April 11, 2011

ቋሚ ሲኖዶስ የቤተ ክርስቲያንን አንድነት የሚያስጠብቅ እና ሕዝቡን የሚያረጋጋ የመጨረሻ ውሳኔ እንዲሰጥ የሐዋሳ ምእመናን ተወካዮች ጠየቁ

  •   ቋሚ ሲኖዶስ ረቡዕ በዚህ ጉዳይ እንደሚነጋገር ይጠበቃል፤
(ደጀ ሰላም፤ ኤፕሪል 11/2011)፦ በጥቂቶች ማስፈራሪያ ተልእኮውን ሳያጠናቅቅ የተመለሰው አጣሪ ኮሚቴ ሪፖርት ለቋሚ ሲኖዶስ ቀርቦ መፍትሔ እንዲፈለግ አለመደረጉ የሐዋሳን ምእመን እና ውጤቱን በገለልተኛነት የሚጠባበቀውን የክልሉን መንግሥት በእጅጉ እንዳሳዘነ የሐዋሳ ምእመናን ተወካዮች ገለጹ፡፡ “ጉዳዩን እንዲያጣራ የተላከው የጳጳሳት ኮሚቴ ለአምስት ቀናት ብቻ ቆይታ በማድረግ የማጣራት ሥራውን ሠርቶ በተከታዩ ሦስት ቀናት ውስጥ ምላሽ ታገኛላችሁ ቢልም ሀገረ ስብከቱ ያለ መሪ ባዶውን እንደሚገኝ” ተወካዮቹ ለብፁዕ ወቅዱስ ፓትርያርኩ በንባብ ባሰሙት ባለአራት ገጽ የጽሑፍ ማሳሰቢያ ላይ አመልክተዋል፡፡ አድራሻቸው እና ማንነታቸው በግልጽ ከሚታወቁ ከስድስት ሺሕ በላይ የከተማው አጥቢያ አብያተ ክርስቲያን ምእመናን የተላኩት ተወካዮቹ፣ የካቲት 2 ቀን 2003 ዓ.ም በቋሚ ሲኖዶሱ የተላለፉት ውሳኔዎች በአብዛኛው ተፈጻሚነት ባለማግኘታቸው በከፍተኛ ደረጃ ተባብሶ እየቀጠለ ለሚገኘው ሁከት እና ብጥብጥ መፍትሔ እንዲፈለግለት ጠይቀዋል፡፡

በቁጥር ከ26 ያላነሱ የሐዋሳ ምእመናን ተወካዮች መጋቢት 28 ቀን 2003 ዓ.ም በፓትርያርኩ ጽ/ቤት በመገኘት ለብፁዕ ወቅዱስ አቡነ ጳውሎስ ባቀረቡት ጥያቄ በሐዋሳ ደብረ ምሕረት ቅዱስ ገብርኤል ገዳም እና በሀገረ ስብከቱ ጽ/ቤት በተፈጠረው የአስተዳደር ክፍተት እና ብልሹ አሠራር መነሻነት በተከሠተው ከፍተኛ ቀውስ፣ በጥቅመኛ ግለሰቦች ድጋፍ እየተባባሰ በመጣው ሁከት ሳቢያ ምእመኑ ሥርዐተ አምልኮውን የመፈጸም መብቱን ተነፍጓል፤ የአካባቢው ኅብረተሰብ ሰላማዊ ኑሮ ተናግቷል፤ የመንግሥት የጸጥታ ሥራ በንጹሐን ምእመናን ላይ በገሃድ ከፍተኛ ጉዳት እያደረሱ የሚገኙትን ነውጠኞች ዕለታዊ ተግባር በመከታተል ታውኳል፡፡ በአሁኑ ወቅት የከተማው ነዋሪ እና ተላላፊ እንግዳ በግልጽ በሚታዘበው አኳኋን ምእመኑ (በተለይም የነውጠኞቹን እኩይ ተግባር የሚቃወሙ ምእመናን ሕይወት እና ደኅንነት) ከአደጋ ተጠብቆ የሚገኘው ከቤተ ክርስቲያን መሪዎች በሚደረግለት ጥበቃ ሳይሆን በእግዚአብሔር ቸርነት እና በክልሉ መንግሥት የጸጥታ ኀይል እገዛ መሆኑን ምእመናኑ አመልክተዋል፡፡ በተፈጠረው ትርምስ ለዘመናት ተጠብቆ የቆየው የእምነታችን ክብር እና ህልውና በእጅጉ አደጋ ላይ መውደቁን ያስረዱት የምእመናኑ ተወካዮች፣ የሌሎች ተሣልቆ (“ለኦርቶዶክሶች እንጸልያላቸው” በሚሉት ፕሮቴስታንቶች ጭምር) እያሳፈራቸው እና አንገታቸውን እያስደፋቸው መሆኑን ገልጸዋል፡፡

ተወካዮቹ አበክረው እንደተናገሩት፣ ምእመኑ በአንድነቱ እና በእምነቱ ጸንቶ እንዲኖር ማድረግ የቤተ ክርስቲያን መሪዎች ታሪካዊ እና መንፈሳዊ ሓላፊነት ነው፡፡ ይህን በመገንዘብ ቋሚ ሲኖዶሱ እና ቅዱስ ፓትርያርኩ በሀገረ ስብከቱ ጽ/ቤትም ሆነ በሐዋሳ የደብረ ምሕረት ቅዱስ ገብርኤል ገዳም፣ የቅድስት ሥላሴ እና የሞኖፖል ጻድቁ አቡነ ተክለ ሃይማኖት አጥቢያ አብያተ ክርስቲያን ውስጥ እንዲሁም በቅዱስ ሲኖዶስ ጽ/ቤት ደረጃ ተሰግስገው የተሳሳተ እና አፍራሽ መረጃ እየሰጡ የሰፊው ምእመን ጥያቄ እንዲታፈን፣ ጥያቄውንም የማኅበረ ቅዱሳን በማስመሰል ብጥብጡ እንዲቀጥል በማድረግ ጥቅማቸውን ለማስጠበቅ ለሚሹት ለእነ ያሬድ አደመ እና መሰሎቹ፣ በፓትርያርኩ ጽ/ቤት ደረጃም በማያገባቸው ጉዳይ ጣልቃ በመግባት የሚታወቁት እንደ ታዋቂዋ ወይዘሮ ላሉት ግለሰቦች ጆሮ ሳይሰጥ በድጋሚ በቀረበው መንፈሳዊ የፍትሕ ጥያቄ መሠረት ሕዝቡን የሚያረጋጉ፣ የቤተ ክርስቲያንን አንድነት የሚጠብቁ ዘለቄታዊ እና ተግባራዊ ርምጃዎች እንዲወስዱ በተወካዮቹ ተጠይቀዋል፡፡

