October 26, 2010

የቅ/ሲኖዶስ የዛሬ ከሰዓት ውሎ፦ ቅዱስ ሲኖዶስ በሐውልቱ፣ በፖስተሩ እና በጠቅላይ ቤተ ክህነቱ ሹም ሽር ጉዳዮች ፓትርያርኩ ማብራሪያ እንዲሰጡ ብርቱ ተቃውሞ እና ጥያቄ አቀረበ


  • የአዲስ አበባ ሀ/ስብከት በአንድ ሊቀ ጳጳስ እና በአንድ ሥራ አስኪያጅ ብቻ እንዲመራ ተወሰነ
  • ፓትርያርኩ ለሀ/ስብከቱ የመረጡትን ጳጳስ ለመሾም ያቀረቡት ጥያቄ ውድቅ ተደርጎባቸዋል
  • ብፁዕ አቡነ ሳሙኤል ሲኖዶሱ ወደ አዲስ አበባ ሀገረ ስብከት እንዲመልሳቸው ጠይቀዋል
  • ሊቀ ማእምራን ፋንታሁን ሙጬ የፈጸሟቸውን በደሎች በዝርዝር አጥንቶ በሕግ እንዲጠየቁ የሚያደርግ ኮሚቴ እንዲቋቋም ተወስኗል
  • ፓትርያርክ አቡነ ጳውሎስ አቡነ ሳሙኤልን ‹‹በመፈንቅለ ፓትርያርክ›› ለመክሰስ ሞክረዋል
  • ‹‹ለራስ ሐውልት ከማቆም በላይ ምን ውርደት አለ? ዐፄ ኀይለ ሥላሴም ለሞተች ውሻቸው ሐውልት አቁመዋል ይባላል፤ በእርስዎ ዘመን አፍረናል፡፡›› (ብፁዕ አቡነ ኄኖክ)
 (ደጀ ሰላም፤ ኦክቶበር 25/2010፤ ጥቅምት 15/2003 ዓ.ም):- ቅዱስ ሲኖዶስ በዛሬው ከሰዓት በኋላ ቆይታው ቀደም ሲል በተያዙት አራት አጀንዳዎች ላይ ተነጋግሯል፤ በብዙዎቹም ላይ ውሳኔ አሳልፏል፡፡ በአራተኛ ተራ ቁጥር በተያዘው ‹‹ማእከሉን ባልጠበቀ መንገድ ከቅዱስ ሲኖዶስ ውሳኔ ውጭ በተሠሩ እና በሚሠሩ ጉዳዮች ላይ ተነጋግሮ መወሰን›› በሚለው ወቅታዊ አጀንዳ ላይ ቅዱስ ሲኖዶሱ በዕሥራ ምእቱ በዓል አከባበር ፓትርያርኩ ‹‹ሰማዕት ዘእንበለ ደም፤ የሚሌኒየሙ አባት›› በሚል ተሠይመው በየአብያተ ክርስቲያኑ ፖስተራቸው ስለ ተሰቀለበት፣ በ18ኛ ዓመት በዓለ ሢመታቸው ዋዜማ በቦሌ ደብረ ሳሌም መጥምቁ ዮሐንስ እና በደብረ መድኃኒት መድኃኔዓለም ካቴድራል ደጃፍ (በአንዳንዶች አገላለጽ ናቡከደነፆር የራሱን ምስል ካቆመበት ዱራ ሜዳ ጋራ ተነጻጽሮ ይጠራል) ላይ እንዲቆም ፈቅደው ስለባረኩት የራሳቸው ‹‹ሐውልተ ስምዕ››፣ በቅርቡ በጠቅላይ ቤተ ክህነቱ ምክትል ዋና ሥራ አስኪያጅ፣ የሒሳብ እና በጀት መምሪያ እንዲሁም የአስተዳደር እና አቅም ግንባታ መምሪያዎች ላይ ስለተደረጉት ሹም ሽሮች፣ ‹‹የጠቅላይ ቤተ ክህነቱን አስተዳደር አየር ባየር ይመራሉ›› ስለሚባሉት (በአንዳንድ አባቶች አገላለጽ ሴቷ ጳጳስ እስከ መባል የደረሱት) የማፊያ ቡድኖች ጉዳይ ብርቱ ጥያቄ እና ተቃውሞ ለፓትርያርኩ አቅርቧል፡፡

ፖስተሩ
ፖስተሩም ይሁን ሐውልቱ ከቀኖና ቤተ ክርስቲያን እና ከሥርዓተ አበው ውጭ መሆኑን ብፁዓን ሊቃነ ጳጳሳቱ ገልጸዋል፡፡ ‹‹ሐውልት ብለው ጣዖት አቁመዋል፤ ሐውልቱ የዘመናችን አርጤምስስ ነው›› ያሉት ብፁዕ አቡነ እንድርያስ፣ ‹‹በመፍራት እና በማፈር ሰው ይሰነካከላል፤ በእግዚአብሔር የሚታመን ግን ደስ ይለዋል፡፡ የሰው ኀጢአቱ በደለኛ ያሰኛዋል፤ በእግዚአብሄር የታመነ ሰው ግን ይድናል፡፡ ብዙ ሰዎች በመኳንንት ፊት ይላላካሉ፤ የሰው ፍርዱ ከእግዚአብሔር ዘንድ ነው፤ እውነተኛ ሰው በግፈኛ ሰው ዘንድ የተናቀ ነው፤ ቀና መንገድም በኀጥአን ዘንድ አጸያፊ ነው›› የሚለውን ኀይለ ቃል ከመጽሐፈ ተግሣጽ ምዕራፍ 5 ቁጥር 24 - 27 በመጥቀስ መንበረ ፓትርያርኩ ቤተ ክህነቱ ቤተ ክርስቲያኒቱ የማታውቃቸው እና ያልወከለቻቸው ግለሰቦች የሚፈነጩበት እና ጉዳያቸውን የሚያስፈጽሙበት ተቋም መሆኑን በማስመልከት ሰፊ እና ብዙዎችን ያሳመነ ማብራሪያ መስጠታቸው ተገልጧል፡፡ ሌሎችም ብፁዓን አባቶች የቤተ ክርስቲያኒቷ ቀኖና እየተጣሰ፣ አስተዳደሯ እየተበላሸ ከቀን ወደ ቀን የምትዋረድበት ሁኔታ እየተባባሰ መምጣቱን በተባበረ ድምፅ አስረድተዋል፡፡ በ1991 ዓ.ም ተሻሽሎ በጸደቀው ሕገ ቤተ ክርስቲያን አንቀጽ ሰባት ስለ ቅዱስ ሲኖዶስ ሥልጣን እና ተግባር ከተደነገገው በተቃራኒ በቅርቡ ስለተደረጉት ቅዱስ ሲኖዶስ ስለማያውቃቸው ሹም ሽሮችም ጉዳይ  ፓትርያርኩ እና የጠቅላይ ቤተ ክህነቱ ዋና ሥራ አስኪያጅ ብፁዕ አቡነ ፊልጶስ ተጠይቀዋል ፡፡

