December 28, 2012

ለእርቁ እንቅፋት እየሆነ ያለው ማን ነው?

ይድረስ ለደጀ ሰላም፤ መልእክት በእንተ  አቡነ ማትያስ
(ቶላ ገመቺሳ ለደጀ ሰላም እንደጻፉት/ READ IN PDF)፦ የደጀ ሰላምን ድረ ገጽ ከሚከታተሉ አንዱ ነኝ፡፡ ጥሩ የመረጃ ምንጭ እየሆነች  በማገልገል ላይ  ስለምትገኝ ሥራዋን አደንቃለሁ፡፡ መረጃ ቁልፍ መሆኑን እንድንረዳ በተግባር አሳይታናለች፡፡ ስለቤተ ክርስቲያናችን  አጠቃላይ ጉዞ  ጥቂት የማይባሉ መረጃዎችን አቀብላናለች፡፡ በዘወትር አንባቢነቴ እድሜ ይስጥልኝ እላለሁ፡፡ ደጀ ሰላም ባትኖር እነ አባ ሰላማ ብቻቸውን ይፈነጩብን ነበር፡፡ ጉዳዩ ሳይደግስ አይጣላ ሆነና  በመናፍቃን “ብሎግ” ተብዮች አንጻር የእውነተኛ የቤተ ክርስቲያን ልጆችንም ድረ ገጽ  እግዚአብሔር  አዘጋጀ፡፡


ታዲያ በአንድ በኩል ደጀ ሰላም  ይህን የመሰለ የቤተ ክርስቲያኒቱን ልጆች የማንቃት ሥራ እየሰራች ብታስደስተንም አንዳንዴ ግን የአመረጃ ፍልሰት ይሁን ወይም ሌላ  የማይጠበቅ ስህተት ትሳሳታለች፡፡ ከእነዚህም ስህተቶች አንዱን ለማሳያ እነሆ ብያለሁ፡፡ ሰሞኑን  አንድ አውሮፓ ውስጥ የሚዘጋጅ ፓል ቶክ /የፍቅርና የሰላም ቤት/ግልጽ ደብዳቤ ለብፁዕ  አቡነ  ማትያስ በሚል  በዩት ዩብ  አቅርቦ ሰምተነዋል፡፡ ይህ ዝግጅት ብፁዕ  አባታችን  ፓትርያርክ እንዲሆኑ የቀረበላቸውን ጥያቄ እንዳይቀበሉ  የሚመክር ነው፡፡ ወጣቶቹ  ከታማኝ ምንጭ  እንዳገኙት በመጥቀስ/ደጀ ሰላምን ማለት ነው፡፡ መቼም አባ ሰላማን እንደማይጠቅሱ  ተስፋ አደርጋለሁ/ብፁዕነታቸውን ሹመታቸውን እንዳይቀበሉ ይማፀናሉ፡፡ ደጀ ሰላም የፈጠረችው  የመረጃ  መዛባት  ጉልህ  ሆኖ የታየኝ  ይህን ዝግጅት ባደመጥኩ  ጊዜ  ነው፡፡ እውነትም ብፁዕ አቡነ  ማትያስ  በቀረበባቸው መረጃ ምክንያት  ለፈተና መዳረጋቸውን ተረዳሁ፡፡ እናም ይህችን መጣጥፍ ለመላክ ተነሣሁ፡፡

በመጀመሪያ ግን የብፁዕ አቡነ ማትያስን ነገር ትንሽ ያዝ አድርገን በእኔ እይታ የሰሞኑን ነውጥ በቤተክህነት ያስነሣውን አካል ጠቆም ላድርግ፡፡ የሰሞኑ አሳፋሪ  ድርጊት  እየተፈፀመ ያለው እራሱን በከፍተኛ ፍጥነት ወደ ሥልጣን በማስጠጋት ላይ ባለ አንድ ቡድን አማካይነት ነው፡፡ ይህ  ወጣቶች ጳጳሳትን የያዘ  ቡድን  አስቀድሞ ለፕትርክና ይበቃሉ  ያላቸውን ታላላቅ አባቶች በተለያየ ሁኔታ ከጫወታ ውጭ ሲያደርግ  ቆይል፡፡ የሚፈልገውን ለመሥራት  የትኛውንም  አካል  እየቀረበ፣ፍላጎቱ  ሲጠናቀቅ ደግሞ ከየትኛውም አካል ለመለየት የሚፈጥን  ይህ ቡድን ማንን በማን ማጥቃት እንዳለበት  ጠንቅቆ  ያውቃል፡፡ ፍላጎቱን ለማሳካትም እነማንን መያዝ እንዳለበትም ያውቃል፡፡ በዚህም የተነሳ መጣላትም አብሮ መሥራትም ሲፈልግ ያለ ይሉኝታ  ያደርገዋል፡፡ ይህ ቡድን ወደ ሥልጣን ይመጣሉ ብሎ  ከሚፈራቸው አካላት አንዱ ብፁዕ አቡነ  ማትያስ  ናቸው፡፡ ስለዚህም ሰሞኑን እርሳቸውን  ከጨዋታ ውጭ ለማድረግ   የተለያየ  ዘዴ በመጠቀም የብልጠት ሥራ ሲሠራ ቆይል፡፡ ይህም፡- 

