November 13, 2011

አባ ሰረቀ የተፈጸመባቸው “ከፍተኛ የስም ማጥፋት ውንጀላ” በሥራቸው ለመቀጠል እንደማያስችላቸው ገለጹ


  • READ IN PDF. UPDATED!!!!
  • የመንፈሳዊ ዘርፍ ም/ዋና ሥራ አስኪያጅ ሆነው በፓትርያኩ በመሾማቸው ተቃውሞ ያቀረቡት አካላት፣ “እንከን የሌለበትን ንጹሕ እምነታቸውን ጥላሸት የቀቡ ከሳሾቻቸው” ማንነት እና የክሱ ዝርዝር እንዲሰጣቸው ጠይቀዋል
  • ‹ውንጀላው› እስከሚጣራ ድረስ “እጅግ መራራ ተጋድሎ በከፈሉበትና ውጤት ባሳዩበት” የቀድሞ ቦታቸው እንዲቆዩ አልያም የዕረፍት ጊዜ እንዲሰጣቸው አመልክተዋል
  • “እውነትንና ፍትሕን” ከቤተ ክርስቲያን እንደሚሹ “እውነትና ፍትሕ” ከቤተ ክርስቲያን ከጠፋ ግን “ሕገ መንግሥቱን ተጠቅመው” መብታቸውን በማስከበር ከሳሾቻቸውን ለመበቀል ዝተዋል
  • ከአዲሱ የሰንበት ት/ቤቶች ማ/መምሪያ ሓላፊ ጋራ ዛሬ ርክክብ ያደርጋሉ
(ደጀ ሰላም፤ ኅዳር 2/2004 ዓ.ም፤ ኖቬምበር 12/2011)፦ ከሰንበት ት/ቤቶች ማደራጃ መመሪያ ዋና ሓላፊነታቸው ተነሥተው የትምህርት እና ሥልጠና መምሪያ ሓላፊ የተደረጉት አባ ሰረቀ ብርሃን ወ/ሳሙኤል የቀረበባቸው ከባድ “የስም ማጥፋት ወንጀል” ሳይጣራ በሥራቸው ለመቀጠል የማይቻላቸው በመሆኑ ከሥራ ጓደኞቻቸው ጋራ በመሆን “እጅግ መራራ ተጋድሎ ከፍዬበታለሁ፤ መልካም ውጤትም አሳይቼበታለሁ” በሚሉበት በሰንበት ት/ቤቶች ማደራጃ መምሪያ ዋና ሓላፊነታቸው እንዲቆዩ አልያም የዕረፍት ጊዜ እንዲሰጣቸው ጠየቁ፤ ለአዲሱ የማደራጃ መምሪያው ዋና ሓላፊ አባ ኅሩይ መሸሻ የመምሪያው ሠራተኞች አቀባበል ያደረጉላቸው ሲሆን በትንትናው ዕለት ደግሞ ከቆሞስ አባ ሰረቀ ብርሃን ወ/ሳሙኤል ጋራ ርክክብ እንደሚካሄድ እየተጠበቀ ነበር፡፡


አባ ሰረቀ “በንጹሕ እምነቴ ላይ እየደረሰብኝ [ላ]ለው ከባድ የስም ማጥፋት ወንጀል አፋጣኝ መልስ እንዲሰጥልኝ ስለመጠየቅ” በሚል ጥቅምት 27 ቀን 2004 ዓ.ም ለፓትርያክ አቡነ ጳውሎስ በጻፉት ሁለት ገጽ ደብዳቤ፣ “በቤተ ክርስቲያኒቱ ስም በመደበቅ በቤተ ክርስቲያኒቱ እና በሀገሪቱ ላይ ከፍተኛ ማኅበራዊ፣ ሃይማኖታዊ እና ኢኮኖሚያዊ ጫና ፈጥሯል” ያሉት ማኅበረ ቅዱሳን እርሳቸውና “የሥራ ባልደረቦቻቸው” ባደረጉት መራራ ተጋድሎ “የተደበቀ ሥራው በሁሉም ወገን እየተገለጠ” በመምጣቱ ከዛቻና ማስፈራራት ባሻገር “በማንነታቸው እና በንጹሕ እምነታቸው” ላይ ጥላሸት እየቀባ ከፍተኛ ዘመቻ እንደከፈተባቸው አስታውቀዋል፡፡

