July 18, 2012

የሲያትል ምእመናን አቡነ ፋኑኤልን በይፋ ተቃወሙ፤ እንዳይመጡም ተስማሙ


(ደጀ ሰላም፤ ሐምሌ 10/2004 ዓ.ም፤ ጁላይ 17/ 2012/ READ THIS NEWS IN PDF)፦ በሰሜን ምዕራብ አሜሪካ በዋሺንግተን ሲያትል በሚገኙት  በደብረ ሰላም ቅ/ሚካኤል እና በደብረ መድኃኒት ቅ/አማኑኤል አብያተ ክርስቲያናት በድብቅ ሊመጡ ያሸመቁትን አቡነ ፋኑኤልን ሕዝቡ በይፋ ተቃወመ፡፡ እሑድ ከቅዳሴ በኋላ ምእመናን በይፋ ባቀረቡት ጥያቄ ላይ ውይይት የተደረገ ሲሆን ሕገ ወጡ ሊቀ ጳጳስ አባ ፋኑኤል ወደ አብያተ ክርስቲያናቱ እንዳይመጡ በብርቱ ተቃውሞ ቀርቧል። በሌሎች አካባቢዎች የተጀመረው “ቤተ ክርስቲያንን ከነአባ ፋኑኤል እና ከፕሮቴስታንቱ አጋራቸው ከኃ/ጊዮርጊስ ጥላሁን የመታደግ” እንቅስቃሴ በሲያትልም ተጀምሯል። “ምንም አያውቅም” እየተባለ የሚናቀው ምእመን ለቤተ ክርስቲያኑ የክፉ ቀን ደራሽ መሆኑን እና በሐዋሳ ያለው ሕዝበ ክርስቲያን እንባውና በተጋድሎው ቅ/ሲኖዶስ ኡኡታውን ሰምቶ ያገኘውን ድል በአሜሪካ የሚገኘውም ምእመን እንደሚደግመው አረጋግጧል።


እሑድ ከቅዳሴ በኋላ ማንም አልነቃብኝም በሚል የዕለቱን መዝሙር አስዘምረው፣ ሕዝቡን ለመሸኘት እና በሳምንቱ አቡነ ፋኑኤል አምጥተው “ሰርፕራይዝ” ማድረግ የፈለጉት የደ/ሰላም ቅ/ሚካኤል ቤተ ክርስቲያን አስተዳዳሪ መልአከ ሰላም ቆሞስ አባ ወ/ሰማያት ከሕዝቡ ድንገት የተወረወረው “ጥያቄ አለን” የሚለው ድምጽ አስገርሟቸውም አስደንግጧቸውም ነበር። “እናንተ ወጣቶች አትረብሹ” በሚል የንቀትም ከቁብ ያለመቁጠርም ጥያቄውን አጣጥለው ለማለፍ ቢሞክሩም ሌሎች ምእመናንም ጥያቄ በማንሣታቸው “እትዉ በሰላም፤ በሰላም ሒዱ” ከተባለ በኋላ ውይይቱ በአዳራሽ ሊቀጥል ችሏል።   

ጉዳዩን በከፍተኛ ምሥጢር እንደያዙት በአደባባይ ያመት አስተዳዳሪው “ለሰበካ ጉባኤው እንኳን ያልነገርኩት ምሥጢር እንዴት ሊታወቅ ቻለ?” በሚል ቁጭታዊ ጥያቄ አቅርበዋል። ለጊዜው አስተዳዳሪ የሌለውና በሰበካ ጉባኤ ብቻ የሚመራው እና በአባ ወልደ ሰንበት ረዥም እጅ የሚዘወረው የቅ/አማኑኤል ቤተ ክርስቲያን በድብቅ አቡነ ፋኑኤል እንዲያስመጣ እና ከዚያ ቀጥሎ ግን በቅ/ሚካኤልም እንዲገኙ፣ ሕዝቡንም በሰላ ምላሳቸው እንዲለውጡ ቀጠሮ ተይዞላቸው የነበረው የአቡነ ፋኑኤል ሥውር ዕቅድ በቅ/አማኑልም በተመሳሳይ መልኩ በተነሣ ጥያቄ ከከሸፈ በኋላ ሊቀ ጳጳሱ እንዳይመጡ ከስምምነት ላይ ተደርሷል።