ለጥያቄው ብፁዕ አቡነ ፊልጶስ ሰጥተውታል በተባለው ምላሽ በለውጡ ጥናት ሂደት ምክክሩ ውስጥ የነበሩትን እና በልማት ኮሚሽኑ ውስጥ ያሉትን ኃላፊዎች ስም በመዘርዘር፣ ከብፁዕ ወቅዱስ ፓትርያርኩ ጋራ እርሳቸውም ተጨምረውበት ሹም ሽሩ እንደተፈጸመ አስረድተዋል፡፡ የብፁዕነታቸው አገላለጽ የአካሄዱን ስሕተተኛነት ያጋለጠ የመሰላቸው ፓትርያርኩም በእጅጉ መቆጣታቸው ተመልክቷል፡፡ ከእኒህም በተጨማሪ ሲኖዶሱ በሌሎች የአሠራር ጥሰቶች ላይ መነጋገሩ የተዘገበ ሲሆን ‹‹ከሲኖዶሱ ፈቃድ ውጭ ይህን ላደረጉበት ማብራሪያ ይስጡ›› በማለት ለብፁዕ ወቅዱስ ፓትርያርኩ ጥያቄ አቅርቧል፡፡ ቅዱስነታቸውም ‹‹አባቶቼ፣ አንተ ቤተ ክርስቲያኗን አዋርዳሃታል፤ አቆርቁዛሃታል አላችሁኝ፤ ስለዚህ በጉዳዩ ላይ አስቤበት ለነገ መልስ እሰጣለሁ›› በማለት ወደ ስድስተኛው የአጀንዳ ተራ ቁጥር ሊሻገር የነበረው ጉባኤው የፓትርያርኩን ምላሽ አዳምጦ ለመወሰን ለነገ እንዲያድር ተደርጓል፡፡

ቅዱስ ሲኖዶሱ ቀደም ሲል በተመለከታቸው ሌሎች አጀንዳዎች በፓትርያርኩ ልዩ ጸሐፊ አማካይነት ‹‹ቃለ ምዕዳን›› በሚል በንባብ የቀረበውን በከፊል ብፁዕ አቡነ ሳሙኤል የሚወነጅል ጽሑፍ ሙሉ በሙሉ ውድቅ አድርጓል፡፡ በጽሑፉ ላይ ቅዱስነታቸው በብፁዕ አቡነ ሳሙኤል በአገር ውስጥ እና ከአገር ውጭ ተፈጽሞብኛል ያሉትን ‹‹የማሳደም፣ የማሳመፅ እና የመፈንቅለ ፓትርያርክ ሙከራ›› በጊዜ እና በቦታ እየለዩ ዘርዝረዋል፡፡ ከውንጀላው ብዙው ክፍል የተፈጸመው ብፁዕ አቡነ ሳሙኤል በ2001 ዓ.ም ከግንቦት - ሐምሌ ወር ድረስ በሥራ ላይ በነበረው የሥራ አስፈጻሚ ኮሚቴ ጸሐፊ ሆነው በሚሠሩበት ወቅት ነው፡፡ ‹‹በአዲስ አበባ ሀገረ ስብከት ሕንፃ ግንባታ ወቅት 15 ሚልዮን ብር በጀት ተፈቅዶ ሳለ ብፁዕ አቡነ ሳሙኤል ለአዳራሽ እና ለአሳንሰር ማሠሪያ ተጨማሪ ገንዘብ ወጪ ማድረጋቸው፣ የአዲስ አበባ ሀገረ ስብከት የሒሳብ አሠራሩን ዘመናዊ(ኮምፒዩተራይዝድ) በማድረጉ›› ለጠቅላይ ቤተ ክህነቱ የተለመደ እና የሚረዳ አለመሆኑ ሌሎች በአቡነ ሳሙኤል ላይ የቀረቡ ክሶች ናቸው፡፡ ብፁዕ አቡነ ሳሙኤል ለክሱ በሰጡት ምላሽ ለሕንፃ ሥራው ወጪ የተደረገው ተጨማሪ ገንዘብ በወቅቱ የጠቅላይ ቤተ ክህነቱ ዋና ሥራ አስኪያጅ በነበሩት በብፁዕ አቡነ ይሥሐቅ እና በራሳቸው በፓትርያርኩ በቀረበው ጥያቄ መሠረት የተፈቀደ በመሆኑ ሕገ ወጥ ሊባል እንደማይችል፣ ተጠያቂነትም ካለ የሚመለከተው የጠቅላይ ቤተ ክህነቱን የቤቶች እና ሕንፃዎች አስተዳደር መሐንዲስ መሆኑን አስረድተዋል፡፡ ስለ ሒሳብ አሠራሩም ሀገረ ስብከቱ በእርሳቸው አስተዳደር ጀምሮት የነበረውን ዘመናዊ አሠራር ከጠቅላይ ቤተ ክህነቱ የቆየ አሠራር ጋራ ለማጣጣም ሲባል ወደ ኋላ እንዲመለስ የጋራ ስምምነት ስለተደረሰበት በወቀሳ መልክ ሊቀርብ እንደማይገባው ነው ብፁዕነታቸው ያስረዱት፡፡