1-የምርጫ መስፈርቱን እሳቸውን እንዳያካትት ማድረግ፡፡
የምርጫ  መስፈርትን  የያዘው ረቂቅ ሲቀርብ የታየው  ሁኔታ የዚህን ቡድን  ፍላጎት ግልፅ   ያደረገ  ነው፡፡ በዚህ ረቂቅ ላይ ብፁዕ አቡነ ማትያስ ለምርጫ  እንዳይቀርቡ ለማድረግ  ሁለት ነገሮች ሆን ተብለው ቀርበዋል፡፡ ዜግነት እና እድሜ፡፡ ዜግነት  ሲቀርብ  አቡነ ማትያስን  ጥሎ በቡድኑ  የተዘጋጁ እነ አቡነ እገሌን ለማሳለፍ ጥሩ መስፈርት ይሆናል ተብሎ ታምኖበት ነው፡፡ እድሜም በፍትሐ ነገሥታችን ከተቀመጠው  ውጭ  ከሰባ  ማለፍ የለበትም  የሚል  ሕግ  ረቂቅ የቀረበው ብፁዕነታቸውን ከምርጫ ውጭ ለማድረግ  ይመስላል፡፡

2-ለፕትርክና እንደተጠየቁ አድርጎ ሥማቸውን ማጉደፍ፤
ከላይ  የጠቀስነው  እንዳለ  ሆኖ  ምን አልባት የምርጫ ረቂቁ በታሰበው መልኩ ካልሄደልን  ቅዱስ ሲኖዶስ ሐሳባችንን ከጣለብን ሌላ መንገድ ያስፈልገናል  በሚል  ሌላኛው መንገድ  ተቀየሰ፡፡ ሁለተኛው መንገድ  የብፁዕነታቸውን  ስም  ከመንግሥት ጋር አገናኝቶ  ማጥፋት ነው፡፡ የትግራይ ተወላጅነታቸውን  ግምት  ውስጥ አስገብቶ ሕዝቡ ከመንግሥት ሊገናኙ ይችላሉ ብንለው ያምነናል፣ ይቀበናል በሚል ለፕትርክና እንደተጠየቁ  ወሬ ማናፈስ ተጀመረ፡፡ ደጀ ሰላም  ይህንን  ዘገባ ታገኝበታለች  ወደሚባልበትም  አቅጣጫ  የወሬው  ንፋስ  ነፈሰ፡፡ ከዚያ  በቃ ያሰቡት ተሳክቶላቸው  የብፁዕነታቸው ስም  ጎደፈ ባልዋሉበት ተጠረጠሩ፣ መጪው ፓትርያሪክ ተብለው ሳይመረጡ መንበሩን ተረከቡ፡፡ ብዙ የዋሃን በዚህ የተሳሳተ መረጃ  ተሰናከሉ፡፡ እኔ ይህን ዜና የተሳሳተ ስል ከኢየሩሳሌም እስከ ጠቅላይ ቤተ ክህነት ስለ ጉዳዩ  በቂ የሆነ የመረጃ ቁፋሮ አድርጌ ነው፡፡ እነ አቡነ ሕዝቅኤል ኢየሩሳሌም የሄዱት እርሳቸውን ለማነጋገር አለመሆኑን ከበቂ በላይ መረጃዎች አሉኝ፡፡