በሲያትል የሚገኙ ምእመናን ሊቀ ጳጳሱን ለምን እንደሚቃወሙ የገለጹበትን ጽሑፍ ከዚህ በታች አእንደሚከተለው አስፍረዋል። መልካም ንባብ።

ቸር ወሬ ያሰማን፤
አሜን።


በስመ አብ ወወልድ ወመንፈስ ቅዱስ አሐዱ አምላክ አሜን::
"ሐዋርያት በሰበሰቧት በአንዲት ክብርት ቤተክርስቲያን እናምናለን::" 
ጸሎተ ሀይማኖት
ሃይማኖታችንን እና የቤተክርስቲያናችንን ሥርዓት የሚጎዳ ህልውናዋን እና ጥቅሟን አደጋ ላይ የሚጥል ማንኛውንም አሰራርና አካሄድን በእግዚአብሔር ስም እንቃወማለን::

የተወደዳችሁ የልዑል እግዚአብሔር ቤተሰቦች ብፁዕ አቡነ ፋኑኤል ወደ ሲያትል ሊመጡ እንደሆነ እና ለዚህም ሶስቱም አጥቢያወች እንደሚሰሩ በተጨባጭ መረጃ አረጋግጠናል:: የአቡነ ፋኑኤልን ወደ እኛ አካባቢ መምጣት አጥብቀን እንቃወማለን:: የምንቃወምባቸው ምክንያቶችም የሚከተሉት ናቸው::

1. በሃይማኖት ጉዳይ
በጥቅምትና በግንቦት 2004 ዓ/ም በተካሄደው የቅዱስ ሲኖዶስ ጉባኤ ላይ በቤተክርስቲያንችን እና በሀማኖታችን ላይ አደጋ ለማድረስ ተነሳስተው የነበሩ ግለሰቦችን እና ቡድኖችን አውግዞ መለየቱ ይታወቃል:: እነዚህ ቡድኖች እና ግለሰቦችም በቤተክርስቲያን ውስጥ ተመሳስለው በመግባት ብዙ ጥፋት በማድረስ ላይ ናቸው:: አቡነ ፋኑኤል ግን እነዚህን  ግለሰቦችን እና ቡድኖች በህቡእም በግልጽም ያበረታታሉ ይደግፋሉ በቤተክርስቲያን መዋቅር ውስጥ ቦታ እንዲኖራቸው ያደርጋሉ:: ለዚህ ትልቅ ማሳያ የሚሆነን ሀዋሳ ላይ የሰሩት ስራ ነው:: ሐዋሳ ተመደበው ከሄዱበት ጊዘ ጀምሮ በሀገረ ስብከት በሰበካ ጉባኤ እና በሰንበት /ቤት ውስጥ ሲያገለግሉ የነበሩ የቤተክርስቲያንን ልጆችን በመግፋት የሀይማኖት ችግር ያለባቸውን ሰወች በመተካት በሐዋሳ ውስጥ ያሉ አባቶች ካህናትን እና ምዕመናን ቅስም ሰብረዋል አንገት አስደፍተዋል:: ካህናት አባቶችን በተሀድሶ አራማጆች በአደባባይ ተዋርደዋል ተሰድበዋል :: በቤተክርስቲያን አውደ ምህረት ላይ የቤተክርስቲያን ያልሆነ ትምህርት እንዲሰጥ ተደርጓል:: በዚህም የተነሳ የሐዋሳ ህዝበ ክርስቲያን ደም እንባ አንብቶ እስከ  ቅዱስ ሲኖዶስ ድረስ ባደረገው ተጋድሎ ከሐዋሳ ተነስተዋል::
ሌላው በሀይማኖት ጉዳይ ላይ አቡነ ፋኑኤልን የምንቃወምበት ምክንያት ደግሞ አሁንም ከእነዚህ የተሀድሶ መናፍቃን ቡድኖች ጋር ያላቸውን የአላማ ኅብረት የሚያሳየው ስራ ነው:: ይሄም በተለያዩ ጊዘያት የሚያወጧቸውን ኦፊሴላው ደብዳቤወች ቅዱሳን በሚሰደቡባቸው እመቤታችን በምትሰደብባቸው እና ቤተክርስቲያን በምትዋረደባቸው የመናፍቃን ድረ-ገጾች ላይ ሲወጡ መታየታቸው ነው:: ምናልባት እርሳቸው ሳያውቁ የሚደረግ ነው ሊባል ይችላል:: እርሳቸው በተደጋጋሚ የቤተክርስቲያን  ማህተም ያልበት እና የእርሳቸው ፊርማ ያለበት ደብዳቤ እንዚህ ድረ-ገጾች ላይ ሲወጣ አንድ ጊዘ እንኳ ማስተባበያ አልሰጡም ስራውንም አላወገዙም:: ይሄም ያላቸው የአላማ ግንኙነት እንዳይጎዳባቸው ነው::