“ከዚህ በኋላ በአስቸኳይ መወሰድ የሚገባው የመፍትሔ ርምጃ ለአንድም ቀን ቢሆን መዘግየቱ ችግሩን በፍጥነት እያባባሰ ከቁጥጥር ውጭ የሆነ ሁከት እና ትርምስ ሊያስከትል እንደሚችል ግንዛቤ ሊወሰድበት ይገባል” እንደ ምእመናኑ ተወካዮች ማሳሰቢያ፡፡ ተወካዮቹ በጥያቄያቸው፣ ቋሚ ሲኖዶሱ የካቲት 2 ቀን 2003 ዓ.ም ውይይት ያደረገባቸው ነጥቦች እና ያሳለፋቸው ውሳኔዎች “ውስን እና እጅግም መሠረታዊ ያልነበሩ” መሆናቸውን ተችተዋል፡፡ ይሁንና ውሳኔውን አክብረን በመቀበል የመጨረሻውን ውጤት ስንጠባበቅ የቆየን ቢሆንም ከውሳኔው መካከል የቀድሞው የሀገረ ስብከቱ ጽ/ቤት ሓላፊ ከመነሣታቸው እና በምትካቸው የተሠየሙት አዲስ ሓላፊ እስከ አሁን መጥተው ጽ/ቤቱን ካለመረከባቸው፣ ሊቃነ ጳጳሳት እና የጠቅላይ ቤተ ክህነት አስተዳደር አካላት የሚገኙበት አጣሪ ኮሚቴ በቅርቡ ችግሩን አይቶ ከመመለሱ ውጭ ዘላቂ መረጋጋት የሚያመጣ ተግባራዊ ርምጃ ካለመወሰዱ ጋራ በተያያዘ ቀውሱ እና አለመረጋጋቱ በተባባሰ ሁኔታ መቀጠሉ ተገልጧል፡፡
ይኸው ያልተገባ አካሄድ በአፋጣኝ እንዲያበቃ ሆኖ፡-
1) በቋሚ ሲኖዶሱ ውሳኔ አገላለጽ “ተፎካካሪ ናቸው” ከተባሉት ማኅበራት ውስጥ በደብረ ምሕረት ቅዱስ ገብርኤል ገዳም አስተዳዳሪ ያልተገባ ከለላ እየተሰጠው የሰንበት ት/ቤቱን አዳራሽ ሙሉ በሙሉ በመቆጣጠር ለብጥብጥ እየተጠቀመበት የሚገኘው፣ በመመሥረቻ ደንቡም መሠረት ዋና ተግባሩ የልማት እና ፀረ-ኤድስ ሥራ እንጂ መንፈሳዊ አገልግሎት ያልሆነው “የተስፋ ኪዳነ ምሕረት ፀረ-ኤድስ ማኅበር” አፍራሽ እንቅስቃሴ በአስቸኳይ እንዲቋረጥ፣ በቃለ ዐዋዲው መሠረት ሕጋዊነት ያለው ሰንበት ት/ቤት ወደ ፊት በሚደራጀው ሰበካ ጉባኤ አማካይነት እስኪቋቋም ድረስ አዳራሹ ተዘግቶ እንዲቆይ እንዲደረግልን፤
2) የገዳሙን ህልውና በከፍተኛ አደጋ ውስጥ እየጣለ፣ ምእመኑን በተሳሳተ መረጃ እየከፋፈለ ወደ ከፍተኛ እልቂት እየመራ ለሚገኘው “ለተስፋ ኪዳነ ምሕረት የልማት እና ፀረ-ኤድስ ማኅበር” ሽፋን በመስጠት ኢ-መንፈሳዊ እንቅስቃሴ እያደረጉ የሚገኙት የደብረ ምሕረት ቅዱስ ገብርኤል ገዳም አስተዳዳሪ በአስቸኳይ ከሓላፊነታቸው እንዲነሡ፤
3) ሀገረ ስብከቱን እንዲመሩ በቅዱስ ሲኖዶስ የተሠየሙት ሊቀ ጳጳስ አቡነ ገብርኤል እና በቋሚ ሲኖዶሱ አማካይነት በድጋሚ የተመረጡት ሥራ አስኪያጁ ወደ ምድብ ሥራቸው በመምጣት ምእመኑን የማረጋጋት፣ መንፈሳዊ አገልግሎቱ በቃለ ዐዋዲው መሠረት እንዲቀጥል፤
4) ከቃለ ዐዋዲው በተቃራኒ በጊዜያዊነት እንዲያገለግል በሚል ሽፋን ያለምእመኑ ፈቃድ እና ዕውቅና በሊቀ ጳጳስ አቡነ ፋኑኤል የግል ፍላጎት ብቻ የተሠየመው እና በአሁኑ ሰዓትም ከገዳሙ አስተዳዳሪ ጋራ በመሆን የቋሚ ሲኖዶሱን ውሳኔ ባለማክበር ሥልጣኑን አልለቅም ብሎ የሕዝቡን ገንዘብ ከሕዝቡ ዕውቅና ውጭ እያንቀሳቀሰ የሚገኘው ሰበካ ጉባኤ በአስቸኳይ እንዲነሣ፣ በምትኩም አዲስ እና ሕጋዊ የሰበካ ጉባኤ በቃለ ዐዋዲው መሠረት እንዲመረጥ፤
5) ከሕዝብ የሚሰበሰበውን የቤተ ክርስቲያን ገንዘብ ለግል ፍላጎታቸው መጠቀሚያ ለማድረግ በማሰብ ተባብሶ ለቀጠለው ከፍተኛ ነውጥ ምክንያት የሆኑት የሦስቱ አብያተ ክርስቲያን(የደብረ ምሕረት ቅዱስ ገብርኤል ገዳም፣ የቅድስት ሥላሴ እና የሞኖፖል ጻድቁ አቡነ ተክለ ሃይማኖት) አለቆች ችግሩ በምእመኑ ሕይወት እና ደኅንነት ላይ ያልተፈለገ አደጋ አደጋ ከማስከተሉ በፊት ያለአንዳች ቅድመ ሁኔታ ከሓፊነታቸው እንዲነሡ፣ በምትካቸው ሃይማኖትን የሚጠብቁ፣ በመንፈሳዊ ብቃታቸው የተፈተኑ፣ በሥነ ምግባራቸው የታነጹ እና በምእመኑ አንድነት የሚያምኑ መንፈሳዊ አባቶች እንዲተኩ የምእመናኑ ተወካዮች በአጽንዖት ጠይቀዋል፡፡

