October 31, 2010

ርእሰ አንቀጽ፦ ብፁዕ ወቅዱስ አቡነ ጳውሎስ “በቃ” ሊባሉ ይገባል፤

  • "ተዘልፎ ልቡን ያደነደነ ድንገት ይሰበራል፤ ፈውስም የለውም" (ምሳሌ 29፡1)
 (ደጀ ሰላም፤ ኦክቶበር 30/2010፤ ጥቅምት 20/2003 ዓ.ም):- የኢትዮጵያ ኦርቶዶክስ ተዋሕዶ ቤተ ክርስቲያን በታሪክዋ ገጥሟት የማያውቅ ችግር ላይ ለመሆኗ ነጋሪ የማያሻው የአደባባይ ምስጢር ከሆነ ሰነባብቷል፡፡ በእርግጥ በረዥም ዘመን ታሪክዋ የተለያዩ ፈተናዎች ተፈራርቀውባታል ከውጭና ከውስጥ ጠላቶች፤ ዳሩ ግን በብፁዕ ወቅዱስ አቡነ ጳውሎስ ዘመነ ፕትርክና የገጠማት ግን ከቶ ሆኖ የማያውቅ ነው፡፡

የኢትዮጵያ ቤተ ክርስቲያን በራሷ ልጆች መመራት ከጀመረችበት ካለፉት 50 ዓመታት ጀምሮ አቡነ ጳውሎስን ጨምሮ 5 ፓትርያርኮችን አስተናግዳለች። በአረፍተ ዘመን በተገቱት በሦስቱ ፓትርያርኮችና በሕይወት ባሉት 4ኛ ፓትርያርክ ዘመን ቤተ ክርስቲያኒቱ አሁን እንዳለው ያለ ውሳጣዊ ችግር አልገጠማትም፡፡ ለዚህም ምክንያቱ ራሳቸው ብፁዕ ወቅዱስ አቡነ ጳውሎስ ናቸው። ብፁዕ ወቅዱስ አቡነ ጳውሎስ በሁለት ወገን የተሳለ ሰይፍ የተሰኘ ቅኔ ተዘርፎላቸው በመንበሩ ላይ ከተሰየሙ ማግስት ጀምሮ በቤተ ክርስቲያኒቱ ላይ የተደረጉትንና እየተደረጉ ያሉትን በደሎች በወፍ በረር እንቃኛቸው፡-
  1. ምእመናንን የማሰላቸት ተግባር
ብፁዕ ወቅዱስ አቡነ ጳውሎስ በአዲስ አበባ ምእመናን አፍ ውስጥ መጀመሪያ የገቡት የንግስ ክብረ በዓል ሥርዓትን ያለመጠን በማራዘማቸው ነው ባለው የቤተ ክርስቲያኒቱ ባሕልና ልምድ መሠረት አንድ የንግስ በዓል ቅዳሴውን አካቶ ቅዳሴው ተሰዓት ከሆነ ቢዛ ዘጠኝ ሰዓት ተኩል ላይ ሰርኦተ ሕዝብ ይሆናል ብፁዕ ወቅዱስ አቡነ ጳውሎስ ግን በረዥም ፖለቲካ ቀመስ ትምሀርት ሕዝቡን ለሁለት ለሦስት ሰዓት ያህል ያግቱታልአብዛኛው ዲስኩራቸው ምእመኑን የሚዘልፍ ያለውን መንግስት የሚያወድስ በመሆኑም ምእመኑ ጥሏቸው እንዳይሄድ ታቦቱን አቁመዋል አንጀቱ እያረረና ዳግመኛ እርሳቸው በሚገኙበት የንግስ በዓል ላይ ላለመገኘት ለራሱ እየማለ የግዱን በረከት አገኝበታለሁ ብሎ ሄዶ ጨጓራ በሽታ ሸምቶባት ይመለሳል፡፡

በዚህ ምክንያት የተነሳ ብዙ ምእመናን ብፁዕ ወቅዱስ አቡነ ጳውሎስ ይገኛሉ ብሎ የሚጠረጥረው ንግስ ላይ አይገኝም፡፡ ብፁዕ ወቅዱስ አቡነ ጳውሎስ የሚገኙበት የንግስ በዓል ቅዳሴው ጠዋት ከሆነ ሰርኦተ ሕዝብ የሚሆነው ፈጠነ ከተባለ ዘጠኝ ነው፡፡ ከሰዓት ከሆነ አስራ አንድና አስራ ሁለት ነው፡፡ ይህ ሆን ተብሎ ምእመኑን ከቤተ ክርስቲያን እንዲርቅ የማድረግ ተልእኮ እንደሆነ ተቆርቋሪዎች ብዙ ጊዜ የሚናገሩት ነው፡፡

2. የቤተ ክርስቲያኒቱ አመራር በወሮበሎች እንዲያዝ ማድረግ
በቤተ ክርስቲያኒቱ የአብነት ትምህርት ቤቶችና ቤተ ክርስቲያኒቱ ባሏት መንፈሳዊ ተቋማት ደክመው ቤተ ክርስቲያኒቱን በፈሪሃ እግዚአብሔር እያገለገሉ ያሉ ብዙ ማዕምራነ ቤተ ክርስቲያን እያሉ እርሳቸው ግን ቤተ ክርስቲያኒቱን ፈጽሞ የማያውቁ እንደውም ሲዘርፉ፤ የሰው አጥር ሲዘሉ የኖሩ ወሮበሎችን በመብራት እየፈለጉ በተለይ በአዲስ አበባ አድባራትና ገዳማት ላይ ምንኩስናን በስም ካልሆነ በግብር የማያውቁትን ስመ ምንኩስናን ለሹመትና ለዝርፊያ የተጠቀሙትን ሰዎች ሰግስገው እነሆ ምእመኑን ከጋጣው እያስወጡት የቤተ ክርስቲያኒቱን የገንዘብ ቤት ባዶውን በማስቀረት ላይ ይገኛሉ፡፡

በብፁዕ ወቅዱስ አቡነ ጳውሎስ አማካይነት የአዲስ አበባን ገዳማትና አድባራት የተቆጣጠሩት በአብዛኛው የአራት ኪሎ ሊስትሮዎች ባወጡላቸው ስም ልጠቀምና የፍንዳታ መነኮሳት ናቸው፡፡ እነዚህ ሳይገባቸው ለሹመትና ለዝርፊያ የምንኩስናን አስኬማና ቀሚስ የደፉና ያጠለቁ ወሮበሎች ምንኩስናን በዓላማ የተቀበሉትን የእውነተኞቹን መነኮሳትን ስም ለማጥፋትና በምእመኑ ዘንድ ያላቸውን አባታዊ ስሜት ለማሳነስ እየጣሩ ነው። ይህም መነኮሳትን በምእመናን ዘንድ ተቀባይነት እንዲያጡ እየተደረገ ያለ ሴራ አካል ነው፡፡ ምንኩስና ወንጌል ያመጣቻት ሕግ ናት “ምንኩስናሰ ጥበበ ሕግ መሢሐዊት ይእቲ” እንዲል ፍትሕ መንፈሳዊ፡፡ መነኮሳትም ምድራውያን መላእክት ሰማያውያን ሰዎች ናቸው፡፡ በግብራቸው ሰማያውያን፣ በተፈጥሯቸው ምድራውያን መባላቸውን ልብ ይሏል፡፡

