August 17, 2012

የቅዱስ ሲኖዶስ አስቸኳይ ጉባኤ ይካሄዳል፤ መግለጫም ይሰጣል


  • የፓትርያርኩን ቀብር የማስፈጸም ጉዳይ ቅድሚያ ጉዳይ ይሰጠዋል፤
  • ዐቃቤ መንበረ ፓትርያርኩ እስኪመረጥ ጠቅላይ ሥራ አስኪያጁ ተወክለው ይሠራሉ፤
  • የአቡነ ጳውሎስ አስከሬን ከተገነዘ በኋላ ግንዛቱ ተፈቶ ዳግመኛ ምርመራ ተካሂዷል፤

(ደጀ ሰላም ነሐሴ 11/2004 ዓ.ም፤ ኦገስት 17/2012/ READ THIS IN PDF)፦ የቅዱስ ሲኖዶስ አስቸኳይ ጉባኤ ዛሬ፣ ነሐሴ 11 ቀን 2004 ዓ.ም ጠዋት፣ 3፡00 ጀምሮ እንደሚካሄድ ይጠበቃል፤ ጋዜጣዊ መግለጫም ይሰጣል፡፡ ለአስቸኳይ ጉባኤው በርካታ ብፁዓን ሊቃነ ጳጳሳት ወደ አዲስ አበባ እየገቡ ሲኾን በተገኙት አባቶች የፓትርያርኩ ሥርዐተ ቀብር አፈጻጸም በቀዳሚ አጀንዳነት እንደሚታይ ተነግሯል፡፡


ትናንት ጠዋት በአዲስ አበባ በተገኙት 12 ያህል ብፁዓን ሊቃነ ጳጳሳት ከጠቅላይ ቤተ ክህነቱ አስተዳደር ጉባኤ ጋራ ባደረጉት ስብሰባ በአምስት ንኡሳን ኮሚቴዎች የተከፋፈለና 15 አባላት የሚገኙበት ዐቢይ ኮሚቴ ተቋቁሟል፡፡ በጠቅላይ ቤተ ክህነቱ ምክትል ዋና ሥራ አስኪያጅ አቶ ተስፋዬ ውብሸት ሰብሳቢነት፣ በትንሣኤ ማሳተሚያ ድርጅት ሓላፊው ሊቀ ካህናት ብርሃኑ ገብረ ዐማኑኤል ምክትል ሰብሳቢነትና በሊቀ ትጉኃን ኀይለ ጊዮርጊስ ዳኜ ጸሐፊነት የሚመራው ዐቢይ ኮሚቴ የመስተንግዶ፣ የእንግዶች አቀባበል፣ የሚዲያ፣ የአዳራሽ ዝግጅትና የትራንስፖርት ንኡሳን ኮሚቴዎችን በበላይነት ያስተባብራል፡፡

ዐቃቤ መንበረ ፓትርያርክ እስኪመረጥ ድረስ ጠቅላይ ሥራ አስኪያጁ ብፁዕ አቡነ ፊልጶስ ቋሚ ሲኖዶሱን በመሰብሰብ በሐላፊነት ይቆያሉ፡፡ በሕገ ቤተ ክርስቲያን አንቀጽ 17 ንኡስ አንቀጽ አንድ መሠረት ፓትርያርኩ በሞት ሲለይ ወይም ከሥልጣኑ ሲወርድ ቅዱስ ሲኖዶስ በሹመት ቀደምትነት ካላቸው ሊቃነ ጳጳሳት መካከል በዕለቱ ዐቃቤ መንበረ ፓትርያርክ መርጦ መሾም ነበረበት፡፡