ይልቅስ አሁን ትኩረታችን ኢየሩሳሌም ባሉት አቡነ ማትያስ ላይ ከሚሆን እርሳቸውን የማያካትት የምርጫ መስፈርት አውጥቶ ምርጫውን እያጣደፈ ያለው የአዲስ አበባው ቡድን ላይ ቢሆን መልካም ነው፡፡ ለሰላም የተላኩ መልእክተኞች ሳይመለሱ አስመራጭ ኮሚቴ ሠይመው ለምርጫ እየተቻኮሉ ያሉት እኮ  አቡነ ማትያስ አይደሉም፡፡ እርሳቸው የጎደፈ ሥማቸውን ይዘው ኢየሩሳሌም  ተቀምጠዋል፡፡ የአዲስ አበባው ቡድን ግን  ወደ መንበሩ ይጣደፋል፡፡ ይህ ቡድን ለራሱ እንደሚሠራ አሁን አሁን ግልፅ እየሆነ ነው፡፡ ማኅበረ ቅዱሳን ራሱን ያገለለው ለዚህ ይመስለኛል፡፡ ደጀ ሰላምም ሰሞኑን ስለዚህ ቡድን ጥቆማ ሰጥታለች፡፡ ትናንት አመስግነናል ዛሬ ደግሞ ተሳስተው ካገኘናቸው መጻፋችን አይቀርም ዓይነት ስሜት አሳይታለች፡፡ መልካም ጅማሬ ነው፡፡ እንደ እውነቱ ከሆነ በመንፈሳዊ ቤት ውስጥ እንዲህ ያለ ድራማ መሥራት ያሳዝናል፡፡ እግዚአብሔር ሳያስቀምጥ ይህንን  የቅዱሳን አባቶች መንበር እና ሥልጣን  በእጅ ለማድረግ መቸኮል በእጅጉ ይገርማል፡፡

ቀጥለን ወደ ብፁዕ አቡነ ማትያስ እንመለስ፡፡ ብፁዕነታቸው በተለይ በሰሜን አሜሪካ ያለውን የእናት ቤተ ክርስቲያን እንቅስቃሴ ያስጀመሩ የጀመሩ አሁን ካለበት ደረጃም  እንዲደርስ ትልቅ አስተዋጽኦ ያደረጉ ታላቅ አባት ናቸው፡፡በየፍርድ ቤቱ ብቻቸውን በመንከራተት  የኢትዮጵያ ቤተ ክርስቲያንን  መብት ለማስከበር የደከሙ አባት ናቸው፡፡ ዛሬ ላይ ተጠናክሮ በየሥፍራው ተስፋፍቶ የምናየው የሀገረ ስብከት እንቅስቃሴ እዚህ እንዲደርስ የደከሙትን ድካም የሚያስታውሱት ሁሉ ሊናገሩት ይችላሉ፡፡ ሰሜን አሜሪካ በተለያየ አህጉረ ስብከት ከመከፋፈሉ በፊት ብቻቸውን ይህን ሁሉ ስቴት አዳርሰዋል፡፡ ከአንድ አባት የሚጠበቀውን መንፈሳዊ ተግባር ዘመኑ በፈቀደላቸው መጠን በሚገባ አከናውነዋል፡፡ ከወጣቱ ወጣት ከአረጋውያን  አረጋው  ሆነው የሚገለግሉ እኝህ አባት ንጽሕናን ከመጠበቅ አንጻር፣ በፍቅረ ነዋይ፣ በዘረኝነት የሚታሙም አይደሉም፡፡ ከእውነተኛ የቤተ ክርስቲያን ልጆች ጋር ሁሉ የሚተባበሩ መሆናቸውንም በቅርበት የሚያውቃቸው ሁሉ ያውቁታል፡፡ የጸሎት አባት፣ በመንፈሳዊውም በሥጋዊውም እውቀት የበለጸጉ አባት ናቸው፡፡ ብፁዕነታቸው  ባለፈው ዘመን ቤተ ክህነት ውስጥ የነበረውን የተበላሸ እንቅስቃሴ በመቃወምም ረገድ የሠሩትን ሥራ የቤተ ክህነቱ ሰዎችም ይመሰክሩታል፡፡ ሰው ይውደደኝ ቡድን ለአደራጅበት ብለው ሳይሆን ስለ እውነት የቆሙ በመሆናቸው ብቻ መቃወም የሚገባቸውን ሲቃወሙ ቆይተዋል፡፡

