March 11, 2011

ተሐድሶ - በወሊሶ

(ደጀ ሰላም፤ ማርች 11/2011)፦ የፕሮቴስታንታዊ-ተሐድሶ-መናፍቃን እምነት አራማጅ ነው የሚባለው “የቅድስት ማርያም የስብከተ ወንጌል ማስፋፊያ ማኅበር” በሚል ራሱን የሚጠራው ቡድን ሥርዐተ ቤተ ክርስቲያንን በማናለብኝነት በመጣስ እና የቅዱስ ሲኖዶስ ውሳኔን በመተላለፍ የሚፈጽመውን ተግባር አጠናክሮ በመቀጠል የቡድኑ መሪዎች በዐቢይ ጾም በወሊሶ መካነ ሕይወት አቡነ ገብረ መንፈስ ቅዱስ ቤተ ክርስቲያን ከበሮ በመምታት ምእመኑን ሲያውኩ  እና ግራ ሲያጋቡ አምሽተዋል፡፡

  •  “እግዚአብሔርን በልቤ አመሰገንኩት፤ የወሊሶ ሕዝብ ከእስራት ተፈታ፤ ነጻ ወጣ፡፡” (ከበሮ ለመምታት ከጳጳሱ ጋራ ተነጋግሮ የተፈቀደለት በጋሻው ደሳለኝ)
  • በከተማው ስታድየም የተካሄደውን የፕሮቴስታንቶች ኮንፈረንስ ሰበብ በማድረግ ‹ጉባኤ ለማድመቅ› በሚል ከበሮ እንዲመታ ፈቃድ የሰጡት የሀገረ ስብከቱ ጳጳስ ናቸው፡፡ 
  •  “ወሊሶ ላይ የተደረገው ሕገ ወጥ እና በቀኖና ቤተ ክርስቲያን ሊወገዝ  የሚገባው ነው፡፡” (ሊቃውንተ ቤተ ክርስቲያን)
  • ቡድኑ በስብከተ ወንጌል ስም የሰበሰበውን በሚልዮን የሚቆጠር ብር ‹ይዞ መሰወሩን› የስብከተ ወንጌል እና ሐዋርያዊ ተልእኮ መምሪያ ሓላፊ ተናግረዋል፡፡
  • መምሪያው በማኅበሩ አባላት ላይ የጣለው እገዳ እንደ ጸና ነው፡፡
  • “የማኅበሩ አባላት በሆኑ ግለሰቦች ባለቤትነት “ታኦሎጎስ” በሚል ስያሜ በኢቢኤስ የሳተላይት ቴሌቪዝን ለሚተላለፈው ስርጭት  መምሪያው ዕውቅና አልሰጠም፤ ዝግጅቱም የቤተ ክርስቲያኒቱን አስተምህሮ አይወክልም፡፡” (የመምሪያው ሓላፊ)
የመጀመሪያው ጾም፤ ዐቢይ ጾም፤ ጌታችን ኢየሱስ ክርስቶስ ከተጠመቀ በኋላ ስለ እኛ ቤዛ እና አርኣያ ለመሆን በገዳመ ቆርንቶስ አርባ መዓልት እና አርባ ሌሊት የጾመው ጾም ነው(ማቴ.4.1-11)፡፡ ጾሙ ዐቢይ የተባለበት ምክንያት ጌታችን የጾመው ጾም ስለሆነ፣ ታላላቅ የሰይጣን ፈተናዎች ወይም አርእስተ ኃጣውእ(ስስት፣ ትዕቢት፣ ፍቅረ ነዋይ) ድል የተነሱበት ስለሆነ፣ ዛሬም ክርስቲያኖች የመድኃኔዓለም ክርስቶስን አርኣያ ተከትለን ድል የምንነሳበት ጾም ስለሆነ ነው፡፡ በሕዝቡ ዘንድ ጾሙ ሁዳዴ ይባላል፤ ሁዳድ ማለት የመንግሥት መሬት፣ የመንግሥት ርስት ማለት ነው፡፡ የመንግሥት ሁዳድ በሚታረስበት እና አዝመራውም በሚሰበሰብበት ጊዜ ልጅ ዐዋቂ ሳይባል የመንግሥቱ ዜጋ ሁሉ ለሥራ ታጥቆ እንደሚነሣ ይህንንም የጌታ ጾም የጌታ-ሁዳድ-የክርስቶስ-ዜጎች የሆኑ ምእመናን ሁሉ ይጾሙታልና የሁዳዴ ጾም ተብሏል፡፡

ጌታችን የጾመው አርባ መዓልት እና አርባ ሌሊት ሲሆን እኛ ግን በስምንቱ የዐቢይ ጾም ሳምንታት የምንጾመው 56 ቀናትን ነው፡፡ በእውነቱ እንኳን 56 ቀናትን ዓመትም ብንጾም እግዚአብሔር በጸጋ ላይ ጸጋ ይጨምርልናል እንጂ አያስኮንነንም፡፡ ከ56ቱ የዐቢይ ጾም ቀናት ሰባት ቅዳሜ ስምንት እሑድ ይገኛሉ፡፡ እኒህም በድምር 15 ቀናት ሲሆኑ ከጥሉላት(ሥጋ፣ ቅቤ፣ ወተት፣ ዕንቁላል) መባልዕት እንጂ ከእህል ውኃ ስለማይጦሙ 15ቱ ተጨማሪ ቀናት ለእኒህ ሰንበታት ምትክ የሚሆኑ ናቸው፡፡ በጾም ወራት ከመባልዕት መወሰን ብቻ ሳይሆን ዐይን ክፉ ከማየት፣ አንደበት ክፉ ከመናገር፣ ጆሮ ክፉ ከመስማት የተቆጠበ እንደሆነ ጾሙን ክርስቲያናዊ ያደርገዋል፤ “ይጹም ዐይን፤ ይጹም ልሳን፤ እዝንኒ ይጹም እምሰሚዓ ሕሡም በተፋቅሮ” እንዳለ (ቅዱስ ያሬድ፣ ድጓ)::

በየዓመቱ በዐቢይ ጾም ለሚገኙ እሑዶች መደበኛ የሆነ ያሬዳዊ ዜማ እና በቅዳሴ ጊዜም ቋሚ የሆኑ ምንባቦች እና ምስባክ ተመድቦላቸዋል፡፡ የቤተ ክርስቲያናችንን መዝሙር ንባቡን ከዜማው አስማምቶ፣ አጠናቅሮ ያዘጋጀው ኢትዮጵያዊው ማሕሌታይ ሊቁ ቅዱስ ያሬድ በጾመ ድጓው(የጾምን፣ የምጽዋትን እና የጸሎትን ጠቃሚነት የሚያስተምረው የዜማ ድርሰቱ) በሁዳዴ ለሚገኙት እሑዶች ሁሉ የተለየ መዝሙር ስለሚሠራላቸው እያንዳንዱ እሑድ በመዝሙሩ ስም ይጠራል፡፡ ከ14ቱ ቅዳሴዎች መካከል የዐቢይ ጾም ቅዳሴዎች - ቅዳሴ ባስልዮስ፣ ቅዳሴ አትናቴዎስ እና ቅዳሴ ጎርጎርዮስ ናቸው፡፡ ለምሳሌ ያህል ያሳለፍነው የመጀመሪያው የዐቢይ ጾም ሰንበት ዘወረደ ይባላል፡፡ 

ይኸውም ቅዱስ ያሬድ በመጽሐፉ መጀመሪያ አምላክ ከሰማይ መውረዱን፣ ሰው መሆኑን እና መሰቀሉን ስለሚያወሳ ነው፡፡ ሙሴኒም ይሉታል፡፡ ምናልባት ስለ ሙሴ ሕግ እና ጾመ ሙሴን ስለሚያነሣ ይሆናል፡፡ በዕለቱ የሚባለው ምስባክ “ተቀነዩ ለእግዚአብሔር በፍርሃት= ለእግዚአብሔር በፍርሃት ተገዙ፤ ወተሐሠዩ ሎቱ በረዓድ= እርሱን በማምለክ ደስ ይበላችሁ፤ አጽንዕዋ ለጥበብ ከመኢትመዐዕ እግዚአብሔር= እግዚአብሔር እንዳይቆጣ ጥበብን አጽንታችሁ ያዙ” የሚለው የመዝሙረ ዳዊት 2. 11 ጥቅስ ሲሆን ወንጌሉም ከዮሐንስ 3. 10-29 “. . .ወደ ሰማይ የወጣ የለም፤ ከሰማይ ከወረደው ከሰው ልጅ በቀር፤ እርሱ በሰማይ የሚኖረው ነው፡፡. . .” የሚለው ክፍል ነው፡፡ ቀጣዮቹን የዐቢይ ጾም ሰንበታት እንደ ቅደም ተከተላቸው ለማውሳት ያህል ቅድስት፣ ምኩራብ፣ መጻጉዕ፣ ደብረ ዘይት፣ ገብርሔር፣ ኒቆዲሞስ፣ ሆሳዕና በመጨረሻም ትንሣኤ ይባላሉ/መጽሐፈ ግጻዌ፤ ብፁዕ አቡነ ጎርጎርዮስ፣ የኢትዮጵያ ቤተ ክርስቲያን ታሪክ፣ ገጽ 125/፡፡

መዝሙር ስልት ባለውና ልብን በሚመስጥ ቃና ተቀነባብሮ ከጉሮሮ የሚወጣ ድምፅ ሲሆን የባሕርይ አምላክ ልዑል እግዚአብሔር በሰማይ እና በምድር የሚመሰገንበት እና የሚለመንበት ዐቢይ የጸሎት ክፍል የሆነ ጣዕመ ዜማ ነው፡፡ ለጆሮ በሚያስደስትና በስሜትም ትርጉም የሚያገኙ ተከታታይ ድምፆችን በማዛመድ በዜማ የሚቀርበው የምስጋና እና የልመና መዝሙር ለመማሪያ እና ለማስተማሪያ እንዲሁም ክፉ መንፈስን ለማራቅም ይጠቅማል፡፡ ከዚህ የተነሣ መዝሙር የምስጋና፣ የንስሐ/የልመና፣ ይቅርታ/ እና ትምህርታዊ/የዶግማ፣ ቀኖና እና ትውፊት ትምህርቶችን የሚሰጥ/ የሚሉ ሦስት ዐይነታዎች አሉት፡፡ ከመዝሙር ጥቅም አንዱ ማስተማር ነውና ትምህርተ ሃይማኖትን ወይም ሥርዐተ እምነትን ወይም ክርስቲያናዊ ትውፊትን ያላካተተ፣ ከመጽሐፍ ቅዱስ እና ከአባቶች ትእዛዝ ውጭ በሆኑ መሣሪያዎች የሚጠቀም፣ ከያሬዳዊ ዜማ ውጭ የሆነ መዝሙር መሰል ዘፈን ኦርቶዶክሳዊ መዝሙር ሊባል አይችልም፡፡

መዝሙርን ጊዜ እና ወቅት ባይገድበውም ወቅቱን እና ጊዜውን የማይመስል መዝሙር ደግሞ አይዘመርም፡፡ ቤተ ክርስቲያናችን የሥርዐት ቤት ስለሆነች በየወቅቱ እና በየጊዜው በየሰዓቱም ቢሆን የሚዘመር መዝሙር አላት፡፡ በሠርግ ጊዜ የአዳም እና የሔዋን ታሪክ እየተጠቀሰ፣ የአብርሃም እና የሣራ ሕይወት እየተዘከረ፣ ሕይወትን ወደ ቅድስና ሊመራ የሚችል ታሪክ እየተተረከ ይዘመራል፡፡ በክረምትም ውኆች እስከ ልካቸው እንዲሞሉ፣ ሰብሉ ፍሬውን እንዲያፈራ እየተለመነ ይዘመራል፡፡ በኀዘንም ጊዜ ኃጢአትን በማሰብ ፍጹም ይቅርታን የሚለምን መዝሙር ይዘምራል፡፡ ብሉይ ኪዳን እና ሐዲስ ኪዳንን ከሌሎች ዓለማት ቀድማ የተቀበለችው ኢትዮጵያ እጅዋን ዘርግታ ከእግዚአብሔር ካገኘቻቸው ስጦታዎች አንዱ በቅዱስ ያሬድ አማካይነት የተቀበለችው ልዩ መዝሙር ነው፡፡ ከመዝሙሩ ጋራ አብሮ የሽብሸባው፣ የጭብጨባው፣ የእልልታው ሁኔታም እንደ ወቅቱ እና እንደ መዝሙሩ ሁኔታ ይወሰናል፡፡ ስለ ኀዘን እየተዘመረ “እልል” አይባልም፡፡

ከቤተ ክርስቲያናችን የዝማሬ እና የምስጋና ሥርዐት አንዱ ማሕሌት ነው፤ የማሕሌቱ ይዘት እና አፈጻጸም ደግሞ አቋቋም ይባላል፡፡ አቋቋም የመቆም ሥርዐት፣ የዜማውን ስልት የሚገልጽ እንቅስቃሴ ነው፡፡ ይህ ሥርዐት ፍጹም ሰማያዊ ነገርን የሚያመለክትና የጌታችንን መከራ በዐይነ ኅሊናችን እያየን ወደ ንስሐ እና እግዚአብሔርን ወደ ማወቅ የሚያደርሰን፣ አባ ሕርያቆስ እንደነገረን “ከጣዕሙ ብዛት የተነሣ አጥንትን የሚያለመልም” ነው፡፡ በእንቅስቃሴው ሁሉ ስለ ክርስቶስ መከራ ሰፊ ትምህርት የሚሰጥበት የቤተ ክርስቲያናችን መዝሙር የሚጠቀምባቸውም የዜማ መሣሪያዎች -ንዋያተ ማሕሌት - በሰማይ መላእክት ዘንድ ያሉ፣ ሰማያዊ ምስጢርን የሚገልጡ፣ የቤተ ክርስቲያናችንን እምነት፣ ሥርዐት እና ትውፊት ከድኅነት ጋራ በማቀናጀት ሥጋዊ ስሜትን በማጥፋት በተመስጦ ወደ እግዚአብሔር የሚያደርሱ ናቸው፡፡ ከንዋያተ ማሕሌቱም ከበሮ፣ ጸናጽል፣ መቋሚያ፣ በገና እና መሰንቆ ተጠቃሽ ሲሆኑ በተናጠል እና በቅንጅት ጥቅም ላይ የሚውሉበት የየራሳቸው የአገልግሎት ጊዜ አላቸው፡፡