ጥቅምት 25 ቀን 2004 ዓ.ም የተጠናቀቀው የቅዱስ ሲኖዶስ ምልአተ ጉባኤ “የማ/መምሪያው እና የማኅበረ ቅዱሳን የሥራ አለመግባባት” በሚል በተመለከተው አጀንዳ ተራ ቁጥር 4፡- የሰንበት ት/ቤት ወጣቶችን፣ ሕፃናትንና ማኅበረ ቅዱሳንን ጭምር አስተባብሮ በመምራት ረገድ በከፍተኛ ድክመት የገመገማቸው እና አለባቸው የተባለውን የእምነት ሕጸጽ ከሊቃውንት ጉባኤ አባላት ጋራ በመሆን በማስረጃ መርምሮ የሚያቀርብ ሰባት ብፁዓን ሊቃነ ጳጳሳት ያሉበት ኮሚቴ ያቋቋመባቸው አባ ሰረቀ “የተፈጸመባቸው ከባድ የስም ማጥፋት ወንጀል” በማኅበራዊ እና ሃይማኖታዊ እንቅስቃሴያቸው ላይ ከባድ ችግር የሚደቅንና “በማንነታቸው ላይ የተፈጸመ ግድያ(Character assassination)” አድርገው የሚቆጥሩት በመሆኑ ጉዳዩ ጊዜ ሳይሰጠው በአስቸኳይ እንዲጣራ ተማፅነዋል፡፡

ፓትርያርክ አቡነ ጳውሎስ ጥቅምት 27 ቀን 2004 ዓ.ም በራሳቸው ማኅተም በጻፉት ደብዳቤ የጠቅላይ ቤተ ክህነት የመንፈሳዊ ዘርፍ ምክትል ሥራ አስኪያጅ አድርገው “በመልካም ፈቃዳቸው” በመደቧቸው ቦታ ላይ እንዳይሠሩ የተቃወሟቸው አካላት እና “ንጹሕ እምነታቸውን ጥላሸት የቀቡ” ከሳሾቻቸው ማንነት እንዲነገራቸው፣ ለክሳቸውም መልስ መስጠት ይቻላቸው ዘንድ የክሱ ጽሕፈት በዝርዝር እንዲሰጣቸውም ጠይቀዋል፡፡

ፓትርያርኩ ለአባ ሰረቀ የሰጧቸው ሕገ ወጥ ሹመት ደጀ ሰላምን ጨምሮ በየደረጃው በገጠመው ከባድ ተቃውሞ የተነሣ ጥቅምት 29 ቀን 2004 ዓ.ም በብፁዕ አቡነ ገሪማ በተጻፈ ደብዳቤ የመንፈሳዊ ዘርፍ ም/ሥራ አስኪያጅ መሆናቸው እንደተሻረና ብፁዕ ዋና ሥራ አስኪያጁ በሚመድቧቸው ቦታ እንዲሠሩ ከብፁዕ ወቅዱስ አቡነ ጳውሎስ እንደታዘዘ የሚገልጽ ደብዳቤ ለአባ ሰረቀ እንዲደርሳቸው ተደርጓል፡፡ በዚህም መሠረት አባ ሰረቀ ከሕፃናት፣ ወጣቶች እና ማኅበረ ቅዱሳን ንክኪ ርቀው “ወደሚሠሩበት” የትምህርት እና ማሠልጠኛ መምሪያ መመደባቸው ተገልጧል፡፡


