August 22, 2012

ብፁዕ አቡነ ናትናኤል ዐቃቤ መንበረ ፓትርያርክ ኾነው ተመረጡ

  • ቋሚ ሲኖዶሱን የሚያጠናክሩ ብፁዓን አባቶች ተመርጠዋል::
  • ሕገ ቤተ ክርስቲያን ስለ ዐቃቤ መንበረ ፓትርያር ምን ይላል? (ከዜናው መጨረሻ ላይ ያንብቡት)
(ደጀ ሰላም፤ ነሐሴ 14/2004 ዓ.ም፤ ኦገስት 20/ 2012/ PDF)፦ የቅዱስ ሲኖዶስ ምልዓተ ጉባኤ ዛሬ፣ ነሐሴ 14 ቀን 2004 ዓ.ም ከቀትር በፊት ባካሄደው አስቸኳይ ጉባኤ ብፁዕ አቡነ ናትናኤልን ዐቃቤ መንበረ ፓትርያርክ አድርጎ መርጧል፡፡ ስለዚህም ጉዳይ ዛሬ በ9፡00 ሰዓት በቅዱስ ሲኖዶስ ዋና ጸሐፊ ብፁዕ አቡነ ሕዝቅኤል ጋዜጣዊ መግለጫ ተሰጥቷል፡፡

ዐቃቤ መንበረ ፓትርያርክ ለመሠየም ምልአተ ጉባኤው ባካሄደው ምርጫ ሦስት ዕጩዎች ቀርበው እንደነበር የጉባኤው ምንጮች ለደጀ ሰላም ተናግረዋል፡፡ በሕገ ቤተ ክርስቲያን አንቀጽ 17 መሠረት ለምርጫ የቀረቡትና በሹመት ቀደምትነት ያላቸው ብፁዓን ሊቃነ ጳጳሳት÷ ብፁዕ አቡነ ማቲያስ በኢየሩሳሌም የኢትዮጵያ ገዳማት ሊቀ ጳጳስ፣ ብፁዕ አቡነ ኤልሳዕ የሰሜን ጎንደር ሊቀ ጳጳስ እና ብፁዕ አቡነ ናትናኤል የአርሲ ሀገረ ስብከት ሊቀ ጳጳስ ናቸው፡፡


በአሁኑ ወቅት የአርሲ ሀገረ ስብከት ሊቀ ጳጳስ የኾኑት ዐቃቤ መንበረ ፓትርያርክ ብፁዕ አቡነ ናትናኤል የዋናው ፓትርያርክ ምርጫ እስከሚከናወን ድረስ ከቋሚ ሲኖዶስ ጋራ እየመከሩ ሲሠሩ እንዲቆዩ የቅዱስ ሲኖዶስ ምልዓተ ጉባኤ ወስኗል፡፡ በ1991 ዓ.ም የወጣውና በሥራ ላይ በሚገኘው ሕገ ቤተ ክርስቲያን መሠረት በተተኪ ፓትርያርክ ምርጫ ጊዜም ዐቃቤ መንበረ ፓትርያርኩ የቅዱስ ሲኖዶስ ሊቀ መንበር በመኾን ምርጫውን ያስፈጽማሉ፡፡ እርሳቸው ግን ምርጫ ውስጥ አይገቡም፡፡

ብፁዕነታቸው በ1971 ዓ.ም በሦስተኛው ፓትርያርክ በብፁዕ ወቅዱስ አቡነ ተክለ ሃይማኖት አንብሮተ እድ ከተሾሙትና ዛሬ በአገልግሎት ላይ ከሚገኙት 16 አንጋፋ ብፁዓን አባቶች መካከል አንዱ ናቸው፡፡

