December 22, 2012

ከኢትዮጵያ ኦርቶዶክስ ተዋሕዶ ቤተ ክርስቲያን የሰላምና አንድነት ጉባኤ የተሰጠ ወቅታዊ መግለጫ።


ወነአምን በአሐቲ ቅድስት ቤተ ክርስቲያን፤ በአንዲት ቅድስት ቤተ ክርስቲያን እናምናለን።”
      (DEC. 21/2012 ታኅሣስ 12/2005 ዓ/ም/ PDF):- በዚህ ታሪካዊ የዕርቀ ሰላም ንግግር ላይ ከኢትዮጵያና ከአሜሪካ በቅዱስ ሲኖዶስ ምልዓተ ጉባኤ ተሰይመው የተላኩት ልዑካን በፍጹም መከባበር ስለ ቅድስት ቤተ ክርስቲያናችን ሰላምና አንድነት በስፋት ተወያይተዋል።

በውይይቱም ወቅት ሁለቱም ወገኖች ከላካቸው አካል ይዘውት የመጡትን መሠረተ ሐሳብ በሰፊው የተነጋገሩበት ሲሆን የብፁዕ ወቅዱስ አቡነ መርቆሬዎስ ወደ አገራቸው መመለስ ለዕርቀ ሰላሙ ስኬታማነት ዋነኛ መሠረት መሆኑን በጋራ ተስማምተዋል። ይሁን እንጂ በኢትዮጵያ ልዑካን በኩል የቀረበው ዋና ሐሳብ “ብፁዕ ወቅዱስ አቡነ መርቆሬዎስ ወደ ቅድስት አገራቸው ገብተው፣ ክብራቸው ተጠብቆና የሚያስፈልጋቸው ሁሉ ተሟልቶላቸው እርሳቸው በፈለጉት ቦታ ይኑሩ”፤ የሚል ሲሆን የዚህ ፍሬ ሐሳብ አመክንዮ ደግሞ ብፁዕ ወቅዱስ አቡነ መርቆሬዎስ ወደ መንበራቸው ቢመለሱ ታሪክ ይፋለስብናል የሚል ነበር። 

በአንጻሩ ደግሞ በውጭ አገር ያሉት ልዑካን ለቅድስት ቤተ ክርስቲያናችን ሰላምና አንድነት ሲባል “ቅዱስነታቸው ከነሙሉ ሥልጣናቸው ወደ መንበራቸው መመለስ አለባቸው” ሲሉ አያይዘውም ፓትርያርክ እያለ ሌላ አዲስ ፓትርይርክ መሾም ነገም በቤተ ክርስቲያን ላይ ሥርዓት አልበኝነት እንዲስፋፋ ይደርጋል፤ ቅዱስ ፓትርያርኩ በሕይወት እያሉ በማን አለብኝነትና በግድ የሌሽነት የሚሾመውም ሰው ፍጹም ተቀባይነት አይኖረውም፤ ይልቁንም ሹመቱ የቤተ ክርስቲያኒቱን  አንድነት ፈጽሞ ያጠፋል፣ ልዩነቱንም ያከፋዋል የሚል ነበር። ስለዚህ ልዑካኑ ልዩነት በታየባቸው መሠረታዊ ሐሳቦች ላይ አሁን በራሳችን ለመወሰን ከአቅማችን በላይ በመሆኑ ሰይሞ ወደላከን አካል ተመልሰን ጉዳዩን በስፋት አስረድተን እንደገና የምንገናኝበትና የዕርቀ ሰላሙን ውይይት የመጨረሻ ምዕራፍ የምናደርስበት ቀጣይ አራተኛ ጉባኤ በቅርቡ ያስፈልገናል ሲሉ ለሰላምና አንድነት ጉባኤው ሐሳባቸውን አቅርበዋል። ጉባኤው ከልዑካኑ በቀረበለት ጥያቄ መሠረት አራተኛው ጉባኤ ከጥር 16-18 ቀን 2005 ዓ.ም (Jan 23-26/2012) በሎስ አንጀለስ፤ ካሊፎርኒያ እንዲካሔድ ሐሳብ አቅርቧል፤ የሰላምና አንድነት ጉባኤው ያቀረበውን ሐሳብ  የሁለቱም ወገን  ልዑካበአንድ ድምፅ ተቀብለው ተስምተውበታል። የኢትዮጵያ ኦርቶዶክስ ተዋሕዶ ቤተ ክርስቲያን የሰላምና አንድነት ጉባኤ የግራ ቀኙን ፍሬ ሐሳብ በጥሞና አዳምጦና ጉዳዩንም በጥልቀት መርምሮ ለቅድስት ቤተ ክርስቲያናችን ሰላምና አንድነት ሥምረት ይበጃል ብሎ ያመነበትን ባለ አራት ነጥብ የመፍትሔ ሐሳብ ለልዑካኑ በጽሑፍ አቅርቧል።