መጋቢት 28 ቀን 2003 ዓ.ም ማለዳ ከሐዋሳ ተነሥተው ጠዋት 3፡30 ላይ በመንበረ ፓትርያርክ ጠቅላይ ጽ/ቤት የተገኙት የምእመናኑ ተወካዮች አቡነ ጳውሎስን ለማግኘት እስከ ቀኑ 10፡20 ድረስ መጠበቅ ነበረባቸው፡፡ ፓትርያርኩ “እነርሱን የማናግርበት ፕሮግራም አልያዝሁም” በሚል የያዙትን አቋም በጠቅላይ ቤተ ክህነቱ ዋና ሥራ አስኪያጅ ብፁዕ አቡነ ፊልጶስ አግባቢነት እስኪለውጡ ድረስ ተወካዮቹ በቅድሚያ ከቅዱስ ሲኖዶስ ዋና ጸሐፊ ብፁዕ አቡነ ሕዝቅኤል ከዚያም ከብፁዕ ዋና ሥራ አስኪያጁ ጋራ ተወያይተዋል፡፡

  “ዮዋ
ብፁዕ አቡነ ሕዝቅኤል የአጣሪ ኮሚቴው አባል በመሆን ጉዳዩን አጥንተው ቢመለሱም በአጣሪ ኮሚቴው አባላት መካከል የሐሳብ መለያየት መኖሩንና የነገሩ ቁልፍ ያለው በፓትርያርኩ እጅ መሆኑን ለተወካዮች ከመግለጽ አልተቆጠቡም፡፡ ቀትር ላይ ከብፁዕ አቡነ ፊልጶስ ጋራ በመሆን ተወካዮቹን በአስተዳደር ጉባኤ አዳራሽ ካናገሩት አንዱ የሆኑት የጠቅላይ ቤተ ክህነቱ የመንፈሳውያን ጉዳዮች ዘርፍ ምክትል ዋና ሥራ አስኪያጅ እና የአጣሪ ኮሚቴው አባል ንቡረ እድ ኤልያስ ኣብርሃ፣ “ሁለት ገመድ ነው አዋሳ ላይ ያለው፤ የተቸገርነው ሁለታችሁንም ከኋላችሁ በሚጎትቷችሁ በእነዚህ ገመዶች ነው” ብለው በመናገራቸው ተወካዮቹን አስቆጥተዋል፡፡ የንግግራቸውን አሊጎሪ በፍጥነት በተረዳች አንዲት ምእመንትም “ገመዱ ያለው እዚሁ ነው፤ የማይገናኝ ነገር አያገናኙ፤ አቋምዎን ያስተካክሉ፤ እኛ ማኅበረ ቅዱሳን አይደለንም፤ ማኅበረ ቅዱሳንን ከተስፋ ኪዳነ ምሕረት ጋራ ማነጻጸር ተገቢ አይደለም፤ ጉዳያችንን ከማኅበረ ቅዱሳን ጋራ በማቀላቀል አያዳፍኑ” በሚል ተገሥጸዋል፡፡ ምእመናኑ በገጠማቸው ማዘናቸውን የገለጹት ብፁዕ አቡነ ፊልጶስ ግን ከጥር 20 - 22 ቀን 2003 ዓ.ም በሐዋሳ መስቀል አደባባይ ሕገ ወጥ ‹ሰባክያኑ› እንዳያስተምሩ በመጻፋቸው መወቀሳቸውን አስታውሰው ጉዳዩ ከአቅማቸው በላይ መሆኑን ለተወካዮቹ አስረድተዋል፤ ብፁዕ ወቅዱስ ፓትርያርኩን በማናገርም ከቀትር በኋላ ቀጠሮ እንዲያዝላቸው አድርገዋል፡፡

ከቀኑ 10፡20 ላይ ከአቡነ ጳውሎስ ጋራ በጽ/ቤታቸው በመገናኘት ከሁለት ሰዓታት በላይ የተነጋገሩት የምእመናን ተወካዮቹ፣ “በድጋሚ እና ለመጨረሻ ጊዜ” በሚል በንባብ ያቀረቧቸውን ጥያቄዎች ተከትሎ ቁጣ እና ተማጽኖ የተፈራረቀባቸው የሐሳብ ልውውጦች ተካሂደዋል፡፡ በምእመናኑ ተወካዮች በኩል በተለይም ካለፈው ሳምንት እሑድ ጀምሮ በውሳኔዎች አለመተግበር ሳቢያ ውጥረቱ እየተባባሰ በመሆኑ “በፓትርያርኩ ነው የተሾምኩት” በሚል በደል ማድረሳቸውን የቀጠሉትን የገዳሙን አስተዳዳሪ ከሌሎቹ ሁለት አጥቢያዎች አለቆች እና ችግር ፈጣሪዎች ጋራ “ጠራርገን እናስወጣለን” ብሎ የተነሣሣውን ምእመን በማረጋጋት ለመጨረሻ ጊዜ ችግሩን ለማስታመም መምጣታቸው፣ ያለመፍትሔ ሊሄዱ እንደማይችሉ አጽንዖት የተሰጠበት ጉዳይ ነበር፡፡