ይኹንና “ድንገተኛ ነው” በተባለው የብፁዕ ወቅዱስ ፓትርያርኩ ሞት ሳቢያ በሀገር እና በውጭ አህጉረ ስብከት የሚገኙት ብፁዓን ሊቃነ ጳጳሳት እስኪሰበሰቡ መጠበቅ በማስፈለጉ፣ በይቀጥላልም ከሚመረጠው ፓትርያርክ አስቀድሞ መፈጸም ከሚገባቸው የቤተ ክርስቲያንን አንድነት የሚያስጠብቁ፣ መሠረታዊ ችግሯቿን ከሚፈትሹ የጥናትና ለውጥ ተግባራት አኳያ ቅዱስ ሲኖዶስን በጊዜያዊ ሊቀ መንበርነት ለሚመራው ዐቃቤ መንበረ ፓትርያርክ ምርጫ ተገቢውን ትኩረት ሰጥቶ መወያየት አስፈልጓል፡፡ በዛሬው የቅዱስ ሲኖዶስ አስቸኳይ ስብሰባም የዐቃቤ መንበረ ፓትርያርኩ ምርጫ ከቀብር ሥነ ሥርዐቱ ፍጻሜ በኋላ እንዲኾን ይወሰናል ተብሎ ተገምቷል፡፡

ይህም ኾኖ ለዐቃቤ መንበረ ፓትርያርክነት የሚመረጡት ብፁዕ አባት በሹመት ቀደምትነት ካላቸው ብፁዓን ሊቃነ ጳጳሳት እንደመኾኑ መጠን÷ ዛሬ በሓላፊነት ላይ የሚገኙትና በሦስተኛው ፓትርያርክ ብፁዕ ወቅዱስ አቡነ ተክለ ሃይማኖት በ1971 ዓ.ም የተሾሙት አባቶች፤ ከሀገር ውስጥ፡- ብፁዕ አቡነ በርቶሎሜዎስ፣ ብፁዕ አቡነ ናትናኤል፣ ብፁዕ አቡነ ኤልሳዕ፤ በውጭ ሀገር በሓላፊነት ላይ ከሚገኙት ውስጥም ብፁዕ አቡነ ዘካርያስ፤ በስደት ከሚገኙትና የዕርቀ ሰላም ንግግር ከሚያካሂዱት ብፁዓን አባቶች ውስጥም አራተኛው ፓትርያርክ ብፁዕ ወቅዱስ አቡነ መርቆሬዎስና ብፁዕ አቡነ ኤልያስ ናቸው።

በተያያዘ ዜና ትናንት አራት ብፁዓን ሊቃነ ጳጳሳት በደጃዝማች ባልቻ ሆስፒታል ተገኝተው የብፁዕ ወቅዱስ ፓትርያርኩን አስከሬን ከገነዙ በኋላ “አሟሟታቸው አጠራጣሪ ነው” በሚል በተነሣው ጥርጣሬ ግንዛቱ ተፈትቶ የአስከሬን ምርመራ መካሄዱንና ዳግመኛ ሥርዐተ ግንዘቱ መፈጸሙን የመንበረ ፓትርያርኩ ምንጮች ተናግረዋል፡፡ ለምርመራው መካሄድ ወደ ሆስፒታሉ መጥተው የነበሩ ከፍተኛ የመንግሥት ባለሥልጣናት ትእዛዝ ሳይኖርበት እንደማይቀር ተመልክቷል፡፡ ለጥርጣሬው መነሻ የኾነው ብፁዕ ወቅዱስ ፓትርያርኩ ከመሞታቸው አስቀድሞ ወስደውታል ከተባለው መድኃኒትና ከዕለቱ ቅዳሴ በኋላ የተመገቡት ምግብ አልተስማማቸውም በሚል የሆድ እጥበት ተደርጎላቸው የነበረ መኾኑ ነው ተብሏል፡፡

