August 23, 2012

የብፁዕ ወቅዱስ ፓትርያርክ አቡነ ጳውሎስ ሥርዐተ ቀብር ዛሬ ይፈጸማል


  • የኮፕት ኦርቶዶክስ ተዋሕዶ ቤተ ክርስቲያን ዐቃቤ መንበር ይገኛሉ።
  • አቶ መለስ ዜናዊ (ገብረ እግዚአብሔርበጸሎተ ቅዳሴው ታስበዋል።
  • ጊዜያዊ ጠ/ሚ ኃ/ማርያም ደሳለኝ ይገኛሉ።
(ደጀ ሰላም፤ ነሐሴ 17/2004 ዓ.ም፤ ኦገስት 23/ 2012/ READ THIS NEWS IN PDF)፦  የኢትዮጵያ ኦርቶዶክስ ተዋሕዶ ቤተ ክርስቲያን አምስተኛው ፓትርያርክ ብፁዕ ወቅዱስ አቡነ ጳውሎስ ሥርዐተ ቀብር ዛሬ፣ ነሐሴ 17 ቀን 2004 ዓ.ም በ6፡00 በመንበረ ጸባዖት ቅድስት ሥላሴ ካቴድራል ይፈጸማል፡፡ ትናንት በመንበረ ፓትርያርክ ቅድስተ ቅዱሳን ማርያም ቤተ ክርስቲያን ጸሎተ ቅዳሴ ተከናውኗል፡፡ በዚህ ወቅት የቅዱስ ሲኖዶስ ዋና ጸሐፊ ብፁዕ አቡነ ሕዝቅኤል እንደተናገሩት÷ “የቤተ ክህነቱም የቤተ መንግሥቱም መሪዎቻችን በአንድ ቦታ እንገናኝ ብለው የተቃጠሩ ይመስል በአንድ ወቅት ተጠርተው ሄደዋል፡፡ ሁለቱንም መሪዎች ተራ በተራ እንሸኛቸዋለን፤ ተራ በተራ ነው የምንሸኛቸው፤” ብለዋል፡፡


ነሐሴ 15 ቀን 2004 ዓ.ም፣ ከሌሊቱ 5፡40 በተወለዱ በ57 ዓመታቸው ከዚህ ዓለም በሞት መለየታቸው የተነገረው የኢ.ፌ.ዴ.ሪ ጠቅላይ ሚኒስትር አቶ መለስ ዜናዊ በጸሎተ ቅዳሴው ላይ ታስበዋል፡፡ በትግራይ ዐድዋ ቅድስት ሥላሴ ቤተ ክርስቲያን /ደብርኪ/ ሰበካ ተወልደው ማደጋቸው የተነገረው አቶ መለስ ዜናዊ÷ በጥምቀተ ክርስትና መጠሪያ ስማቸው ገብረ እግዚአብሔር እንደሚባልም ተገልጧል፡፡

የቅዱስነታቸው አስከሬን ትናንት 8፡30 ላይ በልዩ ሠረገላ ላይ ኾኖ ከመንበረ ፓትርያርክ ቅድስተ ቅዱሳን ማርያም ቤተ ክርስቲያን ተነሥቶ ወደ ካቴድራሉ ሲያመራ፡- ከአዲስ አበባ ሀገረ ስብከት ገዳማትና አድባራት ሰንበት ት/ቤቶች የተውጣጡ መዘምራን፣ የገዳማትና አድባራት አስተዳዳሪዎች፣ የአዲስ አበባ ፖሊስ ኮሚሽን ማርሽ ባንድ፣ ብፁዓን ሊቃነ ጳጳሳት፤ የቅብጥ፣ ሶርያ፣ ሕንድና አርመን ኦርቶዶክስ ተዋሕዶ አብያተ ክርስቲያን፣ የግሪክ ኦርቶዶክስና ቫቲካን ተወካዮች፣ የዓለም አብያተ ክርስቲያን ም/ቤት እንግዶች እንዲሁም በርካታ ምእመናን - በተጠቀሰው ቅደም ተከተል - አጅብውታል፡፡ የአራዳ ክፍለ ከተማ ፖሊስ የክብር ዘብም የብረት ሰላምታ ሰጥቷል፡፡

