November 29, 2011

የአፍሪካ ግብረ ሰዶማውያን በአዲስ አበባ ለማካሄድ ያቀዱትን ስብሰባ “የኢትዮጵያ የሃይማኖት ጉባኤ” ተቃወመ!!



  • የግብረ ሰዶማውያኑ ስብሰባ የ(ICASA)ን ኮንፈረንስ አሉታዊ ትርጉም እንዳያሰጠው ተሰግቷል
  • “Claim, Scale-up and Sustain”(የራስ ማድረግ፣ ማሳደግ እና ቀጣይነት) የግብረ ሰዶማውያኑ ውይይት መሪ ቃል ሲሆን አዲስ አበባ የአፍሪካ ዲፕሎማሲ መዲና መሆኗን በመጠቀም በሌሎች የአፍሪካ አገሮች ላይ ተጽዕኖ ለመፍጠር ዕቅድ ተይዟል፤
  • እስከ አሁን ደቡብ አፍሪካ የተመሳሳይ ጾታ ጋብቻን ሕጋዊ ያደረገች ሲሆን በተቃራኒው የናይጄሪያ ፓርላማ ግብረ ሰዶማዊነትን ሕገ ወጥ ያደረገ ሲሆን በኬንያ እና በዑጋንዳ የግብረ ሰዶማውያን መብት በሚል ለፓርላማዎቻቸው ጥያቄ ቢቀርብም ውድቅ አድርገውታል።
  • ዝምባቡዌ ግብረ ሰዶማውያን “ውሾች ናቸው” በሚል ከሀገር ታባርራለች
 (ደጀ ሰላም፤ ኅዳር 19/2004 ዓ.ም፤ ኖቬምበር 29/2011 PDF):- የውጭ አገር ዜጎች፣ በውጭ አገር የሚኖሩ ኢትዮጵያውያን፣ ወደ ውጭ አገር ለንግድ አብዝተው የሚመላለሱ ኢትዮጵያውያን ግብረ ሰዶማዊነትን እንደ ዘመናዊነት/ሥልጣኔ ቆጥሮ በማስፋፋት ረገድ ከፍተኛ ሚና የሚጫወቱ ሲሆን በአብዛኛው የሚጠራሩበት ስም “ዜጋ” የሚል ነው፤ አንዳንዴ ይኸው ስያሜ “ኦፔራ፣ ወገን፣ ጅራሬ፣ ብርታሉ (ቁምጬ)፣ ጀሲካ ሞናሊዛ፣ ቆሚታ፣ መክተብ” በሚባሉ ስያሜዎች እንደሚተካ ተገልጧል፡፡

ግብረ ሰዶማዊነት በሁሉም እምነቶች ዘንድ ኀጢአት፣ በኢትዮጵያ ሕግም ወንጀል ነው፤ መንግሥት በግብረ ሰዶማዊነት ላይ የተለየ ትኩረት በመስጠት ሕጉን በተግባር ላይ እንዲያውል የተጠየቀ ሲሆን 97 በመቶ ኢትዮጵያውያን ግብረ ሰዶማዊነት አጸያፊ እና ኢ-ሞራላዊ እንደ ሆነ ያምናሉ፤ ኅብረተሰቡ ግብረ ሰዶማዊነትን አጥብቆ በመቃወም ባላቸው ጠንካራ አቋም (anti-gay sentiment) በዓለም ሁለተኛ ደረጃ ላይ ይገኛሉ። /የአ.አ.ዩ የ1996 ዓ.ም ጥናት/ “በግብረ ሰዶማውያኑ የታቀደው የቅድመ የ(ICASA) ኮንፈረንስ ስብሰባ ለኢትዮጵያ እና ለኢትዮጵያውያን ሞራል ክብር ያልሰጠ፣ ፀያፍ፣ ከሥነ ምግባር ውጭ እና ባህላችንን የሚያቆሽሽ አጀንዳ ለማስፈጸም የተነሣ የአንድ ቡድን እንቅስቃሴ ነው” /የኢ.ሃ.ጉ መግለጫ/