ትናንት ጠዋት ብፁዕ አቡነ ፊልጶስ በመንበረ ፓትርያርክ ስብከተ ወንጌል አዳራሽ ለተገኙት የጠቅላይ ቤተ ክህነቱ ሠራተኞች፣ የአዲስ አበባ ገዳማትና አድባራት አስተዳዳሪዎች፣ ምእመናንና ጋዜጠኞች የብፁዕ ወቅዱስ ፓትርያርኩን ዜና ዕረፍት አሰምተው ሌሎች ጉዳዮች በቀጣይ እንደሚገለጹና ዕለቱኑ ፈጥኖ የሚደረግ ነገር አለመኖሩን በመናገር ካሰናበቱ በኋላ በቅጽሩ የቆየችው እጅጋየሁ በየነ ታሰማው በነበረው ልቅሶ “አባቴን ገድለውብኝ ነው፤ ለጅቦች ሰጥተውኝ ሄዱ፤ አስከሬኑ ይመርመርልኝ” በማለት ታሰማው የነበረው ‹ልቅሶ› በአካባቢው የነበሩትን ሐዘንተኞች አበሳጭቷልም፤ አሳዝኗልም፡፡

ቸር ወሬ ያሰማን፣
አሜን

13 comments:

Anonymous said...

የብጹእ ወቅዱስ አቡነ ጳውሎስን ነፍስ እግዚብሔር ከቅዱሳኑ ጋር ያሳርፋት ዘንድ ጸሎታችን ነው:: ከዚህም ባሻገር እግዚአብሔር ለቤተክርስቲያን እውነተኛ መሪ እንዲሰጣት መልካም ምኞታችን ነው::

''ለምዕመኑ “መንግስት በእምነት ተቋማት ላይ የእምነት ተቋማትም በመንግስት ላይ ጣልቃ አይገቡም” በማለት ዘወትር ፕሮፖጋንዳውን ያቀርባል ፤ እውነታው ግን ከዚህ የራቀ ነው ፤...ነገር ግን ይች ቤተክርስትያንና ሀገራችን ሰላም እንድትሆን የሚፈለግ ከሆነ ነገሮች ሁሉ በህገ ቤተክርስትያን ብቻ መከናወን አለባቸው ፤ ያለፍናቸው 20 ዓመታት ችግሮቹ የተፈጠሩት ሲጀመር መሆኑን አንዘንጋ ፤ አባቶችም ስለ ቤተክርስትያንና ስለ ህዝበ ክርስቲያን ብለው ችግር ፈቺ አባት ከመካከላቸው መርጠው ያስቀምጡ ዘንድ የእኛ የልጆቻቸው ጥያቄ ነው፡፡ ከዚህ በኋላ የተጀመረው እርቀ ሰላም መፍትሄ እስኪመጣ ድረስ ተጠናክሮ ይቀጥል ዘንድ መልካም ምኞታችን ነው ፡፡'' አንድ አድርገን

ህገ ቤተክርስቲያን የሚፈቅድም ከሆነ አባ መርቆሬዎስ የፕትርክናክውን መንበር እንደያዙ ከሳቸው እኩል ስልጣን ያለውን የአስተዳደር ስራውን የሚሰራ (ከዋና ስራ አስኪያጁ በላይ የሆነ) አንድ አባት ብቻ ቢያስቀምጡም መልካም ነው:: አቡነ መርቆሬዎስ ግን የትም ይሁኑ ብቻ ግን ብጹእ ወቅዱስ ፓትርያርክ የሚለውን ስም እሳቸው እንደያዙት ቢቆይ ለቤተክርስቲያን አንድነት ጥሩ ሊሆን ይችላል:: ይህ የኔ ሃሳብ ነው እግዚአብሔርና ከሱ በታች ያሉት በመንፈስ ቅዱስ የሚመሩት አባቶቻችን ግን ህገ-ቤተክርስቲያንን ባገናዘበ መልኩ ለቤተክርስቲያን የሚሆናትን ያውቃሉ::

የብጹእ ወቅዱስ አቡነ ጳውሎስን ነስፍ በቸርነቱ ከቅዱሳን ጋር ይደምርልን::

mekonen

Anonymous said...

Amen nefese yimarelene !!
woyezerowa demo min endemetele alegebagnem who is she after all???
she better ask excse to GOD not to be the next person to die!!!

yedingil baria said...

May God lead his soul to rest in peace!

yedingil baria said...

nefs yimar! kelay wondimachin begeletsew hasab esmamalehu! leziihem Egziabher yirdan. Amen!

