October 14, 2010

አቡነ ፋኑኤል እና ሥራ አስኪያጁ ከሐላፊነታቸው እንዲነሡ የተቀጣጠለው ተቃውሞ በዲላም ተጠናክሮ ቀጥሏል

  •  አጣሪ ኮሚቴው የዲላውንም ችግር አጥንቶ የመፍትሔ ሐሳብ እንዲያቀርብ ታዟል
  • ‹‹ችግሩ ከጥቅምቱ ሲኖዶስ በፊት ካልተፈታ አስከፊ ሁኔታ ሊከተል ይችላል››   (አቤቱታ አቅራቢ ምእመናን) 
  •  አቡነ ፋኑኤል በ‹‹ሥነ ሥርዓት አስከባሪ›› ስም ባደራጇቸው 400 ቴኳንዶዎች ይጠበቃሉ
  • ‹‹ለሰው ይቅርና የምትችሉ ከሆነ ለመድኃኔዓለም እንኳ ብታመለክቱ እኔ አልፈራም!›› (አቡነ ፋኑኤል)
(ደጀ ሰላም፤ ኦክቶበር 14/2010፤ ጥቅምት 4/2003 ዓ.ም):- በሲዳማ ጌዴኦ አማሮና ቡርጂ ዞኖች እና ልዩ ወረዳዎች ሀገረ ስብከት በጌዴኦ ዞን ዲላ ከተማ የሚገኙ የስድስት አጥቢያ አብያተ ክርስቲያን ምእመናን፣ ‹‹ቃለ ዐዋዲውን በመጣስ የምእመኑ ውክልና የሌላቸውን ግለሰቦች በሰበካ ጉባኤ አባልነት እያስቀመጡ፣ የልማት ከሚቴዎችን እያፈረሱ፣ በነውረኛ ተግባራቸው የተነሣ ምእመኑ ከየደብሩ የሚያባርራቸውን ማዕርገ ክህነታቸው በውል የማይታወቅ አለቆችን በመመደብ በቤተ ክርስቲያን አስተዳደር ላይ በደል አድርሰዋል፤ የቤተ ክርስቲያንን ሀብት እና ንብረት እየዘረፉ ዕድገቷን እና ልማቷን አቀጭጨዋል፤ የቤተ ክርስቲያን ጉዳይ ገዷቸው በየጊዜው አቤቱታ የሚያቀርቡ ምእመናንን በጥቅም እየደለሉ ባደራጇቸው ቡድኖች በማሰደብ እና በማንጓጠጥ አስፈራርተዋል፤ ብስለት የሚጎድላቸውን ሰባክያን በመመደብ ነዋሪው በእምነት ልዩነት እርስ በርሱ እንዲጋጭ የሚያነሣሣ፣ ምእመኑን የሚከፋፍል ቅሰቀሳ አካሂደዋል›› ያሏቸው ሊቀ ጳጳስ አቡነ ፋኑኤል እና ጉዳይ አስፈጻሚያቸው የሆኑት የሀገረ ስብከቱ ሥራ አስኪያጅ መልአከ ሕይወት ፀሐይ መልአኩ በየደረጃው ከሚገኙ ሌሎች ግብር አበሮቻቸው ጋራ የፈጸሟቸው አሳዛኝ እና አሳፋሪ ድርጊቶች ተጣርተው ከሐላፊነታቸው እንዲነሡ፣ በምትካቸውም ምእመኑን ሳይከፋፍሉ አስማምተው በመንፈሳዊ እና ሞያዊ ብቃት የሚመሩ ሐላፊዎች እንዲመደቡ የሚጠይቅ አቤቱታ አቀረቡ፡፡ ቀደም ሲል የሐዋሳ ከተማ ምእመናን በሊቀ ጳጳሱ፣ በሥራ አስኪያጁ እና ሌሎች የግብር አበሮቻቸው ላይ ባቀረቡት ተደጋጋሚ አቤቱታ መነሻነት በሀገረ ስብከቱ እና በሥሩ በሚገኙ የአጥቢያ ቤተ ክርስቲያን አስተዳደር መካከል የተፈጠረውን ችግር የሚያጣራ ኮሚቴ የሠየመው የቅዱስ ሲኖዶስ ጽ/ቤት፣ በዲላ ከተማ አጥቢያ አብያተ ክርስቲያን የተከሠተውም ችግር በኮሚቴው ተጣርቶ ይቀርብለት ዘንድ አዝዟል፡፡