የሰላም ልዑካኑም በንባብ የቀረበላቸውን የመፍትሔ ሐሳብ በጥሞና ካዳመጡ በኋላ እኛ ወሳኝ አካላት ባለመሆናችን በሁለታችንም በኩል በቅርቡ አስቸኳይ የቅዱስ ሲኖዶስ ምልዓተ ጉባኤ እንዲደረግና የሰላምና አንድነት ጉባኤው ሦስት ሦስት ልዑካንን ወደ ሁለታችንም ልኮ የመፍትሔ ሐሳቦቹን ለቅዱስ ሲኖዶስ ምልዓተ ጉባኤ አቅርበው እንዲያስረዱና ተገቢው የማግባባት ሥራ እንዲሠሩ እንዲደረግ በፍጹም ቅን ልቡና አስተያየታቸውን በመስጠት በወርኃ ጥር በሚካሔደው የዕርቀ ሰላም ጉባኤ የመጨረሻ ውሳኔ እንዲሰጥበት ሲሉ ስምምነታቸውን በአጽንዖት ገልጸዋል። ከዚህም ጋር የዕርቀ ሰላሙ ድርድር ከፍጻሜ እስከሚደርስ ድረስ በሁለቱም በኩል ለሰላምና አንድነቱ ሒደት እንቅፋት የሚሆኑ ማናቸውንም ድርጊቶች ከመፈጸም በተለይም ደግሞ ሢመተ ኤጲስ ቆጶሳትና ሢመተ ፓትርያርክን የመሰሉ ተግባራትን ከማከናወን እንዲቆጠቡና በትዕግሥት እንዲጠብቁ በጋራ ተማምነውና ተስማምተው በፊርማቸው አረጋግጠዋል። ይሁን እንጂ በኢትዮጵያ ያሉት አባቶች ሰይመው የላኳቸው የሰላም ልዑካን እንኳን ገና ወደ ኢትዮጵያ ሳይመለሱ፣ የዕርቀ ሰላሙን ውይይት ሪፖርት ሳያቀርቡና በቀጣዩ ጉባኤ አበው ላይ በጋራ የሚመከርባቸውን ዐበይት ጉዳዮች ሳያቀርቡ ኃላፊነት በማይሰማቸውን የመንጋው እንባና ጩኸት በማይገዳቸው ጥቂት የሲኖዶስ አባላት ግፊት አስመራጭ ኮሚቴ መሰየሙ ከትናንት በስቲያ በመሰማቱ የሰላሙ ሒደት ከፍተኛ እንቅፋት ገጥሞታል። የቤተ ክርስቲያን የአንድነት ተስፋም እንዲጨልም እየተደረገ በመሆኑ በእጅጉ አዝነናል።