Anonymous said...

May God rest his holiness Abune Paulos's soul in peace and bless Ethiopia.

አሃዱ said...

ለ20 አመታት የተበላሸውን የቤተ ክርስቲያናችንን ጉዳይ ለመቅጨት ጊዜው እና ሰአቱ አሁን ነው::

ይህን የተበላሸ ታሪካችንን ለመቋጨት ብጹዕ ወቅዱስ አቡነ መርቆሪዎስ ፓትርያርክ ዘኢትዮጵያ ወደ መንበራቸው መልሶ አስፈላጊው ነገር ቢደረግ መልካም ነው እላላው::

ለስልጣን ሽኩቻ ተግብቶ ግን እንዲሁ አዲስ ፓትርያሪክ(ኢ-ህጋዊ) ከተሾመ ግን እንዲሁ እንደ ተከፋፈልን መቅረታችን ነው::

የኢትዮጵያ አምላክ እርሱ መንገዱን ሁሉ አስተካክሎ ሰላም እና አንድነቱን ያድለን!

Anonymous said...

Egzehabher amelake ke kedusanu gone yedemerlen beterfe ebakachu leleochachen gen betchale kerstynawe senmegbare yenuren menem behonu men abatachen neberu selzeh eske ahun enkwane zemeta yenuren wed fet degmo bealew neger degmo berteten enzeley.genn ebakachu zzzzzzemeta yenuren.

Afrodayt /KARLSRUHE said...

እኛ ሁልግዚ ማሰብ ያለብን ቀጣዩ ቤተክርስቲኒቶን ከዘርን ከጎሳ የጸዳ መንፈሳዊ አባት እንዲሰጠን እግዚአብሄርን መለመን መጸለይ ያስፍልገናል አባቶቻችንም መንፈስቅሩስ በመራቸው መሰረት ካለመንግስት ጣልቃገብነት ፍትህዊ ምርጫ አንዲያደርጉ ለአባቶቻችንም ጸሎት እንያዝላቸው አምላካችን እግዚአብሄር ይርዳን። ደጀ ሰላማች ለቀጣዮ ለቤተክርስቲየን ኽልውና ምን ማድረግ ይጠበቅበታል ከሕዝበክርስቲያኑ የውይይት መድረክ ብታመቻቹ ለቀጣዮለቤተክርስቲያን ኽልውና አሁንወሳኝ ነው የቅዱሳን አምላክ ይርዳን አሜን!!

Anonymous said...

እስከ አሁን ድረስ ስንቱ አብያተ ክርስቲያናት እና ገዳማት ሲቃጠሉ፣ ስንቱ ምዕመናን በቤተመቅደሳቸው ሲሰየፉና ሲደበደቡ፣ ስንቱ ንዋዬ ቅድሳት ሲመዘበር፣ ስንቱ ሥርዓተ ቤተክርስቲያን እና ሕገ እግዚአብሔር ሲጣስ፣ ስንቱ ንጹሃን አባቶች በስውር ሲገደሉ፣ ሲደበደቡ፣ ሲሰደዱ እና ሲዋረዱ፣ ስንቱ አስተዳደራዊ በደልና ሙስና ሲፈጸም፣ ለኖህ ከጌታ የተሰጠው የአረንጓዴ ቢጫ ቀይ የቀስተ ደመና ቃል ኪዳን ከቤተክርስቲያን ጣራ ሲደመሰስ፣ መነኩሴ በአውደ ምህረት ላይ በጥይት ተደብድቦ ሲሞት፣ ወዘተ … ታዲያ እግዚአብሔር የት አለ? "እውን እንደራሄል እንባውን አፍስሶ ኢትዮጵያን የሚታደጋት አንድ ፃድቅ ሰው በኢትዮጵያ ጠፋን"? እያልኩ ዘላለም እግዚአብሔርን እጠይቅ ነበር።

እነሆ አሁን ጊዜው ደርሶ ከዋልድባ ለፈጣሪ የቀረበው የቅዱሳን አባቶች ጸሎት መልስ ማግኜት ጀመረ። ለካም የጌታ ትዕግስቱ ሰፊ ሆኖ እድሜ ለንስሃ እየሰጣቸው ነበር - ሳይጠቀሙበት ቀረ እንጅ!