ሱባኤው ሳይገባ መፍትሔ እንዲፈለግ ተናግረው እንደነበር፣ 10 አባላት ያሉትን አጣሪ ኮሚቴ ከብር 30,000 በጀት ጋራ መስደዳቸውን፣ ይሁንና ሪፖርቱ ተጠናቅቆ ስላልቀረበላቸው ባላለቀ ሥራ ለብቻቸው የሚሰጡት መፍትሔ እንደማይኖር የተናገሩት ቅዱስ ፓትርያርኩ በበኩላቸው፣ “ሰላም እንዳጣችሁ ዐውቃለሁ፤ ጊዜያችሁን በማባከናችሁ አዝኛለሁ፤ ሕዝቡ እንደተሠቃየ ከመንግሥትም ደርሶኛል፤ አትፈቱትም እንዴ ተብዬአለሁ፤ መልካም እና ክፉ ጠባይ ያላቸው ልጆች ቢኖሩም ሁሉም ልጆቼ ናቸው፤ እናንተ አንዱን ክፍል ደገፋችሁ፣ እነዚያም አንድ ክፍል ደግፈው መጡ፤ ሁለታችሁንም ነው የምንፈልገው፤ አንዱ እያለቀሰ ለሌላው አልፈርድም፤ ሌሎች ልጆቼን ነጥዬ መልስ አልሰጥም፤ አስታራቂዎችን ስንልክ እርስ በርሳችሁ በኀይል ትፎካከራላችሁ፤ ሰላም ከተፈለገ እና ፈቃደኞች ብትሆኑ ሽማግሌ አያስፈልግም ነበር፤. . . ዛሬውኑ መፍትሔ መስጠት ይቻላልን? ሁለታችሁም ተስማምታችሁ የምትኖሩበት መፍትሔ ይሻላል ወይስ ሌላ?” የሚሉ ዐረፍተ ነገሮችን በብዙ መልክ እና ቃና ሲደጋግሙ ተደምጠዋል፡፡

መልሰው ደግሞ “ነገሩ እንዲቀጥል የምታደርጉት እናንተ ናችሁ፤ ዕርቅ ማለት የሚተወውን መተው ማለት ነው፤ እገሌ ይውጣ፣ እገሌ ይሻር አትበሉ” ብለዋል፡፡ ተወካዮቹም ብዙኀኑን ምእመን በመወከል ለስድስት ወራት እየተመላለሱ ምላሽ እንዲሰጧቸው ያቀረቡላቸውን ተማፅኖ ሳያስተናግዱ ምንም ዐይነት ውክልና ለሌላቸው ወሮበሎች መሠረተ ቢስ ክስ ቋሚ ሲኖዶሱን ስብሰባ በመጥራት በሁለት ቀን ውስጥ ውሳኔ ማስተላለፋቸው አባታችሁ ነኝ፤ ገለልተኛ ነኝ የሚለውን ቃላቸውን አጠራጣሪ እንደሚያደርገው አብራርተውላቸዋል፡፡ አቡነ ጳውሎስ ግን ውሳኔው የተላለፈበትን የቋሚ ሲኖዶሱን ቃለ ጉባኤ እንደማያውቁት በመናገር ተወካዮቹን አስደንግጠዋል፤ አስደምመዋል - “ሕያው እግዚአብሔርን ይህን ቃለ ጉባኤ አላውቀውም፡፡”

አቡነ ገብርኤል
በሌላ በኩል ስለ ሀገረ ስብከቱ ሊቀ ጳጳስ መመለስ፣ አቡነ ገብርኤል ከሀገረ ስብከቱ ባይነሡም “ውጡ ተብለው መውጣታቸውን” አስመልክቶ ሲያስረዱ፣ “አባ ገብርኤል ወደ ሀገረ ስብከቱ እንዲመለሱ እዘዝ ተብዬአለሁ፤ አላዝዝም! እንገድልዎታለን እየተባለ መላክ አልችልም፤ ሪፖርቱን ቋሚ ሲኖዶሱ አይቶ እስኪወስን ድረስ እኔ ብቻዬን መላክ አልችልም” ብለዋል፡፡ የሐዋሳ ሕዝብ እንደ ሕዝብ እንዴት አንድን ሊቀ ጳጳስ ሊደበድብ ይችላል ሲሉ ለጠየቁት ተወካዮች ሲመልሱም “አባ ገብርኤልን ጥቁር ጨርቅ እያውለበለበ የተቀበላቸው ሕዝቡ ስለጠላቸው አይደለ፤ ራሳቸው ‹በጥቁር መሐረብ ተቀበሉኝ› ብለውኛል፤ ‹ከሐዋሳ ውጣ፣ እናርድሃለን› ተብለው ነው የወጡት፤ ይህን አሳዛኝ ነገር ያደረገው የአዋሳ ሕዝብ ነው፤ መፍትሔ የሌለው ነገር ይዛችሁ በመምጣችሁ አዝኛለሁ፤ እናንተ የአንድ አባት ልጆች ናችሁ፤ የፋኑኤል፣ የገብርኤል አትበሉ፤ በጳጳሳት መካከል ልዩነት እንደሌለ ነግሬያችኋለሁ፤ አቡነ ገብርኤል ወይም አቡነ ፋኑኤል ይምጡ ቢባል በሰላም ትኖራላችሁ ወይ? ለሰላም ጊዜ አልሰጠነውም” ብለዋቸዋል፡፡

በፓትርያርኩ አነጋገር በጣም ማዘናቸውን የገለጹት ተወካዮቹ፡- ምእመኑን በግ እና ፍየል እያደረጉ ሲከፋፍሉ የቆዩትን አቡነ ፋኑኤልን እንኳ ለሦስት ዓመት የታገሡትን ያህል ለአቡነ ገብርኤልም ዕድል እንዲሰጣቸው፣ ያለአባት የራሳችሁ ጉዳይ ተብለው ምእመኑን በሃይማኖቱ ለማጽናት እንደሚያዳግታቸው፣ አቡነ ገብርኤልም መከራ ቢኖር እንኳን ፈርተው እንዲሸሹ ሳይሆን ምእመኑን በመባረክ እና በማረጋጋት ያገለግሉ ዘንድ ክርስትናቸው እንደሚያስገድዳቸው ለዚህም ተንበርክከው እንደሚለምኗቸው፣ ስለ ደኅንነታቸውም ምእመኑ አስፈላጊውን ጥበቃ እንደሚያደርግ ለፓትርያርኩ መግለጻቸው ተዘግቧል፡፡ ለችግሩ መፍትሔ ለመፈለግ የመጡትን የአጣሪ ኮሚቴ አባላት ሌባ ብለው ከመሳደብም በላይ ያረፉበትን ቤት በር በመደብደብ ኮሚቴው ተልእኮውን ሳያጠናቅቅ እንዲመለስ ያደረጉት፣ በሌላ ቦታ ለማቃጠል የሚከብድ ቆሻሻ በቤተ ክርስቲያን ዐውደ ምሕረት ላይ እስከ ማቃጠል የሚደፍሩትን፣ ማታ ማታ በአጥር እየዘለሉ በመግባት ከገዳሙ አስተዳዳሪ ጋራ በሊቀ ጳጳሱ ላይ እየዶለቱ ዐምባጓሮ የሚፈጥሩትን ከ30 የማይልቁ ነውጠኞችን እንደ ፓትርያርኩ አነጋገር “የቤተ ክርስቲያን ልጆች ናቸው” ለማለት እንደማይቻል፣ ይህም ሆኖ ከእነርሱ ጋራ ፊት ለፊት ለመነጋገር ለአጣሪ ኮሚቴው ያቀረቡት ጥያቄ ተቀባይነት እንዳላገኘም አስረድተዋል፡፡