የቅዱስ ሲኖዶስ ጽ/ቤት በቁጥር 10/57/2003 በቀን 2/2/2003 ዓ.ም ለአጣሪ ኮሚቴው ሰብሳቢ ለሆኑት የምሥራቅ ሸዋ ሀገረ ስብከት ሊቀ ጳጳስ ብፁዕ አቡነ ጎርጎርዮስ በጻፈው እና ለደቡብ ብሔር ብሔረሰቦች እና ሕዝቦች ክልላዊ መንግሥት፣ ለሲዳማ ጌዴኦ አማሮና ቡርጂ ዞኖች እና ልዩ ወረዳዎች ሀገረ ስብከት ጽ/ቤት እንዲሁም ለጌዴኦ ዞን አስተዳደር ጽ/ቤት ግልባጭ ባደረገው ደብዳቤ በተለያዩ ምክንያቶች የማጣራቱ ሥራ ሳይከናወን በመጓተቱ የአቤቱታ አመልካቾች ቁጥር እየጨመረ እንደመጣ ገልጧል፡፡ በሀገረ ስብከቱ እና በሥሩ በሚገኙት አጥቢያ አብያተ ክርስቲያን የተከሠተውን ችግር አንድ በአንድ በመያዝ፣ ገዳዩ የሚመለከታቸውን ሁሉ በማነጋገር ከሚገባው የመፍትሔ ሐሳብ ጋራ በአስቸኳይ እንዲያቀርብ ያዘዘው ደብዳቤው ኮሚቴው በሐዋሳ የፍትሕ እና ልማት ኮሚቴ አባላት የቀረበውን ባለዘጠኝ ገጽ አቤቱታ፣ በዲላ ከተማ ምእመናን የቀረበውን ባለሰባት ገጽ አቤቱታ ‹‹እንደ መነሻ በመጠቀም ጭምር›› የማጣራቱን ሥራ እንዲያከናውን አሳስቧል፡፡

‹‹የቤተ ክርስቲያናችን ዕድገት የእኛም ዕድገት ነው፤ የቤተ ክርስቲያን ልማት የእኛም ልማት ነው፤ ለቤተ ክርስቲያናችን ደኅንነት እና ልማት ሳናሰልስ እንሠራለን፤ ይህን እንድናደርግ ክርስቲያናዊ ሕይወታችን ያስገድደናል›› ያሉት በጌዴኦ ዞን ዲላ ከተማ ነዋሪ የሆኑት የስድስት አጥቢያ አብያተ ክርስቲያን ምእመናን መስከረም ዘጠኝ ቀን 2003 ዓ.ም ለብፁዕ ወቅዱስ ፓትርያርክ አቡነ ጳውሎስ ባቀረቡት ባለሰባት ገጽ አቤቱታ ‹‹በአሁኑ ጊዜ ቤተ ክርስቲያን በእውነተኛው ሃይማኖታዊ መንገድ እየተመራች ነው ወይስ የማስመሰል ተግባር እየተፈጸመባት ነው?›› የሚለውን ኀዘናቸውን እንዲመለከቱላቸው ተማፅነዋል፡፡ ሐምሌ 12 ቀን 2002 ዓ.ም ለአቡነ ፋኑኤል 15 ነጥቦችን የያዙ ጥያቄዎችን በጽሑፍ እና በቃል ባመለከቱት መሠረት  ሕዝቡ ተሟልቶ ሊገኝ በማይችልበት ነሐሴ 22 ቀን 2002 ዓ.ም ከሥራ አስኪያጁ ጋራ እንደ መጡ በአቤቱታቸው የጠቀሱት ምእመናኑ፣ ሊቀ ጳጳሱ ከአንድ መንፈሳዊ አባት በማይጠበቅ ወደፊትም በማንም መደገም የማይገባውን የመከፋፈል እና የመለያየት ሥራ መሥራታቸውን ገልጸዋል፡፡ ‹‹አስፈላጊውን የምወስነው እኔ ነኝ›› በሚል ጥቂቶች በተገኙበት ስብሰባውን የመሩት አባ ፋኑኤል፣ ‹‹ተቃዋሚ በዚህ ጎራ ተቀመጥ፤ ካህናትም በተለያዩ ጎራዎች ተቀመጡ፤ ዲያቆናት እና ሰባክያን በዚያ ጎራ ተቀመጡ፤ ሴቶችም እንደዚሁ ተከፋፍላችሁ በተለያየ ጎራ ተቀመጡ፤ የሰንበት ት/ቤት አባላት ለብቻ ሁኑ›› በማለት በካህናት እና በምእመናን እንዲሁም በምእመኑ መካከል ልዩነት የሚፈጥር አካሄድ መከተላቸውን አስረድተዋል፡፡