ጉባኤው በጠዋቱ ክፍለ ጊዜ በመነጋገር ውሳኔ ካሳለፈባቸው ጉዳዮች ውስጥ የአዲስ አበባ ሀገረ ስብከት ሥራ አስኪያጅን ከኃላፊነት ማንሣት ይገኝበታል፡፡ በውሳኔው ላይ ሥራ አስኪያጁ ሊቀ ማእምራን ፋንታሁን ሙጬ ለፈጸሙት የምዝበራ ወንጀል በሕግ እንዲጠየቁ፣ ለዚህም ከተሾሙበት እስከ ወረዱበት ጊዜ ድረስ የሠሯቸውን ጥፋቶች በዝርዝር አጥንቶ በሕግ አግባብ ለፍትሕ አካል የሚያቀርብ ኮሚቴ እንዲሠየም ተወስኗል፡፡ ይህ ውሳኔ በሲኖዶሱ ምልአተ ጉባኤ በሚተላለፍበት ወቅት ከሊቀ ማእምራን ፋንታሁን ጋራ የሥራ ግንኙነት የነበራቸው ፓትርያርክ አቡነ ጳውሎስ ያሳዩት አርምሞ ተሰብሳቢ ሊቃነ ጳጳሳቱን እንዳስደመማቸው ተገልጧል - አንዳንዶች ግን አርምሞው በቀጣዩ አጀንዳ ላይ ተቀባይነት ለማግኘት የተደረገ ‹‹የሰጥቶ መቀበል መርሕ›› ነበር ይላሉ - እርሱም አልተሳካም እንጂ፡፡

በቀጣዩ አጀንዳ ምልዓተ ጉባኤው የተመለከተው በአጀንዳ ተራ ቁጥር ሦስት ላይ የተጠቀሰውን ‹‹ስለ አዲስ አበባ ሀገረ ስብከት ችግር በቅዱስ ሲኖዶስ በተሠየሙት ሊቃነ ጳጳሳት ተጠንቶ የቀረበውን ጥናት›› የተመለከተ አጀንዳ ነበር፡፡ ጥናቱ የአዲስ አበባ ሀገረ ስብከት ለአራት/ለአምስት የመከፋፈልን ጥቅም እና ጉዳት በአማራጭ ዕይታ ያጤነ ነበር፡፡ አሁን ባለው አስተዳደራዊ ሁኔታ ሀገረ ስብከቱን መከፋፈል ‹‹ለተንዛዛ አካሄድ እና ለሌላ ነገር በር ይከፍታል›› ያለው ጥናቱ ሀገረ ስብከቱ ቅዱስ ሲኖዶስ በሚሠይመው አንድ ሊቀ ጳጳስ እና ሊቀ ጳጳሱ አጭቶ በሚያቀርበው እና ቅዱስ ሲኖዶስ በሚያጸድቀው አንድ ሥራ አስኪያጅ እንዲመራ ሐሳብ አቅርቧል፡፡ ፓትርያርኩ ይህን ተከትለው የአዲስ አበባ ሀገረ ስብከት ሊቀ ጳጳስን እርሳቸው መርጠው ለመሾም ያቀረቡት ሐሳብ ሥልጣኑ የሲኖዶሱ መሆኑን በጠቀሰው የብፁዕ አቡነ ጢሞቴዎስ ሌሎች ብፁዓን አባቶች ብርቱ ተቃውሞ ውድቅ ተደርጓል፡፡ ይሁንና በአዲስ አበባ ሀገረ ስብከት እና ምናልባትም በሐዋሳ እንደሚቀመጡ ተስፋ የተሰጣቸው የሚመስሉ በጥንካሬያቸው የተመሰገኑ አንዳንድ ብፁዓን አባቶች ፓትርያርኩን ከወቀሳ ነጻ ለማድረግ እና በፊታቸው ‹‹ሞገስ ለማግኘት›› በሚሰጧቸው ጥቅምን እና ጎጥን ማእከል ያደረጉ ከንቱ ምስክርነቶች ከፍተኛ ተግሣጽ አግኝቷቸዋል፡፡ ይህም ‹‹አቡነ ጳውሎስ ስለ ቤተ ክርስቲያኒቷ ልዕልና እና ህልውና መጠበቅ በሊቃነ ጳጳሳቱ ዘንድ የተያዘውን የአቋም አንድነት ለማላላት ምን ያህል እየሠሩ እንደሆነ ያሳያል ይላሉ›› ታዛቢዎች፡፡

ብፁዕ አቡነ ሳሙኤል
ለአንድ ዓመት ያለሥራ መቀመጣቸውን እና በተደረገው ማጣራት ንጹሕ መሆናቸው መረጋገጡን የተናገሩት ብፁዕ አቡነ ሳሙኤል በበኩላቸው ቅዱስ ሲኖዶስ በአዲስ አበባ ሀገረ ስብከት ወደነበራቸው ኃላፊነት ይመለሱ ዘንድ እንዲፈቅድላቸው ጠይቀዋል፡፡ ለብፁዕነታቸው እና የሐዋሳ ሀገረ ስብከትን አጣሪ ልኡክ ሪፖርት በመጠበቅ ላይ የሚገኘው ቅዱስ ሲኖዶሱ በተራ ቁጥር አራት ላይ፣ ‹‹ሀገረ ስብከት ለሌላቸው እና ዝውውር ለጠየቁ ሊቃነ ጳጳሳት ተነጋግሮ መወሰን›› በሚለው አጀንዳ በነገው ዕለት እንደሚወስን የተገኘው ዘገባ ያስረዳል፡፡

30 comments:

Anonymous said...

አባቶቻችን ተስፋ አላስቆረጣችሁንም:: ይህ ትልቅ ተጋድሎ ነው በርቱ የእውነት አምላክ የበለጠውን እንድትሰሩ የጠፋውን እንድታቀኑ ሰላሙን ጤናውን ይስጣችሁ::

Zemichael said...

Selase abate ebakeh betekeresetiayanehen asebat.

wegenoch ebakachehu tseleyu.

esti hulachen sinodos sebesebawen esekicheres subae eneyaz.

Ebakachehu.

አግናጢዎስ ዘጋስጫ said...

ቅዱሳን አባቶቻችን ለሰማዕትነት ቆርጣችሁ በመነሳታችሁ እጅግ ደስ ብሎኛል፡ ቤተክርስቲያን አሁን ተስፋዋ የለመለመ ይመስላል።
አሁንም አባቶቻችን ለእውነት ብላችሁ ቤተክርስቲያናችንን ታደጓት።
እግዚአብሄር ከእናንተ ጋር ይሁን።

Anonymous said...