“በአገራችን ግብረ ሰዶማዊነት በድኻ አደግ ሕፃናትና ጎዳና ተዳዳሪዎች ላይ በሚደረግ ወሲባዊ ጥቃት ሥር እየሰደደ ያለና እንደ ፋሽን ሊነሣ ያለ ጉዳይ መሆኑ ግልጽ ነው፡፡ ግብረ ሰዶማውያንና ግብረ ሰዶማዊነትን የሚደግፉ የውጭ ድርጅቶች እና ግለሰቦች በኢትዮጵያ ያሉትን ጥቂት ግብረ ሰዶማያውያን ቁጥር በማጋነን ጎልተው እንዲታዩና ለ‹መብታቸው› ሰልፍ እንዲወጡ፣ በ1949 ፍትሐ ብሔር ሕግ የጋብቻ ትርጉም ‹በአንድ ወንድ እና ሴት መካከል የሚደረግ ኪዳን› በሚል ፈንታ ‹በሁለት ሰዎች መካከል የሚደረግ ኪዳን› ተብሎ እንዲሻሻልና ግብረ ሰዶማዊነት በሕግ እንዲፈቀድ መገፋፋታቸው ኅብረተሰቡን በከፍተኛ ሁኔታ እያሳሰበው ይገኛል፡፡

በበርካታ ሥነ ምግባራዊ ባህሏ የምትታወቀው ኢትዮጵያ የወደፊት ዕጣ ፈንታዋን ከማን መድባው ይሆን?  ሥልጣኔ ይግባ ሥነ ምግባር የጎደለው ባህልና ልምድ ግን እዚያው ይቅር ትላለችን? ወይስ እንደሌላው ሥልጣኔውን ከእኵይ ሥነ ምግባሩ ጋራ ታግብሰብስ ይሆን? ይህን ዕድል ፈንታ የሚመርጥላት ትውልድ/ሕዝብ/ መሪ አስተሳሰብስ ወዴት አመዝኖ ይሆን?”/ዩናይትድ ፎር ላይፍ ኢትዮጵያ “ግብረ ሰዶማዊነት” በሚል ርእስ የአዘጋጀው መጽሐፍ/

ዜናውን መስማት በርግጥም ያስደነግጣል - ኢትዮጵያ ከምታስተናግደው 16ው “ዓለም አቀፍ የኤች.አይ.ቪ/ኤድስ እና የአባላዘር በሽታዎች ጉባኤ በአፍሪካ” (16th International Conference on AIDS and STLs in Africa – ICASA) አንድ ቀን ቀደም ብሎ ለማካሄድ የታቀደው የአፍሪካ ግብረ ሰዶማውያን የቅድመ ኮንፈረንስ ማነቃቂያ ስብሰባ ከፍተኛ ትችት እና ተቃውሞ እየገጠመው ነው፤ የኢትዮጵያ ኦርቶዶክስ ተዋሕዶ ቤተ ክርስቲያንንና የኢትዮጵያ እስልምና ጉዳዮች ም/ቤትን ጨምሮ የበርካታ አብያተ እምነት መሪዎችን በአባልነት የያዘው “የኢትዮጵያ ሃይማኖቶች ጉባኤ” የግብረ ሰዶማያኑን ስብሰባ በመቃወም ዛሬ ወሎ ሰፈር በሚገኘው የኖርዌ ቤተ ክርስቲያን ሊሰጠው ያዘጋጀው ጋዜጣዊ መግለጫ ከመንግሥት በተላለፈ ሳይሆን እንዳልቀረ በተገመተ መመሪያ ለሌላ ጊዜ መተላለፉ ተገልጧል፡፡

ጋዜጣዊ መግለጫው ከመጀመሩ ጥቂት ደቂቃዎች በፊት በድንገት የተገኙት የጤና ጥበቃ ሚኒስትሩ ዶ/ር ቴዎድሮስ አድሓኖም የ‹ጉባኤው› አባላት ከሆኑት የአብያተ እምነት መሪዎቹ ጋራ ጊዜ ወስደው በዝግ በር ተነጋግረዋል። በመግለጫው ላይ እንዲገኙ ጥሪ የተደረገላቸው የሀገር ውስጥ እና የውጭ ብዙኀን መገናኛ ጋዜጠኞችም ከአዳራሽ እንዲወጡ በመደረጉ በኮሪዶር ላይ ለመጠበቅ ተገደዋል፡፡
የጤና ጥበቃ ሚኒስትሩ ዶ/ር ቴዎድሮስ አድሓኖም (Middle)