የሥርዐተ ቤተ ክርስቲያን እና የድጓው ሊቃውንት እንደሚያስረዱት በዐቢይ ጾም ለየት የሚል የስብሐተ እግዚአብሔር አደራረስ አለ፡፡ የዚህም መሠረቱ በጾመ ድጓ እና በጾም ምዕራፍ በቅዱስ ያሬድ የተሠራው ቀኖና እና በኋላም በቅዱስ ሲኖዶስ ብያኔ የተደነገገውን መሠረት ያደረገ ነው፡፡ በመንበረ ፓትርያሪክ ጠቅላይ ጽ/ቤት የሊቃውንት ጉባኤ አባል የሆኑት ሊቀ ካህናት ክንፈ ገብርኤል አልታዬ እንደሚያስረዱት በቀኖናው በታዘዘው መሠረት በዐቢይ ጾም ማሕሌት አይቆምም፤ ማሕሌት ተቁሞ ክብረ በዓል እንዲደረግ ቀኖናው አይፈቅድም፤ ከበሮ አይመታም፤ ጸናጽል አይንሿሿም፤ እልልታም የለም፡፡ እንደ ሊቀ ካህናት ክንፈ ገብርኤል ማብራሪያ በዐቢይ ጾም ስብሓተ እግዚአብሔሩ የሚፈጸመው በዘንግ ወይም በዝማሜ ብቻ ነው፤ የሚቆመውም ጾመ ድጓ እና የጾም ምዕራፍ የሚባለው ነው፡፡ እሑድ እሑድ የመወድስ አደራረስ አለ፤ ቅኔ በየምዕራፉ ይደረጋል፡፡ በየምዕራፉ ደግሞ ጾመ ድጓው ይገባል፡፡ በዘወትር ግን ቅኔ የለም፡፡ ምሕላ የሚባል አለ፤ የዘወረደ፣ የምኩራብ የተጽዕኖ ምሕላ አለ፤ ዓርብ ዓርብ ነው የሚደረገው፡፡ በዚህ ቀን ዝማሜም የለም፤ ዝም ብሎ በዜማ ብቻ በጾመ ድጓ የሚደርስ ነው፡፡ ከዚህ ሌላ ከሦስቱ የቅዱስ ያሬድ የዜማ መደቦች ቅዳሴው የሚቀደሰው በመጀመሪያው ስልት በግእዝ ነው፤ ማሕሌት ስለማይቆም ሁለተኛው ስልት በዕዝል ቅዳሴ የለም፡፡

ከዚህ መሠረታዊ የቀኖናው ትእዛዝ ቅዱስ ሲኖዶስ በብያኔ ያሻሻላቸው ነገሮች ሊቀ ካህናት ክንፈ ገብርኤል አብራርተዋል፡፡ ይኸውም በዐቢይ ጾም ውስጥ ያሉ የጌታችንን ዐበይት በዓላት እና የቅዱሳንን ክብረ በዓላት፣ ጥምቀተ ክርስትናን እና የክህነት ሹመትን የሚመለከቱ ናቸው፡፡ ክብረ በዓላትን በሚመለከት አሁን ለምሳሌ ነገ (መጋቢት አምስት ቀን) የጻድቁ አቡነ ገብረ መንፈስ ቅዱስ በዓል ነው፡፡ ባለፈው የካቲት 23 ቀን ሰማዕቱ ቅዱስ ጊዮርጊስ በዐድዋ ያደረገውን ተኣምራት በማስመልከት በዓል አክብረናል፡፡ የካቲት 16 ቀን እመቤታችን ቃል ኪዳን የተቀበለችበት ቀን አንዳንድ ጊዜ ጾሙ ይገጥማታል፡፡ መጋቢት መድኃኔዓለም(27) በስቅለቱ ቤዛነቱ የተፈጸመበት፣ መጋቢት 29 በትስብእቱ(ፅንሰቱ) ደገኛ ምስጢር የተፈጸመበት ነው፡፡ ከሆሳዕና በፊት ያሉት ክብረ በዓላት እኒህ ናቸው፡፡ በቅዱስ ሲኖዶስ ብያኔ መሠረት በእኒህ በዓላት ከበሮ እየተመታ ማሕሌት ይቆምና በዕዝል ይቀደሳል፡፡ በደብረ ዘይት ዕለት በአንዳንድ ቦታ ማሕሌት ይቆማል፡፡

በቀኖናው መሠረት የ40 እና የ80 ቀን ጥምቀተ ክርስትና አይፈጸምም ነበር፡፡ ይኸውም የደስታ ጊዜ እንዳይታይ ነው፤ ክርስትና ካለ ሰዎች ድግስ ይደግሳሉ፡፡ ክህነት (ዲቁና፣ ቅስና፣ ጵጵስና) መሾም አልነበረም፤ ሹመት ካለ በወገኑ ማጨብጨብ፣ መብላት፣ መጠጣት አይቀርምና፡፡ ይሁንና አሁን ግን ይህ በቅዱስ ሲኖዶስ ብያኔ ተሻሽሎ ጥምቀተ ክርስትናውም ይፈጸማል፤ ሹመቱም ይሰጣል፡፡ በዚህ መልኩ ቅዱስ ሲኖዶስ በብያኔ ቀኖናውን በማሻሻል ከላይ የተጠቀሱት የቅዱሳን ክብረ በዓላት በተመለከተው አኳኋን በዐቢይ ጾም እንዲከበሩ ቢፈቅድም ከልክ ያለፈ ፈንጠዝያ እና ዳንኪራ ሊደረግበት ከቶም እንደማይገባ ሊቀ ካህናት ክንፈ ገብርኤል በአጽንዖት ያሳስባሉ፡፡

ከዚህ አኳያ ባለፈው ሳምንት እሑድ፣ የካቲት 27 ቀን 2003 ዓ.ም ምሽት በደቡብ ምዕራብ ሸዋ ሀገረ ስብከት ወሊሶ መካነ ሕይወት ጻድቁ አቡነ ገብረ መንፈስ ቅዱስ ቤተ ክርስቲያን በመንበረ ፓትርያሪክ ጠቅላይ ጽ/ቤት የስብከተ ወንጌል እና ሐዋርያዊ ተልእኮ መምሪያ ፈቃድ ያልተሰጣቸው እና ሕገ ወጥ በሆኑ ዘማርያን ነን ባዮች የተፈጸመው ተግባር “ሕገ ወጥ እና በቀኖና ቤተ ክርስቲያን ሊወገዝ የሚገባው” እንደሆነ ሊቀ ካህናት ክንፈ ገብርኤል ገልጸዋል፡፡ በተጠቀሰው ቀን ራሳቸውን “የቅድስት ማርያም የስብከተ ወንጌል ማኅበር” በሚል ማስመሰያ የሚጠሩት ሕገ ወጥ ሰባክያኑ አመሻሹ ላይ ከቅዳሜ ጀምሮ ቀስ በቀስ የጀመሩትን በዐውደ ምሕረቱ ላይ የመፋነን ድርጊት እሑድ ዕለት እስከ ምሽቱ አምስት ሰዓት ድረስ በመቀጠል ምእመኑን ግራ ሲያጋቡ እና ሲያውኩ መቆየታቸው ተዘግቧል፡፡ 

በዚሁ ዕለት ጠዋት ቅዳሴው እንዳበቃ በአጥቢያ ቤተ ክርስቲያኑ አቅራቢያ በሚገኘው የከተማው ስታዲየም ኮንፈረንስ ያደረጉትን ፕሮቴስታንቶች  ሰበብ በማድረግ የፕሮቴስታንታዊ-ተሐድሶ-መናፍቃን ሎሌ የሆነው የዚህ ቡድን ቀንደኛ አባል በጋሻው ደሳለኝ “እነዚህ መናፍቃን እንደፈነጩ አይቀሩም፤ እኛም ዛሬ አምሽተን በዝማሬ፣ በከበሮ እና በእልልታ እናሳያቸዋለን” በማለት መናገሩ ተዘግቧል፤ አመሻሹም ላይ የሀገረ ስብከቱን ሊቀ ጳጳስ አቡነ ሳዊሮስን አነጋግሮ እንደተፈቀደለት በመጥቀስ መሰሎቹ ትዝታው ሳሙኤል፣ ዘርፌ ከበደ እና ሌላ አንድ መሰላቸው ሳይገባቸው እና ሳይባቸው በያዙት ንዋየ ማሕሌት/ከበሮ/ በዐውደ ምሕረቱ ላይ ሲረግጡ/ዘርፌ ከበደ በቅርቡ በድሬዳዋ ዐውደ ምሕረት ላይ “ዛሬ ይሄን መድረክ እንቀውጠዋለን” እንዳለችው/ ማምሸታቸው ተገልጧል፡፡

በመጀመሪያ ላይ በማጉረምረም ለመቃወም የሞከረው ምእመን በጋሻው “ከሊቀ ጳጳሱ ተነጋግሮ እንደተፈቀደለት” ሲናገር ከጥቅምቱ የቅዱስ ሲኖዶስ ምልአተ ጉባኤ በኋላ ተዛውረው በመጡትና ብዙም በማያውቃቸው ብፁዕ አባት ግራ በመጋባት እያመነታ እና ገሚሱም ቀስ በቀስ እየተላመደ አብሮ ለማጨብጨብ መገደዱን ከስፍራው የተገኙ ምንጮች ጠቁመዋል፡፡ ከዚህ በላይ ግን ሕዝቡን ያስቆጣው ሊቀ ጳጳሱ በተቀመጡበት በዐውደ ምሕረቱ ላይ እንዳሻው የፈነጨው በጋሻው ደሳለኝ ፕሮቴስታንቶቹን መስሎ እና አህሎ የደረበው “የነጻ አውጪነት” ካባ ነው፡፡ ነጻ ያልወጣው “ነጻ አውጪው” በጋሻው እንዲህ ሲል ነበር ዴማጎጂውን የለፈፈው፡- “ብፁዕ አባታችን ታላቅ አባት ናቸው፤ እግዚአብሔርን በልቤ አመሰገንኩት፤ የወሊሶ ሕዝብ ከእስራት ተፈታ፤ ይሄ ሕዝብ ነጻ ወጣ፡፡”


የሊቃውንት ጉባኤ አባሉ ሊቀ ካህናት ክንፈ ገብርኤል በጋሻው በማናለብኝነት በተናገረው እና “ሊቀ ጳጳሱ ፈደዋል” በተባለበት መልክ አንድ ሀገረ ስብከት ወይም አንድ አጥቢያ ብቻውን ቀኖናን በማሻሻል ፈቃድ ሊሰጥ እንደማይችል ነው አብክረው የሚያሳስቡት፡፡ “ወሊሶ ላይ የተደረገው ሕገ ወጥ ነው፤ ቅዱስ ሲኖዶስ ብያኔ ያልሰጠበት ነው” ያሉት ሊቁ ድርጊቱ በቀኖና ቤተ ክርስቲያን ሊወገዝ እንደሚገባው አመልክተዋል፡፡ “የደስታ ስሜት የሚሰጡ ነገሮች ሁሉ መታቀብ አለባቸው፡፡ ሃገራችን ኢትዮጵያ ተጠብቃ የኖረችው በጾሟ፣ በጸሎቷ እና በትሩፋቷ ነው፡፡ ጾምን ብናከብረው ያከብረናል፤ ብንወደው በእግዚአብሔር ዘንድ የተወደድን ያደርገናል፡፡ ዐቢይ ጾም ደግሞ እንደ ስሙ ዐቢይ ነው፡፡ ከሌሎች አጽዋማት ለይተን ልናከብረው ይገባናል፡፡ ጾም ከእህል ከውኃ መከልከል ብቻ አይደለም፤ ትልቁ ነገር የጾሙን ሥርዐት አክብሮ ማስከበር ነው፡፡”

“እነዚህ ሰዎች ለስንት ዘመን ከበሮ ሲመቱ ኖረዋል፤ ስንት ሰው አምጥተዋል?” በማለት የሚጠይቁት ሌሎች መምህራን በበኩላቸው ሎሌው እና ጥቅመኛው ቡድን ለንስሐ የሚያበቃ ስብከትም ይሁን የንስሐ መዝሙር እንደማይሆንላቸው ስለሚያውቁ “ከበሮ ካልተመታ አይሞቅልንም” በሚል ክሕደታቸውን ለማሰራጨት ወቅቱ ስላልፈቀደላቸው የመረጡት የማደናገሪያ ስልት መሆኑን አስገንዝበዋል፡፡ “ወራቱ የኀዘን፣ የዝምታ እና የለሆሳስ እንጂ በከበሮ ፍሥሓ የሚደረግበት አይደለም፤ ሥርዐተ እምነት እና የቅዱስ ሲኖዶስ ብያኔ በአንድ አጥቢያ እና ሀገረ ስብከት ፈቃድ ሊሻሻል አይችልም፡፡ እኒህ ሕገ ወጥ ሰባክያን እና ዘማርያን ነን ባዮች ዛሬ ሥርዐተ ቤተ ክርስቲያንን ጥሰው በጾም ከበሮ በመምታት ‹ሕዝቡን ከመናፍቃን እንጠብቃለን› ካሉን ነገ ‹ጾሙን ሽረን ሕዝቡን እናምጣው› ላለማለታቸው ማረጋገጫ የለም፤ ወትሮስ ቢሆን የመናፍቃኑ ጥፋት ምን ሆነና ነው? ምእመኑን ከሥርዐት ውጭ እያደረጉ ጥበቃ ብሎ ነገር የለም፡፡ ድርጊታቸው ሁሉ ምእመኑን ወደ መናፍቃኑ የመውሰድ እንጂ ምእመኑ ሥርዐተ ቤተ ክርስቲያንን ተምሮ እና አምኖ እንዲጸና አይደለም፡፡”

ሁኔታው በስፋት ከተሰማ በኋላ ብፁዓን ሊቃነ ጳጳሳት ለሕገ ወጦቹ ‹ዘማርያን› እና ‹ሰባክያን› ፈቃድ በሰጡት እና ያለአገባቡ የጾሙ ቀኖና በመጣሱ የተሰማቸውን ኀዘን ገልጸዋል፡፡ ከስብከተ ወንጌል እና ሐዋርያዊ ተልእኮ መምሪያ፣ ከቅድስት ሥላሴ መንፈሳዊ ኮሌጅ አስተዳደር፣ ከአዲስ አበባ ሀገረ ስብከት የስብከተ ወንጌል ክፍል፣  ከማኅበረ ቅዱሳን፣ ከአጥቢያ አብያተ ክርስቲያን አስተዳዳሪዎች እና የስብከተ ወንጌል ሓላፊዎች ጋራ የፀረ-ፕሮቴስታንታዊ-ተሐድሶ-ኑፋቄ ንቅናቄ በመፍጠር ከ12 በላይ የሀገረ ስብከቱ አጥቢያ አብያተ ክርስቲያን ተከታታይ ጉባኤያትን እያካሄዱ የሚገኙት ሰባክያነ ወንጌልም ትላንት በቦሌ ደብረ ምሕረት ቅዱስ ሚካኤል ቤተ ክርስቲያን ባካሄዱት ጉባኤ ድርጊቱን በማጋለጥ ምእመኑ ሕገ ወጦቹን እንዲቋቋማቸው አሳስበዋል፡፡

