October 23, 2011

ሊቃነ ጳጳሳቱ ፓትርያርኩን በበቀለኛነት እና ጣልቃ ገብነት ወቀሱ


  • READ IN PDF.
  • ሁለቱ የሰሜን አሜሪካ አህጉረ ስብከት ሊቃነ ጳጳሳት በፓስፖርት እና በመኖሪያ ፈቃድ እድሳት እጦት እየተንገላቱ ነው፤ ሁለቱም ሊቃነ ጳጳሳት በ30ው ዓመታዊ መደበኛ ስብሰባ ይሁን በቅዱስ ሲኖዶስ ምልአተ ጉባኤ ላይ አይገኙም
  • “ትኩረት ባለመስጠት ይሁን በሌላ ምክንያት አብዛኞቹ በውጭ ሀገር የኢትዮጵያ ኦርቶዶክስ ተዋሕዶ ቤተ ክርስቲያን አህጉረ ስብከት ሊቃነ ጳጳሳት በጉባኤው ላይ አልተገኙም፡፡ በአርኣያነቱም ሆነ በምሳሌነቱ ልዩ በሆነው በዚህ ዓለም አቀፍ 30ኛው ጉባኤ ላይ በመገኘት አንድነትን አለመግለጽ ቅሬታን ከማሳደሩም በላይ ጥያቄን ሊያስከትል ስለሚችል ቅዱስ ሲኖዶስ ለዚህ ጉዳይ ትኩረት ሰጥቶ አስፈላጊውን የማስተካከያ መመሪያና ውሳኔ እንዲያስተላልፍ ጉባኤው በአጽንዖት ጠይቋል፡፡” (የስብሰባው የጋራ አቋም መግለጫ)
  • “ጥሪው ለሥራ ሳይሆን አሳስሮ ለማስቀመጥ ነው፤. . . እልህ አስጨራሽ ሥልጣንዎ በእምነት ካልሆነ በሥጋ አመለካከት የሚወጡት አልነበረም፤ . . .  በቀልን ለተጠማ አባት ራሴን አሳልፌ አልሰጥም” (ብፁዕ አቡነ አብርሃም)
  • የሰሜን አሜሪካው የውጭ ጉዳይ ተጠሪ ጽ/ቤት ሲኖዶሱ ያልወሰነበት ነው በሚል የሊቃነ ጳጳሳቱን ተቀባይነት አላገኘም
(ደጀ ሰላም፤ ጥቅምት 11/2004 ዓ.ም፤ ኦክቶበር 22/2011)፦ የኢትዮጵያ ኦርቶዶክስ ተዋሕዶ ቤተ ክርስቲያን በሰሜን አሜሪካ ካሏት ሦስት አህጉረ ስብከት የዋሽንግተን ዲሲ እና አካባቢው ሀገረ ስብከት ሊቀ ጳጳስ ብፁዕ አቡነ አብርሃም እና የሰሜን ምዕራብ አሜሪካ ካሊፎርኒያ ሀገረ ስብከት ሊቀ ጳጳስ ብፁዕ አቡነ ኤዎስጣቴዎስ፣ ፓትርያርኩ ብፁዕ ወቅዱስ አቡነ ጳውሎስ ቅዱስ ሲኖዶስ ሳያውቀው እና ሳይመክርበት በሊቃነ ጳጳሳቱ ላይ የበላይ የሆነ “የውጭ ጉዳይ ተጠሪ ጽ/ቤት” በዋሽንግተን ዲሲ እንዲቋቋም ያስተላለፉትን ትእዛዝ፣ እንዲሁም ብፁዕ አቡነ ፋኑኤል ያለቅዱስ ሲኖዶስ ፈቃድ እና ከሁለቱ አህጉረ ስብከት ዕውቅና ውጭ ወደ ሰሜን አሜሪካ እየተመላለሱ በሚፈጥሩት ችግር ላይ ርምጃ ባለመውሰዳቸው በጣልቃ ገብነት ወቀሷቸው፡፡

አቡነ ፋኑኤል
ሊቃነ ጳጳሳቱ በአድራሻ ለቅዱስ ሲኖዶስ ጽ/ቤት እና ለፓትርያርክ አቡነ ጳውሎስ ከጻፏቸው ደብዳቤዎች ለመረዳት እንደተቻለው፣ መቀመጫውን ዋሽንግተን ዲሲ ላይ በማድረግ “በሦስቱ አህጉረ ስብከት እና በመንበረ ፓትርያርኩ መካከል አገናኝ ድልድይ እንዲሆን” በሚል ሐምሌ13 ቀን 2003 ዓ.ም በቁጥር ል/ጽ/572/03 ሊቀ ሥዩማን ኀይለ ጊዮርጊስ ጥላሁን ሞገስ ለተባሉ ሰው በተጻፈው የፓትርያርኩ ደብዳቤ እንዲቋቋም የታዘዘው የውጭ ጉዳይ ተጠሪ ጽ/ቤት ተግባራት በአህጉረ ስብከቱ ጽ/ቤቶች ሊፈጸሙ የሚገባቸው በመሆናቸው የጽ/ቤቱ መቋቋም የሐላፊነትንና የሥራ መደራረብን የሚያስከትል፣ ካህናትንና ምእመናንን ግራ የሚያጋባ፣ በሕገ ቤተ ክርስቲያን እና በቅዱስ ሲኖዶስ ለሊቃነ ጳጳሳቱ የተሰጣቸውን ተግባር እና ሓላፊነት የሚጋፋ ሆኖ እንዳገኙት ተገልጧል፡፡

