December 28, 2011

የድሬዳዋ ቅዱስ ገብርኤል ቤተ ክርስቲያን መዝባሪዎች እጃቸውን ከደብሩ እና ከሀገረ ስብከቱ ላይ እንዲያነሡ ተጠየቀ


  • የደብሩ አስተዳዳሪ የአጥቢያውን ልማት የመምራት አቅም የላቸውም::
  • ፖሊስ ሁለት የሰንበት ት/ቤት ወጣቶችንና አንድ ምእመን ይዞ አስሯል::
  • ተዋንያኑ ፋንቱ ማንዶዬ እና ችሮታው ከልካይ በቁሉቢ ለአኵስም ጽዮን ሙዚዬም ግንባታ የገቢ ማሰባሰቢያ መርሐ ግብር ያካሂዳሉ::
 (ደጀ ሰላም፣ ታኅሣሥ 18/2004 ዓ.ም፤ ዲሴምበር 28/2011. READ IN PDF)፦ በድሬዳዋ ሀገረ ስብከት የሚገኙ የስምንት አጥቢያ አብያተ ክርስቲያን ሰንበት ት/ቤቶች ወጣቶች እናምእመናን በሳባ ደብረ ኀይል ቅዱስ ገብርኤል ሕንፃ ቤተ ክርስቲያን ግንባታ የተፈጸመው ሙስና ተጣርቶ በሙሰኞቹ ላይ ሕጋዊ ርምጃ እንዲወሰድ፣የደብሩን አስተዳደር በመምራት ረገድ የከፋ የአቅም ማነስታይቶባቸዋል፤በሰበካ መንፈሳዊ ጉባኤው የተተለሙ የልማት ዕቅዶች ተፈጻሚ እንዳይሆኑ ዕንቅፋት ፈጥረዋልየተባሉት የደብሩ አስተዳዳሪ መልአከ ኀይል ቆሞስ አባ ገብረ እግዚአብሔር ቸኮል ከሓላፊነታቸው እንዲወገዱ በተቃውሞ ትዕይንት ጠየቁ፡፡

