September 14, 2012

በእንተ ሰላመ ቤተ ክርስቲያን

 (ደጀ ሰላም፤ መስከረም 4/2004 ዓ.ም፤ September 14/ 2012/ READ THIS NEWS IN PDF)፦ ከዚህ በታች ያለውን ጽሑፍ ያደረሱን “ውሉደ አበው ዘተዋሕዶ” የተሰኙ ፀሐፊ ሲሆኑ የደጀ ሰላም ዝግጅት ክፍል ጽሑፉ የያዘው ቁምነገር ለደጀ ሰላማውያን ቢደርስ ሊኖረው የሚችለውን ጠቀሜታ በመገንዘብ እንደሚከተለው አቅርበነዋል። ቸር ወሬ ያሰማን፤ አሜን።
 ፍቅር፣ ሰላም እና ይቅርታ ለቤተ ክርስቲያን አንድነት!
(ውሉደ አበው ዘተዋሕዶ)
የኢትዮጵያ ኦርቶዶክስ ተዋሕዶ ቤተ ክርስቲያን በታሪኳ ፈርጀ ብዙ ፈተናዎች እና ችግሮች ስትጋፈጥ ኖራለች ። ቢሆንም ቅሉ በእግዚአብሔር አጋዥነት ሁሉንም እያለፈች ከዛሬው ዘመን ደርሳለች ። ፭ኛው የኢትዮጵያ ፓትርያርክ ብፁዕ ወቅዱስ አቡነ ጳውሎስ ማረፋቸውን ተከትሎ ቅድስት ቤተ ክርስቲያን መላውን ሕዝበ ክርስቲያን ባሳተፈ መንገድ የወደፊት ጉዞዋን አሳምራ፥ መጠበቅ ያለበትን አየጠበቀች ፥ መስተካከል የሚገባውን እያስተካከለች ፥ አደራዋን ጠብቃ ፥ ቀጥ ያለውን አቋሟን እንዳከበረች ያለማወላወል እንደምትቀጥል ይታመናል። ለዚህም ያመች ዘንድ መሠረታዊ የሆኑ የትኩረት አቅጣጫዎችን በመለየት ወሳኝ ሥራዎችን መሥራት ጊዜው የሚጠይቀው ዐቢይ ጉዳይ ነው።


አንድ ፓትርያርክ አልፎ ሌላ ፓትርያርክ ሲተካ በቤተ ክርስቲያን ጉዞ ውስጥ ታላቅና ወሳኝ ምዕራፍ መሆኑ አያሻማም። ያለፉት ፳ ዓመታት በቤተ ክርስቲያናችን ታሪክ ሁለት አባቶች በአንድ ጊዜ በፓትርያርክነት ሲጠሩ የቆዩበት እንግዳ ክስተት የተስተናገደባቸው ናቸው። እንዲህ ያለ ነገር ቤተ ክርስቲያንን ሲሞግታት በታሪኳ የመጀመሪያዋ ነው። በመካከል የነበረው እሰጥ አገባ ሳይጠናቀቅ ከሁለቱ አባቶቸ አንደኛው በማረፋቸው ይህ ወቅት የተለየ ትኩረት የሚሻ ሆኗል። አቡነ ባስልዮስ  አርፈው አቡነ ቴዎፍሎስ ሲሰየሙ፣ ከአቡነ ቴዎፍሎስ ቀጥሎ አቡነ ተከለ ሃይማኖት ሲሰየሙ፣ ከአቡነ ተክለ ሃይማኖት በኋላም አቡነ መርቆሬዎስ ሲሰየሙ እንደዚህ ያለ ውዝግብ እና ውቅም ነበር። አቡነ መርቆሬዎስ በሕይወተ ሥጋ እያሉ፥ ፕትርክናውንም በአግባቡ በቀኖና ቤተክርስቲያን መሠረት ማስረከብ እና አለማስረከባቸው ሳይረጋገጥ፥ ሁለት ሲኖዶስ ተፈጥሮ፥ ጉዳዩ እልባት ሳያገኝ አነዚያ ሁሉ ዓመታት አለፉ። በአቡነ መርቆሬዎስ እና በአቡነ ጳወሎስ መካከል የተደረገው ሽግግር መልኩ በውል ሳይታወቅ እንዳነጋገረ ከዛሬ ደርሰናል።

ዘመኑን የዋጀ ከሀገር እስከ ዓለም አቀፍ አድማስ የሚዘረጋ ሰፊ የመንፈሳዊ አገልግሎት እንቅስቃሴ የሚደረግበት ጊዜ አሁን መሆኑን ከሚነግሩን ወይም ከሚጠቁሙን ጉዳዮች አንዱ አሐቲ ቅድስት ቤተ ክርስቲያን ከሁለት የመከፈሏ ነገር ቀዳሚው መሆኑ የጎላ የተረዳ ነገር ነው። ስለ ቅድስት ተዋሕዶ ቤተ ክርስቲያን መቆርቆር እና መቆጨት ብቻውን የማይበቃበት ወይም የማይጠቅምበት ሰዓት ቢኖር ይህ ያለንበት ጊዜ መሆኑን በጥንቃቄ ልንመረምር ይገባል። የመሠረታዊ ለውጥ ፍንጣቂዎች ፍንትው ባለ ብርሃን ማብራት የሚጀምሩበት፥ ስለ አንዲት ቅድስት ኦርቶዶክሳዊት ተዋሕዶ ቤተ ክርስቲያን አንድነት ከመቼውም በተሻለ የምንጨነቅበት እና የየድርሻችንን የምንወጣበት ነውና ወደ ምንናፍቀው ግብ ወይም ውጤት ለመድረስ ሥራዎቹ ሁሉ ዛሬ መጀመር አለባቸው። ይህም የተጀመሩትን ምግባረ ሠናያት ሁሉ ማስቀጠልን ያጠቃልላል። ስለሆነም ከላይ ከቅዱስ ሲኖዶስ ጀምሮ እስከ እያንዳንዱ ምእመን ድረስ እግዚአብሔርን ደጅ ከመጥናት ጋር በሁለቱ ሲኖዶሶች መካከል የተጀመረው እርቀ ሰላም በሚፈለገው ደረጃ እንዲጠናቀቅ በሰከነ መንፈስ እንዲሁም በልዩ ትኩረት ሥራ መሥራት ለነገ የማይባል ፍጥነት እና ጥንቃቄ የሚሻ መሆኑ አሌ አይባልም።

በኢትዮጵያ ቤተ ክርስቲያን ታሪክ ለመጀመሪያ ጊዜ አንዲት ቤተ ክርስቲያን በሃይማኖት ሳይሆን በአስተዳደር ከሁለት ተከፍላ ፳ ዓመታትን በመሪር ኀዘን እና ትካዜ አሳልፋለች። ይህንን አሳዛኝ ታሪክ ለመፋቅ የተለያዩ እልህ አስጨራሽ ጥረቶች ሲደረጉ ቆይተዋል። “የተጀመረው ጅምር ፍጻሜ ላይ የሚደርስበት ጊዜ መቼ ይሆን?” የሚለው የመላው ሕዝበ ክርስቲያን ጥያቄ መልስ የሚያገኝበት ወቅት አሁን ነውና ዕድሉ በከንቱ ማለፍ የሚገባው አይደለም።

አባቶች እና ምእመናን አንገታቸውን እንደደፉ መኖር ይበቃቸዋል። ለሌላ መትረፍ የሚገባት ቤተ ክርስቲያን ለራሷ መሆን ሲያቅታት ከማየት ሞት ይሻላል። ለዚህም ደግሞ በሀገር ውስጥ ያለው እና በአሜሪካ ያለው ቅዱስ ሲኖዶስ አባላት ድርሻ እጅግ ከፍ ያለ ቢሆንም በየአጥቢያ ቤተ ክርስቲያን ከሚገኘው ሕዝበ ክርስቲያን እስከ ሊቃውንተ ቤተ ክርስቲያን ያሉት ሁሉ ወሳኝ ድርሻ አላቸውና ችላ የሚባሉ አይደሉም። አሁን በተናጠል ስናብስለስለው የኖርነውን በጋራ የምንመክርበት አባቶች ወደ አንድ ጠንካራ ቅዱስ ሲኖዶስ የሚጠቃለሉበት እንጂ ሌላ የመከራ እና  የመከፋፈል ኑሮ የምንገፋበት አይደለም። ጉዳዩ የአባቶች ሊቃነ ጳጳሳት ብቻ ተደርጎ መወሰድ የለበትም። የተከፈለችውና ሰላምን ያጣችው መላዋ ቅድስት ቤተ ክርስቲያን ናትና!