በዚህ መልኩ በቀጠለው ውይይት መሐል ፓትርያርኩ የተወካዮቹን ቀልብ የሳበ አንድ ምክር ሰጥተዋል - “ሐቁን እየተከተሉ ከተበደሉ ክብር እንጂ ውርደት አይደለም፤ እኔ ብዙ ፈተና ደርሶብኛል፤ በእስጢፋኖስ ቤተ ክርስቲያን ሰይፍ ተመዞብኝ ለአንገቴ የተሰነዘረው ትክሻዬ ላይ ዐርፏል፤ ልብሴ ተቀዷል፤ ወደ እስራኤል ለሕክምና ሄጄ ሞቷል ብለው ያስወሩብኝ ሰዎች ስመለስ ቆመው ተቀብለውኛል፤ ድንጋይ ተወርውሮብኛል፤. . .የአሁኑ ፈተና በእናንተ መካከል የመጣ ፈተና ነው፤ እንዲህ የሚያደርገው ጸላኤ ሠናይ እንጂ የሰው ጉድለት አይደለም፡፡”

በምክሩ ያሰቡበት የምእመናኑ ተወካዮችም “እርስዎ ሰይፍ ተቃጣብኝ ብለው ወደ ቅዱስ እስጢፋኖስ ቤተ ክርስቲያን ከመሄድ አልተከለከሉም፤ እንግዲያስ ምነዋ በሐዋሳ ሕዝብ ስም የጠሯቸው እፍኝ የማይሞሉ ወሮበሎች በአቡነ ገብርኤል ላይ ጥቁር ጨርቅ አውለብልበዋል ብለው እንዳይሄዱ መከልከልዎ?” ፓትርያርኩም መለሱ፤ እንዲህም አሉ፡- “የእኔ ችግር ከዚህ ጋራ የሚያያዝ አይደለም፤ እስኪ የሚያደርጉትን ልይ ብዬ በልጆቼ መካከል አባ ገብርኤልን አልሰድም፡፡”

ብዙ የተወካዮቹ እጆች ወጡ፤ ይሁንና “በቃን፣ በቃን፣ ይብቃን” የሚለውን ሹክሹክታ ተከትሎ “ሕዝቡ ችግር ፈጣሪዎችን በኀይል ጠራርገን እናስወጣ ሲለን ለመጨረሻ ጊዜ ታገሡ፤ ሄደን እንለምን ብለን ነው የመጣነው፤ ከአሁን በኋላ ወደ እርስዎ አንመጣም፤ ምናልባትም እርስዎ ወደ እኛ ይመጡ ይሆናል፤ በዚህ ለሚፈጠረው ሁሉ ሓላፊነቱን ጠቅላይ ቤተ ክህነቱ ይወስዳል” የሚሉ ማሳሰቢያዎች ተሰምተዋል፡፡ “ሪፖርቱ ነገ ይደርስሃል ተብዬአለሁ፤ ውጤቱን ነገ ወይም ከነገ ወዲያ (ያለፈው ሳምንት ዓርብ እና ቅዳሜ) እንዲቀርብ አደርጋለሁ” - ብፁዕ ወቅዱስ ፓትርያርኩ፡፡

ኀሙስ ማምሻውን ከተጠናቀቀው ከዚህ ዐይነቱ ውይይት በኋላ ወደ ሊቀ ጳጳሳቸው ብፁዕ አቡነ ገብርኤል ቤት ያመሩት የምእመናኑ ተወካዮች ‹አግድም ነው፣ አንድ ወገን ነው› ባሉት የፓትርያርኩ ንግግር በእጅጉ እያዘኑ ነበር፡፡ የምእመንነት ግዴታቸውን እየተወጡ ከዚህ በኋላ ሂደቱን በቀጥታ ለመንግሥት ለማሳወቅ ማሰባቸውም አልቀረም፡፡ በያዟቸው ተጨባጭ ማስረጃዎች እነ ያሬድ አደመ እና “የተስፋ ኪዳነ ምሕረት የልማት እና ፀረ-ኤች.አይ.ቪ ኤድስ ማኅበር” የቀድሞው ተጠሪ ገዛኸኝ አበራ አሳስተው በየአጥቢያ ቤተ ክርስቲያኑ ያሠማሯቸውን አብዛኞቹን ‹ቴኳንዶዎች› ጭምር አስረድተው በማሳመን ለሃይማኖታቸው ጥብቅና የሚቆሙ አድርገዋቸዋል፡፡ በሲዳማ ባህል አዳራሽ እና በጂምናዝየም የስብሰባ አዳራሽ ከ1500 በላይ ለሆኑ ምእመናን ባደረጓቸው በማስረጃ የተደገፉ ገለጻዎች በሀገረ ስብከቱ የተፈጠረውን አስተዳደራዊ ክፍተት እና ብልሹ አሠራር ለብዙኀኑ ምእመን በማስረዳት ከጎናቸው ለማሰለፍ ችለዋል፤ ማስረጃዎች ርእሰ መስተዳድሩ ቢሮም ደርሰዋል፡፡ በዚህም “ጾም አያስፈልግም፤ ጳጳስ አያስፈልግም፤ ዋናው ኢየሱስ ነው፤ ክርስቶስን አስኳል አድርገን እንሰብካለን” እያለ በቤተ ክርስቲያን ዐውደ ምሕረት ላይ የሚወሸክተው፣ ሥዕለ ማርያምን ቀድዶ እስከመጣል እና ኦርቶዶክሳዊት ተዋሕዶ ቤተ ክርስቲያንን “አሮጊቷ ሣራ” በሚል የሚዘልፈው የፕሮቴስታንታዊ-ተሐድሶ-ኑፋቄ ጎራ እንዲመናመን ተደርጓል፡፡