የኢ/ኦ/ተ/ቤ/ክ ቅዱስ ሲኖዶስ ሕገ ወጥ ሰባክያነ ወንጌልን እና ዘማርያንን በሚመለከት የካቲት 12 ቀን 2001 ዓ.ም ባስተላለፈው ውሳኔ፣ “የየሥራ ዘርፉ እንቅስቃሴ የሚጀመረው በአጥቢያ ቤተ ክርስቲያን ስለሆነ የእያንዳንዱ የአጥቢያ ቤተ ክርስቲያን አስተዳዳሪ የተጣለበትን ሓላፊነት ተገንዝቦ ሕገ ወጦች ፈቃድ ሳይኖራቸው እንዳያስተምሩ የቁጥጥር ተግባሩን በማጠናከር የቤተ ክርስቲያኒቱን ህልውና ከሚፈታተን ተግባር ይጠብቅ ዘንድ” ጥብቅ መመሪያ መስጠቱ ይታወሳል፡፡ የስብከተ ወንጌል እና ሐዋርያዊ ተልእኮ መምሪያ ሓላፊ አባ ኀይለ ማርያም መለሰ መምሪያው በእነ በጋሻው ደሳለኝ ላይ የጣለውን እገዳ እስከ አሁን እንዳላነሣና እግዱን የማስከበር ሓላፊነት የየአህጉረ ስብከቱ ሓላፊዎች እና የአጥቢያ አስተዳደር ተግባር መሆኑን በዚህ ወር ታትሞ ከወጣው ሐምራዊ መጽሔት ቅጽ 4 ቁጥር 44 እትም ጋራ ባካሄዱት ቃለ ምልልስ አስታውቀዋል፡፡

ሕገ ወጦቹ መቀመጫውን በአሜሪካ ባደረገው ሲ.ቢ.ኤስ የቴሌቪዥን ጣቢያ “ታኦሎጎስ” በሚል ስያሜ ለሚያስተላልፉት ፕሮግራም ከመምሪያው ምንም ዐይነት ዕውቅና ሳይሰጣቸው እና በሚዲያ ማገልገል እንደሚችሉ ፈቃድ ሳያገኙ በኢትዮጵያ ኦርቶዶክስ ተዋሕዶ ቤተ ክርስቲያን ስም የአየር ሰዓት ይዘው ፕሮግራም ማስተላለፋቸው እንዳስገረማቸው የመምሪያ ሓላፊው አልሸሸጉም፡፡ ቤተ ክርስቲያን መልእክቷን የሚያስተላልፉ ሰዎችን የዕውቀት፣ የሥነ ምግባር ደረጃ እና ተጠሪነት መኖር አለመኖሩን በቅድሚያ እንደምታጤን የተናገሩት ሓላፊው፣ በጣቢያው ኤዲቲንግ ሳይሠራባቸው እና ሳይጣሩ በሚሠራጩ ዶግማዊ እና ቀኖናዊ ያልሆኑ መልእክቶች ሳቢያ ቅሬታዎች እየተሰሙ መሆኑን ተናግረው ዝግጅቱ ቤተ ክርስቲያንን እንደማይወክል አስታውቀዋል፡፡
“ቤተ ክርስቲያን የምትጓዘው እነሱ በሚሉት እና በመረጡት መንገድ አይደለም፡፡ ምን መስፈርት ማሟላት እንዳለባቸው ተጠርተው ከተነገራቸው በኋላ ቅጽ አዘጋጅተን ሰጥተናቸዋል፡፡ የት እንደተማሩ፣ የት እንዳገለገሉ. . .ወዘተ የመሳሰሉትን የሚጠይቅ ቅጽ እና መታወቂያ አዘጋጅተናል፡፡ በመንፈሳዊ ትምህርት ዲግሪ እና ዲፕሎማ ከሌላቸው ደግሞ በካህናት ማሠልጠኛ የተማሩ እና ከስድስት ዓመት በላይ በሰንበት ት/ቤት ያገለገሉ መሆናቸውን፣ አጥቢያ ቤተ ክርስቲያናቸው የሚታወቅ መሆን እንዳለበትም ተዘርዝሯል፡፡ ከዚህ በኋላ ፈተና ይፈተናሉ፤ የቤተ ክርስቲያኒቱን አቋም በትክክል የሚገልጹ እና የሚያሟሉ ሆነው ሲገኙ ፈቃድ ይሰጣቸዋል፡፡”
ይህን መመዘኛ ወደ ጎን በማለት ከዕውቀት እና ሕጋዊነት ጋራ የተጣሉት እነበጋሻው የመምሪያው የበላይ ሓላፊ ብፁዕ አቡነ ማርቆስ ለ29ው የመንበረ ፓትርያሪክ አጠቃላይ የሰበካ መንፈሳዊ ጉባኤ እንደተናገሩት፣ “ስሙ የማይጠራ ሰባኪ አለ፤ አጥቢያህ የት ነው? አገሩን ሁሉ የምታማሰል፣ የምታሸብር አንተ ማነህ?” ሲባል “የሕዝብ ነኝ” አለ፡፡ “የሕዝብ ነኝ የሚል አንደኛ መንግሥት ሁለተኛ ቃልቻ ነው፤ ለመሆኑ ተመዝግበሃል ወይ? ሲባል ፍጥጥ አለ፤ አፈረ፡፡ ይህንኑ ሁኔታ ለብፁዕ አቡነ ፊልጶስ በደብዳቤ አሳወቅን፡፡ በኋላ ግን በየት እንደገባ፣ በየት እንደሾለከ ሳናወቅ በዚሁ አዳራሽ ሲሾም ሲሸለም [ከፓትርያሪኩ] ዐየን፡፡ እባካችሁ ሥራ አስኪያጆች የምናወጣውን መመሪያ አስከብሩልን፡፡ ይህ ማኅበር [“የቅድስት ማርያም የስብከተ ወንጌል ማኅበር”] አደገኛ ነው፤ መብረቅ ብልጭ ቢል ሰዓሊ ለነ ቅድስት የማይል፤ ፍላጎቱ እና ስሜቱ ገንዘብ ማግኘት ብቻ ነው፡፡”

ብፁዕነታቸው በአጠቃላይ ጉባኤው ላይ ስለእነ በጋሻው የተናገሩትን አባ ኀይለ ማርያም መለሰ በሐምራዊ መጽሔት ቃለ ምልልሳቸው ላይ አጠናክረውታል፡፡ “በተለያየ ምክንያት ወላጆቻቸውን ያጡ ሕፃናትን፣ ጧሪ ቀባሪ የሌላቸውን አረጋውያንንና የመሳሰሉትን ለመርዳት” በሚል በፓትርያሪክ አቡነ ጳውሎስ ፈቃጅነት እና በልዩ ጽ/ቤታቸው ሓላፊ ብፁዕ አቡነ ገሪማ ፊርማ በቁጥር ል/ጽ/103/2002 በቀን 23/02/2002 ዓ.ም በወሰደው ፈቃድ የተቋቋመው “የቅድስት ማርያም የስብከተ ወንጌል ማኅበር” ታኅሣሥ 25 ቀን 2002 ዓ.ም “የገናን ዋዜማ በወንጌል እና በዝማሬ” በሚል በሚሌኒየም አዳራሽ በ30 ብር የመግቢያ ዋጋ ‹ጉባኤ› አዘጋጅቶ ነበር፡፡ ከዚህ ጉባኤ ቀደም ሲል ግን ጉባኤውን ለከተማው ባለጸጎች ለማስተዋወቅ፣ ለስብከተ ወንጌል እና ሐዋርያዊ ተልእኮ መምሪያው “በየክፍለ ሀገሩ ጉባኤ ለማካሄድ የሚያስችል ሞንታርቦ፣ ላንድ ክሩዘር መኪና፣ ድምፅ ማጉያ ለመግዛት” በሚል ሌላ የገቢ ማስገኛ ስብሰባ በሒልተን ሆቴል ጠርቶ ነበር፡፡ በዚህ ስብሰባ እስከ 150‚000 ብር በጥሬ እና በቃል ኪዳን ተገኝቷል፡፡ ለዋናው የሚሌኒየም አዳራሽ ጉባኤ 78‚000 የመግቢያ ትኬቶች እያንዳንዱ በብር 30 ተሸጧል፡፡ 300 የቪ.አይ.ፒ ትኬቶች እያንዳንዳቸው በ300 ብር ተሸጠዋል፡፡ በአጠቃላይ የአዳራሽ ኪራይ እና ሌሎች ወጪዎች በስፖንሰርሽፕ መሸፈናቸው ግምት ውስጥ ሲገባ ቢያንስ ከ3.5 ሚልዮን ብር በላይ እንደተሰበሰበ መገመት ይቻላል፡፡

እስኪ አባ ኀይለ ማርያም ይህን አስመልክቶ ከሐምራዊ መጽሔት ጋራ ያደረጉትን ጥያቄ እና መልስ እንከታተል፤

ሐምራዊ፡- ከአንባብያን የደረሰን ሌላ መረጃም አለ፡፡ “ቅድስት ማርያም የስብከተ ወንጌል ማስፋፊያ ማኅበር” የተሰኘው ማኅበር ከዚህ ቀደም ከእናንተ ፈቃድ አግኝቶ በሚሌኒየም አዳራሽ ጉባኤ አዘጋጅቶ ነበር፡፡ አነሣሡ መልካም የነበረውን ያህል እንቅስቃሴውን ሊቀጥል ያልቻለበት ምክንያቱ ምን ነበር?

አባ ኀይለ ማርያም፡- እንቅስቃሴው መልካም የነበረ ቢሆንም ፍጻሜው ትራጄዲ ነበር፡፡ በዚያን ወቅት እኔና የመምሪያው ሠራተኞች አዲሶች ነበርን፡፡ ፈቃዱ በቀጥታ ከላይ ሲያገኙት ፈቃድ ከማን እንደተሰጣቸው ጠየቅን፤ እኛ ሳናውቅው ጉባኤው መካሄድ የለበትም ብለን ሰፊ ውይይት አካሄድን፡፡ በመጨረሻም ስምምነት አድርገን ፈቃዱን ከጠቅላይ ቤተ ክህነት አግኝተዋል፡፡ ያ ፈቃድ እነርሱ በስብከተ ወንጌል እና ሐዋርያዊ ተልእኮ መምሪያ ሥር እንደሆኑ ቢገልጽም ግልባጭ ግን አልተጻፈልንም፡፡ በኋላ ወደ ስምምነት ስንደርስ በሚሌኒየም አዳራሽ የሚካሄደውን ጉባኤ ስብከተ ወንጌል መምሪያ መቆጣጠር አለበት ተባባልን፡፡

በሚሌኒየሙ አዳራሽ ጉባኤ እኔም ተገኝቻለሁ፡፡ ፕሮግራሙ በመልካም ሁኔታ ተጠናቀቀ፡፡ ገንዘቡ ተሰበሰበ፡፡ “ምን ያህል ገንዘብ እንዳስገባችሁ ሪፖርት አድርጉ” አልናቸው፡፡ የተወሰነውን ከገለጹ በኋላ የተቀረው ሰዎች እጅ ላይ ነው የሚገኘው አሉን፡፡ ብዙ ጠበቅናቸውና በደብዳቤ ጠየቅናቸው፡፡ መልስ አልሰጡንም፡፡ መጨረሻ ላይ ጠፉ፤ ስልካቸውን አጠፉ፤ አድራሻቸውን ሰወሩ፡፡ የባንክ አካውንታቸውን ስላላወቅን መስዘጋት አልቻልንም፡፡ መቼም የሃይማኖት ሰው ይዋሻል ብለን አልጠበቅንም፡፡

ሐምራዊ፡- ጉባኤውን ያዘጋጀው ማኅበር 900‚000 ብር ለእናንተ ማስገባቱ ነበር በሚዲያ ጭምር የተነገረው. . .

አባ ኀይለ ማርያም፡- ለማን ነው ያስገቡት?

ሐምራዊ፡- ለስብከተ ወንጌል እና ሐዋርያዊ ተልእኮ መመሪያ ማስገባታቸውን ነበር የሰማነው. . .

አባ ኀይለ ማርያም፡- በፍጹም! እኛ ጋራ ሠባራ ሳንቲም ገቢ አልሆነም፡፡ ጠይቀን፣ ጠይቀን በመጨረሻ ጠፉብን!፤. . .ተሰወሩ፡፡ የፕሮግራሙ አዘጋጆች ወጣት ባለሃብቶች እና የንግዱ ማኅበረሰብ አባላት መሆናቸውን ነበር በጽሑፍ ያገኘነው መረጃ የሚጠቁመው፡፡

ሐምራዊ፡- እና እነዚህ ባለሃብቶች ከጉባኤው የሰበሰቡትን ገንዘብ በሙሉ ይዘው ተሰወሩ ነው የሚሉን?