ጸልዩ በእንተ ቤተ ክርስቲያን!!!
የነገዉ ቀን እስኪመሽ ቸኩያለሁ፣ አቡነ ሳሙኤል መንበረ አዲስ አበባን ሲረከቡ ለማንበብ።
ምስቅልቅሉ የወጣዉን የአዲስ አበባን አስተዳደር መስመር ማስያዝ የሚችለሁት ተገቢ አባት አቡነ ሳሙኤል ናቸዉ፤ ብየ ስለማምን!!!

አምላከ እዝራ የአባቶቼን ክንድ ያበርታ። አሜን።

Anonymous said...

I am very glad to read such a wonderful candid meeting that has authentic and clear message to the concerned people in the Synod. I will never expect again the fearless people who were joking around by the innocent people do the same. The Ethiopian Orthodox Tewahedo Church will grow by spiritual Church administration as long as our fathers struggle to pave the way of peace, unity, and love. Now TRUTH has reigned

Anonymous said...

ጅምሩ በጣም ደስ ይላል. አባቶች በዚህ ጠንካራ አቃም ከቀጠሉ ትልቅ ለውጥ እናያለንም እንሰማለንም. ሙጨ ተመነጠረ እጅአየሁም ትመነጠራለች ገና. እግዚአብሄር ሆይ መልካም ዜና አሰማን ለአቡነ ሳሙአኤልም የአዲስ አበባ ሃገረ ስብከት ስጥልን. አሜን.

Anonymous said...

በእውነት ቅዱስ ፓትርያርኩ ቢያውቁበት በዕውቀታቸው እና በዓለም አቀፍ ታዋቂነታቸው። ሊያኮሩ የሚችሉ ሰው ነበሩ ።
ነገር ግን ምን ያደርጋል በዙሪያቸው የተሰበሰቡት መካሪወቻቸው የእርሳቸውን ስም እና የቤተ ክርስቲያኒቱን ክብር በግል ጥቅማቸው ለወጡትና ትዝብት ላይ ጣሉአቸው። ለነገሩ አንድ ፓትርያርክ በቅ. ሲኖዶስ የሚሰየም እና መንፈሳዊነት ያለው አማካሪ ሊኖረው በተገባ ነበር ።

በመሆኑም እግዚአብሄርን የማይፈሩ ህግንም የማያከብሩ እንደእነ ል.ማምራን ፋንታሁን ሙጨ እና እንደነ ወይዘሮ እጅጋየሁ ያሉ ሰዎች የቅርብ አማካሪዎች እና ሠራተኞች መስለው ቀረቡ። ለዚህም የከፋ ትችት ዳረጓቸው።
የሀገረ ስብከቱ ሥራ አስኪያጅ የነበረው ሊ.ማምራን ፋንታሁን ሙጨ በሚሊዮን የሚቆጠር ብር ዘርፎ ውጭ ሀገር ጠፍቶ ሄደ ተባለ።ከእንግዲህ ማን ነው በህግ ሊጠይቀው የሚችለው? ነገር ግን ከታሰበበት ሊሆን ይችላል። ቤተ ክርስቲያን በተመለከተ መንግሥት እየያዘ ያለው አቋም ጥሩ ስለሆነ ሊያስመጣው ይችላል።በተለይም መንግሥት የማይሠሩ ኪራይ ሰብሰቢዎችን ለመቆጣጠር ቆርጦ ተነስቷል ይባላል።

ዘሚካኤል said...

አምላክ ሆይ እባክህ ከምህረትህ ላክልን።

የሰው ሰወኛውን ሳይሆን የአንተን መፍትሄ ላባቶቻችን ክንድ አበርታ።

ልጆችህ አንሳቀቅብህ።

ቤትህን ከቀማኞች ጠብቅ፤ ቤትህን አጽዳ።ልጆችህንም ከተኩላ አድን።

አቤቱ እባክህ ጊዜህ ይድረስ።

Anonymous said...

ስለማይነገር ስጦታው እግዚአብሄር ይመስገን::

ብጹአን አባቶች በተጋድሎአችሁ ረክተናል:: የተጋድሎአችሁን ፍሪ ለመመገብ ያብቃን::

አሜን::

Anonymous said...

አባቶች፡በርቱና፡የጥፋት፡ርኩሰትንና፡ግብረ፡
አበሮቹን፡ከተዋሕዶ፡ቤተ፡ክርስቲያን፡አስወ
ግዱ።የደረሰብን፡ውርደትና፡ውድመት፡እጅ
ግ፡የበዛና፡መራር፡መሆኑን፡ልባችሁ፡ያውቀዋ
ል።በዚህ፡ተጋድሏችሁ፡ካሌብ፡ወልድ፡ዮፎኒን
ና፡እያሱን፡ስለቆራጥነታቸው፡የባረከ፡ልዑል፡
እግዚአብሔር፡እናንተንም፡ያበርትያችሁ!መ
ላው፡ተዋህዶ-ኢትዮጵያ፡እስከ፡መጨረሻው፡አ
ብረናችሁ፡ቆመናል!የእግዚአብሔርን፡ቤት፡ለ
መጠበቅና፡ሕጉንና፡ሥርዓቱን፡ለማስከበር፡አብ
ረናችሁ፡እንደቆምን፡አውቃችሁ፡ወደ፡ኋላ፡እን
ዳትሉ!ከዘንድሮው፡ጥቅምት፡ሽረትን፡ተጎናጽ
ፈን፡ለአገራችንና፡ለሕዝባችን፡መምኪያ፡እንድ
ንሆን፡የአባታችን፡የአቡነ፡ተክለ፡ሃይማኖት፡አም
ላክ፡ይርዳን!እመ፡ብርሃን፡ሐዘናችንንና፡ልቅሷች
ንን፡ለቅዱሱ፡ልጇ፡አቅርባልናለች።የአዋሳ፤ሕዝ
በ፡ተዋሕዶ፡እንባና፡ድካም፡የፈጣሪያችንን፡ፍርድ፡
እንድናገኝ፡ረድቶናልና፡በርትታችሁ፡የጀመራች
ሁትን፡የጽዳት፡ዘመቻ፡ግፉበት፤እንግፋበት።ይህ፡
ቅዱስ፡ተጋድሎ፡ከጥፋት፡ርኩሰትይ፡ጋር፡ለመሁኑ፡
ቦሌ፡የቆመው፡የጣዖቱ፡ጥጃ፡የመሰክራል!እግዚአብ
ሔርን፡አሳዝነናል።በድለናል።የተዋሕዶ፡ቀኖና፡በ
ጥፋት፡መልእክተኞች፡ሲደመሰስና፡ሕዝብ፡ሲያለቅ
ስ፡እያየን፡እስታሁን፡አንዳች፡እንኳ፡አላደረግንም፡
ነበር።በመንፈስ፡ቅዱስ፡እርዳታ፡አሁን፡ወደ፡ፍረያ
ማ፡አዝማሚያ፡መጓዝ፡ስለጀመርን፡እግዚአብሔር፡
ይረዳናልና፡በርቱ!በታላቅ፡ቆራጥነት፡ኢያሪኮን፤ያ
ዙ፤እንያዝ።ይህን፡ነው፡እግዚአብሔር፡ከኛ፡የሚጠ
ብቀው፤ሕጉንና፡ሥርዓቱን፡ማክበርና፡ማስከበር፡አለ
ብን!!!