ምን አልባት በተሐድሶ አራማጆች ዘንድ  ይጠሉ ይሆናል፡፡አንዳንድ የተሐድሶ አራማጆች በብሎጋቸው  የእርሳቸውን ነገር እያነሱ ሲጥሉ የምናየው ለዚህ ነው፡፡ የቤተ ክርስቲያን ልጆች ግን  ለኚህ ትልቅ አባት ፍቅር እና አክብሮት አለን፡፡ ያልሆነ  ሥም ሲለጠፍባቸውም ዝም አንልም፡፡ ምርጫው በትክክል ይፈፀም መንግሥት ጣልቃ አይግባ ጥሩ ጥያቄ ነው፡፡ እርሳቸውን ባልዋሉበት ማማት ግን ሌላ ነገር ነው፡፡ እኚህ አባት በትክክለኛ መንገድ ተመርጠው ቦታው ላይ መቀመጥ እንዳይችሉ የመመረጥ መብታቸው  እንደተገፈፈ  አስተውሉ፡፡ ግን ለምን? ባልዋሉበት ውለዋል ብሎ ይህንን ሥም ለብፁዕነታቸው መስጠት ተገቢ ነው ብላችሁ ታስባላችሁ? ደጀ  ሰላሞችም  እባካችሁ ብፁዕ አቡነ ማትያስን ለቀቅ የአዲስ አበባውን ቡድን ጠበቅ አድርጉ፡፡ መንግሥትም  ገብቶበት ከሆነ ለምን  ብለን እንድንጠይቅ  መረጃውን  በቶሎ አድርሱን፡፡ ከምርጫ በፊት እርቀ ሰላም  እንዲቀድም ድምጻችንን ከየሥፍራው እንድናሰማ ዘዴውን ጠቁሙን፡፡
                                                                             ለሁሉም ቸር ያሰንብተን፡፡
      

            
            
          

12 comments:

Anonymous said...

የአንድነቱ ነገር ተረሳና ማንን እንሹም ወደማለት ተገባ እንዴ? ይገርማል! የኢትዮጵያ ኦርቶዶክስ ተዋሕዶ ቤተ ክርስቲያን የሰላምና አንድነት ልዑካን በደኅንነቶች እየታደኑ፤ ቤተ ክርስቲያን አንድት ትሁን በማለታቸውና የሁላችንን ጥያቄ በመጠየቃቸው ዝም በሉ ሲባሉ? ሊቃነ ጳጳሳቱ በንቡረ እድ ኤልያስ/ የደኅንነት አባል/አማካይነት ተገደው ወደ አሜሪካ ኢምባሲ ተወስደው ከማስፈራሪያ ጋር የሰላም ጉባኤውን አውግዘው ካልሄዱ መግቢያ እንደ ሌላቸው ተነግሯቸው ከሁለት ቀናት ሙግት በኋላ በያማያምኑበት መግለጫ ላይ እንዲፈርሙ መደረጉ እየተነገረ ነው፤ አንድ ሁነን መነሣት እንጅ የሚያስፈልገን እገሌ ይሁን እግሌ ይሁን ለማለት እንደኔ ጊዜው አይደለም፤ እረ የሰው ያለህ!
በእንተ ማርያም መሐረነ ክርስቶስ።

Kebede Bogale said...

ፀሓፊው ስለ ብፁዕ አቡነ ማትያስ የሰጡት አወንታዊ የምስክር ቃል እኔም እኒህን አባት ስለማውቃቸው በተሰጠው ምስክርነት አልስማም። አቡነ ማትያስ ዛሬ ካለው መንግሥት ጋር የጠበቀ ግንኙነት ያላቸው ለመሆኑ የሚጠራጠር ካለ የሥራቱ ተጠቃሚ የሆነ ሰው ብቻ ነው ። ገና የዛሬዎቹ ገዢዎች ጫካ በነበሩበት ጊዜ ጀምረው ነበር ግንኙነት የመሠረቱት። ለዚህም የሥጋ ወገኖቻቸው ደርግን ጥለው አዲስ አበባን እንደተቆጣጠሩ ነበር በድብቅ የነበረውን ድጋፋቸውን ይፋ ያደረጉት። ለዚህ የበለጠ መረጃ የሚፈልግ ካለ የአትላንታ ቅድስት ማርያምን ምዕመናን ምን እንዳደረጉኣቸው መጠየቅ ነው። እኔም አንዱ ሳምናቸው የከዱኝ የርሳቸው ስቃየኛ /victim ነበርኩ። አቡነ ማትያስ እኔም የእኛም አባት መስለውኝ የዘመኑ ኢትዮጵያዊ ዳንኤል እያልኩ አወድሳቸው ነበር። ልዩ አክብሮትና ፍቅርም ነበረኝ። ነገር ግን ወያኔና ሻብያ እናት አገራችን ኢትዮጵያን እንደ ቅርጫ ሥጋ ሲከፋፈሏት እኛ ልጆቻቸው ቀኑ ጨልሞብን የሚያጽናናን አባት እየፈለግን በየአደባባዩ ስንላቀስ እርሳቸው ቤተ ክርስቲያናችን ድረስ መጥተው በማቴዎስ ወንጌል ስም የመንግሥታቸውን የድጋፍ መግለጫ በቅስቀሳና ፕሮፓጋንዳ መልክ ነበር ያቀረቡልን። ፓትርያርክ እሆናለሁ ብለው አስበው የነበሩትም ያኔ ነው። በአሜሪካ ያሉትን በስደተኛው ሕዝብ የተቋቋሙትን አብያተ ክርስቲያናትም በመንግሥታቸው ስር እንዲሆኑ ኣወ ታግለዋል። በዚህም ምዕመናን ከፋፈሉ እንጅ አንድ አላደረጉም። እናት ቤተ ክርስቲያንን በሕገወጥ አመራር ሥር ስትወድቅ ዋናው ተባባሪ ሁነው ሠርተዋል። ባጭሩ አቡነ ማትያስ ኣሁን ያለው መንግሥት ታማኝ አግልጋይ ናቸው እንጅ ለቤተ ክርስቲያን አንድነትና ፍቅር የሚቆረቆሩ አባት ላለመሆናቸው ባለፉት 21 ዓመታት የሠርዋቸው ሥራዎቻቸው ዋና ምስክሮች ናቸው። የበለጠ እንዳልኩት በአትላንታና ዲሲ አካባቢ የሚኖሩትን ምዕመናን ጠይቆ መረዳት ይቻላል። እኔም ማንነቴን ሳልደብቅ ነው ይችን አስተያየት የምሰጠው። ብፁዕ አባታችንም ቢሆኑ ማንነቴን በደንምብ ነው የሚያውቁት።