ጋዜጠኞቹ በቆይታቸው ኢትዮጵያ ከኅዳር 24 እስከ 28 ቀን 2004 ዓ.ም የሚካሄደውን 16ኛውን “ዓለም አቀፍ የኤች.አይ.ቪ/ኤድስ እና የአባላዘር በሽታዎች ጉባኤ በአፍሪካ” (ICASA) ማስተናገዷ የሀገርን ገጽታ በዓለም አቀፍ መድረክ ለመገንባት እና እያንዳንዱ ተሳታፊ በጉባኤው ላይ ለመታደም ይችል ዘንድ ለምዝገባ ከከፈለው በመቶዎች የሚቆጠር ዶላር ጀምሮ ከሚያስገኘው ኢኮኖሚያዊ ጠቀሜታ አኳያ ከፍተኛ ሽር ጉድ እየተደረገበት ቢሆንም መንግሥት ከልምድ በሚታወቀው የዚህ ዐይነቱ ዓለም አቀፍ ጉባኤ ተሳታፊዎች ግብራዊ ጠባይዕ ላይ ጥንቃቄ አለማድረጉ ከሚያስከትለው “የባህል መበረዝ/ወረርሽኝ ጠንቅ” አንጻር ክፉኛ አስተችቶታል፤

የአብያተ እምነት መሪዎቹም በግብረ ሰዶማያውያኑ የቅድመ ኮንፈረንስ ማነቃቂያ ስብሰባ ላይ ያላቸውን የተቃውሞ መግለጫ እስከ ዛሬ በማዘግየታቸው በጋዜጠኞቹ እንዲብጠለጠሉ አድርጓቸዋል፡፡ አንዳንዶቹም ቅዳሜ፣ ኅዳር 23 ቀን 2004 ዓ.ም በጁፒተር ሆቴል የሚካሄደው የግብረ ሰዶማያውያኑ ውይይት የሕዝቡን ቁጣ በማነሣሣት ከፍተኛ ተቃውሞ ሊቀሰቅስ እንደሚችል በማመልከት መንግሥት የሆነ የማስታገሥ ርምጃ ሊወስድበት እንደሚገባ አስተያየት ሲሰጡ ተሰምተዋል፡፡

የጋዜጠኞቹ ቁም ነገር እና ቀልድ የተቀላቀለበት ጭውውት በቀጠለበት ሁኔታ በድንገት ከአዳራሹ ብቅ ያሉት የኢትዮጵያ ወንጌላዊት ቤተ ክርስቲያን መካነ ኢየሱስ መሪ ቄስ ኢተፋ ጎበና፣ “መግለጫው ለሌላ ጊዜ ተላልፏል፤ መቼ እንደሆነ በትክክል አላውቀውም፤ ከጉባኤው በፊት ወይም በኋላ ሊሆን ይችላል” በማለት አጭር ማስታወቂያ ተናግረው ወደ አዳራሹ በር ፊታቸውን መልሰዋል፡፡ “ጉዳዩ ሀገራዊም ሃይማኖታዊም ጭምር በመሆኑ የአቋም መግለጫችሁን ለሌላ ጊዜ ማስተላለፉ አግባብ ነው ወይ? ከሚ/ሩ ዶ/ር ቴዎድሮስ አድሓኖም ጋራ ስለተወያያችሁበት ጉዳይ ሊነግሩን ይችላሉን?” የሚሉ ጥያቄዎች ተከታትለው ቢቀርቡላቸውም “አላውቅም፤ አልተሰጠኝም” ከሚል በቀር ቀጥተኛ ምላሽ ለመስጠት ፈቃደኛ አልሆኑም፡፡ እርሳቸው በዚህ መልክ ተናግረው ወደ አዳራሹ ተመልሰው ከገቡ ከጥቂት ደቂቃ በኋላ ሁሉም የአብያተ እምነት መሪዎች አዳራሹን ለቀው ሲወጡ በፊታቸው ላይ ብስጭት እና ሐዘን ይነበብ እንደነበር ተዘግቧል።