ዛሬም፡እንድያኔው፡ሰማዕቱ፡አባታችን፡
አቡነ፡ጴጥሮስ፡ከመካከላችን፡ናቸው።

ለጥሪያችሁ፡በዝግጅት፡ከቆሙት፡የተዋሕዶ፡
ልጆች፡አንዱ፡-

ሳሙኤል፡ዘአሰቦት፡ነኝ።

John said...

" ጌታ ቅርብ ነው። በነገር ሁሉ በጸሎትና በምልጃ ከምስጋና ጋር በእግዚአብሔር ዘንድ ልመናችሁን አስታውቁ እንጂ በአንዳች አትጨነቁ።

አእምሮንም ሁሉ የሚያልፍ የእግዚአብሔር ሰላም ልባችሁንና አሳባችሁን በክርስቶስ ኢየሱስ ይጠብቃል።

በቀረውስ፥ ወንድሞች ሆይ፥ እውነተኛ የሆነውን ነገር ሁሉ፥ ጭምትነት ያለበትን ነገር ሁሉ፥ ጽድቅ የሆነውን ነገር ሁሉ፥ ንጹሕ የሆነውን ነገር ሁሉ፥ ፍቅር ያለበትን ነገር ሁሉ፥ መልካም ወሬ ያለበትን ነገር ሁሉ፥ በጎነት ቢሆን ምስጋናም ቢሆን፥ እነዚህን አስቡ፤"

ፊል4:6

Anonymous said...

›v„Š wì<®” K=n’ äädƒ እ¨<’}—¨< ›UL¡ Øw›~” ÁÉL‹G<:: c¨< J• ¾TÃuÉM እ”Úƒ J• ¾TÃÖ?e ›ÃјU“ በተለያዩ ጊዜያት የፈጸማችኋቸውን ጥቃቅን ስህተቶች በመፈለግ አንገት ሊያስደፏችሁ እና አፋችሁን ለማዘጋት የሚተጉ አሉና በርቱ! እስካሁን ቸልተኛ ሆናችኋል፤ ፈርታችኋል ወዘተ እየተባለ ለሚቀርብባችሁ ወቀሳ መልስ መስጫው ጊዜ አሁን ነውእና አይዟችሁ፡፡ ሕዝቡ በሰቂለ ሕሊና ውሳኔአቸወሁን እየጠበቀ ስለሚገኝ አብረናችሁ ነን፡፡ አምላከ ቀዱሳን በደሙ የዋጃትን ቅድስት ቤተክርስቲያናችንን እና እናንተ አባቶቻችንን እንዲጠብቅልን አብዝተን እንጸልጣለን!!!

yemelaku bariya said...

ኦስትሪያ እና በአውሮጳ የምትኖሩ የቤተ ክርስቲያን ልጆች የፋንታሁንን ሁኔታ መከታተል የናንተ ድርሻ ነው:: ከቤተ ክርስቲያናችን ድሃ እናቶቻችንና አባቶቻችን ለቤተ ክርስቲያን የሰጡት ተርፏቸው አይደለም እግዚአብሔር እንድገለገል እንጅ እናም ለአገልግሎት ይውል የነበረውን ግማሹን ለመኪና ግማሹን ለሃውልት ግማሹን ለግብረ አበሮቹ ግማሹን ለራሱ ዘርፎ እና አዘርፎ በአውሮጳ ሊቀመጥ ኦስትሪያ ዚንባብዌ አይደለችም የሕዝብ ገንዘብ የዘረፉ ሌቦችን የሚደብቅ ፣የሚጠብቅ፣ከለላ የሚሰጥ አይመስለኝም እና ወንዲሞቻችን አስቡበት:: እሱ ላይ ተገቢው ቅጣት ከተፈጸመ ወደፊት ሌላውም ከሱ ይማራል:: ሌባ መደበቂያ ሊያገኝ አይገባም::

Anonymous said...

Great job holy synod, but why Abun pulose hesitate to tell them the truth because truths do not need to think always on the tip of tongue.

Dan said...

ጥሩ አጀማመር ይመስላል።
ወደ ትክክለኛ ስርዓት ለመመለስ ተጀመረ እንጂ ዘላቂ ውጤት ገና አልታየም።

ስጋቴ እንዳለፈው አመት የሲኖዶሱ ውሳኔ ይህም ውሳኔ እንዳይፍረከረክ ነው።

የዛሬ አመት የደረሰውን እምታስታውሱ አስታውሱ

"አቡነ ጳውሎስ ከአስተዳደር ኃላፊነት ተቆጥበው በቡራኬ በጸሎት ተወስነው መንፈሳዊ አመራር ብቻ እንዲሰጡ "በመንበራቸ በክብር እንዲቀመጡ" በሲኖዶሱ የተቋቋመው የሥራ አስፈፃሚ ኮሚቴ አስተዳደራዊ የበላይነትም ፀድቆ ነበር

አቡነ ጳውሎስ ግን በሲኖዶሱ የተቋቋመው የሥራ አስፈፃሚ ኮሚቴ አገዱ ጳጳስም ሻሩ።

ሲኖዶሱም ይህን ያደረጉት "ከሕገ ቤተክርስቲያን ውጭ ሆነው ነው።" ተጠሪነቶ ለሲኖዶሱ ነው" ጳጳሳት መሾምም ሆነ ማገድ የሚችለው ሲኖዶሱ እንጂ እሳቸው አለመሆናቸውን በመጥቀስ ስህተት መስራታቸውን አምነው ይቅርታ እንዲጠይቁና እግዱን እንዲያነሱ ይጠይቋቸዋል።