ለመሆኑ እርቀ ሰላሙ ቤተ ክርስቲያንን በሚበጅ ሁኔታ እንዲጠናቀቅ የሊቃውንት፥ የገዳማውያን ፥ የካህናት፥ የምእመናን ፥ የሰንበት ትምህርት ቤት አባላት፥ የማኅበራት እና የመገናኛ ብዙኀን ድርሻ ምን ሊሆን ይችላል?

ሊቃውንተ ቤተ ክርስቲያን
የቤተ ክርስቲያን መሠረተ እምነት [ዶግማ]፣ ቀኖና እና ትውፊት ሳይዛባ የተከፈለችው እናት ቤተ ክርስቲያን ወደ አንድነቷ እንድትመጣ የሊቃውንተ ቤተ ክርስቲያን ድርሻ በጣም ከፍ ያለ ደረጃ ያለው ነው። ከመስመር የወጣውን በቃለ እግዚአብሔር መሣሪያነት የሚመልሱ፣ የተሳሳተውን የሚያርሙ፣ የዶግማ እና የቀኖና እንዲሁም የትውፊት ጠበቃዎች መሆናቸው ግልጥ ብቻ ሳይሆን የታመነ እና የተረዳ ነው። ስለሆነም ዛሬ በአካለ ሥጋ ያሉ ሁሉ ምእመናን ግራ እንዳይጋቡ በመምከር፣ ከቤተ ክርስቲያን መርሆዎች አንጻር ሊደረግ የሚገባውን ከምንጭ ከምንጩ እያመጡ በማስረዳት፣ አበው ሊቃነ ጳጳሳት ሊከተሉት የሚገባውን በማማከር፣ ለምእመናንም ድርሻቸውን ማመላከት ይጠበቅባቸዋል።

ሊቃውንት መምህራን በቤተ ክርስቲያን ታሪክ እንደምናውቀው ፍትሕ ተጓደለ፣ ደሃ ተበደለ በማለት ከመደበኛ ሐዋርያዊ ተልእኮ በተጨማሪ የሚገስጹ ናቸው። በመሆኑም በማወቅም ይሁን ባለማወቅ ከተፈቀደው እና ሊሆን ከሚገባው የሚያፈነግጡ ቢኖሩ በመገሰጽ እርቀ ሰላሙ እንዲጠናቀቅ የማድረግ ሓላፊነት በትከሻቸው ላይ ይገኛል። በየዐውደ ምሕረቱ ጉዳዩን አጀንዳቸው ወይም ርእሳቸው አድርገው የቤተ ክርስቲያን ልጆችን የማስተማር ብቻ ሳይሆን የማነቃነቅ ሥራ እንዲሠሩ ይጠበቃል። ይህም ሥራ ወንበር ዘርግተው ጉባኤ አቁመው ከሚያስተምሩ የአብነት መምህራን ጀምሮ እስከ ሰባክያነ ወንጌል ያሉትን ያጠቃልላል። አንድነቱ የሚያመጣውን ጥቅም እና መለያየቱ የሚያስከትለውን ጉዳት በቃልም በጽሑፍም እያሳዩ ለእናት ቤተ ክርስቲያን እስከ ዛሬ የደከሙትን ያኽል ሊወጡ እና ሊወርዱ ያስፈልጋል።

ገዳማውያን
ከዓለም ርቀው፥ በዓት አጽንተው፥ ንጽሕ ጠብቀው ራሳቸውን እና ቤተ ክርስቲያናቸውን በማያቋርጥ ጸሎታቸው የሚያገለግሉ በርካታ አባቶች በቤተ ክርስቲያናችን ይገኛሉ። ይህንን የብኅትውና ወይም የምናኔ ሕይወት ያላሳጣን እግዚአብሔር ስሙ የተመሰገነ ይሁን እና ቅድስት ቤተ ክርስቲያን ተጠብቃ የምትኖረው በማይታየው የእነርሱ ተጋድሎ መሆኑ ለአፍታ እንኳ ሊዘነጉት አይቻልም። ስለሆነም ከዝጉኀን መናንያን ጀምሮ በየገዳሙ በመቁነን የሚኖሩት አበው በተለየ ሁኔታ ይህን የእርቀ ሰላም ጉዳይ በማዘከር ፈጣሪያችንን ደጅ በመጥናት መልክ እንዲይዝ በማድረግ ይራዳሉ።

በተለያዩ ገዳማት ቢወሰኑም ቅሉ አበው መነኮሳት፣ እመው መነኮሳይያት መናንያን ባሕታውያን የከተማ ሰው ከሚተዋወቀው በላይ ይተዋወቃሉ እና ተጠራርተው፥ መክረው እና ዘክረው ጸሎት ቢይዙበት ጉዳዩ አልባብ አልባብ የሚሸት መልካም መዓዛ ያለው ወጤት ይዞ እንደሚመጣ ቅንጣት ታኽል አንጠራጠርም። በመጽሐፍ “የጻድቅ ሰው ጸሎት በሥራዋ አጅግ ኃይልን ታደርጋለች” እንደተባለ። ጌታችን አንድ መሆን የሚቻለው በጸሎት መሆኑን ሲያጠይቅ “አባት ሆይ እኛ አንድ እንደሆንን እነዚህም ደግሞ በስምህ አንድ እንዲሆኑ አድርጋቸው” ብሎ በመጸለይ ያስተማረንን አብነት አድርገው የጸሎት ሀብት ያላቸው አባቶች ሁሉ ሊጸልዩ ሱባኤ ሊይዙ ይገባል።

ካህናት
በየአጥቢያ ቤተ ክርስቲያኑ እና በተለያዩ የቤተ ክርስቲያን መዋቅር በአገልግሎት ያሉ ካህናት የመንጋው ጠባቂ ኖሎት [እረኞች] መሆናቸው ይታወቃል። እያንዳንዱ ምእመን የንስሐ ወይም የነፍስ አባት ያለው በመሆኑ ቤተ ክርስቲያን ልጆቿ በአግባቡ የሚጠበቁበትን ሥርዓት ሠርታ ማኅበረ ምእመናን ከነጣቂ ተኩላ ተጠብቀው እንዲኖሩ በማድረግ ላይ ትገኛለች። ስለሆነም እያንዳንዱ ካህን በሥሩ የሚጠብቃቸውን አባግአ ክርስቶስ ስለ እርቀ ሰላሙ አስፈላጊነት እና ጠቀሜታ ከማስረዳት በተጨማሪ በግሉ ሊፈጽመው የሚገባውንም በማድረግ ከፍ ያለ አስተዋጽኦ ሊያደርግ ይችላል።  

ምእመናንን ከማስተማር እና ከማደራጀት ባሻገር ወደላይ ወደጎን እና ወደታች የሚገኙ ሌሎች አባቶችን በማነሣሣት እና ተጽዕኖ በማሳደር የማይናቅ ሥራ ይሠራሉ። በዓመታዊ የሰበካ ጉባኤ አኅጉረ ስብከታቸውን እየወከሉ የሚሳተፉት ካህናት በጉባኤው ላይ ከፍተኛ ትኩረት እንዲሰጠውና መርሐ ግብር ተይዞለት ጥልቅ ምክር ተደርጎበት በመልካም ኹኔታ እንዲቋጭ ላቅ ያለውን ድርሻቸውን ማበርከት ይችላሉ።

ምእመናን
ምእመናን በቤተ ክርስቲያናችን አስተዳደራዊ ሂደት ያላቸው ቀጥተኛ ተሳትፎ የሚጠበቀውን ያኽል አይደለም። ምንም እንኳ እስከ ዛሬ ያለው ልምድ ይኽን ቢያስብለንም በታሪክ ምእመናን ቤተ ክርስቲያናቸውን አስፈላጊውን መሥዋዕትነት በመክፈል ሲጠብቁ መኖራቸው ለአፍታ አይዘነጋም። ይህች ቤተ ክርስቲያን አጼ ሱስንዮስ “ካቶሊክ ይንገሥ ተዋሕዶ ይፍረስ” የሚል አዋጅ ባወጁ ጊዜ ሃይማኖት ከመካድ ደማችን ይፍሰስ ብለው ስምንት ሺህ ምእመናን አንገታቸውን ሰጥተው ሰማዕት የሆኑባት ቤት ናት። ዛሬም ቢሆን ገንዘባቸውን ጉልበታቸውን እንዲሁም ዕውቀታቸውን ከመለገስ አስታጉለው አያውቁም። ያለ እነርሱ ቤተ ክርስቲያን ሙሉ አይደለችምና። በእርቀ ሰላሙ ጉዳይም ቢሆን የእነርሱ ድርሻ በጣም ታላቅ መሆኑን ተረድተው ሳይውሉ ሳያድሩ ለለውጡ መረባረብ ከእነርሱ ይጠበቃል።