አስከሬኑ በካቴድራሉ እንደ ደረሰ የሠርክ ጸሎተ ኪዳን ተደርሷል፡፡ ዐቓቤ መንበረ ፓትርያርክ ብፁዕ አቡነ ናትናኤል እና በኢየሩሳሌም የኢትዮጵያ ገዳማት ሊቀ ጳጳስ ብፁዕ አቡነ ማቲያስ አጭር ቃለ ምዕዳን ሰጥተዋል፡፡ ዐቃቤ መንበረ ፓትርያርክ ብፁዕ አቡነ ናትናኤል ሲናገሩ፡- “የቤተ ክህነቱንም የቤተ መንግሥቱንም መሪዎቻችንን በአንድ ወቅት አጥተናል፡፡ እግዚአብሔር ሰጠ፣ እግዚአብሔር ነሳ ብለን መጸለይ ይኖርብናል፤” ብለዋል፡፡ ሌሊቱን ጸሎተ ማሕሌቱ ሲከናወን አድሯል፤ ቅኔዎችም ቀርበዋል፡፡

በዛሬው የብፁዕ ወቅዱስ ፓትርያርኩ ሥርዐተ ቀብር አፈጻጸም ከንጋቱ 12፡00 ላይ በመንበረ ጸባዖት ቅድስት ሥላሴ ካቴድራል የተጀመረው ጸሎተ ቅዳሴ ብፁዓን ሊቃነ ጳጰሳትና የአኀት አብያተ ክርስቲያን ተወካዮች ባሉበት ተከናውኗል፤ በአሁኑ ሰዓት ጸሎተ ፍትሐቱ እየተጠናቀቀ ይገኛል፤ በይቀጥላል የአኀት አብያተ ክርስቲያን ተወካዮች በየቋንቋቸው ለቅዱስነታቸው ጸሎት ያደርጋሉ፡፡ ይኸውም የቅብጥ ኦርቶዶክስ ተዋሕዶ ቤተ ክርስቲያን ዐቃቤ መንበር ከአምስት ልኡካን ጋራ፣ የሕንድ ኦርቶዶክስ ተዋሕዶ ቤተ ክርስቲያን ተወካዮች ከአምስት ልኡካን ጋራ፣ የአርመን ተወካዮች ከሦስት ልኡካን ጋራ፣ የሶርያ ቤተ ክርስቲያን ተወካይ ጸሎት የሚያደርጉት ጸሎት ነው፡፡ ይህ ዜና በሚጠናቀርበት ሰዓት የቅብጥ፣ የሕንድና የአርመን መንበረ ፓትርያርክ ተወካዮች ጸሎት አድርገዋል፡፡

በውስጥና በዐውደ ምሕረቱ በርካታ አገልጋዮችና ምእመናን ተገኝተዋል፤ በዐውደ ምሕረቱ ላይ በተወሰነ መልኩ መገፋፋትና መጨናነቅ ይታያል፡፡ የውስጥ ሥርዐቱ እንደተጠናቀቀ የቅዱስነታቸው አስከሬን በክብር ታጅቦ ወደ ዐውደ ምሕረት ወጥቶ በተዘጋጀለት ቦታ ያርፋል፤ የሊቃውንቱ ያሬዳዊ ወረብ፣ የሰንበት ት/ቤት ወጣቶች መዝሙሮች፣ የሊቃውንተ ቤተ ክርስቲያን ቅኔዎች ይቀርባሉ፡፡ በብፁዕ አቡነ ገሪማ የተዘጋጀው የብፁዕ ወቅዱስ ፓትርያርክ ዜና ሕይወትና ሥራዎች ይደመጣሉ፡፡