የቤተ ክርስቲያኒቱ መንፈሳዊም ኾነ ማኅበራዊ ተግባር ዘርፈ ብዙ ነው ያለው የምልዓተ ጉባኤው መግለጫ ቋሚ ሲኖዶሱን ማጠናከር አስፈላጊ ኾኖ በመገኘቱ የዋናው ፓትርያርክ ምርጫ እስከሚከናወን ድረስ ከዐቃቤ መንበረ ፓትርያርኩና ከቋሚ ሲኖዶሱ ጋራ አብረው የሚሠሩ ሰባት ብፁዓን ሊቃነ ጳጳሳት በአባልነት ሠይሟል፡፡ እነርሱም፡- 1) ብፁዕ አቡነ ጢሞቴዎስ፣ 2) ብፁዕ አቡነ ገብርኤል፣ 3) ብፁዕ አቡነ እስጢፋኖስ፣ 4) ብፁዕ አቡነ ሉቃስ፣ 5) ብፁዕ አቡነ ሳሙኤል፣ 6) ብፁዕ አቡነ ማቴዎስ፣ 7) ብፁዕ አቡነ አብርሃም ናቸው፡፡ 

ቅዱስ ሲኖዶስ ዐቃቤ መንበረ ፓትርያርክ ለመምረጥ ከብፁዕ ወቅዱስ ፓትርያርኩ ሥርዐተ ቀብር ፍጻሜ በኋላ ቀጠሮ ይዞ የነበረ መኾኑን በማስታወስ ምርጫው ዛሬ ለምን እንደተደረገ ከጋዜጠኞች ጥያቄ ቀርቧል፡፡ ብፁዕ አቡነ ሕዝቅኤል ለጥያቄው በሰጡት ምላሽ÷ “መንበር ያለ ሓላፊ አንድም ቀን ማደር ስለሌለበት ለሥርዐተ ቀብሩ ከውጭ የሚመጡትንም ይኹን በሀገር ውስጥ ያሉትን ምእመናንና እንግዶች የሚናዝዝና የሚያሰናብት አባት አስፈላጊ ኾኖ በመገኘቱ ምልዓተ ጉባኤው ዐቃቤ መንበረ ፓትርያርክ በአስቸኳይ ሠይሟል፤” ብለዋል፡፡

ብፁዕነታቸው እንዲህ ይበሉ እንጂ ዛሬ ምልዓተ ጉባኤው በአስቸኳይ ተስብስቦ ዐቃቤ መንበረ ፓትርያርኩን እንዲመርጥ ያስገደዱት የብፁዕ ወቅዱስ ፓትርያርኩ ሥርዐተ ቀብር ቀን እንዲለወጥ በመንግሥትና በብፁዕ ወቅዱስ ፓትርያርኩ ቤተሰብ “ግፊት ተደርጓል” ከመባሉ አንሥቶ ሌሎችም ምክንያቶች ሳይኖሩ እንደማይቀር የዜናው ምንጮች አመልክተዋል፡፡

ተጨማሪ ዜናዎችን ይከታተሉ


ሕገ ቤተ ክርስቲያን ስለ ዐቃቤ መንበረ ፓትርያር ምን ይላል?
አንቀጽ 17
·         ዐቃቤ መንበረ ፓትርያርክ
1.    ፓትርያርኩ በሞት ሲለይ ወይም በዚህ ሕግ አንቀጽ 16 መሠረት ከሥልጣኑ ሲወርድ ቅዱስ ሲኖዶስ በሹመት ቀደምትነት ካላቸው ሊቃነ ጳጳሳት መካከል በዕለቱ ዐቃቤ መንበረ ፓትርያርክ መርጦ ይሾማል፡፡ የተተኪው ፓትርያርክ ምርጫም ይካሔዳል፡፡
2.    የተተኪው ፓትርያርክ ምርጫ አፈጻጸም እንደጊዜውና እንደሥራው ሁኔታ እየታየ 40 እስከ 80 ቀን ባለው ጊዜ ይሆናል፡፡
3.    የዐቃቤ መንበረ ፓትርያርክ ተግባር
. ዐቃቤ መንበረ ፓትርያርክ ጊዜያዊ ጉደዮችን ከቋሚ ሲኖዶስ ጋር እየመከረ ያከናውናል፡፡
. በፓትርያርኩ ምርጫ ጊዜም የቅዱስ ሲኖዶስ ሊቀ መንበር ሆኖ ምርጫውን ያስፈጽማል፤ እርሱ ግን ከምርጫው አይገባም::

ምንጭ፦ ሕገ ቤተ ክርስቲያን 1991 .