ሌላው በሥራ አስኪያጅነት የሾሙት ኃይለጊዮርጊስ ጥላሁን የተበለው ግለሰብ የቤተ ክርስቲያን ትምህርት የሌለው : በሃይማኖቱ እንከን ያለበትና ከመናፍቃኑ ጋር እየሠራ ያለ ነው:: ታዲያ እኒህ አባት ሃይማኖት ጠብቀው ማስጠበቅ እንዴት ይችላሉ ?

2. ሥርዓተ ቤተክርስቲያንን በተመለከተ

እስካሁን ባለው ሥርዓተ ቤተክርስቲያን አንድ አባት ወደ አንድ ሀገረ ስብከት ተመድበው ሲሄዱ ማገልገል ያለባቸው ከእርሳቸው በፊት ሲያገልግሉ የነበሩት አባት በመሰረቱት ሀገረ ስብከት ውስጥ ነው:: አቡነ ፋኑኤል ግን ይሄንን ሥርአት በመጣስ ከእርሳቸው በፊት የነበረውን ሀገረ ስብከት በግልጽ በአሜሪካ ድምጽ ሬዲዮ አላውቀውም ሀገረ ስብከትም የለም የሚል መግለጫ በመስጠት ትልቅ ስህተት ፈጽመዋል:: ለዚህም የሰጡት ምላሽ ወደ አሜሪካ ስመጣ አየር ማረፊያ ላይ መጠው አልተቀበሉኝም የሚል ነው:: ነገር ግን የዲሲ እና አካባቢው ሀገረ ስብከት ካህናት እና ምእመናን በተደጋጋሚ ሥርዓተ ቤተክርስቲያንን ጠብቀው መዋቅር ጠብቀው እስከሄዱ ድረስ አብረን ለማገልገል ዝግጁ ነን በሚል ያቀረቡላቸውን ጥሪ አልተቀበሉትም::