እየተከታተሉ በጥያቄ ያጣደፏቸውን ጋዜጠኞች የእስልምና ጉዳዮች ም/ቤቱ ተወካይ “አቦ/እባካችሁ ተዉኝ” ሲሉ ብፁዕ ወቅዱስ አቡነ ጳውሎስ ብስጭት በሚነበብበት ዝምታ ወደ መኪናቸው መግባትን መርጠዋል፤ የአዳራሹ በር በተከፈተበት አጋጣሚ ፎቶ ግራፍ ያነሡ ጋዜጠኞች ካሜራም በጸጥታ ኀይሎች እየተቀማ ፊልሙ ከፎቶ ካሜራው ላይ እንዲሰረዝ ተደርጓል፡፡
ኅዳር 23 ቀን 2004 ዓ.ም በጁፒተር ኢንተርናሽናል ሆቴል የሚካሄደው የቅድመ ICASA የአፍሪካ ግብረ ሰዶማውያን የማነቃቂያ ኮንፈረንስ ራሱን አምሸር - AMSHeR(The African Men for Sexual Health and Rights) ብሎ በሚጠራ ቡድን የተዘጋጀ ፕሮግራም ሲሆን ከ25 አገሮች የተውጣጡ 200 ተሳታፊዎች ይገኙበታል ተብሏል፤ የውይይቱ መሪ ቃልም “Claim, Scale-up and Sustain” (የራስ ማድረግ፣ ማሳደግ እና ቀጣይነት) የሚል እንደሆነ ተገልጧል፡፡

ስብሰባው “ለግብረ ሰዶማውያኑ አዲስ ትብብር ለመፍጠር እና ለማቀናጀት፣ ልምድን ለማዳበር፣ ምርጥ ተሞክሮዎችን ለማስፋፋት እና ለሚቀጥለው ትውልድ ይህንኑ ዘይቤ ለማስተላለፍ ለየት ያለ ዕድል እንደሚፈጥር ይታመንበታል” ይላል ለስብሰባው ቅድመ ዝግጅት የወጣው የቡድኑ መግለጫ፡፡ “ግብረ ሰዶማዊነት ሕጋዊ እንዲሆን ከማስቻል አኳያ አፍሪካዊ ምላሽና ነጸብራቅ ማሳየት፤ ኤች.አይ.ቪ/ኤድስን ከመከላከልና ከመቆጣጠር አኳያ ግብረ ሰዶማዊነትን ሕጋዊ ማድረግ የሚያበረክተውን አስተዋፅኦ በመለየት ለተግባራዊነቱ አቅጣጫን መቀየስ፣ በአፍሪካ የወንድ ለወንድ ግብረ ሰዶማዊ ግንኙነቶችን - MSM and HIV(Men who have sex with Men) እውን የማስደረግ ጉዳይ ለኤች.አይ.ቪ/ኤድስ ስርጭት አስተዋፅኦ ስለሚያደርግ ትኩረት እንዲያገኝ ማስቻል” በመግለጫው ላይ የተጠቀሱ የውይይቱ ዓላማዎች ናቸው፡፡ በውይይቱ ላይ የ (ICASA)ን ተወካይ ጨምሮ አምስት ታዋቂ ሰዎች የዕለቱ ተጋባዥ ተናጋሪዎች እንደሚሆኑ ተመልክቷል፡፡
የግብረ ሰዶማውያኑ ስብሰባ ከ(ICASA) ኮንፈረንስ ቀድሞ እንዲካሄድ መታቀዱ ለጉባኤው አሉታዊ ትርጉም እንደሚያሰጠው ያሳሰቡት “የኢትዮጵያ ሃይማኖቶች ጉባኤ” አባላት በበኩላቸው ግብረ ሰዶማዊነት በኢትዮጵያ የወንጀል ሕግ ወንጀል እንደሆነ በግልጽ ተቀምጦ ሳለና ከ97 በመቶ በላይ ኢትዮጵያውያን ድርጊቱን እንደ አጸያፊ እና ኢ-ሞራላዊ አድርገው የሚቆጥሩት መሆኑ እየታወቀ አምሸር ይህን ስብሰባ ለማድረግ ማቀዱ “ለኢትዮጵያ ሕግ እና ለኢትዮጵያውያን ሞራል ቦታ ያልሰጠ መሆኑን ያሳያል” ብሏል፡፡