የሰላምና አንድነት ጉባኤውን የሦስት ዓመት ጥረት ዋጋ ለማሳጣት  ጥረት በሚደርጉ ጥቂት የቅ/ሲኖዶስ አባላት ጉባኤው በእጅጉ አዝኗል፤ የኢትዮጵያ ኦርቶዶክስ ተዋሕዶ ቤተ ክርስቲያን የሰላምና አንድነት ጉባኤ በእኒህ ጥቂት ግለሰቦች አማካይነት አባቶች ቤተ ክርስቲያንን ወደከፋና መፍትሔ ወደማይገኝለት ችግር እዳያስገቧት ከፍተኛ ሥጋት አድሮበታል። ይልቁንም የቤተ ክርስቲያንን የሰላምና የአንድነት በር ለመዝጋት ከመጣደፍ  እንዲታገሡና ወደማስተዋል እንዲመለሱ በቤተ ክርስቲያን አምላክ ስም በአጽንዖት እናሳስባቸዋለን። ይልቁንም የሀያ ዓመታቱ የልዩነት ችግሩ ሳይፈታ ሌላ ፓትርያርክ መሾም የኢትዮጵያ ኦርቶዶክስ ተዋሕዶ ቤተ ክርስቲያንንና በሚሊዮኖች የሚቆጠሩትንና በመላው ዓለም የሚገኙትን ኦርቶዶክሳውያን ካህናት፣ ምእመንና የሰንበት ት/ቤት ወጣቶችን የመከራ ቀን ማራዘምና የክርስቶስን መንጋ ከመበተን ያለፈ አንዳችም ፋይዳ እንደማይኖረው እየታወቀ እኔ ያልኩት ካልሆነ የሚለው ኢቀኖናዊ አመለካከት ሊታሰብበት ይገባል። ስለሆነም ሰላምና አንድነት የራበው፣ ፍቅርና መተሳሰብ የጠማው፣ መለያየት የሰለቸው መላው ሕዝበ ክርስቲያን ድምፁን አሰምቶ እያለቀሰና እየጮኸ በማን ላይና ለማንስ ነው አባት የሚሾመው! አሁንም አባቶች የሕዝባቸውን ድምፅ በማስተዋል እንዲሰሙ በአጽንኦት እንጠይቃለን።
በመሠረቱ ሰላምና አንድነት የማንንም ክብርና ታሪክ አያጎድፍም፤ ይልቁንም የአባቶችን ሕልውናና ክብር የሚሽረው ሕያው ታሪካቸውንም የሚያጠፋው ሰላም ባጣችና በተከፋፈለች ቤተ ክርስቲያን ውስጥ መኖር ነው። በመሆኑም አባቶቻችን ላከበረቻቸው ቤተ ክርስቲያን ዋጋ ሊከፍሉ፣ ለአንድነቷና ለክብሯ ፍጹም ጸንተው ሊቆሙና ስለ ነገውም ትውልድ ሊያስቡ ሲገባቸው አለመታደል ሆነና እያየንና እየሰማን ያለነው ግን የተገላቢጦሽ ነው። “የአባቶችን ልጅ ለልጆች፥ የልጆችን ልብ ለአባቶች” ተብሏልና። አባቶች አደራቸውን ለመወጣት ጥረት ሊያደርጉና ለቤተ ክርስቲያን አንድነትና ሰላም ተግተው ሊሠሩ ሲገባ የቤተ ክርስቲያንን የሰላምና አንድነት በር ለመዝጋት የሚተጉ ጥቂት ሊቃነ ጳጳሳት ታላቋን ቤተ ክርስቲያን ወደ ከፋ የችግር አዘቅት ውስጥ ለማስገባት ሲታገሉ ማየት ለቤተ ክርስቲያን ልጆች ሁሉ በእጅጉ የሚያሳፍር ሆኗል። የሊቃነ ጳጳሳቱንም የአመራር ብቃትና የቅዱስ ሲኖዶስን አርቆ አሳቢነትም ጥያቄ ውስጥ አስገብቶታል።

ጥንታዊት ሐዋርያዊት የሆነችው የኢትዮጵያ ኦርቶዶክስ ተዋሕዶ ቤተ ክርስቲያን በዘመናችን በታላቅ ፈተና ላይ ናት። ላለፉት 21 ዓመታት ያንገላት ልዩነት እንዲወገድና ለዘለዓለም በአንድነቷ እድትጸና ማድረግ ሲገባ ልዩነቱ ህልውናዋን እንዲፈታተን  የሚያደርግ ተግባር እየተካሄደ በመሆኑ ሁላችንም ስለቤተ ክርስቲያናችን ዝም ልንል አይገባም፣ ልዩነት ሰልችቶናል፣ አባቶቻችው እንተወጋገዙና ሕዝባቸውን እንደበተኑ ሲያልፉ ማየት ሰልችቶናል፤ የተከፋፈለችን ቤተ ክርስቲያን አባቶቻችን አላወረሱንም፤  እኛም የተለያየች ቤተ ክርስቲያንን ለትውልድ ልናስተላልፍ አይገባም እንላለን። ከ40 ሚሊዮን በላይ የሁነው የኢትዮጵያ ኦርቶዶክስ ተዋሕዶ  ሕዝበ ክርስቲያን በጥቂት አባቶች አለመግባባት ምክንያት ለልዩነትና ለሰላም እጦት ሊጋለጥ አይገባውም፤ ስለዚህ የቤተ ክርስቲያኑ  ጉዳይ የማይመለከተው የቤተ ክርስቲያን ልጅ የለምና በመላው ዓለም ለሚገኙ የኢትዮጵያ ኦርቶዶክስ ተዋሕዶ ቤተ ክርስቲያን ሊቃነ ጳጳሳት፣ካህናት፣ ሕዝበ ክርስቲያን፣ የሰንበት ትምህርት ቤት ወጣቶችናሁሉ፣ እንዲሁም ጉዳዩ ለሚመለከታቸው የመንግሥት አካላት ከዚህ የሚከተለውን መልክታችንን  በአክብሮት እናስተላልፋለን።

