January 18, 2011

የከተራ - ጥምቀት በዓል ዝግጅት

  • በመዲናይቱ አዲስ አበባ በ62 ማኅበራት የተደራጁ ከ25‚000 በላይ  ወጣቶች በቅድመ ግጅቱ ታቦተ እግዚአብሔር የሚያልፋባቸውን  ጎዳናዎች በማጽዳት እና በመደልደል፣ መንገዶችን እና አደባባዮችን በሰንደቅ ዓላማ በማሸብረቅ ግንባር ቀደም ተሳትፎ እያደረጉ ነው
  •  የማኅበራቱ አደረጃጀት እና ባለቤትነት በጠቅ/ቤተ ክህነቱ የስብከተ ወንጌል እና ሐዋርያዊ ተልእኮ መምሪያ እና የሰንበት ት/ቤቶች ማደራጃ መምሪያ መካከል ውዝግብ ያስነሣ ሲሆን በቀጣይ ወጣቶቹን ‹‹የስብከተ ወንጌል እና ሐዋርያዊ ተልእኮ መምሪያው በትምህርተ ወንጌል አንጾ ለአገልግሎት በማዘጋጀት በሰንበት ት/ቤቶች ማደራጃ መምሪያ ሥር እንዲዋቀሩ ስምምነት ተደርሷል፤›› ተብሏል፡፡ ማኅበራቱን ከክፍለ ከተሞች የሰንበት ት/ቤቶች አንድነት ጉባኤ አመራሮች እና ከማኅበረ ቅዱሳን ጋራ ለማጋጨት የታቀደውን ተንኮል እንደደረሱበት የገለጹት የማኅበራቱ ተወካዮች በበኩላቸው ከብፁዕ ወቅዱስ ፓትርያሪኩ ተሰጥቶናል በሚሉት ፈቃድ መሠረት በስብከተ ወንጌል እና ሐዋርያዊ ተልእኮ መምሪያ ሥር መቆየትን እንደሚመርጡ በመግለጽ ላይ ናቸው፡፡
  •  ማኅበራቱ ‹‹የበላይ መዋቅር ስለሌላቸው የጥፋት ኀይል መጠቀሚያ እንዳይሆኑ ስጋት ገብቶኛል›› ያለው መንግሥት ጠቅ/ቤተ ክህነቱ ለአደረጃጀታቸው ዕውቅና ሰጥቶ በማእከላዊነት እንዲቆጣጠራቸው፣ ቲ-ሸርት እንዳይለብሱ አልያም በሚለብሷቸው ቲ-ሸርቶች ላይ ከሚጽፏቸው ‹ተንኳሽ ጽሑፎች›፣ በመንገዶች ላይ
  • ቄጤማ ከመጎዝጎዝ እና ምንጣፍ ከማንጠፍ እንዲቆጠቡ፣ የሰንደቅ ዓላማን ሕግ አክብረው እንዲጠቀሙ አልያም ባንዲራ ከመስቀል እንዲከለከሉ ካህናቱ በየአጥቢያ አብያተ ክርስቲያኑ እንዲመክሩ አሳስቧል፡፡
  •  ‹‹ቲ-ሸርቱ ተዘጋጅቷል፤ ቄጤማ መጎዝጎዝ እና ማንጠፍም መጽሐፍ ቅዱሳዊ ነው፤ ባንዲራውም ሃይማኖታዊ ምሳሌ እና ትርጉም አለው፤. . .በዓሉ በደረሰበት ዋዜማ ምንም ልናደርግ አንችልም፤ በሚስተካከሉት ጉዳዮች ላይ ከበዓሉ በኋላ ተነጋግረን እንወስናለን፡፡›› (የጠቅላይ ቤተ ክህነት እና የአ.አ ሀገረ ስብከት ተወካዮች)
  •  ጉዳዩ ‹‹ወደ እኔ የመጣውን ወደ ውጭ አላወጣውም›› በሚለው ቃለ ወንጌል መሠረት እንዲጤን የሚመክሩት አስተያየት ሰጪዎች በበኩላቸው ጠቅ/ቤተ ክህነቱ መምሪያዎቹ ከመዋቀራቸው ከዘመናት አስቀድሞ ስብከተ ወንጌልም የሰንበት ትምህርትም ነባራዊ መሆናቸውን አስቦ ከሁሉም በላይ የወጣቶቹ     ክርስትና ከአንዳንድ ጥቅመኞች እና የፕሮቴስታንታዊ ተሐድሶ አቀንቃኞች የሚጠበቅበትን የሽግግር መዋቅር እንዲያመቻች፣ መንግሥትም ዝንባሌያቸውን በበጎ እንዲመለከተው ወጣቶቹም እንደ ትላንቱ ከማሰብ ተቆጥበው እስከ አሁን በተግባር እንዳስመስከሩት በነገራቸው ሁሉ ፈሪሃ እግዚአብሔርን እና አክብሮተ ሰብእን(ግብረ ገባዊነትን) እንዲላበሱ መክረዋል፡፡
 (ደጀ ሰላም፤ ጃኑዋሪ 18/2011፤ ጥር 10/2003 ዓ.ም)፦ ከተራ - ከተረ ከሚለው ግስ ግእዛዊ የተገኘ ሲሆን ዘጋ፣ አቆመ፣ አገደ፣ ከለከለ ማለት ነው፤ ከተራ የማገድ፣ የመክበብ ሥራ ነው፡፡ በሃይማኖታዊ ፍቺው ከተራ የበዓለ ጥምቀት ዋዜማ ነው፤ ጥር 10 ቀን ወራጅ ውኃ የሚገደብበትን፣ ታቦት እና ምእመናን የውኃው አካል በተሰባሰበባቸው ባሕረ ጥምቀት በማምራት ጌታችን መድኃኒታችን ኢየሱስ ክርስቶስ በ30 ዓመቱ ከገሊላ ወደ ዮርዳኖስ ወርዶ በእደ ዮሐንስ ለመጠመቅ በማእከለ ዮርዳኖስ በቆመ ጊዜ ውኃው ለሁለት እንደ ግድግዳ ተከፍሎ መቆሙን ያመለክታል፡፡ 

በዚህም ጌታችን የዕዳ ደብዳቤያችንን ደምስሶ ከቅድስት ሥላሴ መንፈሳዊ ልደት የምናገኝበትን የልጅነት ጥምቀት ሰጥቶናል፤ በዓለ ጥምቀትም የዚህ መታሰቢያ ነው፡፡ ኢትዮጵያ ዜና ጥምቀተ ክርስቶስን ከሰማችበት ከመጀመሪያው መቶ ክፍለ ዘመን አንሥቶ በተለይም ከአጤ ገብረ መስቀል ዘመነ መንግሥት (6ኛው መ/ክ/ዘ) ወዲህ የጥምቀትን በዓል ዛሬ በሚታየው አኳኋን ስታከበር እንደ ቆየች ይታመናል፡፡ በክብረ በዓሉ ከመንበረ ክብራቸው ወጥተው ወደ ባሕረ ጥምቀት የሚወርዱት ታቦታት በካህናቱ ሃሌታ፣ በምእመናኑ እልልታ እና በየአጥቢያ አብያተ ክርስቲያኑ በተቋቋሙ የሰንበት ት/ቤት ወጣቶች መዝሙሮች ታጅበው በተመሳሳይ አኳኋን እንደሚመለሱ ይታወቃል፡፡

በዘንድሮው የጥምቀት በዓል አከባበር በየአካባቢያቸው በልዩ ልዩ ማኅበራት የተደራጁ የከተማ ወጣቶች በተለይም ከ2001 ዓ.ም አንሥቶ በጀመሩት አኳኋን ሲያደርጉ የሰነበቱትን የተጠናከረ ቅድመ ዝግጅት በማጠናቀቅ ላይ ይገኛሉ፡፡ በኢ/ኦ/ተ/ቤ/ክን የስብከተ ወንጌል እና ሐዋርያዊ ተልእኮ መምሪያ ሥር ‹‹የጥምቀት በዓል ተመላሾች ወጣቶች ኅብረት›› በሚል ስያሜ በ62 ማኅበራት የተደራጁት ከ25‚000 በላይ ወጣቶች ከወራት በፊት ከምእመናን እና ከበጎ አድራጊዎች ባሰባሰቡት ገንዘብ ታቦተ እግዚአብሔር እና ምእመናን የሚያልፉባቸውን እና የሚቆሙባቸውን ጎዳናዎች በማጽዳት፤ አውራ መንገዶችን፣ አደባባዮችን እና ዐጸዶችን በተለያዩ መልኮች በሰንደቅ ዓላማ በማስዋብ ላይ ይገኛሉ፡፡ በዓሉ ተከብሮ በሚውልባቸው ዕለታት ማኅበራቱ ምእመናንን ከማስተናበር እና ነዳያንን ከመመገብ ጀምሮ የተለያዩ የበጎ አድራጎት ተግባራትን እንደሚያከናውኑ ተዘግቧል፡፡

ይሁንና የማኅበራቱ አደረጃጀት እና በተጠናከረ መልኩ የሚያደርጉት እንቅስቃሴ የመንግሥትን ትኩረት መሳቡን ተከትሎ ሐላፊነት ወስዶ በማእከላዊነት ከመቆጣጠር አኳያ በጠቅላይ ቤተ ክህነቱ የስብከተ ወንጌል እና ሐዋርያዊ ተልእኮ መምሪያ እና በሰንበት ት/ቤቶች ማደራጃ መምሪያ መካከል የባለቤትነት ውዝግብ ማስነሣቱ ተሰምቷል፡፡ ከሦስት ዓመት በፊት የቤተ ክርስቲያንን መሠረታዊ ህልውና እና ብሔራዊ መብት በመጋፋት አድልዎ እና ግፍ በሚፈጽሙ አካላት ድርጊት ተቆጭተው የተነሣሡት ወጣቶች በየአካባቢያቸው በመሰባሰብ በጥር ወር 2001 ዓ.ም የጥምቀትን በዓል በድምቀት እንዲከበር ማድረጋቸው ይታወሳል፡፡ ልምዱ ባለፈው ዓመት በተከበረው የጥምቀት በዓል የአስፋልት መንገዶችን በማጠብ፣ ቄጤማ በመጎዝጎዝ፣ ሥነ ሥርዐት በማስከበር እና በሌሎች የበጎ አድራጎት ተግባራት ጭምር ተጠናክሮ ታይቷል፡፡ ለቀጣይነቱ የወጣቶቹ ተወካዮች ወደ ብፁዕ ወቅዱስ ፓትርያሪኩ ቀርበው በመወያየት በስብከተ ወንጌል እና ሐዋርያዊ ተልእኮ መምሪያ ሥር ተደራጅተው እንዲንቀሳቀሱ እንደተፈቀደላቸው ተዘግቧል፡፡ መምሪያው በተለይ ከዚህ ዓመት መጀመሪያ አንሥቶ በማኅበራቱ(መጀመሪያ ላይ ብዛታቸው እስከ 85 ይደርስ ነበር) ሥር የተደራጁትን ወጣቶች በጠቅላይ ቤተ ክህነት አዳራሽ በመጥራት ከውሏቸው እና ከግንዛቤያቸው ጋራ የሚመጣጠን ትምህርት እና ምክር ለመስጠት ዐቅዶ ነበር፡፡