አባ ኀይለ ማርያም፡- ምንም ያስገቡት ገንዘብ የለም፡፡

ቤተ ክርስቲያንን በዚህ መልኩ የንግድ ማእከል በማድረግ ጥቅሙን እያሳደደ ወዲያውም ደግሞ ከተሐድሶ መናፍቃን ጋራ ተሳስሮ እና ተመጋግቦ በአሽከርነት የሚያገለግለው ይኸው ቡድን በቅርቡ በኀያል መንፈሳዊ ወኔ እየተቀጣጠለ በሚገኘው የፀረ-ፕሮቴስታንታዊ-ተሐድሶ-ኑፋቄ ንቅናቄ በወሳኝ መልኩ እየተመታ ገኛል፡፡ አንዳንድ አባላቱም በንቅናቄው ተማርከው የውግንና እና የአሰላለፍ ለውጥ እያደረጉ ናቸው፤ በወላዋይነት የሚያመነቱም አልታጡም፡፡ ከ‹80›ዎቹ አንዱ ሊሆኑ እንደሚችሉ ስጋት ከገባቸው አንዳንዶቹ ለንቅናቄው ግንባር ቀደም አባላት አማላጅ ሲልኩ አንዳንዶቹም ችግሩን በመካድ ጥረቱን ጥላት ለመቀባት በየመድረኩ እየተወራጩ ይገኛሉ፡፡ ለሁለቱም የሚበጃቸው ግን ለቡድናዊ ጥቅማቸው እና ለግል ዝናቸው ሳይሆን ለኅሊናቸው እውነት ማደር ነው፡፡ 

በዚህ ሐተታዊ ዜና የተዘረዘረው ዐውደ ምሕረት የወጣ የቀሪው ጭፍራ ድርጊት ግን የቀቢጸ ተስፋ ነውና እርሱን የማጋለጥ እንቅስቃሴ በማጠናከር ለማሟሸሽ አልያም ለይቶለት አባቱ እና እናቱ ወደሆነው የፕሮቴስታንት ጎራ እንዲቀላቀል ለማድረግ የተጀመረው የአርቲስቶቹ “ማኅበረ ላሊበላ” (የእነ ፍረ ሕይወት መለሰ፣ ሽመልስ አበራ፣ ካሌብ ዋለልኝ፣ ዋስይሁን ንጋቱ፣ ዳንኤል፣ እስጢፋኖስ እና ሌሎችም “ተዋሕዶ” የተሰኘ ልጅ ዐዋቂውን በእንባ ያራጨ መንፈሳዊ ድራማ)፣ የመዝሙር ቤቶቹ የቪሲዲ ኅትመት (የማኅበረ ቅዱሳን ኦዲዮ ቪዥዋል የዲያቆን ዓባይነህ ካሴን “ውኃ የሌላቸው ምንጮች” የመምህር ዘመድኩን በቀለ ጌልጌላ መዝሙር ቤት የዲያቆን ዳንኤል ክብረትን “የገሃነም ደጆች” እንዳሳተመው በቀጣይም “አርማጌዶን ቁጥር ሁለት” ለማሳተም እንደተዘጋጀው)፣ በመንበረ ፓትርያሪክ ቅድስተ ቅዱሳን ማርያም ገዳም በመምህር ዳንኤል ግርማ ሰብሳቢነት በመምህር ሱራፌል ወንድሙ ፀሓፊነት እየተሰበሰቡ የመድረክ ውሏቸውን ያለ ምሕረት በመገምገም፣ ቀጣይ ስምሪቶችን በማቀድ የሚተጋው የሰባክያኑ (መ/ር መኮንን ደስታ፣ መ/ር ተስፋዬ ሞሲሳ፣ መ/ር በላይ ወርቁ፣ መ/ር ዳዊት ጥበቡ፣ መ/ር ታዴዎስ ግርማ፣ መ/ር ወንድወሰን መገርሳ፣ መ/ር አስቻለው ከበደ፣ መ/ር ዘመድኩን በቀለ፣ መጋቤ ብሉይ ዓምደ ወርቅ፣ መ/ር ኅብረት የሺጥላ፣ መ/ር ኀይሉ ጉተታ፣ መ/ር ቀለም ወርቅ፣ መ/ር ንጉሡ፣ መ/ር ምሕረተአብ አሰፋ፣ መ/ር ዮናስ ፍቅረመ/ር ፈቃዱ አረጋ፣ ባሕታዊ ሶፎንያስ፣ መ/ር ጳውሎስ መልክአ ሥላሴ፣ መ/ር ዘኤልያስ ወልደሚካኤል፣ መ/ር ዳንኤል ክብረት፣ መ/ር ታደሰ ወርቁ፣ መ/ር ያረጋል አበጋዝ፣ መ/ር ዘማሪ ኤርሚያስ አሰፋ) ጥምረት፣ የነገረ መለኮት ምሩቃን ማኅበር እገዛ እና የተቋማቱ ሁሉ ትብብር ቀጥሎ በአስተዳዳራዊ እና ቀኖናዊ ርምጃ ሊታገዝ ይገባል፡፡ ከአሜሪካ ዘማሪ ወንድወሰን በቀለ እና ዘማሪት ፋንቱ ወልዴ፣ ከአገር ቤት ወ/ሮ ዘውዴ ገብረ እግዚአብሔር፣ ወ/ሮ ሓዳስ እና መ/ር ዳንኤል ክብረት ጥረቱን በገንዘባቸው ጭምር ረድተዋል፡፡

በአሁኑ ወቅት ምእመኑ የኢትዮጵያ ቤተ ክርስቲያንን አዳክሞ ለመውረስ ወይም ከፍሎ ለመረከብ የተወጠነው ሤራ በየመድረኩ በሚገለጽበት ወቅት ሌላ ነጋሪ ወይም አስታዋሽ ሳያስፈልገው የሤራውን አስፈጻሚዎች በራሱ ትንተና በስም ዝርዝር ሳይቀር ወደሚለይበት መደምደሚያ፣ የስብከተ ወንጌል ሓላፊዎች ትክክለኛውን መምህር ብቻ እንዲመድቡ ወደሚጠይቅበት ንቃት፣ ሕገ ወጥ ሰባክያንን እና ዘማርያንን ከየመድረኩ ወደሚያባርርበት ቁርጠኝነት ተሸጋግሯል፤ በቅርቡ በገርጂ ቅዱስ ጊዮርጊስ በያሬድ አደመ፣ በናዝሬት እግዚአብሔር አብ በአሰግድ ሣህሉ ላይ የወሰዳቸው የማባረር ርምጃዎች ቀናዒው ምእመን የሚሰጡትን መረጃዎች ከራሱ ጋራ አዋሕዶ የተግባር መመሪያው ማድረግ መጀመሩን አመላካች ነው፡፡ ጥንቱንም በኅሊናው ጓዳ በልቡናው ሰሌዳ የተቀረጸለትን የቀናውን የአባቶቹን ሃይማኖት ገላልጦ እንዲሞቀው የሚያደርጉትን ደገኛ መምህራን ከመድረኩ ግርጌ ጠብቆ ግንባራቸውን ይስማል፡፡ “ይህ ሁሉ እየተፈጸመ እስከዛሬ የት ነበርን?” በሚል ቁጭቱን፣ “መርሐ ግብሩ እንዲህ እንዳማረበት ይቀጥል ይሆን?” በማለት ስጋቱን ይገልጻል፤ “ቸብ ቸብ አድርጉ፤ እጃችሁኝ አውጡ እየተባልን ቢዝነስ ሲሠራብን ኖረናል፤ ቤተ ክርስቲያን እውነተኛውን ከአስመሳዩ እንድትለይልን አሳስቡልን” በማለት የአደራ መልእክቱን ያስተላልፋል፡፡ ከዚህም በላይ ጥረቱን በምን እናግዝ በማለት በገንዘቡ፣ በጉልበቱ አስተዋፅኦ ሊያደርግ ከንቅናቄው ጎን ተሰልፏል፡፡

ከአገልጋዮችም መካከል አንዱ የሐዲስ ኪዳን መምህር እንዲህ ብለዋል - “ውሻ ተነክሼ ቁራሽ ለምኜ ተምሬ መጋቤ ሐዲስ የተባልሁበትን ማንም በሜዳ ሲጠራበት አፍሬበት ነበር፡፡ እግዚአብሔር ይስጣችሁ አሁን አንገቴን ቀና እንዳደርግ፣ ቦታ እንዳገኝ አደረጋችሁኝ፡፡ ምነው ጌታ፣ ነጋዴዎቹን በጅራፍ ከመቅደስህ አስወጥተህ ከሓዲዎቹን ዝም አልሃቸው?”

የቤተ ክርስቲያናችን ከፍተኛ አስተዳደር ለዚህ ዐይነቱ መተባበር ተገቢውን የበላይ አመራር በመስጠት ለውጤት እንዲያበቃው ይጠበቃል፡፡  

ጨው ለራስህ ስትል ጣፍጥ …. 

ቸር ወሬ ያሰማን፣ አሜን

55 comments:

Anonymous said...

Zenaw ybetakristiyanin sirat lamastabaqi ymidaragawn hulu silasayen amasaginalhu

betely simachew beteterw ena lelochim enqu y menfasawi kollege miruqan korahu!halafinatu katasatachew bizu endamisaru tesfa alen

balafew zenachu lay enatem bjimlaw satataru sim matfatachu qir ymiyasegne new!

mesekere said...

ደጀሰላማውያን ስለቤተክርስቲያናችን እየተከታተላችሁ ለምታሰሙን ዜና በርቱ:: በደጀሰላም ካልሰማነው ችግሩ መኖሩን እንኳን አናውቅም ነበረ ምንም እንኳን በጎ ዘመን አምጣልን ብሎ ከመጸለይ ሌላ ማድረግ ባንችልም:: ሁሉም ሰው ቤተክርስቲያን በአሁኑ ወቅት ላለችበት ችግር ዋነኛው መንስሔ ቤተክርስቲያንን ለመምራት ሀላፊነት የወሰዱ አባቶች በቅዱስ ሲኖዶስ ውሳኔ ሳይሆን በማን አለበኝበት በሚሰሩት ስራ እንደሆነ ግልጽ ነው:: በጋሻው እና ጋደኞቹ በቤተክርስቲያን መድረክ ላይ የሚፈነጩት ከላይ ያሉት አይዛችሁ ግፉበት እኛ አለን እየተባሉ እንጂ እንደው በራሳቸው ብቻ አይመስለኝም:: መድሃኒአለም ምህረቱን ያድለን::

Anonymous said...

May God protect us all with His mercy!

zkidus said...

zkidus


የፕሮቴስታተሐድሶን-የማጋለጥ እንቅስቃሴ በማጠናከር ለማሟሸሽ አልያም ለይቶለት አባቱ እና እናቱ ወደሆነው የፕሮቴስታንት ጎራ እንዲቀላቀል ለማድረግ የተጀመረውን ትግል10ወር በተከታታይ የታገለው የሐዋሳ ከተማ ምእመን ሐገር አቀፍ አደረጀጀት እንዲፈጠር በማለት የአደራ መልእክቱን ያስተላልፋል፡፡

Anonymous said...

ይገርማል!! አማርኛም አልተማሩም እንዴ!!! አማርኛ ጠፍቶ ነው እንቀውጠው፡፡ለነገሩ አሁን በአዲስ አበባ አድባራት እየተሰጡ ያሉ ትምህርቶች እጅግ ያስደስታሉ፡፡ለምሳሌ በመርካቶ ቅ/ራጉኤል ከየካቲት 29 እስከ መጋቢት አንድ የተሰጠው ትምህርት በጣም ያስደስት ነበር፤ የእነዚህን የመናፍቃንን ርዝራዦችን ምስጢር ያጋለጠ ነበር፤ ሁሉም አድባራት ይህንን እንቅስቃሴ ማጠናከር አለባቸው፡፡

Anonymous said...

enen gira yegebagne neger tadiso khonu lmin yisabikalu? lemn altakalaklm? zenw lik aydelm ways?
knsu ymimarew hizbm thadiso hone maltko new aydel.

deje selam bitimalsulugne

getachew said...

የፕሮቴስታተሐድሶን-የማጋለጥ እንቅስቃሴ በማጠናከር ለማሟሸሽ አልያም ለይቶለት አባቱ እና እናቱ ወደሆነው የፕሮቴስታንት ጎራ እንዲቀላቀል ለማድረግ የተጀመረውን ትግል 10 ወር በተከታታይ የታገለው የሐዋሳ ከተማ ምእመን ሐገር አቀፍ አደረጀጀት እንዲፈጠር በማለት የአደራ መልእክቱን ያስተላልፋል፡፡

Anonymous said...

You said this,
'የኢትዮጵያ ቤተ ክርስቲያንን አዳክሞ ለመውረስ ወይም ከፍሎ ለመረከብ'
According to your news the southern part of Eth. is almost divide as you said if these guys are thadiso.but i don't think what you said is true cos the higher leaders kept silent...

Anonymous said...

Hi!It it is for sure these guys did what is should not be done in Hudadie but instead of telling them not to do it again and give them Kenona, you talk about it in public, i know they did great job in Wolliso where the people are being confused and harassed by the protestans, you guys did not report what happened a years ago in Wollisso but now you just exagerate things and blame everyone, these guys are still our people so do not throw them out to the dogs. you guys are not from Deje Selam but fro Deje Rebsha

Anonymous said...

dejeselam
ቤተ ክርስቲያናችን የሥርዐት ቤት ስለሆነች yemilew ababal algebagnim?

Anonymous said...

LIK YEZARE AMET 'ZEMARIT ZERFE'BE WOLAYITA SODO AKABABI LALE GETER BETECHRISTIAN LEGUBAE SITGABEZ KEBERO ENDIMETA ASFEKIDUNA EMETALEHU BELA NEBER,LIK BEAMETU TESAKALAT?GID YELACHIHUM ENEZIH SEWOCH GIZACHEW DERSUAL.

Anonymous said...

የሁለቱ ግለሰቦች (አቡነ ሳዊሮስና በጋሻው) ግንኙነት የዛሬ አይደለም፡፡ የወሊሶው አይነት ዘመቻም የዛሬ አይደለም፡፡ ልክ የዛሬ ሁለት አመት በነጌሌ ቦረና ከተማ ተክለሃይማኖት ቤተክርስቲያን በተመሳሳይ መልኩ ሲጨፍሩና ሲያስጨፍሩ ህዝቡ አቤት ቢልም አቡነ ሳዊሮስ የትርምሱ ፈቃጅና አስተባባሪ ሆነው አልፈዋል፡፡

ነገሩ የተበላሸው በድቁና ዘመናቸው ከጋብቻ በፊት ‘ፍሬ ያፈሩ’ ናቸው ተብሎ የሚታሙ ‘ባለአሰኬማዎችን’ ማየት ስንጀምር ነው፡፡ ታዲያ እነዚሁ ሰዎች ዛሬ አንዳቸው ለሚስጥር ሌላኛው ለቢዝነስ የትርምስ ግንባር ፈጥረው ማየት ለኔ ምኔም አይደለም፡፡

እግዚአብሄር የተሸለውን ይላክልን፡፡

A2ከመቀሌ said...

“ሰው እንዴት በራሱ ላይ እሳትን ያነዳል? …”
‘ለሰዎች ማሰናከያን የሚያደርግ ሁሉ ወዮለት፤ በአንገቱ የወፍጮ መጂ ታስሮ ወደ ጥልቁ ባህር ቢወረወር ይሻለው ነበር…’ አይደል የሚለው የእግዚአብሔር ቃል።
እግዚአብሔር ማስተዋሉን ይስጣቸው…

"A2" ከመቀሌ said...

“ሰው እንዴት በራሱ ላይ እሳትን ያነዳል? …”
‘ለሰዎች ማሰናከያን የሚያደርግ ሁሉ ወዮለት፤ በአንገቱ የወፍጮ መጂ ታስሮ ወደ ጥልቁ ባህር ቢወረወር ይሻለው ነበር…’ አይደል የሚለው የእግዚአብሔር ቃል።
እግዚአብሔር ማስተዋሉን ይስጣቸው…

Anonymous said...

deje selam, tsome lay nachu?

Now I doubt you are doing for the church of Twahido. Why you disturbing us in this great lent? We have to pray and fast and we should see the result.
Like politicians don’t report to us each and every thing of your personal issues with different individuals. Please make clear your aim for the church and believers because all what you said is now contradicted each other.