የተቃውሞ ተሰላፊዎቹ “ደካማ እና ነውረኛ” በማለት ለገለጧቸው የደብሩ አስተዳዳሪ እና ለሙሰኞቹ የሕንፃ አሠሪ ኮሚቴ አመራሮች ሽፋን በመስጠት ዝርፊያውን አጠናክረዋል፤ ምእመኑ በየደረጃው ላቀረባቸው አቤቱታዎች በአድርብዬ ጠባይ ተመጣጣኝ ርምጃ አልወሰዱም ያሏቸውን የሀገረ ስብከቱን ሥራ አስኪያጅም ነቅፈዋል፡፡ የከተማው ፖሊስ ኮሚሽን የተቃውሞ ትዕይንቱን ቀስቅሰዋል፤በዋናነትም አስተባብረዋል ያላቸውን ሁለት የሳባ ደ/ኀ/ቅ/ ገብርኤል ቤተ ክርስቲያን ሰንበት ት/ቤት ወጣቶች እና አንድ ምእመን ይዞ ማሰሩም ተመልክቷል፡፡ ሁለቱ ወጣቶች እና ምእመኑ በድሬዳዋ የፌዴራል መጀመሪያ ደረጃ ፍ/ቤት ቀርበው ምርመራዬን አልጨረስኩም ባለው ፖሊስ የ14 ቀናት ጊዜ ቀጠሮ የተጠየቀባቸው ቢሆንም ፍ/ቤቱ ከአራት ቀናት በኋላ እንዲያቀርባቸው ትእዛዝ ሰጥቷል፡፡
የሰንበት ት/ቤት ወጣቶቹ እና ምእመናኑ ጥያቄዎቻቸውን በተቃውሞ ትዕይንት ያቀረቡት በየዓመቱ ታኅሣሥ 19 ቀን በርእሰ አድባራት ቁሉቢ ደብረ ፀሐይ ቅዱስ ገብርኤል ቤተ ክርስቲያን ከሚከበረው የቅዱስ ገብርኤል ክብረ በዓል አስቀድሞ ዛሬ ረፋድ ላይ ወደ ድሬዳዋ ላመሩት ብፁዕ ወቅዱስ ፓትርያርክ አቡነ ጳውሎስ የተለመደው አቀባበል በሚደረግበት በደብረ ምሕረት ቅዱስ ሚካኤል ካቴድራል በመገኘት ነው፡፡ ወጣቶቹ እና ምእመናኑ ጥያቄያቸውን ለፓትርያርኩ ለማቅረብ በካቴድራሉ ተሰልፈው በሚጠባበቁበት ወቅት በመፈክር መልክ ከያዟቸው ኀይለ ቃሎች ውስጥ፡- “የሳ/ደ/ኀ/ቅ/ ገብርኤል ቤተ ክርስቲያን አስተዳዳሪ ብቃት ስለሚያንሣቸው ከሓላፊነታቸው ይነሡ”፤ “እነ ኢንጅነር ሰሎሞን ካሳዬ ከሀገረ ስብከታችን ላይ እጃቸውን ያንሡ”፤ “የብፁዓን አባቶቻችንን ውሳኔ እናከብራለን” የሚሉ ይገኙበታል፡፡
ፓትርያርኩ ቀትር ላይ ድሬዳዋ አየር ማረፊያ ሲደርሱም ሆነ በካቴድራሉ ከተገኙ በኋላ ለወትሮው አቀባበሉን የሚያደምቁት የሀገረ ስብከቱ ስምንት አጥቢያ አብያተ ክርስቲያን አስተዳዳሪዎች፣ የሰበካ መንፈሳዊ ጉባኤያቱ ሊቃነ መናብርት፣ የሰንበት ት/ቤት ወጣቶች እና ምእመናን እንደ ወትሮው አለመገኘታቸው ታውቋል፡፡ ለፓትርያርኩ አቀባበል መቀዝቀዝ የወዲያው ምክንያቱ ፖሊስ በሰላማዊ መንገድ ጥያቄያቸውን ለማቅረብ ከተዘጋጁት ወጣቶች መካከል ሁለቱን፣ ከምእመናኑም አንዱን ለይቶ በመውሰዱ ሰልፈኞቹ ወደታሰሩበት ፖሊስ ጣቢያ በመሄዳቸው ነው ተብሏል፡፡ ዓይነተኛው ምክንያት ደግሞ በሳባ ደብረ ኀይል ቅዱስ ገብርኤል ቤተ ክርስቲያን ሕንፃ ሥራ ጋራ በተያያዘ የተፈጸመው ሙስና እና በተሐድሶ ኑፋቄ አራማጅነታቸው የተነሣ ውሳኔ የተላለፈባቸውን ሦስት ግለሰቦች ቀኖናዊ ቅጣት አፈጻጸም ቸል በማለት የሀገረ ስብከቱ ሥራ አስኪያጅ እና ሊቀ ጳጳስ ወደ ቀድሞ ቦታቸው እንዲመለሱና በእግዳቸው ወቅት ‹የቆያቸው› ውዝፍ ደመወዛቸው እንዲከፈላቸው ትእዛዝ ማስተላለፋቸው፣ ይህን ውሳኔያቸውን እንዲያጤኑ ለቀረበው ጥያቄም ምላሽ አለመስጠታቸው በአገልጋዩ እና ምእመኑ ዘንድ የፈጠረው ቁጣና ሐዘን መሆኑ ተዘግቧል፡፡
ለእስር ከተዳረጉት ሁለት ወጣቶች መካከል አንዱ (ኢንጅነር ወንድወሰን ብርሃኑ) ለሕንፃ ቤተ ክርስቲያኑ ሥራ በአማካሪ መሐንዲስነት ያገለገለ እና በዋናነት በኮሚቴው ሰብሳቢ ብርሃኔ መሐሪ የሚፈጸመውን ሙስና ሲቃወም የቆየ ነው፤ የእስሩ ዓላማ የጠቅላይ ቤተ ክህነቱ ምሕንድስና ዘርፍ ሓላፊ አቶ ሰሎሞን ካሳዬ ታኅሣሥ 19 ቀን በደብሩ ሕንፃ አሠሪ ኮሚቴ የተፈጸመውንና እርሳቸውም ከጥቅሙ ተጋሪ የሆኑበትን የጠቅላይ ቤተ ክህነቱን የኦዲት ሪፖርት የሚያስተባብል የማስተባባያ ሪፖርት ያለ ተቃዋሚ ለምእመኑ ለማቅረብ ለማስፈራራት የታቀደ ሳይሆን እንደማይቀር ለጉዳዩ ቅርበት ያላቸው አካላት ተናግረዋል፡፡ ቀደም ሲል አቶ ሰሎሞን በተመሳሳይ መንገድ ያደረጉት የተሳሳተ የማስተባባያ ሪፖርት የማቅረብ ሐሳብ በምእመኑ ማስጠንቀቂያ የከሸፈ በመሆኑ ለነገው ክብረ በዓል የተዘጋጁበት ሙከራም እንደማይሳካላቸው ምእመናኑ እየተናገሩ ይገኛሉ፡፡
የጠቅላይ ቤተ ክህነት ቁጥጥር አገልግሎት ኦዲተሮች ከሳባ ደብረ ኀይል ቅዱስ ገብርኤል ቤተ ክርስቲያን ሕንፃ አሠሪ ኮሚቴ አመራሮች እስከ መንበረ ፓትርያርኩ በተዘረጋው የጥቅም ሰንሰለት ስለተፈጸመው ሙስና አጣርተው ባቀረቡት ሪፖርት መሠረት ከፕሮጀክት አማካሪ መሐንዲስ ይሁንታ ሳይገኝ፣ ምንም ዓይነት የቅድመ ክፍያ ዋስትና ሳይቀርብ አላግባብ ለሕንፃ ሥራ ተቋራጩ ከፍተኛ ገንዘብ ተከፍሏል፡፡
በቃል ትእዛዝ እና ያለዋስትና በብድር መልክ ለሕንፃ ሥራ ተቋራጩ በየጊዜው የተፈጸመው ይኸው ያልተገባ ክፍያ በውለታ ጊዜው ውስጥ ለሕንፃው አጠቃላይ የግንባታ ፕሮጀክት ሊከፈል ከነበረው ወጪ ከግማሽ በላይ ነው፡፡ ሆኖም የሕንፃ ሥራው ከውል ጊዜው አራት ዓመት በላይ ዘግይቶም ከ65 በመቶ በላይ ባለመጠናቀቁ፣ ይህም በየጊዜው በሚንረው የግንባታ ማቴሪያሎች ወጪ የተነሣ ሕንፃው መጀመሪያ ከተገመተው 2.9 ሚሊዮን ብር ጠቅላላ ወጭ ወደ 4.8 ሚሊዮን ብር በማሻቀቡ ደብሩን ለከፍተኛ ወጪ እየዳረገው እንደሚገኝ ተመልክቷል፡፡ ከዚህም ባሻገር ከሕንፃው ዲዛየን ጋራ የማይጣጣሙ በግንባታው ገጽታ ላይ የሚስተዋሉ የኢንጂነሪንግ ችግሮች መኖራቸውም ነው የሚነገረው፡፡