ቸር ወሬ ያሰማን፤
አሜን፡፡

10 comments:

Anonymous said...

ውድ ደጀ ሰላማውያን

ለብፁዓን አባታቶቻችን ምስጢሩንና ጥበቡን የገለጠ አምላክ ይክበር ይመስገን።

Anonymous said...

ውድ ደጀ ሰላማውያን

ለብፁዓን አባታቶቻችን ምስጢሩንና ጥበቡን የገለጠ አምላክ ይክበር ይመስገን።

Bini habte said...

ይትባረክ አምላከ አበዊነ።

Anonymous said...

ተመስገን ጌታ ሆይ!!!!
ውድ ደጀ ሰላማውያን

አሁን ጊዜው የመረጃም በመሆኑ ለአባቶቻችንም ሆነ ለህዝበ ክርስቲያኑ መረጃ ከበፊቱ በበለጠ የሚያስፈልግበት ጊዜ ነው፣ያለፈው ታሪክ እንዳይደገም ሁሉም የበኩሉን አስተዋጽኦ ማድረግ ይገባዋል፣ከሙስሊም ወንድሞቻችንም ትምህርት ልንወስድ ይገባል ባይ ነኝ እራሳቸውን ለመጠበቅ እያደረጉ ያሉት ትግል እኛንም እራሳችንን እንድናይ ያደርገናል:: ደግሞም ፈተናው የሚቀርልን አይመሰለኝም::

እኛ የበኩላችንን እንወጣ የቀረውን ደግሞ እግዚአብሄር የጎደለውን ድክመታችንን ይሙላልን,የሚመጣውንም ፈተና ከእኛ ያርቅልን!!!!!!

Anonymous said...

Minalbat seytan yasebew kifat endaynor, Ebakachihu negerun yepoletica anasmeslew. Gizewn lemeleyayet sayhon letselot enargew. Geta fitsamewin yasamir. Amen.

Hailu said...

Akabe Menber Memeretu Melkam.

I am so puzzled how short sighted we have become.

We seem to have totally forgotten how divided and weakened our church has been in the past 20 years.

Talking about electing another "patriarch" will be a total disregard of the misery of our Orthodox Church with the coming of Aba Paulos.

We must rather search our souls and ask the tough questions. How can we solve the division in our church? How can we reconcile the fathers in the two synods and unite our church at last?

I pray that our church gets united. Egziabher Meleyayetachin Yemiabekabetin Meftihe Endinasib Yadirgen.

Anonymous said...

መልካም::

Anonymous said...

WHAT MAKES OUR ALMIGHTY SAVIOUR GLAD?? SEPARATION OR UNITY??
This time, we have a big chance to solve our church separation problem. We had ONE church but TWO Patriarch, which was the main problem to restore church unity. Now One has gone and one is. I believe the Church fathers in Addis Abeba should deal with Abune Merkorios to find best solution to restore church unity. Simply to elect a new Patriarch, is to accept separation as grace and normal. Belay

ስለአንድነታችን said...

የቤተ ክርስቲያናችን አባቶች ለ20 አመት የተከፋፈለችውን ቤተ ክርስቲያናችን አንድ የምትሆንበትን ዘዴ ከመዘየዳቸው በፊት አዲስ ፓትርያሪክ ከመረጡ በቤተ ክርስቲያናችን ውስጥ ከአቡነ ጳውሎስ የበለጠ የከፋ ታሪክ የሚኖራቸው የአሁኑ አባቶች ነው የሚሆኑት:: እግዚአብሔር እንዲህ እንዳመቻቸልን ስለ አንድነቱ ጉዳይ ስለ ብጹዕ ወቅዱስ አቡነ መርቆሪዎስ ፓትርያርክ ዘኢትዮጵያ ጉዳይ ጊዜ ሰጥተው መፍትሄ ሊፈልጉበት ይገባል እላለው::

አንድነታችን ናፍቆኛል!!!