በስብሰባው ላይ ቀደም ሲል በጽሑፍ ለሊቀ ጳጳሱ የተላኩት ጥያቄዎች በንባብ ተሰምተዋል፡፡ ከጥያቄዎቹ መካከል አቡነ ፋኑኤል በቅድስት ሥላሴ ገዳም እና በዳማ ቅዱስ ጊዮርጊስ አብያተ ክርስቲያን ልማት እና ለአገልጋይ ካህናቱ ኑሮ መሻሻል ታስቦ የተቋቋመውን ሕንጻ አሠሪ ኮሚቴውን በማፍረስ በራሳቸው ያለ ሕዝቡ ውክልና በሰበካ ጉባኤ አባልነት ባስመረጧቸው ግለሰቦች እንዲመራ መመሪያ መስጠታቸው፣ ከቃለ ዐዋዲው በተፃራሪ ምእመኑ ሳይመርጣቸው የተቀመጡት ግለሰቦችም ‹የልማት ኮሚቴው ወደፊት ይቋቋማል› በሚል የልማት ኮሚቴውን አፍርሰው ራሳቸው ገንዘብ ሰብሳቢ፣ ራሳቸው ዕቃ ግዢ፣ ራሳቸው ዕቃ አቅራቢ፣ ራሳቸው ገንዘብ አስገቢ እና አውጪ በመሆን የቤተ ክርስቲያኒቷን ሀብት ለብክነት መዳረጋቸው ይገኝበታል፡፡