እነዚህ በብፁዕ ወቅዱስ አቡነ ጳውሎስ ዘመነ ፕትርክና እንደ አሸን የፈሉት መነኮሳት ግን እንኳን መላእክትን በግብር ሊመስሉ ከሰውነት ተርታም የወጡ ናቸው፡፡ መነኮሳት በሥራቸው ሁሉ ሐዋርያትን ያከሉ የመሰሉ ናቸው። ከዚህ ዓለም ገንዘብ በመለየት ሹመት ሽልማትን በመተው ክርስቶስን በፍጹም ልባቸው በፍጹም ነፍሳቸው የተከተሉ መሆን አለባቸው፡፡ በብፁዕ ወቅዱስ አቡነ ጳውሎስ ዘመነ ፕትርክና የፈሉት “መነኮሳት” ግን ልብሰ ምንኩስናውን መድመቂያ አስኬማውን ማጭበርበሪያ ከማድረጋቸው ውጪ በጠራራ ፀሐይ በማናለብኝነት መነኮሳት ሊገቡበት ቀርቶ ስለ እርሱ ሊሰሙ የማይገባቸው ቦታ በመገኘት፤ እውነተኛ አባት መስለዋቸው ለንስሐ የሚቀርቡዋቸውን እህቶች በዝሙት በመፈታተን፤ የቤተ ክርስቲያን ሙዳይ ምጽዋትን በመዘቅዘቅና ብዙ አሳፋሪ ድርጊት የተሰማሩ ናቸው። ስለ እነርሱ በየጊዜው እየተሰማ ከዚህ ጉድ ይገላግሉናል በማለት ምእመናን ወደ ብፁዕ ወቅዱስ አቡነ ጳውሎስ አቤት ሲሉ የሚሰጣቸው መልስ “ጆሮን ጭው የሚያደርግ”፣ ከቤተ ክርስቲያኒቱ ፍጹም የሚያርቅ ነው፡፡

በአንድ ወቅት በአንድ ደብር ላይ ተመድቦ የነበረ በእንጦንስ ቆብ የሚነግድ ወንበዴ የደብሩን ካዝና በማራቆቱ ዋልጌነቱ ገደብ ያለፈ በመሆኑ የአጥቢያው ምእመናን ወደ ብፁዕ ወቅዱስ አቡነ ጳውሎስ አቤት ሊሉ ይሄዳሉ። ለዚህ ተግባር ሾመው ሸልመው የላኩት ዋናው አዝማች እርሳቸው መሆናቸውን ያላወቁት ምእመናን (አባት አግኝተው) ለአቤቱታ ነበር ወደእርሳቸው የሄዱት ከብፁዕ ወቅዱስ አቡነ ጳውሎስ የሰሙት ግን ያልጠበቁትና ኅሊናን የሚያስት ነበር“ገንዘባችንን በላ ብላችሁ ነው እዚህ ድረስ የመጣችሁት? ገና እናንተን የሚበላ ይሾምላችኋል” የሚል ነበር መልሳቸው፡፡

ብፁዕ ወቅዱስ አቡነ ጳውሎስ ሐሰት አልተናገሩም። በአዲስ አበባ አድባራት ላይ ሰው በላ የሆኑ በምንኩስና ልብስ የደመቁ አውሬዎችን ማሰማራታቸው አገር ያወቀው ፀሐይ የሞቀው ያደባባይ ምስጢር ነው፡፡ እነዚህ የቀበሮ ባሕታውያን የምእመኑን ገንዘብ ብቻ ሳይሆን ሕይወቱን ሁሉ እየሰረቁ ለተኩላ አሳልፈው እየሰጡት ነው፡፡ ለዚህ ሁሉ ፊት አውራሪው ብፁዕ ወቅዱስ አቡነ ጳውሎስ መሆናቸው የተረጋገጠ ነው፡፡

ብፁዕ ወቅዱስ አቡነ ጳውሎስ ወሮበላ “መነኮሳትን” ብቻ አይደለም በዚህች ቤተ ክርስቲያን ላይ ያዘመቱባት ቀኝና ግራቸውን የማያውቁ  ውርጋጦችንም ጭምር ነው ብፁዕ ወቅዱስ አቡነ ጳውሎስ ይህቺን ቤተ ክርስቲያን ለማጥፋት ጦር ሰብቆ ከመጣው ጋር ሁሉ አብሮ ለመስራት ፈቃደኛ ናቸው። ለቤተ ክርስቲያኒቱ የሚያስብ ሁሉ የእርሳቸው ጠላት ነው እርሳቸውን ቢቃወም እንኳን ቤተ ክርስቲያኒቱን ለማጥፋት ጦር ሰብቆ ዘገር ነቅንቆ የመጣ ከሆነ የዓላማ አጋራቸው ነውና ከእርሱ ጋር እጅና ጎንት ሆነው ይሰራሉ። ለዚህም እርሳቸውን ሰድቦ መጽሐፍ ጽፎ ከነበረው ግራና ቀኙን ከማያውቀው እንጭጭ ጋር የፈጠሩት ሕብረት አንዱ ማስረጃ ነው፡፡
  • ቤተ ክርስቲያኒቱን ሊቃውንት አልባ የማድረግ ዘመቻ፤
የቤተ ክርስቲያኒቱ ጠበቆች የሆኑት ሊቃውንተ ቤተ ክርስቲያን እየተገፉ ከቤተ ክህነቱ አስተዳደር በአፍኣ እንዲሆኑ ማድረግ የጀመሩት በመንበራቸው ላይ ጥቂት ዓመታትን እንኳን ሳያስቆጥሩ ነው። ይህ የሚያሳየው የቤተ ክርስቲያኒቱን ቀኖናና ሥርዓት ለማጥፋት ዓልመው የመጡ ናቸውና ከሊቃውንቱ ተቃውሞ እንዳይገጥማቸው በማሰብ ነው፡፡ ለቤተ ክርስቲያኒቱ ብርሃን የሆኑ ብዙ ሊቃውንተ ቤተ ክርስቲያንን አስመርረው አስወጥተዋል፡፡ በቤተ ክርስቲያኒቱ ላይ “የቆብ ዘረኝነት”ን አንግሰው በሕግ (በትዳር) ያሉ ሊቃውንትን ነቅለው በምትካቸው ለመሾም ብለው የምንኩስና ቆብ ያጠለቁ ምንደኞች መነኮሳትን ተክለዋል። በዚህም ለዘመናት የኖረውን የኢትዮጵያ ቤተ ክርስቲያን ባሕልን አጥፍተው ካቶሊካዊ ሥርዓትን የመተካት ዕቅዳቸውን ጀምረውታል።