ይህን መሠረት በማድረግ ነው ለብፁዕነታቸው፣ “ለአንዴ እና ለመጨረሻ ጊዜ ወስነን ነው የመጣነው፤ ለ19 ዓመት ከ19 ቀን ለፍተን ባቀናነው ገዳም ከአባቶቻችን የወረስነውን ለልጆቻችን እንዳናወርስ ውጡ እየተባልን የታወጀብንን አስቸጋሪ ነገር አስወግደነዋል፤ ሕዝቡ ተሸንፈው እንዲቀሩ ሳይሆን እንዲመጡ ይፈልጋል፤ አስፈላጊውን ከለላ እና ጥበቃም ያደርጋል፤ ለእኛ የሚጠቅመን የእርስዎ ጥንካሬ ነው፤ በእርስዎ አለመምጣት ብዙ ክፍተት ይፈጠራል፤ የሚመለሱበትን ቀን ቆርጠን ሕዝቡ የሚቀበልበትን ቀን ብናመቻች፤ ከዚህ በኋላ በዚህ ጉዳይ ወዲህ መምጣት አንፈልግም” ያሏቸው፡፡ “እናንተን ማገልገልም ግዴታዬ ነው” ያሉት ብፁዕነታቸውም ስጋት ተስፋ የተመላበት ምላሽ ሰጥተዋቸዋል - “ሕዝቡ አንድ ከሆነ ለመመለስ ዝግጁ ነኝ፤ ትልቁ ነገር ሰላሙ ነው፤ መንቀሳቀስ የምችለው ግን እርሳቸው ሲፈቅዱልኝ ነው፤ የሴትዮዋ ተጽዕኖ ከባድ ነው፤ እኔን ከማኅበረ ቅዱሳን ጋራ በመፈረጅ ከማኅበረ ቅዱሳን ገለልተኛ የሆነ ጳጳስ ይመደብ እየተባለ ነው፤ ይህ መሠረት የሌለው ክስ ነው፤ በሕገ ቤተ ክርስቲያን መሠረት ለምን ብዬ እጠይቃለሁ፤ በሆያ ሆዬ ሓላፊነቴን አልተውም፤. . .ቤተ ክርስቲያን በፈተና ላይ ፈተና፣ የፈተና ፈተና ነው የገጠማት፤ የግንቦቱ ሲኖዶስ ችግሩን ሳይፈታ ካለፈ ቤተ ክርስቲያኒቱን ሸጠዋታል ማለት ነው፡፡”

21 comments:

Kidanemariam the Dire dawa said...

ኦ ጌታ ሆይ በቀራንዮ የፈሰሰው ደምህ እንዲሁ በከንቱ ይቀር ይሆን፡፡ በደምህ የዋጀሃት ቤተ ክርስቲያን የወኝበዴዎች ዋሻ ሆና ትቀር ይሆን!!!???

TM Z dilla said...

አቤቱ አምለከ እስራኤል ሆይ ቤተክሪስቲያናችንን አስባት መልካም አባት ለበጎቹ የሚያስብ ጠፍተዋልና፡፡
እገግዚአብሔር እትዮጵያን ይባርክ!!!!

የውስጥ አዋቂ said...

እናንተ ማ/ቅዱሳንና ወዘተዎች? ማነው የተገለጸውን እንዳታውቁ አዚምን የረጨባችሁ!? የችግሩ ምንጭ አመተ ሰይጣን-ወ/ሮ እጅጋየሁ ሆነው እያሉ ፓትርያርኩ፣አባ ...ወይም አቶ...እያላችሁ ነጋ ጠባ በድርሰት ከምታስቸግሩን ለምን እንደምን አድርጋችሁ እጅጋየሁን እግርዋን አስራችሁ ሲኦልን አታወርድዋትም?
አባት ሲታመም ወደ ጸበል ወስዶ ማሳጠብ'ኮ የኛ ስራ ይመስለኛል። አሁንም 'አመተዋ' ባለ ብዙ መተት ስለሆነች አእላፍ አባቶችንና ወንድሞች አገልጋዮችን ሳትበክል ለዩላት። እናንተም'ኮ እጅዋን ስላልንካችሁዋት ነው እንጂ የርስዋን ተሰላፊ መሆናችሁ አይቀርላችሁም ነበር።

Anonymous said...

እባካችሁ የሀዋሳ የኦርቶዶክስ ልጆች በርቱ
እግዚአብሔር ቤቱን በደንብ ሊያጠራ ስለፈለገ ነው እስከአሁን ያልተቋጨው ጉዳዩ፡፡
እግዚአብሔር ይርዳችሁ
ተስፋ አትቁረጡ
ቅዱስ አባታችን የውሸት አባት መሆናቸውን አስመስክረዋል፡፡
“ሕያው እግዚአብሔርን ይህን ቃለ ጉባኤ አላውቀውም፡፡”
አቤት!

Anonymous said...

wey gud amlake kidusan melkamun gize yamta esti .Yeawasa mimenan ayzowachehu amlak meftehe alewu kirb ken meftehewun yisetal.

esti mehila yazu ena Egzio maherene enebel. semune himamat saygeba.

Kidane Mariam Ze Dire dawa. said...

የግንቦቱ ሲኖዶስ ችግሩን ሳይፈታ ካለፈ ቤተ ክርስቲያኒቱን ሸጠዋታል ማለት ነው፡፡”

Anonymous said...

ለምን አቡነ ገብርኤል ከአቡነ ኤልያስ ፅናትን አይማሩም;; በአርባ ምንጭ እኮ ያንያህል ፈተና ሲደርስባቸው ታግሰው በዛው ሀገረ ሰብከታቸው ነበር የተቀመጡት
ስለዚህ እሳቸውም ይህን ችግር እያወቁ ለምን አዲስ አበባ ሂደዉ ይቀመጣሉ እዛው ቁጭ ብለው ነገሩን ከመንግስት ጋር መፍታት ይችሉ ነበር::
ከዚህ በሓላ የአዋሳ ህዝብ ለቤ/ክኑ ጠበቃ ይሆናል አስፈላጊውን ሁሉ ያደርጋል ህዝቡም በዚሁ መቀጠል እና መበርታት አለበት::
ልዑል እግዚአብሔር ቤ/ክን እና ሕዝቦን ይጠብቅ::
አሜን

Anonymous said...

Is she our Church's 'Matriarch', who is whirling the dust around? Mirchaw techiberbirual, lela enimertiliwo 'abatachin'.

Anonymous said...

I am very much surprised by the movement of Tehadiso and the reaction of our fathers. These(Tahdiso) probably are planning to take the church and administer for the sake of generation primarily Money not spiritual well being of society.