በአንጻሩ በሰበካ ጉባኤው ቃለ ዐዋዲ አንቀጽ 21 ንኡስ አንቀጽ አንድ መሠረት ዕድሜያቸው ከአራት እስከ ሠላሳ ዓመት የሚገኙ ሕፃናት እና ወጣቶች በየአጥቢያቸው የማደራጀት ሐላፊነት ያለበት የሰንበት ት/ቤቶች ማደራጃ መምሪያ፣ ‹‹በማኅበራቱ የታቀፉት ወጣቶች እንደመሆናቸው መደራጀት ያለባቸው በእኔ ሥር ነው፤›› በሚል የይገባኛል ጥያቄ አንሥቶባቸዋል፡፡ ወጣቶቹ የአጥቢያ አብያተ ክርስቲያን ሰንበት ት/ቤቶች ባላቸው የአባላት አቀባበል፣ ሥልጠና እና አገልግሎት መስፈርት መሠረት ታቅፈው በየሰበካቸው እንዲንቀሳቀሱ አልያም ‹‹ከጥምቀት በዓል በፊት እንዲበተኑ›› የሚሹት የማደራጃ መምሪያው ሐላፊ የስብከተ ወንጌል እና ሐዋርያዊ ተልእኮ መምሪያን በመክሰስ ለፓትርያሪኩ አቤቱታ ማቅረባቸው ተመልክቷል፡፡ የስብከተ ወንጌል እና ሐዋርያዊ ተልእኮ መምሪያ በበኩሉ ‹‹በማኅበራቱ ውስጥ ዕድሜያቸው ከሠላሳ ዓመት በላይ የሚሆናቸው ጎልማሶችም ስለሚገኙ በስብከተ ወንጌል አሠልጥኖ ለአገልግሎት የማዘጋጀት ድርሻው የእኔ ነው፤›› በማለት አቤቱታውን ቢከላከልም ከፓትርያሪኩ ጽ/ቤት ወጣ በተባለ ደብዳቤ ማደራጃ መምሪያውን ይቅርታ እንዲጠይቅ መደረጉ ተጠቁሟል፡፡

ቀደም ሲል ወጣቶቹን በማእከላዊነት የሚቆጣጠር አካል አለመኖሩን መነሻ በማድረግ በቲ-ሸርት ላይ የሚጻፉ ‹‹ተንኳሽ›› የሚላቸው ጽሑፎች (‹‹ኢትዮጵያ የክርስቲያን ደሴት ናት›› የሚለው ዓይነት) እና ወጣቶቹ በተጠናከረ አኳኋን የሚያካሂዷቸው ግልጽ የአደባባይ ክዋኔዎች በሌሎች ላይ ሊያሳድሩ ከሚችሉት ሥነ ልቡናዊ ጫናዎች አንጻር እንዲታገዱ ቤተ ክርስቲያኒቱ ትእዛዝ እንድታስተላልፍ የፌዴራል ጉዳዮች ሚኒስቴር ሐላፊዎች ፓትርያሪኩን ጨምሮ ከቋሚ ሲኖዶስ አባላት ጋራ መምከራቸው ተዘግቧል፡፡ በዓሉ ሃይማኖታዊ እና ይዘቱም መንፈሳዊነቱን የጠበቀ እስከሆነ ድረስ የተነሣው ስጋት ሊኖር እንደማይገባው ይልቁንም በተለያዩ ቦታዎች በቤተ ክርስቲያኒቱ ላይ የሚደርሰው የፍትሕ መጓደል እንዲገታ የሚያሳስብ ጥያቄ መቅረቡ ተገልጧል፡፡

ባለፈው ሳምንት ጥር ሦስት ቀን 2003 ዓ.ም ብፁዕ ወቅዱስ ፓትርያሪኩ በጠሩትና የሚመለከታቸው የጠቅላይ ቤተ ክህነቱ የመምሪያ ሐላፊዎች፣ የአዲስ አበባ ሀገረ ስብከት ሥራ አስኪያጅ እንዲሁም የወጣቶቹ ተወካዮች በተገኙበት በተደረገው ስብሰባ ማኅበራቱ፣ ”የፕሮቴስታንታዊ ተሐድሶ ኀይል አሠልጥኖ የላካቸው ወንጭፎች ናቸው” የሚል ክስ እንደቀረበባቸው እና ይህም ‹‹ማኅበረ ቅዱሳን ባካሄደው ጥናት በማስረጃ መረጋገጡ›› ተገልጾ እንደነበር ተነግሯል፡፡ ይሁንና ፓትርያሪኩ አለ የተባለው ማስረጃ በጥንቃቄ ተትንትኖ ለኀሙስ ጥር አምስት ቀን 2003 ዓ.ም እንዲቀርብ ትእዛዝ ቢሰጡም በዕለቱ በተደረገው ስብሰባ የተባለውን ‹‹ማስረጃ ተንትኖ ያቀረበ››ም ይሁን እንዲቀርብ ያስታወሰ አካል አለመኖሩ ታውቋል፡፡ ጉዳዩን አስመልክቶ አስተያየታቸውን የተጠየቁ ታዛቢዎች ‹‹እባብን ግደል ከነበትሩ ገደል›› ሲሉ ወጣቶቹን እና ማኅበረ ቅዱሳንን ለማጋጨት የታቀደውን ተንኮል አጣጥለውታል፡፡ በምትኩ ብፁዕ ወቅዱስ ፓትርያሪኩ፣ ‹‹ጠቅላይ ቤተ ክህነቱ ሐላፊነት ወስዶ ወጣቶቹ እንዲማሩ እናደርጋለን እንጂ እንዴት እንበትናቸዋለን?›› በማለት የማኅበራቱ አደረጃጀት እና ባለቤትነት ጉዳይ ከበዓሉ በኋላ ባለው የሳምንቱ መጨረሻ በሚካሄደው ምክክር እልባት እንደሚሰጠው መናገራቸው ተሰምቷል፡፡ በማደራጃ መምሪያው ሥር የሚገኘው የሰንበት ት/ቤቶች አንድነት ጉባኤ አመራሮችም የማኅበራቱን አመጣጥ እና ወቅታዊ ሁኔታ በማጤን የመፍትሔ ሐሳብ ለማቅረብ እየተዘጋጀ መሆኑ ተመልክቷል፡፡

በሌላ በኩል ቅዳሜ ጥር ሰባት ቀን 2003 ዓ.ም በአዲስ አበባ አስተዳደር ምክትል ከንቲባ ስብሰባ የተጠሩት የአዲስ አበባ ገዳማት እና አድባራት አስተዳዳሪዎች፣ የጠቅላይ ቤተ ክህነት መምሪያ ሐላፊዎች፣ የአዲስ አበባ ሀገረ ስብከት ሊቀ ጳጳስ ብፁዕ አቡነ ቀውስጦስ እና ሥራ አስኪያጁ ንቡረ እድ አባ ገብረ ማርያም ገብረ ሥላሴ በተገኙበት በጥምቀት በዓል አከባበር ዙሪያ ውይይት ተካሂዷል፡፡ ስብሰባውን የመሩት ምክትል ከንቲባው አቶ ከፍ ያለው አዘዘ እና የአዲስ አበባ ፖሊስ ኮሚሽን ኮሚሽነር ፈቃዱ ሰቦቃ በበዓሉ አከባበር በሰንደቅ ዓላማው ሕግ መሠረት ወጣቶቹ በሚያደርጉት የበዓል ቅድመ ዝግጅት የኮከቡ ዓርማ ያለበት ባንዲራ ጥቅም ላይ እንዲውል አለበለዚያ ባንዲራ መስቀሉ እንዲቀር፣ ቄጤማ ከመጎዝጎዝ፣ ‹‹ተንኳሽ ጽሑፍ›› የሰፈረባቸውን ቲ-ሸርቶች ከመልበስ፣ ምንጣፍ ከማንጠፍ እና ሞንታርቦዎችን ከመጠቀም እንዲከለከሉ ምክር እንዲሰጥ አሳስበዋል፡፡ ‹‹ጥምቀት በነጭ ልብስ እንጂ በቲ-ሸርት ይከበራልን? ቄጤማ መጎዝጎዝንስ ሥርዐቱ ይፈቅዳል?›› ሲሉም ጥያቄ ማቅረባቸው ተሰምቷል፡፡

የተባሉት ነገሮች በሙሉ ወጣቶቹ ቀደም ሲል በተዘጋጁበት አኳኋን እየተከናወነ በመሆኑ፣ የበዓሉ ዋዜማም በመድረሱ ምንም ለማድረግ አዳጋች እንደሆነ ከተሳታፊዎች ምላሽ ተሰጥቷል፤ ሂደቱን ከበኋላ በሚደረግ ውይይት ቢወሰንበት እንጂ አሁን ለማገድ መሞከርም በቅርቡ በአዲስ አበባ ዩኒቨርስቲ ‹‹ለአንዱ የሚደረገው ለሌላው እየተነፈገ የአንድ ወገን ዐምባገነናዊ አሠራር›› በመስፈኑ የተፈጠረውን ዐይነት ችግር እንደሚያስከትል የጠቅላይ ቤተ ክህነቱ ዋና ሥራ አስኪያጅ ለዩኒቨርስቲው አስተዳደር የጻፉትን ደብዳቤ በመኮነን ከመድረክ ለቀረቡት ትችቶች እና ጥያቄዎች ምላሽ ተሰጥቷል፡፡ አረንጓዴ፣ ቢጫ እና ቀይ መደብ ያለው የኢትዮጵያ ባንዲራም ሃይማኖታዊ ምሳሌ እና ትርጉም ጭምር ያለው በመሆኑ ባንዲራን መጠቀም የፖሊቲካ ወይም የተቃውሞ ምልክት ብቻ ተደርጎ ሊታይ እንደማይገባው፣ አገር የምትጠበቀው በጸሎትም እንደሆነ ቤተ ክርስቲያንም በክብረ በዓላቷ የስጋት ምንጭ ተደርጋ መታየት እንደማይገባት ብፁዕ አቡነ ቀውስጦስ መክረዋል፡፡

43 comments:

ዘክርስቶስ said...

ምነው ሰው ወዶ ወደ ቤተ ክርስቲያኒቱ ሲጠጋ እንኳን በደህና መጣህ ይባላል እንጂ የተሰበሰበውን ሁሉ “ተሐድሶ” ነው እያልን የእንካስላንቴ ወሬ የምንነዛው!? አባባሌ በስንዴ መሐከል እንክርዳድ አይኖርም ማለቴ ሳይሆን የተጨበጠ እውነታን ሳትይዝ ወጣቱን በአዲስ ስም መጥራት አልተዋጠልኝም። እንዲያውም የወጣቶቹን መሰብሰብ ድብቅ ዓላማ የያዘ ነው ብለን ሰማይ ደግፈን የምናድር ወገኖች ብንኖርም አሮጌ ልብሱን አውልቀን የክርስቶስ ገንዘብ ማድረግ ይጠበቅብናል። የቅዱስ ፓትርያርኩ አባባል ተስማምቶኛል።
የጽሑፉ አንድምታው ተረድቼዋለሁ፤ ነገርግን አምላክን ለማገልገልና ጠላትን ለማሸነፍ ከተፈለገ ሁሉም አማኝ ወደ አንድ ክብ መግባት አለባቸው። ይህ የጳውሎስ ይህ የአጵሎስ፤ ያልሰለጠነ አስተሳሰብ ከመሠረቱ ለመፋቅ እንታገል!
መፍትው አሀዊየ እብለክሙ እንቋዕ አብፀሐክሙ ለበዐለ ጥምቀት!

Anonymous said...

Hiiiiiiiiiiiii dear dejeselamawyan?
This is very interesting and critical time. On my side I have an opinion that the church should observe attentively and put regulations for this type of movement. thankyou.

Anonymous said...

እረ እባካችሁ ስለ ፍቅር ብላችሁ እናንተ ማህበረ ቅዱሳን ነን ባዮች- ፀረ አንድነት፣ ፀረ ሰላም፣ ፀረ ፍቅር
ፀረ አባቶች፣ ፀረ ቤተክርስቲያን፣ ፀረ ሀገርና ፀረ ሊቃውንት የሆነ የሰይጣን ሥራችሁን አቁሙ።

አስመሳይ ክርስቲያንነትን ትታችሁ ከእውነተኛ ክርስቲያኖች ጋር በመተባበር ሀይማኖታችንና ቤተክርስቲያናችንን
በአንድነት አገልግሉ። እንደ ዘመነ አይሁድ ክርስቲያኖችንና ሐዋርያትን አታሳዱ። እነሱስ መቼም ሳይገባቸው
ና የትንቢት መፈፀሚያ ሊሆን ግድ ነውና፣ እናንተ ግን እናውቃለን፣ ካለኛ ክርስቲያን የለም፣ እያላችሁ
ታወሩ አይደል እንዴ+ ታዲያ ካላችሁ ፦ ከመንፈስ ፍሬዎች አንዱ ክርስቲያኖችን እርስ በርስ ማቃቃር
ነው እንዴ ወደ ቤቱ የሚገባውን ማጣላትና ማስወጣት ነው እንዴ እረ እናስተውል።

ቤተ ክርስቲያናችንን በሆነ ባልሆነው እያደማችሁ ይሀው ለዚህ የመከፋፈል ቁስል ካንሰር ዳረጋችሁት።

እረ በቃ፣ እረ በቃ፣ በንስሀ ተመለሱ ይብቃችሁ የትንቢት መፈፀሚያም አትሁኑ አስተውሉ።።።።።።

Anonymous said...