በመንበረ ፓትርያርኩ ጽ/ቤት እና በአንድ ሀገረ ስብከት መካከል የሚገባ ሌላ መዋቅር እንደሌለ በቃለ ዐዋዲው የተጠቀሰውን መሠረት በማድረግ “የቅዱስ ሲኖዶስ አባላት የሆኑ ሊቃነ ጳጳሳትን ከጠቅላይ ቤተ ክህነት ጋራ የሚያገናኝ የቅዱስ ሲኖዶስ አባል ያልሆነ ሰው የሚመራው አካል የማቋቋሙ አስፈላጊነት “ግልጽነት የጎደለው ነው፤ እንዲያውም ለአህጉረ ስብከቱ ህልውና የሚያሰጋ በመሆኑ ቅዱስ ሲኖዶስ የማያዳግም እርምት እንዲሰጥበት” ጠይቀዋል፡፡

በቃለ ዐዋዲው መሠረት አንድ ሊቀ ጳጳስ በተሾመበት ሀገረ ስብከት ላሉ ካህናት እና ምእመናንን ሙሉ ሓላፊነት ያለበት መንፈሳዊ አባት እንደሆነ የተደነገገውን በመጣስ ተቋቋመ የተባለው ጽ/ቤት አብዛኛውን ውይይት የሚያደርገው ራሳቸውን ‹ገለልተኛ› ብለው ከሚጠሩ አብያተ ክርስቲያን እና መደበኛ ውክልና ከሌላቸው ካህናት ጋራ ነው፤ ይህንንም ጽ/ቤቱ እስከ አሁን ከሚያደርጋቸው መረዳታቸውን ያረጋገጡት ብፁዓን ሊቃነ ጳጳሳቱ፣ ሁኔታው በሰሜን አሜሪካ “ራሱን የቻለ መዋቅር እየመሰለ የመጣውን ገለልተኝነት”ን በማስፋፋት እና በማጠናከር አህጉረ ስብከቱ ለአብያተ ክርስቲያን(ካህናት እና ምእመናን) አንድነት በሚያደርጉት ጥረት ላይ ዕንቅፋት እንደሚፈጥር በመጥቀስ የፓትርያርኩን ትእዛዝ ተቃውመውታል፡፡

ቀደም ሲል የሲዳሞ ሀገረ ስብከት የነበሩትና በኋላም የሕንጻዎችና ቤቶች አስተዳደር እና ልማት ድርጅት ሊቀ ጳጳስ የሆኑት አቡነ ፋኑኤል በልዩ ልዩ ምክንያቶች ወደ ሰሜን አሜሪካ በመመላለስ ያለዋሽንግተን ዲሲ እና አካባቢው ሀ/ስብከት ዕውቅና፡-
  • በአትላንታ ቅዱስ ሚካኤል ቤተ ክርስቲያን(ገለልተኛ ቤተ ክርስቲያን) ተገኝተው የቅስና እና የዲቁና ማዕርግ ሰጥተዋል፡፡
  • በኖርዝ ካሮላይና ሻርለት መንበረ ጸባዖት ቅድስት ሥላሴ ቤተ ክርስቲያን(ገለልተኛ ቤተ ክርስቲያን) ተገኝተው ቤተ ክርስቲያኑን ባርከው ከፍተዋል፡፡
  • በቨርጂኒያ አሌክሳንደርያ ሐመረ ኖኅ ኪዳነ ምሕረት(ገለልተኛ ቤተ ክርስቲያን) ተገኝተዋል፤ ክህነትም ሰጥተዋል፡፡
  • እሑድ፣ ኦክቶበር 8፣ 2011 በናሽቪል ቴኔሲ ተገኝተው የመድኃኔዓለም ቤተ ክርስቲያን እንደሚባርኩ ፕሮግራም እንደተያዘላቸው ተረጋገጧል፡፡
ሊቀ ጳጳሱ እየፈጸሟቸው በሚገኙት ከቀኖና ውጭ የሆኑ ተግባራት የቤተ ክርስቲያንን አንድነት የበለጠ የሚያናጋና ቤተ ክርስቲያን ወደልተፈለገ አቅጣጫ እንድታመራ የሚያደርግ ችግር እየፈጠሩ መሆኑን ከመስከረም 26 - 27 ቀን የተካሄደው የሀገረ ስብከት ሰበካ መንፈሳዊ ስብሰባው ማረጋረጡን አቡነ አብርሃም ለቅዱስ ሲኖዶስ ጽ/ቤት የላኩት የመንፈሳዊ ጉባኤው ቃለ ጉባኤ ያብራራል፡፡