በስብሰባው ላይ ሊቀ ጳጳሱ የእርሳቸውን ሐሳብ ለሚደግፉ ካህናት፣ ዲያቆናት፣ የሰንበት ት/ቤት አባላት፣ ሰባክያን፣ ከምእመናንም ለሁለት ሰዎች ብቻ ዕድል በመስጠት ሕዝቡ ለቤተ ክርስቲያን ጠቃሚ በሆኑ ሐሳቦች ዙሪያ እንዳይወያይ በመከልከል የመናገር እና በነጻነት የመወያየት መብቱን አፍነዋል፡፡ በምትኩ ጉዳይ የሚያስፈጽሙላቸውን የሁለቱን አብያተ መቅደስ አስተዳዳሪ፣ የስብከተ ወንጌል ሐላፊ እና ሌሎች ካህናትን ተራ በተራ በማስነሣት በበጎ አድራጎታቸው የተከበሩትን የ27 ዕድሮች የሕዝብ ሽማግሌዎች እንዲሰደቡ፣ እንዲንጓጠጡ አስደርገዋል፤ ‹‹በመንግሥት ደኅንነት ትያዛላችሁ›› በሚል ዛቻም አስፈራርተዋል፡፡ ለስብከተ ወንጌል ሳይበቁ ዐውደ ምሕረቱን የጠሉትን የመሳደቢያ፣ የጠቀማቸውን የማወደሻ መድረክ ያደረጉ ዋልጌዎች በድምፅ ማጉያ ተጠቅመው የሌሎችን እምነት በማንኳሰስ በሰላም ተከባብሮ በኖረው ሕዝብ መካከል ግጭት ለማስነሣት ሞክረዋል፡፡ ተንኳሽ ቅስቀሳውን ያደረጉት ሰባኪ ነን ባዮች በአሁኑ ወቅት በፍርድ ቤት ክስ ተመሥርቶባቸው ውሳኔ በመጠባበቅ ላይ ቢሆኑም በአቡነ ፋኑኤል ፊት የተፈጸመው ደንታ ቢስ እና አሳፋሪ ወንጀል ከዚህ በፊት በስፍራው ተፈጽሞ እንደማያውቅ ምእመናኑ በአቤቱታቸው ዘርዝረዋል፤ ‹‹ከሕዝብ አፈንግጠው ወዴት ለመሄድ ያስባሉ?›› በማለትም ጠይቀዋል፡፡ ሥራ አስኪያጁ መልአከ ሕይወት ፀሐይ መልአኩም በሌሎች ወረዳዎች በሥነ ምግባር ብልሹነታቸው ሳቢያ በምእመኑ የጋራ ውሳኔ የተባረሩትን፣ በአንዱ ደብር ዲያቆን በሌላው ደብር ቄስ ነን በማለት የሚያጭበርብሩ አለቆችን በፈጠሩት የጥቅም ትስስር በሁለቱ አብያተ መቅደስ ላይ በአስተዳዳሪነት በመሾም የቤተ ክርስቲያኑን ሀብት ለብክነት በመዳረጋቸው ከፍተኛ በደል እንደፈጸሙባቸው ተገልጧል፡፡ በዚሁ ስብሰባው ላይ ሥራ አስኪያጁ ሊቀ ጳጳሱን በመከተል አቤቱታ አቅራቢዎችን ሲሳደቡ እና ሲያንጓጥጡ ውለዋል፡፡

ቀደም ሲል የሐዋሳ ምእመናን ለመንበረ ፓትርያርኩ ባቀረቡት አቤቱታ፣ የሀገረ ስብከቱ ሥራ አስኪያጅ በመኖርያ ቤት ውድነት በምትታወቀው ሐዋሳ ከአንድም ሁለት የመኖርያ ቤቶችን ሠርተዋል፤ ግልጽነት በጎደለው አኳኋን ልጆቻቸውን በሀገረ ስብከቱ የተለያዩ መዋቅሮች ውስጥ አስቀጥረዋል፤ ያለሰበካ ጉባኤ የሚተዳደረውን የቅዱስ ሩፋኤልን ቤተ ክርስቲያን ምእመናንን፣ ‹‹ስለ ገንዘብ እና ጉልበት አስተዋፅኦ እንጂ ስለ አስተዳደሩ አያገባችኹም›› በማለት የግለሰቦች መጠቀሚያ አድርገውታል፤ በቅድስት ሥላሴ ቤተ ክርስቲያን ያለሰበካ ጉባኤው ዕውቅና ንብረቱ እንዲሸጥ ወስነዋል፤ ከሰበካ ጉባኤው ዕውቅና ውጭ ቅጥር በመፈጸም ካህናቱን፣ ‹‹የቀጠርኳችኹ እኔ ነኝ፤ ላነሣችኹም ሥልጣን አለኝ›› እያሉ ተጽዕኖ ያደርጋሉ፤ የደብር አስተዳዳሪዎችን በሐሰተኛ መረጃ በመክሰስ ያስፈራራሉ፤ የሥራ ሞራላቸውን ይጎዳሉ፤ ግራ ያጋባሉ፤ በደብረ ምሕረት ቅዱስ ገብርኤል ገዳም በቃለ ዐዋዲው መሠረት እና በጠቅላላ ጉባኤው የተመረጡትን የሰንበት ት/ቤቱን አመራሮች በመበተን፣ ከዓላማ እና የጥቅም አጋሮቻቸው ጋራ የሰንበት ት/ቤቱን ቁልፍ በመሮ ሰርስሮ በመሥበር እና በሌላ ቁልፍ በመቀየር ቀደም ሲል ከሰንበት ት/ቤቱ የታገዱ ሰዎችን አስገብተው እንዲተኩ አድርገዋል፤ አቤቱታ ያቀረቡ የምእመናን ተወካዮችን ‹‹ፀረ ሰላም፣ የዐመፅ እና የሽብር ኀይሎች ናቸው›› በማለት በአደባባይ ወንጅለዋል፡፡