Wearing T-shirts with quoats at addis AAU campuses is strictly forbidend by a letter posted today(posted by aau dean of students) they are enforcing as for improper actions. May god be with us

ድሉ የእግዚአብሔር ነው said...

ማኅበረ ቅዱሳንን ከክርስትና ሃይማኖት አንጻር ሳይሆን እኔ የማያቸው እንደ አገር ወዳዶች ነው። ለምን የተዋጊነት ባህርይ ይታይባቸዋልና። እውነተኛ የእምነት ሰዎች የጠፋውን እየፈለጉ ያገኛሉ/ያድናሉ እንጂ እያደኑ አያሳድዱም። የወንጌል ሐዋርያዎች ካንደበታቸው የሚወጣው ቃል፥ ከብዕራቸው የሚመነጨው መስተፋቅረ ሰብ ሁሉ ወደ ክርስቶስ ልጅነት የሚስብ ነው። ከማኅበረ ቅዱሳን ይህን መመዘኛ አላይም። በነሱ የሀሳብ ጎዳና የት እንደሚወስዱት ሳይጠይቅ የሚከተላቸውን ሁሉ 'ቅዱስ'እያሉ ሲቀበሉ ፥ የት ነው የምትወስዱን እያለ የሚጠይቀውን ሁሉ ግን 'ተሐድሶ ወይም መናፍቅ ' እያሉ ከእናት ቤተክርስቲያኑ እንዲባረር ያደርጉታል። ስለዚህ ይህን ክፉ ስም መጎናጸፍ የሚፈራ ሁሉ በፍርሀት ተሸማቆ እነሱን እንዲከተል ያደርጉታል። ይህም በመሆኑ እነሱን እኔ የማያቸው እንደ አገር ወዳዶች እንጅ እንደ የወንጌል ሰዎች አድርጌ ለማየት እቸገራለሁ።
የሰጠሁት አስተያየት ማንንም ለማሰናከል እንዳልሆነ ይታይልኝ ።

Anonymous said...

Mahiber kidusanan Meukes asafari naw.Andisaw besetaw hasabulay.Mikiniyatum you are totally out of the aim & the goal of Mahibere Kidusan.Do you know white Dove.They are the club of commemoration of saints as well as Turning young generation to the ever lasting Kingdom of God and Defending Our Church from bad thinkers Like you.
Gashaw .

ሲራክ said...

እንኳን ለጥምቀት በዓሉ በሰላም አደረሰን! እንደው "መዲናዋ" የምትለውን ነገር ተወት ብታደርጓት...

Anonymous said...

ነገሩ እኮ እንዲህ ነው፡፡ በእነዚህ 62 ማኅበራትና በማኅበረ ቅዱሳን መካከል ጠብ እንዲፈጠር የሚፈልጉ ክፍሎች ነገር እየሰሩ መሆኑን እንደተደረሰበት ነው ዜናው የሚያትተው፡፡ አንባቢው/ዋ፣ ማኅበረ ቅዱሳን በሃሰት እየተወነጀለ እንደሆነ ነው እኮ የማኅበራቱ አመራሮች የተገነዘቡት፡፡ የምናነበውን ካላገናዘብነው ችግር ነው፡፡ እውነታው በጎም ይሁን ክፉ የምንሰጠው አስተያየት በአንድ ጉዳይ ላይ ያለንን አቀባበል ወይም ጥላቻ በግልጽ የሚያስረዳ ይሆናል፡፡ የአስተያየት ሰጪውም ጽሐፍ ማኅበረ ቅዱሳንን እንደሚጠላ የሚያሳይ ነው፡፡ በአጭሩ ዜናው ተገልብጦ ነው የተነበበው፡፡

Anonymous said...

ዘ ክርስቶስ-ድሉ...- ዛሬ ደግሞ ማህበሩን በ"ፀረ..." የጨረስከው:-
አንድን የአማርኛ ጽሑፍ የማንበብና የመረዳት ብቃት የሌላችሁ ግለሰቦች ለስድብ ምላሳችሁን ከማርዘም ይልቅ ምናልባት ክርስቲያኖች ከሆናችሁ አሳጥራችሁ ለምስጋና ብታውሉት የሚበጅ ይመስለኛል:: እናንተ ማህበሩን ለማብጠልጠል ተጨባጭ ምክንያት ሳይሆን ስሙን ብቻ ተጽፎ ማየት ይበቃችኋል:: ይህ ደግሞ ከክርስትና ሥነ ምግባር ውጭ ስለመሆኑ ሌላ ማንም ሳይሆን ራሳችሁ ላይ የተቀመጠው ህሊናችሁ ይነግራችኋል::
እስኪ ማን ይሙት ሌላውን መራቀቅና አግር መጥቀሙን ተውትና ማህበራቱንና ማህበረ ቅዱሳንን ለማጋጨት የሚፈልጉ አካላት እንዳሉ መገለፁን መረዳት ተስኗችሁ የጽሑፉ ጭብጥ አድርጋችሁ ለአስተያየት መረባረባችሁ የጤንነት ወይስ?
ለነገሩ ማህበሩ ለተዋህዶ ጽናት ምክንያት የሆኑ አባቶች በያሉበት በአገልግሎት እንዲጸኑ የሚያደርገውን ጥረት የምታወግዙ: በአንፃሩ ይህችን ጥንታዊት ቤተ ክርስቲያን ከሥሯ ሊመነግሉ የሚታገሉቱን ባያችሁት ተጨባጭ ማስረጃ በአባቶች ማስወገዙን የምትቃወሙ እናንተ እነማን እንደሆናችሁ ለመረዳት ብዙ ማንሰላሰልን የሚጠይቅ አይደለም:: እናም ሳይመሽ አቅጣጫችሁን በብርሃን(ወንጌል) አስተካክሉ::
"የት እንደሚወስዱት ሳይጠይቅ የሚከተል..." በሚለው አገላለጽህ ግን ልታፍር ይገባሃል:: ምክንያት-አሁን በአብዛኛው ማህበሩን ይከተላል የምትለው ሰው ይህችን ጥያቄ ለመጠየቅ ቢያንስ ቢያንስ ያንተን ያህል ብቃት አለው::

እባክህን ፈጣሪ ከተናግሮ አናገሪ ጠብቀን!
ሰላመ እግዚአብሔርን ይስጠን!
ከክፉ ይልቅ ደግና ለቤተክርስቲያን የሚያስብን አእምሮ ያድለን::

Anonymous said...

I do attend a church whose parishners are mainly Members of MK. The youth and the deacons give a commited and wonderful service. But, at times, they seem to focus mostly on Ethiopiawinetachin rather than Christian'netachin. That puzzles me a lot. I wish the main focus is for us to Worship God and not show our pride on our ancestors good work. Let us be follow our fathers foot step. Serving and Worshiping God from heart regardless of our origin or ethnic affiliation.

Anonymous said...

ውድ ወገኖቼ ማህበረ ቅዱሳንን ባልተገባ መንገድ የመንቀፍ ነገር በዚህም ሆነ በሌላ መድረክ ተደጋግሞ ሲነሳ አንብበናል፡፡ አድምጠናል፡፡ ማህበሩ ለእንደዚህ ዓይነቱ እንቶ ፈንቶ ምላሽ በመስጠት ጊዜውን ማባከን ባይገባውም፤ በዚሁ የጡመራ መድረክ በተመሳሳይ ሁኔታ ለሚነሱት ነቀፌታዎች ምንም አለማለት እንደኔ ላለ ተራ ክርስቲያን ግርታን ሊፈጥር ይችላል፡፡እንደኔ አንደኔ አስተያየት ሰጭዎች አስተያየታችንን ከመስጠታችን በፊት እስቲ ከወገንተኝነት በጸዳ ህሊና በማስረጃ በማስደገፍ ሃሳባችንን እንሰንዝር፡፡ ይህ ካልሆነ በሃሰት እየመሰከርን ምኑን ክርስቲያን ሆንነው፡፡ከዚህ ቀደም የተሰጡትን የተቃውሞና የነቀፌታ አስተያየቶች ለመቀበልም ሆነ ላለመቀበል ይረዱናልና አስተያታችንን በማስረጃ ማስደገፋችንን ዘወትር አንዘንጋ፡፡ ምክንያቱም በማህበረ ቅዱሳን ላይ የተሰነዘሩትን ክሶች የሚያስረግጥ በማስረጃ የተደገፈ ነገር በምንም መልኩ ቀርቦ አላስተዋልንም እና ይልቁንም የነቀፌታ አስተያየት አቅራቢዎቹን በሌላ ነገር (የእነ አጅሬ ወገን እንደሆኑ) እንድንጠረጥር ያስገድደናል፡፡ስለምን

• የኢ/ኦ/ተዋህዶ ቤተክርስቲያንን በይፋ ለማፍረስ በገንዘብ እርዳታና አቅም በፈቀደ ሁሉ ከራሳችን አብራክ የተከፈሉ ልጆቻችንን ቀደም ሲል በአዳራሽ በመሰብሰብ እና በማዝመት ይተጋ የነበረው አሜሪካዊው ፓስተር ዊሊያም ብላክ (William Black)፤

• በመናፍቅነት፣ አባቶችን በመናቅና በስድብ ከምንም በላይ ደግሞ በአፍቅሮተ ንዋይ በተጨባጭ በተደገፈ ማስረጃ የሚታወቀው የ“ተዋህዶ” ሰባኪ በጋሻው ደሳለኝ ፤

• አባቶችንና ምዕመናንን በመሳደብና በመከፋፈል በስልጣን እና አፍቅሮተ ንዋይ ሰክረው የአዋሳን የተዋህዶ አማኞች ሲያምሱ የነበሩት እነ ያሬድ አደመ፣

• ከአፍቅሮተ ንዋይ በተጨማሪ የተሃድሶ ዘመቻን ለማስፈጸም የሚተጉትና ይህም በተጨባጭ በማስረጃ የተደረሰባቸው ኢትዮጵያዊ አሜሪካዊያን ወሮ በላዎች (ዊሊያም ብላክ በአግድሞሽ ምስክርነት የሰጠላቸው) እንደነ ፋንታሁን ሙጨ እና ጌታቸው ዶኒ…..

እንደ አንድ ልብ መካሪ እንደ አንድ ቃል ተናጋሪ ሆነው ስለማህበረ ቅዱሳን የሰጡት አስተያየት ወዳጆቹ ከሚሰጡት አስተያየት በላይ ተቃዋሚዎቹ የተናገሩት ብዙ በጣም ብዙ አስተማረን፡፡ የማህበሩ ጠላቶች የአንድ እናት ልጆች መሆናቸውም ማረጋገጫ ሆኖ ይገኛል፡፡ በዚህ መድረክ ሊዘረዘር የማይችል እጅግ አሳዛኝ መከራና ስቃይን ተቀብለው ይህችን ሃይማኖት ያቆዩንን አባቶቻችንን መሳደብ እና እነርሱን ከፈጁ፣ ጥንታዊ ቅርሶቻችንን ከዘረፉ፣ አብያተ ክርስቲናትን ካቃጠሉ ታሪካዊ ጠላቶቻችን ጋር መሰለፍ፤ዛሬ ዛሬ የሚያስነውር ሳይሆን የሚያስከብር የሚያስወቅስ ሳይሆን የሚያስመሰግን እየሆነ ነው፡፡ ዛሬም ሆነ ነገ የቀደሙ አባቶቻችን የነገሩንን እንጅ፣ ጠላቶቻችንም ሆኑ ጀሌዎቻቸው የሚሰብቁልንን በማር የተለወሰ ሰብቅ እየተቀበልን ባልተገባ አካሄድ ከመሄድ እንድንቆጠብ የቅዱሳን አምላክ ይርዳን፡፡ ማህበረ ቅዱሳን በእኔ አስተያየት ትናንትም ሆነ ዛሬ አባቶቻቸውን የሚወዱና የሚያከብሩ የኢ/ኦ/ተ. ዶግማና ቀኖናዋ ተጠብቆ ለትውልድ እንዲተላለፍ ጊዜያቸውን፣ ገንዘባቸውን እና እውቀታቸውን መስዋዕት በማድረግ አስገራሚ በሆነ ሁኔታ እየተጉ የሚገኙ እንደሆነ በተጨባጭ እናውቃለን፡፡ የቅዱሳን አምላክ እርሱ ብርታትና ጥንካሬን ከረጅም እድሜ ጋር ያድላችሁ፡፡ የቤተ ክርስቲያናችን ተስፋዋ እናንተ ናችሁና በርቱ፡፡

“የተሃድሶ ዕንቅስቃሴያችንን የሚያደናቅፍ ማህበረ ቅዱሳን የሚባል አንድ አድሃሪ ቡድን አለ“ አለ ዊልያም ብላክ፡፡

ዘክርስቶስ said...