Muluken Abera said...

I'm confeused which one is true,God bless Great Ethiopian Orthodox church!!.

Anonymous said...

በአሁኑ እጅግ አደገኛ በሆነው ሠዓት ካህናትና ምእመናን ያገባናል ብለው የተረባረቡበት አንገብጋቢ ጉዳይ ዕርቀ ሰላም እንዲቀድምና የቤተ ክርስቲያኒቱ አንድነት ተመልሶ በፍቅር እንዲታነጽ ነው። የአቡነ ማትያስ ማንነት አይደለም። ስለዚህ ትክክሉን ዓላማ ለማስቀየር የሚሞክሩ ብዙ ፈተናዎች እንደሚደርሱ በመገንዘብና በመጠንቀቅ ቢያንስ ለሚከተሉት ሳምንታትና ወራት ዕርቀ ሰላምን ለማምጣትና የቤተ ክርስቲያኒቱን አንድነት መልሶ ለመመሥረት በሚጠቅሙ በገንቢ ሀሳቦች ላይ ማተኮሩ ይበጃል።

Anonymous said...

ato kebede bogale

What your write is a complete lie. We at Atlanta, knows Abune Matias and we have no problem with him. You just fabricated a story.

You didn't mention any fact other than lies. I don't know your motive, but i can guess you are one of the "problem creators" that doesn't want to see our church unite.

Anonymous said...

አቶ ከበደ . ውሸት ሲባል እንዲህ ነው እንዴ? የግል ጥላቻ ካለብዎ ሌላ ነገር ነው፣ እንዲህ ዓይንት ፈጠራ መጻፍ ግን ነውር ነው። እኛ የአትላንታ ማርያም ም ዕመናን በሳቸው የተነሳ ምንም የደረሰብን ችግር የለም። ማንበብ አልቻሉ ይሆናል እንጂ . በአዲሱ የፓትርያርክ ምርጫ ህግ እኮ እሳቸው የሉበትም ነው ጸሃፊው ያሉት። እንዴ? አይገባዎትም ወይስ እንዲሁ የመጻፍና የመሳደብ ሱስ ስላለብዎ ነው?

ሰይጣን ሆይ ወግድ !

Anonymous said...