አቡነ ፋኑኤል እነኝህን ኢ-ቀኖናዊ ተግባራት ለመፈጸም ደብዳቤ ስለመመደባቸው[ከአቡነ ጳውሎስ] እንደማያውቁ የገለጹት አቡነ አብርሃም፣ ፓትርያርክ አቡነ ጳውሎስ አቡነ ፋኑኤልንና ተባባሪ አስተባባሪዎችን ወደ ሰሜን አሜሪካ በመላክ እርሳቸው በማያውቁትና ባልተጠየቁበት የአድማ ክስ እና ወንጀል እንደተፈጸመባቸው፣ ይህን ሀገረ ስብከቱን የሚያዳክምና ሩጫቸውን የሚገታ ተጽዕኖ በቅዱስነታቸው ትእዛዝ እና ድጋፍ በቀጣይነት እየተፈጸመ እስከ ዛሬም ድረስ እያዘዙበትና እየደገፉት መቀጠሉን አመልክተዋል፡፡

ብፁዕ አቡነ አብርሃም የፓትርያርኩን የበቀል ፍላጎት የሚገልጹት አሁን ከሚመሩት ሀ/ስብከት ጋራ በተያያዘ ብቻ ሳይሆን “ብዙ ኖሬበት ብዙ ሠርቼበታለሁ፤ በምእመናኑም ዘንድ መልካም ስም አግኝቼበታለሁ” ከሚሉት ደብረ ኀይል ቅዱስ ራጉኤል ቤተ ክርስቲያን በደብሩ አስተዳዳሪ እና ቄሰ ገበዝ ተጎትተውና ተዋርደው እንዲወጡ መደረጋቸውን በማውሳትም ነው፡፡ በወቅቱ የደረሰባቸውን በደል ለፓትርያርኩ አቤቱታ ባቀረቡ ጊዜ አቡነ ጳውሎስ የተናገሯቸውን ቃል ለራሳቸው ኅሊና ከማስታወስ በቀር በጽሑፍ እንዲገልጹት ኅሊናቸው እንደማይፈቅድ ተናግረዋል፡፡ “የፓትርያርኩ ሕጋዊ ወኪል” በሚል ራሱን ይጠራ የነበረው መናፍቁ ጌታቸው ዶኒ ብፁዕነታቸው ባልፈጸሙትና ባልተረጋገጠ ነገር በጋዜጣ ስላጻፉባቸው ትችቶችና ወቀሳዎች አቡነ ጳውሎስ ዘንድ ለአቤቱታ ሲቀርቡ በፌዝና በስላቅ ለመስተናገድ ጠብቀው እንዳልነበረ አቡነ አብርሃም በቁጭት ገልጸዋል፡፡

በ2002 ዓ.ም በተደረገው የቅዱስ ሲኖዶስ ስብሰባ በውጭ ከሚገኙ ጳጳሳት የተወሰኑት “በነፍስ ድረሱ” ዐይነት ጥሪ ሲደረግላቸው እርሳቸው ጥሪው እንዳልደረሳቸው፣ በስብሰባው ላይም እንዳይገኙ ተዘዋዋሪ ማስጠንቀቂያ ደርሷቸው እንደነበር አቡነ አብርሃም አስታውሰዋል፡፡ የመጣውን ሁሉ በጸጋ ለመቀበል ወስነው ወደ ኢትዮጵያ ከመጡም በኋላ በየትኛውም ቤተ ክርስቲያን እንዳያስቀድሱና እንዳያስተምሩ ስውር የስልክ ትእዛዝ ለአድባራት አስተዳዳሪዎች በመስጠት፣ የመጡበት የሲኖዶስ ስብሰባ ከተጠናቀቀም በኋላ “ወደ ሀገረ ስብከትህ መመለስ አትችልም፤ ተከሰሃል፤ ስምህ ይጠፋል፤ እኔ የምመክርህን ማድረግ ብቻ ነው” በሚል በፓትርያርኩ በመታገዳቸው ጉዟቸው ተስተጓጉሎ ለአላስፈላጊ ወጪና ለአካላዊ ሕመም መዳረጋቸውን፣ የነበራቸው የዲፕሎማት ፓስፖርት ጊዜው ስላለፈ ተለዋጩን የዲፕሎማት ፓስፖርት እና በሚኖሩበት አገር መውጣት መግባት የሚያስችል መኖሪያ ፈቃድ እንዲሰጣቸው ያቀረቡላቸውን ደብዳቤ ከፊታቸው ላይ ቀዳደው መጣላቸውንና ዛሬም ለአራተኛ ጊዜ አመልክተው ተቀባይነት አለማግኘታቸውን ዘርዝረዋል፡፡