አቡነ ጳውሎስ ግን
“ይህን በፍጹም አልቀበልም እንደውም እንዲህ ያለ ሕገወጥ ስብሰባ አልመራም” በማለታቸው፤”ስብሰባውን የማይመሩ ከሆነ አዳራሹን ለቀው ይውጡልን” በማለት ጳጳሳቱ ቢጠይቋቸውም “አልወጣም የምትሉትን እዚሁ ቁጭ ብዬ እሰማለሁ” በማለታቸው 41 የሚሆኑ ጳጳሳት ሰብሰባውን ረግጠው በመውጣት ለብቻቸው በሌላ አደራሽ ተሰባስበዋል።

ለብቻው ተሰብስው በደረሱበት ድምዳሜም ፓትርያርኩ ያሳለፉት የዕግድ ውሳኔ ሕገ ቤተክርስቲያንን የተከተለ ባለመሆኑ እግዱ እንዲነሳ እሳቸውን በተመለከተ የአስተዳደር ስራውን ጨርሶ መስራ ስላልቻሉና ቤተክረስቲያኒቱን ወዳልተፈለገና ፍጹም ወደተበላሸ አቅጣጫ እየወሰዷት በመሆኑ ከጸሎት ውጭ በማንኛውም አስተዳደር ስራ እዳይገቡ እንደራሴ ሊሾምባቸው ይገባል በሚል ውሳኔ ላይ ደርሰው ይህን ውሳኔ ለማጽናት ለአዳሪ ቀጥረው ተለያይዋል።

አርብ ሐምሌ 3 ቀን 2001 ዓ.ም.

ስብሰባው የተመራው እንደወትሮ በፓትርያርኩ ሳይሆን በከፍኛ የመንግሥት ባለሥልጣን አባይ ፀሐዬ ነበር። እንዲሁም ኮሚሽነር ወርቅነህ ገበየሁና ሌሎች ሁለት ባለሥልጣናት ስብሰባውን አጅበውት ውለዋል።

መንግሥት በኃይማኖት ጉዳይ ጣልቃ የመግባት ፍላጎት እንደሌለው በመግለጽም ቤተክርስቲያኒቷን ወደ ሰላም ለማጣት ሕገቤተክርስቲያኒቷንና የሲኖዶሱን ውሳኔ አክብረው እንዲንቀሳቀሱ ሲኖዶሱም ተሰብስቦ ይበጃል ያለውን ውሳኔ እንዲያሳልፍ መክረው ስብሰባው በተረጋጋ መንፈሥ ሰኞ ዕለት እንዲቀጥልና ይበጃል ያለውን ውሳኔ እንያሳልፍ አሳስበው ተለያይተዋል።

ሰኞ ሐምሌ 6 ቀን 2001 ዓ.ም.

ጳጳሳቱ አርብ ዕለት በተሰጣቸው ተስፋ ስብሰባው በተረጋጋ መንፈሥ ይቀጥላል የሚል ስሜት የነበራቸው ቢሆንም ፓትርያርኩ ምንም የተለየ መሻሻል ሳያሳዩ በአቋማቸው በመጽናት በቀዳሚነት አጀንዳ ተይዞ የነበረውን የሥራ አስፈጻሚውን እግድ አላነሳም በማለት አሻፈረኝ አሉ።

ሲኖዶሱ የሾማቸውን የሥራ አስፈጻሚ ኮሚቴ አባላት ከሕገ ቤተክርስቲያን ሕገ ደንብ ውጪ ለምን ታገዱ የሚል ጥያቄ የቀረበላቸው አቡነ ጳውሎስ፤ኮሚቴው የተሰየመው መተዳደሪያ ደንብ አቅርቦ ከሐምሌ 5 ቀን 2001 ዓ.ም. በኋላ ለሲኖዶሱ እንዲያቀርቡ እንጂ ከዛ ውጭ እየተሰበሰቡ የፈለጉትን ውሳኔ ለማሳለፍ ባለመሆኑ መተዳደሪያ ደንቡን አዘጋጅተው ሳያቀርቡ በሱ ጉዳይ ላይ በስብሰባው መነጋገር እንደማይፈልጉ ፓትርያርኩ በመናገር ምላሽ መስጠታቸውን ምንጮቹ ተናግረዋል።

ሊቃነ ጳጳሳቱ መተዳደሪያ ደንቡን አዘጋጅተው መጨረሳቻን ኮሚቴው በስብሰባው ላይ ሲገልጹ፤ፓትርያርኩም ቀበል ብለው ስራችሁን ስለጨረሳችሁ መተዳሪያ ደንቡ ወደ ሕግ ክፍሉ ተመርቶ ይመርመር ይላሉ። ጳጳሳቱም ሲኖዶሱ ከላይ መተዳሪ ደን አውጥቶ ያስተዳራል እንጂ ወደታች ልኮ ሕግ አያጸድቅም መተዳደሪያ ደንቡ ተመርምሮ መታየት ካለበትም ገለልተኛ የሆነ የውጭ ኮሚቴ እንዲያየው መደረግ እንዳለበት በመግለጽ ተከራክረዋቸዋል።

ዋናው ጉዳይ መተዳደሪያ ደንቡ ሳይሆን መጀመሪያ ከሲኖዶሱ እውቅና ውጭ የተደረጉ እግዶች ይነሱ የሚለው ነው በሚል ጠንካራ መከራከሪያ በማቅረብ ቢሞግቷቸውም ፓትርያርኩ በጀ የሚሉ ሆነው አልተገኙም።
=======

አመቱን ሙሉ ከድጥ ወደ ምጥ ገብተናል

ያኔ የሲኖዶሱን ውሳኔ ተቀብለው ቢሆን ቢያንስ ቢያንስ የፖስተሩና ሐውልቱ ጥቁር ነጥብ በፓትርያርኩና ቤተክርስቲያናችን አይደርስም ነበር

“ፖስተሩም ይሁን ሐውልቱ ከቀኖና ቤተ ክርስቲያን እና ከሥርዓተ አበው ውጭ መሆኑን ብፁዓን ሊቃነ ጳጳሳቱ ገልጸዋል፡፡ ሐውልት ብለው ጣዖት አቁመዋል፤ ሐውልቱ የዘመናችን አርጤምስስ ነው ” አቡነ እንድርያስ እንዳሉት፣


ለሥርዓትና ቀኖና ቤተክርስቲያን ለቆሙና ለሚታገሉ ሁሉ ለብጹዓን ሊቀ ጳጳስት ከነሱም ጋር ለቆሙ ሁሉ ካህናት ምዕመናን ሁሉ መጸለይና ማበረታታት መደገፍ ይገባናል።

አምና የደረሰው እንዳይደገም።
አምና የደረሰው እንዳይደገም።

Demissie said...

abune paulos liyakoru yemichilu tawaqi sew neberu blehal.
100% lik neh!! ahunim endiyakorun enitebiqalen. Gin, kifugna gitrenetachewn atifut enebelachew.