1)             የኢትዮጵያ ኦርቶዶክስ ተዋሕዶ ቤተ ክርስቲያን የሰላምና አንድት ጉባኤ ባቀረበው የመፍትሔ ሐሳብ መሠረት ሁለቱም  አካላት መክረውና ተስማምተው ቤተ ክርስቲያንን እንድ እንዲያደርጉ ጥሪያችንን እናቀርባለን።
2)             ቤተ ክርስቲያንን ከፋፋሎ ለማስቀረት የሰላምንና አንድነትን በር ለመዝጋት የሚደረገው ማምንኛውም ሩጫ ተገቶ፣ አባቶች ለቤተ ክርስቲያን የሚጠቅም ሥራ እንዲሰሩ  እንጠይቃለን።
3)           በመልካም ሂደት ላይ የሚገኘው የእርቀ ሰላም ድርድር ለፍጻሜ ሳይበቃ ስድስተኛ ፓትርያሪክ ለመሾም መዘጋጀት ቤተ ክርስቲያንን ለዘለዓለም  እንደ ተለያየች እድትቀር የሚያደርግ በመሆኑ ድርጊቱ እንዲቆም በእንባና በጸሎት ሰላምን በሚጠባብቀው ሕዝብ ስም በአጽንኦት እንጠይቃለን፤ 
4)           ለቤተ ክርስቲያን ሰላምና አንድነትና ሲባል መንግሥትም ባለው ኃላፊነት የዕርቀሰላሙ ድርድር ለፍጻሜ እንዲደርስ ይተባበር ዘንድ በአክብሮት እንጠይቃለን፤
5)            በመላው ዓለም የሚገኙ ካህናትና ምዕመናን በማንቸውም ሰለማዊ መንገድ  ስለቤተ ክርስቲያን አንድነት ድምጻቸውን እንዲያሰሙ፤ ለቤተ ክርስቲያን ሰላምና አንድትም ተገቢውን ሁሉ እንዲያደርጉ እንጠይቃለን።
6)           የተጀመረው የዕርቀ ሰላም ድርድር ፍጻሜ ላይ እንዲደርስ በኢትዮጵያም ሆነ በመላው ዓለም የሚገኙ ካህናትና ምዕመናን  ጸሎተ ምህላ በያሉበት እንዲያደርጉ ጥሪያችንን እስተላልፋለን።
«ጸልዩ በእንተ ሰላመ ቤተ ክርስቲያን፤ስለቤተ ክርስቲያን ሰላም ጸልዩ»
የኢትዮጵያ ኦርቶዶክስ ተዋሕዶ ቤተ ክርስቲያን የሰላምና አንድነት ጉባኤ

7 comments:

Anonymous said...

We have to know the name of those govt supported papasat we should protest them not just only on the coming sunday it should be every sunday so tell us their name please.do not Hide them they should know that we know them.include their picture if possible

Anonymous said...