የፖለቲካ ስሜታችን እንዋጠዉ ለፓትሪያርክ መላእክ አይመጣም ካሉት አባቶች ዉስጥ ይሆን ዘንድ ግድ ነዉ ምንም ተቃዋሚ ብንሆን እኝህ አባት ተቃዋሚ ሆነዉ ለብጽዕና ካበቃቸዉ መንበር ከዕናት ቤ/ክ ምንም ይሁን ምን ዛሬ በዉጭ ያሉ አባቶች ለፈጠሩት ችግር ተባባሪ መሆን ነበረባቸዉ የምንል አይመስለኝም ሌላዉ ከዘር አቅጣጫ የምናይ ሰዎች ችግሩ መንግስት ላይ ብቻ አንለጥፍ እኛም ተመሳሳይ ግልባጩ ነን እስቲ ቆም ብለን እናስብ አባ ጊዮርጊስ ዘጋስጫም ቢመጣ ትግሬ ነዉ አቡነ አረጋዊም ቢመጡ የትግሬ ወዳጅ ናቸዉ የምንል ከወያኔ የባስን ጭፍን ጠይና ጭፍን ዘረኞች ለሰላሙም ይሁን ለፓትሪያርክ ምርጫዉ በጣም ችግር እንደሆኑ ልናስተዉል ይገባል

Anonymous said...

እኔስ ሰው አማረኝ
እኔስ ሰው አማረኝ የሃይማኖት ጀግና
ፈሪሃ እግዚአብሔር ያለው በዕምነቱ የጸና
ለአንድነት የሚሞት ፤ ለኔ ለኔ ማይል ለኛ የሚያደላ
አደራን ጠብቆ ለትውልድ ለማውረስ ከቶ ማይል ችላ
ቀኖናዋ ሲጣስ አይዞሽ ሚላት ጠፍቶ
በሥጋዊ ሃሳብ በሌላም በሌላ ሁሉ ተለያይቶ
ስንት እንዳልወለደች ስንት እንዳላቀፈች
ወራሽ በማጣቷ ቅድስት ቤተክርስቲያን ምነው ትለናለች።
ለቀረበው ጥሪ መልሳችን ምንድን ነው?...
ለኔ ማለት ትቶ ለተተኪው ትውልድ ትውፊት ማከማቸት
ወይስ ዛሬን በልቶ ለነገ አለማሰብ ላንድያው መረሳት?
የሥልጣን አባዜ የተጠናወተው
ኅብረቷ አንድነቷ የማያስጨንቀው
የመንጋው መበተን ከቶ የማይደንቀው
ቀሚስ አንዘርፎ “አስኬማውን” ደፍቶ አባት ነኝ ከሚለው
ነጭ ለባሹም ቢሆን አማኝ ነኝ ከሚለው
ለሰላም እንቅፋት አቡሃ ለሀሰት የናቱን ጡት ነካሽ የትየለሌ ነው።
እኔስ ሰው አማረኝ ተዋሕዶ ጀግና
ፈሪሃ እግዚአብሔር ያለው በዕምነቱ የጸና
አደራን ጠብቆ ለትውልድ ለማውረስ የሚል ደፋ ቀና።
በጥይት ሩምታ ያኔ የሞትክላት
ቀድስት ቤተክርስቲያን እምዬ የኔ እናት
ዛሬ ባገር በቀል ህመም ላትድን ጣር ላይ ናት።
ጴጥሮስ ብትንሣ መቃብር ፈንቅለህ
ሁሉን ብትታዘብ አንዴ ቀና ብለህ
እናትህ ስትጮህ ብላ የልጅ ያለህ
ከቶ ባንተ ዘመን ሊታሰብ የማይችል ስንት ጉድ ታያለህ።
በጀግና እግር ጀግና ቢተካ ምን አለ?
የታሪክ ድግግም አንዳንዴም እኮ አለ