የጠቅላይ ቤተ ክህነቱ የቁጥጥር አገልግሎት ኦዲተሮች በምርመራ ስላረጋገጡት የ1.8 ሚሊዮን ብር ጉድለት መተማመን ተፈጥሮ የደብሩ ሰበካ አስተዳደር ጉባኤ በጉድለቱ ሳቢያ በሕንፃ ሥራ ተቋራጩ ቀጣይነት እንዲሁም በተጓተተው ግንባታ ዕጣ ፈንታ ላይ ያነሣቸው ጥያቄዎች መፍትሔ ሳይበጅላቸው የጠቅላይ ቤተ ክህነቱ ምሕንድስና ዘርፍ ኢንጅነር ሰሎሞን ካሳዬ ከፓትርያርኩ ልዩ ጸሐፊ እና ከሕንፃ አሠሪው ኮሚቴ ሰብሳቢ ብርሃኔ መሐሪ ጋራ በመተባበር የኦዲተሮችን አቋም የሚያስቀይር እና የቀደመውን ኦዲት ሪፖርት ግኝቶች የሚያስተባብል የቅሰጣ ሪፖርት በጓሮ በር አዘጋጅተዋል፡፡ በዚህም ሳያበቁ ከምእመኑ እና ከመንግሥት ተጠያቂነት በመሸሽ ከሀገር ጠፍቶ ለሰነበተው የሕንፃ ሥራ ተቋራጭ ከውል ጊዜው ውጭ ለሆነና በ1994 ዓ.ም የቋሚ ኮንስትራክሽን መተዳደሪያ ደንብ አንቀጽ 70 መሠረት ዝርዝሩ ተለይቶ ላልታወቀ የግሽበት/የግንባታዋጋ መናር በሚል የተጨማሪ ብር 900,000 ክፍያ እንዲፈጸም አጸድቀዋል፤ እንደ ምንጮቹ ጥቆማም ከዚህ ሕገ ወጥ ክፍያ እንደ የደረጃቸው ጥቅም ተጋርተዋል፡፡
የኤጲስ ቆጶስ ሹመት ተስፈኛው የሆኑት የሀገረ ስብከቱ ሥራ አስኪያጅ ቆሞስ አባ አረጋዊ ነቦምሳ እና የሀገረ ስብከቱ ሊቀ ጳጳስ ብፁዕ አቡነ ገሪማ ለዚህ ሁሉ በደል ቸልተኝነት በማሳየት የተፈጸመውን ሙስና እና የአስተዳደር በደል ለመረጠው ምእመን በሪፖርት አጋልጦ የተተኪ ሰበካ መንፈሳዊ ጉባኤ አባላትን ለማስመረጥ የተዘጋጀውን ሰበካ ጉባኤ አስተዳደር አባላት ከቃለ ዐዋዲው ውጪ ከሓላፊነታቸው እንዲለቁ ከፓትርያርኩ ልዩ ጽ/ቤት በተጻፈ ደብዳቤ መመሪያ እንዲወርድ አድርገዋል፡፡
ይሁንና ጉዳዩን በቅርበት የሚከታተለው የአጥቢያው ምእመን ከትላንት በስቲያ እሑድ በተካሄደው አዲስ የሰበካ መንፈሳዊ ጉባኤ አባላት ምርጫ ንቁ ተሳትፎ በማድረግ በሐቅ የሚያገለግሉትን የቤተ ክርስቲያን ልጆች መርጧል፡፡በአንጻሩ ብርሃኔ መሐሪ የተባሉ የሕንፃ አሠሪ ኮሚቴው ሰብሳቢ ግን ከሌሎች የጥቅም ተጋሪዎቻቸው ጋራ አሁንም በሓላፊነታቸው ላይ እንደተቀመጡ ይገኛሉ፡፡ዛሬ የከተማው ምእመናን እና የሰንበት ት/ቤት ወጣቶች ጥያቄያቸውን በሰላማዊ መንገድ ለማቅረብ በተዘጋጁበት ሁኔታ ለሁለት ወጣቶች እና አንድ ምእመን መታሰር የእኚህ ግለሰብ ግፊት እንዳለበት ተጠቁሟል፡፡ግለሰቡ በስመ ታጋይ የሚነግዱ፣ የድሬዳዋ እግር ኳስ ፌዴሬሽን ዐቃቤ ነዋይ በነበሩበት ወቅት የፌዴሬሽኑን ካዝና በማራቆት የተባረሩ፣ ከደብሩ ሕንፃ ግንባታ ፕሮጀክት በሚጋሩት ሕገ ወጥ ጥቅም ሽንሌ በተባለ የከተማዋ ክፍል የግል ኢንቨስትመታቸውን እያካሄዱ የሚገኙ ሙሰኛ እና ጀብደኛ ግለሰብ መሆናቸው ይነገርባቸዋል፡፡
ብፁዕ አቡነ ገሪማ የፌዴራዊ መንግሥት ሁለተኛ ከተማ የሆነችው ድሬዳዋ ሀገረ ስብከት ሊቀ ጳጳስ ይሁኑ እንጂ በመንበረ ጵጵስናቸው አሉ ለማለት እንደማያስደፍር የሀገረ ስብከቱ ምንጮች ይናገራሉ፡፡ “የሀገረ ስብከቱ ጽ/ቤት ሠራተኞች ደመወዝ የሚከፈለው የሒሳብና በጀት ክፍል ሠራተኛው በየወሩ አበል እየታሰበለት ደመወዝ መክፈያ ቅጽ እየያዘ አዲስ አበባ ጽርሐ መንበረ ፓትርያርክ ድረስ እየተመላለሰ ብፁዕነታቸውን በማስፈርም ነው፤” ይላሉ በሊቀ ጳጳሱ ግራ የተጋቡ አስተያየት ሰጪዎች፡፡ ይሁንና አስተያየት ሰጪዎቹ እንደሚናገሩት እንኳን አሁንና ቀድሞም አቡነ ጳውሎስ በዓመት ሁለት ጊዜ፣ ታኅሣሥ 19 እና ሐምሌ 19፣ ለቅዱስ ገብርኤል ክብረ በዓልወደ ድሬዳዋ በወረዱ ቁጥር ሊቀ ጳጳሱ አይለዩዋቸውም፡፡ ዛሬም ፓትርያርኩ ወደ ድሬዳዋ ሲያመሩ ከብፁዕ አቡነ ሕዝቅኤል፣ ብፁዕ አቡነ ፊልጶስ እና ብፁዕ አቡነ ያሬድ ጋራ ብፁዕ አቡነ ገሪማም አብረዋቸው ነበሩ፡፡ በእነዚህ የፓትርያርኩ ምልልሶች ወቅት የሀገረ ስብከቱ አጥቢያ አብያተ ክርስቲያን ተራ ገብተው ለእያንዳንዱ አቀባበል በፉክክር መልክ ለመስተንግዶ በሚያወጡት በርካታ ሺሕ ብሮች(በትንሹ ከ20,000 ብር ያላነሰ) ግብር ያስገባሉ፡፡
ዛሬ ማምሻውን ፓትርያርኩ በ1.5 ሚሊዮን ብር ያሠሩት ማረፊያቸው በሚገኝበት በደብረ ምሕረት ቅዱስ ሚካኤል ካቴድራል ከወትሮው ያነሰ ቁጥር ያለው ምእመን በተገኘበት የሠርክ መርሐ ግብር ተካሂዷል፤ አቡነ ጳውሎስም ነገ ታኅሣሥ 18 እና 19 ቀን በቁሉቢ ደ/ፀ/ቅ/ገብርኤል ቤተ ክርስቲያን በመገኘት ለአኵስም ጽዮን ቤተ መጻሕፍት ወመዘክር(ሙዚዬም) ማሠሪያ የገቢ ማሰባሰቢያ ቅስቀሳ ያካሂዳሉ ያሏቸውን ተዋንያን ፋንቱ ማንዶዬንና ችሮታው ከልካይን አስተዋውቀዋል፡፡ከእነርሱም ጋራ የካህናት አስተዳደር መምሪያ ሓላፊ(መጋቤ ካህናቱ) ሊቀ ማእምራን ኀይለ ሥላሴ ዘማርያም፣ ጌታቸው ዶኒ እና ሌሎችም ግለሰቦች መኖራቸው ተዘግቧል፡፡
በቀደመው ዜና ዘገባችን እንደገለጽነው የርእሰ አድባራት ቁሉቢ ደብረ ፀሐይ ቅዱስ ገብርኤል ቤተ ክርስቲያን በክብረ በዓል በሚያስገኘው በብዙ ሚሊዮን የሚቆጠር ገንዘብ፣በስእለት እና መባዕ በሚገቡት ስፍር ቁጥር የሌላቸው ንዋያተ ቅድሳት አማካይነት በተቋቋመው “የቁሉቢ ንዋያተ ቅድሳት ማደራጃ”ለአህጉረ ስብከት፣ ተቋማት እና መንፈሳዊ ኮሌጆች ድጎማ በሚል ሀብቱ በየጊዜው ወደ መንበረ ፓትርያርኩ ቢጋዝም ደብሩ እና አካባቢው ግን ከአንድ መለስተኛ ት/ቤት በቀር የተሠሩለት የልማት ተግባራት የሉትም፡፡