ብፁዕ አቡነ ፋኑኤል ከዚህ በፊት ባደረጓቸው ተግባራት የቤተ ክርስቲያንን መዋቅር አስከብሮ ለመሄድ  የነበራቸው አስተዋጽዖ አነስተኛ መሆኑንና ሥርዓተ ቤተ ክርስቲያንን በመተላለፍ በፈጸሙት ተግባር የብዙዎችን ኅሊና  ጎድተዋል ለማስረጃም፦
ከዚህ በፊት ያገለገሉበትና አሁንም እየመጡ የሚያርፉበት የደብረ ምሕረት ቅዱስ ሚካኤል ቤተ ክርስቲያን መዋቅር  ማስገባት ሳይችሉ መቅረታቸውን፤  ከዚህ በፊት በአሜሪካን እንዲያገለግሉ ቢመደቡም በነበራቸው  ችግር ምክንያት  ከካህናትና ከምእመናን  ባላቸው አለመግባባት የተነሳ በቅዱስ ውሳኔ መነሣታቸውን፤  የቤተ ክርስቲያንን ሥርዓት በመተላለፍ  በተለያዩ አብያተ ክርስቲያናት በመገኘት  የሀገረ ስብከቱን  መዋቅር በመናቅ  ክህነት  መስጠታቸውንና  ቤተ ክርስቲያንም መባረካቸውን፤  ከዚህ በፊት በሰሜን አሜሪካ በመዋቅር ሥር ባለ ቤተ ክርስቲያን እንዳላገለገሉ፣ ለእንግድነት ወደ አሜሪካም በመጡበት ጊዜ ሁሉ በሀገረ ስብከቱም ሆነ በሀገረ ስብከቱ ሥር ባሉ አብያተ ክርስቲያናት ተገኝተው እንደማያውቁ መጥቀስ ይቻላል::

3. መዋቅርን በተመለከተ

አቡነ ፋኑኤል ወደ አሜሪካ ተመድበው እንደመጡ ያደረጉት ከሀገር ቤት የላካቸው የቅዱስ ሲኖዶስን አሰራር እና መዋቅር ተቀብለው ከሚያገለግሉ አጥቢያወች ጋር አብሮ መስራት ሳይሆን የሀገር በቱን ቅዱስ ሲኖዶስ አንቀበልም መዋቅሩንም አንቀበልም የቅዱስ ፓትርያርኩን ስምም አንጠራም ከሚሉ እና ራሳቸውን ገለልተኛ ነን ከሚሉ አጥቢያወች ጋር አብሮ መስራትን ነው::ይሄም ከቤተክርስቲያን መዋቅር እና ትውፊታዊ አሰራር የራቁትን ወደ ቤተክርስቲያን ከማምጣት ይልቅ መለየትን ማፈንገጥን የሚያበረታታ አደገኛ ተግባር ነው::

4. ትውልድን በተመለከተ

በአሁኑ ጊዜ እግዚአብሔር ለቤተክርስቲያን የሚቆም ትውልድ በማስነሳቱ ወጣቱ የሚችለውን ሁሉ ለማድረግ ደፋ ቀና እያለ ይገኛል:: ይሄም እግዚአብሔር የለም ከሚለው አብዮታዊ መንግስት በኋላ በጣም ትልቅ ደስታ ነው:: ይህ ወጣት በቤተክርስቲያን ውስጥ ህጓ እና ሥርአቷ በሚፈቅደው መሰረት በብጹአን አበው መልካም ፈቃድ ቡራኬ እና መመሪያ ተሰባስቦ እያገለገለ ይገኛል:: አቡነ ፋኑኤልም ከመጡ በኋላ በተለያየ መልኩ የሚያገልግሉ የአገልግሎት ማኅበራት ያናግሩን እና አብረን እናገልግል በሚል ተደጋጋሚ ጥያቄ አቅርቧል:: እንዲያውም እርስወ ያሉበት ድረስ የአየር ቲኬት ቆርጠን እንምጣ እና ያናግሩን ብለው እስከ መለመንም ደርሰዋል:: እርሳቸው ግን አሁን በመላው አሜሪካ በቅድስት ቤተክርስቲያን ውስጥ ያለው የየአጥቢያወች አገልግሎት እንዲጠናከር ከፍተኛ እንቅስቃሴ እያደረገ ያለውን ወጣት አልቀበልም አላውቀውም አብሬም አልሰራም ብለዋል:: ይሄ ምናልባትም ታዲያ በቤተክርስቲያን ምን አይነት ወጣት ነው የሚፈልጉት አላማቸውስ ምንድን ነው? ቤተክርስቲያንንስ ትውልድ አልባ ማድረግ ነው የሚፈልጉት ማለት ነው? ብለን እንድንጠይቅ አስገድዶናል ::