ከመንግሥት - የኢ... ፕሬዝዳንት ተወካይ፣ ጊዜያዊ ጠቅላይ ሚኒስትር አቶ ኀይለ ማርያም ደሳለኝ፣ የአኀት አብያተ ክርስቲያን አባቶች፣ የምሥራቅ አብያተ ክርስቲያን ተወካዮች - የሩስያ፣ የግሪክ፣ ሊባኖስ፤ የሮም ካቶሊካዊት ቤተ ክርስቲያን ፖፕ ተወካይ የፖንቲፊካል ካውንስል ካርዲናል የኖርዌይ ቤተ ክርስቲያን ሊቀ ጳጳስ፣ የዓለም አብያተ ክርስቲያን /ቤት ዋና ጸሐፊ፣ የዓለም ሃይማኖቶች /ቤት ለሰላም ተወካይ፣ የሁሉም የአፍሪካ አብያተ ክርስቲያን /ቤት ዋና ጸሐፊ፣ የኢትዮጵያ የሃይማኖት ተቋማት የጋራ ጉባኤ ተወካይ ንግግሮች ያደርጋሉ፡፡

ልዑል እግዚአብሔር የቅዱስነታቸውን ነፍስ ያሳርፍልን፤ ከማኅበረ ቅዱሳን ይደምርልን፡፡
ተጨማሪ ዜናዎችን ይከአታተሉ፤
ቸር ወሬ ያሰማን፤
አሜን፡፡

6 comments:

Kebede Bogale said...