10 comments:

Haq tenagari... said...

What kind of fashion is this demonstration? Church matters are not political issues and the laity should take to the streets to seek whatever correction they demand. This is the work of the so called government puppets who want to divert attention from the real demonstration against the 'government which is going to happen soon.' If they want something to be addressed it can be taken to the respective arch bishop and/or to the Synod if necessary. But this recent trend of Sunday school taking to the streets demanding this and that is not the tradition of the Church nor is spiritual approach. IT IS WRONG!

Anonymous said...

የርእሰ አድባራት ቁሉቢ ደብረ ፀሐይ ቅዱስ ገብርኤል ቤተ ክርስቲያን በክብረ በዓል በሚያስገኘው በብዙ ሚሊዮን የሚቆጠር ገንዘብ፣በስእለት እና መባዕ በሚገቡት ስፍር ቁጥር የሌላቸው ንዋያተ ቅድሳት አማካይነት በተቋቋመው “የቁሉቢ ንዋያተ ቅድሳት ማደራጃ”ለአህጉረ ስብከት፣ ተቋማት እና መንፈሳዊ ኮሌጆች ድጎማ በሚል ሀብቱ በየጊዜው ወደ መንበረ ፓትርያርኩ ቢጋዝም ደብሩ እና አካባቢው ግን ከአንድ መለስተኛ ት/ቤት በቀር የተሠሩለት የልማት ተግባራት የሉትም፡: I like it .....Dear Dejeselamawyian please keep up the good job. According to my view Abune Paulos should back up from those big monasteries and churches . They Should be left for the HagerSibekets and ArchBishops of the belonging AhigureSibket. EgziAbHer Betekerstiyanachinin Yitadegat. Amen!!!!

Anonymous said...

ለሚመለከተው ሁሉ ….