Anonymous said...

ከዚህ በላይ የደጀሰላምን በመኮነን ተደጋጋሚ አስተያየት ለሰጣችሁ...

ምንም እንኳ አሁንም ልባችን ውስጥ ባለው ጠማምነት የተነሳ ግልጽ ባይሆንልንም ጾምን(በተለይም ዐቢይ ጾምን) በተመለከተ የቤተ ክርስቲያን አስተምህሮ ምን እንደሆነ ከርዕሰ ጉዳይዋ በማስቀደም ደጀ ሰላም ሊቃውንትን በመጠየቅ ጥርት ባለ ተዋህዷዊ ለዛ ያቀረበች ይመስለኛል:: ይህንን አስተምህሮ አልቀበልም ማለትና ድርጊቱን የፈጸሙትን ግለሰቦች መደገፍ የተለያዩና ሊጠሩ የሚገባቸው ጉዳዮች ናቸው:: ሰዎቹ ለምን ተነኩብን ከሆነ የደጋፊነት አጀንዳ ስለሆነ በዚህ ብሎግ እንደአስተያየት መጻፍ የለበትም ባይ ነኝ:: ነገር ግን ደጀ ሰላም የፃፈችው እምነት ስህተት ካለበት አመክንዮአችሁን ፃፉና በእነዚያ ላይ ብንከራከር አዋቂነት ብሎም ጊዜአችንና ብሎጓንም በአግባቡ መጠቀም ይመስለኛል::

የማዝነው ግን ዛሬ እጅግ በጣም አዋቂ የለበትም በምትሏትና ጠረፍ ላይ ባለች ሰንበት ት/ቤት አባላት እንኳ የማትሻር ሥርዓት "በጣም ትልቅ ብሎም መጋቤ ሀዲስ" ብላችሁ በምታመልኩት አንድ ሰው አላዋቂነት ወይም ኑፋቄ የቤተ ክርስቲያን ሥርዓት መናዱን ነው::

አንድ ወዳጄ "አማርኛ ጠፍቶባቸው ነው ወይ እንቀውጠው መባሉ?" ላልከው ግን አትፍረድ:: ይህን ባይዋ ግለሰብ ከአባቶቿ እግር ሥር ቁጭ ብላ: በትምህርተ ቤተ ክርስቲያን በልጽጋ: ዓለማዊ ጉሮሮዋን በመንፈሳዊ ምስጋና ሞርዳ: ማኅሌታይ እንደሆኑ ዘማርያን ሊቃውንት የቅዳሴ ጠበሉን ጠጥታ: እጣኑንም አሽትታ ወደአደባባይ መውጣት ሲገባት እነ በጋሻው በቀጥታ ከጭፈራ መድረክ ተቀብለው ወደ ሙዚቃ መሰል የመዝሙር መድረክ አስተላለፏት:: ከእነሱ የምትሰማው አነጋገር በተዋህዷዊ ለዛ ያልታሸ የምታደምጠው ዜማ ከያሬድ ጣዕመ ዜማ ይልቅ ያው ድሮ ለምታውቀው ሙዚቃ እጅግ የቀረበ ነበርና ከየት ታምጣው?

ለማንኛውም ፈጣሪያችን ኢየሱስ ክርስቶስ ዛሬም ቤቱን እንዲያጸዳልን ሁላችንም እንፀልይ::

ላእከ ማርያም
ባህር ዳር

ZHAWASSA said...

ተሐድሶን-የማጋለጥ እንቅስቃሴ ለማጠናከር የተጀመረውን ትግል10ወር በተከታታይ የታገለው የሐዋሳ ከተማ ምእመን ሐገር አቀፍ አደረጀጀት እንዲፈጠር በማለት የአደራ መልእክቱን ያስተላልፋል፡፡

lemma kefyalew said...

አሁንስ የምለውም አጣሁ!!!
ብቻ እግዚአብሔርን በተስፋ መጠበቅ ነው።

Anonymous said...

Even if what the "tihadoss" are doing is worying, am proud of what the true kids of EOTC are doing. We all were in a real deap sleep and the case make us to wake up. My God bless what the preachers association is doing and keep our church strong and united.

Thank you degeselamaweyan. kalehiwot yasemalign

w/medin said...

አይ እግዚሃብሄር!!!! አሁንስ ይች ቤ/ክ እናት የሌላት ልጅ መሰለች ፡፡ ሕግና ስርዓት እንደሌላት የማንም መፈንጫ ስትሆን ሲኖዶስ ምን እንደሚሰራ ነው የማይገባኝ!! መቼም አባት የላት !!!የነዚህ ሰዎች አላማ ግልፅ ነው እንደራሳቸው ባዶ አዳራሽ ቤ/ክ ባዶ ማድረግ ነው ፡፡ እባካቹ ክርስትያኖች መቃወም ከኛ ይጀመር ምዕመኑ ካልተቀበላቸው ምንም ማድረግ አይችሉም አባቶችና ሌሎች የሚመለከታቸው ሁሉ ማን አዚም እንዳደረገባቸው እግዚሃብሄር ይወቅ!!!!አይ በጋሻው ልቡ ይስጥህ ለጥፋት ይህንን ያህል መራወጥህ

gebremariam said...

ቤተ ክርስቲያናችን የሥርዐት ቤት ስለሆነች malet hulum neger besireatna behig yihun endil negerochin besireatna behig yemitakenawin malet new. tiru yemegabe hadis ababal betam tikikil new shumet beewketna besine migbar weyis beagura zelelinet?algebagnim? shumet yemisetut abatochis min aytew yesetuachew? leagura zelelochu malet new.
GOD BLESS ETH AND EOTC

Anonymous said...

Dear Brothers and Sisters!
Should we call a person or group of persons that has not fully respected the canon of EOTC with regard tos ongs Tehadiso? Should we call the "senodos in exile" that also did not respect the canon in some aspects Tehadiso? Aren't we not pushing them to the Protestant Camp?
Shall we not be polite and merciful to our brothers and sisters?

Daniel Mirach said...

የቤትህ ቅናት እንደ እሳት አቃጠለኝ::
ጌታ ሆይ የማይታየው ረቂቁ ጂራፍህ
ሁሌም በቤትህ እንዳለ እናምናለን::
እኛ ደካሞች ነን: አንተ ተዋጋልን::

ኑ: እንስገድ ለእርሱም እንገዛ:
በእርሱ በፈጠረን በእግዚአብሔር ፊት እናልቅስ:
እርሱ አምላካችን ነውና::

ጥኡመ ልሳን ያረድ ና ከኛ ጋራ
ጾመ ድጓህን አድርስ::

ድሮ ሰባኬ ወንጌልና መዘምር የሚኮነው
ከቤት ወጥቶ ተሰዶ: አቁፋዳ ተይዞ
በእንተ ስማ ለማርያም ተብሎ
በቆሮንቶስ ገዳም ፈተና አልፎ ነበረ::
አቤት አሁንማ ሁሉም አለቃ: ሁሉም መምህር....

ምንም እንኳ የሚያደናግር ቢባዛ:
ክርስትናና ዓለም: አንዱ ወደ አንዱ እንዳይሄድ
በመሃል ትልቅ ገደል አለ::

በሌሎች ስንፍና ምእመናንም እንዳንፈተን
ሁሌም "ቤቴ የጸሎት ቤት ይባላል: እናንተ ግን
የወንበዴዎች ዋሻ አደረጋችሁአት" የሚለውን
እያሰብን መምህራኖቻችንን ለይተን እንወቅ: በእነርሱ
ስር ብቻ ቁጭ ብለንም እንማር::
ካህናትም (ጳጳሳት: ቀሳውስት: ዲያቆናት) የጠባቂነትና የመምህርነት ኃላፊነታችን
መወጣት ያለብን ጊዘ ነው::

ጌታ ሆይ ቤተ ክርስቲያንህን እስከ ዳግም መምጣትህን ጠብቃት:: አሜን:

fkre said...

በወቅቱ እኔ ነበርኩ የተደረገውንም አይቻለሁ ቀኖና እንጂ ዶግማ አይደል ? ምን ችግር አለ? ምን አለ ባናካብደው .......

Tewahedo said...

In the name of the Holy Trinity One God Amen!

We always have to adher what our fathers say. I am not as such biased by what you write because the church in which I was going years before use kebero during lent for major feasts. And this is to make the feast more colourous.

Cannon is how to practice our religion. It is not religion by itself don't be like pharasis. For sure if we have to keep our people in the church, I recommend our chuch to see its cannon every time and make up to date to go with the society like the Copts.


God Bless Orthodoxy Forever Amen!

Tewahedo said...

In the name of the Holy Trinity One God Amen!

We always have to adher what our fathers say like what Aba Haile Mariam Said. But still I have a comment for some of the people who lack knowledge of bible and the orthodox church teaching.

In the real world the church has been using Kebero during lent for major feasts. And it is to make the feast more colourfull.

It is a cannon which can be modified based on the need. Cannon is how to practice our religion. It is not religion by itself. For sure if we have to keep our people in the church, I recommend our chuch to see its cannon every time and make up to date to go with the society like the Copts.


God Bless Orthodoxy Forever Amen!

teddy said...

ዶግማ አይደለም እያልን ከብ/ክ ሥርዓት መራቅ ለነጣቀዊ ተኩላ እራስን መስጠት ነው ፡፡ ሐዋርያ ቅዱስ ጳውሎስ በ2ኛ ተሰ.3÷7 ወንድሞች ሆይ ከእኛ እንደ ተቀበለው ወግ ሳይሆን ያለ ሥርዓት ከሚሄዱ ወንድሞች ሁሉ ትለዩ ዘንድ ዘንድ በጌታችን በኢየሱስ ክርስቶስ ስም እናዛችኋለን፡፡ ሐዋርያው ከኛ የተቀበለው መጽሐፍ ቅዱስ አይደለም ወግ ነው ያሉት ይህም ቱፊት ሥርዓት ማለት ነው ስለዚህ ከሥርዓት ከተለዩ ወንድሞች ልንለይና ይገባል ፡፡ የአባቶቻችን የከበረ በረከታቸው ድል የማትነሳ ረድኤታቸው እንከን ጥርጥር የሌለባት ኦርቶዶክሳዊ ተዋህዶ ሃይማኖታቸው ከእኛ ጋር ትሁን አገራችን ኢትዮጲያ ከመናፍቃን ትምህርት ከካሀዲን ሰይፍ ትጠብቅልን፡፡

Anonymous said...

ዶግማ አይደለም እያልን ከብ/ክ ሥርዓት መራቅ ለነጣቀዊ ተኩላ እራስን መስጠት ነው ፡፡ ሐዋርያ ቅዱስ ጳውሎስ በ2ኛ ተሰ.3÷7 ወንድሞች ሆይ ከእኛ እንደ ተቀበለው ወግ ሳይሆን ያለ ሥርዓት ከሚሄዱ ወንድሞች ሁሉ ትለዩ ዘንድ ዘንድ በጌታችን በኢየሱስ ክርስቶስ ስም እናዛችኋለን፡፡ ሐዋርያው ከኛ የተቀበለው መጽሐፍ ቅዱስ አይደለም ወግ ነው ያሉት ይህም ቱፊት ሥርዓት ማለት ነው ስለዚህ ከሥርዓት ከተለዩ ወንድሞች ልንለይና ይገባል ፡፡ የአባቶቻችን የከበረ በረከታቸው ድል የማትነሳ ረድኤታቸው እንከን ጥርጥር የሌለባት ኦርቶዶክሳዊ ተዋህዶ ሃይማኖታቸው ከእኛ ጋር ትሁን አገራችን ኢትዮጲያ ከመናፍቃን ትምህርት ከካሀዲን ሰይፍ ትጠብቅልን፡፡

Anonymous said...

ወሬ ማብዛት ብቻ!!ተሃድሶ፤ካቶሊክ፤ጴንጤ ምናምን ማለት ምን ዋጋ አለው? እስኪ ልብ ካላችሁ መበለት እጅጋየሁንና የዕውቀት መጢቃ ጋሻውን ያሰማራውን ነጭ ለባሽ ግን ስራው ጥቁሩን ሰውዬ አስወግዱ!! ግንዱን መጣል ሲያቅታችሁ ቅርንጫፉ ላይ ትንጫጫላችሁ። አንዱ ቅርንጫፍ ቢቆረጥ ግንዱ ካለ ሌላ ቅርንጫፍ የማይወጣ ይመስላችኋል?

Anonymous said...

ወሬ ማብዛት ብቻ!!ተሃድሶ፤ካቶሊክ፤ጴንጤ ምናምን ማለት ምን ዋጋ አለው? እስኪ ልብ ካላችሁ መበለት እጅጋየሁንና የዕውቀት መጢቃ ጋሻውን ያሰማራውን ነጭ ለባሽ ግን ስራው ጥቁሩን ሰውዬ አስወግዱ!! ግንዱን መጣል ሲያቅታችሁ ቅርንጫፉ ላይ ትንጫጫላችሁ። አንዱ ቅርንጫፍ ቢቆረጥ ግንዱ ካለ ሌላ ቅርንጫፍ የማይወጣ ይመስላችኋል?

Anonymous said...