በረዥሙ የኢትዮጵያ ቤተ ክርስቲያን ታሪክ ሕጋውያን በቤተ ክርስቲያኒቱ አስተዳደር ውስጥ ትልቅ ሥፍራ እንደ ነበራቸው የቤተ ክርስቲያኒቱን ጉዞ የሚያውቅ ሁሉ የሚገነዘበው ሀቅ ነው፡፡ አሁን ግን መጻሕፍትን የሚያራቅቁ፣ አስተዳደርን ጠንቅቀው የሚያውቁ መንፈሳዊነታቸው የተመሰከረላቸው፣ ቤተ ክርስቲያኒቱን የሚወዱና ሌት ተቀን ለቤተ ክርስቲያኒቱ የሚያስቡ ሕግ ገብተው ያሉ ሊቃውንት እየተሽቀነጠሩ እየተጣሉ ትንታግ በሆኑት በእነዚህ አበው ሊቃውንት ምትክ ለሹመት ለሽልማት ብሎ የምንኩስና ቆብ ደፍቶ በመጣ በማንኛውም ተርታ ሰው እየተተኩ ነው፡፡ ይህ ቤተ ክርስቲያኒቱ አሁን ላለችበት ውድቀት ታላቅ አስተዋጽኦ አድርጓል፡፡  

  •  የቤተ ክርስቲያኒቱን አንድነት ማናጋት፤
ከሀገር ውጭ ያለችው የኢትዮጵያ ኦርቶዶክስ ተዋሕዶ ቤተ ክርስቲያን አሁን ላለችበት መለያየት ብፁዕ ወቅዱስ አቡነ ጳውሎስ የአንበሳውን ድርሻ ይወስዳሉ። በመንበሩ ላይ ከተሰየሙበት ጊዜ አንስቶ ለይስሙላና ለፕሮፓጋንዳ ፍጆታ ከዋለ  የለበጣ የእርቅ ጥረት ያለፈ ያደረጉት መሠረታዊ የእርቅ አጀንዳ የለም። እንዲያውም ልዩነቱን ወደባሰ ደረጃ አድርሰውታል። በውጭ ያሉት አባቶች እልህ ተጋብተው ቀኖና ቤተ ክርስቲያንን ጥሰው ጳጳሳትን እንዲሾሙ አስተዋጽኦ አድርገዋል። በገለልተኝነት ያሉትም ባሉበት እንዲጸኑ እያበረታቱ ይገኛሉ። ይህን የሚያደርጉት የሥልጣን ዘመናቸውን ለማራዘምና ቤተ ክርስቲያኒቱን የማጥፋት ተልዕኳቸውን ለማሳካት ነው፡፡

  • የቅዱስ ሲኖዶስን ሉዓላዊነት መጋፋት፤
ቤተ ክርስቲያን ዘኢትዮጵያ ሐዋርያዊት እንደመሆንዋ የምትመራው በሕገ ሐዋርያት ነው። ሐዋርያዊት ቤተ ክርስቲያን በመንፈስ ቅዱስ በሚመራው ቅዱስ ሲኖዶስ ትተዳደራለች። የቅድስት ቤተ ክርስቲያን የመጨረሻ ወሳኝ አካል ቅዱስ ሲኖዶስ ነው፡፡ አምስተኛው የኢትዮጵያ ቤተ ክርስቲያን ፓትርያርክ አቡነ ጰውሎስ ግን ልክ እንደ አምባገነን ምድራዊ መሪ የሲኖዶሱን ሥልጣን በአምባገነንነት ነጥቀው ያሻቸውን ሲሾሙ ያሻቸውን ሲያባርሩ፣ ቤተ ክርስቲያኒቱን ያለ ሕጓና ሥርዓትዋ ሲዘውሯት ኖረዋል። በምድራውያን አምባገነን መሪዎች የማይደረገውን እስከማድረግ ደርሰዋል። በቁማቸው ሐውልት እስከማቆም፡፡ በቅዱስ ሲኖዶስ ውሳኔ ላይ መሳለቅ የሲኖዶስን ውሳኔ አሽቀንጥረው ራሳቸው ካደራጁት የማፍያ ቡድን ጋር የራሳቸውን ኔት ወርክ ዘርግተው የቅዱስ ሲኖዶስን ህልውና እስከመዘንጋት ደርሰዋል፡፡ ምእመኑም በቀቢጸ ተስፋ ውስጥ ሆኖ “ቤተ ክርስቲያኒቱን የሚመራው ቅዱስ ሲኖዶስ አለ ወይስ የለም?” እስከማለት ደርሷል፡፡ 

ሰሞኑን የቅዱስ ሲኖዶስ አባላት የወሰዱት ቁርጠኝነት ምእመኑን ከቀቢጸ ተስፋ ያወጣ ሲሆን በብፁዕ ወቅዱስ አቡነ ጳውሎስ በኩል የሚታየው አልሞት ባይ ተጋዳይነት የውስጥ ሥውር አጀንዳቸውን ቁልጭ አድርጎ ያሳየ ነው፡፡

አሁን የብፁዕ ወቅዱስ አቡነ ጳውሎስ አምባገነናዊና ኢ-ኦርቶዶክሳዊ አመራርና አሠራር ለአንዴና ለመጨረሻ ጊዜ ተነቅሎ የሚጣልበት ወቅት መሆን አለበት። ብፁዓን አበው ሊቃነ ጳጳሳት የቅዱስ ሲኖዶስ አባላት በወሰኑት ውሳኔ መሠረት ብፁዕ ወቅዱስ አቡነ ጳውሎስ የማይስማሙ ከሆነ ከዚህ በላይ መታገስ ሕዝበ ክርስቲያኑን ከቤተ ክርስቲያን ማራቅ፣ ቤተ ክርስቲያኒቱንም ለተኩላዎች አሳልፎ መስጠት ነው። ብፁዕ ወቅዱስ አቡነ ጳውሎስ  ቅዱስ ሲኖዶስ ከወሰነው ውሳኔ እንደለመዱት አፈንግጠው በራሳቸው መንገድ ያደራጁትን የማፍያ ቡድን ይዘው የሚጓዙ ከሆነ ሊወገዙና ከቤተ ክርስቲያኒቱ መንበር ሊወገዱ ይገባል፡፡ ቅዱስ ሲኖዶስ ይህን ካላደረገ ጥርስ የሌለው አንበሳ ሆኖ ለመቀጠል ይገደዳል ማለት ነው፡፡ በበኩላችን ብፁዕ ወቅዱስ አቡነ ጳውሎስ “ረግረጉና እቋሪው ውኃ ግን ጨው እንደሆነ ይኖራል እንጂ አይፈወስም” እንደተባለው (ሕዝ.47፤11) ከእንግዲህ ወዲህ የማይፈወሱ ድዊውይ ናቸውና ቅዱስ ሲኖዶስ ከመንበሩ ሊያስወግዳቸው ይገባል፡፡

ቸር ወሬ ያሰማን፤ አሜን

32 comments:

Anonymous said...