በርግጥ!
በግልባጭ አመድ ከእሳት ይወለዳል
ከመልካም ስንዴም ጋር እንክርዳድ ይበቅላል
እስከ ጊዜው ድረስ ከሰብሉ ጋር ያድጋል
በመከር ጊዜ ግን ከምርቱ ይለያል
በመንሽ ተበጥሮ ወደ እሳት ይጣላል።
የእኛ ዕጣስ የቱ ነው?
ምግባር ከሃይማኖት አስተባብሮ ይዞ ለክብሩ መታደል
ወይስ መጅ ታስሮብን ወደ ጥልቁ መጣል?
ዓለምን ብታተርፍ ብተገዛ ብትነዳ
እስኪ ምን ተረፈህ ነፍስህ ከተጎዳ?
እንዲመለከትህ ጉዳዩን ተረድተህ
ለእምነትህ ፅናት ምን ላበርክት ብለህ
የቤተክሲያን ጉዳይ ጉዳዬ ነው ብለህ
ብኩርናህን አትጣል ለምስር ወጥ ብለህ
አምነህ ተሰማራ ለዕውነት ለአንድነት ቅናት ይደርብህ።
አልተማርክ ይሆን ወይ ወንጌል በጥሞና
ማን ያውቃል እንደሆንክ አውቆ አበድ አውቆ አጥፊ አንገተ ደንዳና
ፊትና ኋላህን ግራ ቀኝህን እየው ልብ አርግ እንደገና
ሰሎሞን ነግሮሃል መንግሥት ተከፋፍላ ከቶ እንደማትፀና።
ጥልን ክርክርን ለሥጋ ማድላትን ዛሬ ካላስወገድህ
ለፈጸምከው በደል በሕይወተ ሥጋ ንስሐ ካልገባህ
የአዳም ዘር ነህና አይቀርም ማለፍህ ፍርድ ፊት መቅረብህ
ዋይ! ለኔ ብያለሁ በኋላው ትንሣኤ ማጣፊያ እንደያጥርህ።
ጥንት ካባቶቻቸን ትውፊት የወረስነው
ተጽፎ ያየነው በቃል የሰማነው
ዘላለማዊ ክብር አክሊል ሚያቀዳጀው
መለያየት ትተን በተዋሕዶ ጥላ በፍቅር መኖር ነው።
እኔስ ሰው አማረኝ የተዋሕዶ ጀግና
ፈሪሃ እግዚአብሔር ያለው በዕምነቱ የጸና
አደራን ጠብቆ ለትውልድ ለማውረስ የሚል ደፋ ቀና።
የእናት ቤተክርስቲያናንን አንድነቷን ይጠብቅልን!!!
ከ ራማ ዘ - ቶሮንቶ/ ካናዳ።

Anonymous said...

I am not ok with this article. The content of the article is divisive (even the name of the writer sounds fake). Personally, I am coming here to get some unbiased info about the church. Articles posted here should reflect the views of dejeselam unless you have some a hidden agenda behind.

Anonymous said...

ከላይ ከበደ ቦጋለ ስለ አቡነ ማትያስ የጻፈው ስላልተዋጠላችሁ ከበደን ወረዳችሁበት:: በርግጠኝነት እናንተ ስለ ከበደ ጽሁፍ ውሸታምነት የጻፋችሁ ሰዎች ከአትላንታ አይደላችሁም:: አትላንታን አታውቁትም እንዲያውም:: ከበደ ቦጋለን ግን ጆርጂያ አትላንታም ባይሆን ቢያንስ እዛው አሜሪካ ነዋሪ መሆኑንና ለቤተክርስቲያን አንድነት በሚገባ የሚቆረቆር ንጹህ የተዋህዶ ልጅ መሆኑን ደጋግሞ በሚጽፈውና እሱ ባለበት አካባቢ ከሚኖሩ ሰዎች እናውቃለን:: አሁንም በግልጽ በስሙና በራሱ ኢ-ሜይል ነው ፖስት ያረገው:: እናንተ ግን ስማችሁን እንኳን ሳትናገሩ ነው ሁላችንም የምናውቀውን ሰው የወረዳችሁበት:: ማስተዋል የሚችል ሰው ውሸታሙ ከበደ ሳይሆን እናንተ መሆናችሁን ለማወቅ ምንም መረጃ አያስፈልገውም:: ለማንኛውም አሁን ስለግለሰብ (ስለ አንድ ጳጳስ) በመነጋገር ጊዜ አታቃጥሉ:: ጉዳያችን የፓትርያርክ ምርጫ አይደለም ሰላምና አንድነት ብቻ ነው:: ቤተክርስቲያን ፓትርያርክ ባይኖርም እንኳን በአቃቤ መንበር ለረጅም ጊዜ መቆየት ትችላለች:: አሁን የምንፈልገው ሰላምና አንድነት ብቻ ነው:: ማንም ይሁን ማን ከዚህ በኋላ አቡነ መርቆሬዎስ በህይወት እያሉ የፓትርያርክነትን ስልጣን የሚቀበል ማንኛውም ጳጳስ ወይም መነኩሴ ከይሁዳ የከፋ ይሆናል:: አቡነ መርቆሬዎስ እንኳን 'እኔ አልፈልግም ሌላ ሰው ፓትርያርክ መሆን አለበት' ማለት አይችሉም:: ይህ የቤተክርስቲያን ስርአት ነው:: እሳቸው ማስረከብ የሚችሉት (አልችልም ማለት የሚችሉት) የአስተዳደር ጉዳዮችን እንጂ ፓትርያርክነትን አይደለም:: ቅዱስ ሲኖዶሱ ለአስተዳደር ጉዳዮች ሌላ እንደራሴ መሾም ይችላል:: ሌላ ፓትርያርክ ግን ማንም ማን መሾም አይችልም:: ስለዚህ እባካችሁ አቡነ ማትያስንም: አቡነ ጎርጎርዮስንም: ሌሎች ስልጣን ፈላጊ ጳጳሳትንም ተዋቸው:: አሁን ስለ ሰላምና አንድነት ብቻ ይሁን ንግግራችን:: ደጀ ሰላምም አሁን ፖስት ያረግሽውን ስለ ግለሰብ የሚወራ አይነት ጽሁፍ በዋናው ገጽሽ ላይ ባታስተናግጅ መልክም ነው:: የሰላም አምላክ እግዚአብሔር ሰላሙን ያድለን::