በአንጻሩ ቀደም ሲል በነበሩት ሊቀ ጳጳስ እና በራሳቸው በሥራ አስኪያጁ ፊርማ ከአገልግሎት የታገደውን፣ የሐዋሳ ቅድስት ሥላሴን ማኅተም እንዲሁም ከቤተ ክርስቲያን ውጭ ያሉ ግለሰቦችን እና ተቋማትን የሐሰት ማኅተም ተጠቅሞ ገንዘብ በመሰብሰብ ሕገ ወጥ ጉባኤ ለማካሄድ የተንቀሳቀሰውን ራሱን ‹‹ተስፋ ኪዳነ ምሕረት ፀረ - ኤድስ ማኅበር›› እያለ የሚጠራውን አካል ተመስጋኝ የልማት ተቋም አድርጎ በማቅረብ ምእመኑ ከእርሳቸው ጋራ እንዳለ ለማስመሰል እና ያደረሱትን አስተዳደራዊ በደል ለመሸፈን ተንቀሳቅሰዋል፡፡ በመሆኑም ላለፉት አራት ዓመታት በሀገረ ስብከቱ ሥራ አስኪያጅ እና በተባባሪዎቻቸው የሚፈጸመው ከፍተኛ የኾነ አስተዳደራዊ በደል እና የቤተ ክርስቲያን ገንዘብ ምዝበራ ሥር መስደዱን እና አስከፊ ደረጃ ላይ መድረሱን በመግለጽ ከሐላፊነታቸው እንዲነሡ የሐዋሳ ምእመናን አቤቱታ አቅርበው እንደ ነበር ይታወሳል፡፡

‹‹ዝምታን የመረጠ አእምሮ መፍትሔን አያመነጭም›› በሚል መርሕ አቤቱታቸውን በእውነተኛ እና በበቂ ማስረጃዎች ላይ አስደግፈው እንዳቀረቡ የገለጹት የዲላ ከተማ ምእመናን፣ ‹‹ሰማይን የማረስ ጳጳስን የመክሰስ የነገር አቁማዳ›› ይዘው እንዳልተነሡ አስገንዝበዋል፡፡ ይልቁንስ ‹‹የአቡነ ፋኑኤል አስተዳደር በቃለ ዐዋዲው ደንብ እና መመሪያ ላይ ሳይሆን በራሳቸው ውድ እና ፈቃድ ላይ ተመሥርቶ የሚመራ ሆኖ ስላገኘነው፣ ከእንግዲህ ከሊቀ ጳጳሱ ጋራ አንድ አድርጎ እና አስማምቶ የሚያሠራን መንገድ አይኖርም፡፡ ስለሆነም ከሊቀ ጳጳሱ ጀምሮ የግብር አበሮቻቸው ሁሉ የፈጸሙት አሳዛኝ ድርጊት በቅዱስነትዎ በኩል በሚሠየመው አጣሪ ልኡክ ተጠንቶ ከሓላፊነታቸው እንዲነሡ፣ በምትካቸው አስታርቀው እና አስማምተው በመንፈሳዊ እና ሞያዊ ብቃት የሚመሩን አባቶች እንዲመደቡልን እንጠይቃለን›› ብለዋል፡፡