በተለይም በተለያየ መንገድ የሚያወቋቸውን እና የሚቀርቧቸውን ሊቃነ ጳጳሳት፣ ሊቃውንት፣ ካህናት እና በቀጥታም ይሁን በተዘዋዋሪ የሚያገኟቸውን ተጽዕኖ ማሳደር የሚችሉ አካላትን በማሳሰብ እና  በማወያየት የተጀመረው የቤተ ክርስቲያንን አንድነት የማጠናከር ጉዳይ እንዲሰምር በማድረግ ረገድ ድርሻቸው የማይተካ ነው። ምእመናን አባቶችን ባገኙ ቁጥር ሊያነሱባቸው የሚገባው የማይረሳ ጉዳይ እርቀ ሰላሙ መሆን አለበት ። ምንጊዜም ጉዳዩ እልባት እስኪሰጠው ድረስ ክትትል እና ድጋፍ ማድረግ ከእነርሱ ይጠበቃል። ከላይ በመጣው ክፍፍል ምክንያት ፊት የተማለሱ ካሉም ቀድመው ይቅር ለእግዚአብሔር በመባባል የበለጠ ሥራውን ሊያጠናክሩት ይችላሉ። ይህንን በምእመናን መካከል ሊኖረ የሚችል ክፍተት የሚያውቁም በማሸማገል ቀዳዳውን መድፈን አይሳናቸውም። አባቶችን ከማሳሰብ ከማማከር እና ከማሳመን እኩል ይህም ከእነርሱ ይጠበቃል።

የሰንበት ትምህርት ቤት አባላት
ዛሬ ሰንበት ትምህርት ቤቶቻችን በራሳቸው ያላስለሰ ጥረት የደረሱብት ደረጃ እጅግ ከፍተኛ ነው። ልጅ ያቦካው ለራት አይበቃም የሚባለው ተረት በእነርሱ ዘንድ ቦታ ካጣ ሰንበትበት ብሏል። እነርሱ ቤተ ክርስቲያን ላቅ ወዳለ ደረጃ እንድትሄድ ቀን ተሌት ያለመታከት እየለፉ ይገኛሉ። በእነርሱ ዘንድ ይህንን ሓላፊነት የሚሰማው አስተሳሰብ በልባቸው ሰሌዳ እንዲቀረጽ ያደረገ መንፈስ ቅዱስ እንጂ ሌላ ማን ሊሆን ይችላል? ይወጣሉ ይወርዳሉ ይሮጣሉ ግን አይደክሙም። ትምህርተ ሃይማኖትን ከሕፃናት ጀምሮ እስከ ጎልማሶች ድረስ በመጠን በመጠናቸው በማደራጀት ትውልዱ ሃይማኖቱን እንዲያውቅ የሚያደርጉትን ተጋድሎ ለታዘበ ሁሉ ዕጹብ ድንቅ ከማለት በስተቀር በምን ቃል ሊገልጸው ይችላል?

የቤተ ክርስቲያኒቱ ግማሽ አካላት የሚሆኑት የሰንበት ትምህርት ቤት አባላት በእርቀ ሰላሙ ጉዳይ እንደሌላው ተልእኮ ሁሉ ሊረባረቡ ይገባል። ከእነርሱ ሌላ ነገ የሚተካ ትውልድ የለምና ያለፈው ቁስል ሳይሽር ከሰነበተ አደጋው ለእነርሱም ነውና አሁን በመነሣሣት ለመፍትሔው የተቻላቸውን እንዲያደርጉ በሩ ተከፍቷል። የተሳሳቱትን በማስተካከል፣ ለወላጆቻቸው እና ለሚያውቋቸው ሁሉ መረጃ በመስጠት ሁሉም የየበኩሉን እንዲወጣ በማሳሰብ አባላትን በማሰተማር ብዙ ሥራ መሥራት ይቻላል። ወደ አባቶች በመቅረብም የሚበጀውን ሀሳብ በመጠቆም እና በማግባባት ሰፊ ሓላፊነት ያለበት ተልእኮ እንዲፈጽሙ የቤተ ክርስቲያን አደራ አለባቸው። ጉዳዩ እስካሁን ትኩረት የተነፈገው እንደመሆኑ መጠን የተመቻቸ መድረክ በማዘጋጀት እርስ በእርስ በመወያየት የጥናት መድረክ በማዘጋጀት በቲያትር እና በድራማ ሕዝበ ክርስቲያኑን በማስተማር ብዙ ብዙ ተስፋ ይደረጋል።

ማኅበራት
ቅድስት ቤተ ክርስቲያን የሱታፌ አደባባይ ናትና ልጆቿ በተለያየ አደረጃጀት እየታቀፉ እንዲያገለግሏት ሥርዓት ሠርታ ትውፊት አዘጋጅታ በማስተናገድ ላይ ትገኛለች። ማኅበራት የዚህ አሠራር አካላት ናቸው። ማንኛውም ማኅበር ከእናት ቤተ ክርስቲያን መዋቅር ወጪ ሊሆን አይችልም። በዚህ መዋቅር ሥር እንደመሆናቸው መጠን የቤተ ክርስቲያን መከፈል እነርሱንም ይነካቸዋል።

እያንዳንዱ ማኅበር በአንድም ይሁን በሌላ መንገድ ከአባቶች ከሊቃውንት ከገዳማውያን ከካህናት ከሰንበት ትምህርት ቤቶች እንዲሁም ከሌሎች ማኅበራት ጋር የመገናኘት ዕድሉ ከፍተኛ ነው። አባላቱን በጉዳዩ እንዲመክሩ ከማስተባበር በላይ ተመሳሳይ አመለካከት እንዲዳብር የማድረግ ግዴታ አለባቸው። እንደየተቋቋሙበት ዐላማ ሁሉ ይህም የቅድስት ቤተ ክርስቲያን አንድ የመሆን ነገር እንደ እግር እሳት መቆሚያ ሊነሣቸው ይገባል።

መገናኛ ብዙኀን [ሚድያዎች]
የቤተ ክርስቲያን ሰላም የሀገር ሰላም ነው። አንድነቷም የሀገር አንድነት ነው። መንግሥታዊም ሆኑ የግል መገናኛ ብዙኀን የቤተ ክርስቲያን መከፋፈል እጅግ ሊያሳስባቸው ይገባል። የምንነጋገረው ፵ ሚሊዮን ምእመናንን ስለያዘች ቤተ ክርስቲያን ነውና በቀላሉ የሚታይ ጉዳይ አይደለም። የሀገሪቱን ሕዝብ ብዛት ግማሽ ያኽሉን የያዘች ቤተ ክርስቲያን ስትቸገር ቆሞ የሚያይ ሚድያ ማየት ይከብዳል። እርቀ ሰላሙ ምን ምን ዓይነት ፋይዳ እንዳለው በየተወሰነ የጊዜ ሰሌዳ ማስተማር መቀስቀስ አዎንታዊ መረጃ በመስጠት ጉዳዩ ትኩረት እንዲያገኝ ከማድረግ በተጨማሪ አቅጣጫ በመጠቆምም የሚያበረክተው አስተዋጽኦ በጥቂቱ የሚገመት አይደለም።

አሉታዊ መረጃዎችን ከመስጠት በመቆጠብ አዎንታዊ ሥራዎች ላይ በመረባረብ ከፍተኛ ተጽዕኖ ለማሳደር ማን እንደመገናኛ ብዙኀን የሚያሰኝ አቅም አላቸው። በቴሌቪዥን፣ በሬድዮ፣ በኤሌክትሮኒክ ሚድያ፣ ማኅበራዊ ሚድያዎችን ጨምሮ፣ በኅትመት ሚድያ ወዘተ የእርቀ ሰላሙን አስፈላጊነት ጥቅሙን እንዲሁም ባይፈጸም ጉዳቱን በማመላከት ተገቢውን የበኩላቸውን ድርሻ ሊወጡ ይችላሉ። የተለያዩ ጽንፍ አቋም ያላቸውን በማቀራረብ አስታራቂ ሀሳቦችን በማቅረብ ተደማጭነት ያላቸውን አባቶች እና ምእመናን እየለዩ ሀሳባቸውን እንዲሰነዝሩ በማድረግ ከፍተኛ ዋጋ ያለው ሥራ የመሥራት ሓላፊነት አለባቸው።