ይሁንና ማኅበረ ቅዱሳንን “ሰንሰለቱን ባልጠበቀ ማመልከቻ አቀራረብ” የሚከሱት ግብዙ አባ ሰረቀ የቅርብ አለቃቸው የሆኑትን ብፁዕ አቡነ ፊልጶስን ተሻግረው ለብፁዕ ወቅዱስ አቡነ ጳውሎስ ባቀረቡት አቤቱታ “የሐሰት ውንጀላ” ነው ያሉት ክስ በተሰጣቸው የሥራ መደብ ሓላፊነታቸውን ለመወጣት የማያስችላቸው በመሆኑ እስኪጣራ ድረስ ቀድሞ በነበሩበት ቦታ እንዲቆዩ አልያም የዕረፍት ጊዜ እንዲሰጣቸው ጠይቀዋል፡፡ የቀረበባቸው “ውንጀላ” ተጣርቶ እውነትንና ፍትሕን ከቤተ ክርስቲያን የማያገኙ ከሆነ ደግሞ ሕገ መንግሥቱን ተጠቅመው መብታቸውን በማስከበር ‹ከሳሾቻቸውን› እንደሚበቀሉ ዝተዋል፡፡

ይገርማል! አባ ሰረቀ “የእውነት እና ፍትሕ ምንጭ ናት” እንደሆነች በአቤቱታቸው ከጠቀሷት ቤተ ክርስቲያን በላይ እና በፊት ትምክህታቸው በሌላ ኖሯል! እንደ ምንኩስናቸው ቢሆን ኖሮ ይህ ዐይነቱ አቋም ከአባ ሰረቀ አይጠበቅም ነበር፡፡ ስለዚህም ይሆን ማኅበረ ቅዱሳን “ፖሊቲካ እና ሃይማኖትን እያጣቀሰ ስለ መሄዱ” የመንግሥት ባለሥልጣናት የተገኙበትን የመስከረም 12 ቀን 2002 ዓ.ም ስብሰባ አዘውትረው በጀብደኛነት የሚተርኩት? የአባ ሰረቀ ግብዝነት(hypocrisy) ማኅበረ ቅዱሳንን በሚከሱበት “ሰንሰለቱ ያልጠበቀ የደብዳቤ አቀራረብ” ብቻ ሳይሆን እርሳቸው ራሳቸው በአሜሪካ ሳሉ በራሳቸው አነጋገር “ማጣቀስ” ብቻ ሳይሆን ሲያደበላልቁት በቆዩትና መንግሥት በሚገባ በሚያውቀው ፖሊቲካዊ አሰላለፋቸውም ጭምር የሚገለጽ ነው/ዝርዝሩን በቆይታ እንመለስበታለን/፡፡

ከአባ ሰረቀ ከሰንበት ት/ቤቶች ማደራጃ መምሪያ ዋና ሓላፊነታቸው እንደሚነሡ ከታወቀበት ጊዜ ጀምሮ እስከ አሁን ድረስ እየተስተዋሉ የሚገኙት ውሳኔውን ለማዳፈን የሚጥሩ ርብርቦች - አባ ሰረቀ የፕሮቴስታንታዊ-ተሐድሶ ፕሮጀክት ሕንብርት (መቋጠሪያ ነጥብ ወይም ውል)፣ የሰንበት ት/ቤቶች ማደራጃ መምሪያ ደግሞ የፕሮጀክቱ ገዥ መሬት ለማድረግ የነበረውን የአራረ ቤተ ክርስቲያን ስትራቴጂ እንደሚያመለክት እየተገለጸ ነው፡፡

ጥቅምት 13 ቀን 2004 ዓ.ም ምልአተ ጉባኤው አባ ሰረቀ ከማደራጃ መምሪያው ተነሥተው ደመወዛቸውን እንደያዙ ወደ ሌላ መምሪያ እንዲዛወሩ፣ ሃይማኖታዊ ሕጸጻቸውም እንዲመረመር በሙሉ ድምፅ ያለ ልዩነት የተላለፈው ውሳኔ በአማን ታሪካዊ ብቻ ሳይሆን ኦርቶዶክሳዊት ተዋሕዶ ቤተ ክርስቲያናችንን ከውስጥ እና ከውጭ በማጠራቀቅ ለመከፋፈል አልያም ባለችበት አዳክሞ ማንነቷን ወደ ፕሮቴስታንታዊነት ለመለወጥ ለተሸረበው የኑፋቄ ፕሮጀክት ከባድ ምት ነው ለማለት እንደፍራለን!!