ውድ ደጀ ሰላም? እኔ የሰጠሁትን አስተያየት ለአንዳንድ ወንድሞች ማሰናከያና ከዐውደ ንባቡ ውጭ መስሎ ከታያቸው ፍጹም ይቅርታን እንዲያደርጉልኝ ከልብ እጠይቃለሁ። እንደኔ ሳላነብ በስሜት ‘ኮሜንት’ አልሰጥም፤ ትግሌም የተበታተነውን ሐይል አንድ ሆነ አምላኩን እንዲያገለግል፤ለሀገራችንና ለቤተ ክርስቲያናችን የሚጠላ አካል ካለ ደግሞ በሕብረት መመከት እንዳለበት አምናለሁ እመክራለሁ።

ስለሆነም 9ኛው አስተያየት ሰጪው ወንድሜ {ከድሉ ጋር ያጣበቅኸኝ} ምናልባት ሐሳቤን በሌላ መንገድ በመተርጎም አይተኸው ከሆነ ይቅርታ አድርግልኝ እያለኹ ስጠይቅህ ከምን ተነስቼ እንደጻፍኩት ለማስታወስ ያህል ግን የሚከተለውን ለማንበብ ጊዜህን ብተሰዋልኝ ምን ይመስለሐል? ተጨማሪ ምክር ካለህም ለመታረም ዝግጁ ነኝ።
ከምስጋና ጋር


"ማኅበራቱ፣”የፕሮቴስታንታዊ ተሐድሶ ኀይል አሠልጥኖ የላካቸው ወንጭፎች ናቸው” የሚል ክስ እንደቀረበባቸው እና ይህም ‹‹ማኅበረ ቅዱሳን ባካሄደው ጥናት በማስረጃ መረጋገጡ›› ተገልጾ እንደነበር ተነግሯል፡፡ ይሁንና ፓትርያሪኩ አለ የተባለው ማስረጃ በጥንቃቄ ተትንትኖ ለኀሙስ ጥር አምስት ቀን 2003 ዓ.ም እንዲቀርብ ትእዛዝ ቢሰጡም በዕለቱ በተደረገው ስብሰባ የተባለውን ‹‹ማስረጃ ተንትኖ ያቀረበ››ም ይሁን እንዲቀርብ ያስታወሰ አካል አለመኖሩ ታውቋል"

"ብፁዕ ወቅዱስ ፓትርያሪኩ፣ ‹‹ጠቅላይ ቤተ ክህነቱ ሐላፊነት ወስዶ ወጣቶቹ እንዲማሩ እናደርጋለን እንጂ እንዴት እንበትናቸዋለን?›› በማለት የማኅበራቱ አደረጃጀት እና ባለቤትነት ጉዳይ ከበዓሉ በኋላ ባለው የሳምንቱ መጨረሻ በሚካሄደው ምክክር እልባት እንደሚሰጠው መናገራቸው ተሰምቷል"

ዘብሔረ.... said...

ከላይ አዋቂ ነኝ ባይ ኩታራ ምን ስለተናገሩ ነው ባነከሰ አማርኛህ ሰዎችን አዳቅለህ ለመስደብ የተነሳሳህ? ከመተቸች ለመተቸት መማር ይቅደምህ። መቼም ሐቁን ሲነገርህ እንደ ሰይጣን መበርገግ ተሰጥዎ ሆኖብሃል አይደል? ድንቁርናህን ለማስመስከር ነው የዘክርስቶስና የድሉ ለእግዚአብሔር መልእክት አንድ አድርገህ ያቀረብከው ?። ድሉ? ያየሀውን ለመመስከር ፈራ-ቸር አትበል።

Anonymous said...

ድሉ የእግዚአብሔር ነው። አሜን። ማቅ ምን ይሻላችሁአል እየዋለ እያደረ በጨለማ የምትሰሩት-
የፈሪሳዊያን ሥራ በክርስቶስ ብርሃን እየተገለጠ ነው። ከሁሉ የሚገርመው የጌታችን የመድሐኒታችን
የኢየሱስ ክርስቶስን ሥም ይዛችሁ ክርስቶስንና ክርስቶሳዊያንን መውጋታችሁ ነው። ነገር ግን
የመውጊያውን ብረት ብትቃወም ላንተ ይብስብሃል እንደተባለው ነው የሚሆንባችሁ።

ምንነታችሁና ማንነታችሁን ህዝበ ክርስቲያኑ እንደሆነ ጠንቅቆ ያውቃል፣ እያወቀም ነው።
የማይገለጥ የተከደነ የተሰወረ የለምና። እኔ በጣም የማስበው ላወቃችሁ ጠንካራ ክርስቲያን
አይደለም። እንደተባለው ወዴት እንደምትወስዱአቸው ለማያውቁ ለለጋ ክርስቲያኖች ነው።

የሆነው ሆኖ ማንነታችሁን እራሳችሁም ስለማታውቁትና በኦርቶዶክስ ሥም ተሰይማችሁ
ኦርቶዶክሳዊውን ክርስቲያን ግራ ከምታጋቡትና ግራ ከምትጋቡ ቦታችሁ ባህል ሚኒስቴር
ይመስለኛል። ባህል ሚኒስቴር አላስገባ ካላችሁ ደግሞ ጌታ መሐሪ ነው የወጉትን፣ የሰቀሉትን
ያሳደዱትን ሁሉ ምርዋልና ወደ እርሱ ተመለሱ። እውነት እውነት እላችሁአለሁ ለታናናሽ
ወንድሞቻችሁ የምታደርጉት ሁሉ ለእኔ አደረጋችሁት እንዳለ ጌታችን ክርስቲያኖችን
ብታሳድዱ እሱን እንዳሳደዳችሁት ስለ ተናገረ እንዳይፈረድባችሁ ለማሳሰብ እንጂ ለመሳደብና
የባህል ሚኒስቴር ሥራችሁን ለማስቆም አይደለም። እኛማ ልንድንበት የሚገባንን አውቀናል።

ሐይማኖት የግል ነው ። በጅምላ ድህነት የለም። እንደ ግሪሳ ወፍ ግርርርርርርርር ብሎ
በመጋፋትም ድህነት የለም በማስተዋል ተጉዞ ጨርቁን መንካት ግን ያድናል። አሜን።።

Anonymous said...

I really admire ዘክርስቶስ. I have read all your previous and today’s comments which are genuine, evidential, meaningful and constructive. Especially when men insulted you, your responses are መንፈሳዊ. If I were you, I would not answer like you. Please continue teaching us

Anonymous said...

አሁንስ የ ዘክርስቶስ አራድነት ደግሞ እንደው በዛ። ትህትና ላለማለት ፈልጌ ነው ሀሳቦችህ ከልብ ከሆኑና የተዋህዶን ትምህርት የምትከታተል በህይወት በአገልግሎቱ ውስጥ ያለፍክ ከሆነ ያባቶቹም የአገልጋይ ወጣቶቹም ጭንቀት ሊገባህ ይገባል በቅንነት የሚያስብ የቤተክርስትያንን አባቶች የአገልግሎት ውጣ ውረድ የሚያውቅ የአገልጋዮችን ትጋት ያየ ወጣቶቹ አገልግሎታቸው መልክ እንዲይዝ የሚደረግን እንቅስቃሴን ከክርስቶስ እንደማራቅ እንደመበተን አድርጎ መውሰድና ሆን ብሎም ማስተጋባት ያሳዝናል ቤተክርስቲያናችንን ከሚፃረር መንፈስም የሚመጣ ሃሳብ ነው።ቤተክርስቲያናችን ትሰበስባለች እንጂ አትበትንም ታድያ ይሄ ሁሉ ድካም ለምንድን ነው? ወንድሞቼ ብስለታችሁን ለማፅናት ተጠቀሙበት ያልበሰለ ሰውን ማስደንበር አገልጋዮችን እንዲጠረጥር ማድረግ አላማው ምንድን ነው።አባቶችም ማህበረ ቅዱሳንም የጭንቀታቸው ምንጭ በ 80&90 ዎቹ በናዝሬት በሃረር በአዲስ አበባና በሌሎችም ቦታዎች የነበረውን የበግ ለምድ ለባሾች፣ የጥፋት ተልእኮ አራማጆች ያደረሱት ትርምስ እንደሆነ የምናውቅ እናውቃለን። ይህንን ደግሞ በእርግጥ ምስክር ባያሻም ወጥተው የነበረ ጌታ ረድቷቸው የተመለሱ እያለቀሱ መስሎን ነበረ ብለው መስክርዋል። ዋናው ነገር መናፍቃን እዛች ምድር አሉ የሉም? ካሉና መንገድ ከተገኘ እነዚህን ወጣቶች ለማሳሳት እንቅልፍ ይወስዳቸዋል ወይ? ምን አለ ነገሮችን ባልሆነ መንገድ እያጣጠፍንና በአፈ ጮሌ እየተበላለጥን በሌለ ነገር ከምንነታረክ እንደቤተክርስቲያን ልጅነታችን ለእናት ቤተክርስቲያናችን የሚጠቅም ለወንጌል መስፋፋት የሚረዳ ስራ ብንሰራ። እስኪ ሄደን በእውነት እየሆነ ያለውን እንይ። አባቶቻችን በወንጌል ትምህርት፣ በጸሎት፣ በትሩፋት..የበረቱ ስለነበሩ እግዚአብሔር ባወቀ ደግሞ ዘመኑን የተረዱ ባለምም በመንፈሳዊነትም ያደጉ የቤተክርስቲያን ልጆችን አስነስቶ ይሄው አደርጅቶ ቤተክርስትያንን እያስጠበቀ ይገኛል። በነገራችን ላይ ማህበረ ቅዱሳን ደርቡሽ፣ ጣልያን፣ ግራኝ ወይ ምእራባዊ ወይ አረባዊ አይደለም የእኛው ሰውዬ ልጅ የእኛው ሴትዮ ልጅ የእነዛው ልጆች ወንድምና እህት የኛው ዘመድና ጓደኛ እንጂ።የማህበረ ቅዱሳን መደራጀት ትምህርት እንዲስፋፋ መትጋት፣ ትውልዱን በትምህርት በአገልግት ማትጋት፣ የቤተክርስቲየንን ዜና ማስፋፋት፣ ገዳማትን መርዳት፣ አባቶችን መንከባከብ፣ ያአብነት ትምህርቱ እንዲቆይ ጠንክሮ መስራት፣ የስህተት ትምህርቶችን ማጋለጥ፣ ቤተክርስቲያናችን ለትውልድ እንድትተላለፍ የበኩልን ማገዝ፣ ባጠቃላይ ዘመነኞቹ እጣን እጣን መሽተታቸው/ብፁእ አቡነ ገብርኤል በቅርቡ እንዳሉት/ይገርማችሁዋል ብዙዎችን ያቃጥላል። የማህበረ ቅዱሳንን መደራጀት መናፍቃንና ተሀድሶዎች አይወዱትም፣ ፀረ ክርስቶሶች አይወዱትም፣ ቤተክርስቲያን ውስጥ የተሰገሰጉ ዘርና ጥቅም የተደገፉ አይወዷቸውም፣ አንዳንድ ፖለቲከኞች አይወዷቸውም። ለምን? ዘመንን ባልዋጀ አሰራር የሚጠቀም ቤተክህነት አሰራርና የአንዳንድ አባቶችን የዋህነት በመጠቀም ሊገኝ የሚችል የአላማቸው ማስፈፀሚያ መንገድ ይዘጋልና። እንጂ አንዳንድ ሰዎች እንደሚሉት የቤተክርስቲያን አባቶች በእምነት ደንግገው ስርአት ሰርተው ከሚያደርጉት ውጪ የሚባልም የሚፈፀምም እምነትና ስርአት የለም። ልቡ ውጪ ያለ ሰው የሚለው አያጣም እንጂ።
የተዋህዶ ልጅ ነኝ። ሰላም

Anonymous said...