Anonymous said...

yegermal! leka ewunetegna yebetekristian abatochem alu. ene lebetekristian ruk negn... mamen akategn.

Anonymous said...

በርትተን እንደደካማነታችን እየጸለይን የእግዚአብሔርን ሥራ እንጠብቅ ሁሉ እንደፈቃዱ ይደረግ

Haftu said...

Temesgen amlakekidusan Egizabher senodos yelm ymidimdame hizbu derso neber laka yasrat hagrwa Ethiopia amlake kidusan alresatm bewnt bewner ysenodosu 29gnw sebsaba (bechelam yeneber hisb bebrhane aye malt yasdefral) deje selam kalehiot yasemaln

Anonymous said...

ይትባረክ አምላክ አመዊነ!!!!!
አባቶች ኮራሁባችሁ!
በተልይ በተለይ ---››› “በውሳኔው ላይ ሥራ አስኪያጁ ሊቀ ማእምራን ፋንታሁን ሙጬ ለፈጸሙት የምዝበራ ወንጀል በሕግ እንዲጠየቁ፣ ለዚህም ከተሾሙበት እስከ ወረዱበት ጊዜ ድረስ የሠሯቸውን ጥፋቶች በዝርዝር አጥንቶ በሕግ አግባብ ለፍትሕ አካል የሚያቀርብ ኮሚቴ እንዲሠየም ተወስኗል፡፡”
ሊቁ ፍርድቤጽ ሲቀርቡ የሚከተሉ… ሰዎች ጭምር … ይመርመሩልን!
አንገቴን ደፍቸ ክረምቱን አሳልፌነበር! ዛሬ … ዛሬ ግን ኮራሁ! ቤተክርስቲያን ማፍያ መመልመያና ማጎልበቻ እንዳልሆነች አየሁ … ሰማሁ… አነበብሁ…
የሰማ፣ያሰማ፣የጻፈ፣ያጻፈ… ደጀ ሰላም ቃለ ሕይወት ያሰማልን!!!

May God’s help never depart from us.

Anonymous said...

አንበሶቻችን ሲያገሱ ከማየት በላይ የሚያስደስት ነገር የለም። ትዕግስታችሁ በዝቶ ብዙ ጥፋቶች ጠፍተዋል።እኛም ተስፋችን ተሟጦ ነበር። እንዚያን ለማጥራት እና ቤተክርስቲያንን ወደ ቀደመ ክብሯ ለመመለስ ያላችሁ እድል ይህ ነው። ተጠቀሙበት! ሃውልቱ፤ወንዛቂ አሰራሮች እና የጨዋዎች በቤተክህነት መፈንጨት መቆም አለበት።ይሄ ነገር እንደተለመደው በይቅርታ ብቻ አይታለፍ። በህግ መዳኘት ያለበት በህግ ይዳኝ!

አብረናችሁ ነን!

Dirsha said...

Oh!! my God I don't believ it b/c I was realy hopless with our Fathers. Please our Fathers this is the write truck that you could follow and this is the way you have promissed at the time of coronation. Please the Patriyaric accept the critisims and correct them, work for the church's Tinisae Yelefew Yibikawot Bemiyastemirute nisiha Yimelesu. The Government ps Help our true fathers not the Mafiyas.

Amilake Israel Mechereshawn Yasamirlin.

ዘ ሐመረ ኖህ said...

ደጀ ሰላሞች እግዚአብሔር ይባርካችሁ፡፡ብልሽልሽት ያለውን ቤተክህነት እግዚአብሔር በእውነቶኞቹ አባቶች አድሮ ያጸዳልን ዘንድ የአቡነ ጳውሎስንና መሰሎቻቸውን ልብ ይመልስልን ዘንድ በጣም ከሳቱት ፓትርያርካችንና መሰሎቻቸው ጀምሮ እስከ ታች ተራዎቹ ድረስ ለንስሃ እንድንበቃ እንጸልይ፡፡ በነገር ሁሉ ከእውነተኞች ብጹአን አባቶች ጋር መንፈሳዊ ተጋድሎ አብሮ መጋደል ይጠበቅብናል፡፡ በኦስትርያም ሆነ በሌላው ዓለም የምትገኙ ሁሉ ስለ ፋንታሁን ሙጨ የሚኖርባችሁ የቤት ስራ እንደ ተጠበቀ ሆኖ ፋንታሁን ሙጨ ምን አልባት ከሰው ፍርድ ቢያመልጥ ከእግዚአብሔር ፍርድ ግን ፈጽሞ ማምለጥ እንደማይችል ልናስታውሰው ይገባል፡፡

Anonymous said...

GOD YOU ARE GREAT ALWAYS I CANT CONTROL MY TEARS WHEN I READ THIS NEWS OHH GOD YOU ARE ALWAYS GREAT PLEASE FORGIVE US MAKE OUR CHURCH PEACEFUL.I EVER FELT HAPPY IN MY LIFE LIKE TODAY .WOW GOD YOU KEEP YOUR EYES IN YOUR HOME AND YOUR PEOPLES PLEASE.
GOD I LOVE YOU ,I AM HAPPY TO HEAR /TO SEE/ WHEN YOU FIX OUR PROBLEM.
YOU ARE EVER THING FOR ME AND MY LIFE WHAT CAN I SAY NOW?????????????????
TEMSGEN TEMSGEN TEMSGEN TEMSEGEN KEBR YEGBAH YENE GETA TEMSGNLEGN LEZELALEM.
Ehete micheal

GK said...