አሁንም ገና የቤቱን ቆሻሻ ሳያጸዳ እና ዙሪያውን ያሰፈሰፉበትን ጠላቶቹን ድራሻቸውን ሳያጠፋ ጌታ ምህረቱን አያወርድም! የመውጊያውን ጫፍ ነክተዋልና፣ የማያሸንፉትን ተዳፍረዋልና፣ ገንዘብን አምላካቸው አድርገዋልና፣ ጎሰኝነትን እና መከፋፈልን ሕጋቸው አድርገውታልና፣ በገንዘብና በስልጣን ሲሰክሩ ዘላለማዊ የሆኑ መስሏቸዋልና፣ የህዝብን እንባ ንቀው እንደፈርኦን ልባቸውን አደንድነዋልና፣ መቅሰፍቱ ይቀጥላል ………..

አምባገነኖች ሆይ ልብ ይስጣችሁ! በንስሃ ተመለሱ! እጃችሁን ከቤተክርስቲያን ላይ ጭቆናችሁን እና የጎሰኝነት መርዛችሁን ከሕዝብ ላይ አንሱ! በተለይም አምባገነኑ መንግሥታችን ሆይ! ፈርኦን በመቅሰፍት ብዛት እንደተንበረከከ አሁንም የዘመናችን ፈርኦኖች ከመቅሰፍቱ ለመዳን ከፈለጋችሁ እጃችሁን ከቤተክርስቲያናችን ለመሰብሰብ፣ ሕዝባችሁን ይቅርታ ለመጠየቅ ጊዜው አሁን ነው። ይቅርታ የጠየቀ እና ንስሃ የገባ በደሉ ሁሉ ይፋቅለታልና።

አባቶች ሆይ! ሥጋችሁን እንጅ ነፍሳችሁን ምንም ሊያደርጉ የማይችሉትን ከንቱ ፍጥረታት አትፍሩ! ይልቁንስ በጎቸን ጠብቁ፣ ሕጌን አስተምሩ፣ ቤቴን አስከብሩ፣ እንደተባላችሁ ሁሉ፤ ለነፍሱ እንጅ ለሥጋው የማያድር፣ እውነተኛ፣ የሰላም እና የፍቅር አባት እንድትተኩልን እግዚአብሔር ከእናንተ ጋር እንዲሆን ፀሎታችን አይለያችሁም። እናንተም በርቱልን! ተጋደሉልን! ለተኩላ አሳልፋችሁ እንዳትሰጡን! ድራሿ እንደጠፋው ቁስጥንጥንያ የአሁኗ እስታንቡል የእኛም ቤተክርስቲያን በተሃድሶዎች፣ በጎሰኞች እና በልማት ሰበብ ድራሿ እንዳይጠፋ ተጋደሉልን። የእኛም የዘወትር ለቅሶ እና ፀሎት አይለያችሁም።

ምዕመናን ሆይ ከምንጊዜውም በበለጠ ለቤተክርስቲያናችን እና ለራሳችን አምርረን እናልቅስ፣ እንፀልይ፣ አባቶቻችንን እናግዛቸው፣ የእኛን እርዳታ ሲፈልጉ እንድረስላቸው፣ አስተዳደራዊ በደል በቤተክህነትና በቤተክርስቲያናችን ሲንሰራፋ ዝም አንበል፣ አምርረን ስለእውነት ብለን እንቃወመው፣ ቤተክርስቲያናችንን እና ሃይማኖታችንን እንጠብቅ!

የእግዚአብሔር ቸርነት፣ የድንግል ማርያም ረድኤት፣ የቅዱሳን አበው ጸሎት እና ምልጃ ከሁላችን ጋር ይሁን! የጅማሬውን ፍጻሜ ያሳምርልን!