ውድ ወገኖቼ

ውድ ወገኖች

እግዚአብሔር ይመስገን መቼም በቤተ ክርስቲያናችን ዙሪያ እንደ አቅማችን መጠን ከጊዜ ወደ ጊዜ በሚሆነው ነገር ሁሉ ተስፋ እያጣን በመጣንበት ሰዓት ብፁዓን አባቶቻችን አንድ ልብ በመሆን ታላላቅ ውሳኔዎችን ለመወሰን በመብቃታቸው ብቻ ምን ያህል እንዳስደሰተን ለሁላችን ግልጽ ነው። ነገር ግን የቅዱስ ፓትርያርኩ አካሄድ እንዲህ መሆን እና ከአሁን በኋላ ውሳኔዎቹ ተግባራዊነታቸው አጠያያቂ ቢሆን በውኑ ተስፋችን ምንድን ነው? ከሁሉ በላይ አውልቱ በውሳኔው መሠረት ባይፈርስ? ሌሎቹ ውሳኔዎች አለመፈጸማቸው የተለመደ ስለሆነ ማለት ነው።

እግዚአብሔር ይርዳን

Anonymous said...

Dear DS,

I agree on the suggested solution. Let us unite towards this proposal.

Let the will of God be with us

Anonymous said...

nice comment. but why you guys called him "btshu wekedus" he is not a saint . I think abune pauolos is enough.

awudemihiret said...

አዎ በቃቸው።አሁን አባቶችን ልንረዳ ይገባል።ደሰ እንዴት ብለን ሆ ብለን ልንነሳና አባቶችን
ልንረዳ የምንልበትንና ከጎናቸው መሆናችንን ልንገልፅላቸው የምንችልበትን ሁኔታ አመቻቹልን።

Anonymous said...

Thank you DS. I wish all the Holy Synod members would get a copy of this article. I will do all my best to distribute to all church members. I hope other brothers and sisters will do the same.

ቅዱስ ሲኖዶስ ከመንበሩ ሊያስወግዳቸው ይገባል፡፡

Nemera

Mahlet said...

Deje-Selam

I would like to say thank you for the progression of the courage and journalism from the meeting log,timely analsyis to presenting the one and only solution to the long suffering of the People

Thank you

Anonymous said...

+++
ደጀ ሰላሞች የሰጠችሁት ትነታኔ በእውነቱ ለማንኛውም የተዋህዶ ምእመን በቂ እና ተቀባይነት ያለው ነው።
ግን ማን ይሆን ለዚህች ቤተ ክርስቲያ ሰማዕት ለመሆን የሚደፍር!!!
ብጹዕ ቅዱስ አቡነ ጳውሎስ በዙ በደል አድርሰዋል እያደረሱም ነው!!!
ከዚህ በፊት ስለቤተ ክርስቲያን ክብር ሲባል ስለ ሰላሟ ሲባል ብዙ ትዕግስት ተደርጓል!!!
ግን ማን ነው አሁን በቃ ማለት የሚችለው?
ምን እናድርግ ነው ጠያቄው?
ዞሮ ዞሮ ከብጹአን አባቶች ተጋድሎ እና ቆራጥነት ከሊቃውንተ ቤተ ክርስቲያ ከምእመናን ተጋድሎ የሚያስከፍል ነው!!!

Dan-ዳን said...

5ኛው ፓትርያርክ ባደረባቸው የጤና መታወክ ምክንያት
ቀኖና ቤተ ክርስቲያንን ሕገ ቤተ ክርስቲያንን ማስተዋል ማስከበር እንዲሁም ማክበር ስለ ተሳናቸው

አመራራቸው ክርስቲያን ምዕመናን የሚሳዝን

አምልኮተ እግዚአብሄርን አስክዶ ወደ ጣዖት አምልኮ የሚመራ --ሃውልታቸውን አቁመው -እንደ ፈርኦን ስገዱልኝ ወደ ማለት የቃጣቸው

የሾማቸውን ቅዱስ ሲኖዶስ አልታዘዝ ብለው ያፈነገጡ

በፍቅረ ነዋይ የተነደፉ --ወርቅን የሚወዱ ይነቀሉ ይላል የቅዳሴ ጸሎታችን

በውስጥ በአፍአ -በተግባር በአለባበስ- ካቶሊኮቹን እየተከተሉ እንደ ሱስንዮስ አገርና ሃይማኖት እየገለባበጡ

ቤተ ክርድቲያንና ምዕመናንን አደጋ ላይ የጣሉ

ሚልዮን ህዝብ ከሚታመስ አንዱ ሰው በገዳም ይወሰን ወደገዳም ይመለስ

SendekAlama said...

+++

በእርሳቸው ወራዳ ሥራ ቤተ ክርስቲያን እንዳትነቀፍ በማለት የበግ ላት ሆነን ሁሉን ሸፍነንላቸው ኖረናል። በማን አለብኘነት ቤተ ክርስቲያናችንን አሳልፈው ለወሮ በላ ሲሰጡ ግን ለትንሽ ጊዜም ቢሆን የፍዬል ጂራት ሆነን ወራዳ ተግባራቸውን በአደባባይ መናገርና በቃ ልንላቸው ይገባል። ራሳቸውን በራሳቸው ያዋረዱ ስለሆኑ ፍርዱ በእርሳቸው ነው።

በቃ!

Mahlet said...

Asking about why we call Abune Paulos His Holiness.
The Ethiopian Orthodox Church ,all the Orthodox Churches in that matter call their Popes His holiness since these churches teach that apostolic succession is maintained through the consecration of their bishops in unbroken personal succession back to the apostles or at least to leaders from the apostolic era.Therefore the term Holy is used to the position they are holding not the individual as a person.

The De... said...

I said earlier that it was all a game, and the winner is the usual suspect.I is only when a change of system comes change comes,and that requires sacrifice.Are you ready?? Aba Pawulos has no power;the central command is in the palace.''If anybody touches the father,he also touches the son'' So the fight should be with the real enemy of the church and the country EPRDF/TPLF.

Anonymous said...

To whom it may concern,to all spiritual orthodox people,to those who are victims of this kind of work.

Let us talk about God's word.I am really amazed how we people follow devil's work.

It it mentioned in the Holy Bible?
Did our truly Fathers thought us this behavior?

No one can answer these questions except our spirit? lets us our spirit
be a judge up on us. We have to confess."Masenakeya lemihon weyolet"

On the contrary, Our God has thought us to be sacrificed even for a single individual.Our Fathers had been sacrificed and are being suffering.God bless you.

Let us pray for our church.

Dan-ዳን said...

የፈራነው ደረሰ ያጠራነው ደፈረሰ
እንዳይሆን
ከአምስ ቀን በፊት እንዲህ ብዬ ጽፌ ነበር

====Dan said...
October 26, 2010
ጥሩ አጀማመር ይመስላል።
ወደ ትክክለኛ ስርዓት ለመመለስ ተጀመረ እንጂ ዘላቂ ውጤት ገና አልታየም።

ስጋቴ እንዳለፈው አመት የሲኖዶሱ ውሳኔ ይህም ውሳኔ እንዳይፍረከረክ ነው።

የዛሬ አመት የደረሰውን እምታስታውሱ አስታውሱ

"አቡነ ጳውሎስ ከአስተዳደር ኃላፊነት ተቆጥበው በቡራኬ በጸሎት ተወስነው መንፈሳዊ አመራር ብቻ እንዲሰጡ "በመንበራቸ በክብር እንዲቀመጡ" በሲኖዶሱ የተቋቋመው የሥራ አስፈፃሚ ኮሚቴ አስተዳደራዊ የበላይነትም ፀድቆ ነበር