"""...በመንበረ ፓትርያሪክ ቅድስተ ቅዱሳን ማርያም ገዳም በመምህር ዳንኤል ግርማ ሰብሳቢነት በመምህር ሱራፌል ወንድሙ ፀሓፊነት እየተሰበሰቡ የመድረክ ውሏቸውን ያለ ምሕረት በመገምገም፣ ቀጣይ ስምሪቶችን በማቀድ የሚተጋው የሰባክያኑ ጥምረት፣....... የነገረ መለኮት ምሩቃን ማኅበር እገዛ እና የተቋማቱ ሁሉ ትብብር ቀጥሎ በአስተዳዳራዊ እና ቀኖናዊ ርምጃ ሊታገዝ ይገባል፡፡ ከአሜሪካ ዘማሪ ወንድወሰን በቀለ እና ዘማሪት ፋንቱ ወልዴ፣ ከአገር ቤት ወ/ሮ ዘውዴ ገብረ እግዚአብሔር፣ ወ/ሮ ሓዳስ እና መ/ር ዳንኤል ክብረት ጥረቱን በገንዘባቸው ጭምር ረድተዋል፡፡"""
ደጀሰላሞች ስለዜናው እግዚአብሄር ይስጣችሁ ተስፋ ሰጪ አስደሳች ዜና ነው፡ ለኔ ከነበጋሻው ሰይጣናዊው ትርምስ የእውነተኞቹ አገልጋዮች ትብብር አስደንቆኛል። ሰይጣን ምን ያህል ቢያናፋ የጌታ ምህረትን አያክልም አይደል። አንዳንዴ ገብርኤል ምንአለ የሰይፉን ጫፍ ብቅ ቢያደርግ ልል እልና ወዲው ደግሞ የራሴን ሀጥያት አስታውስና እና በጌታ ምህረት ቀጥ ብዬ መቆሜን አስብ እና እንደፈቃድህ ይሁን ብዬ ዝም እላለሁ።

ለቤተክርስትያን እድገት ለተዋህዶ የምናስብ ስለ ስርአተቤተክርስትያን የምንቆረቆር ይህንን የሰባክያኑን የዘማሪዎቹንና ባጠቃላይ የትጉህ አገልጋዮችን ጥረት መደገፍ አለብን በምንችለው ሁሉ። በቤተክርስቲያናችን ስርአት መሰረት ትምህርተ ወንጌሉን አገልጋዮች በሁሉም ቦታዎች በእኩል ማዳረስ ቢችሉ ሀሰተኞች ቦታ አይኖራቸውም ህዝቡም እውነትና ሀሰት መለየት ይቀለዋል ስለዚህ የተጀመረውን ስራ ለማገዝ ሁሉም ባለው ይራዳ አንድ ክፍል ይፈጠርና አስተባብሩን እኔ ይሄንን ስራ የሚያግዝ እንደነ ዘማሪት ፋንቱ ወልዴ እንደነ መምህር ዲ.ዳንኤል ክብረትና እንደሌሎቹ ወንድም እህቶቼ የምችለውን ያቅሜን በገንዘብ እረዳለሁ በየወሩም ቢሆን፡ እዚህ አሜሪካና ሌሎቹም ክፍለ ዓለማት ስለቤተክርስቲያን የሚያለቅሱ ብዙዎች አሉና እባካችሁ ግንኙነት ይኑር የሚታይ ነገር ይፈጠር ኑና አስተባብሩን በየቦታውም ዙሩ ከበረከቱ ይድረሰን ክፉዎቹ ቤተክርስቲያን ያላትን የታመቀ ሃይል ያውቃሉ ቀምሰዋልም ወጭት ሰባሪ ሆነው የትንቢት መፈፀሚያ ሲያደርጋቸው እንጂ ብዙ እምቅ ሀይል እንዳለ ነገር ግን ጊዜ ጠብቀው ያለውን ልዩነት ተረድተው ለመበተን ነውና በመተባበር እንንቃባቸው። ብዙ እድል ያለን እኛ ነን የብሉይ፣ የሀዲስ ትርጓሜው፣ የሊቃውንቱ መፅሀፍት፣ ቅኔው፣ ያሬዳዊ ዜማው፣... መድረኩ፣ ሊቃውንቱ፣ ገዳማቱ፣ አባቶቻችን፣ ቅን ትጉ አገልጋዮች፣ አማኝ የዋህ ምእመናን...የቤተክርስቲያንን ሀብት መዘርዘር በኔ አያምርም እንጂ ያለን እግዚአብሔር የሰጠን ፀጋ ብዙ ነውና ባለን ተጠቅመን ቤተክርስቲያናችንን እናድን እንተባበር ግርግሩን አዲስ አበባ፣ አዋሳ፣ ድሬዳዋ፣ ወሊሶ... እየተፈነጣጠሩ ማድረጋቸው አውቀው አይመስላችሁም አንድምታ ያለው ክፉ አላማ ነገሩ ባለቤቱን የተማመነ በግ ላቱን ውጭ ያሳድራል መሆኑ ነው ይሁን እስከጊዜው፡ በኔ እድሜ ህዝብ ለማንጋጋት ባህታዊ ገብረመስቀልን የሚያክል የለምና መክሰም አይቀርም ውድቀታቸው ይለያይ እንደሆነ እንጂ። ዋናው መልእክቴ የተዋህዶ ልጆች እንተባበር ልምድ ያላችሁ ወንድም እህቶች አስተባብሩን ነው። ሰላም ሁኑ። ደጀሰላሞች ስለዚህ ደግ ዜናችሁ እግዚአብሔር ይስጣቸሁ። የተዋህዶ ልጅ ነኝ ከዳላስ።

Anonymous said...

እስኪ ሁላችንም በአካባቢያችን ያለውን ስርአተ ቤተክርስቲያን በሚያዘው መሰረት የሚፈፀመውን አገልግሎት እናጢን ምን ችግር አለው በህብረት በፍቅር ሲደረግ ፍፁም መንፈሳዊ አይደለም? እነዚህ ሰዎች ድብቅ አላማ ስውር እምነት ከሌላቸው በስተቀር የቤተክርስቲያን ስርአት ከሚፈቅደው ውጭ በመሄድ የአምልኮውን ቦታ ለምን ማወክ ላይ ይተጋሉ ቤተክርስቲያናችን የምንደሰትበትም፣ የንስሀና፣ የምናዝንበት፣ የፆም፣ የፀሎት ጊዜ ይኑረን በማለቷ መታዘዝ ለምን አልፈለጉም። በኛ ቤተክርስቲያን ከበሮ መምቻ ጊዜ መቼ አነሰና ነው። ልዩነት ለመፍጠር፣ ህዝቡን ቡድን ፈጥሮ ለማጨቃጨቅ የንስሀውን ጊዜ ለማባከን ፀሎታችን እንዳይሰማ ለማድረግ ህዝቡም እርስ በእርሱ በመበጣበጥ ለመለያየትና በመጨረሻም ለማስኮብለል ነውና። እባካችሁ የተዋህዶ ልጆች ቤተክርስቲየናችሁን የምትወዱ በየዋህነት መጠቀሚያ አትሁኑ ቀኖና ቤተክርስቲያን አጥር ቅጥር ነው። ቀኖና/ስርአት/ የደፈረ ሰይጣን ቀጥሎ የሚዘምተው ወደ ዾግማው/እምነት/ ነው። ስርአት ብንጠብቃት ትጠብቀናለች እንደሚሉ አባቶች። ስርአት ሊሻሻል ይችላል ሲባል ማንም እየተነሳ ያሻሽለዋል ማለት አይደለም። የቤተክርስቲያኗ የበላይ የሆነው ቅዱስ ሲኖዶ ብቻ እንጂ። አለበለዚያማ በየቦታው የተለያየ የአምልኮ ስርአት ካለ ምኑን አንድ እምነት ሆነው ስለዚህ ስርአትን እንደቀላል አንየው። የቤተክርስቲያን አላማዋ ህዝቡን መንፈሳዊ ማድረግ እንጂ ማስጨፈር አይደለም። እነሱም የንስሀ መዝሙር የንሰሀ ስብከት ይለማመዱ በትህትና ስርአተ ቤተክርስቲያንን በማክበር አገልግሎታቸውን በፍቅር ያድርጉት። ጭር ሲል አልወድም ጥሩ አይደለም። በሉ ኑ ነገ እንትን ሄደን ከታወቀው የቤተክርስቲያን ስርአት ውጪ እንዲህ እንዲህ እናድርግና እንበጥብጥ እያሉ መዝመት ያስተዛዝባል አሳዛኝም ነው። በቤተክርስቲያን ስርአት መሰርት የሚያስተምሩ የሚዘምሩ አገልጋዮች የሚያገለግለግሉባቸው አውደምህረቶች፣ በምእምናን ከአፍ እስከ ገደፋቸው የሚሞሉት አውደምህረቶች፣ ጉባኤያቸው በሰላም ተጀምረው በሰላም የሚፈፀሙ ጉባኤዎችን እያዩ እነሱስ ቢቀኑ ምን አለ። አንዲቷን ቤተክርስቲያን ብቻ ማገልገል ከሆነ አላማው በመበጥበጥ ውስጥ የሚገኝ ነገር ምን አለ ሌላ አላማ ከሌለ በስተቀረ። ሰላም ሁኑ። ደጀ ሰላሞች በርቱ።

መርከቤ ንጉሴ /ከአዲስ አበባ/ said...

በስመአብ ወወልድ ወመንፈስ ቅዱስ አሕዱ አምላክ።አሜን!!

ያልገባኝ ነገር በተለይ በተደጋጋሚ ስማቸው የሚጠቀስ ግለሰቦች እኔ በግሌ ሰው ይሳሳታል፡ የተሳሳተን ደግሞ መክሮና እስተምሮ መመለስ ይቻላል።ሌላው ያልተገባ ነገር የቅናትና ነገሮችን የማጋነን ሁኔታ ነው የሚል አቋም ነበረኝ። ነገር ግን በተለይ በተደጋጋሚ ስማቸው የሚጠሱት ግለሰቦች ለመመከርና ለመመለስ ፈቃደኛ ካልሆኑ ተደጋጋሚ የሆነ ስሕተት ሰሩ እየተባለ ቤተ-ክርስቲያን እሽሩሩ የምትላቸው እስከመቼ ነው? እኛስ እንዲህ አደረጉ የሚለውን በየጊዜው እየሰማን ውስጣችን የሚቃጠለው እስከመቼ ነው? ከዚህ በፊት የሚከተለውን ፅፌ ነበር። “እኔ መመላለስ በማዘወትርበት ደብር አንዱ ቄስ ይቀድሳሉ፣ያስተምራሉ፣ ያሳልማሉ፣ በአጠቃላይ ቄስ የሚያከናውነውን ተግባር ያከናውናሉ። ነገር ግን ለካስ እኚ ቄስ ተሐድሶ ነበሩና የሰንበት ት/ቤት ተማሪዎች ለደብሩ አስተዳዳሪ ጉዳዩን ነግረዋቸው ችላ ብለውት ሦሥት/3/ ወር ያመላልሷቸዋል። ከዚህ በኋላ አንድ ቀን ከቅዳሴ ተከትሎ አስተዳዳሪው ዛሬ ነገ በማለት ጉዳዩን ችላ ሰላሉት መዕመናኑ ማወቅ አለበት ሲባል አስተዳዳሪው በጭራሽ በማለት ሲሟገቱ ቆይተው ጉዳዩ ታወቀ። አስተዳዳሪው እንዴት እንዲህ ሊሆን ይችላል ይህ ሰው ንፁህ ነው በማለት ወገንተኝነት በማሳየት ያዙኝ ልቀቁኝ ሲሉ መታገስ ያልቻሉ ሰዎች አስተዳዳሪው ትክክል እንዳልሆኑ ነግረዋቸው ረጋ አሉ። በመጨረሻም በመዕመናን ትግል እኚህ ሰው ከዚህ ደብር ተነስተው ያለምንም ምክርና ተግሳፅ ሌላ ደብር ተመድበው በመስራት ላይ ይገኛሉ። እኛን ኦርቶዶክሳውያንን በዋናነት እያጠቃንና ሐይማኖታችንን እያስደፈረ ያለው ጉዳይ ገንዘብ ወዳድነታችን ነው።” የሚል ነበር። አሁንም ቢሆን በዋናነት እያጠቁን ያሉት ከፍተኛ እምነት ተጥሎባቸው ወሳኝ ቦታ ላይ የተቀመጡና ለርካሽ ጥቅም ብለው ሕሊናቸውን የሸጡ ሰዎች ናቸው። በአጠቃላይ ከአስመሳይና ግዴለሽ አገልጋዮች ባሻገር የቁጥጥሩ መላላትና ርምጃ አለመኖር መናፍቃኑ በቤታችን እንደልባቸው እንዲሆኑ አድርጓቸዋል። ዘፋኞቹም ዘማሪ ቢሆኑ ቅድስት ቤተ-ክርስቲያን ትቀበላቸዋለች። እየተቀበለቻቸውም ነው። ግን ከዘፈን ወደ ዝማሬ ሲመጡ ከእኩይና ከቆሻሻ ተግባራቸው ጋር ለጥቅም ብለው መሆን የለበትም።

እግዝአብሔር አምላክ ወዳጅ መሳይ ጠላትን ያጥፋልን። አሜን!!
መርከቤ ንጉሴ /ከአዲስ አበባ/

Anonymous said...

ለአንዳንድ ቅን አሳቢ ነን ባዮች...

የእነዚህን ግለሰቦች ከሥርዓት ውጭ መሆን ተከትሎ ቅር የተሰኘን ብዙዎች እንዳለን ከአስተያየቶች መረዳት ይቻላል ይሁን እንጂ የእነሱ ደጋፊዎች ስለሆኑ ብሎ እንዲሁ ማለፉ ነገ ከውስጣችን የሚፈሩ መሰል የለውጥ ኃይል ነን ባዮች ቁጥር መጨመር ይመስለኛል ምክንያት እነዚህ ሰዎች የቤተክርስቲያንን ሥርዓት መሸርሸር እየፈቀዱ ያሉት ነተለያዩ የራሷ ደረጃዎች ቁጭ ብለው ነውና

fkre የተባሉ አስተያየት ሰጭም ከነዚህ ወገን እደሆኑ ከአስተያየታቸው መረዳት ቀላል ነው
"በወቅቱ እኔ ነበርኩ የተደረገውንም አይቻለሁ ቀኖና እንጂ ዶግማ አይደል ? ምን ችግር አለ? ምን አለ ባናካብደው ......."

ለመሆኑ ሥርዓትና ዶግማ ምንድን ናቸው እንዴት በማን መቼ ይዘጋጃሉ ጥቅማቸውስ ምንድን ነው መጽሐፍ ቅዱሳዊ ናቸው አይደሉም ወዘተ ከአባቶች መማር ብትችሉ ልዩነት ይገለጽላችኋል

ኣይ እኛ በመረጥነው ሀሳብ ብቻ እንጓዛለን እኛ ያላስተማርነው ትምህርት ትምህርት እኛ ያላረቀቅነው ህግ ሥርዓት ሊሆን አይችልም ካላችሁ ደግሞ ከዚህች ቤተ ክርስቲያን የተለየ አሠራር አላችሁና ከእኛ ተለዩ መባል ምን ያስገርማል ለምንስ ሰዎችን ያስከፋቸዋል ከዚህች ቤተ ክርስቲያን እንደትኋን ተጣብቆ ሁከት መፍጠርስ ምን ይጠቅማል

እባካችሁ እነበጋሻው ቤተ ክርስቲያን(ክርስቶስ)እኮ በእሷ ጥላ ሥር የመኖርም ሆነ ያለመኖር ነፃነትን ከማንም ቀድመው ሰጥተዋችኋል:: ከእናንተ ጥቅመኛ ከሆኑ ሰዎች በመለጠፍ ሰላሟን ከመንሳት ገለል ብላችሁ የፈለጋችሁትን ለምን አታመልኩም? አይደለም በዐቢይ ፆም ከበሮ መምታት ዕቅዳችሁን የረዥም ጊዜ ከማድረግ ለምን እንደ ግብር ወንድሞቻች ዛሬውኑ በጊታር መጨፈር አትጀምሩም? ቤተ ክርስቲያን እኮ የለየላቸውን መናፍቃን ለምን እንዲህ አደረጉ ብላ አታውቅም:: በፈለጉት መንገድ ሄደዋልና::

እናም ልዩነት ሳይገባችሁ የምታወግዙን ወገኖች ሆይ ቤተ ክርስቲያን ምሉዕ ናት ብለን እናምናለን:: የጎደላችሁን የፈለጋችሁት ሂዱና ሙሉ ባዮች ነንና ሰላም አትንሱን::

ላእከ ማርያም
ባህር ዳር

ሰናይ said...