ለተከበራችሁ ለኢትዮጵያ ኦርቶዶክስ ተዋሕዶ ቤተ ክርስቲያን የሰላምና የአንድነት ጉባኤ አባላት
ልዑል እግዚአብሔር ድካማችሁን ቆጥሮ በአባቶች መካከል ዕርቅ ተፈጽሞ በቤተ ክርስቲያኒቱ ዘለዓለማዊ ፍቅር፣ ሰላምና አንድነት ሲመሠረት ለማየት ያብቃችሁ።
ከኢትዮጵያና ከውጭው ዓለም ከሚጎርፈው የመቆርቆር (አንዳንዴም የቁጣ) ስሜት፣ ቅን አስተያየትና የመፍትሔ ሀሳብ ለመረዳት እንደተቻለው አደጋው የገባቸው ካህናትና ምእመናን ሁሉ ከዕርቀ ሰላምና ከአንድነት ውጪ ለቤተ ክርስቲያኒቱ ሌላ አማራጭ እንደሌላትና ለዚህም መሥዋት ለመክፈል መዘጋጀታቸውን አበክረው እየገለጹ ነው። በሁሉም ወገን ያሉት አባቶች ይህንን ሐቅ ሊገነዘቡት ይገባል፤ መንጋቸውን ካጡ መልካም የበግ እረኛ ሊሆኑ አይችሉምና።
አባቶች የቤተ ክርስቲያኒቱን አንድነት በፍቅርና በዕርቀ ሰላም መልሶ መገንባትና መጠበቅ ተስኗቸው ሃያ ዓመት ቀርቶ አንድም ቀን ቢሆን ማደራቸው የሕሊና ጸጸት ሳያሳድርባቸው አይቀርም።
አሁንም ቢሆን ለቤተ ክርስቲያኒቱና ለሚጠብቁት መንጋ ብቻ በማሰብ ቆርጠው ከተነሱ በእግዚአብሔር ቸርነት ፍቅርን፣ ሰላምንና አንድነትን መልሶ ለማነጽ ሙሉ ሥልጣን አላቸው፤ ኃላፊነትም ያንኑ ያህል።
የቤተ ክርስቲያኒቱ ሕግ የሚከበረው በመሥዋዕትነት፣ በዕርቅ፣ በመተማመን፣ በሰላምና በፍቅር እንጂ እንደ ምድራዊው ሕግ በእሰጥ አገባ እንዳልሆነ ከአባቶች ይበልጥ ጠንቆ የሚያውቅ የለም። ስለዚህ በሁለቱም ወገን ያሉት አባቶች በምድራዊ ድርድርና አወዛጋቢ መግለጫ በመስጠት ሳይሆን፣ በእግዚአብሔር ኃይልና ምሕረት ተመክተው ዕርቀ ሰላም ስለመውረዱና የቤተ ክርስቲያኒቱ አንድነት ስለ መጽናቱ በጋራና በአንድ ድምጽ በራሳቸው በመሪዎቹ ቃል በታላቅ ናፍቆት ለሚጠብቀው ለሕዝበ ክርስቲያኑና ለመላው ዓለም በቅርቡ እንዲያበሥሩ ይጠበቃል። ከልዑል እግዚአቤር ፊት ሊቀርብ የሚችል ሌላ አማራጭ የለምና።

Anonymous said...

What happened Dejeselamawian?
Do you really sense what next will be? What do you or us really benefit from anger or get ready to labeling our father/s? r u really ready to moderate this kind of views or opinions? come on be one step ahead from us.

I don't mean to control your right of Democracy, but u r in ugly and bumppy road.

G/Giwergis said...

የተከበራችሁ ወንድሞች እና እህቶች፡
እነዚህ ለሰላሙ እንቅፋት እየሆኑ ያሉ አባቶች ፡ ምናልባት በኑፋቄ ትምህርት ተመርዘው እንደሆንስ???
መቼም እንደዚያ ካልሆነና ቅድስት የኦርቶዶክስ ተዋህዶ ቤተክርስቲያንን ለማፍረስ የሚፈልጉ ካልሆኑ በስተቀር አሁን እያደረጉ ያለውን ለቤተ_ክርስቲያናችን አንድነት ጸር የሆነውን ድርጊት አያደርጉም ነበር ወይንም ከማድረግ ይቆጠቡ ነበር። እናም እንደኔ ከሆነ፡ ለቤተክርስቲያን አንድነት ከሚደረገው ጸሎት በተጓዳኝ እነዚህን ችግር ያለባቸውን አባቶች ማጋለጥና በጊዜ ለይቶ ማውገዝ ወይንም ማስወገድ የግድ ይላል። ካለበለዚያ ግን ቤተክርስትያንን የሚበታትነው መርዝ (ኑፋቄ) በሰፊው ከተሰራጨ በኋላ ግን መድሃኒት ብናገኝም የተሟላ ፈውስ ግን ለማግኘት አንችልም። እናም ካሁኑ ሳይዘገይ ወደ/የ ጸሎት እና ተግባር እንቅስቃሴወችን (በግልም ሆነ በቡድን በመሆን) እንጀምር። እግዚአብሔርም እንደሚረዳን የታመነ ነው !!