+++
እንኳን ለብርሃነ ጥምቀቱ አደረሰን!!!
ሑሉኑም በጊዜው ዋጋውን የሚከፍል አምላካችን እንደሚከፈል የታመነ ነው!
ስለዚህ የሚያገለግል ያገልግል የሚያወራም ያውራ ሁሉም የዘራውን ያጭዳል!
ወገኖቼ እግዚአብሔርን የምናገለግል እኮ ሰዎቸ የምስጋና ወረቀት እንዲሰጡን አይደለም።
ለዚህች ለተቀደሰች ቀን ያደረሰን ቸሩ አምላካችን የተመሰነ ይሁን!

Anonymous said...

ፕሊስ አዋቂዎች ከሆናችሁ ተጨማሪ ስድብን ከምትደረድሩ ማስተባቢያችሁን እንደ ዘክርስቶስ በመረጃና በትሕትና አስደግፋችሁ አቅርቡልን።
ዘክርስቶስ ወላዲተ አምላክ ትባርክህ

ከምትሰድቡት አንዱ ነኝ

Anonymous said...

ውድ አንባቢ/ቢዋ (anonymous)
“ሐይማኖት የግል ነው ። በጅምላ ድህነት የለም። እንደ ግሪሳ ወፍ ግርርርርርርርር ብሎ
በመጋፋትም ድህነት የለም በማስተዋል ተጉዞ ጨርቁን መንካት ግን ያድናል። አሜን።”
ያልከው/ሽው የግል አዳኝ እንድንቀበል በዚህ መንገድ ከገለጽክልን/ሽልን ነገሩ ከማን ወገን እንደሆነ በግልጽ የሚያስረዳ ነው፡፡ ታዲያ የትኛው ክርስቲያን ነው የማኅበረ ቅዱንን ማንነትና ምንነት ያወቀውና እያወቀ ያለው?
”ድሉ የእግዚአብሔር ነው said...
ማኅበረ ቅዱሳንን ከክርስትና ሃይማኖት አንጻር ሳይሆን እኔ የማያቸው እንደ አገር ወዳዶች ነው። ለምን የተዋጊነት ባህርይ ይታይባቸዋልና።”
ወንጌሉ እኮ ስለወጊያ ትጥቅና ስለጠላት የውጊያ ታክቲክ ሳይቀር ይናገራል፡፡ ተዋጊነታቸው በጦር መሣሪያ እንዳልሆነ ደግሞ የፈጠጠ ሃቅ ነው፡፡ አንተን የገረመኸ ተዋጊነታቸው መሆኑ ራሱ ይገርማል፡፡ እኔን የሚገርመኝ ሁሉም ክርስቲያን ተዋጊ ሊሆን ግድ በሚልበት ክርስትና የውጊያ ታክቲካቸው እንደ እኔና አንተ የአሉባልታ ሠራዊት በማሰለፍ ሳይሆን ዒላማውን የጠበቀ ከመናፍስትና ከዚህ ዓለም የጨለማ ገዢዎች ጋር መሆኑ ነው፡፡ የማይባርቅ ጥይት፣ የማይሸነፍ አሰላለፍ ይሏል ይኼ ነው፡፡
በዓለማቀፋኒት (በዩኒቨርሳሊዝም) ስም ኣርቶዶክሳዊነትን ከቀደመው በላቀና በላሸቀ የስነ ልቡና ቅኝ አገዛዝ ቀንበር ለመጣል፣ የራሷ ሲያርባት እንደሚባለው በሰዶማዊነት (ወንድ ከወንድ ሴት ከሴት፣ ሰው ከእንስሳ ሲያራክቡ) እየሰጠሙ የለም ብቻችንን አይደለም እናንተም መስጠም አለባችሁ ለሚሉን ለመስጠት ደፋ ቀና ባዮች እባካችሁ ደጀ ሰላም የሁሉም ናት ግን ወደልቡናቸው ለተመለሱ፣ ምዕራባዊነት መራር የኃጢአት ምንጭ መሆኑን ለተረዱት ነውና ውጊያ፣ አርበኛ፣በጅምላ ድኅነት የለም፣ ግሪሳ ወፍ እያላችሁ ባልተገራ ክንፍ ግርርርርርርርርርርርርር እያላችሁ ማረፊያ እንዳጣ ወፍ ግር አትበሉ፡፡
ዘክርስቶስ ተባረክ፣ ካፍ ሳይሆን ከልብ የሚሆነው ትኀትናህ አስተማሪዬ ሆኗል፡፡

Anonymous said...

selam Dejeselamaweyan
Be 2001 besenbet tmehert bit ser honi kenesu gar yemeserat edel getemon neber wetatochu le hayemanotachew kalachew feker yetenesa becha new yehen yemiyedergut kemanem yetelkum hone swer alma yalachew aydelum wegenochi enzi nefsat yenane erdata yeflgalu amlak wedbitu tertowachewal ena demo endit bebitu mesenat endalebachew enasayache.
Fetari yagezen

ድሉ የእግዚአብሔር ነው ! said...

ማኅበረ ቅዱሳንን ከክርስትና አንጻር ሳይሆን ክሀገር ወዳድነታቸው አንጻር ነው የማደንቃቸው የሚል አስተያየት በመስጠቴ የተበሳጩ መልስ ሰጭዎች የሰጡትን አስተያየት ተመልክቻለሁ። መልካም ነው ። መድረኩ መማማሪያ እስከሆነ ድረስ እኔም ላስተምር ብየ ወደ መድረኩ ከምመጣው ይልቅ እማራለሁ ብየ ነው የምመጣው። 'ተዋጊነት ይታይባቸዋል' ባልኩት ላይ አንድ አስተያየት ሰጭ ፥ ውጊያውን እኔ ለማለት በፈለኩት አላዩትም። እዎ እኔ ''ተዋጊነት '' ስል ዓለማዊና ሥጋዊ ተዋጊነትን ለመግለጽ ነው እንጂ ወንጌላዊ የሆነውን መንፈሳዊ ውጊያ ማለቴ አልነበረም። ለመሆኑ ይህ ሁሉ ውጊያ መንፈሳዊና ወንጌላዊ ነው ለማለት እንደፍራለን ? ማነው ዛሬ መንፈሳዊ ውጊያ የሚደርገው ክርስቲያን ? መንፈሳዊ ውጊያስ ስንል ምን ማለታችን ነው ? " የክርስቶስ ተከታይ አንድ ወታደር ነው፣ በመንፈስ በኩል ከሰይጣንና ከኃጢአት ጋር ይዋጋል" (2 ቆረንቶስ 10፥ 3-5፥ 1ጢሞ 1፡18። 2ጢሞ. 2፥3-4። ያዕ. 4፡1፥ 1ጴጥ. 2፡11) "ዕቃ ጦሩም መንፈሳዊ ነው " (ሮሜ. 13፡12። 2ቆሮ. 6፡7። ኤፌ. 6፡ 11-18። 1ተሰ. 5፡8)ታዲያ በዚህ ዓይነት ነው የዛሬው ውጊያችን? በውኑ ውጊያችን ከሰይጣንና ከኃጢአት ጋር ነው ?
"አይቴ ሀለው ቀደምት መነኮሳት ? ምንባሮሙ ገዳማት፥ ወመብልኦሙ ቆጽለ ሐመልማላት፥ ኢፈርህዋ ለሞት ፈርህዋ ለኃጢአት=በጥንት ጊዜ መኖሪያቸው በገዳማት ፥ ምግባቸውም ለምለም ቅጠል የነበረው ቅዱሳን መነኮሳት -ኃጢእትን እንጂ ሥጋዊ ሞትን የማይፈሩ የነበሩት የነሱ አይነት ቅዱሳን ዛሬ የት ኣሉ?" እሴብሕ ፀጋኪ። ዛሬ በስም እንጂ በግብር ቅዱስ ማን አለ ? ለምሆኑስ '' ማኅበረ ቅዱሳን'' የሚለው ስም አይበዛባችሁም ? በእውነት ማኅበራችሁ የቅዱሳን ማኅበር ነው ? እኔ ግን የኢትዮጵያውያን ሀገር ወዳዶች ማኅበር ብትሉት ስማችሁ ለግብራችሁ እንደ ሰምና ወርቅ ይሆናል እላለሁ። ተዳፈርኩ ይሆን ? ከሆነ ይቅርታችሁን በቅድሚያ እጠይቃለሁ። ምክንያቱም ለምወዳት እናት አገሬ ያላችሁን ፍቅርና ተቆርቋሪነት ስለምጋራ። ትላንት በአባቶቻችን የተሠሩት አኩሪ ታሪኮቿ፥ መንፈሳዊ ቅርሶቿና ትውፊቶቿ በዛሬውም ትውልድ ተጠብቀው ለቀጣዩ ትውልድ እንዲተላለፉ ለማድረግ የምታደርጉትን ጥረት አደንቃለሁ። ይህን በሚመለከት የትውልድ አደራችሁን እየጠበቃችሁ ነው እላለሁናባጭሩ በርቱ ነው መልክቴ ።

Anonymous said...

የደጀ ሰላም ብሎግ በማንበብ ደረጃ ተጠቃሚ እንጂ አስተያየት በመስጠት እንዳልሳት ከማለት ፍራቻ የተነሳ ያልተጋሁ የኦርቶዶክስ ተከታይ ነኝ። እንዲሁ አልፎ አልፎ ጽሑፎቻችሁን ሲነካብኝ እነሳለሁ እንጂ። በጣም ከገረመኝ ግን ልንገራችሁ፦ የተወሰኑ ሰዎች የፊደል ለቀማ ካልሆነ በስተቀር የሚያስተላልፉት መልእክት ማእከላዊና መሠረታዊ ሲሆን አንዳንዶቹ ደግሞ ‘ፖስት’ የተደረገውንና ሒስ የቀረበበት ከምን ተነስተው መሆናቸው ሳያስተውሉ እኔን ለመንካት ፈልጎ ነው በሚል ጥርጣሬ በስሜት ጎዳና የሚፅፉባቸው ታዝቢያለሁ። አንዳንዱን ደግሞ ማን ነው ይህን ሐሳብ የፃፈው ብሎ ቼክ ሳያደርግ የሌላውን በሌላ ስም ተክቶ ለስድብ በስድብ የሚታኮስ ቃኝቻለሁ። ሌላኛውን ደግሞ የስድብ ሱስ ያለበት ወገን አይቻለሁ።
እስኪ የተሳሳትን እነማን መሆናችን የፃፍነውን ደግመን እንመርምረው? ደህነኛውን እናበረታታው የተሳሳተውን ደግሞ በዚህ ቦታ ተሳስተሃል ብለን ስሕተቱን በግልጽ እንዲያርም እንንገረው። በበለጠ ደግሞ እኔ ራሴ ምን ያህል ተሳስቻለሁ ብለን ራሳችንን ለማረም የሚያሳይ መነፅር እንግዛ።
ጽዮነይቲ

Anonymous said...

ከ"ዘክርስቶስ ሰዳቢዎች አንዱ ..." በመሠረቱ ጎራህ ከተሳዳቢዎች ዘንድ ከሆነ ይህ ብሎግ ስለማይመለከትህ ስድብ መፃፉ ብዙ የሚጠቅምህ አይደለምና ብትተወው መልካም ነው::ተሳዳቢዎች ከእግዚአብሔር ዘንድ አይደሉም::

ቁም ነገሩ የማስረጃ እጦት ሳይሆን አንተ ማስረጃ ብለህ በምታምነውና በትክክለኛው ማስረጃ መካከል የለው ሰፊ ልዩነት ነው:: "አውቆ የተደበቀ ቢጠሩት አይሰማም"አይደል ነገሩ?