ከዚህ በተለየ መንገድ ቤተ ክርስቲያንን ለሌላ የመለያየት እና የመከፋፈል መንገድ እንድትጓዝ የማድረግ ዐላማ ይዘው የሚሠሩ ሚድያዎችም መኖራቸውን ዐውቆ፣

·         ለሚሰጡት የተሳሳተ አስተያየት እና መላምት ተገቢውን ምላሽ በመስጠት፣
·         ዐላማቸውን እና ማንነታቸውን በማጋለጥ ፣
·         ሥጋዊ ጥቅማቸው የሚጠበቀው ቤተ ክርስቲያን ከዚህም የበለጠ ስትከፋፈል መሆኑን በማሰብ የሚያደርጉትን ጎጂ እንቅስቃሴ በማሳየት መገናኛ ብዙኀን የሚጫወቱት ሚና ከፍተኛ ነው። ስለሆነም እጅግ በጣም የተለጠጡ ሀሳቦችን እያቀረቡ ወይም ተምኔታዊ የሆኑ ጉዳዮችን በመዳሰስ ምእመኑ የሚይዘውን የሚጨብጠውን እንዲያጣ ከማድረግ በመቆጠብ ነባራዊውን ሁኔታ በመቃኘት ለአንድነት ከሚሠሩ አካላት ጋር የቅርብ ትስስር በመፍጠር ወሳኝ እና ታሪካዊ ሥራዎችን መሥራት የሙያ እና የዜግነት እንዲሁም የቤተ ክርስቲያን የልጅነት ሓላፊነት እንደሆነ መዘንጋት የለበትም።

እነዚህ እና ሌሎች ያልተጠቀሱ አካላት መንግሥትን ጨምሮ በያሉበት ጉዳዩ የሰመረ እና ያማረ እንዲሆን አስፈላጊውን ሁሉ ድጋፍ መስጠት፣ የሚያፈገፍጉ ሲኖሩም ግፊት በማድረግ ፣ የሚደክማቸውን በማበረታታት፣ የገንዘብም ፥ የቁሰቁስም ፥ የሙያም ፥ የሀሳብም ድጋፍ በመለገስ እስከ ፍጻሜው ድረስ ከቤተ ክርስቲያን ሳይለዩ እልባት ሳያገኝ እንዳይስለቹ በትጋት መሥራት አለባቸው። ለእኛ ጉዳይ ከእኛ የተሻለ የለምና!

እርቀ ሰላሙ በምን ውጤት ሊጠናቀቅ ይችላል?
ይኽንን እረፍት የማይሰጥ ተግባር ለሌላ ቀን በይደር ማቆየት በጭራሽ መታሰብ የለበትም። መቋጨት ሲኖርበት ለሌላ ተጨማሪ ዘመን የመነጋገሪያ ጉዳይ እንደሆነ እንዲቀጥል እና የተከታዩ ትውልድ ዕዳ ወይም ሸክም ሆኖ እንዲተላለፍ የማንኛውም የእግዚአብሔር ወዳጅ ፍላጎት አይደለም። ጉዳዩ እንደተንጠለጠለ መባጀት መክረም ወይም መጎተት የለበትም። ሁለት ሊሆኑ የሚችሉ ውጤቶች እንደሚኖሩት መገመት ይቻላል። እልባት መስጠት ሲባል ጉዳዩ በሁለት መልክ ሊጠናቀቅ እንደሚችል መታወቅ ይኖርበታል።

ትልቁ ፥ የመጀመሪያው እና አማራጭም የማይገኝለት ፍጻሜ  በስምምነት፣ ይቅር ለእግዚአብሔር ብሎ በመጎናበስ ፣ ያለፈው ስህተት እንዳይደገም በማውገዝ ፣ ያጠፋነው ሁላችንም ነን በማለት፣ አቋም ማክረርን በመተው፣ ስለ አንዲት ቅድስት ንጽሕት ተዋሕዶ ቤተ ክርስቲያን እንጂ ስለ ግል ክብር እና ስብእና ባለመጨነቅ፣ ቁስሉን ለአንዴ እና ለመጨረሻ ጊዜ በማጠንፈፍ እልባት መስጠት የሚለው ነው።

ሁለተኛው እና የማይፈለገው ነገር ግን የመጀመሪያው አማራጭ አስፈላጊው ሁሉ ከተደረገም በኋላ የማይሳካ ከሆነ አጀንዳው እንደተከፈተ መኖር ስለሌለበት የሚዘጋበት መንገድ ተፈልጎ የሚጠናቀቅበት ነው። ሁለተኛው ይሆናል ተብሎ ባይገመትም አማራጭነቱ ግን ሊዘለል አይችልም። የመሆን ዕድሉ ሰፊ መሆኑ ወይም የተስፋ ብርሃን መፈንጠቁ ያለመሆን ዕድሉን ጨርሶ እስካልደመሰሰው ድረስ መታሰቡ በራሱ ባያስደስትም ሊታሰብ የሚገባው ነው።

ይሁን እንጂ ሁሉም የሚሻው [ከጥቂቶች በስተቀር] እና የሚጓጓለት የመጀመሪያውን አማራጭ፣ ከቤተ ክርስቲያን ጠላት በስተቀር ተቃዋሚ የሌለውን ፍጻሜውን እውን በማድረግ አበው ዲያብሎስን ከእነ ሠራዊቱ በማሳፈር፣ በዓለመ መላእከት፥ በልዑል እግዚአብሔር ፊት ታላቅ የደስታ ጉባኤ እንዲደረግ ምክንያት ይሆናሉ ተብሎ ይጠበቃል። ሁላችንም ተስፋ የምናደርገው ይህንን ብቻ ነውና አባቶቻችን እንደማያሳፍሩን እንተማመናለን ።

አሁን ለምን ?
የእርቀ ሰላሙ ጉዳይ አሁን ለምን ዋና መነጋገሪያ ጉዳይ ሆነ የሚለው ጥያቄ ሊነሣ የሚችል መሆኑ ግልጽ ነው። ለዚህም የሚከተሉትን አመክንዮዎች መመልከት ይበጃል።

፩. የመዳን ቀን አሁን ስለሆነ
መለያየት መድኃኒት የሚያሻው የነፍስ በሽታ ነው። ሐዋርያው ቅዱስ ጳውሎስ የሥጋ ሥራዎችን ሲዘረዝር ከጠቀሳቸው መካከል አንዱ መለያየት ነው። ገላ ፭፥፳፩ ። ፈውስ የሚያስፈልገው ሕማም ከሆነ ዘንድ እስኪሽር ድረስ መከታተል እና ወዲያውኑ መፍትሔ መስጠት ያስፈልጋል።

በጊዜ መፍትሔ ያልተፈለገለት ቁስል ወይ በሽታ ሲቆይ ያመረቅዛል ወይም ካንሰር ይሆናል። መጽሐፍ ስለ መድኀኒተ ነፍስ ሲናገር “የመዳን ቀን አሁን ነው” ይላል። ፩ቆሮ ፮፥፪ ። በጎ ሥራ ለመሥራት ከአሁን የተሻለ ጊዜ ኖሮ አያውቅም። እንደ ሐዋርያው ቅዱስ ታዴዎስ ዕለቱን ዘርቶ ዕለቱን አፍርቶ በዕለቱ ለመሥዋዕት ማድረስ ባይቻል እንኳ የመጨረሻው ግብ ላይ ለመድረስ በበጎ ወይም በቅን ኅሊና መጠንሰስ ይቻላል። ስለሆነም አሁን ለእርቀ ሰላም የተመረጠች የተወደደች ጊዜ ናት ።