One thing that always puzzles me is some words from these tehadiso group like " ... we are preaching Jesus as our main basis or askual"

Were these guys Orthodox? I am asking this question because I indeed know that our Orthodox's base is Jesus every practice including most traditional deed are related to him. if they were, they might not know who there were believing or they are not referring our church probably they are referring other church!

These all have to happen because it has been already forecasted by holy father.

HM

Enbaqom said...

ኡፎይ! ምንም ኃጢአት ብሰራ ለንስሐ ጊዜ የሚሰጥ አባታዊ
ቃል ሰማሁኝ:: ነገር ግን መተጋገዝ አልቻልንም::
እኔ በእውነት ልቤን የተሰማኝ ልንገራችሁ:- ንስሐ ባልገባና
ከኃጢአት መንፃቱ በረሳ ልባችን ተይዘን ስድብና መለያየትን
እያመጣን ነን ያለነው:: አንድ ከሃዲ ከተገኘ በሊቃውንት ጉባኤና
በሕገ ቤተክርስቲያን ያለውን ሥርዓት ተለትለን የተፈጠረውን የሃይማኖት
ሕጸጽና የፈጠረው ሰው ወደ ቤተክርስቲያን ማቅረብ ለትውልድና ለቤተ
ክርስቲያን ይጠቅማል:: ዋና ችግሩ ሳይታወቅ መጮህና መረባበሽ ግን
የቤተክርስቲያን ባሕል አይደለም:: ሁሉም በእርጋታና በሰከነ መንፈስ
በትዕግሥት ነው የሚሰራው::
ቅዱስ አባታችን የተናገሩት ቃል በቃል ከሆነ በጣም ልብን የሚነካና
ተስፋን የሚዘራ ነው:: አሁን እንደ ልጅነቱ ማኅበረ ቅዱሳን እርሱ
የሚያውቀውና አለ የሚለው የሃይማኖት ሕጸጽ በማቅረብ ቢያግዝ መልካም ነበረ::
በእርገጠኝነት ቤተክርስቲያን የክሕደት ትምህርት ያስተማረውን ሰው በሕግዋን
አይታ ትወስንበት ነበር::
የስነምግባር ጉድለትም እንዲሁ: ነገር ግን የአስተያየትና የአካሄድ ልዩነት እስኪመሲል
ድረስ ሁሉቱም ወገን ስሕተተኛና ለራሱ የሚቆም አስመስሎበታል::
እኔ ግን ስደቡኝ እንጂ ከቤተክርስቲያን አባት የምጠብቀው ንግግርና በማስተዋል
እንጂ በስሜት እንዳልገፋ የሚያደርግ ቃል ለመጀመሪያ ጊዜ (በዚህ ብሎግ) ሰምችያለሁ
እግዚአብሔር ማስተዋሉን ያድለን: የሁሉ እናት እመቤታችን ማርያም ትድረስልን::
አሜን:
እንባቆም

Anonymous said...

ኧረ ፈጣሪያችን በዚች ሃገር ላይ አንድ ቅዱስ አጣህ እባክህ ተመልከተን በቃችሁ በለን እውነት ነው አልታዘዝንም አልተገዛንም እንደ ቃልህም አልተንቀሳቀስንም ግን በቅንነት እንደ ቃልህ በመመላለስ ለዘመናት በቤትህ ሲያገለግሉ በእምነታቸው ጸንተው ስላለፉት አባቶቻችን ብለህ ማረን ይቅር በለን ቤትህን ይጠብቁ ዘንድ የተቀመጡት ሥጋ አሸነፋቸው ሆዳቸው አልሞላ አለ ጭንቅላታቸው አልሰራ አለ በአባቶቻቸው አጽም ላይ ቆመው እነሱ የደከሙለትን እንደነሱ ሳይሆን ተርበው ተጠምተው ተሰደው በሰይፍ በእሳት ውስጥም ሳይቀር ያስጠበቁትን እምነት ቀለዱበት ለቀላጆችም አሳልፈው ሰጦት በአደባባይም መሳለቂያ አደረጉን እኛም የምንጽናናበት የሚያበረታታን እንድንጾም እንድንጸልይ ሱባኤ እንድንይዝ በችግሮቹ ዙሪያ እንድንማጸንህ መፍትሄ ከአንተ ነውና ወደ አንተ እንድንጮህ እንኳን የሚያደርገን አጣን ደከመን አቃተን ባልፈለግነው መንገድ እንድንጓዝ አመቻቹን ለነሱ ይጠቅማልና እኛም የምህረት እጅህ እስኪዘረጋ ጸንተን እንዳንቆም አቅም አጣን ቤተ ክርስቲያንን በአለም ዳኞች ፊት እንድናቆማት ቀጣዩን ጥፋት እኛ እንድንለኩስ የግድ አሉን ያለበለዚያ በምህረትህ አደባባይ እንድንፋጅ አማራጭ እየሰጡን ነው ተስፋ ሲቆርጡ መድረስ አንተ ታውቅበታለህና አትዘግይብን እባክህን ከዚህ ጥፋት ታደገን እነሱንም ልብ ስጣቸው ይህን ቆብ ሲጭኑ ወደ ነበረ ልቦናቸው መልሳቸው መቼም ሲነሱ እንደዚህ ባለ ክህደት ካልተነሱ ብዬ ነው በቃችሁ በለን አጥቂዎቻችን በውስጣችን በጭንቅላታችን ላይ ናቸውና ከቃልህ እንዳያወጡን እርዳን

ከአቡዳቢ

Anonymous said...

የግንቦቱ ሲኖዶስ ችግሩን ሳይፈታ ካለፈ ቤተ ክርስቲያኒቱን ሸጠዋታል ማለት ነው፡፡” Ere Amelak Hoye Eskahun Aleteshetechem Malet New .....Ena Gin Kezi Belaye Mekera Min Enedehone ...Yemiyaseredagne Kale ?????

DEREJE THE AWASSA said...

አውቆ የተኛን ቢቀሰቅሱት አይሰማም
ይህስ ከጾምና ፀሎት በቀር አይወጣም

Anonymous said...