ይህንን ጩኸት ለዲሲ ምዕመናን እንድታደርሱልን እንማጸናለን፡፡


ባለንበት ቤተክርስቲያን በተደጋጋሚ አውደ ምሕረቱን የራስን ዲስኩር ፤ ዝና ፤ ስድብ ፤ ፓለቲካ መናገሪያ ሳይሆን ወንጌል መስበኪያ፤ ቃለ እግዚአብሔር መማሪያ ይሁን ብለን ብንጮህ የሚሰማን ስላጣን ሕዝብ አንድ እንዲል ለማሳሰብ ነው፡፡ ሰባኪም ይሁን ካህን ወይም ጳጳስ ለሕዝቡ ሊያስተላልፍ የፈለገው አስተዳደሪያዊ መልዕክት ካለ ወንገል የሚሰብክ አስመስሎ ሕዝቡን የሚያሳዝን ወቀሳ አይሉት ስድብ የመሰለ መልዕክት ያስተላልፋሉ፡፡ ወንጌል ከሆነ በአውደ ምሕረት ፤ የግል መልዕክት ወይም አስተዳደራዊ ጉዳይ ከሆነ ደግሞ ለይቶ በአዳራሽ ማድረግ ይገባል፡፡ ሁል ጊዜ ቦርዱና ክህናቱ የሚፈልጉትን ተናግረው ሕዝቡ እንዳይናገር ይገባሉ ሕዝቡ ግን በአውደ ምሕረት ላለመናገር እግዚአብሔር መፍራት ይዞት ዝም ይላል፡፡ ክርስቶስ ለዚህ ነው ቤተ የጸሎት ቤት ናት እንጂ የራስ ዲስር መደስኮሪያ፤ የግለሰብ ዝና ማውሪያ ፤ የነጋዴዎች መነገጂያ አይደለችም ብሎ በጅራፍ እየገረፈ ከቤቱ ያስወጣቸው፡፡

በዲሲ ደብረ ምሕረት ቅ/ሚካኤል ቤተክርስቲያን የአስተዳደር ቦርድ ለመምረጥ የሁለት ዓመት የፍርድ ቤት ውጣ ውረድ ከፈጀብን በኋላ በማን አለብኝነት በሕዝብ ተመርጠው የገቡት ተጨማሪ አስመራጮች ችግር አለ መፍትሔ ስጡን ብለው ከቦርዱ እና ከካህናትና ሰንበት ት/ቤቶች ጥምረት መፍትሔ እየተጠባበቅን ቦርዱ መርጦ ያስቀመጣቸው ጥቂት አስመራጮች ስራውን አጠናቀናል ብለው የማይፈልጉትን እጩ ሁሉ ከውድድሩ አስወጥተው ምርጫው ተጠናቀቀ፡፡ የሕዝቡን ድምጽ አፍነው በልተዋልና እግዚአብሔር ይፍረድባቸው ብለን ዝም ስንል አቡነ ፋኑኤል (የቀድሞው አባ መላኩ) በአደባባይ ምን ታመጣላችሁ አይነት ስድባቸውን ወንጌል ላስተምር ብለው ባሳለፍነው እሁድ ሲወርዱብን አረፈዱ፡፡ ወገን እስከመቼ ነው የምንታገስ … ማነው በቃችሁ የሚላቸው፡፡

ለቦርዱ የተመረጡትን 8 ሰዎች (አብዛኛዎቹ ቦርዱ እና አጋሮቹ) ፤ 4 የካህናት ተወካዮች ቃል ለማስገባት ብለው መድረኩን የያዙት አብነ ፋኑኤል ድምሩ ዜሮ ለሚሆን ነገር ያለአግባብ ፍርድ ቤት ሔዳችሁ ብለው ፍትሕ ለተጠማ ወገናቸው የሚያጽናና የእግዚአብሔር ቃል እንደማቀበል የስድብ እሩምታ መግበውታል፡፡

እኛማ አባት አለን ብለን ነጻ ምርጫ ይኑር ፤ በቤተክርስቲያኑ ተጠያቂነት ያለበት አሰራር ይፈጠር ፤ በአዳርሽ እየሰበሰባችሁ አወያዩን ብለን ለጠየቅነው ጥያቄ ቦርዱ መልስ ነፍጎናል እና እርሶ መፍትሔ ይስጡን ብል ብንጠይቆ እኔ ቤተክርስቲያኑን አስረክቤያችሁ ሔጃለው እና አይመለከተኝም ነበር ያሉት የዛሬ አመት ገዳማ፡፡ ይህ ጵጵስና ማዕረግ ከደረሰ አባት አይደለም መሃከላችን ካሉ ሽማግሌዎች የማይጠበቅ ነው፡፡ ይህ ሳይጸጽቶት አሁን ደግሞ ለምን ፍርድ ቤት ሔዳችሁ ብለው መሳደቦ ቅሌት ነው፡፡ ፍትህ ፍለጋ የሚሰማን ብናጣ ወዴት እንሂድ … እድለኛ ብንሆንማ እርሶ መፍትሔ ይሰጡን ነበር፡፡ ነገር ግን ቦርዱ እርሶ እራሶ ባሉበት ሆነው ያንቀሳቅሱት ስለነበር መልሱ አንድ አይነት ሆነ፡፡ ፍትህ ፍለጋ ሰብስቡንና አወያዩን ፤ ሃሳባችንን እንግለጽ ፤ በአውደ ምህረት ወንጌል ብቻ ይሰበክ ፤ የአስተዳደር ጉዳይ በአዳራሽ እንወያይ ብንል እድል አይሰጠን ቢል ፤ አባት አለን ብለን ፍትህ እንዲሰጡን ብንጠየቅ… አይመለከተኝም ቢሉን ፍርድ ቤት ሔድን፡፡