መሥዋዕት የሚያርገው፣ ቅድመ እግዚአብሔር የሚደርሰው ፍቅር በመንበሯ ስትቀመጥ ነው። እግዚአብሔር በዓይነ ምሕረቱ እንዲመለከተን ከአሁን በስተቀር ሌላ ጊዜ አልተሰጠንምና ልንጠቀምበት ያስፈልጋል። ጌታችን በወንጌል ያስተማረን “ነገ ለራሱ ይጨነቃል” ብሎ ነውና አሁንን መጠቀም ከምክንያቶች ሁሉ በላይ ነው። ማቴ ፮፥፴፬ ። ሐዋርያው ቅዱስ ያዕቆብም የጌታውን ትምህርት አብነት አድርጎ “ዛሬ ወይም ነገ ወደዚህ ከተማ እንሄዳለን በዚያም ዓመት እንኖራለን እንነግድማለን እናተርፍማለን የምትሉ እናንተ፥ ተመልከቱ፥ ነገ የሚሆነውን አታውቁምና“ ብሏል። ያዕ ፬፥፲፫ ። በዚህ መጽሐፋዊ  ትምህርት ምክንያት አሁንን መምረጥ ተገቢ መሆኑን ስንመለከት እርቀ ሰላም አሁን ለምን? ለሚለው ጥያቄ በቂ ምላሽ እናገኛለን ። ይሁን እንጂ ሌሎች ሁለት ተጨማሪ ምክንያቶችም እንደሚከተለው እንመለከታለን ።

፪. የታሪክ ቀጥተኛ ተሳታፊዎች ሳያመልጡ
የሰው ልጆች በዚህች ዓለም የሚኖሩት እጅግ አነስተኛ ለሆነች እና  ማለቂያዋም ለማትታወቅ ዘመን ብቻ መሆኑን ትናንት አብረውን ከነበሩት ግን ከቀደሙን ሁሉ መረዳት አይሳንም። እየተከታተሉ መሄድ የተሠራ ሥርዓት ሆኗልና ሁላችንም ተራችንን የምንጠብቅ ነን ። በመሆኑም ቅድስት ቤተ ክርስቲያን ከሁለት ስትከፈል ያዩ፥ የሰሙ፥ እዚያው የነበሩ ጥቂት አበው በሕይወተ ሥጋ እያሉ እርቀ ሰላሙ ቢከናወን እጅግ ይመረጣል።

አበው “ማን ይናገር የነበረ ማን ያርዳ የቀበረ” እንዲሉ በቦታው በስፍራው የነበሩ ሊቃነ ጳጳሳት ባሉበት ቢከናወን ሌላ ምስክር ሌላ አብነት ፍለጋ ሳያሻ አጀንዳውን ለማጠናቀቅ የተመቸ ይሆናል።

እነዚህን አበው በእርግጠኝነት የምናገኛቸው ዛሬ ወይም አሁን ነውና አሁን ይመረጣል። ይኽ ዕድል ካመለጠ ግን በጉዳዩ ላይ የሚነጋገሩት የሚመክሩት አበው ሰማእያን ብቻ ይሆኑና እንደሰማነው በሚል አኳኋን ተነጋግረው ይግባባሉ ማለት ያዳግታል። ቋሚ ምስክሮች እያሉ መሆኑ በእጅጉ ይበጃልና አሁን ሰናይ ጊዜ ነው።

፫. ብረቱን እንደጋለ መቀጥቀጥ
ብረቱን እንደጋለ መቀጥቀጥ የሚፈለገውን ቅርጽ ለማምጣት ይመቻል። ከዘገየ ግን ብረት ብረት ነውና ለማንም አይንበረከክም። በሀገር ቤትም በውጭ ሀገርም አሁን በጎ መነሣሣት አለ። እርቀ ሰላሙ በሚፈለገው ደረጃ እንዲጠናቀቅ እጅግ በጣም በርካታ መናንያን፣ ሊቃውንት፣ ካህናት እና ምእመናን በከፍተኛ ጉጉት እና  ናፍቆት ላቅ ባለ ደረጃ ፈጣሪያቸውን እየተማጸኑ ይገኛሉ። መሬቱ ለእርሻው እና ለዘሩ ተመቻችቷል። ጉጉት በሁሉም ዘንድ አለ። ከአሳለፍናቸው ጊዜያት ሁሉ አሁን እንደጋለው ብረት የበለጠ የምንፈልገውን ቅርጽ ለማምጣት ሰናይ ዕድል አምጥቷል። ታሪክ ለመሥራት ታሪክም ለመሆንም አሁን ምቹ ጊዜ ነውና አሁን ይሁን! አዎ አሁን ይሁን! እንላለን ።

በእነዚህ ሦስት መሠረታዊ ምክንያቶች እርቀ ሰላሙ ቀጠሮ የሚያስፈልገው አይሆንም። አሁን በእጃችን ያለ እግዚአብሔር የሰጠን የእኛ የሆነ እርሱን የሚያስደስት ሥራ የምንሠራበት እንደመሆኑ መጠን መለያየትን ከአንጀታችን አውግዘን ፍቅር እና ሰላምን ወደ መንበራቸው መልሰን አምረን እና ደምቀን ደግሞም ጎልብተን ብቅ የምንልባት የዘመን ሽልማታችን ናትና እንጠቀምባት !

የመለያየቱ ጉዳት፣ የአንድነቱ ጥቅም
መለያየቱ ጉዳት እንዳለው ሁሉ አንድነቱ ደግሞ እጅግ በጣም ላቅ ያለ ጥቅም አለው። ይህንን የጉዳት እና የጥቅም አመክንዮ ሳንመለከት በደረቁ እርቀ ሰላም እርቀ ሰላም ማለቱ ብቻውን በቂ አይደለም። አሁን በምናየው ሁኔታ ቤተ ክርስቲያን እንደተከፈለች ብትቀጥል ጉዳቱ ምንድን ነው ? እርቀ ሰላም ተደርጎ ቤተ ክርስቲያን አንድ ብትሆን ምን ጥቅም አለው? የሚሉትን መዳሰሱ የሚመለከታቸው ሁሉ ጉዳዩን ተረድተው እና አምነውበት የድርሻቸውን እንዲወጡ ለማድረግ ያመቻል።

ስለሆነም በዝርዝር ለማየት አስቸጋሪ ቢሆንም ቅሉ በጥቂቱ ለማየት ያኽል ሁለቱንም በየርእሳቸው ማየቱ ጠቃሚ በመሆኑ እንደሚከተለው እንመለከታቸዋለን ።

የመለያየቱ ጉዳት
ሀ. እግዚአብሔርን ያሳዝናል
እንኳንስ የራሱ የክርስቶስ ቤተ ክርስቲያን ስትከፋፈል ቀርቶ ለትንሿ አካል ቤተሰብእ እንኳ የሚገድደው እግዚአብሔር “መለያየትን እጠላለሁ” ብሏል። ሚክ ፪፥፲፮ ። ሲጀመር ቤተ ክርስቲያን የእግዚአብሔር እንጂ የሰው አይደለችም። ይኽም ሲባል ሰው ድርሻ የለውም ለማለት ሳይሆን መሠረቷ ፣ ምሶሶውና ጉልላቱ መድኅነ ዓለም ክርስቶስ ነው ለማለት ነው። “በገዛ ደሙ የዋጃትን የእግዚአብሔርን ቤተክርስቲያን ትጠብቋት ዘንድ መንፈስቅዱስ እናንተን ጳጳሳት አድርጎ ለሾመባት ለመንጋው ሁሉ እና ለራሳችሁ ተጠንቀቁ።” እንዲል። ሥራ ፳፥፳፰ ። ቤተ ክርስቲያንን መጠበቅ ማለት ከሌላው ሥራ በተጨማሪ አንድነቷን ማጽናት ነው። ለመከፈሏ ምክንያት መሆን ይህንን አምላካዊ ትእዛዝ ማስተሀቀር ይሆናል። ደሙን ያፈሰሰላቸው ምእመናን ሲከፈሉ እንዲሁም የጌታችንን አሠረ ፍኖት ሊከተሉ የሚገባቸው አበው ሲለያዩ ለምእመናንም ለራሳቸውም አልተጠነቀቁምና የጌታቸውን ደም ከንቱ በማድረግ ሊገኝ የሚችል ጉዳት እንጂ ጥቅም የሚባል ምን ይገኛል?