ምእመናኑ ይህን መሰሉን አቤቱታ በቆይታ ለበላይ አካል እንደሚያቀርቡባቸው የተረዱት አቡነ ፋኑኤል የእብሪታቸውን ልክ ምናልባትም የእምነታቸውን ጤናማነት በውል በሚያሳይ አኳኋን የሚከተለውን ዐረፍተ ነገር በስብሰባው ላይ መናገራቸው በምእመናኑ አቤቱታ ላይ ተመልክቷል - ‹‹እንኳንስ ለሰው ይቅርና የምትችሉ ከሆነ ለመድኃኔዓለም ብታመለክቱ እኔ አልፈራም፡፡›› ይህን ተከትሎ ምእመናኑ በአቤቱታቸው የመጨረሻ መሥመሮች ላይ ባሰፈሩት ቃል ደግሞ ከሚከተለው ውሳኔ ላይ ደርሰዋል - ‹‹ጳጳሱ ራሳቸውን ከመድኃኔዓለም ጋራ አወዳድረው እኛን አመልካቾችን ማፌዣ እና ማላገጫ አድርገውናል፤ ይህን በማድረጋቸው እኛም ከእርሳቸው አባትነት ርቀናል፡፡››

የሀገረ ስብከቱን ወቅታዊ ሁኔታ በአጠቃላይ የሊቀ ጳጳሱን የቀን ተቀን ብልሽት በተለይ በቅርበት የሚከታተሉ የሐዋሳ እና አንዳንድ የጠቅላይ ቤተ ክህነቱ ምንጮች አቡነ ፋኑኤልን ከዚህ መሰሉ እብሪት ሊያደርሳቸው የሚችለውን መንሥኤ ይናገራሉ፡፡ እንደምንጮቹ መረጃ ብልሽቱ አቡነ ፋኑኤል በመጪው ጥቅምት በወሳኝ መልኩ እንደሚካሄድ በሚጠበቀው የቅዱስ ሲኖዶስ ጉባኤ በሀገረ ስብከቱ እንደማይቀጥሉ ሊወሰን እንደሚችል ዐውቀው/ ተነግሯቸው በቀቢጸ ተስፋ የሚያደርጉት መወራጨት ሊሆን ይችላል፡፡ ሌሎች አስተያየት ሰጪዎች ደግሞ የአቡነ ፋኑኤል (የቀድሞው አባ መላኩ) ብልሽት የአሁን ሳይሆን የሊቃነ ጳጳሳቱ ልብስ ሰፊ ሳሉ ጀምሯቸው በሀገረ አሜሪካ ሥር የሰደደ መሆኑን ያስታውሳሉ፡፡ ‹‹በሙግት መኖር እንደሆነ የኖርኩበት ነው፤ ሲሻችሁ በቺቺ መጫረስ ትችላላችሁ፤ በቺቺ ተጫረሱና እኔ ከአሸናፊው ጋራ እሆናለሁ›› ማለት የለመደባቸው ማኬቬሊያዊው አቡነ ፋኑኤል ከዜግነታዊ ማንነታቸው አንሥቶ ክስ ያልተለያቸው ናቸው፡፡