አይመለከተኝም ባሉበት ቤተክርስቲያ ግን የሃገረ ስብከቱ ጳጳስ ሆኜ መጥቻለውና ከሰራሁት ቤቴ ማንም አያስቀጣኝም ብለው ስለ ታላቁ መልአክ ቅዱስ ሚካኤል ማስተማር ሲገባዎ ስለራስዎ አስተመሩን፡፡ ቤቱስ የእግዚአብሔር እጂ የማናችንም እንዳልሆነ ልብ ይበሉ፡፡

ይህ አይበቃ ብሎት እኛን ከጠላችሁ ለምን ቤተክርስቲያን ትመታላችሁ እዛው በየቤታችሁ መቅረት ትችላላችሁ አሉን፡፡ ቤተክርስቲያን የምንመጣው እኮ እግዚአብሔርን ፍለጋ ነው እንጂ እናንተን አይደለም፡፡ እግዚአብሔር የሰጣችሁ ክህነት የምትፈልጉትን ልትጠሩበት ሌላውን ደግሞ ቤታችሁ ቅሩ ሊሉበት ነውን፡፡ በጉንም ግለገሉንም ጠቦቱንም ጠብቅ አለ እንጂ አባሩ አላለም፡፡ ብዙ የተጋደሉ ሃዋሪያቱ እንካን እኛ የማንጠቅም ባሪያዎች ነን አሉ እንጂ “ ብትፈነዱ እንደኛ ካህን ጳጳስ አትሆኑም ” ብለው በሕዝብ ላይ አይደለም በአሕዛብ ላይ አልተዘባበቱም፡፡ … ምን አይነት ዘምን መጣ ወገን … በአውደ ምህረቱ “እኔ ተምሬ ዶክተር ፕሮፌሰር መሆን እችላለሁ እናንተ ግን ካህን ጳጳስ መሆ አትችሉም” ብለው በሕዝቡ ላይ ሲቀልዱ እና ሲያሽማጥጡ ምነው ወንጌሉ ጠፋዎ፡፡ ምን አልባት ካህን ጳጳስ ብቻ ሳይሆን እንደ ተክልዮ ቅዱስ ጻድቅ የሚሆኑ ሕጻናትና ወጣቶች ልጆቻችን በመካከላችን እንዳሉ ዘንግተውት ነውን፡፡ ነገሩማ እንካን 20 ዓመት እና ከዛም በላይ ጠንክሮ መማር የሚጠይቅ ዶክተር ፕሮፌሰር መሆ አይደለም ተራ ሞያተኛ ለመሆንም የእግዚአብሔር ፈቃድ እንደሚያስፈልግ ዘነጉት፡፡



“ስትወለዱም ስትሞቱም ያለእኛ አይሆንላችሁም የአህያ ሥጋ አደላችሁ አትጣሉም …” ይህንን ቃላት ከአንድ መነኩሴ መንጋውን እንዲጠብቅ አደራ ከተሰጠው ከኔ ቢጤ ወንበዴም አልጠብቅም ያውም ቤተክርስቲያን ውስጥ ወንጌል አትታበይ ትላለችና፡፡ ትህቢት የኃጢያት ሥር ናት ብላችሁ ያስተማራችሁን እናንተ ናችሁ፡፡ ለነገሩ ምን አለብዎ ቢታበዩ ይህ ለመንፈሳዊ ሰው ነው የሚገደው እንጂ አለማዊ ለሆነ አይደለም፡፡ መንፈሳዊ የሆኑት አባቶቻችን መነኮሳትማ ደሞዛቸው ለተቸገሩ እየረዱ ለታረዘ እያለበሱ ሕይወታቸውን ሆሩ እንጂ ሁለት ሶስት የተንጣለለ ፓላስ ለራሳቸው ሰርተው አላከራዩም፡፡


“እርሶ ብቻ ቤተክርስቲያኑን የሰሩ እርሶ ብቻ ሞርጌጅ እንደቀፈሉ ደጋግመው ሲናገሩት ያሳዝናል” እግራችን እስኪንቀጠቀጥ ቆመን ሰርተን ያመጣነውን ገንዘብ ሳያሳዝነን ለቤተክርስቲያን የሰጠን እኛ ምዕመናን እኮ ነን፡፡ የሚያሳዝነው እኛን በአንድ ቤተክርስቲያን የምንገኝ አብረነዎት የሰራን ልጆቾትን አንድ ማረግ ሳይችሉ እንዴት ነው ሰሜን አሜሪካን ሊመሩ የመጡት … ፡፡ “ማፈሪያ ማፈሪያዎች ናችሁ … ማፈሪያዎች” እያሉ ከዱርዮ እንካን የማይጠበቅ ቃላት ሲደጋግሙት እኛ በንዴት አንድ ቃል እንድንናገር እና በፓሊስ ለማባረር እንደሆነ ይገባናል፡፡ “እዛው በየቤታችሁ ቅሩ” ያሉንም ለዚሁ ነው፡፡ እኛ ግን ከእግዚአብሔር ቤት ወዴትም አንሄድም ይልቁንም ጳጳስ ነዎት ብለን የሸፋፈነውን ጉድ ማውጣት ካስፈለገ አውጥተን በህግ ሁላችሁንም እንፋረዳለን፡፡ የተዘረፈው ገንዘብ ፤ የደማው ልብ ሁሉ ይቅርታ ጠይቃችሁበት መፍትሔ እስካልሰጣችሁት ድረስ ሕግ እንዲገዛችሁ ያስፈልጋል፡፡

አሁንም የእግዚአብሔር ቤት የጸሎት እና የእምነት ቤት ናትና የራሳችሁን ዲስኩር በአውደ ምሕረቱ ከመስበክ ተቆጠቡ፡፡ የእግዚአብሔርን ቃል ብቻ አስተምሩን፡፡

ከተቆርቋሪ አንዱ …

Anonymous said...