ስደተኛው አባት ወደ መንበራቸው ይመለሱ !
በሀገር ውስጥ ያለው ሲኖዶስ በስደት ያሉትን ፓትርያርክ ብፁዕ ወቅዱስ አቡነ መርቆሬዎስን መልሶ መንበሩ ላይ ማስቀመጥ ሲገባው ሌላ መርጦ ቢያስቀምጥ ቤተ ክርስቲያኒቱ ከሁለት መከፈሏን በማጽደቅ ሃላፊነቱን ወሰደ ማለት ነው። ይህ እንዳይሆን በውጭም ሆነ በሀገር ውስጥ ያለነው የቤተክርስቲያኒቱ ካህናትና ምዕመናን፣ ክፍለ ሀገር ፥ ቋንቋና ነገድ ሳይለየን እንደ አንዲት ቤተ ክርስቲያን ልጆች ለእናት ቤተ ክርስቲያናችን አንድነትና ስርአት መጠበቅ በህብረት ቁመን ይህን አዲስ ሹመት መቃወም አለብን። የቤተ ክርስቲያንን አንድነት በማስጠበቅ ፋንታ የቡድን ወይም የድርጅትን ጥቅም ለማስቀደም ደፋ ቀና ማለት አሁን መቆም አለበት። ክርስቲያናዊ ስነምግባርም አይደለም። የቤተ ክርስቲያን አባቶች ከሁሉም በላይ ማሰብ ያለባቸው ስለቤተ ክርስቲያኒቱ አንድነት እንጅ ስለግል ምቾታቸው መሆን የለበትም። ዓለማውያን ገዚዎች የሚፈልጉት ለዓለማዊ ሥራቸው የሚስማማቸውንና የሚተባበራቸውን ሰው ስለሆነ እንዲመረጥላቸው የሚፈልጉት ፥ የቤተ ክርስቲያን አባቶች ደግሞ የሰማያዊው መንግስት ወኪል ለሆነችው አሓቲ ቤተ ክርስቲያን አንድነትና ሰላም የሚመቸውን ሥራ ነው እንዲሰሩ የሚገደዱት። ዓለማዊ የሆነው መንግስትና ሰማያዊው መንግስት የማይጣጣሙ መሆናቸው እስከታወቀ ድረስ ፥ የቤተ ክርስቲያን አባቶች ደግሞ ለሁለቱ ተቃራኒ ጌቶች አገልጋዮች መሆን እንደማይችሉ የሚከተለው መለኮታዊ ቃል ያረጋግጣል። <> ማቴ. 6 ፡24 .
ይህ የሰው ቃል አይደለም ፣ የራሱ የመዳኅኒታችን የኢየሱስ ክርስቶስ ቃል በወንጌለ መንግሥቱ ተጽፎ የምናገኘው ማንም ሰው ሊያስተካክለው /amend ሊያደርገው የማይችል ዶግማ ነው። ይህን ቃል ነው የቤተ ክርስቲያን አባቶች የመጠበቅ ግዴታ ያለባቸው። ለዚህ ቃል ነው አባቶች መገዛት ያለባቸው። ለዚህ ቃል ነው እንደ ሰማዕታት መሞትም ሆነ መኖር ያለባቸው። ሌላው እንዲያደርገው መናገር ወይም ማስተማር ብቻ በቂ አይደለም ፥ ‘’ከመዝ ንግሩ ወከመዝ ግበሩ’’ እንዳለው ሥራውንም ሠርቶ ማሳየት ነው እንጅ። ‘’በፁዓን” የሚለውን ቅዱስ ቃል የመጠሪያ ማዕረጋችሁ ያደረጋችሁ አባቶች ይቅር ስለእግዚአብሔር ተባብላችሁ ፥ ሠለሥቱ ምዕት የሠሩትን ሥራት ጠብቃችሁ ለተከታዩ ትውልድ ማስረከብ መንፈሳዊ ግዴታ አለባችሁ። መነኮስሰ ምውት ውእቱ እምፍትወተ ዛቲ ዓለም የተባላችሁ አባቶች የዚህን ዓለም ገዥዎች በዓለማዊ ሥራቸው ልትመስሏቸውም ሆነ ልትተባበሯቸው አይገባም። እናንተ ናችሁ እንደ መጥምቁ ዮሐንስና ዮሐንስ አፈወርቅ ሁናችሁ እነሱ ፍርድ እንዳያጓድሉ ፥ ድሀውን እንዳይበድሉ ተጽእኖ ማሳደር ያለባችሁ እንጅ እነሱ አይደሉም የናንተ አርዓያዎች መሆን የሚገባቸው። ተልዕኳችሁና መንገዳችሁ የተለያየ ነውና ! ሊቃነ ጳጳሳት ሁናችሁ ስትሾሙ ዓለማዊ የነበረውን ስማችሁን ትታችሁ በጻድቃን፥ በሰማዕታት፥ በነቢያትና በሐዋርያት ስም የምትጠሩት ከዓለማዊ ተግባር ለመለየታችሁ ልዩ መታወቂያችሁ እንደሆነ እናንተ ብፁአን አባቶች ከኔ ከአንድ ኃጢአተኛ ግለሰብ የበለጠ ታውቁታላችሁ።
ይች መንበር ለአንድ አባት እንጂ ለሁለት መሆን እንደማይገባት እያወቃችሁ በድጋሚ ይህን ብታደርጉ አንዲት ሴት ሁለት ባሎች እንድታገባ እንደፈቀዳችሁ ቁጠሩት። ወንጌሉ እንደሚለው ሴቷ ባሏ በህይወት እያለ ሌላ ወንድ ብትይዝ አመንዝራ እንደምትባልና ባሏ ከሞተ በኋላ ግን ሌላ ባል ብታገባ አመንዝራ እንደማትባል ነው። አንዲት የፓትርያርክ መንበርም መጀመሪያ የተሾመው አባት በህይወት እያለ ሌላ እንዲቀመጥባት ማድረግ የሴቷ ምሳሌ ነው የሚሆነው።