በሌላ በኩልም ብርሃነ ዓለም ቅዱስ ጳውሎስ ስለ ቤተ ክርስቲያን ሲናገር “ነገር ግን ወንድሞች ሆይ ፥ ሁላችሁ አንድ ንግግር እንድትናገሩ ፣ በአንድ ልብ እና በአንድ አሳብም የተባበራችሁ እንድትሆኑ እንጂ መለያየት በመካከላችሁ እንዳይሆን በጌታችን በኢየሱስ ክርስቶስ ስም እለምናችኋለሁ።” ብሏል። ፩ቆሮ ፩፥፲ ። ይኽንን ሐዋርያዊ ቃል አለማክበር ጉዳት ሲሆን ማክበር ደግሞ ጥቅም ነው።

ለ. በታሪክም በእግዚአብሔርም ያስጠይቃል
በሌላ በኩልም አሁን በሕይወተ ሥጋ ያሉ አባቶች ይህንን ችግር ሳይፈቱት ቢያልፉ ለእነርሱ ለራሳቸውም ከፍተኛ ጉዳት በሁለት ወገን ያመጣባቸዋል። አንደኛ በታሪክ ያስጠይቃቸዋል። ታሪክ የሚመዘግበው ደጉን እየመረጠ ክፉውን እያስቀረ አይደለም። ታሪክ አይዋሽም አያደላምም። በመጽሐፍ ቅዱስ የቅዱሳን ደጋግ ሥራቸው ተጋድሏቸው የተጻፈውነ ያኽል ስህተታቸውና ወድቀታቸውም ተጽፏል። ይኸው ይትባሃል በሌሎች አዋልድ መጻሕፍትም ይገኛል። ስለዚህ በዚህ አጋጣሚ የበጎ ሥራ አሰላለፍ ውስጥ መገኘት ታሪክን ስምን እና ዝናን ማስከበር ይሆናል። በመጽሐፍ “ከመልካም ሽቱ መልካም ስም… ይበልጣል” እንደተባለ። መክ ፯፥፩። መልካም ስምን ለመትከል ይህ ጊዜ መልካም ዕድል ይዞ መጥቷል። ያለበለዚያ ግን ከታሪክ ተወቃሽነት እና ተጠያቂነት ማምለጥ አይቻልም። ማንም ሰው በታሪክ ተወቃሽ ለመሆን በክፉ ሥራ ለመታወስ የሚፈቅድ አይኖርም። ስለሆነም አባቶች ጸያፉን በማድረግ የእነርሱንም ሆነ የቤተ ክርስቲያንን ታሪክ ከማጉደፍ እንደሚቆጠቡ ይታመናል።

ሁለተኛ የታሪክ ተጠያቂ ከመሆንም በላይ የሚያስጨንቀው በነፍስም የሚጠየቁበት በመሆኑ ነው። የማንኛውም ሰብአዊ ፍጡር ነፍስ የምትቀርበው በፍቅር አምላክ ፊት ለፍቅር ብሎ ወደሞተው ጌታ መንበር ነው። ያን ጊዜ እርቀ ሰላምን ጠልታ የሄደች ነፍስ ምን መልስ ይዛ ልትቀርብ ትችላለች ? ይህንን ለአበው መንገር ለቀባሪው ማርዳት ይሆናልና ብዙ ሀተታ አያስፈልገውም። እነዚህ ሁለቱ ተያያዥነት ያላቸው አደገኛ እና የማይፈለጉ ጉዳቶች ናቸው።

ሐ. ውሎ ሲያድር የቀኖና እና የሃይማኖት ችግር ያመጣል
በተፈጠረው ልዩነት ምክንያት የተጣሰ ቀኖና ከመኖሩ ባሻገር እርቀ ሰላሙ በተጎተተ እና በተለጠጠ ቁጥር ሌላ የጎንዮሽ ችግር ይዞ ብቅ ሊል እንደሚችል መገመት አያዳግትም። በአንድ ወገን ሁለት ሲኖዶስ ሲኖር ቤተ ክርስቲያን በማይቋረጥ ሃይማኖታዊ እንቅስቃሴ ውስጥ ስለምትኖር በተለያዩ ጉዳዮች ላይ ወቅቱ እንደሚጠይቀው ሁኔታ ሥርዓት መሥራት ቀኖና መደንገግ የሚያስፈልጋቸው ጉዳዮች መከሰታቸው አይቀርም።

በእነዚህ አጋጣሚዎች ሁለቱም ሲኖዶሶች በያሉበት በአንድ ጉዳይ ላይ ተመሳሳይ ውሳኔ ሊወሥኑ እንደሚችሉ ሁሉ የተለያዩ ውሳኔዎች ለመወሰንም የማይችሉበት ምክንያት አይኖርም። በዚህ ምክንያት የአንዲት ሃይማኖት የአንዲት ሀገር ልጆች በተለያየ ቀኖና መመራት ይጀምራሉ ማለት ሲሆን ለመጠገን አስቸጋሪ የሆነ ስብራት ይፈጠራል።

በሁለተኛው ወገን ደግሞ በቀኖና ልዩነት የተጀመረው ልዩነት እያደገ ሄዶ የሃይማኖት ልዩነትን ወደ መውለድ የመስፋቱ ጉዳይ ነው። ለቀኖና እና ለሥርዓተ ቤተ ክርስቲያን መለያየት ዋስትና እንደሌለን ሁሉ በተለያየ ሰበብ አስባብ የሚመጡ ሃይማኖታዊ ልዩነቶችም ላለመከሰታቸው ምንም ዓይነት ዋስትና ሊገኝ አይችልም። ከዚኽኛው ልዩነት የከፋ አደጋ ወይም ጉዳት ከቶውኑ ሊታሰብ አይችልም። አንዲት ቤተ ክርስቲያን በእምነት ከሁለት ተከፈለች ማለት በዘመነ ርእሳነ መናፍቃን የገጠማት ትርምስ ተከትሎ ይመጣል ማለት ነው። ይህንን እጅግ መራራ እና አስከፊ ቀውስ ከወዲሁ ለመከላከል የሚቻለው ቅድስት ቤተ ክርስቲያን ወደ አንድነት እንድትመጣ ማንኛውንም መሥዋዕትነት በመክፈል ብቻ ይሆናል።

መ. ምእመናንን ይከፋፍላል
ቅድስት ቤተ ክርስቲያን አይደለም አስተዳደር፥ ወንዝ እና ተራራ፣ ቋንቋ እና ጎሳ የማይገድባት በምድር ያለች ሰማያዊት ዓለም ናት። ምድራውያን እና ሰማያውያን በአንድነት የተሰባሰቡባት የአንድነት አደባባይ ልዩ እና ቅድስት የሆነች ጉባኤ ናት። ምእመናን የዚህ እና የዚያ ነን እያሉ በመካከላቸው ያልተፈቀደ አጥር አጥረው ከትውልድ ወደ ትውልድ የሚተላለፍ የመለያየት ሸክም እያሸከሙ በማያውቀው ጉዳይ ባላጠፋው ጥፋት አንድ ከመሆን ይልቅ ለጠብ የሚፈላለግ እንዲሆን የሚያደርግ የማይሽር ጠባሳ ጥሎ ያልፋል። ይህ ቅስም ሰባሪ አደገኛ ጉዳት መሆኑን ማን ይክዳል?

ገና በሩቅ ያሉትን ወደ እቅፏ ማምጣት የሚጠበቅባት የራሷን ከበተነች ከዚህ በላይ የሚከፋ ጉዳይ ከየት ይመጣል? የጠንካሮች  አበው ቆራጥ ተጋድሎ እና የቅዱሳን ሰማዕታት ደም የፈሰሰው ለቤተ ክርስቲያን ሰላም እና ለመንጋው አንድነት እንጂ ለሌላ አልነበረም። ምእመናን ለማስቀደስ፣ ሥጋ ወደሙን ለመቀበል፣ ልጆቻቸውን ክርስትና ለማስነሣት፣ ቃለ እግዚአብሔርን ለመማር፣ እንደ ሀገር ልጅ ለመጋባት … ወዘተ ለምን ይቸገሩ? ያለጥፋታቸው ለምን ይቀጡ? ይህስ የሚያንገበግብ ጉዳት አይደለምን ?

ሠ. ውግዘት
ልዩነቱ ብቻውን የመጣ ሳይሆን በመወጋገዝ የታጀበ መሆኑ የታወቀ ነው። ቀኖና ቤተ ክርስቲያንን የጣሰው አንዱ ወገን ብቻ አይደለም። በዚህ ጉዳይ እገሌ እንጂ እኔ የለሁበትም ብሎ በከረረ መንፈስ በጠነከረ አቋም መገስገስ ራስን ማስገመት ይሆናል። በመወጋገዙ ምክንያት ከአበው ሊቃነ ጳጳሳት ጀምሮ እስከ የ፵ እና የ፹ ቀን ሕፃናት ድረስ ኀዘን አለ። ይህንን አጥንት የሚሰብር ኀዘን የሚያክል ጉዳት ከየት ይመጣል? በሕይወትም በሞትም እንደታሠሩ መኖር እጅግ ያስጨንቃል። ይህንን እንደሰሙ የሞቱ ስንቶች ናቸው ? ታስረናል ብለው የተጨነቁስ ስንቶች ይሆኑ ?