ደጀ ሰላማውያን፣ በቀጣይ ቅዱስ ሲኖዶሳችን በሙሉ ድም ለወሰነው ውሳኔ ተፈጻሚነት በንዓት እንደምንሠራ እየገለጽን ደስታችሁ ፍጹም እንዲሆን፣ ለታሪክም መዘክር ይሆን ዘንድ የጥቅምቱ ቅዱስ ሲኖዶስ ምልአተ ጉባኤ ጥቅምት 13 ቀን 2004 ዓ.ም በአባ ሰረቀ ላይ፣ ጥቅምት 20 ቀን 2004 ዓ.ም በስምንት የፕሮቴስታንታዊ-ተሐድሶ-ኑፋቁ አራማጅ ማኅበራት እና በሕገ ወጥ ሰባክያን ላይ ውሳኔ ያስተላለፈበትን ቃለ ጉባኤ እና ሌሎች ተከታይ ደብዳቤዎችን እንድትመለከቱ (ፒ.ዲ.ኤፉን ይክፈቱት) እንጋብዛለን፡፡

ቸር ወሬ ያሰማን፣
አሜን፡፡










9 comments:

Anonymous said...

እባካችሁን ስትጽፉ አንድዳንድ የምይገባ ቃላት አትጠቀሙ፡ ለምሳሌ ከባድ ምት... ፖለቲካዊ ቃል ይመስላል።

Anonymous said...

