November 19, 2010

የቅድስት ሥላሴ መንፈሳዊ ኮሌጁ ደቀ መዛሙርት የምግብ ቤቱ ሐላፊ እንዲነሡላቸው ጠየቁ

(ደጀ ሰላም፤ ኖቬምበር 19/2010፤ ኅዳር 10/2003 ዓ.ም)የቅድስት ሥላሴ መንፈሳዊ ኮሌጅ ደቀ መዛሙርት በምግብ አቅርቦት ጥራት፣ በጤና አገልግሎት ሽፋን፣ በሥርዐተ ትምህርት ጫና እና የደቀ መዛሙርት መማክርት መቋቋምን አስመልክቶ ለተቋሙ አስተዳደር ያነሷቸው ጥያቄዎች፣ “ወቅታዊ ምላሽ እና ተገቢ ትኩረት አልተሰጣቸውም” በሚል ከትናንት አንሥቶ በካፊቴሪያው ባለመመገብ እና ትምህርት በማቋረጥ የጀመሩትን ተቃውሞ ቀጥለው ውለዋል፡፡ ደቀ መዛሙርቱ ዛሬ ጠዋት የበላይ ሐላፊ ሊቀ ጳጳስ ብፁዕ አቡነ ጢሞቴዎስ እና ሌሎች የኮሌጁ አስተዳደር ሐላፊዎች በተገኙበት በተነሡት ጥያቄዎች ዙሪያ ውይይት ማድረጋቸው ተዘግቧል፡፡

በውይይቱ ደቀ መዛሙርቱ የምግብ ቤቱ ሐላፊ ተቋሙ ዳግመኛ ከተከፈተበት 1988 ዓ.ም አንሥቶ ይፈጽሙታል ለሚሏቸው በደሎች በቂ ማስረጃ ያላቸው በመሆኑ ከቦታቸው እንዲነሡ እንዲያውም ወደ ኮሌጁ ቅጽር እንዳይገቡ ጥያቄ አቅርበዋል፡፡ ከምግብ እህል ግዥ አንሥቶ በአቅርቦቱ ጥራት ላይ የሚታዩት ችግሮች በአስቸኳይ እንደሚስተካከሉ ቃል የገባው የኮሌጁ አስተዳደር፣ የምግብ ቤት ሐላፊውን ከቦታቸው ለማንሣት የራሱ አሠራር ስላለው ደቀ መዛሙርቱ በጠየቁት ፍጥነት ለማንሣት እንደሚቸገር ገልጾ ደቀ መዛሙርቱ አሉን የሚሏቸውን ማስረጃዎች ማቅረብ እንደሚችሉ ከመግለጹም በላይ በካፊቴሪያው መመገባቸውን እንዲቀጥሉ፣ የከሪኩለም ጫናው ችግር ደግሞ በሒደት እንደሚፈታ እና ከመጪው ሰኞ አንሥቶ ወደ ትምህርት ገበታቸው እንዲመለሱ የሚያስጠነቅቅ ማሳሰቢያ ማውጣቱ ታውቋል፡፡ 

ደቀ መዛሙርቱ በበኩላቸው ምርቱ ከግርዱ ያልተለየ የምግብ እህል ያለጨረታ በጥቅም ትስስር በመግዛት ጥራቱ የተጓደለ ምግብ እንዲቀርብ በማድረግ ለረጅም ጊዜ የጤና ችግሩ እንዲጸና ምክንያት የሆኑት (በአንዳንድ ደቀ መዛሙርት ዘንድ ኅዳርን ጠብቀው በሚያሥነሱት ችግር ‹የኅዳር በሽታ› በመባል ይታወቃሉ) የምግብ ቤቱ ሐላፊ ከቦታቸው ተነሥተው ወደ ቅጽሩ እንዳይገቡ እስካልታገዱ ድረስ በካፊቴሪያው ያቋረጡትን ምግብ መመገባቸውን እንደማይቀጥሉ ገልጸዋል፡፡

በውይይቱ ላይ የደቀ መዛሙርቱ መማክርት እንዲቋቋም ከአስተዳደሩ ጋራ መግባባት ላይ ከተደረሰ በኋላ ከየትምህርት ዓመቱ አንድ አንድ ተወካዮች በአጠቃላይ ስድስት አባላት ያሉት መማክርት መቋቋሙ ታውቋል፡፡ መማክርቱ በኮሌጁ አስተዳደር ዕውቅና ካገኘ በኋላ አሁን በደቀ መዛሙርቱ እና በአስተዳደሩ መካከል የሚታዩትን አለመግባባቶች በወቅቱ ለመፍታት አዎንታዊ ሚና እንደሚጫወት ተስፋ ተደርጓል፡፡ በተቋሙ የቀድሞ ተማሪዎች የተቋቋመው የነገረ መለኮት ምሩቃን ማኅበር በበኩሉ ችግሩ በአጭር ጊዜ እልባት እንዲሰጠው የማግባባት ጥረት ለመጀመር ዝግጅቱን እንዳጠናቀቀ ለማወቅ ተችሏል፡፡

Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)