H.mariam

Kebede Bogale said...

እግዜብሔር ይስጥልኝ ከላይ እኔን በውሸታምነት የወነጀሉኝን ወገኖች የተከላከሉልኝ ወገኔ። እኔ አትላንታ ጆርጅያ በፈረንጆች አቆጣተር ከ1987 እስከ 1991 ዓ.እ ነበርኩ። የመጀመሪያውን ቤተ ክርስቲያን ከመሠረቱት ሰዎች አንዱ እንደሆንኩ አሁን ያሉት ምዕመናን ያውቃሉ። 10ኛውን የምሥረታ መታሰቢያም ሲያከበሩ ጠርተውኝ ሂጃለሁ። አቡነ ማትያስ እኔ አትላንታን ከለቀኩ በኋላ ቤተ ክርስቲያኗን ባገር ቤቱ አመራር ስር ለማድረግ በፍርድ ቤት ከሰው ተሸንፈውና አፍረው እንደተመለሱ ሰምቻለሁ። ቤተ ክርስቲያኗ አሁንም ቢሆን በጣም አድጋና ተስፋፍታ መንበረ ሊቀ ጳጳስ ሁና ፤ በብዙ ካህናትና ምዕመናን አገልግሎት እየተሰጠባት ትገኛለች። እኒህ ወገኔ እንዳሉት እኔ ማንነቴን ሳልደብቅ ነው ለሚፃፉት ነገሮች የማውቀውን አስተያየት የምሠጠው እንጅ እኔን ውሸታም እንዳሉት ወገኖች ማንነቴን በጨለማ ውስጥ ደብቄ አይደለም። እኔ ከእግዚአብሔርና ከእውነት በላይ ማንንም አልፈራም። አላከብርምም። ለዚያም ነው ማንነቴን የማልደብቀው። ያስጠጋኝ አገርም የመናገርና የመፃፍ ነፃነት የማይገደብበት አገር እንጅ፥ የብፁዕ አቡነ ማትያስ የሥጋ ወገኖች በሚገዟት ኢትዮጵያ እንደሚኖሩት ወገኖቻችን በመናገሬና በመጻፌ "አሸባሪ" ተብየ እድሜ ልክ እስራት ይፈረድብኛል ብየ በማልፈራበት አገር ውስጥ ነው የምኖረው። ደጀ ሰላም የግለሰቦችን ጉዳይ ማውጣት የለባትም ስለተባለው ነግርም አልስማማም። ይህ የተራ ግልሰብ ጉዳይ አይደለም። በወሳኝ ቦታና ዘመን እንዲሁም ሁኔታ ውስጥ ስላሉ "የቤተ ክርስቲያን አባት" ጉዳይ እንጅ። የምንነጋገረው ስለቤተ ክርስቲያን ጉዳይ ስለሆነ ደጀ ሰላምም ከዚህ ውጭ የሆነ ነገርን እስካሁን ስታስተናግድ አላየሁም። ስለዚህ በያዘችው እንድትቀጥል ነው በበኩሌ የማበረታታው። የቤተ ክርስቲያናችን የትምህርትና የመረጃ ማዕከል ሁና እንደምትቀጥልም ተስፋ አደርጋለሁ። ደጀ ሰላማውያን ለእውነት ቁመው እውነትን እስካስተናገዱ ድረስ ፤ ሁሉን ማድረግ የሚችለው ዋናው የቤተ ክርስቲያን ራስ ፥ ጌታችን ፥ አምላካችንና መድኀኒታችን ኢየሱስ ክርስቶስ ብቸኛው መመሪያ ሰጭያቸውም ሁኖ እንደሚመራቸው አልጠራጠርም ።

Anonymous said...

U r politician. ante smetawi athun ,,yqr mebabalu ,yshalenal ,qimegnoch anhun shabya & weyane demo mn ametaw
sle andnet bnasb yshalal.

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)