ይህ ሕገ ወጥ ድርጊት 2 ጊዜ ተፈጽሟል። የመጀመሪያው ነብሰ ገዳዩና አልቦ እግዚአብሔር ያለው ደርግ ብፁዕ ወቅዱስ አቡነ ቴዎፍሎስን አውርዶ ገና ከመግደሉ በፊት ብፁዕ ወቅዱስ አቡነ ተክለ ሃይማኖትን ባሾመ ጊዜና ደርግን የተካው መንግሥት ብፁዕ ወቅዱስ አቡነ መርቆሬዎስን አውርዶ አቡነ ጳውሎስን እንዲሾሙ በማድረጉ ነው። ስለዚህ አሁን በፈቃደ እግዚአብሔር ከሁለቱ አንዱ አርፈዋል፣ መጀመሪያ የተሾሙት ግን አሁንም በሕይዎት አሉ። ይህም በመሆኑ የተበላሸው እንዲስተካከል ፥ የተጣሰው ቀኖና ቤተ ክርስቲያን እንደገና ታርሞ ነባር ሥራቱን ጠብቆ እንዲሄድ የሚደረግበት ሁኔታ ተፈጥሮአልና በውጭም ሆነ በውስጥ ያላችሁ ብፁአን አባቶች ይህን መልካም አጋጣሚ ተጠቀሙበት። ወነአምን በአሓቲ ቅድስት ቤተ ክርስቲያን እንተ ላዕለ ኩሉ ጉባዔ ዘሐዋርያት እያልን የሠለሥቱ ምዕትን ጸሎት እንድንጸልይ እርዱን። እኛ የውስጡ ነን እኛ የውጩ ነን እያልን ለ20 ዓመት የአንዲት ቤተ ክርስቲያን ልጆች ተከፋፍለን የቆየንበት ሁኔታ መቆም አለበት። ይህ እንዳይደረግ እንቅፋት የሚሆነውን የዲያብሎስ ሃይል በመንፈስ ቅዱስ ሃይል ታግላችሁ ድል መምታት አለባችሁ። መንግሥትም ሆነ ሌላ የፖለቲካ ሃይል በመንፈስ ቅዱስ አመራር ላይ ዳግም ጣልቃ ገብቶ ቤተ ክርስቲያንን አንድ እንዳታደርጉ ታግሎ ሊያሸንፋችሁ አይገባም።
ስደተኛውን አባት መልሱና በቅድስት አገራችን ውስጥ ያለውን የፖለቲካ ልዩነትም በብሔራዊ እርቅ እዲፈታ ቤተ ክርስቲያኒቱ ከሁሉም የፖለቲካ መስመር ነፃ ሁና የማስታረቅ ሚናዋን እንድትጫወት አድርጉ። በመንፈስ ቅዱስ የበላይ መሪነትና ጠባቂነት የሚመራው ቅዱስ ሲኖዶስ የተቀደሰ ሥራው የተለያዩትን አንድ ማድረግ ፥ የተጣሉትን ማስታረቅ፥ የታሠሩትን ማስፈታት ፥ የተሰደዱትንና የታጋዙትን ወደናት አገራቸው እንዲመለሱ ማድረግ ነው። አገራችን ኢትዮጵያ በጎሳና በሃይማኖት ግጭት ምክንያት የመከፋፈል አደጋ ያሰጋታል የሚሉ ብዙ ዓለም አቀፍ ጠበብቶች እያስጠነቀቁ ነው። ታድያ ይህ አደጋ እንዳይገጥማት ብሔራዊ መግባባትና እርቅ ዋናው መከላከያ መሳሪያ ነው። ይህን ብሔራዊ መግባባትና እርቅ ለማምጣት ደግሞ ከቤተ ክርስቲያናችንና ሌሎች ኢትዮጵያውያን ከሆኑ የእምነት ተቋማት የተሻለ ሌላ ሃይል አለ ተብሎ አይገመትም። ይህ ሁሉ የሚሆነው ግን የቤተ ክርስቲያኒቱ አባቶች መጀመሪያ እራሳችሁ ታርቃችሁና አንድነታችሁን ጠብቃችሁ ለሌሎች አርዓያነታችሁን ማሳየት ስትችሉ ብቻ ነው ። እናንንተ ይህን ሳታደርጉ ዓለማውያንን ታረቁና አንድ ሁኑ ብትሉ ፥ ዓለማውያኑ የት የምታውቁትን እርቅና አንድነት ነው እኛ እንድናደርገው የምትነግሩን የሚል መልስ ነው የሚሠጡት።
ስለዚህ ጊዜ ሳትሠጡ ቅዱስ አባታችንን መልሳችሁ መንበሩ ላይ በማስቀመጥ አንድ ወጥ አመራር በውጭም ሆነ በውስጥ ላለነው ምዕመናን ልጆቻችሁ እንድትሰጡና ለብሔራዊ እርቅና መግባባት የመጀመሪያው አርዓያዎች እንድትሆኑ በቤተ ክርስቲያን ራስ በሆነው በራሱ በጌታችንና በአምላካችን በኢየሱስ ክርስቶስ ስም እማጸናችሁ አለሁ።
ከቤተ ክርስቲያኒቱ ምዕመን አንዱ የሆንኩ ከበደ አገኘሁ