የተወደዳችሁ ምዕመናን እኛ ይሄንን ሁሉ የምናነሳው በአቡነ ፋኑኤል ወይንም በሌላ ማንም አካል ላይ ጥላቻ ወይንም ቂም በቀል ኖሮን አይደለም:: አቡነ ፋኑኤልን በግል አናውቃቸውም የምናውቃቸው በእናት ቤተክርስቲያናችን አማካኝነት ብፁዕ አባት ተብለው ስለተሾሙ ነው:: ነገር ግን የሚሰሩት ስራ እናት ቤተክርስቲያናችንን አደጋ ላይ የሚጥል የቤተክርስቲያንን አንድነት የሚያናጋ የቤተክርስቲያንን ሰላም የሚነሳ ቤተክርስቲያንንም ግለሰቦች በፈልጉት መንገድ እንዲጠቀሙባት የሚያደርግ ስለሆነ ነው:: ከዚህም ባለፈ ደግሞ በወጣቱ ትውልድ ላይ ያላቸው አመለካከት በጣም አደገኛ ስለሆነ እና ቤተክርስቲያንንም ትውልድ አልባ እንድትሆን የሚያደርጋት ስለሆነ ነው:: ስለዚህ እኒህን ብዙ ችግር ያለባቸውን እና በብዙ አቅጣጫ ጥያቄ የሚነሳባቸው አባት በአጥቢያችን መጋበዝ እና ማስተናገድ ለሚሰሩት የጥፋት ስራ እውቅና መስጠት እና ተባባሪ መሆን ስለሚሆን አጥብቀን እንቃወማለን:: የቤተክርስቲያን ቅናት የሚያቃጥለን ክርስቲያኖች ሁሉ በዚህ ጉዳይ ላይ አባቶችንን እና የሰበካ ጉባኤ አባላትን በአንድ ድምጽ እና በህብረት በፍጹም ክርስቲያናዊ ጨዋነት እና አክብሮት ልንጠይቃቸው ይገባል እንላለን::

እግዘአብሔር ቤተክርስቲያናችንን ይጠብቅልን!

13 comments:

Anonymous said...

ጥሩ ዘገባ ነው, የሲያትል ህዝበ ክርስቲያን እስከ መጨረሻው ይታገላል::ነገር ግን የሚከተለው ሀሳብ ትክክል አይደለም::

ጉዳዩን በከፍተኛ ምሥጢር እንደያዙት በአደባባይ ያመኑት አስተዳዳሪው “ለሰበካ ጉባኤው እንኳን ያልነገርኩት ምሥጢር እንዴት ሊታወቅ ቻለ?” በሚል ቁጭታዊ ጥያቄ አቅርበዋል።

ምክንያቱም ስላላመኑ::

Anonymous said...

መልዓከ ሰላም አባ ወልደ ሰማዓት መቆጨትም የሌለባቸው :

1. ለምዕመናን ደንታ የሌላቸው ለሚያዋጡት ገንዘብ እንጂ ፡ ለቤተ ክርስቲያን በማሰብ ሃሳብ ቢያቀርቡ ምንም የማይቀበሉ::

2. ምዕመናንን በቀናነት ከማገልገል ይልቅ በቀቢጸ ተስፋ ሲመተ ጵጵስና ቅዥት ውስጥ የሚኖሩ::

3. በሲያትል አድባራት “ሊቀ ካህናት” የሚል ሹመት በአቡነ ፋኑኤል በመሾማቸው ፡ የጳጳሱ ቀኝ እጅ በመሆን የአካባቢው ጉዳይ የሚያስፈጽሙ::