አህያውን ፈርተው ዳውላውን እንዲሉ ከበሮ እንዲመታ የፈቀዱትን ሊቀ ጳጳስ ትቶ የኔ ቢጤ ጨዋውን መውቀስ ምን ይሉታል? በቤተክርስቲያን መዋቅር ውስጥ ያሉትን ሊቀጳጳስ ቃለ-መጠይቅ ብታድርጉላቸው ጥሩ ነው። ደጀሰላሞች ዘገባችሁ ከጊዜ ወደ ጊዜ ኦርቶዶክሳዊ ይዘቱ እየመጠቀ ነውና በርቱ ስል የጡመራችሁ ትኩረት ከግለሰቦች ይልቅ ችግሮች ላይ የበለጠ ቢያተኩር እላለሁ።

yosef said...

በጣም ነዉ የሚገርመዉ!!! ይሄ ክደት ነዉ; እግዚአብሔር ሁሉንም ነገር ያስተካክለዉ።
ደጀ ሰላሞች በርቱ።
ደህና ሁኑ።

yalew Tefera said...

ያልው ተፈራ በፌስቡክ
ደጀ ሰላሞች ባቀረበችሁት ጉዳይ እጅግ ደስ ብሎኛል ምክኒያቱም በፅሁፋችሁ ላየ በተደጋጋሚ ስታነሱት የነበረው ‹‹መጋቢ ሃዲስ››…….. የሚባለው ግለስሰ በዚህ ዓመት ሁለት ጊዜ ወደ ደብረ ዘይት በመጣባቸው ወቅቶች ልቤ በሃዘን ሲቆስል ነበርና፡፡ በረቱ!!!
አንድ ግን የምነቅፍባችሁ ነገር አለ፤ ይኸውም በፅሁፋችሁ ላይ ‹‹ምናልባት ስለ ሙሴ ሕግ እና ጾመ ሙሴን ስለሚያነሣ ይሆናል›› የሚለው አገላለጽ ትክክል አይደለም፡፡ እንደ ቤተ ክርስቲያን አስተምህሮ ምንም ነገር ምናልባት፣ሊሆን ይችላል፣ ሳይሆን አይቀርምና በመሳሰሉት አገላለፆች አይገለፅም፡፡ ምክኒያቱም እነዚህ አገላለፆች እርግጠኛ ሳንሆን ስንቀርና ስንጠራጠር የምጠቀማቸው ስለሆኑ ነው ከዚህም በላይ በመፅሐፍ ቅዱስ ስለ እግዚአብሔርና እግዚአብሔር ስላደረገው ሲናገር ይህን ደረገ፣አድርጉዋል፣ያደረጋል….. እያለ እርግጥ ባለ አገላለፅ ይገልፃል እንጂ አንድም ቦታ ምናልባት ተብሎ የተገለፀ ሃሳብ ወይም መልእክት የለም፡፡ ለዚህች አገላለፃችሁ ትኩረት የሰጠሁበት ምክኒያት ስላለኝ ነው፡፡ ስሙን የማልገልጻው አንድ መምህር አንድ የመጽሃፍ ክፍልን ሲያስተምር ‹‹እኔ ሳስበው እንሂህ ለማለት ብሎ ይመስለኛል›› ብሎ ስያስተምር ስለ ሰማሁ ነው፡፡ እናንተም የራሳችሁን አመለካከት ምናልባት በማልት ልትጽፉልን አይገባም!!! ቤተክስቲን ስለያ ነገር በማያሻማ መልኩ ምታስተምረውን ማስቀመጥ እንጂ፡፡
እግዚአብሔር ማስተዋሉን ይስጠን!!!

Anonymous said...

To Tewahedo,

The church is responsible to change the youth(society) or to let them think heavenly not to change its practice as per the need of youth(society).

If the Church happens to change itself as per the willingness,ideas ,style of youth or society in general, it surely ends up with Hall or full of non believers as we all probably see from westerns' church.

Therefore, please do accept that the Church is always a leader for society not the other-way round.

HMUSA

Anonymous said...

በስመ አብ ወወልድ ወመንፈስ ቅዱስ አሃዱ አምላክ አሜን
ደጄ ሰላሞች አንደምን ሰነበታችሁ፣ በእዉነት የቤተ ክርስቲያን አምላክ ዋጋችሁን ይክፈላችሁ:: እኔ ችግሩ የተፈጠረበት ቦታ ነው የምኖረው፣ እውነት አጅግ በጣም ያስለቅሳል፣ ያኔ በገጠር አንደነርሁ ቤተ ክርስቲያን ስንገባ በጣም አየፈራን አረማመዳቺንን አስተካክለን ነበር፣ በሐዋሳ ግን አውደ ምህረት ሰው አንደምሰድብበት አየሁ፣ የሚገርመው ነገር የአርባ ቀን ማተብ አንኩአን የላቸውም:: እረ ስንቱ ይነሳል:: አሁን ደግሞ በሽታው ወደ ቅ/ስላሴ አምርቷል፣ ካህናት ከስራ ታግደዋል፣ ምክንያቱ ደግሞ ይገርማል;"ለሀዋሳ ዩኒቨርሲቲ ተማሪዎች የንስሐ አባት አንዳትሆኑ በሚል ሰበብ "፣ ሁሉም የድርሻውን ይወጣ፣ ምእመናን ሁላቺምን እንፁም፣ እንፀልይ ፣ እንስገድ።
"ሁሉም እንደተሰጠው መጠን፣ ለጊዜው ሃሳቡን ለአባታቺን ፣ ለእናታቺን ፣ ለወንድም ለሕታቺን ያለውን ነገር ማሳወቅ አለብን ፣
ድርሻችንን አንወጣ!!!
ክፉውን ያርቅልን መልካሙን ያቅርብልን!!!
መስቀሉን ተሸክመን እንደ አባቶቻቺን እግዚአብሔርን ለመከተል ያብቃን።
ሰላመ እግዚአብሔር ከሁላቺን ጋር ይሁን !!!

Anonymous said...

በስመ አብ ወወልድ ወመንፈስ ቅዱስ አሃዱ አምላክ አሜን
አንደነሱ (አንደ በጋሻው) ሃሳብ ቢሆን ኑሮ ሁላቸንም ሃይማኖታቸንን ቀይረን ነበር። አሁንም ጌታችን ፣አምላካቸን፣ መዳኒታችን አየሱስ ክርስቶስ ከኛ ጋር ነው መቸም ወደአናንተ አንመጣም። አረ ስንቴ ልቤን አቁስላችሁታል አራሴን አስክጠራተር ድረስ። ኧረ ለመሆኑ የየሐገራቱ ጳጳሳት ለምን ይሆን በተደጋጋሚ ሲቸፍሩበን ዝም ብለው የሚያዩት? አንዴዉም አኮ አነሱ ናቸው ፈቃድ የሚሰጧቸው።አዉነት አነሱ አዉነቱን አና ዉሸቱን መመርመር አቅቶአቸው ነው ወይስ አነሱም ተሃድሶ ሆነው ነው? መንጋዉን መጠበቅ የማን ሥራ ሆነ አና ነው አንደዚህ ችላ የሚሉት? ምናለበት ለአዉነት ስትሞቱ ብናያችሁ። አግዚአብሔር ልብ ይስጠን። የምህረት አምላክ ቤተክርስቲአንን ይጠብቅልን።የአግዚአብሔር ሰላም የቅድስተ ቅዱሳን አረዴት በረከት ከሁላችን ጋር ይሁን።

Ze Abyssinia said...

Ze Abyssinia

This is time for solidarity, this is time for unity, when the daughters and sons of the TEWAHIDO sould get together for one mission. We need to stand up for defending the church. Let's leave away expectations from any where Except from the High Most God and Ourseleves.

As I can see those preachings whom we heard nowadays from our elder brothers like Dn Daniel Kibret and Dn Abayneh Kassie are best examples to fight against the tehadiso's. I appreciate the effort now being carried out by Dn Abayneh, since I saw and followed his preachings, especially on the current issue. Wherever he goes he tries to let the laity know what is really going on with brave heart, as mentioned on this blog up. This is what we need now. Some one who directs us to the everlasting life.
Please convey many thanks to him and all teachers who are working at full energy. May be this is the time for solidarity. The former togetherness shall be established again, so that the walls of Jericho will get demolished.

Pls keep on informing us

For sure the surroundings of the tehadiso's are turning to be hail. They are on the way to be left alone. They are currently under thraoma. We are observing people are running away from them b/c of the effort. Very soon we will see them bared. They are trying to release the last bullet, after which they will have non. You daughters and sons of the church Keep on doing good.

God Bless Ethiopia.

መርከቤ ንጉሴ /ከአዲስ አበባ/ said...

በስመአብ ወወልድ ወመንፈስ ቅዱስ አሕዱ አምላክ።አሜን!!

እነዚህ ቤተ-ክርስቲያንን እናድሳለን ብለው የተነሱት ሰዎች የበሉበትን ወጪት ሰባሪ ከመሆናቸውም በላይ ለርካሽ ጥቅም የተገዙና ሕሊናቸውን የሸጡ ናቸው። ያውም በቅድስት ቤተ-ክርስቲያን ውስጥ ሆነው ሳይታወቅ ሥርዓትና ደንቡን ባልጠበቀ ዝማሬ፣ ስብከት፣ ፅሑፍና የመሳሰሉትን እግዝአብሔርን ለማገልገል ሳይሆን ጥቅምን ለማግበስበስ በድፍረት የሚነግዱ። ነገዱ አተረፉ ይህም አልበቃ ብሏቸው እነሱም መናፍቅ ሆነው ከመናፍቃን ጋር በማይረባና በጊዜያዊ ጥቅም ተሳስረው በተለያየ ሁኔታ ሲበጠብጡን ኖሩ። በእርግጥ እያጠቁን ያሉት ከፍተኛ እምነት ተጥሎባቸው ወሳኝ ቦታ ላይ የተቀመጡና ለርካሽ ጥቅም ብለው ሕሊናቸውን የሸጡ ሰዎች ናቸው። በአጠቃላይ ከአስመሳይና ግዴለሽ አገልጋዮች ባሻገር የቁጥጥሩ መላላትና ርምጃ አለመኖር መናፍቃኑ በቤታችን እንደልባቸው እንዲሆኑ አድርጓቸዋል። የሚመለከተው ክፍል ችላ ቢላቸውም እንደተነቃባቸው እያወቁ ለምን ይሆን ቤታችንን የሙጥኝ ማለታቸው? የሚመለከተው ክፍል ዝም ካለን ምዕመናኑ ምንም አያመጣም ብለው አስበውት ይሆን? ነው ከገዛቸው ድርጅት ጋር የብዙ አመታት የኮንተራት ውል አላቸው? ስማቸው የተጠቀሱት ግለሰቦች ብቻ ሳይሆኑ ሌሎችም በበአላትና በሐይማኖታችን ያልተፈቀዱ ነገሮችን ከማከናወን አልፈው እኮ የሚያስገባቸው ጠፋ እንጂ መቋሚያ፣ፀናፅን፣ ከበሮአችንንና ሌላም የሰረቁን እንሶ በገና፣ማሲንቆና የመሳሰለትን ለቤተ-ክርስቲያናችን፣ ለእምነታችን፣ መሳጭና ውበት የሆኑትን አስጥለው እንደነሱ ጨፋሪ ካደረጉን በኃላ ለመውረስ ፒያኖና ኦርጋን ይዘን ቤተ ክርስቲያን ካልገባን የሚሉ አሉ። ለዚህ ሁኔታ መጠናከር ደግሞ በእደማርያም እጅጉ ረታ ከፍተኛ ሚና እየተጫወቱ ነው። http://www.ethiopianorthodox.org/ ይህ ድረ-ገፅ በእደማርያም እጅጉ ረታ የሚያዘጋጁት ነው። እዚህ ድረ-ገፅ ላይ የሳምንቱ ምርጥ መዝሙር እየተባለ የሚደመጠው በኦርጋን በኚሁ ሰው የተቀናበረ የቤታችን መዝሙር ነው። አብዛኛው ፅሑፋቸውና ሌላው ነገር ስለ ኦርጋን ነው። በተለያየ አድራሻ ከኚህ ሰው ጋር ቅሬታና ጥያቄዬን በማቅረብ ለመፃፃፍ ሞክሬያለሁ። ነገር ግን የሚመልሱልኝ መልስ በቂ ያልሆነና የማይገባኝ ነው። ደጀ-ሰላሞች እባካችሁ የምትመልሱልኝ ከሆነ በድጋሚ ነው የምጠይቃችሁ ይህ ድረ-ገፅ እኛን ኦርቶዶክሳውያንን የወከለ ነው? በእደማርያም እጅጉ ረታ የሚባሉትስ ሰው ማናቸው?

እግዝአብሔር አምላክ አስተዋይ ሕሊና ይስጠን።አሜን!!
መርከቤ ንጉሴ /ከአዲስ አበባ/

Anonymous said...

ደጀሰለሞች ከማህበረ ቅዱሳን ድህረገጽ በመጠኑ ያነበብነዉን እናንተ ሌላም መረጃ ጨምራችሁ ስለአቀረባችሁልን እግዚአብሔር ይስጥልን፡፡ በተረፈ ግን ሁለት ነገሮችን ለማለት ፈለግሁ
1. ከዚህ በፊት በ1998 አካባቢ ወደ ምስራቅ ወለጋ ነበርኩና በአቢይ ጾም እንዲሁ ሲደረግ አይተን እንደሰ/ትቤት አባልነታችን ቅር ተሰኝተን ነበር በጣም የሚገርመዉ ግን በዛ ወቅትም የሀገረስብከቱ ሊቀጳጳስና መ/ር ምህረተአብ ነበሩ፡፡ ስለዚህ ዋናዉን ባለጉዳይ የቅዱስ ሲኖዶስ አባል የሆኑት ሊቃነጳጳሳትን እናንተ ደጀሰላሞች እራሳችሁ ስለጉዳዩ ለምን አታናግሩም ሊቀ ካህናት ክንፈ ገብርኤልን በሌሎች ስራዎቻቸዉም የምናከብራቸዉ አባት ስለሆነ ከርሳቸዉ የተሰጠዉ የቤተክርስቲያኒቱ መልስ ደስ ያሰኛል፡፡
2. የቤተክርስቲያኒቱ ዉበት ስርዓቷ ነዉ ምን ችግር አለዉ? አታካብዱ እንዴት ይባላል? ጌታችን መ/ኢ/ክ እራሱ ማድረግ የሚችለዉን “ሂድና እራስህን ለካህን አስመርምር” ማለቱ ማካበዱ ይሆን የተሃድሶዎች ዓላማ እኮ ማደስ አይደለም ማፍረስ ነዉ እንጂ፡፡አውሮፓውያን በክርስትና ላይ የሠሩት የማይካስ ወንጀል አምላክ የለሽ ትውልድ እንጂ ጻድቃንን አላፈራላቸውም፡፡ በዚህ ጉዳይ ላይ የበለጠ ለመረዳት የወንድማችንን የዳንኤል ክብረትን ብሎግ ይጎብኙ (http://www.danielkibret.com/2011/03/blog-post_13.html

Anonymous said...