ውድ ወገኖቼ
ለፍርድ ኧንቸኩል!!
Regarding L.M. Fantahun, let us wait until the end of the investigation. Why we accuse and give the verdict ahead. If so what is the role of Holly Synod?
I am sorry for the comment 'Europe is not Zimbabwe'. Are we encouraging him to stay in Europe? He knows why he went to Europe. If he came back home, do you rephrase the above as 'Ethiopia is Zimbabwe'?. Therefore, let us wait for the days to come before we judge.
Most of us here in the cyber have limited information in reference to the fact. Therefore, as a Christian, don't rush to judge (Le Fird Anchekul endayferedibin!)
Abetu Le Andebetie Tebaqi Anurlat....
Egziabher Betekrstianachin YiTebqlin, amen.
G.K

ዲያቆን መሐሪ ገብረማርቆስ said...

ከአንድ ነገር ነጻ መውጣትና ለአንድ ነገር ነጻ መውጣት የተለያዩ ነገሮች ናቸው፡፡

የቦሌውን ድንጋይም ሆነ ሌሎቹን ቤተክርስቲያን ላይ የተፈጸሙትን ግፍጥጥ ብለው የወጡ ቁልፈታም በደሎች አባቶቻችን መቃወማቸው አንድ እመርታ ቢሆንም የመቃወማቸው ግቡ መቃወም ብቻ ሳይሆን የተበላሸውን ለማስተካከል መሆን አለበት፡፡ መቃወም በራሱ ግብ ሊሆን አይችልም፡፡

የቤተክርስቲያንን እጆች ለዘመናት ስትታሰር ከኖረችበትና ከቅርብ ጊዜ ወዲህ ደግሞ እየተጠፈረችበት ከመጣችው ሰንሰለት መፍታት ብቻ ሳይሆን ነገ ይህ የመለካዊነት፣ የስግብግብነትና የዘረኝነት ዲያብሎሳዊ በሽታ ዳግም አንሠራርቶ እንዳይዛት ለችግሮቹ መፍትሔ በመስጠት መዋቅራዊ ድክመቱ መፈወስ (ጠብቆ ይነበብ) አለበት፡፡ የነበረውን የተበላሸ አስተዳደር ለመተካት መንቀል አንዱና ከፊሉ ጉዳይ እንጂ ሙሉ ሥራው አይደለም፡፡ የተስተካከለ አስተዳደር መትከል ይቀራል፡፡ አለበለዚያ ፈረንጆቹ እንደሚሉት Power Vacuum ይፈጠርና ለሌላ የተበላሸ አስተዳደር መንገድ ይከፍታል፡፡ ስለዚህም፡-

ቅዱስ ሲኖዶስ አምና ያቋቋመው ሥራ አሥፈጻሚ ኮሚቴ ከነሙሉ ዐቅሙ ወደ ሥራው ይመለስ፡፡

አባ ጳውሎስም ሆኑ ሌሎች በዚህ ሊከፉ ይችሉ ይሆናል- መብታቸው ነው፡፡ ጥቅሙ ሲነካበት የማያኮርፍ የለምና የማኩረፍ መብታቸው የተጠበቀ ነው፡፡

ውድ አባቶቻችን

አንገታችንን ደፍተን የኖርንባቸው ዓመታት ሳያንሱ ባለፈው ዓመት ባደረጋችሁት ችላ ባይነትና ፈሪነት የተነሣ ሰዎቹ በባዕዳን ዓይን ሌቦች የሚመሯት ቤተክርስቲያን ተደርጋ እንድትሳል አድርጋችኋል፡፡ በሓፍረት የለሽ ሥራዎቻቸው እኛንም አንገታችንን ከማቀርቀር አልፈን ጨርሶ እንዲቆርጡን ዕድል ሰጥታችኋቸዋል፡፡ ዘንድሮ ይህ መደገም የለበትም፡፡ ኮሚቴውን ወደ ሥራው መልሱት፡፡ ፓትርያርኩን ወደ ጸሎት ሕይወትና ወደቡራኬ አገልግሎት ወስኑ፡፡ የአንድ ዓመት ስሕተቶቻችሁ ምን ያህል ውርደት በቁና እንዳከናነበን አትርሱ፡፡ ዘንድሮ ያንን ስሕተት ደገማችሁ ማለት እንደመካከለኛው ዘመን ምንግዴና ምንደኛ የካቶሊክ ጳጳሳት ቤተክርሰቲያኗንና አምላኳን ሰድባችሁ ለሰዳቢ አሳልፎ መስጠት ነው፡፡ ዛሬ የአውሮፓ ቤተክርስቲያን ወደ ዳንስ ቤት መቀየሯንም አትዘንጉ፡፡

ስለቤተክርስቲያን ብላችሁ ልትሞቱ ይገባችኋል- ካስፈለገ፡፡ እናንተን እያየን እኛም ለሰማዕትነት እንቀርባለን፡፡

ጌታ ሆይ እባክህ ምንደኛውን ንቀለው!

ወርቅን የሚወዱ ይነቀሉ!!!

awudemihiret said...

እንደ ኤልያስ ዘመን አምላክ አንዳንድ አባቶችን ሰውሮ አስቀርቶልናል።ወደፊትም ቤቱን ለሆዳሞች
አሳልፎ እንደማይሰጥ ተስፋ አለኝ።አምለከ እስራኤል ቤተክርስቲያናችንን ከሆድ አደሮች ይጠብቅልን።

Tamiru said...

እግዚአብሔር ይመስገን ጥሩ ጥሩ ወሬ እየሰማን ነው ከወደ ጠ/ቤ/ክ፡፡
አሁንም ጉባኤው እግዚአብሔር ይቆጣረው፡፡
እርሱ የፈቀደው ብቻ ይሁን አሜን!

Deacon Mehari Gebre Marqos said...

አንድ እግር በርበሬ መንቀል አቅቷችሁ

አቃጥሎ ለብልቦ አንድዶ ፈጃችሁ

ይህንን ሲሰማ ያጎራል ላመሉ

ማናትም ቢሏችሁ ምንትዋብ ናት በሉ

Anonymous said...

አዬዬዬ ፋንታሁን ኦስትርያ ሊቀመጥ ከቶ አይችልም።አንገቱን ይዘን እናስመልሰዋለን።ብቻ የት ሃገር
እንደሚሄድ ተከታተሉና ጠቁሙን።

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)