አቡነ ጳውሎስ ግን በሲኖዶሱ የተቋቋመው የሥራ አስፈፃሚ ኮሚቴ አገዱ ጳጳስም ሻሩ።

ሲኖዶሱም ይህን ያደረጉት "ከሕገ ቤተክርስቲያን ውጭ ሆነው ነው።" ተጠሪነቶ ለሲኖዶሱ ነው" ጳጳሳት መሾምም ሆነ ማገድ የሚችለው ሲኖዶሱ እንጂ እሳቸው አለመሆናቸውን በመጥቀስ ስህተት መስራታቸውን አምነው ይቅርታ እንዲጠይቁና እግዱን እንዲያነሱ ይጠይቋቸዋል።

አቡነ ጳውሎስ ግን
“ይህን በፍጹም አልቀበልም እንደውም እንዲህ ያለ ሕገወጥ ስብሰባ አልመራም” በማለታቸው፤”ስብሰባውን የማይመሩ ከሆነ አዳራሹን ለቀው ይውጡልን” በማለት ጳጳሳቱ ቢጠይቋቸውም “አልወጣም የምትሉትን እዚሁ ቁጭ ብዬ እሰማለሁ” በማለታቸው 41 የሚሆኑ ጳጳሳት ሰብሰባውን ረግጠው በመውጣት ለብቻቸው በሌላ አደራሽ ተሰባስበዋል።

የሲኖዶሱ አባላት ተሰብስው በደረሱበት ድምዳሜም ፓትርያርኩ ያሳለፉት የዕግድ ውሳኔ ሕገ ቤተ ክርስቲያንን የተከተለ ባለመሆኑ እግዱ እንዲነሳ እሳቸውን በተመለከተ የአስተዳደር ስራውን ጨርሶ መስራ ስላልቻሉና ቤተክረስቲያኒቱን ወዳልተፈለገና ፍጹም ወደተበላሸ አቅጣጫ እየወሰዷት በመሆኑ ከጸሎት ውጭ በማንኛውም አስተዳደር ስራ እዳይገቡ እንደራሴ ሊሾምባቸው ይገባል በሚል ውሳኔ ላይ ደርሰው ይህን ውሳኔ ለማጽናት ለአዳሪ ቀጥረው ተለያይዋል።

አርብ ሐምሌ 3 ቀን 2001 ዓ.ም.

ስብሰባው የተመራው እንደወትሮ በፓትርያርኩ ሳይሆን በከፍኛ የመንግሥት ባለሥልጣን አባይ ፀሐዬ ነበር። እንዲሁም ኮሚሽነር ወርቅነህ ገበየሁና ሌሎች ሁለት ባለሥልጣናት ስብሰባውን አጅበውት ውለዋል።

መንግሥት በኃይማኖት ጉዳይ ጣልቃ የመግባት ፍላጎት እንደሌለው በመግለጽም ቤተክርስቲያኒቷን ወደ ሰላም ለማጣት ሕገቤተክርስቲያኒቷንና የሲኖዶሱን ውሳኔ አክብረው እንዲንቀሳቀሱ ሲኖዶሱም ተሰብስቦ ይበጃል ያለውን ውሳኔ እንዲያሳልፍ መክረው ስብሰባው በተረጋጋ መንፈሥ ሰኞ ዕለት እንዲቀጥልና ይበጃል ያለውን ውሳኔ እንያሳልፍ አሳስበው ተለያይተዋል።

ሰኞ ሐምሌ 6 ቀን 2001 ዓ.ም.

ጳጳሳቱ አርብ ዕለት በተሰጣቸው ተስፋ ስብሰባው በተረጋጋ መንፈሥ ይቀጥላል የሚል ስሜት የነበራቸው ቢሆንም ፓትርያርኩ ምንም የተለየ መሻሻል ሳያሳዩ በአቋማቸው በመጽናት በቀዳሚነት አጀንዳ ተይዞ የነበረውን የሥራ አስፈጻሚውን እግድ አላነሳም በማለት አሻፈረኝ አሉ።

ሲኖዶሱ የሾማቸውን የሥራ አስፈጻሚ ኮሚቴ አባላት ከሕገ ቤተክርስቲያን ሕገ ደንብ ውጪ ለምን ታገዱ የሚል ጥያቄ የቀረበላቸው አቡነ ጳውሎስ፤ኮሚቴው የተሰየመው መተዳደሪያ ደንብ አቅርቦ ከሐምሌ 5 ቀን 2001 ዓ.ም. በኋላ ለሲኖዶሱ እንዲያቀርቡ እንጂ ከዛ ውጭ እየተሰበሰቡ የፈለጉትን ውሳኔ ለማሳለፍ ባለመሆኑ መተዳደሪያ ደንቡን አዘጋጅተው ሳያቀርቡ በሱ ጉዳይ ላይ በስብሰባው መነጋገር እንደማይፈልጉ ፓትርያርኩ በመናገር ምላሽ መስጠታቸውን ምንጮቹ ተናግረዋል።

ሊቃነ ጳጳሳቱ መተዳደሪያ ደንቡን አዘጋጅተው መጨረሳቻን ኮሚቴው በስብሰባው ላይ ሲገልጹ፤ፓትርያርኩም ቀበል ብለው ስራችሁን ስለጨረሳችሁ መተዳሪያ ደንቡ ወደ ሕግ ክፍሉ ተመርቶ ይመርመር ይላሉ። ጳጳሳቱም ሲኖዶሱ ከላይ መተዳሪ ደን አውጥቶ ያስተዳራል እንጂ ወደታች ልኮ ሕግ አያጸድቅም መተዳደሪያ ደንቡ ተመርምሮ መታየት ካለበትም ገለልተኛ የሆነ የውጭ ኮሚቴ እንዲያየው መደረግ እንዳለበት በመግለጽ ተከራክረዋቸዋል።

ዋናው ጉዳይ መተዳደሪያ ደንቡ ሳይሆን መጀመሪያ ከሲኖዶሱ እውቅና ውጭ የተደረጉ እግዶች ይነሱ የሚለው ነው በሚል ጠንካራ መከራከሪያ በማቅረብ ቢሞግቷቸውም ፓትርያርኩ በጀ የሚሉ ሆነው አልተገኙም።
=======

አመቱን ሙሉ ከድጥ ወደ ማጥ ገብተናል

ያኔ የሲኖዶሱን ውሳኔ ተቀብለው ቢሆን ቢያንስ ቢያንስ የፖስተሩና ሐውልቱ ጥቁር ነጥብ በፓትርያርኩና ቤተክርስቲያናችን አይደርስም ነበር

“ፖስተሩም ይሁን ሐውልቱ ከቀኖና ቤተ ክርስቲያን እና ከሥርዓተ አበው ውጭ መሆኑን ብፁዓን ሊቃነ ጳጳሳቱ ገልጸዋል፡፡ ሐውልት ብለው ጣዖት አቁመዋል፤ ሐውልቱ የዘመናችን አርጤምስስ ነው ” አቡነ እንድርያስ እንዳሉት፣


ለሥርዓትና ቀኖና ቤተክርስቲያን ለቆሙና ለሚታገሉ ሁሉ ለብጹዓን ሊቀ ጳጳስት ከነሱም ጋር ለቆሙ ሁሉ ካህናት ምዕመናን ሁሉ መጸለይና ማበረታታት መደገፍ ይገባናል።

አምና የደረሰው እንዳይደገም።
አምና የደረሰው እንዳይደገም።
አምና የደረሰው እንዳይደገም።

Tesfa said...