ለ3ኛ ጊዜ አስተያየት ስሰጥ- አባ ሠረቀ ብርሃን ተነሳ ተብሎ የእልልታ ጊዜ ሳያበቃ በሌላ ሥራ እንደሚመደብ የተናገርኩት ሆኖ አይቸዋለሁ። ምናልባትም ወደተነሳበት ሊመለስም ይችላል። የሆኖ ሆኖ በጊዜው እስክናየው ድረስ ቀደም ሲል አስተያየት ሰጥቼ የነበረውን አንድ ነገር አሁንም ደግሜ ወደማንሳቱ ልሂድ። በተመሳሳይ ሥራ እንደሚመደብ፤ ከዚያም ባሻገር ጉዳይ ወደሕግ ጉዳይ ዞሮ ብዙ ንትርክና ጭቅጭቅ ሊያስነሳ እንደሚችል ወደተናገርኩበት አስተያየቴ ስመለስ አሁን ጊዜውን ጠብቆ እየሆነ ማየቴ ነው። አዎ! ይህ ነገር ገና ብዙ መዘዝ ይስባል። ተከሳሽ እስካለ ከሳሽ ሊኖር የግድ ነው። አባ ሠረቀ በሃይማኖት ጉዳይ ተከሰዋል፤ የከሰሰው ማነው? የክሱ ዝርዝር ምን ይላል? ቅዱስ ሲኖዶስ ነው ከሳሽ ወይስ በደረሰው ክስ መሠረት ነው አጣሪ የመደበው? ከሳሽ ለተመደበበት አጣሪ መልስ መስጠት የሚችለው በየትኛው የክስ ቻርጅ መነሻ ነው? ራሱ መልስ መስጠት ይቻል ወይም መልስ መስጠት የሚችል ጠበቃ ያቁም ስለተከሰሰበት የሃይማኖት ክህደት የክሱ፤ የሰነድ ማስረጃ፤ የድምጽ ወይም የቪዲዮ መረጃ ከተገኘበት ግልባጩ ሊደርሰው የግድ ነው። መቼም እንዲያው በቃል ነው የተከሰስከው፤ የምትመልሰውም በቃል ነው የሚባል የህጻን ጫወታ በበሰሉ የቤተክርስቲያን ሰዎች መካከል አይኖርም። ተከሳሹ ግን ይህን እንደሚፈልግ በጻፈው ማመልከቻ ጠይቋል። ከቤተክህነቱ ለዚህ የህጋዊ አካሄድ ጥያቄ መልስ ለመስጠት የሚችልና በድፍኑ ሰውዬው ይጣራ ከሚል ባሻገር ቅድመ ግንዛቤ ያለው አካል ስለመኖሩ እርግጠኛ አይደሉም። ስለዚህ ሰውዬው የዘመኑን የሕግ አካሄድ የተከተለ ጥያቄ አቅርቦ መልስ ማግኘት ካልቻለ እየተናገረ እንዳለው ወደሕገመንግሥት የህግ መብቶቹ ይሄዳል ማለት ነው። ምናልባትም ተከሳሹ የበሰለ የህግ አማካሪ እንደሚኖረው አይጠረጥርም። ከዚያስ ምን እንይ? አዎ ወደሕገመንግሥታዊ የሕግ ተቋማት ሲሄድ፤
1/ ስውርና ግልጽ የአቡነ ጳውሎስ ትብብር አይለውም።
2/ ከዚህ በፊት ከማኅበረ ቅዱሳን ጋር በነበረው አለመግባባት የተነሳ ወደመንግሥት አካላት ሲያሰማቸው የነበሩ ድምጾች ካሉትና በ15 ቁጥር ሚስማር እያስወጋ ቆይቶ ከሆነ ( ከሰውዬው ባህርይ አንጻር ይህ አይጠረጠርም) እየደረሰበት ያለውን ነገር የበለጠ ለመጠቀም ይሰራበታል።
3/ ከሳሽ ከሌለው ወይም የክሱ ዝርዝር ካልደረሰው የተከሳሽነት ክስ የተነሳ ሰብአዊ መብት ኰሚሽን ወይም ከእንባ ጠባቂ ኰሚሽን «መብታቸው እንዲጠበቅ»የሚል ደብዳቤ ቢችል ራሱ ሄዶ ወይም ጉዳይ ፈጻሚ ሹመኞች አምጥተው እጁ ላይ ያደርጋሉ ብለን እንገምታለን።
4/ከርእሰ መንበር ጳውሎስ ድጋፍ ያለው ሰው ነው። ከመንግሥት ባለሥልጣናት እንዳሉትም አይጠረጠርም። እራሱም ቢሆን ለነገር አይሰንፍም። የገንዘብ ችግር ያለበትም ሰው አይደለም። እግዚአብሔር ካልጣለው እንደአንድ ተራ ምድራዊ ሹመኛ በቀላሉ ይወድቃል ማለት የዋሕነት ይመስለኛል፤ ግምቴ ስህተት ከሆነ ሂደት ያሳየናል።
በጥቅሉ ሰውዬውን ለመክሰስ ከጥላቻ ባሻገር ወግ ያለው የክስ አካሄድ፤ አቀራረብ፤ መልስ አሰጣጥና መልስ ሰጪ፤ የ ስርዓትና ጭብጥ ክርክር አመሰራረት ከሌለ እንዴት ተደርጎ ነው በድፍኑ አባ ሠረቀ ተሃድሶ ወይም የሃይማኖት ህጸጽ አለብህና መልስ ልትሰጥ ይገባል የሚባለው? መልስ እሰጣለሁ፤ ግን ከሳሼን ልወቅ፤ ክሴ ይድረሰኝ እንዳለው በምን ይገደዳል? እንደዚያ ማለቱስ አግባብ የማይሆነው በምን ሎጂክ ነው? እናም ከማድረጋችን በፊት ጥላቻን የተሻገረ እውቀት እንዲኖረን ያስፈልጋል እላለሁ።
የተሻለውን ሁሉ ለቤተክርስቲያናችን የሚያውቅ እግዚአብሔር ሰላሙን ያውርድ! ፈሪሃ እግዚአብሔር ያለውን መሪና ተመሪ ይስጠን!አሜን።

yemelaku bariya said...

የአገሪቱ ክስ ለአንድ ወገን ብቻ ነው እንደ የሚሰራው:: ባለፈው ራሳቸው ተከሰው ብይን ሲጠበቅ በአቋራጭ ክሱ እንዳይታይ ሁኗል:: አሁን እሳቸው ከሳሽ ሲሆኑ ህጉ እንደት እንደሚያስተናግዳቸው ማየት ነው::

Anonymous said...