የመንግሥት ተወካዮች፣ መንግሥታዊ ያልሆኑ ድርጅቶች እና የሃይማኖት መሪዎች ታኅሣሥ 13 ቀን 2001 ዓ.ም “ግብረ ሰዶማዊነት - ተፈጥሮ ወይስ የሥነ ምግባር ውድቀት” በሚል ርእስ ከሳይንስ፣ ሥነ ምግባር እና ባህል አኳያ ውይይት በማድረግ ባለ10 ነጥብ የአቋም መግለጫ ያወጣ ሲሆን ለዘመናት የቆዩ የሀገራችን አኩሪ የሃይማኖት፣ ባህል፣ እና የታሪክ ዕሴቶች ከአገሪቱ ሕጎች ቀስ በቀስ የሚሸረሸሩበት ሁኔታ እንዲገታ፣ ከውጭ ሀገር በሚገቡ ፊልሞች፣ መጽሔት እና ጽሑፎች በኢንተርኔት ስለሆነ በአጠቃቀም እና ዝውውር ላይ መንግሥት አፋጣኝ ጥናት በማድረግ የሕግ ማዕቀብ እንዲዘረጋ. ርምጃም እንዲወስድ ጠይቀዋል፤ በግብረ ሰዶማዊነት ችግር ለገቡት ዜጎችም የሥነ ልቡና ሕክምና እና የምክር አገልግሎት አግኝተው ከችግሩ እንዲወጡ የተለየ ማእከልና ጉዳዩን የሚከታተል የጋራ ምክር ቤት እንዲቋቋም ማሳሰቡ ይታወሳል፡፡
ሰዶማውያን የሚለው ስያሜ በቅዱስ መጽሐፍ ርኵሰትና ዝሙት ይፈጽምባቸው ከነበሩና በኋላም በእሳትና ዲን ከጠፉ ሁለት የጥንት ከተሞች የተገኘ ግብራዊ ስያሜ እንደሆነ ይወቃል፡፡

ዛሬ በ”የኢትዮጵያ ሃይማኖቶች ጉባኤ” ጋዜጣዊ መግለጫ ላይ “ብርቱ ማሳሰቢያ” በሚል ርእስ የተሰራጨውን መግለጫ ሙሉ ቃል ቀጥሎ መመልከት ይችላሉ፡፡
                            