በአሜሪካዊ ዜግነታቸው የሚኮፈሱት አቡነ ፋኑኤል በሐዋሳ ደብረ ምሕረት ቅዱስ ገብርኤል ዐውደ ምሕረት ላይ፣ ‹‹ይሞታል ወይ ታዲያ! ስለ ራሴም ዝና እናገራለሁ፤ እኔ አሜሪካ ሄጄ በሊሞዚን መሽሞንሞን እችላለሁ፤ በችግር የምትቆራመደው አንተ ነህ!!›› በማለታቸው የማያፍሩ ናቸው፡፡ ሊቀ ጳጳሱ በየወሩ የቅዱስ ሚካኤል በዓል ዕለት ከአሜሪካው የቅዱስ ሚካኤል ቤተ ክርስቲያን ምእመናን  ገንዘብ እንደሚሰበሰብላቸው/ እንደሚዋጣላቸው፣ መዋጮውንም ‹‹በሐዋሳ የካህናት ማሠልጠኛ ውስጥ ለምረዳቸው አሳዳጊ አልባ ሕፃናት አውለዋለሁ›› በሚል እንደሚሰበስቡ ተነግሯል፡፡ ዶላሩን ለማጋበስ የማስመሰያ ቪዲዮ እያቀናበረ የሚረዳቸውም በሥራ አስኪያጁ የድጋፍ ደብዳቤ የሐዋሳ መጽሐፍ ቅዱስ ማኅበር ሰብሳቢ የሆነው ዓለምነህ ሽጉጤ (እርሳቸው በኲረ ትጉሃን የሚል ማዕርግ የሰጡት የተስፋ ኪዳነ ምሕረት ፀረ ኤድስ መከላከያ እና መቆጣጠርያ ማኅበር አመራር) የተባለ ግለሰብ ነው፡፡

አቡነ ፋኑኤል በሀገረ አሜሪካ ያካበቱትን እና በአንዳንድ ጳጳሳትም ዘንድ ሳይቀር ‹‹በእናት ቤተ ክርስቲያን ሥር ነን›› እያሉ ንብረትነታቸው ግን የሊቃነ ጳጳሳቱ የግላቸው በማድረግ የመቀሸብ ልምድ በሐዋሳ የካህናት ማሠልጠኛ እና በውስጡ በሚገኘው የቅዱስ ሩፋኤል ቤተ ክርስቲያን ላይም እያስፋፉት ይገኛሉ፡፡ ንቁህ እና ትጉህ የሀገረ ስብከቱ አገልጋዮች እና ምእመናን እንደሚያውቁት ጠቅላይ ቤተ ክህነት ለማሠልጠኛው በየዓመቱ 50‚000 ብር በጀት ይመድባል፤ የት እንሚገባ፣ ምን እንደሚሠራበት የሚያውቅ የለም እንጂ፡፡ በቅጽሩ የሚገኘው የቅዱስ ሩፋኤል ቤተ ክርስቲያንም ሰበካ ጉባኤ ሳይቋቋምበት የሥራ አስኪያጁ መልአከ ሕይወት ፀሐይ መልአኩ እና ሀገረ ስብከቱን አየር ባየር እንደሚመራ የሚነገርለት የያሬድ አደመ መጠቀሚያ እንደሆነ ነው የሚነገረው፡፡ ይህን አስመልክቶ ጥያቄ የሚያቀርቡ ምእመናንም ‹‹ስለ ገንዘብ እና ጉልበት አስተዋፅኦ እንጂ ስለ አስተዳደሩ አያገባችኹም›› የሚል ምላሽ በሥራ አስኪያጁ እንደተሰጣቸው የሐዋሳ ምእመናን ባለፈው ዓመት ባቀረቡት አቤቱታ ላይ ተመልክቷል፡፡