ረ. መሳለቂያ መሆን
ጊዜው በቤተ ክርስቲያን ላይ የተነሡባትን ባለ ብዙ ኅብር ጠላቶች በአንድነት፣ በኅብረት የምንጋፈጥበት ሊሆን ሲገባው በተበታተነ እና በተዳከመ ሁኔታ ለመታገል የተቀፈደድንበት መሆኑ ሌላው የመለያየቱ ጎጂ ጎን ነው። አንድነቱ የተናጋ ኃይል ነጥሎ ለመምታት ይመቻል። መለያየታችን አዳክሞናል። ከሁለቱ ሲኖዶሶች ባሻገር “ገለለተኛ” የሚባል ሌላ አካል እየተቋቋመ ከሁለት ዘርፍ ወደ ሦስት ደረጃ ልዩነቱ እያደገ መሆኑ እያነቀን የምንውጠው ሐቅ ሆኖብናል። ነገ ሌላ ምን ሊፈጠር እንደሚችል መገመት ቢከብደንም የተቃዋሚዎቻችን መሳለቂያ እና መጠቋቆሚያ መሆናችን ልባችንን እያደማው ነው።

በመጽሐፍ የመጡብንን የመጽሐፍ ቃል ጠቅሰን ማስረዳት እየሞከርን ዳዴ ማለት በጀመርንበት ወቅት ከመኖሪያ ሰፈራችን እስከ መሥሪያ ቤታችን ድረስ የቤተ ክርስቲያን መለያየት እንደ ድክመት ሲጠቀስብን መስማት አንገት ያስደፋል ደም ያስለቅሳል። ለአዳዲስ ክርስቲያኖችም ይህን ማስረዳት አዳጋች እየሆነ መጥቷል። ለልጆቻችንም ለመንገር አፍረናል። የእኛ አንገት መድፋት ሳያንስ የተተኪዎችን ቅስም መስበር እና ለተቃዋሚዎች ተላልፈን መሰጠታችንም እጅግ አድርጎ ጎድቶናል።

የአንድነቱ ወይም የእርቀ ሰላሙ ጥቅም
“ናሁ ሰናይ ወናሁ አዳም ሶበ ይኄሉ አኀው ኅቡረ- ወንድሞች በኅብረት ቢቀመጡ መልካም ነው እነሆም ያማረ ነው።” እንዲል መጽሐፍ  አንድ መሆን እጅግ በጣም የሚወደድ የሚፈለግ መንፈሳዊ ምግባር ነው። መዝ ፻፴፩፥፩ ። ብርሃነ ዓለም ቅዱስ ጳውሎስ ስለ ሰላም እንዲህ ብሎ ተናግሯል። “በንጹሕም ልብ ጌታን ከሚጠሩ ጋር ጽድቅን እምነትን ፍቅርን ሰላምን አጥብቀህ ተከተል።” ፪ጢሞ፪፥፳፪ ። ቅዱስ ዳዊትም በመዝሙር “ከክፉ ሽሽ መልካምንም አድርግ ሰላምን እሻ ተከተላትም።” በማለት ሰላምን መፈለግ ብቻ ሳይሆን ወደእርሷ መቅረብ መሄድ ወይም መጠጋት አንደሚገባ ያሳያል። መዝ ፴፬፥፲፬ ። አንድ ከመሆን የሚገኘውን ጥቅም ለማስረዳት ብዙ አዳጋች ነው ተብሎ ባይገመትም ቅሉ ለማሳያ የሚሆኑ ጥቂቶችን ማየት ያስፈልጋል።

ሀ. ከላይ በጉዳት የተቀመጡት ሁሉ ይሻራሉ
መላ አካሉ ከሁለት ተሰንጥቆ ጤነኛ ነኝ፣ ባለ ሙሉ አካል ነኝ የሚል ጤነኛ ሰው ይኖራል ማለት መቼም አይቻልም። መሰንጠቁ ቀርቶ፣ ቁስሉ ሽሮ ሙሉ አካል በሆነ ጊዜ ሙሉ ማንነቱን በማግኘቱ ማንነቱ ይከበራል ፥ ሕያውነቱም ይረጋገጣል። ቅድስት ቤተ ክርስቲያንም አንድነቷ ይመለሳል። አቅሟ ይሟላል። ኃይሏ ይደረጃል። ወደ አሰበችበት ወደ ዐላማዋ ለመጓዝም የሚከለክላት አይኖርም። የመለያየቱ ጦስ በየክፍለ ዓለሙ ተዳርሷል። የአቡነ እገሌ የአቡነ አገሌ ነኝ መባባል የተለመደ ሆኗል። ቤተ ክርስቲያን አንድ ስትሆን ይህ ሁሉ ይቀራል። አባቶች ሲለያዩ እነርሱን ተከትሎ የተከፈለው ሕዝበ ክርስቲያን አንድ ይሆናል። ስብሐት ለእግዚአብሔር የሚለው የአንድነት መዝሙር በሰማይም በምድርም ይዘመራል።

ጌታችን በመዋዕለ ሥጋዌው ከጸለያቸው ጸሎቶች አንዱ “…ቅዱስ አባት ሆይ፥ እነዚህን የሰጠኸኝን እንደ እኛ አንድ እንዲሆኑ በስምህ ጠብቃቸው።” የሚለው ይገኝበታል። ዮሐ ፲፯፥፲፩ ። ቀድሞውንም የአምላካችን ፈቃድ እኛ አንድ እንድንሆን ነው። ቤተ ክርስቲያን አንድ ሳትሆን እኛ አንድ መሆን አንችልም። እርሷ አንድ ስትሆን እግዚአብሔር ይደሰታል ፥ መሥዋዕቱ ያርጋል ፥ ጸሎታችን ቅድመ እግዚአብሔር ይደርሳል ፥ ግዳጅም ይፈጽማል ፥ ምእመናን አንድ ይሆናሉ ፥ ውግዘት ይነሣል ፥ ቤተ ክርስቲያን ኃይሏ ይጠነክራል ፥ ጠላቶች ያፍራሉ።

ለ. አቅም ይዳብራል
የተበታተነው ኃይል ፣ አስተሳሰብ ፣ ሙአለ ንዋይ ወደ አንድ መዝገብ ይመጣል። ያሰብነውን ለመሥራት፣ ሮጠን ለመቅደም መደጋገፍ እንችላለን ። ቤተ ክርስቲያን ወደ ተልእኮዋ ካለፉት ጥቂት ዘመናት እጅግ በጣም በተሻለ ሁኔታ ተፋጠናለች ፥ ትቀርባለችም። አቅም ሲጠናከር ስብከተ ወንጌልን በዓለም ዙሪያ ለማዳረስ የተሻለ ቀን ይመጣል። መሠረታዊ የልማት ሥራዎችን ለመሥራት በሩ የበለጠ ይከፈታል። መተማመን እና መዋደድ የቤተ ክርስቲያንን ልጆች የበለጠ ያስተሳስራቸዋል።

ወደጥንተ ጠላታችን ፊታችንን አዙረን መንፈሳዊ ተጋድሏችንን እናጠናክራለን። በአንድነት ፊት መቆም የማይችለው የመለያየት አባት ከመንገዳችን ይወገዳል። የቅድስት ቤተ ክርስቲያን ግርማ ሞገሷ ይመለሳል። ጥንታዊ እና ሐዋርያዊ አደራዋን ለመወጣት የውስጥ አቅሟ መደርጀት ብዙ ያራምዳታል። ካሰበችበት እንዳትደርስ የሚከለክላት የአቅም እንቅፋት ቀስ በቀስ ይከስማል። የሁላችንም ፍላጎት በመንፈሳዊውም ሆነ በምጣኔ ሀብታዊ ልማት የጠነከረች፣ ለዐላማዋ የቆመች፣ በጽናት የምትታገል፣ ለዓለም የምታበራ አንዲት ቤተ ክርስቲያን እንድትኖር ነውና ።