ደጀ ሰላሞች እነማን እንደሆናችሁ ራሳችሁን ባትገልጡም በምታቀርቡት ዘገባ ማንነታችሁ ግልጽ ሆኖ ይታያል፤ አንድ ያደንቅሁላችሁ ነገር እናንተ የማትቀበሉትን አስተያየት ማስተናገዳችሁ ነው፤ ይህ አንድ ሚዲያ ሊያደርገው የሚገባ ነገር ነውና በዚሁ ቀጥሉበት፤ በመቀጠል ግን ለእናንተም ሆነ በሁለት ጎራ ለተከፈሉት አስተያየት ሰጪዎች የምለው ነገር ቢኖር የሁላችሁም ትኵረትና መጽሐፍቅዱስ ያተኰረበት ነገር የተለያየ መሆኑን ቆም ብላችሁ እንድታጤኑት ነው፤ ጌታችን መጻሕፍት ስለእርሱ እንደሚመሰክር ተናግሯል/ዮሐ.5፡39/ ስለዚህ የቅዱሳት መጻሕፍት ዋነኛ ርእሰ ጉዳይ የሆነውን ክርስቶስን መመልከትና እርሱን መግለጥ የሁሉም ትኵረት መሆን ይገባዋል፤ የኦርቶዶክስም ሆነ የፕሮቴስታንት እንዲሁም የካቶሊክ ተሐድሶ የእግዚአብሔር አጀንዳ ሳይሆን የሰው አጀንዳ ነው፤ እግዚአብሔር የሚፈልገው በክርስቶስ የሚገኘውን የሕይወት ተሐድሶ ነው፤ ይህም በሮሜ 12፡2 ‹በልባችሁ መታደስ ተለወጡ እንጂ ይህን ዓለም አትምሰሉ› ተብሎ በተጻፈው ቃል የተገለጠ ነው፡፡

Anonymous said...

Habtamu


Wey Amlake! Is it the responsibilty of the Hawassa Miemenans? why do we contribute our share? What is the secret behind the silence of Media's of MK? What is the purpose to have media if it can do something to rescue the church from such conspiracy? Shame on the excutives-in-chief of Semea Tsidk and Hamer. They have passed through prestigious phase to the extent of sacrification. Dipolomacy is not the correct tool. EWNET ARINET YAWETANAL.

IT is true that those persons are not on the side of the Church. they are against the church.

Megabe Mistir Welde-Rufael said that illness and death are now in the church and many AYINAMAWOCH have passed away. the reason is still secret. It seems a March on apologists of the church. Archbishop Gebriel and others should take care.

they are now running to complete their job before the Synod meeting in April.

May God be with US, Amen! SETYOWAN YASTAGSILIN. ESACHEW YIHUN KALU...

KM said...

I wonder on the "የውስጥ አዋቂ" ideas.
I think he is right. What we have not deeply understood could be that point. Without something, this simple widow cannot cheat our fathers. Please lets think of it and do solution over it.

Anonymous said...

ene yemilew yebetechrstianu era kirstos asfetsami kidus sinodos, tadiya mengist lemin Yekidus sindosin wesane lemin ayasikebirim!!

Anonymous said...

የግንቦቱ ሲኖዶስ ችግሩን ሳይፈታ ካለፈ ቤተ ክርስቲያኒቱን ሸጠዋታል ማለት ነው፡፡”
እስከ አሁን ድረስ ጫንቃችን ከሚሸከመው በላይ ነገሮችን ተሸክመናቸው ችለናቸዋል ። አሁን ግን ቤተክርስትያናችን ለሁለት ስትከፈል አይናችን እያየ ጆሯችን እየሰማ ዝም የምንልበት ህሊና የለንም። ለዚህ መሰረታዊ ችግር ሲኖዶሱ መፍትሄ መስጠት ካልቻለ የታሪክ ተወቃሽ ብቻ ሳይሆን እግዚሐብሔርም የሚጠይቅበት ጊዜ ይመጣል። ቤተክርስትያናችን ስትሸጥ የሚያይ አይን እንዲኖረን አንፈልግም። አባ ጰውሎስ እስከ አሁን በማወቅም ሆነ ባለማወቅ በድፍረትም ሆነ በየዋህነት ይቺ ቤተክርስትያን ላይ ያደረሱባትን ችግር ባለቤቱ እግዚሐብሔር ይጠይቃቸው።
እኔ ቆሜ እኔ በህይወት ሳለሁ የሷን ሁለት ሆና ማየት ስለማልሻ የህይወትም መስዋዕትነት ለመስጠት እኔ ዝግጁ ነኝ። በማንም ወንበዴ ተሀድሶውያን እንቅስቃሴ አባቶቻችን ያስረከቡንን ይችን ቤተክርስትያን ሆዳቸው አምላካቸው ለሆናቸው ሰዎች አሳልፈን አንሰጥም። አሁን ሲኖዶሱ መወሰን ካልቻለ እኛ ሳንሆን እግዚሐብሔር እንደሚፋረዳቸው አልጠራጠርም።።
እግዚሐብሔር ኢትዮጵያን ይባርክ
ላሜዳ

Tsion said...

Tsion

Yebetkristianen chegroch lemeftat Abatochachen yadergut endeneberew Gubae bemesrat lemefetat benmoker Men alebet!

April 12,2011

Kalkidane said...

ኦ ጌታ ሆይ በቀራንዮ የፈሰሰው ደምህ እንዲሁ በከንቱ ይቀር ይሆን፡፡ በደምህ የዋጀሃት ቤተ ክርስቲያን የወበዴዎች ዋሻ ሆና ትቀር ይሆን Sewerene New Leal Mine yebalale

መብሩድ said...

ወይ ተዋህዶ!!!
ጌታ ሆይ ይኼን ፈተና ልንቋቋው እንችላላን?
ምንድን ልታስተምረን ነው?
ከበደላችን ብዛት ልትቀጣን?
እናምናለን ምህረትህ ትከለክልሃለች።
በደላችን ብዙ ነው እናምናለን እባክህ ስለምትወዳቸው ብለህ ራራልን።

ወገኖቼ እጅግ ብዙ ትንታኔና መፍትሔ ሰማን።
ይኼ የፈተናውን ክብደት የሚያሳይ መሰለኝ።

በእጃችን ምን አለ?ከፊታችን ትልቅ ዕድል እንጠቀምበት።
ይኼን ፈተና አሳልፎ እንዲያሳየን።
ከፊታችን በሚመጣው ሰሙነ ሕማማት እንጠቀምበት።


የማቴዎስ ወንጌል 17፥21
ይህ ዓይነት ግን ከጸሎትና ከጦም በቀር አይወጣም አላቸው።

የሉቃስ ወንጌል 22፡31

ሰይጣን እንደ ስንዴ ሊያበጥራችሁ ለመነ።


የትንሳኤ ቀን እንገናኝ።

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)