ቅን ልቡና ቢኖርህስ ካንተ በላይ ሁለተኛው አስተያየት ሰጭ የፃፈው ብቻ ባስተማረህ ነበር::

እስኪ ሁሉን ቻይ ፈጣሪ መስሎ አዳሪን ከእውነተኛ:ብርሃንን ከጨለማ የምንለይበት ልቡና ለአንተም ለእኔም ያድለን::

"በሥራቸው ታውቋቸዋለችሁ"

Mimi said...

አገር የምትጠበቀው በጸሎትም እንደሆነ ቤተ ክርስቲያንም በክብረ በዓላቷ የስጋት ምንጭ ተደርጋ መታየት እንደማይገባት ብፁህ አባታችን የተናገሩት ተገቢ ነው፡፡ አንደውም ለፖሊስ ሰራዊት አባላት እገዛ ነው ያደረጉት ወጣቶቹ፡፡ እንደው የዑራኤልን አጥቢያ ወጣቶችን ያየ እንደው ላባቸው እንደዛ እየፈሰሰ እግዚአብሔርን ሲያገለግሉ እያየን ምን ሊጠቀሙ ረብሻን ይፈጥራሉ.. ኧረ

መጨረሻቸውን እግዚአብሔር ያሳምርልን
ከገቡበት የጽድቅ መንገድ አያውጣብን

አሜን

Fitsa said...

Beneger hulu abatachin Egziabher yimesgen ahun sira eyetesera new mallet new telat wugiyawun abertitual. Mahiberekidusan ahun yebelete litiseru yetelatim mishig yibelt linad yigebal kidusanin betegadiloachew hulu abro yenebere geta kenante gar endale amnalehu . kiristian yisededal enji ayasadidim geta yeasadochin kend yimetal enersun gize eyegeletachew new enante zim bilachu sirachun siru .
Geta eyesus hoy kibir leante yihun bezih hulu mekera wust betekristianin atsintehatalina … yewust atsirare betekristianin astagisilin amen.

Anonymous said...

እንኳን ለጥምቀት በዓሉ በሰላም አደረሰን!!!
የወጣቱስ ሥራ ያኮራል እንጂ አይነቀፍም ። በእዉነቱ ለታቦተ ሕጉ የሚገባውን ክብር ነው ያደረጉት ።
መንግስት ደግሞ በዩኒቨርስቲዎች የሚያደርገው አልበቃ ብሎት "T - shirt አትልበሱ፣ ቀጤማ አትጎዝጉዙ -----------" ማለት ጀመረ ?
የሚገርም ነው ። ለነገሩ እንደኔ እንዴ የልብ ልብ የሰጠው የኛ ሰዎች ለበዓሉ ያላቸው ክብር ነው ።
የታዘብኩትን ልንገራችሁ ። ጃንሜዳ የጥምቀተ ባህሩ ስነ-ስርዓት እየተካሄደ ነው ፕሮግራም መሪው " ፓትርያሪኩን፣ የሀገረ ስብከቱን ጳጳስ ሌሎችንም "ስማቸውን ከነክብር ስማቸው እየጠራ መጣና የመንግስት በለ ስልጣናትንም " ክቡር እገሌ ክቡር እገሌ -----" እያለ መጥራት ቀጠለ ። እኔ አሁን የባለሥልጣኑ ስም ተጠራ ብዬ አይደለም " የሚገርም " ያልኩት ከዚህ በሁአላ የሰማሁት ነገር ልቤን ነክቶኝ እንጂ ። ፕሮግራም መሪው አስከትሎ " የልዩ ልዩ ሃይማኖት ተወካዮች " ብሎ ቁጭ አለ ። ቆይ እኒህ ሰዎች ጥሪ ተደርጎላቸዋል ? ከሆነ የኞቹም ከእነርሱ ይጠራሉ ማለት ነው ። ምን ችግር አለው ? የሚል ቢኖር" መሪዎቹ አያምኑበት፣ አያዉቁት ምን አግብቶአቸው ይመጣሉ ። ችግር አለው እንጂ" ። ዳዊት እንኩአን " እግዚኦ ቦዑ አሕዛብ ወአርኮሱ መቅደስከ" ነው ያለው እናም ቤተ ክርስቲያን መስመር እየለቀቀች ይመስለኛል ? እኔ በበኩሌ አዝኛለሁ
እግዚአብሔር ልቦናውን ይስጠን !!!!!!!!

Anonymous said...

Dear colleagues,

Almighty and we know who is who and what their intentions are. Their goal is to destruct the church and their end is hell. That is defined from the outset. They dig for money day and night. They use children and females for their business, 'Mezmur'. When they get defeated they point fingers to Mahibere Kidusan. You have really failed and don't try to fail again. Yikoyen

Anonymous said...

"ለምሆኑስ '' ማኅበረ ቅዱሳን'' የሚለው ስም አይበዛባችሁም ? በእውነት ማኅበራችሁ የቅዱሳን ማኅበር ነው ?"

ውድ ድሉ…
ለጽሑፍህ መልስ የሰጠሁት በብስጭት አይደለም፡፡ ለምንስ እበሳጫለሁ? ግራና ቀኝ ማየት ካልቻልኩ እንደሠፈር ወሬ በዋዛ ላመልጥ አልችልም፡፡ አስተያየቴን የሰጠሁት ዓለም ሁሉ እንደ ጅብ ከብቦ በሚመገብበት የመረጃ ማዕድ ላይ ነው፡፡ ስለዚህ ለመቀበል የምተጋውን ያህል ለአስተያየት የሚያነሳሳ ሲገኝም እንዲሁ በምስጋና ወይም በትችት መልክ መስጠቱ ክፋቱ ምን ላይ ነው?

በዚህኛው አገላለጽህም ጨለምተኛነት ይስተዋላል፡፡ ያለበቂ መረጃና ሚዛናዊነት አሁንም በማኅበረ ቅዱሳንና በቤተክርስቲያን የበላይ መዋቅር ተቀባይነት ባለው መልኩ ሳይሆን በራስህ ስሜት ትርጉም ለመስጠት መሞከርህ በማኅበሩ ላይ አኩራፊ ወይም ብስጩ መሆንህን የሚያረጋግጥ ነው፡፡
ማኅበረ ቅዱሳን ማለት የቅዱሳን ስብስብ ማለት ነው? ለዚህ ጥያቄ መልስ ለማግኘት ዋነኛ ማስረጃው የሚከተለው ነው፡፡
1. የማኅበሩ ማቋቋሚያና የመተዳደሪያ ደንቡ
2. ጠቅላይ ቤተክህነት በስሩ ባለው መምሪያ ሥር እንዲታቀፍ ያደረገው በምን ትርጉም እንደሆነ መረጃ በመጠየቅ
3. የማኅበሩ ድረ ገጽ፣ በየጊዜው የሚወጡ የኅትመትና የኦዲዮቪዡዋል ውጤቶች ናቸው፡፡
4. ቅንነቱ ካለ የማኅበሩን የበላይ አመራር መጠየቅም ያላዋቂነትን ሞራ ለመግፈፍ የሚያሰችል ነው፡፡

በነገራችን ላይ ማኅበረ ሐዋርያት በሚል የሚጠራ ማኅበር አለ፡፡ ሐዋርያት ናቸው ማለት ነው? ጴጥሮስ ወይም ጳውሎስ ወይም ከእነዚያ አንዱ ነኝ ብለው ነው የተሰባሰቡት፤ አገልግሎትንም የሚፈጽሙት?
ሥጋዊ ዓለማዊ ውጊያን ማለቴ ነው ማለትስ ምን ማለት ነው? ስትጽፍ አንተ በሚገባህ ሳይሆን ተደራስያንህ (አንባቢዎች) በቀላሉና ያለመደናገር መሰረታዊ መልእክቱን በሚረዱበት መንገድ መሆን አለበት፡፡ አቀራረብህ እኮ እንቆቅልሽ ዛሬ የበላሁት ምንድን ነው? ዓይነት ሆነ፡፡ አንድ ላይ የተቀመጥነው በመረጃ ማዕድ እንጂ በምግብ ጠረጴዛ ዙሪያ አለመሆኑን ገንዘብ በል፡፡ የጠቀስካቸው የወንጌል ምዕራፍና ቁጥሮች ያው እኔ በጽሑፍ ያሰፈርኳቸው ናቸው እነዚህን በመጥቀስ አዋቂነትን ወይም ትጉህ መንፈሳዊነትን ማስመስከር የሚቻል አይመስለኝም፡፡

ለመሆኑ ሥጋዊና ዓለማዊ ውጊያ ማለት፣
• ምን ማለት ነው?
• መቼ፣ የት፣ እንዴት፣ ይካሄዳል?
• እስከ አሁን የተካሄዱትም ያስገኙትን ድል ያስታቀፉንንም ኪሣራ ሰፍረህ ቆጥረህ አስረዳ፡፡ ያን ጊዜ እሰይ አገልግሎትህ ይበጅ ይደርጅ እንበልህ፡፡

የክርስቶስ ሰላም ይብዛልህ፡፡ አሜን

Anonymous said...

Dear Dejeselamawian,
I have read most of the comments from different readers, the most comments i have seen from those who are not belong here in this blog.
I always wonder back in Ethiopia, we have our neighbours and no matter they have in side their house. It's their problem, the only time people from the neigbour hood will be called up on during distrubance in that particular house, we lived with out law inforcement with the advice of elders from our neighbourhood, The only reason was that everyone there have a fear of God in their heart. However, here in our Orthodox problem we blem eachother and fight eachother, it's our problem not our neigbour's please "Protestant" stay out of this it's our problem and we will solve it. We are discussing in the house lord. Please go there and solve your own problem do not try to immdeat for our problem and not even consult us for what we are about to do, we all know with the help of our father we will cross the river and be on the top of the mountain.
So please we ask you humbly to leave our problem for us, we thank you for your kind and hostile answers and sugestions. We have got enough of you now let it settel now. please...please..
May the grace of God be with us all.
Thank you.

Anonymous said...

ስንት አየን "የእግዚአብሔር ድል"...

በመጀመሪያ ደጀሰላሞች በብሎጋችሁ ላይ የሚወጡ አስተያየቶችን ማጤን ብትችሉ መልካም ነው:: ምናልባት ምዕመናንን የጠቀምን መስሏችሁ በአንፃሩ የመናፍቃን እና ሌላ ተልእኮ ያላቸው ግለሰቦች መድረክ ወደመሆን እየተሸጋገራችሁ ያላችሁ መሆኑን የዘነጋችሁ ይመስለኛል:: ፖስት ካደረጋችሁት ርዕሰ ጉዳይ ውጭ የሚመጣን ሀሳብ(ያም አስተማሪ ከሆነ) ውጭ ማስተናገድ ስትጀምሩ በእርግጠኛነት የሌላ መጠቀሚያ ትሆናላችሁ:: መቼም የሚዲያ ተጽእኖ ለእናንተ የሚነገር አይሆንም::

በመቀጠል ግን ድሉ ስለሚባል አንድ ግለሰብ በመነጋገር ጊዜዬን በማጥፋቴ እያዘንኩ በቅድስናም ይሁን በርኩሰት መንዝሩት ለብሎጉ አዲስ ለሆነ አንባቢ አደናባሪ የሆነ ጽሑፉን ከማረም ወደኋላ አልልም::

ግለሰቡ በዚህ አጋጣሚ መልካም ሥራን በማርከስ የተዋህዶን ጽናት በመናፈቅ የሚተጉ ክርስቲያኖችን በማሳደድና ጥላሸት በመቀባት ገሃነም እንጂ ጽድቅ የለምና ፈጣሪ እንዲረዳህ እጸልያለሁ::

ከንቃተ ህሊናህ ውጭ (unconsciously) በሆነ መልኩም ይሁን ዓለማ ተልመህለት የምታደርገው ጥረት የእናት ጡት ነካሽ እያደረገህ ነውና ለህሊናህ(conscience) ቦታ ብተስጥ መልካም ይመስለኛል::

ይህ ሕዝብ ቃለ እግዚአብሔርን ሰምቶም ሆነ አንብቦ እንደማያውቅ "እንደነ እንትና" ያልተረዳህውን ጥቅስ መደርደርህ አሁንም ያስነቃብሃልና ሌላ ዘዴ መዘየዱ ሳያዋጣህ አይቀርም:: ወንበር ተክለህ ሳይሆን ወንበር ነቅለህ የያዝካቸው ቃላተ ግእዝም አይገቡህምና ያለቦታው ባታውላቸው መልካም ነው:: ከላይ አንድ ፀሐፊ እንደህፃን ልጅ ስለ ማህበረ ቅዱሳን ትርጉም ሊያብራሩልህ በመሞከራቸው በእርሳቸው ሳይሆን በአንተ እንዳፍር አስገድዶኛል:: ምክንያት:- ይህን ትርጉም ለመረዳት የተዋህዶ ልጅ መሆን ሳይሆን ኢትዮጵያዊ መሆን ብቻ ይበቃልና:: በአጭሩ ትርጉሙን እዚህ ብሎግ ሳትደርስ በአካባቢህ ያሉ መናፍቃን ወይም ኢ አማንያን ሊያብጠረጥሩልህ ይችሉ ነበርና ነው:: በዚሁ አጋጣሚ ግን ስለማህበረ ቅዱሳንን ወግኖ አስተያየት የሚሰጥን ሰው እንደ ርኩስ የምታዩ ታዳሚዎች ዓላማችሁ ግልጽ አይደለምና ምክንያት አብራችሁ ብትገልጹ መልካም ነው:: አስተያየታችን ከእውነት ያልወጣ እስከሆነ ድረስ ደግ ያደረገን ማበረታታቱ ኃጢአቱ ምን ላይ እንደሆነ ሊታየኝ ስላልቻለ ነው ይህን ማለቴ::

በመጨረሻ አሁንም የተዋጊነት ትርጉም ላይ ገና ነህና ለመረዳት ጥረት አድርግ:: የማታምንበት ከሆነ ይቅርታ አድርግልኝና ከተረዳህው ግን የነአርዮስንና የነንስጥሮስን የአንድ ወገንና የሰለስቱ ምእትን የሌላ ወገን ጦርነት ከየት ትፈርጀዋለህ?