በወቅቱ ከፓትርያርኩ ጋራ ውዝግብና ክርክር ከመፍጠር “ወደ አንድ ገዳም ሄጄ ለመቀመጥ እስከ መምረጥ ደርሼ ነበር” ያሉት ብፁዕነታቸው፡- የዲፕሎማቲክ ፓስፖርታቸው ካልታደሰላቸውና አገር መውጣት መግባት የሚያስችላቸው ከጥቅምት ሰባት ቀን ጀምሮ እየተካሄደ በሚገኘው ሀገር አቀፍ የሰበካ መንፈሳዊ ጉባኤና ከጥቅምት 12 ቀን 2004 ዓ.ም ጀምሮ በሚካሄደው የቅዱስ ሲኖዶስ ስብሰባ ላይ እንዲገኙ የተላለፈላቸውን ጥሪ “በቀልን ለተጠማ አባት ራስን አሳልፎ መስጠት” በመሆኑ በስብሰባዎቹ እንደማይገኙ አስታውቀዋል፤ በሕገ ቤተ ክርስቲያን የተፈቀደላቸውን መብት ሲኖዶሱ እንዲያስከብርላቸው፣ ፓትርያርክ አቡነ ጳውሎስም “ሕገ ቤተ ክርስቲያንን ጠብቀው እንዲያስጠብቁ፣ ይቅር ባይነትን ተምረው እንዲያስተምሩ፣ ቁረጥ ጣል፣ ሰርዝ ደልዝ፣ ለውጥ በርዝ የሚለውን ባዕድ ቃል ትተው እንዲያስተው፤ አበው ቅዱሳን በተጓዙበት መንገድ ተጉዘው እንዲመሩ፣ ሥርዐተ ቤተ ክርስቲያን የማያገናኘን ግለሰቦች አስመስለውና ቀምመው እንዲያቀርቡ የተደረገውን የአድማ መንገድ ዘግተው፣ ሀገረ ስብከቱን ወደ ቀደመ ክብሩ እንዲመልሱላቸው” ጠይቀዋል፡፡

በተመሳሳይ ሁኔታ በሰሜን ምዕራብ አሜሪካ ካሊፎርኒያ ሀገረ ስብከታቸውን በማጠናከር ላይ መሆናቸውን የገለጹት ብፁዕ አቡነ ኤዎስጣቴዎስም የተሰጣቸውን ሓላፊነት በተሻለ መልኩ ለመወጣት የድኅረ ምረቃ ትምህርታቸውን[ከቅድስት ሥላሴ መንፈሳዊ ኮሌጅ በቴዎሎጂ የመጀመሪያ ዲግሪ አላቸው] እየተከታተሉ በመሆናቸው የመኖሪያ ፈቃድ እና ፓስፖርት እድሳት ለማስጨረስ የድጋፍ ደብዳቤ እንዲጻፍላቸው ለሀገረ ስብከቱ ሥራ አስኪያጅ ያቀረቡት ጥያቄ ውድቅ በመደረጉ የቤተ ክርስቲያንን ክብር በሚነካ እና አገልግሎቱን በሚጎዳ ሁኔታ እየተንገላቱ መሆናቸውን በደብዳቤያቸው አስታውቀዋል፡፡

በአንጻሩ ከጥቅምት ሰባት ቀን ጀምሮ ሲካሄድ የቆየው የመንበረ ፓትርያርክ አጠቃላይ ሰበካ መንፈሳዊ ጉባኤ 30 መደበኛ ዓመታዊ ስብሰባ ዛሬ ተሲዓት ላይ ሲጠናቀቅ በወጣው ባለ33 ነጥብ የውሳኔ ሐሳብና የጋራ አቋም መግለጫ ላይ እንደተመለከተው በውጭ ከሚገኙ አህጉረ ስብከት ሊቃነ ጳጳሳት አብዛኞቹ አለመገኘታቸው ተመልክቷል፡፡ በዐይነቱ ልዩ በሆነው በዚህ ዓለም አቀፍ ጉባኤ ላይ ተገኝቶ አንድንትን አለመግለጽ “ቅሬታን የሚያሳድር እና ጥያቄን የሚያስከትል ነው” ያለ ሲሆን ቅዱስ ሲኖዶስ ለጉዳዩ ትኩረት ሰጥቶ አስፈላጊውን የማስተካካያ መመሪያ እና ውሳኔ እንዲያስተላልፍ አሳስቧል፡፡

Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)