ውድ ደጀሰላም ያወጣችሁት ርዕስ አንቀጽ በጣም አስፈላጊ እና ወቅታዊ ነው:: ቤተ ክርስቲያናችንን እንደዚህ የሚያዋርድ አባት ከዚህ በላይ ልንታገስ አይገባም:: አባቶቻችን በጀምሩት በርትተው ሌላ ታሪካዊ ስራ ይሰራሉ ብዬ ተስፋ አደርጋለሁ:: እኛ ከጎናቸው መሆናችንን የምንገልጽበት መንገድ ቢመቻች እና የአቅማችንን ብናደርግ ጥሩ ነው::

ገ/ሚካኤል
ሲያትል

Anonymous said...

ሐምሌ 2002 በታተመው ሐመር መጽሔት ላይ ከኢትዮጵያ እስከ እስክንድርያ በሚል ርዕስ ስድስተኛው የእስክንድርያና የግብጽ ፓትርያርክ ሆነው ቤተ ክርስቲያናቸውን ይመሩ የነበሩትን የአቡነ ቄርሎስን ታሪክ ሳነብ በዕንባ ነበር። መቼ ይሆን ይህች ቤተ ክርስቲያን እውነተኛ መሪ አግኝታ እፎይ የምትልበት ዘመን የሚመጣው አባት ማለት ምን ማለት እንደሆነ ምን አልባት የሚረዱት ከሆነ እባካችሁን የአቡነ ቄሮሎስን የሕይወት ታሪከ « ለአቡናችን» አስነብቧቸው ።

123.... said...

BETAM TKIKIL!!!!

Dan-ዳን said...

ማሳሰቢያ ማሳሰቢያ ማሳሰቢያ
የአባ ጳውሎስ ፎቶግራፍ ከዛሪ ጀምሮ
በዚህ ድሕረ ገጽ አይለጠፍ አንየው
ስማቸውንም አንስማ
ከዛሪ ጀምሮ በመንበሩ የተቀመጡ እየተባለ ይጠቀሱ
በዚህ ማሳሰቢያ ሁሉም ድምጽ ቢሰጥበት

Anonymous said...

That is the right thing to do. To unplant abune poulos's devilish root from the church.

May God be with truthful father.

Anonymous said...

+++
ሀ) ለሀገር ሽማግሌዎችና
የሀገር ሽማግሌዎችና የቤተክርስቲያን ልጆች ፕሮፊሰር ኤፍሬም: ሊቀ ትጉሃን አስታጥቄ አባተ እና ሌሎችም እባካችሁ ሰዉ እሽ የሚሉ ከሆነ ለአንደየና ለመጨረሻ ለምኑአቸዉ ስለቤተክርስቲያን ሰላም ሲባል:: ከእግዚአብሔር ጋር ታደጉአት የታሪክ ባለቤት:፡
ነገሩም በእንቁላሉ በቀጣሽኝ ነዉ:: የባህታዊ ደም ከፈሰሰ ጀምሮ ኃጢያትን ተለማምደውት የፖለቲካ ሰው ናቸው :: ምናልባት የወንዛቸው ልጅ አይዞህ ምንያመጣል ብሎአቸው ከሆነምስ?
ለ)ለብጹዓን አባቶች
ለሥርዓትና ቀኖና ቤተክርስቲያን ለቆሙና ለሚታገሉ ሁሉ ለብጹዓን ሊቀ ጳጳስት ከነሱም ጋር ለቆሙ ሁሉ ካህናት ምዕመናን ሁሉ መጸለይና ማበረታታት መደገፍ ይገባናል።
ብጹዓን አባቶች በሀገረ ስብከታችሁ የቤ/ንን እንዳያሳየን ብላችሁ ለህዝቡ ንገሩ ሥራችሁም ይታወቅ ምዕመናንም ይጸልዩበት::
ሐ)ለምዕመናንም ሁሉ
ምዕመናንም እግዚአብሔር ፊቱን እንዲመልስልን ትጉና ጸልዩ::
መ)ለደጀ ሰላም
የአባ ጳውሎስ ፎቶግራፍ ከዛሪ ጀምሮ በዚህ ድሕረ ገጽ አይለጠፍ አንየው ስማቸውንም አንስማ ከዛሪ ጀምሮ በመንበሩ የተቀመጡ እየተባለ ይጠቀሱ::
ሠ) ለአቡነ ፓውሎስ
የቅዱሳን አጽም ፍርዱን ይስጠዎት ምንም እንኳን ቢመቸዎት አንድቀን ወርቁም አማካሪውም ጥለዉት ይሄዳሉ:: ቢበዛ....

Anonymous said...

i think the meeting that has been held for the last few days didn't solve one major problem of the church. this has to solved. the problem is abune paulose. the solution is " abune paulose mabarer" not only from his post but also from Ethiopia. he doesn't help for the church and for the country.

xyz

solomon said...

ወገኖቼ
ሁላችንም የተናደደን ቢሆንም አንዳንድ አገላለጾች ግን የቤተክርስቲያን ልጅነታችንን የሚጣረሱ እንዳይሆን መጠንቀቅ ይገባል(በሃይልና በስድብ አ እንዳይሁን) ፡፡ በቤተክርስቲያን ሁሉም በሰላምና በስርዓት መደረግ ስላለበት ፡፡ ቅዱስ ሲኖዶስ ያወጣውን ውሳኔ አልቀበልም በማለታቸው ብቻ ሳይሆን ይችን ቤተክርስቲያን በብዙ አጋጣሚዎች ለአጽራረ ቤተክርስቲያኖች መሳለቂያ ለኔ ቢጤዎች ለማያውቁ መጠመጃና ለተኩላ ራት መሆኛ ከሆኑ ቆይተዋል( ብዙ አጽራረ ቤተክርስቲያኖች ምእመናንን በቤተክርስቲያን ያሉ አባቶች የሚሰሯቸውን ስህተቶች እጅግ በማጉላትና በማጥላት … ቤተክርስቲኝን እንዲጠሉና ወደ እነሱ ጎራ እንዲቀላቀሉ ያደርጋሉና) ፡፡ ስለዚህ ከዚህ በኋላ ቅዱስ ሲኖዶሱ ስለ አቡነ ጳውሎስ ያለውን የመጨረሻ የስልጣን ውሳኔ እንዲገልጽ ቢጠየቅ የተሻለ ይመስለኛል፡፡
ለሁሉም እግዚአብሄር ማስተዋሉን ያድለን!!

Anonymous said...