4. ከኃይማኖት ይልቅ ለገዢው ፓርቲ የዘረኝነት ፖለቲካ ታማኝነታቸውን በተለያየ ጊዜ ያንጸባረቁ እንደሆነ በቅርብ የሚያውቋቸው ይመሰክራሉ::

5. ከዚህ ቀደም ይነሱ ተብለው በ2001 ዓ.ም. በፓትርያርኩ ልኡካን የተላኩ ብጹአን ሊቃነ ጳጳሳት ባቀረቡት ሪፖርት ቅዱስ ሲኖዶሱ ይነሱ ቢልም ነገር ግን በፓትርያርኩ ከለላ እስካሁን ያሉ:: በዚህም ምክንያት ቤተ ክርስቲያንና ምዕመናን ለሁለት እንዲከፈል ያደረጉ::

6. በእርሳቸው ዙሪያ ከአዲስ አበባ ... ሱዳን ... ሲያትል ቅዱስ አማኑኤል ... ቅዱስ ሚካኤል ... ባደረጓቸውን ቤተ ክርስቲያንን የሚያውኩ ተግባራት ዙሪያ ብዙ ማለት ይቻላል... ወደፊት በሰፊው እንመለስበታለን ... ይቆየን...

Anonymous said...

በምድረ አሜሪካ የተዋህዶ ልጆች በርቱ የቤተክርስቲያንን ክብር እንዳትዘነጉ

Anonymous said...

እንደ አንድ የቤተክርስቲያን አባል በስብሰባው ተገኝቼ ነበር ተቃውሞው ተገቢና ስርዓት የጠበቀ ሲሆን ስምምነት ላይ ስለመደረሱ ግን እጅግ እጠራጠራለሁ ለማንኛውም ቤተክርስቲያናችንን እግዚአብሔር ከፈተና ይጠብቅልን ምዕመናንም ከዚህ ልምድ በመነሳት ቤተክርስቲያናችንን ነቅተን እንጠብቅ።

Anonymous said...

በርቱ ጠንክራችሁ ቤተክርስቲያናችንን ጠብቁ እግዚአብሔር ከእናነተ ጋር ይሁን::

Anonymous said...

Bravo seattle!!! Alu gena - those long hands should be cut. Aba W/Semaet - you better prioritize your Church rather than trying to control another one. This never can happen. Autocrating is an old fashion!!! Come down to your self. Avoid hidden ajenda.

Anonymous said...

በጣም የሚገርመው ደሞ ቅዱስ አማኑኤል ቤተክርስቲያን አስተዳዳሪ ስለሌለው ብቻ የሚሰራው ስውር ደባ ቤተክርስቲያኑ እንዳያድግ እያደረገው ነው:: በሲያትል የመጀመሪያው ቤተክርስቲያን ሆኖ ሳለ የማንም መጫወቻ መሆኑ እጅግ የሚያሳዝን ነው::

ሊቀጳጳሱ አቡነ ፋኑኤል በማንአለብኝነት መጀመሪያ አማኑኤል ከዛ ደግሞ ሚካኤል ለመምጣት አቅደው ነበር:: የትም ይምጡ የት መዋረዳቸው ግን አይቀሬ ነው:: ሌሎች አብያተ ክርስቲያናት ሄደው በጀርባ በር ወጥተው እንዳመለጡት እዚህም አመልጣለው ብለው አስበው ከሆነ ሃሰት ነው:: የሚመጡበት መኪናም ቢሆን የቲማቲምና የድንች መጫወቻ መሆኑ አይቀርም ልክ እንደሳቸው አባባል "This is America."

Anonymous said...