እግዚአብሔር የአንተንም የእኔንም ልብ ያቅና:: አሜን!

ABYSSINIA said...

እባካችሁ በመጀመሪያ ደረጃ የፅሁፉን ጭብጥ በደንብ እንረዳ:: በተለይ ዘክርስቶስና አንዳንድ ወንድሞች ፅሁፉን እንደገና አንብቡት ማህበረ ቅዱሳንን በጭፍን የሚቃወም የማህበሩን አላማና ተግባር የማያውቅ ወይም ተሃድሶ ወይም መናፍቅ ወይም አህዛብ ወይም እምነት የሌለው...ሊሆን ይችላል::በተረፈ እግዚአብሄር አምላክ ለሁላችን የምናስተውልበት ልቡና ይስጠን አሜን::

Anonymous said...

Anonymous ድሉ የእግዚአብሔር ነው said...

ማኅበረ ቅዱሳንን ከክርስትና ሃይማኖት አንጻር ሳይሆን እኔ የማያቸው እንደ አገር ወዳዶች ነው። ለምን የተዋጊነት ባህርይ ይታይባቸዋልና።

ከዚህ በላይ ያለውን ለጻፍከው ለ'ልበክፉ በስም ይደግፉ'

"እግዚአብሔር ተዋጊ ነው ስሙ እግዚአብሔር ነው:-...." ዘጸአት 15:-3-4

ለማኅበረ ቅዱሳን:-

"ስለበጎ ፈቃዱ መፈለግንም ማድረግንም በእናንተ የሚሰራ እግዚአብሔር ነውና::" ፊልጵ 2:-13 በያላችሁበት በርቱልን::

እንወዳችኋለን!!!!!!!!!!!!!!!!!!!!!!!!!!!!!!

አክባሪ እህታችሁ:.

mebrud said...

"ድሉ" ስለ አድዋ ድል የምታውቀው ነገር አለ?
አገር ወዳድነትን ከመንፈሳዊነት ትገነጥለው ዘንድ እንደምን ተቻለህ ወዳጄ?
መንፈሳዊት የሆነች የኢትዮጵያ ኦርቶዶክስ ተዋህዶ ቤተክርስቲያን አርበኞችን ታቦት አስይዛ ለጦርነት ማሰለፏን አፈታሪክ ይሆን እንዴ?
አቡነ ጴጥሮስ መንፈሳዊ ናቸው ወይስ አገር ወዳድ?
አንተስ?

አሜን ወአሜን! said...

ወገኖች ሰላም ለሁላችን ይሁን ! አሜን ወአሜን !
በዚህ ጡመራ መድረክ ላይ የተለያዩ ሃሳቦች መስተናገዳቸውን የምትቃወሙ ግለሰቦች በማየቴ እገረማለሁ። የተለያየ ሃሳብ ካልሰማን ምኑን ውይይት ሆነ? ከዚህም በላይ ያመነውን ጠንቅቆ የሚያውቅ ሰው ምንም ቢያነብና ቢሰማ አይናወጥም።ስለዚህ የተለያየ አቋምና አስተያየት አንፍራ።
" . . .ያመንሁትን አውቃለሁና፥ የሰጠሁትንም አደራ እስከዚያ ቀን ድረስ ሊጠብቅ እንዲችል ተረድቼአለሁ።" (2ኛ ወደ ጢሞቴዎስ 1፥12)
ስብሐት ለእግዚአብሔር።
አሜን ወአሜን!

ድሉ የእግዚአብሔር ነው said...

ሰላመ እግዚአብሔር ከሁላችሁም ጋር ይሁን፤
ስለመንፈሳዊና ዓለማዊ /ሥጋዊ ውጊያ ባቀርብኩት አጭር ሃሳብ ኣንዳንድ ወገኖች የሰጡትን መልስ አይቻለው። በተለይ አንዱ ወገን የተቆጣ አይነት ሰው መስሎኛል። ቁጣ ግን የክርስቲያኖች መታወቂያ አይመስለኝም። እርሱ ግዕዝን ከመምሀራን እንደተማረ፥ እኔ ግን በጥራዝ ነጠቅነት የማላውቀውን እንደማውቅ አድረጌ እንደጻፍኩት አድርጎ ተችቶታል። አወ እኔ እንደ እርሱ ከቅኔ ቤት ገብቸ ቅኔን እስከ አገባቡ አልተማርኩም ይሆናል። ብማርምና ባውቅም እንኳ ተምሬአለሁ ፥ አውቃለሁ አልልም። ለምን ? አውቃለሁ ማለትንና በእውቀት መኩራራትን ወይም መታበይን (ግብረ ዲቁናም ቢሆን የተማርኩት ትምህርት )ያስተማሩኝ መምሕራን አላስተማሩኝም። የመጽሐፍ ቅዱሱን ጥቅስም ሲሉ ሰምቸ ነው የጠቀስኩት እንጂ እኔ እንደዚህ ወገኔ የጥቅሱ ባለቤት አይደለሁም። ያም ሆነ ይህ የጥቅሶቹ እውነተኛ ባለቤት ማን መሆኑን ለማወቅ የፈለገ ጥቅሶቹ የተቀዱበትን ምንጭ ከምንጫቸው ቀድቶ በመጠጣት ከጥማቱ ሊረካ ይችላል። የተጠማው ሁሉ ጠጥቶ የሚረካበት ምንጭ በዚያ በቅዱሱ ወንዝ ውስጥ ይገኛልና ፡፡
ስለአቡነ ጴጥሮስ ፣ ጀግናውና አገር ወዳዱ አቡነ ጴጥሮስ ሐምሌ 22 ቀን 1928 ዓ.ም በግፈኛው ፋሽስት ኢጣልያ በጥይት ተደብድበው የሞቱት የአርበኝነት ሞት ነው እንጂ ክርስቶስን እንዳያመልኩ በመከልከላቸው አይደለም። በክርስቶስ ስም በእህዛብ ሰይፍማ ቢሆን ኑሮ የሞቱት ቤተክርስቲያናችን ''ሰማዕተ ኢየሱስ ክርስቶስ'' ብላ በስማቸው ቤተክርስቲያን ታሠራላቸው ነበር። እምተቀንዮ በፋሽስት ይሔሰኒ መዊት ብለው በአርበኝነት ስለሞቱ ለዚያ መታሰቢያ ሐውልተ ስም ቁሞላቸዋል።
የአድዋው አውደ ውጊያም እንዲሁ የአርበኝነትና በባእድ ቅኝ ጋዛት አንገዛም ባይነት እንጂ ስለ ኃይማኖት የተደረገ ተጋድሎ አልነበረም። ክርስቶስ ስለስሜ ሙቱ አለ እንጂ እየገደላቸሁ ሙቱ አላለም። "ከመዝ ንግሩ ፥ ወከመዝ ግበሩ'' ነው ያለው። መን እንዳለ እና ምን እንዳደረገ ወንጌሉን እንመልከት። ልክ ነይ ስለግዕዙ ቃላት ? ካልሆንኩ ይቅርታ ይደረግልኝ። ግዕዝ ገና ወደ እናት ሀገሬ መልሶ ስላላጋዘኝ ግዕዝ ቃሉን አላጥፋው እንጂ ብስተው ሊፈረድብይ አይገባም። ...ኦ አምላኬ ኢየሱስ ክርስቶስ ! አግዕዘኒ እምአርዑተ ኃጢአት በከመ አግአዝኮ ለአቡየ አዳም ወአግባእኮ ኅበ ዘትካት መንበሩ እስመ አነ ውእቱ ወልደ ኣዳም።
አዎ ድሉ የእግዚአብሔር ነው !

mebrud said...

ድሉ እንኳንም በጣሊያን ወረራ ጊዜ አልተፈጠርን! አገሬ በሰማይ ነው ጣሊያን ክርስቶስን እንዳናመልክ እስካላደረገን ምን ቸገረን ብለን ህዛባችንን አስወርረን ነበር።
እንዴት ያለ የዋህነት ነው?አስበው በቅኝ ተገዝተን ቢሆን ስለሃይማኖታችን ስለተዋህዶ ዛሬ ምን ይተርፈን ነበር።እስቲ በቅኝ ተገዝቶ፣ቋንቋው ባህሉ ሃይማኖቱ ያልጠፋበት አለያም ያልተቀየጠበት የትኛው አገር ነው?
መቼስ "እነኛ መንፈሳዊ አባቶች በአድዋ መስዋዕትነት የከፈሉት አገራቸው በሰማይ እንደሆነ ሳይረዱት ነው " ብለህ አትሞግተኝም ።እንኳን እነሱ እኔና አንተም ይቺ አትጠፋንም።

ቤተክርስቲያናችን አገርና ሕዝብን እንድንወድ ታስተምረናለች።ተስፋ ስለምናደርጋት የሰማይ አገርም ጠንቅቀን እንድናውቅ በጉዞአችን ሊገጥሙ የሚችሉ ፈተናዎችና አደጋዎች ለመቋቋም እስፈላጊውን የውጊያ ትጥቅ ታስታጥቀናለች።በተረዳ ነገር እንዲህ እናምናለን።

መጋደላችን ከደምና ከሥጋ ጋር አይደለምና፥ ከአለቆችና ከሥልጣናት ጋር ከዚህም ከጨለማ ዓለም ገዦች ጋር በሰማያዊም ስፍራ ካለ ከክፋት መንፈሳውያን ሠራዊት ጋር ነው እንጂ።

ስለዚህ በክፉው ቀን ለመቃወም፥ ሁሉንም ፈጽማችሁ ለመቆም እንድትችሉ የእግዚአብሔርን ዕቃ ጦር ሁሉ አንሡ።

እንግዲህ ወገባችሁን በእውነት ታጥቃችሁ፥ የጽድቅንም ጥሩር ለብሳችሁ፥ በሰላም ወንጌልም በመዘጋጀት እግሮቻችሁ ተጫምተው ቁሙ፡፡
ኤፌ 6፡12
"ወንጌላዊነት" ዛሬ ስንት ነገር ነው መሰለህ
ወይ ለክርስቶስ ወይ ለአገር ሳያደርጉን መሀል ያንሳፈፉንን አየናቸውኮ።አንድ ቀን እንደብራናችን እንደማይሸጡን ምን ማረጋገጫ አለን?

DEREJE THE AWASSA said...