Anonymous said...

DS: Tahnk you for the "reportage"

But for this sentence:
"ልዑል እግዚአብሔር የቅዱስነታቸውን ነፍስ ያሳርፍልን፤ ከማኅበረ ቅዱሳን ይደምርልን፡፡"

I can see you are going to get in trouble. Brace for it, I tell you.

Peace,
YeAwarew

Anonymous said...

" ስደተኛው አባት ወደ መንበራቸው ይመለሱ ! "
ለምን ገዳም አልግቡም ???????????
========================
ማን አሰደዳቸው? ሞት ፈርተው ነውጂ ወደ አለማዊዩ አሜሪካ የገቡ፤ አገራችን እንኳን አቡነ መርቆሬወስን ወንበዴ የሚያስጠጋ ገዳሞች ሞልቷታል። ሀይማኖታችንን ከሁለት ከመክፈል ለምን በገዳም ሁነው ለሕዝባቸው አቤት አላሉም። የመረጡት ይህችን አለም ነው እየኖሩባት ነው። አንበሳው እስኪሄድለት እንደሚጠብቅ ጅብ በአሜሪካ ዋሻ ተደብቀው ኑረው ዛሬ ብቅ ሊሉ ከፈለጉ፤ እግዚአብሔርን ደስ ሊያስኙት የሚችሉ አይመስለኝም።
ነገር ግን በእርሳቸው (አቡነ መርቆሬወስ) ስር ሆነው የኢትዮጵያ ኦተቤክርስቲያንን የሚያገለግሉትን ጳጳሳትና ቄሳውስት የቀጣዩ ፓትርያርክ እንዲቀበላቸው ምኞቴን ልገልጽ እወዳለሁ።

Berhanu Melaku said...

ይድረስ ለአቶ Kebede Bogale...August 24, 2012 1:39 AM

" ስደተኛው አባት ወደ መንበራቸው ይመለሱ ! " ማን አሰደዳቸው?
ለምን በቃኝ ብለው ወደ ገዳም አልገቡም ???????????
=================================
ሞት ፈርተው ነው እንጂ ወደ ዓለማዊት አሜሪካ የገቡ፤ ማንም አሰደዳቸው" ስልጣናቸውን አላግባብ ተቀምተዋል? አዎ በዚያ እንስማማለን። ይሁን እንጂ ወደ አሜሪካ ሄደው ሌላ ሴኖዶስ በሃይማኖታችን ላይ መመስረታቸው ትልቅ ስተት ነው። አገራችን እንኳን አቡነ መርቆሬወስን ወንበዴ የሚያስጠጋ ገዳሞች ሞልቷታል። ሀይማኖታችንን ከሁለት ከመክፈል ለምን በገዳም ሁነው ለሕዝባቸው አቤት አላሉም። የመረጡት ይህችን አለም ነው እንደ ምርጫቸውም እየኖሩባት ነው። ዛሬ ግን አንበሳው እስኪሄድለት እንደሚጠብቅ ጅብ በአሜሪካ ዋሻ ተደብቀው ኖረው ቀን የወጣ ሲመስላቸው ብቅ ሊሉ ከፈለጉ፤ በዚህ እግዚአብሔርን እና የ ኦ.ተ ምዕመንን ደስ ሊያስኙት የሚችሉ አይመስለኝም።
ነገር ግን በአቡነ መርቆሬወስ ስር ሆነው የኢትዮጵያ ኦ.ተ.ቤ. ክርስቲያንን የሚያገለግሉትን ጳጳሳትና ቄሳውስት የቀጣዩ ፓትርያርክና ቅዱስ ሴኖዶስ እንዲቀበላቸው ምኞቴን ልገልጽ እወዳለሁ።

Anonymous said...