ውድ ደጀ-ሰላማውያን፤- ይህን እንቅስቃሴ በንቃት ከሚከታተሉትና ከሚሳተፉት መካከል አንዱ ነኝ፡፡ አንድ የታዘብኩትን የሚያስቆጨኝንና የሚያሳዝነኝን ነገር ልንገራችሁ፤- አቶ.......አገር ያወቃቸው ፀሐይ የሞቃቸው አጭበርባሪና ሌባ ናቸው የሚያሳዝነው ግን የመንግስት ግለሰቡን መደጋፍና መተባባር ነው፡፡ በግሌ ዜጎች ሁሉ እኩል ናቸው የሚል ዕምነት አለኝ ይህ ግለሰብ ግን ማንኛውም ሰው በህንፃው ጉዳይ ጥያቄ ካቀረበ ‹ከኋላው ሌላ የፖለቲካ አጀንዳ አለ› በማለት መለጠፍ ልማድ ሆኖበታል የሚገርመው ይህ አይደለም መንግስት እንዲህ የተባሉትን ሰዎች መከታተሉና ማስፈራራቱ ነው፡፡ የእግዚአብሄር ቤተሰቦች የሃይማኖት አባቶች ተከታዮቻቸውን የማይሰሙ ከሆነ መንግስት ህዝቡን የማይሰማ ከሆነና ያወጣውን ህግ የማያከብር ከሆነ ……………………………………እ/ር የወደደውን የሚፈቅደውን ያድርግ.
እ/ር ኢትዮጵያን ይባርክ!!!!

Anonymous said...

ውድ ደጀ-ሰላማውያን፤- ይህን እንቅስቃሴ በንቃት ከሚከታተሉትና ከሚሳተፉት መካከል አንዱ ነኝ፡፡ አንድ የታዘብኩትን የሚያስቆጨኝንና የሚያሳዝነኝን ነገር ልንገራችሁ፤- አቶ ………. አገር ያወቃቸው ፀሐይ የሞቃቸው አጭበርባሪና ሌባ ናቸው የሚያሳዝነው ግን የመንግስት ግለሰቡን መደጋፍና መተባባር ነው፡፡ በግሌ ዜጎች ሁሉ እኩል ናቸው የሚል ዕምነት አለኝ ይህ ግለሰብ ግን ማንኛውም ሰው በህንፃው ጉዳይ ጥያቄ ካቀረበ ‹ከኋላው ሌላ የፖለቲካ አጀንዳ አለ› በማለት መለጠፍ ልማድ ሆኖበታል የሚገርመው ይህ አይደለም መንግስት እንዲህ የተባሉትን ሰዎች መከታተሉና ማስፈራራቱ ነው፡፡ የእግዚአብሄር ቤተሰቦች የሃይማኖት አባቶች ተከታዮቻቸውን የማይሰሙ ከሆነ መንግስት ህዝቡን የማይሰማ ከሆነና ያወጣውን ህግ የማያከብር ከሆነ ……………………………………እ/ር የወደደውን የሚፈቅደውን ያድርግ.
እ/ር ኢትዮጵያን ይባርክ!!!!

Anonymous said...

አባ ጳውሎስ ያልተከፈለ እዳ


የኢትዮጵያ ኦርቶዶክስ ቤተ ክርስቲያን በታሪኳ ከገጠማት አስከፊ ጊዚያቶች አንዱና ዋነኛው ጊዜ አሁን ነው ብል ማጋነን አይሆንብኝም። አባ ጳውሎስ ደግሞ ለፈተናዎቿ የአንበሳውን ድርሻ ይይዛሉ። እንደ አንድ የቤተ የቤተ ኬሬስቲያን አማኝ ጉዳዩን በመቆርቆርና በጥልቀት ስንመለከተው ፓትርያሪኩ የቤተ ክርስቲያኗን ሁለንተናዊ ክብር ለሃያ አመታት ያህል ማዋረድ ብቻ ሳይሆን እንደጥላትም ተዋግተዋታል ብል ጥላቻ የውለደው ብሂል ሳይሆን እውንት ምሆኑኑን ማሳያ ምክንያቶቼ ይምስክሩልኛል።

1 ምሳሌንታቸው ቅድስና የራቀው አገልጋይ በቤተ ክርስቲያን እንዲበዛ አድርጓል ሊቃንት እንደሚስማሙብት አይደለም ህይውት /ምሳሌነት / ንግግር እንኳን ከመሪ ይወረሳል ይላሉ። ሃዋርያውም እኔ ክርስቶስን እንደመሰልኩ እናተም እኔን ምሰሉ ሲል የሚምራት ቤተክርስቲያን ከንግግሩ ብቻ ሳይሆን ከህይወቱ እንዲማሩ ይመክራቸው ነበር ። በቅዱስ ጳውሎስ ስልጣን የተሰየሙት ፓትርያሪክ ጳውሎስ ግን በእውነቱ በተቀቡት ላይ መፍርዴ ሳይሆን ህይወታቸው ለደቂቃ የሚያስተምር አይደለም ። በቤተ ክርስቲያኗ እየተስፋፋ ያለው የነውር ውጤቶች ሁሉ በህይውቱ የሚያስተምር መንፈሳው መሪ በማጣቱ ነው። የራሱን ቤት እንደሚሰርቅ ክፉ ባለትዳር ሰው የተሾሙባት ቤተኬርስቲያንን ንብረት እንደጠላት ገንዘብ በድቦ የሚዘርፉ ጆቢራዎች የበዙት እርሳቸውና ቤተሰባቸው ክህነትን በገንዘብ ከመሸጥ አንስቶ የቤተ ክርስቲያኗን ገንዘብ ከሌቦች ጋር በመመሳጠር መዝረፋቸው በምታይቱ ነው። ይህ ብቻ ሳይሆን በቤተ ክርስቲያኗ አስተዳደር ታይቶ በማይታወቅ ሁኔታ በርኩሰት ስራ የተሞሉ አገልጋይ ሳይሆኑ መስለው የሚታዩ አደገኛ ቦዘኔዎች ቤተ ቤተክርስቲያኗን የሞሉት ለቅድስና የማይጨነቁ አለማዊነት ክብራቸው ይሆነ ነውረኞ መብዛታቸው ምስጢሩ ሌላ ሳይሆን አባ እንደ ቄሳሮች ሀውልት እያሰሩ አምልኮት ሁሉ ውዳሴና ቅኔም ክብርና ዝማሬም ለእኔ ብቻ ይሁን በለው በቅድስናው ስፍራ በርኩሰት በመሰየማቸው ነው።