ይድረስ ለደጀ ሰላማዊያን እግዚሰብሔር ብርታቱ ይስጣቹ
አስተየት ከመረጃ ጋር አቅርቡል !
በአንድ ወቅት በአንድ ደብር ላይ ተመድቦ የነበረ በእንጦንስ ቆብ የሚነግድ ወንበዴ የደብሩን ካዝና በማራቆቱ ዋልጌነቱ ገደብ ያለፈ በመሆኑ የአጥቢያው ምእመናን ወደ ብፁዕ ወቅዱስ አቡነ ጳውሎስ አቤት ሊሉ ይሄዳሉ። ለዚህ ተግባር ሾመው ሸልመው የላኩት ዋናው አዝማች እርሳቸው መሆናቸውን ያላወቁት ምእመናን (አባት አግኝተው) ለአቤቱታ ነበር ወደእርሳቸው የሄዱት። ከብፁዕ ወቅዱስ አቡነ ጳውሎስ የሰሙት ግን ያልጠበቁትና ኅሊናን የሚያስት ነበር። “ገንዘባችንን በላ ብላችሁ ነው እዚህ ድረስ የመጣችሁት? ገና እናንተን የሚበላ ይሾምላችኋል” የሚል ነበር መልሳቸው፡፡
በአንድ ወቅት በአንድ ደብር ላይ ተመድቦ የሚለውን በተጨባጭ ማስረጃ ወቅቱን፣ ጊዜው፣ ዓመተ ምህረቱን፣ እንዲሁም ደግሞ የደብሩን ስም፣ የት አካባቢእንዳለ፣ ክፍለ ሀገሩን፣ የተሾመው አካል ስም። ሌላም ሌላም ,,,,,,,,,,, ወ..ዘ…ተ….
እግዚአብሔር ሰላሙን ለሃገራችን ይስጥልን
ቸር ወሬ ያሰማን

Anonymous said...

ይድረስ ለደጀ ሰላማዊያን እግዚሰብሔር ብርታቱ ይስጣቹ
አስተየት ከመረጃ ጋር አቅርቡል !
በአንድ ወቅት በአንድ ደብር ላይ ተመድቦ የነበረ በእንጦንስ ቆብ የሚነግድ ወንበዴ የደብሩን ካዝና በማራቆቱ ዋልጌነቱ ገደብ ያለፈ በመሆኑ የአጥቢያው ምእመናን ወደ ብፁዕ ወቅዱስ አቡነ ጳውሎስ አቤት ሊሉ ይሄዳሉ። ለዚህ ተግባር ሾመው ሸልመው የላኩት ዋናው አዝማች እርሳቸው መሆናቸውን ያላወቁት ምእመናን (አባት አግኝተው) ለአቤቱታ ነበር ወደእርሳቸው የሄዱት። ከብፁዕ ወቅዱስ አቡነ ጳውሎስ የሰሙት ግን ያልጠበቁትና ኅሊናን የሚያስት ነበር። “ገንዘባችንን በላ ብላችሁ ነው እዚህ ድረስ የመጣችሁት? ገና እናንተን የሚበላ ይሾምላችኋል” የሚል ነበር መልሳቸው፡፡
በአንድ ወቅት በአንድ ደብር ላይ ተመድቦ የሚለውን በተጨባጭ ማስረጃ ወቅቱን፣ ጊዜው፣ ዓመተ ምህረቱን፣ እንዲሁም ደግሞ የደብሩን ስም፣ የት አካባቢእንዳለ፣ ክፍለ ሀገሩን፣ የተሾመው አካል ስም። ሌላም ሌላም ,,,,,,,,,,, ወ..ዘ…ተ….
እግዚአብሔር ሰላሙን ለሃገራችን ይስጥልን
ቸር ወሬ ያሰማን

Anonymous said...

ውድ ደጀሰላማውያን

እውነተኛው የቤተክርስቲያናችን አንድ አባት፡ የአሁኑ ፓትርያርክ ስለጣን ከያዙ በኋላ በአንድ መድረክ የተናገሩት እስካሁንም የሚታወስ ነው፡፡እንዲህ አሉ “ እናንተ የትግራይ ሰዎች፤ በዚህ ዘመን መንፈሳዊውም ሆነ ዓለማዊው ስልጣን ዛሬ በእጃችሁ ይገኛል፡፡ ካወቃችሁበት በእግዚአብሄር፣ በታሪክ እና በህዝብ የምትከበሩበት፤ ካላወቃችሁበት፤ የምትዋረዱበት የፈተና ጊዜ ላይ ትገኛላችሁ፡፡ እንግዲህ እወቁበት… ” ብለው ነበር፡፡ በርግጥም ያ ፈተና ዓለማዊውን ትተን በመንፈሳዊው ህይወት በገሃድ እየታየ የመጣ ይመስለኛል፡፡

Anonymous said...

ውድ ደጀሰላማውያን

በነገራችን ላይ አንድ ሃየማኖት ከእምነቱ ውጭ በሆኑና ለዚያ ሃይማኖት የተቀመጠ ደንብና ስርዓትን በማያከብሩ ሰርጎ ገቦች መናፍቃን እና ዘራፊዎች ለሚደርስባት ጥቃት የሚከላከል የህግ ጥበቃ ከመንግስት ማግኘት መብት የላትም? ነው ወይስ ምእመኑ በራሱ መንገድ ነው እንደነዚህ ዓይነቶቹን የበግ ለምድ ለባሾች ማጽዳት ያለበት? በእኛ በኩል ይህንን መስዋዕትነት ለመክፈል ዝግጁ ነን፡፡

Anonymous said...

Thank you Deje Selam, and I fully agree with your stand! Dictator Abune Paulos must be stopped for once and all!!!

The De... said...

QUESTION OF THE MONTH. Do you think eprdf/tplf allows anybody to be patriarch who opposes its anti- Ethiopia policies ??? The key to any change in the church is to fight the key enemy of our church and our country.NO CHANGE COMES UNLESS WE CHANGE THE RULING GROUP IN POWER IN THAT COUNTRY. Aba Paulos is just a servant of this group.So lets not wast time.So if anybody is really loves his/her church and country,it is time to walk the walk,stop the talk.

Anonymous said...

Time and again I heard and listend that there is a fear to avoid him, I couldn't understand why,unless he is backed by the government. These days I come to understand that EPRDF is behind him. Even if I didn't have interest in politics so far, yes it is realy the center of the problem and I do strongly agree with your suggestion.

መርከቤ ንጉሴ/ከአዲስ አበባ/ said...

በስመአብ ወወልድ ወመንፈስ ቅዱስ አሕዱ አምላክ፡፡ አሜን!!
ወገኖቼ እውነት ኦርቶዶክሳውያን ብቻ ከሆንን በዚህ መድረክ ላይ የምንሳተፈው መልካም ነገር ማሰብና ስለ ሐይማኖታችን የሚጠቅም ጥሩ ጥሩ መልዕክት ብናስተላልፍና እራሳችንን ሰድበን ለሰዳቢ ባንሰጥ የተሻለ ነው፡፡ ፓትርያርካችን ስማቸው አይጠራ ፎቷቸው አይታይ ያሉት አስተያየት ሰጪ በእርግጥ እኔ እስከማውቃቸው ድረስ ብዙ ጊዜ አስተያየታቸው በሳል ነበር፡፡ ነገር ግን ከሚያዩትና ከሚሰሙት ለሐይማኖታቸው ካላቸው ቀናነት የተነሳ በብስጭት የተናገሩት ይሆናል የሚል እምነት አለኝ፡፡ ቤተ-ክርስቲያናችን በዶግማና መጽሐፍ ቅዱሳዊ መሠረት ባለው ቀኖና ነው የምትመራው፡፡ ስለዚህ ቅዱስ ሲኖዶስ በዶግማና ቀኖና ከወሰነው ውጪ እንዲህ እናድርግ ማለት የኛ የኦርቶዶክሳውያን ተግባር አይደለም፡፡ ወገኖቼ እውነት እውነት እላችኋለሁ ይህን ስላችሁ ከናንተ በላይ አዋቂ ሆኜ ሳይሆን ለሐይማኖቴ ካለኝ ክብርና ፍቅር አንጻር ነው የምቀባጥረው፡፡ ብታምኑም ባታምኑም እኔ አቡነ ዘበሰማያትን እንኳን እስተካክዬ የማልደግም ሰው ነኝ፡፡