ለደጀሰላሞች
Post it or not
በብሎጋችሁ በተለያዩ የቤተክርስቲያን ጉዳዮች ላይ የምትጽፉትን እከታተላለሁ።
ሆኖም ግን ከቅርብ ጊዜ ጀምሮ በአንባብያን አስተያየት ላይ ያላችሁ ለዘብተኝነት በርግጥ ለቅድስት ቤተክርስቲያን ትንሳኤ እየሰራችሁ ነው ወይ!? ያስብላል።
ይህ የፖለቲካ መድረክ ቢሆን ኖሮ ማንም የመሰለውን ቢጽፍ አመለካከት ነውና የሚቀበል ይቀበላል አሊያም ይተዋል።
ይህ ብሎግ ግን የእምነት ነው። ስለዚህ አስተያየቶች ገደብ ሊበጅላቸው ይገባል። አለበለዚያ ግን ብሎጉ የኑፋቄ ማሳ መሆኑ የማይቀር ነው። ለመሆኑ እነ ድሉ፣ ዘ-ክርስቶስ እና ዘ-ብሔረ እየዘሩት ያለው ምንድን ነው? ሲፈልጉ በብዕር ስማቸው ሌላ ጊዜ Anonymous ሆነው በዚህ ብሎግ ቤተክርስቲያንን ሲሳደቡ ዝም የሚል የብሎግ ባለቤት በርግጥ ለቤተክርስቲያን ጉዳት ግድ ያለው አይመስልም? ለመሆኑ አስተማሪና ገንቢ አስተያየት በመስጠት የዚህ ብሎግ ታዳሚ የነበሩት እነ ማኅሌት የት ገቡ ብላችሁ እራሳችሁን ጠይቁ። ነጻ አስተያየትና ኑፋቄ የየቅል ናቸው። የእናቱ ስድብ ያለበትን ብሎግ በጉጉት የሚያነብ ማነው?
እግዚአብሔር የስድብን አፍ ይዝጋልን!

Anonymous said...

To dilu, I am wondering How you didn't know the church which is newly built for the memory of Abune Petros at Fiche,Showa.

Anonymous said...

ድሉ የሚሉህ ቀሳጢ አሁን ማንነትህ እየነጠረ ወጣ::

ካሁን በፊት እንደ ዲያብሎስ ጥቅስ እየመረጥክ ተመሳስለህ አንባቢን ለማደናገር ትጥር ነበር:: ዛሬ ግን ፀረ-ተዋህዶ ብቻ ሳትሆን ፀረ-ኢትዮጵያ መሆንህ አዋቂነት መስሎህ ባሰለቸህን ጽሑፍህ ገሃድ ወጣ::

ለአንድ ወቅት የጣሊያን ጀብድ የአንተ አይነት ባንዳዎች የነበራቸው ድርሻ ቀላል አልነበረም::

አቡነ ጴጥሮስስ ባንተ ድኩም አንደበት እንደሚንኳሰሰው ሳይሆን ጣሊያንን ጨምሮ ዓለም የመሰከረላቸው ጻድቅ ወሰማዕት ናቸው:: መልእክታቸው ምን እንደነበር ታሪክ አንብብ::

አርህቅ እማእከሌነ ዝንቱ መላእክተ አመፃ እግዚኦ!

ዘክርስቶስ said...

እባካችሁ እነ ደረጀ ብትተውኝ ምንአለበት። እኔ በአንድ አርቲክል ከሁለት በላይ አስተያየት መስጠት አልፈልግም፤ እውነት እንጂ ፈጠራ መልክእት አላስተላለፍኩም ምናልባት በተቀባይ አካል ችግር ካልኖረ በስተቀር። እንዲያውም አስተያየት ከመስጠት መቆጠብ አለብኝ ብዬ ወስኜ ነበር ነገርግን አንዳንድ ወንድሞች የሰጡት ሐሳብ የሚያሳምን ሆኖ አግኝቼዋለሁ (The main purpose of BLOG is to fill the gaps).
እውነትን ለመረዳት እግዚአብሔር ዓይነ ልቦናችን ያብራልን!

ድሉ የእግዚአብሔር ነው ! said...

ደረጀ ዘሐዋሳ የተባሉ የመወያያ መድረኩ ታዳሚ እኔ የሰጠሁትን አስተያየት ኑፋቄና እናቱን እንደሚሳደብ አድርገው አይተውታል። በዚህም የኔን ሃሳብ በማስተናገዱ የሃሳብ መስጫ መድረኩን ነቅፈውታል። ''ኑፋቄ እና እናቱን የሚሳደብ" ስለሚሉት ነገር ግን የቱ የኑፋቄ ፥ የትኛው የእናቱ ስድብ እንደሆነ መግለጽ አልቻሉም። ለመሆኑ ኑፋቄ ስለሚባለው ነገር በቂ ግንዛቤ አለዎት ወገን ? በ325 ዓ.እ በቅዱስ እለእስክንድሮስና ያኔ ሊቀ ዲያቆናት በነበረው ቀዱስ ሐዋርያ እትናቴዎስ መሪነት በ318 ሊቃውንት ኒቂያ ላይ እንደተወገዘው እንደ አርዮስ ክርስቶስ ፍጡር እንጂ ፈጣሪ አይደለም እልኩ? በ381 ዓ.እ በ150 ሊቃነ ጳጳሳት ቁስጥንጥንያ ውስጥ እንደተወገዘው እንደ መቅዶንዮስ "መንፈስ ቅዱስ መልክተኛ እንጂ በመለኮት ከአብና ከወልድ ጋር እኩል አይደለም " አልኩ ? እግዚኣብሔር ወልድ ከእመቤታችን ከቅድስት ድንግል ማርያም በሥጋ ከመወለዱ በፊት ከአብና ከመንፈስ ቅዱስ ጋር እኩል ነበር ፥ ከማርያም ከተወለደ በሁዋላ ግን ኣካሉ 2 ሆነ ፤ አንዱ የእብ ልጅ አንዱ የማርያም ልጅ ሰልሆነ አምላክ ከሰው መወለድ ሰለማይችል ማርያም የክርስቶስ (ትስብእት) እናት ናት እንጅ ወላዲት አምላክ አይደለችም በማለቱ በ431 ዓ.እ በ200 ጳጳሳት ኤፌሶን ውስጥ እንደተወገዘው እንደ ንስጥሮስ አልኩ ? እኔ በወንጌል ሐዋርያት የሰብኩተን ፥ እነቅዱስ አትናቴዎስ ፥ እነቅዱስ ጎርጎርዮስ ዘእንዚናዙና ጎርጎርዮስ ዘኑሲስ እንዲሁም የተዋሕዶ እባቶች እነቅዱስ ቄርሎስና ቀዱስ ድዮስቆሮስ እና ሌሎችም የሐይማኖት አባቶች ያስተማሩትን ሐይማኖት አበውን ነው የማምነው። እነሱ ካስተማሩት ሳልጨምርና ሳልቀንስ እነሱ ባስተማሩት እምነት ላይ ብቻ የተመሰረተ ነው እምነቴ።
እንደ ጴንጤዎች ክርስቶስን ከመለኮትነቱ /ከገዥነቱ ዝቅ አድርጌ ፈራጂ እንጅ የተገዥነት ባህርይ እንዳለው እንደ ፍጡር "አማላጅ ነው" የሚል እምነት የለኝም። በወላዲት አምላክ በሁለቱም በኩል ድንግል በሆነች በቅድስት ማርያም አማላጅነት ፥ እንዲሁም በጻድቃን ፥ በሰማዕታትና በቅዱሳን መላእክት ተራዳኢነትና አማላጅነት የማምን ክርስቲያን ነኝ። ደረጀ ዘሐዋሳ ፥ ታድያ የት ላይ ነው ኑፋቄየ ? ከዚህ ውጭስ መናፍቅ የሚያስብል እምነት የትኛው መጽሐፍ ውስጥ ይገኛል? ከብሉይና ሐዲስ? ወይስ ከመጽሕፍተ ሊቃውንት?
ሌላው ስማቸው ህቡዕ የሆነው ወገን አቡነ ጴጥሮስ በስማቸው ፍቸ ሰላሌ ውስጥ ቤተክርስቲያን እንደተሰራላቸው አብስረውኛል? በስማቸው ታቦት ተቀርጾላቸው 'ቅዱስ አቡነ ጴጥሮስ የኢትዮጵያ ኦርቶዶክስ ተዋህዶ ቤተክርስቲያን ' ተብሎ ነው እንደነ አቡነ ተክለኃይማኖት ዘደብረ ሊባኖስ የተሰራላቸው ? ቅዱስ ሲኖዶሱ 'ቅዱስ ወሰማዕቱ ለኢየሱስ ክርስቶስ' ብሎአቸዋል ?እኔ በውጭ አገር የምኖር ምዕመን ስለሆንኩ ለመረጃው እሩቅ በመሆኔ ይሆናል።
ያም ሆነ ይህ ያልሆነውን እንደሆነ አድርገን ከማመናችን በፊትና ሙሉ አማኙን ሁሉ መናፍቅ የሚል የማይመስለውን ቅጽል ከመቀጸል ብንቆጠብ መልካም ነው። የመወያያ መድረኩን አስተናጋጅም እንደ አፍቃሬ መናፍቃን አድርገን አፍራሺ ሂስ ባንሰጥ ይመረጣል።
እግዚአብሔር መንፈስቅዱስ አስተዋይ አእምሮ እንዲሰጠን እንጸልይ።
ድሉ የእግዚአብሔርና በእግዚአብሔር ብቻ ነው !

Anonymous said...

ውድ የክርሰቶሰ ቤተሰቦች እና የቤ/ክ ልጆች በዕውን ይህ የምትከራከሩበትርዕስ ቤተክርስተያንን ያንፃት ይሆን

Anonymous said...

ድሉ …
ውድ ዱሉ ለደረጀ ዘሐዋሳ የሰጠኸው ገለጻ በጣም ጥሩና የቤተክርስቲያኒቱን የእምነት አቋም ነው፡፡ ብራቮ፡፡ ታዲያ እንዲህ ዓይነት አቋም ያለህ አማኝ ከሆንክ አንድን ማኅበር ብቻ ነቀሰህ አውጥተህ በአሉታዊ አገለላጥ እንዲህና እንዲያ ማለት ለምን አስፈለገህ? ማውራት ከአለብን ምርቱን ከግርድ እንለይ፡፡ እንድ አስተያየት ሰጪ የማኅበሩን አመራር አካሄድ ነጥሎ መናገር ችሏል፡፡ ተገቢ ይመስለኛል፡፡ ማኅበር በጅምላ ፀረ ቤተክርስቲያን አቋም ሊያራምድ አይችልም፡፡ ይህ ከሆነ መጀመሪያውኑም ተቀባይነት ሊኖረው አይችልም፡፡ አንተ ለረዥም ዘመናት ከኢትዮጵያ ውጪ የምትኖረ ከሆነ በአገር ውስጥ ያለውን አጠቃላይ ሥራ በግርዱፉ ይሆን እንደሁ አንጂ በዝርዝርና በጥልቀት የማወቅ እድል ይኖርሃል ተብሎ አይታሰብም፡፡ ታዲያ ቅሬታ ካለህ ጉዳዩን በመጀመሪያ ከራስህ ጋር በሰከነ ልቡና በመምከር፣ ቀጥሎም በማኅበሩ የተከናወኑትንና የሚከናወኑትን አገልግሎቶች በመገምገም፣ በመጨረሻም ተገቢውን የረዥም ጊዜ ጥናት በማድረግ የማኅበሩን አቋም ማወቅ ከዚያም ለቤተክርስቲያን ያለውን አዎንታዊ ወይም አሉታዊ ጎን በመዝኖ አቋም መውሰድ ተገቢ ይመስለኛል፡፡ በደፋው ያውም ወቅታዊውን አገራዊ ሁኔታ በመስታወት ፊት እንደቆመ ለማየት በማይቻልበት መልክዓምድር እየኖርክ የሰጠኸው አስተያየት በተጨባጭ መረጃ ላይ የተመሰረተ አይመስልም፡፡ ለወደፊቱም ቢሆን የምትሰጣቸው አስተያየቶች ወይም ትምህርታዊ ዘገባዎች ከአድሎአዊነት የጸዱ ከመወቀስ ይልቅ መተባበርን የሚሰብኩ ቢሆን ይመረጣል፡፡
መልካም ጊዜ እመኝልሃለሁ፡፡

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)