እግዚአብሔር ቤተክርስቲያናችንን ይጠብቅልንን! ኢትዮጵያን ይባርክልን! አሜን!

ዘሐመረ ኖህ said...

ዐቃቤ መንበረ ፓትርያርክም ሆነ ዋናፓትርያርክ ከመሾሙ በፊት በስደት ከሚገኙ አባቶች ጋር ያለውን ውግዘት ማንሳትና የጋራ የሆነ መፍትሄ መፈልግ ወሳኝ ነው ብዬ የግል አስተያየቴን እሰጣለሁ ምክንያቱም እርቅ እየተባለ ችግሩ እየተጓተተ መለያየቱ እንዳይቀጥል በመጓተቱም ሌሎቸ የማየታወቁ ችግሮች እንዳይፈጠሩና ተለያይተን እንዳንቀር ያሰጋል
ሌላው መንግስት ምንም እንኳን ለራሱ በቋፍ ላይ ቢገኝም ነገር ግን እንደ ለመደ የምፈልገውን እሾማለሁ እንዳይል አባቶች የሚጠይቀውን መስዋእትነት ከፍለው ቤተክርስቲያናችንን መታደግ ይጠበቅባቸዋል ካልቻሉ ለሕዝብ በማስታወቅ ሕዝቡ መልካሙን ገድል እንዲጋደል የማድረግ ኃላፊነተ አለባቸው ሕዝቡም እንደ ድሮው ሳያውቅ እንዳይቀልጥ በንቃት መከታተል ይኖርበታል መንግስት ጣልቃ እገባለሁ ካለ ሕዝቡ አባቶችን ሳይጠብቅ መልካሙን ገድል ለመጋደል ከአሁኑ ሊዘጋጅ ይገባል
በተረፈ እጅጋየሁ ወይም ኤልዛቤልን የሚያስታግስ ሰው እንዴት ይጠፋል አንድ ሴት እስከመቼ የእግዚአብሔርንም የሰውንም ሕግ እየጣሰች ትኖራለች በገንዘቧ አናሳ ባለስልጣንና ዱርዬ እየገዛች እራሷን እንደ መንግስትም እንደ ሲኖዶስም ስትቆጥር ለምን ዝም ትባላለች
መንግስትም ይሁን ግለሰብ እግዚአብሔርን የማርፈራ ከሆነ ማነህ ባለሳምንት የሚባለው እሱ እንደሆነ ይወቀው
ለሞቱት ነፍስ ይማር የቆሙ ለሚመስላቸውም ልብ ይስጥልን

ዘሐመረ ኖህ said...

መንግስት አሁንም በቤተክርስቲያናችን ላይ እጁን አስገብቶ ፓትርያርክ ልሹም ካለ ሕዝቡ ሆ ብሎ ተነስቶ በመቃወም ቤተክርስቲያንን ከመንግስትና ከተሃድሶ መናፍቃን እንዲሁም ከአጠቃላይ አጽራረ ቤተክርስቲያን ጥፋት ማዳን አለበት በጥንት አባቶቻችን መስዋእትነት እዚህ የደረሰች ቤተክርስቲያናችን በኛ ዘመን እንዲህ ልትሆን አይገባትም ሰው እንኳን ለዘላለማዊ ሕይወቱ ይቅርና ለሌላም ይሞታል ይሰዋል ጊዚያዊና የማይጠቅም ፍራቻችንን አስወግደን በአንድንት ለቅድስት ቤተክርስቲያን እንነሳ መልካሙን ገድል ለመጋደል በትእግስት በጾም በፀሎት በሱባኤ እንጠብቅ ከዚያም ሁላችንም የየራሳችንን ድርሻ እንወጣ ከመቼውም ጊዜ የበለጠ ቤተክርስቲያን ልጆቿን የምትፈልግበት ጊዜ አሁን ነው እንድረስላት ይህ እድል እንዳያመልጠንና እድሜ ልክ እንዳንፀፀት ቆርጠን መነሳት አለብን

Demile yalew said...