ከዚህ በተረፈ ሁሉም ነገር በባለቤቱ በእግዝአብሔር በቦታው በጊዜውና በሰዓቱ ይከናወናል፡፡ ምናልባት አሁን ቅዱስ ሲኖደስ የወሰነው ሁሉ ባይፈጸም ሐያሉ እግዝአብሔር ነገ ሐውልቱንም በመብረቅ በየደብሩ ያለውን ምስልም በአውሎ ነፋስ እንደማያፈርሰውና የቀረውንም ነገር እንደማያጠራው በምን እርግጠኞች ሆንን? ነው እግዝአብሔር ተአምር እንደሚሰራና ሁሉም ነገር በእሱ ቁጥጥር ሥር እንደሆነ ተጠራጠርን?

ቸሩ አምላካችን መልካሙን ሁሉ ያድለን፡፡ አሜን!

መርከቤ ንጉሴ/ከአዲስ አበባ/

Dn haileMichael said...

በስመ አብ ወልድ መንፈስ ቅዱስ አሐዱ አምላክ አሜን
እኔ በበኩሌ በተነሰው ሀሳብ እስማማለሁ ምክንያቱም

1 አቡነ ፓውሎስ የመንግስት አካላት ቤተክርስቲያንን ስሳደቡ ከመቃወም ይልቅ የሚደግፉ እስኪመስል ድምጻቸውን አጥፍተው ነገር ግን በየመድረኩ የፖለቲከው የቁርጥ ቀን ልጅ መሆናቸውን የሚያስመሰክሩ በመሆናቸው
እዚህ ላይ ማንም ለበላይ ይገዛ የሚለውን የሐዋርያውን ቃል ዘንግቼ አይደለም ለበላይ መገዛት ሃይማኖት እስካልተነካ ብቻ ነው
2 በኢትዮፕያ ያልነበረ ንጉስ ነበረ ተብሎ ስለፈፍ ዝምታ የመረጡ
3 በዐረበኛ የተጻፈ ወረቀት የቀደደ ተማሪን ለማስቀጣት አሕዛብ ከዳር እስከ ዳር ተንቀሳቅሰው እንድባረር ሲያደርጉ በአንጻሩ በባሌ በአርሲ በጅማ እና በተለያዩ ቦታዎች ክርስቲያኖች ግፍ ስፈጸምባቸው የቤተክርስቲያን ይዞታዎች ስነጠቁ በአጠቃላይ በቤተክርስቲያን ላይ በተለያየ መልኩ ተጽእኖ ስደረግ ድምጻቸው የማይሰማ ነገር ግን በየበዓሉ ንግግራቸውን በፖለቲካ አዋዝተው የሚናገሩ
4 በቤተክርስቲያን ውስጥ ዘረኝነትን ጎጠኝነትን ሙስናን የሞራል ውድቀትን ክፍፍልን በአጠቃላይ ለመንቀል የሚያስቸግር ችግርን በመትከላቸው
5 አለቃ አያለውና ሌሎች ሊቃውንት እንዳሉት የሃይማኖት ሕጸጽ ያለባቸው በመሆኑ
አንድ በስጋ የቅርብ ዘመድ የሆነ የካቶሊክ እምነት ተከታይ የነገረኝን ልንገራችሁ ከሮማ ፖፕ ሚሽን ወይም ተልእኮ ነበራቸው ነገር ግን ውስጥ ስለነቁባቸው ማስፈጸም አልቻሉም ነበረ ያለኝ

6 እና በአጠቃላይ ቤተክርስቲያኒቱን ለማዳከም የሚሰሩ በመሆናቸው የቤተክርስቲያን አባት ለመሆን ብቃት ስላማይኖራቸው ወይም መሰፈርቱን የማያመዋሉ ከመሆናቸውም ባሻገር የሃይማኖቱ ተዓማኒነታቸው ስለሚያጠራጥር ቤተክርስቲያን የባሰ ችግር ውስጥ ከመውደቅዋ በፊት እርሳቸው ልነሱ ይገባል
የቤተክርስቲያን ጉዳይ የአገር ጉዳይ የታሪክ ጉዳይ የነገ የልጆቻችን ጉዳይ ሕዝቡን ስልምመለከተው ይልቁንም ስለሚያንገበግበውና እረፍት ስለምነሰው ተወልዶ በደገበት አገር ቤተክርስቲያን እንዲህ ያለ ስህተት ስሰራ ስለማያስችለው የታፈነ እሳት ሆኖ ውስብስብ ችግር ከማምጠቱ በፊት የሕዝቡ እሮሮ ይሰማ ትኩረት ይሰጠው እንላለን

Anonymous said...

And wendime ye tigray hizib menfesawim alemawim siltan yizachuhal ena tetekemubet andi abat bilewal bilehal ene yemilew gin gileseboch hizibin ayiwekulum be abune paulos tifat ye tigray hizib liwekes ayichilim mikiniyatum abune paulos andi gileseb sile-honu lemisale be Mengistu hailemariyam tifat ye Amara hizb endemayiteyekew be abune paulos tifatim ye Tigray hizib ayiteyekim ayiwekesim. Egziabher amlak le abatachin libona na mastewalu yistachew.

Anonymous said...

ይገርማል!!!!!!
ይገረማችኋል 06/03/2003 ዓ.ም ቃሊቲ በሚገኘው ደብረ ቁስቋም ቤተክርስቲያን የንግስ በዓል ላይ ተገኝቼ ጉድ ሰማሁ በስመ ሪፖርት ተብሎ ስለ ፓትሪያሪኩ ብዙ ተሰበከ ብዙ ተነገረ ብዙም ቢባል ቢነገር አይደንቀኝም በእሱ ተከታዮች ብዙ ስለሰማሁ፤ግን ለጆሮ የሚያም (የሚያጠራጥር) ነገር ሰማሁ እንኳን ቦሌ ያለው ሀውልታቸው ሊፈርስ ቀርቶ በስማቸው ፅላት ይቀረጻል ብለው እርፍ ከዛም አጠገቤ ያለችው ልጅ ፅላት ከተቀረጸላቸው አቡነ ጳውሎስን ልናነግስ እንሄዳለን ማለት ነው ስትል ሰምቼ ውስጤ እያረረ ስቄ ዝምአልኩኝ፡፡ እውነትም ፓትሪያሪኩ ባሉበት ደብር መሄድ ያስጠላል

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)