2 ፓትርያሪክ ጳውሎስ የአቃቤ እምነት ተግባር ከማከናወን ይልቅ ለመናፍቃን መፈልፈል ምክንያት ከምሆናቸው በላይ መጠለያ ሆነዋል።
አባ የፕትርክና ሹመቱን በገኙበት እለት በመሃላ ያጸኑትን/ያሰሙትን /ቃል ችላ ብልው ቤተ ክርስቲያኒቱ በአረማውያን በመናፍቃንና በፖለቲከኞች እየደረሱባት ባሉት መከራዎች ሁሉ ለአንድም ቅን ተቆርቁረው ህዝባቸውን ሲያጽናኑ ታይተው አይታውቁም ። ከቤተ ክርስቲያኗ በተገኝው ገንዘብ በሚሊየን ብር በተገዛ መኪና እየንተፈላሰሱ ካህናቷ በመቅደስ ሲታረዱ መናፍቃኑ በጉያዋ ተስግስገው መርዝ ሲረጩ አይተው እንዳላዩ ዝም ይላሉ ከባሰም በዚ አኩሪ ተግባር ላይ የተንቀሳቀሱትን አካላ አካያሳድዳሉ ።

3 አባ ጳውሎስ ጸረ ሊቃውንት አፍቃሬ ቦዘኔ ናቸው። መቼም ከቅድሞ ጀምሮ አባ የማን ውዳጅ ነቡ ተብሎ ሲታወስ ሰውየው በእርግጥም ከሊቃውንት ይልቅ ቦዘኔዎችን ውዳጅ የሚያደርጉ ናቸው። እስቲ ልብ በሉ ከአለቃ አያሌው ይልቅ የድራፍት ቡድን የነበሩትን ዮሐንስ ዋለ በለጠ ይረፉ ተሾመ ገብረ መስቀል ወዳጆቻቸው ነበሩ። ዛሬም ከሊቃውንቱ ይልቅ ምንም ፍሬ የሌላቸውን ባዶ ደመናዎችን እነ ኤልዛቤል ጌታቸው ዶኒን እስንድር ገብረ ክርስቶስ ጸጋዬ ግደይ ሰሎሞን በቀለ እና መሰሎቻቸው ወዳጅ ሆነው ያማክራሉ ያሾማሉ ያሽራሉ ያሳድጋሉ ያዋርዳሉ ያቅብላሉ ይቀበላሉ በስማቸው ምለው ያስፈራራሉ ። እነ ሊቀ ካህናት ክንፈገብርኤል እያሉ የቄስ ኮሊና የኑፋቄ ማህደር የሆነውና በተደጋጋሚ በኑፋቄው ቤተ ክርስቲያንን ያገማውን አዕመረ እሸብርን የሊቃውንት ጉባኤ መሪ አሉ ። ይቀጥላል

Anonymous said...

ውድ ደጅ ስላማውያን እረባካችሁ ሰዉ ይሉኝታ አጣ አሁን ፋንቱ ማንዶዬና ቸሮታው ምን ሊሰሩነው ቀስቃሽ የሆኑት ይህ ሜሪ ጆይ አደል አባ ጳውሎስ የካህናቱን ስንቄ የሆነውን የቁልቢ ገብርኤልን ገንዘብ ለመዝረፈ ባዘጋጁት እቅድ እንዴት ተባባሪ ይሆናሉ የገረመን ያመጣቸው ደግሞ የጌታቸው ዶኒ ወዳጅ ስሎሞን በቀለ የተባል የአባ ጳውሎስን ሀውልት አሰርቶ በቦሌ ያስተከለ ሰባኪነው መባሉን ሰምቼ ገረመኝ እርሱም እዚያ ሲቅሰቄስ አየውሁት ሲኖዶስ ባልወሰነው ስራ ፤ኣይ የተሳተፉ ሁሉ በታሪክ ብቻ ሳይሆን በህግ መጠየቃቸው አይቀርም ። አቶ ጌታቸው ዶኒማ ታላቅ ስራ አገኙ ማለት ነው የተዳከመው ቢዝነስ በዚህ ይጠገናል

Anonymous said...

Aweke Tesema betelemede adimaw astedadariwin abarere Melake Sahil Aweke Tesma Atilanta kegeba Jemro Selam Yelem

Anonymous said...

ወይ ተአምር አባ ጳውሎስ በአሰበ ተፈሪ ጉባኤ እንዲደረግ በእጅጋየሁና በሰሎሞን በቅለ ማላጅናት ለስራ አስኪያጁ በቁልቢ መመርያ ተስጥቶት እየተደረገ ይገኛል

Anonymous said...

hi dejeselam t feel bad to my the church due to Aba paul and his mafeya group , i rember during aba mercorious did not like this. Now racism ,corruption, and diving the church in two is during this aba pual . So what can we do ? aba mercorious is perferable than aba paul administration. please pray together to God .

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)