O God !! God of our forefathers righteousnes, we don't no what we do for the one only way of your law tewahdo, lead us by your choosen real father our & next generation by your own wisdom !!

ድሉ ዘእግዚአብሔር said...

የዛሬ 20 ዓመት የተሠራው ጥፋት አሁን መታረም አለበት። ሁላችንም እንደምናውቀው አቡነ ጳውሎስ ፓትርያርክ የሆኑት የዛሬ 21 ዓመት በጠመንጃ ሃይል የመንግሥት ሥልጣን በያዙት ዘመዶቻቸው ምርጫ እንጅ በሕገ ቤተክርስቲያን አልነበረም። መሠረቱ ሕገ እግዚአብሔር የሆነው ሕገ ቤተ ክርስቲያን በታጠቁ ሃይሎች ተሽሮ ነው ሕጋዊው ፓትርያርክ ብፁዕ ወቅዱስ አቡነ መርቆሬዎስ በግፍ መንበራቸውንና አገራቸውን ጥለው እንዲሰደዱ የተገደዱት። ይህ ግፍ ከተፈፀመ ጊዜ ጀምሮ አሓቲ (አንዲት) ቤተ ክርስቲያን ከሁለት ተከፍላ፡ ጳጳሳት ከጳጳሳት ፥ ካህናት ከካህናት ጋር ፥ ምዕመናን ከምዕመናን ጋር በፍቅር ሠንሠለት ተሳስረን ለሕዛባችንና ለሀገራችን እንዲሁም ለዓለም ሰላም በመጸለይ ፋንታ በጥል ሠንሠለት ተሳስረን ፥ የጥል ግድግዳ በመካከላችን አቁመን ፥ የቂም ካራ/ጩቤ ታጥቀን ያችን የበቀል ቀን እየጠበቅን እንገኛለን። እዎ አሓቲ ቤተ ክርስቲያን በሁለት ሲኖዶስ ተከፍላ የተለመደው እንዳይቀር ቅዳሴው ይቀደሳል ፥ ማሀሌቱ ይቆማል፥ ፆሙ ይፆማል ፥ ስብከቱ ይሰበካል። ግን ለጽድቅ ወይስ ለግብረ ተርእዮ ሰብ? መልሱን ሁላችንም እናውቀዋለን። ስለዚህ ችግሩ ከተፈጠረ ጊዜ ጀምሮ አሁን የእርቀ ሰላሙን መንገድ ለመከተልና ችግሩን ለመፍታት አመች ሁኔታን እግዚአብሔር ፈቅዶአል ብየ አምናለሁ። ቤተ ክርስቲያኒቱ ታርቃ ዓለማውያን ለሆኑት በፖለቲካ ለተከፋፈሉት የአንዲት ኢትዮጵያ ልጆች ምሳሌ መሆን አለባቸው። አባቶች ታርቀው በፖለቲካ ምክንያት የተጣሉትን ማስታረቅ አለባቸው። ለብሔራዊ እርቅ አጥብቀው መጣር አለባቸው። የሃገራችን ችገር በብሔራዊ እርቅ ካልተፈታ ከሁሉም በላይ አደገኛ ችግር የሚገጥማት ይች ጥንታዊት ቤተ ክርስቲያን ናት። አዎ በወንድሞቻቸው ጳጳሳትና ካህናትም ትብብር ጭምር በግፍ የተሰደዱት ብፁዕ ወቅዱስ አቡነ መርቆሬዎስ ወደመንበራቸው መመለስ አለባቸው። በውጭም ሆነ በሀገር ውስጥ ቤተ ክርስቲያናችን በእውነትም ቅዱስ በሆነ በአንድ ሲኖዶስ መመራት አለባት። ይህ እንዲሆን የቅዱስ ሲኖዶስ የበላይ መሪና ጠባቂ የሆነው መንፈስ ቅዱስ ለሁሉም አባቶች ጥበቡን ይግለጥላቸው። ዓሜን ፡

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)