Thank you Berhanu! God bless you.

John 10:27
My sheep hear my voice, and I know them, and they follow me:

John 10:1-16
“Truly, truly, I say to you, he who does not enter the sheepfold by the door but climbs in by another way, that man is a thief and a robber. But he who enters by the door is the shepherd of the sheep. To him the gatekeeper opens. The sheep hear his voice, and he calls his own sheep by name and leads them out. When he has brought out all his own, he goes before them, and the sheep follow him, for they know his voice. A stranger they will not follow, but they will flee from him, for they do not know the voice of strangers.” ...

Kebede Bogale said...

እኔ አንድ ፓትርያርክ ዓለማዊ መንግሥት ከመንበሩ ሲያሰድደው ወደ ገዳም ይግባ የሚል የቀኖናም ሆነ የዶግማ መፃሕፍት አላነበብኩም። ወሶበ ይሰድዱክሙ በውስተ ዛቲ ሀገር ጉዩ ውስተ ካልዕታ ። አማን እብለክሙ ኢይትፌጸማ አህጉረ እስራኤል እስከ ሶበ ይመጽእ ወልደ እጓለ እመሕያው ። የሚል ቃል ነው ማቴዎስ 10 ቁጥ. 23 ላይ ተጽፎ የማነበው እንጅ አንድም ቦታ ላይ ሊቃነ ጳጳሳት ገዳም ገብተው ይደበቁ የሚል ትእዛዘ ወንጌል የለም። አዎ አንዳንዶቻችሁ በከርስትና ስም የየግል ፍላጎታችሁን ስለሆነ እንድሆን የምትፈልጉት ቀኖና ቤተ ክርስቲያን እንዲጠበቅ የምታሳዩት ጥረት የለም። በዚህም ምክንያት ማን ምን መሆኑን ማወቅ የማንችልበት ዘመን ላይ ሆነናል። ብፁዕ ወቅዱስ አቡነ መርቆሬዎስ በሕይዎተ ሥጋ በዚህ ዓለም እስካሉ ድረስ የቤተ ክርስቲያኒቱ አባት እርሳቸው ናችሀው ። መንፈሳዊ ሥልጣናቸውን የግዛት ክልል አይገድበውም። የሚሻለው ግን ወደ ሀገራቸው ገብተው የቀረ ሕይወታቸውን ቤተ ክርስቲያኒቱን አንድ አድርገው እንዲመሩና በሀገራችን ላይ በሁሉም መልኩ ያለውን የመከፋፈል አደጋ እንዲወገድ የበኩላቸውን አስተዋጽዖ እንዲያደርጉ አገዛዙና በሀገር ወስጥ ያሉት አባቶች ይህን ጥሪ እንዲቀበሉት ሁላችንም የበኩላችንን ጥረት ብናደርግ ነው ። ይህን በማድረግ ፋንታ ሌላ አባት እንዲመረጥ ቢድረግ ግን ያው በአገዛዙ ፈቃድ የተደረገ እንጅ ምርጫው የመነፈስ ቅዱስ ነው ብለን መቀበል ያስቸግረናል። መንፈስ ቅዱስ ፍፁም ስለሆነ ሥራው ሁሉ ፍፁም ነው። አንድ ያደርጋል እንጅ አይከፋፍልም። ያፋቅራል እንጅ አያጣላም። ተቃራኒው መንፈስ ርኩስ ብቻ ነው በመከፋፈል ነግዶ የሚያተርፈው። እኔ ግን አንደ አንድ ምዕመን የተሻረው ቀኖና ቤተ ክርስቲያን ተስተካክሎ ቤተ ክርስቲያኑዋ አሓቲ/አንድ እንድትሆን ነው። ያ ካልሆነ የተለመደው 2 ሲኖዶስና 2 ፓትርያርክ ይኖራሉ ማለት ነው። አቡነ መርቆሬዎስ ሕጋዊ ፥ ሌላው ደግሞ ሕገ ወጥ ሁኖ ይቀጥላል ማለት ነው። ይህን ነው የምትፈልጉት ?

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)