Anonymous said...

Give us the name
1 abune gorgorios
2 abune abreham
3 abune hezeqel
4 abune samuel
5 2 more.

major problem of the church

Kebede Bogale said...

በእርቅ፥ በፍቅርና ሰላም የሚያምን ከሁሉም በላይ የሆነውን እግዜብሔርን የሚፈራ እኮ ነው። ኃያሉን እግዜብሔር የማይፈራ ደካማውን ሰው ፈርቶ ለእርቅና ሰላም አይምበረከክም። እነዚህ ለቤተ ክርስቲያናችን አንድነትና ሰላም እምቢተኞች የሆኑት እኮ እምቢተኝነታቸውን የሚያስጠብቅላቸው፥ የሚመኩበት ጠመንጃ ያነገበ ኃይል ስላላቸው ነው። 'መስቀል ኃይልነ ፥ መስቀል ጽንእነ፥ መስቀል ቤዛነ ፥ መስቀል መድኀኒተ ነብሰነ ' ብለው ሳይሆን የሚምኑትና የሚመኩት 'ጠመንጃ ኃይልነ ፥ ጠመንጃ ጽንእነ ፥ ጠመንጃ ቤዛነ ፥ ጠመንጃ መዳኃኒተ ሥጋነ'ብለው ስለሚያምኑ ነው። እምነታቸው በጠመንጃ ባይሆንማ ቢያንስ የላኳቸውን አባቶች ረፖርት እስከሚያዳምጡ ድረስ ይታገሱ ነበር። ድሮውንም እርቅና ሰላም የሚባለውን የመንፈስ ቅዱስ ሥራ ስለማያምኑበት ነው ይህን ያደረጉት። ንቀት ፥ ትእቢትና ትምክህት የመንፈስ ቅዱስ ፀጋ ሳይሆኑ የድያብሎስ ናቸውና። እርቅ፥ ሰላም፥ አንድነት ፥ ትሕትናና ትግሥት ናቸው የመንፈስ ቅዱስ ጸጋና ስጦታወች። የመንፈስ ቅዱስ ማደሪያ የሆኑ አባቶችን የምንለይባቸው መስፈርቶች እነዚህ ናቸው እንጅ የውስጥን ማንነት የሚሸፍኑት ቆብና አስኬማ ብቻ መሆን የለባቸውም። ...ስለዚህ እነዚህ ''ጳጳሳት'' የሚመኩበት መንግሥት እስካላቸው ድረስ የቤተ ክርስቲያናችን ሰላምና አንድነት ይመጣል ብለን መጠበቁ የማይጨበጥ ተስፋ ብቻ ሁኖ ነው የሚቀረው። ባገር ውስጥ ያሉት ብዙኃኑ የቤተ ክርስቲያኒቱ አባቶች ቢሞክሩም፥ የታጠቀ ኃይል ያላቸው ጥቂቶቹ እረቀ ሰላሙን ረግጠው ''ፓትርያርክ'' ብለው እንደለመዱት አለቃቸውን ከመሾም የሚያግዳቸው ኃይል የለም። ጊዜው የነሱ ነውና! እኛ ግን በዚህ ሁኔታ የተሾመን የአምጽ አባት ''አባታችን'' ብለን አንቀበልም። አባታችን ማን እንደሆነ እናውቃለንና !

Hailu said...

Ayyyyyyyyeeeeeeeeeeee. Koselin Eko Wondimoche.

What time are we in to see these so called Papasat not care for the very church they are appointed to keep and lead?

Why don't they care about the faithful Orthodox Christians?

Oh God Almighty, Please deliver us from mess; Please guide us through this difficult time;Please show these Papasat the true meaning of being spiritual fathers.

May God bless the Peace and Reconcilliation Committee, the true children of Ethiopian Orthodox Church.

Amen.

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)