በጋሻው ባንድ ወቅት በዚያ ርዕሱን ሰርቀህ “ የመስቀሉ ስር ቁማርተኞች“ በሚል አሳትመህ ቃሉን ከየት እንዳገኘኸው ባላውቅም ”ለእውነት ስትቆም፤ ለህሊናህ ስትታመን አለም በአንተ ላይ መዝገብ ሙሉ ክስ አላት፤ አላማዋም አንተን መወንጀል እና በጉስቁልና መቅሰፍት መምታት ብቻ ይሆናል” ብለኸን ነበር። እናም ጳጳሱን ለከት በሌለው ቃላቶችህ ለማቃለል ሞከርህ። የሚገርመው እኒያኑ ጳጳስ መልሰህም ካፍህ የሚወጡት ቃላት መልዕክት አይምሮህ ስለማያገናዝብ የውዳሴ መአት አወረድህላቸው። ጳጳሱ ባንተ መልዕክት ሲጸጸቱ ወይም ባደባባይ መግለጫ ሲሰጡ አላየንም። ያኔ ስትሰድባቸውም መልሰህም ስታወድሳቸውም የነበሩት ጳጳስ ሁሌም ድሮም የሚሰሩትን ስራ ይሰራሉ። ስለዚህ እኔን የሚገርመኝ ካንተ እየዋዠቁ የሚወጡት ቃላት ምንነት ነው። እውነት ካንድ የእግዚአብሔር ሰባኪ ያውም ከ”መጋቢ ሃዲስ” ይወጣል። ይቅርታ ማዕረጉም እንደ እርዕሱ የተሰረቀ ነው። አሁን ድፍረት አግኝተህ ቤተክርስቲያኗን አጠቃላይ ለመውረስ ብትችልም ብፁዕ አቡነ----- ለመባል ተነስተሃል። የቆምክበትን ቦታ የዘነጋህ መሰለኝ። በተደጋጋሚ ተሞክሮ የከሸፈ ስልት ስለሆነ ባደባባይ ንስሃ ገብተህ በቤቱ ለመኖር መወሰን ወይ ለይቶልህ ወደ ቃልቻህ መሄድ ትችላለህ።
ቤተክርስቲያን ሁሌም አንዲት ናት።

Anonymous said...

እጅግ በጣም ይገርማል. ደጀ ሰላማውያኖች እግዚአብሔር ይስጥልኝ እናንተ እየጻፋችሁ ሁሉን ነገር ግልጽ በሆነ መንገድ በማቅረባችሁ ብዙ ተረዳሁኝ:: እባካችሁ በርቱ እግዚአብሔር ይርዳን እና በተለይ እነዚህ ተሀድሶ የሚባሉትን ከላይ እንደ ገለጹት እናት አባታቸው ከሆኑት ከፕሮቴስታንቶች ይቀላቀላሉ እንጂ ተዋህዶ ነን እያሉ መካከላችን ተሰግስገው የማፍረስ ተልእኳቸውን ማካሄድ በፍጹም በፍጹም እንደማይችሉ በቁርጥ ማወቅ አለባቸው::
<>

እግዚአብሔር ይቅር ይበለን ፈቃዱ ይሁን እና መልካሙን መንገድ ይምራን ሀይማኖታችንን ጠብቀን ስርዓተ ቤተ ክርስቲያናችንን አስከብረን እንድንኖር ይርዳን.
sara adera

Anonymous said...

menwe begashwe ewnte adergha weys hree gera gebagh ewnte lemnger tesfa ysekortal gen deje selame zenwen keyte ageghattwet betame yaselkesal

mebrud said...

መታደስ ይቅርብኝ
ሰላሜን አትንሱኝ
ስትል ቤተክርስቲያን

ካፈርኩ አይመልሰኝ
ለሚሉን በስንኝ
እነሆ፡-

ኩራትና ትዕቢት የሙሉት አናት
ሰይፋና ጎራዴ የመቱት አንገት
አይገላገሉም እንዲህ በቀላሉ
ከመሬት ላይ ወድቀው ካልተንከባለሉ።
ከበደ ሚካኤል እንዳሉ።
ቢሆንም ቅሉ!
ምዕመናን ነቄ ካላሉ
ወሊሶ ወላ አዋሳ
"ሊቀውጥ" ያማረው ሁሉ
ቀላል ይሸውዳሉ?

ደኅና ዋሉ

ቃላተ አዲሳባ፡
ቀወጠ-በጠበጠ፣ጮኸ፣ተቆጣ፣ጨፈረ፣አቅራራ..
ነቄ-አወቀ(ባነነም ይሉታል)
ቀላል-በጣም፣(በኃይለኛውም ይሉታል)
አዋሳ-ሐዋሳ
ወላ- ጭምር(ከትግርኛው ዋላ የተወሰደ ይመስላል)

Anonymous said...

Ene yemaygebagne neger, Begashawen "hay" yemilew tefto newe endih lehager yaschegerew, weys ye-tikem tegari yehonena, ayzoh kegoneh alehu yemilew tileke sewe selalew newe? - agelgelot mechem betsebena kireker yetageb sihon, minew kome bello selerasu biyaseb, lemin keleloch hulu agelgayoch yesu sime becha be-kifu sinesa, lemin rasun ayteyekem? ene minem yeteleke ewket baynoregnem, yekedmo abatoch, ande sewe enquawn siyazinebachew kesew teleyetew Egziabeheren betselot yeteyeku neber! Minale tikekelegna nege enqwan beleh betamin, sewe hulu anten agenda kemiyaregeh erasehen betagel? Egziabeher wede- Libehe yemeleseh!!!

Weletemeskel said...

Ene eko enkokilish yehonebig abatochns haye yemil tekorkuarye akale tefa malet new?Dejeselamoch ega miemenan minm madreg anichilim malet new? zim bilen tekatilen mekemet new beka?.yesemay amlak yakenawinilinal ega tenesten enisra plse plse!!!!!!!!!!!!!!!!!!Ene begashawma min yadirgu betam esururu tebalu!!!!!!!!!Abatoch geta libona yistachuh,firdin yakililachu!!!!!!!!Huhe..............tekatelku!!!!

ze Abyssinia said...

Dear Dejeselam, Pls do not stop such encouraging works. To all believers of TEWAHIDO this time for prayer and fasting, but also with complement of spiritual war against the devil and its messengers.

This issue must not be breaking news. We need to perform for the long lasting solution. We need to discuss with all of our colleagues on how to resist the aggression. It shall not be emotionally but mindfully. We need to bring a stronger solution than the tehadisos, since we are able to do that. B/c the Almighty who can do everything irrespective of time resource is all the time with us.

Keep on discussing. keep on informing, especially what is being done with regard to the defending. We need to contribute moral and financial help for the movement.
Those evangelists, in Addis should get such assistance. As they are not subordinate to any one else, they have no one to subsidies their service. We have to stand by their side.

We need to fight until every obstacle get cleared. No STOP before that.

Anonymous said...

I realy appreciate what Ze Abyssinia is saying. Especially about 'wuha yelelachew minchoch',the preaching of Dn Abay and 'yegehanem Dejoch' of Dn Daniel. Even it should be distributed for free.

Anonymous said...

Wow!!! I watched the VCD of Diakon Abayneh Kassie. What a courage!

By the way where was he this all the time. It is good to see him back.

Anonymous said...

በቤተክርስቲያን ያደገ ሰው የአባቶቻችን አካሄዳቸውን ስርአታቸውን ጽድቃቸውን ከእግዚአብሄር ጋር ያላቸውን ግንኙነት በደንብ ያውቃል ታዲያ ሳይገባቸው ቀርቶ ነው ሰውን ለማበሳጨት ብሎ መድሃኒአለም ክርስቶስ እንካን በገዳመ ቆረንቶስ ያሳለፈውን ጾም በከበሮ .....አያቴ የሆነ ነገር ሲቃጠል እግዚኦ በሉ ትላለች እረሳ ሞታለች እኛ ግን አሁንም እግዚኦ እንላለን እግዚኦኦኦኦኦ

Anonymous said...

ሴይፈ ገብርኤል
ያባቶቻችን አምላክ ሀገራችንን ከአላውያን ነገስታት ቤተክርቲያናችንን ከዲያቢሎስ ሴራ ይጠብቅልን አሜን!!!
ወንድሞቼ ከዚህ በፊት ፓትሪያሪኩ ከነ ዲየቆን በጋሻው እና ከደጋፊዎቹ ጋር እሳትና ጭድ መስለው ወደ መድረክ ብቅ ያሉበት ዘመን ፣ ውስጥ ለውስጥ ስራቸውን የሚሰሩበት፣ ጊዜ መግዣና የመዘጋጃ ዘመናችው ነበር ይህ ታሪክ የሚፈታው ታላቅ ሚሰጢር ይመስለኛል ምዕመን መስሎ ቢያቅተው ጠምጥሞ ሊሞክረን መቷልና ትግሁ ወፀልዩ…
ዛሬ ታዲያ ስራቸውን ወደ ቀጣይ ምዕራፍ አሸጋግረውት ይህንን ሁሉ መከራ በቤተክርስቲያን እና በምዕመናን ላይ አድርሰዋል ለዚህም ስራቸው መጀመሪያ ያደረጉት ሳይጣሉ ባደባባይ ተጣልተው ሳያሰታርቁአቸው ባደባባይ በመታረቅ ነው፡፡
ይህ ከፍትኛ የሆነ በማስመስል የተለበጠ ጥበባቸው እንደዚሁ ባደባባይ ሁከት ብቻ የሚቋጭ አይመስለኝም ከተሳካ ከምዕረፍ ወደ ምዕራፍ መሸጋገር ካልሆነ ደግሞ በታሪክ እንደምናውቀው ታላላቅ የኑፋቄን ትምህርትን አስርገው ወደ ቤተክርስቲያን ለማሰገባት እንደሞከሩት ታላላቅ የቤተክርስቲያን አባቶች እንደነበሩት የማነቀል እሾኅ ፣የማይሽር ቁስል መትከላቸው፣ እያደር የሚቀጣጠል እሳት ማዳፈናቸው አየቀሬ ነው፡፡ከታሪክ ተማሩ፣ ወገኖቼ ለማውገዝ አትቸኩሉ ነቀፌታ ያለበትን ግን ከመንቀፍ ወደ ኋላ አትበሉ፣ ከኛ ጥበብ የጌታ ፍርድ ይበልጣል፣ በርግጥ ሌባን ሌባ ማለት ተገቢ ነው፣ የሰውንም አካሄድ መተቸት ያለ ነው በእማመላክ ፍቃድ ሁሉ የእጁን እስኪያገኝ ድረስ ግን ሁሉንም በእየማዕረጉ በየስልጣኑ ልንጠራው ይገባናል!
(የሆነው ሆኖ እንዲያው ሰውን በህይወት እያለ ብፅዕ፣ ቅዱስ ማለትስ አግባብ ነው ወይ? ስለማላውቅ ነው እባካችሁ ንገሩኝ)
ምንአልባትም ሶስተኛው ምዕራፋቸው በአምላክ ጥበብ ብቻ በእመአምላክ፣ በሰማይና በምድር ንግስት አማላጅነት ብቻ የሚገታ ይመስለኛል እናም ወገኔ ክርስቲያን ምዕመን ሆይ በአፍ ያይደለ በንፅህ ልቦና ወደ ጌታ ለምኑ
ፓትራሪኩ እና በዙሪያቸው ያሉ ጳጳሳት እና ደጋፊዎቻቸው ለታሪክ የሚበቃ ፍርድን በላያቸው ላይ አኑረዋል
እናት ቤተክርስቲያናችንን ሊያፈርሱአት አይቻላቸውም በከንቱ ዝናራቸውን ይጨርሳሉ እንጂ
ድንጋይ ብትወድቅበትም ቢወድቅብህም ይሰብርሃል ይቀጠቅጥሀል
እናንተ ግን ወደ ፈተና እንዳትገቡ ትጉና ፀልዩ
ባደባባይ ደም አፍስሱ ነፍስ አጥፉ ብሎ አዋጅ ነጋሪ ከመሆን ትድኑ ዘንድ!!!

Anonymous said...

ለመሆኑ በአብይ ጾም ወቅት የማይፈቀደው ከበሮ ብቻ ነው ወይንስ ጭብጨባም ጭምር ነው? ይህ ቀኖናስ የሚገኘው በየትኛው የቤተክርስቲያን መጽሐፍ ነው?

የቤተክርስቲያናችን ሊቅ አለቃ ክንፈገብርኤል አልታዬ ብቻ ናቸው ወይንስ ሃሳባቸሁን ስለሚደግፉላችሁ ነው? ለነገሩ የማቴዎስ ወንጌል 23፣10 ሊቃችሁ አንድ እርሱም ክርስቶስ ነውና። ሊቃውንት ተብላችሁ አትጠሩ። ይላል

ደግሞስ ቢዝነስ ቢዝነስ የምትሉት እናንተ ማኅበረ ቅዱሳኖች የምትሰሩት ቢዝነስ ቀላለ ሆኖ ነው? አሁን ደግሞ የተሃድሶ መናፍቃኑን ሴራ ለመዋጋት በሚል ደንበኛ ቢዝነስ ጀምራቸኋል መቼም ምእመኑን አጥንቱን መጋጥ ነው የቀራችሁ እግዚአብሔር ለሁላችንም ቀና ልብ ይስጠን፣ እውነተኛ እረኛም ያስነሳልን እንጂ ቤተክርስቲያኒቱ የተኩላዎች መፈንጫ ሆናለች፣ እኛንም ወዲያና ወዲህ እየጠለዛችሁ ግራ አጋባችሁን፡፡ ደግሞስ ቤተክርስቲያኒቱን የምትመሩት እናንተ ናችሁ ወይንስ ሲኖዶሱ ነው፡፡

መርዶክዮስ

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)