                                ብርቱ ማሳሰቢያ
ከጥቂት ቀናት በኋላ ሊከናወን ላለው የ16ው የዓለም አቀፍ የፀረ-ኤች.አይ.ቪ እና የአባላዘር መቆጣጠር(ICASA) ስብሰባ ኢትዮጵያ በታላቅ ዝግጅት ላይ ትገኛለች፡፡
የ(ICASA) ኮንፈረንስ የአፍሪካ አገሮች እያደረጉት ላሉት ኤች.አይ.ቪ/ኤድስን የመከላከልና ሕዝቡን የማስተማር ሂደት ታላቅ ሚና ያለው አህጉራዊ ኮንፈረንስ ነው፡፡
በመዲናችን አዲስ አበባ ከኅዳር 24 - 28 ቀን 2004 ዓ.ም ሊካሄድ የታቀደው 16ው ኮንፈረንስም ከሚሌኒየሙ የዕድገት ግቦች ዋነኛው በሆነው ኤች.አይ.ቪ/ኤድስን የመከላከል እንዲሁም ሁሉም የበሽታው ተጠቂዎች የሕክምና ሽፋንና ክብካቤ ሊያገኙ የሚችሉበትን መንገድ እንዲቀይሱ እና ልምድ እንዲካፈሉ 10,000/ዐሥር ሺሕ/ ለሚሆኑ የአፍሪካ አገሮች ተወካዮች እና እንግዶች መድረክ አመቻችቷል፡፡
ኢትዮጵያውያን የዚህ ታላቅ መድረክ አዘጋጆች መሆናችን ታላቅ ኩራት እንዲሰማን ያደርገናል፡፡
ይህ በእንዲህ እንዳለ ይህን የማሳሰቢያ ጥሪ እንድናሰማ ያነሣሣን የ16ው የ(ICASA) ጉባኤ በማስታከክ በአገራችን ፀያፍ፣ ከሥበ ምግባር ውጭና ባሕላችንን የሚያቆሽሽ አጀንዳ ለማስፈጸም የተነሣ የአንድ ቡድን እንቅስቃሴ ነው፡፡
ይህ ቡድን ራሱን AMSHeR(The African Men for Sexual Health and Rights) ብሎ የሚጠራ ሲሆን ዋነኛ ዓላማውም በአፍሪካ የሚገኙ ግብረ ሰዶማዊ ወንዶች የተሻለ ሕይወት እና ተቀባይነት የሚያገኙበትን መንገድ ማመቻቸት ነው፡፡ ይህ ድርጅት በ13 የአፍሪካ አገሮች መቀመጫቸውን ያደረጉ 15 ግብረ ሰዶማዊነትን እንደ በጎ ምግባር የሚያንፀባርቁ ድርጅቶች ያዋቀሩት የጋራ ድርጅት ነው፡፡
AMSHeR ከ(ICASA) ኮንፈረንስ ጋራ አስታኮ ‹ቅድመ ኮንፈረንስ› በሚል ርእስ ቅዳሜ ኅዳር 23 ቀን 2004 ዓ.ም በጁፒተር ኢንተርናሽናል ሆቴል ከ25 አገሮች ለተውጣጡ ታዳሚዎች MSM and HIV(Men who have sex with Men) በሚል አጀንዳ ላይ ውይይት ለማካሄድ ዐቅዷል፡፡
የውይይቱ መሪ ቃልም “Claim, Scale-up and Sustain” የሚል ሲሆን ቀጥተኛ የአማርኛ ትርጉሙ “የራስ ማድረግ፣ ማሳደግ እና ቀጣይነት” የሚል ነው፡፡
AMSHeR በዕለቱ (ICASA) ከሚያነሣቸው የውይይት ነጥቦች ጋራ ተመሳሳይነት ያላቸው ነገር ግን ግብረ ሰዶማዊነት እና ግብረ ሰዶማዊ የመሆን መብትን በአዎንታዊ መልኩ የሚያንፀባርቁ የውይይት እና የልምድ ልውውጥ መድረኮችን ለማካሄድ ዐቅዷል፡፡
በኢትዮጵያ የወንጀል ሕግ ግብረ ሰዶማዊነት ወንጀል እንደሆነ በግልጽ ተቀምጦ ሳለና ከ97 በመቶ በላይ ኢትዮጵያውያን ድርጊቱን እንደ አፀያፊ እና ኢ-ሞራላዊ አድርገው የሚቆጥሩት መሆኑ እየታወቀ ይህን ስብሰባ ለማድረግ AMSHeR ማቀዱ ለኢትዮጵያ ሕግ እና ለኢትዮጵያውያን ሞራል ቦታ ያልሰጠ መሆኑን ያሳያል፡፡
ከዚህ በተጨማሪ የዚህ ኢ-ሞራላዊ ስብሰባ በቅድመ ኮንፈረንስ ስም ከ16ው የ(ICASA) ኮንፈረንስ በፊት መደረግ በኮንፈረንሱ ላይ አሉታዊ አንድምታ እንዲያጠላበት ያደርጋል ብለን እናምናለን፡፡
                       
እግዚአብሔር ኢትዮጵያን ይባርክ !!!

Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)