Anonymous said...

የተወደዳችሁ የቤተ ክርስቲያን ልጆች በሙሉ

በአሁኑ ወቅት ቤተክርስቲያናችን መንታ መንገድ ላይ ቆማ ትገኛለች:: እስካሁን ስንጠላውና ሲከፋፍለን የነበረው ዘረኛና ሙሰኛ አስተዳደር በተጠናከረ መልኩ ቀጥሎ የቤተክርስቲያን ስርአት ሲጣስ ዝም ብሎ መመልከት ወይም የእስካሁን ስህተትን አስተካክሎ ስርአቷን ጠብቆና አስጠብቆ በትክክለኛው መንገድ ቤተክርስቲያኗን መምራት የሚሉ ናቸው:: ለምን የመጀመሪያውን አማራጭ አቀረብከው የሚል ጥያቄ ሊነሳ ይችላል :: ውሳኔያችን በየደረጃው በተለያዩ ምክንያቶች ስርአቱን የጠበቀ ካልሆነ ውጤቱ ምን ሊሆን እንደሚችል ስላሳሰበኝ ነው:: ከስርአቱ ውስጥ አንዱ የሆነው አንድ “ፓትርያርክ” በሀይማኖቱ ህጸጽ ከሌለበት በስተቀር በህይወት እያለ ሌላ “ፓትርያርክ” አይሾምም:: አለመታደል ሆኖ መንግስት በአቶ ታምራት ላይኔ አማካኝነት በቤተ ክርስቲያናችን ላይ ያደረስው በደል በቀላሉ የሚታይ አይደለም:: በሀገራችን የፍትህ ስርአት ሲኖር ወንጀለኞች ይጠየቃሉ አይቀርም:: ለዚህም እኩይ አላማቸው ለ20 አመታት አባ ጳውሎስን ተጠቀሙባቸው:: ቤተ ክርስቲያኗን ጎዷት አዳከሟትም::
ስለዚህ እኛ ህዝበ ክርስቲያን በሙሉ ለቤተ ክርስቲያን ስርአት መጠበቅ የበኩላችንን ድርሻ እንወጣ:: የአባታችን የፓትርያርኩ አባ መርቆርዮስ ሁኔታ ይታሰብበት:: በመንበራቸው መቀመጥ አለባቸው:: የተከፈለች ቤተ ክርስቲያንን ከማየት የዚህን ትውልድ ስም ከህይዎት መጻህፍት ይደምስስ::ይህንን ሳናደርግ ብንቀር ግን በታሪካችን ከባድ ስህተት የፈጸሙት አባ ጳውሎስ ብቻ ሳይሆኑ ሁሉም ጳጳሳት ሆኑ ማለት ነው:: ሁለተኛ ታሪካዊ ስህተት እንዳይፈጸም:: ለነገሩ ፍርሀቴን ገለጽኩ እንጂ ይህ ችግር እንደማይፈጸም አባቶቻችን በግንቦቱ የሲኖዳስ ስብሰባቸው አኩሪነታቸውን አስመስክረዋል:: ከሁሉ በፊት የእርቀ ሰላሙ ጉዳይ በፍጥነት ማለቅ አለበት:: ውድ የቤተክርስቲያን አባቶቻችን ቅድስት ስለሆነች በቅዱስ ጴጥሮስ መሰረትነት ስለታነጸች ስለአንድት ቅድስት ቤተክርስቲያን ብላችሁ መነቃቀፍን ትታችሁ አንድነታችሁን አጽንታችሁ መንታ መንገድ ላይ ያለችውን ቤተክርስቲያን ትታደጉ ዘንድ እማጸናችኋለሁ:: መንግስት እጁን ይሰብስብልን:: ከሙስሊም ወንድሞቻችን መብትን እንደት ማስከበር እንዳለብን ልምድ እንውሰድ::
እግዚአብሔር አምላካችን ቅድስት ኢትዮጵያን ተዋህዶ ሃይማኖታችንን ይጠብቅልን::

ከ ክፍለ ጊዮርጊስ ደሴ

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)