አንድ አባት ቤተክርስትያንን የሚከፋፍል ከሆነና ምዕመኑንም ማስተዳደር ካልቻለ ከዛም አልፎ ቤተክርስትያንን አንደግሎ ንብረት ምዕመኑን ወይም ሰበካጉባየውን ሳያማክሩ በራሳቸው ፈቃድ ያሻቸውን ስራ እንዲሰሩ ማንው ስልጣን የሰጣቸው? ይህን ልክ ያለሆነ ስልጣን የስጣቸው ጳጳስም ይሁን ልላ ሐይል ቢኖር ከአባ ጋር ቦታውን ለታማኝ እረኛ ሊያስረክቡ ይገባል፥ ምዕመኑም ይህን ጥያቄ ስለቤተክርስትያን አንድነትና ስለቤተክርስትያን ህልዎና ሲል መጠየቅ ይገባዋል፥፥

ድሉ ዘእግዚአብሔር said...

ራሱን ትታችሁ እግር እግሩን ብትቀጠቅጡት እውሬው አይሞትም። ከራሱ ላይ አተኩሩ ነው የምለው።

Anonymous said...

O my god it is really good, I do not think that abune fanuale is a good father,we all know that so why do we need to invite him?. something should be done about aba weldesemaet and zemekile along time ago.That church used to be full of love and respect you both destroy all of it. especially zemikile you should know better by now so please stoop dividing our church for second time.let us be aware of our church.

Anonymous said...

በሌሎች አካባቢዎች የተጀመረው “ቤተ ክርስቲያንን ከነአባ ፋኑኤል እና ከፕሮቴስታንቱ አጋራቸው ከኃ/ጊዮርጊስ ጥላሁን የመታደግ” እንቅስቃሴ በሲያትልም ተጀምሯል። “ምንም አያውቅም” እየተባለ የሚናቀው ምእመን ለቤተ ክርስቲያኑ የክፉ ቀን ደራሽ መሆኑን እና በሐዋሳ ያለው ሕዝበ ክርስቲያን እንባውና በተጋድሎው ቅ/ሲኖዶስ ኡኡታውን ሰምቶ ያገኘውን ድል በአሜሪካ የሚገኘውም ምእመን እንደሚደግመው አረጋግጧል።

Anonymous said...

እግዚአብሄር ይስጣችሁ እናንት ወጣቶች፣ እናንተን እግዚአብሄር ለዚች ቤተክርስትያን ባይፈጥር እስካሁን ቤተክርስትይንእችን አትኖርም ነበር። ተባረኩ።

Anonymous said...

እሰይ አቡነ ፋኑኤል በሃሰትም ይሁን በስውር ወደሲያትል ሊያደርጉት የነበረውን በረራ ሰርዘው ቀርተዋል:: አቤት ታይቶኝ ነበር እዚህ ቢመጡ ኖሮ እውነትም ለመናፍቃን ብቻ የቆሙ አባት መሆናቸው ይረጋገጥ ነበር:: ዳሩ ሳይመጡ ቀሩ እንጂ::

እኔ እምለው የቀሩት ግን:
ደግ አባት አለመሆናቸው ስለታወቀባቸው ነው?
ወይስ ሰዉ ተቆጥቷልና አልመጣም ነው?
ወይስ ከበስተጀርባው ሌላ ሴራ አለበት?
ወይስ ምን????

ለማንኛው "ትንሽ ሲረጋጋ እመጣለሁ" ብለው አስበው ከሆነ ባይሞክሩት ይሻላል:: እዚያው በቅዱስ ሲኖዶስ ፊት ይቅርታ ጠይቀው የኢትዮጵያን ሕዝብ አስቀይሜአለሁ ብለው በገሃድ ካልመሰከሩ ማንም የሚያከብራቸው አይኖርም:: በጣም በድብቅ ቢሰሩ እና ለመምጣት ቢወስኑ እንኳን ቀድሶ ከመሄድ ውጪ "ቆሜ አስተምራለሁ!" ቢሉ ትርፍ የለውም እዛው ሊቀጳጳስ እንደሆኑ ተከብረው ይቀመጡ::

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)