Now everything is clear, the engineer of tehadisso is Patriach. Stope blaming this and that focuse on the source the problem.
May God save our church from Diabelos!!

Anonymous said...

dear yemelaku barya;
የሀገሪቱ ሕግ ለአባ ሠረቀ ብቻ ይሰራል ያለ የለም። ሃሳብህ መሰረታዊውን ነገር የያዘ ቢሆን ይመረጣል። ሌላኛው ወገን የምትለው ማንን ነው? ግልጽ ብታደገው ጥሩ ነበር።

yemelaku bariya said...

እኔ ያልኩት ለአንድ ወገን ነው እንጅ ሌላ ወገን አላልኩም:: ለማብራራት ያክል አባ ሠረቀ ከአሁን በፊት በተከሰሱበት ክስ ጉዳዩ ን ያዩት ዳኛ የቀረበባቸው ክስ የሚያስከስስ ስለሆነ እንዲከላከሉ ብይን ከተሰጠባቸው በኋላ በአባ ጳውሎስ ጣልቃ ገብነት ክሱ እንዲቋረጥ ተደርጓል:: ይህ ከሆነ በኋላ ደግሞ እሳቸው ወደ ክስ በከሳሽነት ሲሄዱ የፍርድ አካላቱ እንደት እንደሚያዩት የምናየው ይሆናል ነው ያልኩት:: አሁን ሃሳቤን እንድትረዳው ያደረኩ ይመስለኛል::

Anonymous said...

አንቺ ደጀ ሰላሞ፣ አንድ አንድ ጊዜ እርስ በርሱ የሚጋጭ ነገር ትጽፊያለሽ። አባ ሠረቀ፣ የተጠረጠሩበት ጉዳይ በሥራ መቀጠል እንደማያስችላቸው ገለጹ ብለሻል። በሌላ አረፍተ ነገር ደግሞ ቀደም ሲል ወደነበርሁበት ልመለስ ካልሆነ ግን የ እረፍት ጊዜ ይሰጠኝ ሲሉ ጠይቀዋል ብለሻል።እነዚህ ዐረፍተ ነገሮች እርስ በርሳቸው አይጋጩም ትያለሽ ወይ? የዚህ አይነቱ አጻጻፍ የወደፊት ታማኝነትሽን ያሳጣሻል። ደህና ዋይ

Anonymous said...

አባ ሰረቀ በምንም የአገልገሎት መስክ ሳይመደቡ በጉባዔው ታይቶ በሀይማቾታቸው ህፀፅ ከተገኜና ከጥፋታቸው የማይመለሱ ከሆነ ከቤተ ክርስቲያን ማሰናበት ከተመለሱም ቀኖናቸውን እስኪጨርሱ በአንዱ ገዳም በአርምሞ እንዲቀመጡ ቢሆን ለርሳቸውም ሆነ ለምእመናን መልካም ይመስለኛል::እባካችሁ ማህበረ ቅዱሳኖች እኛ ከተገላገልናቸው ከዛ በሁዋላ የራሱ ጉዳይ አይነት ነገር ባይሆን ጥሩ ነው:: ሰውየው ሀይማኖታቸው ከሌላ ወገን ከሆኑ ከኛ ጋር ምን ይሰራሉ?
እስከመጨረሻውመታገል የግድ ይላል::

Anonymous said...

Dear Sereqe, you have the following option:

1) The country's courts and the commisions... are not entitles interfere on inhouse religious controversies. And the apical decision of the church the holy synod has given the instructure on the procedures to folllow. So wait for that. If you are innocent/not guilty (unlikely) you will be compansated.

2) If not you may need to repent and need to go to monastries for time of tranquility and prayer. but you are not accustomed to life in monastries. So you may go to USA but that is also not safe heaven for you.

3) So you may need to join your backstoppers. The protestants. But please submmit the crosses and the clothes. And you can also join Getachew doni and intensify you bussiness.

What do u think ?

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)