ሐ. የመለያየት በር ይዘጋል
ቅድስት ቤተ ክርስቲያን ጥንታዊት፣ ሐዋርያዊት እና አሐቲ ናት። ይህም ማንነቷ ከትውልድ ወደ ትውልድ ተጠብቆ የሚቀጥል ማንነት ነው። ስለ ወንጌል አገልግሎት ስለ ቤተ ክርስቲያን መስፋፋት በተደረገ ምክክር የሀሳብ ልዩነት በእኛ ብቻ ሳይሆን በቅዱሳን ሐዋርያት ዘመንም የነበረ መሆኑን ከመጽሐፍ ቅዱስ እንማራለን። የቀደሙት አበው የሀሳብ ልዩነታቸው እንኳ የተሻለ ከመሻት ለአንድ ዓላማ ለአንዲት እምነት በሚጠቅም ሃይማኖታዊ ፍቅር እንጂ ለግል ፍላጎት ወይም ዝና እና ክብር ከመጨነቅ አልነበረም። በዚያም ልዩነታቸው ውስጥ መንፈስ ቅዱስ ሥራውን ይሠራ ነበር ።

ይህንን አብነት በማድረግ አባቶች ልዩነት ቢኖር እንኳ የለማንም ጣልቃ ገብነት ጽርሐ ጉባኤያቸውን ዘግተው እግዚአብሔርን ይዘው ተመካክረው እና ተወቃቅሰው የሚበጀውን ያደርጋሉ እንጂ ለሌላ መከፋፈል እና መለያየት የሚከፈት በር አልነበራቸውም።

ያጠፋ ሲገኝም ተመክሮ እና ተዘክሮ እርሱም ጥፋቱን ቀኖና ቤተ ክርስቲያን በሚፈቅደው መንገድ ውሳኔውን አምኖ እንዲቀበል ይደረጋል እንጂ በእምቢተኝነት መለየትን አይናፍቅም አይፈለግም።

እርቀ ሰላሙ አንድ ጊዜ ከተጠናቀቀ ወደፊት ባለፈው የከፋ መንገድ ለመሄድ የሚጓጓ አይኖርም። ሁሉም የችግሩ ገፈት ቀማሽ ነበረና ያንን የመለያየት ጊዜ የሚመኝ ይኖራል ተብሎ አይታሰብም። ከኖረም ጤነኝነቱ ጥያቄ ውስጥ የወደቀ ይሆናል።  እርቀ ሰላሙ አንዴ በአስተማሪ ሁኔታ ከተፈጸመ በኋላ የፈለገው ችግር ቢመጣ ያለመለያየት በተጋድሎ በመጽናትና ፈጣሪን ደጅ በመጥናት የማይመጣ ለውጥ አይኖርም። እርቀሰላሙ በሰላም ከተጠናቀቀ ለአንዴ እና ለመጨረሻ ጊዜ የመለያየትን በር መዝጋት ይቻላል። ልዩነቶች ሁሉ በውይይት የሚፈቱበት መንገድ ይዘረጋል። ከዚያ በኋላ መጥፎውን ጎዳና ማንስ ይሻዋል? እግዚአብሔርን የሚፈራ በዚያ መንገድ ለመሄድ የሚጓጓ ከአንግዲህ ወዲያ አይገኝም። ቅድስት ቤተ ክርስቲያን የውይይት ማዕድ ዘርግታለች እና ከማዕዱ በመሳተፍ በተወደደችው እምነት ለዘለዓለሙ መኖር ይቻላል።

መ. ለአብነት መብቃት
የተፈጠረው መለያየት በመግባባት እና ይቅር ለእግዚአብሔር በመባባል በአትኅቶ ርእስ ቢጠናቀቅ ከላይ ከተጠቀሱት መሠረታዊ ጥቅሞች በተጓዳኝ ለአብነት ወይም ለአርአያነት ወይም ለምሳሌነት የሚበቃ አንድ ታሪክ ይጻፋል ማለት ነው። አባቶች የሚናገሩትን መኖር ይጠበቅባቸዋል። እነርሱ በሕይወት በምግባር ወንጌልን ተርጉመው እንዲያስተምሩ የሁሉም ሕዝበ ክርስቲያን ጉጉት ነው። ቤተ ክርስቲያን በእርቀ ሰላም መንገድ ችግሯን መፍታት ከቻለች የእርቅን አስፈላጊነት ከማስተማር አልፋ በተግባር ትሰብካለች። የዚህም ድርጊት አስተማሪነት ለዘለዓለሙ ሲጠቀስ የሚኖር ይሆናል። እርቅን በተግባር ማስተማር የቤተ ክርስቲያን ተቀዳሚ ሓላፊነት ነውና በተለያየ መንገድ የተቃቃሩ እና የተለያዩ ሁሉ እርሷን አብነት እያደረጉ ፈለጓን እንደሚከተሉ የታመነ የታወቀ የተረዳ ነገር ነው።

በዚህም መንገድ ይጠቅማልና ይህንን ፈርጀ ብዙ ጥቅም ሊያመጣ የሚችል ድርጊት መፈጸም ይዋል ይደር የማይባል መሆኑን እንወቅ እንረዳ እና ስተምር እና ለተግባራዊነቱ የሚጠበቅብንን እንወጣ ።

ማጠቃለያ
በሚሳለቁብን ዘንድ ተጨማሪ ጥቅስ እንደሰጠን መቀጠል ሕማም ሆኖብናል። የልብ ስብራታችን እንደሆነ አንገታችንን እንዳስደፋን ረዥም ዘመናት በጉስቁልና እና በኀፍረት ቆይተናል። አባቶቻችን በስምምነታቸው ሊፈውሱን ይገባል። የምንጠብቀው በሰላም በፍቅር መጠናቀቁን ነው። ይሁን እንጂ ምናልባት የማይቻልበት ሁኔታ ካለም እንኳ ጉዳዩ ከመጀመሪያ አስከ መጨረሻ የነበረው ሒደት ለሁሉም በግልጽ ተብራርቶ በጋራ ውሳኔ የሚዘጋበት ሁኔታ መፈጠር አለበት።

እርቀ ሰላሙ መስመር ይዞ እንዲጠናቀቅ የተለያዩ ቴክኒካዊ ድጋፎች የሚያደርጉ አካላት በአግባቡ ቢደራጁ የበለጠ ሰናይ ይሆናል። ተደራዳሪዎች በባለሙያዎች ምክር መደገፍ ይኖርባቸዋል። ከዘገባ ጥንቅር ጀምሮ ፣ አማራጭ ሀሳቦችን በማቅረብ፣ ጥቅምና ጉዳትን እየተነተኑ ለቅዱስ ሲኖዶስ አባላትም ሆነ ለተደራዳሪ አባቶች እያቀረበ የሚያስወስን አካል ቢኖርም ይመረጣል እና በአስቸኳይ ተግባራዊ የሚደረግበት ሁኔታ መፈጠሩ አንድና ሁለት የለውም።

እነዚህን ሁሉ ሀሳቦች ግምት ውስጥ በማስገባት እገሌ ወእገሌ በመባባል ሓላፊነትን ከራሳችን ላይ ለማሸሽ ከሞመከር ተቆጥበን የየድርሻችንን እግዚአብሔርን በጸሎት ደጅ ከመጥናት ጋር ከአሁን ጀምሮ በመረባረብ ቤተ ክርስቲያናችንን የማዳን አደራችንን ልንወጣ ያስፈልጋል። ጉዳዩ የእኛ እና የእኛ ብቻ ይሁን ። አኛም ያለስንፍና ሥራችንን ያለቀጠሮ እንጀምር። ከአባቶቻችን ጋር የነበረ እግዚአብሔር ከእኛም ጋር ነውና እንደማያሳፍረን እንመን ። ያደርግልናልና አንጠራጠር። ከተመልካችነት እና ከታዛቢነት ወጥተን የባለቤትነት ሥራ እንወጥን ። ቤቱ ሲፈርስ ቆሞ የሚመለከት ማንም የለም። ቅድስት ቤተ ከርስቲያናችን የዘለዓለም ቤታችን ናት እና እንድረስላት ። አያገባችሁም አይመለከታችሁም የሚሉትን አንስማ። አንዲት እናት ብዙ ትወልዳለች። ከልጆቿ መካከል አንዱ ሌላውን በእናታችን ጉዳይ አይመለከትህም ሊል አይችልም። ቤተ ክርስቲያን ደግሞ የሁሉም እናት ናት ። ከሆነች ዘንዳ ሁሉም ጉዳይዋ እንደየደረጃው እና እንዳለን ዕውቀት ይመለከተናል። በመሆኑም ከመመካከር ጀምሮ በሚመለከታቸው አካላት ላይ ተጽዕኖ እስከማሳደር የሚዘልቅ አልፎ ተርፎም በያለንበት ቦታ ሊሠራ የሚገባውን መሥራት አለብን ። የድርሻችንን ተወጥተን የቤተ ክርስቲያን አንድነት ተመልሶ በፍቅር እንባ ለመራጨት ያብቃን !


Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)