የማፊያው ቡድን በቤተ ክርስቲያን ላይ ስለሚፈጥረው ችግር የተቆርቋሪ ምእመናን አቤቱታ ሲቀርብላቸው ‹‹ሲፈልግ ለምን እሳት አይለቅባትም›› ከማለት አንደበታቸውን ያልመለሱት አቡነ ፋኑኤል ለምእመኑ የሚያሳዩት ንቀት ምናልባትም በታሪክ የሚታወሱበት ሌላው ብልሽታቸው ሊሆን ይችላል፡፡ ሥራቸውን ትተው፣ ቤታቸውን ዘግተው ስለ ቤተ ክርስቲያን ችግር የሚንከራተቱ የሐዋሳ ምእመናን ተወካዮች እግራቸው ሥር ወድቀው በልቅሶ ቢለምኗቸው፣ ‹‹ዘወር በል፤ በልቅሶ የሚሆን ነገር የለም፤ የአዋሳን ምእመን እንዲህ የሚያደርገው'ኮ ወንጌል overdose ሆኖበት ነው›› በማለት የግብረ በላዎቻቸውን ድምፅ የሚያሰማ ኀይለ ቃል ተጠቅመዋል፡፡ ይህም ሳይበቃቸው የሐዋሳ ደብረ ምሕረት ቅዱስ ገብርኤል ምእመናን የሰበካ ጉባኤው ምርጫ በቃለ ዐዋዲው መሠረት እንዲካሄድ ያቀረቡትን ተቃውሞ ችላ ብለው በራሳቸው የመረጧቸውን እምነት የማይጣልባቸው ግለሰቦች ካስቀመጡ በኋላ፣ ‹‹የሕዝቡን ጫጫታ እንደ ሳውንድ ትራክ ተጠቅመን ሥራችንን ሠርተናል›› በማለት መሣለቃቸው ተሰምቷል፡፡

ከዚህ በመለስ በመንበረ ጵጵስናው ለመናገር የሚያሳፍር አጸያፊ ተግባር እየተፈጸመ መሆኑ በሐዋሳ ምእመናን ፊት ያለ የዕለት ተዕለት እውነታ ነው፡፡ መንበረ ጵጵስናውን ከሚያረክሱት ዋናው ደግሞ ‹አቡነ› የሚል የፌዝ ቅጽል በሕዝቡ የተሰጠው ያሬድ አደመ ነው፡፡ ከዲላ ጻድቁ አቡነ ገብረ መንፈስ ቅዱስ እስከ ዱባይ ድረስ የቤተ ክርስቲያንን አሐቲነት በማናጋት የሚታወቀው ያሬድ አደመ በሀገረ ስብከቱ የሰንበት ት/ቤቶች ማደራጃ መምሪያ ጸሐፊ ሆኖ ከተቀጠረ በኋላ ቀድሞም አየር ባየር የሚመራውን የአቡነ ፋኑኤልን ብልሹ አመራር በውክልና እስከ መረከብ (እርሳቸው በሕዝብ ገንዘብ ወዳሠሩት የአዲሳ'ባ ቪላቸው ሲሄዱ) መድረሱ እየተገለጸ ነው፡፡ ከተግባሮቹ ዋነኛውም የቴኳንዶ ሥልጠና የወሰዱ፣ ከሀገር ውስጥ እና ከባሕር ማዶ በዝርፊያ ከሚገኘው የቤተ ክርስቲያን ሀብት ጥቅም የሚቋደሱ 400 የከተማውን ወጣቶች ባለ አረንጓዴ ቢጫ እና ቀይ ቀለም ዩኒፎርሞችን በማልበስ ‹‹ሥነ ሥርዐት አስከባሪ›› የሚል ባጅ ተለጥፎላቸው በውስጥ እና በዐውደ ምሕረት አገልግሎት ወቅት ጠረጴዛን እንደ ማገጃ /physical barrier/ በመጠቀም ጭምር አቡነ ፋኑኤልን እንዲጠብቁ፣ ስለ ቤተ ክርስቲያን አቤቱታ የሚያቀርቡ ምእመናንን እንዲያሳድዱ ነው፡፡ አቡነ ፋኑኤል ስለ እነዚህ የግል ‹አንጋቾቻቸው› ባለፈው ዓመት እነያሬድ አደመ በደነፉበት ያልተሳካው የመስቀል አደባባይ ስብሰባ ወቅት ፍንጭ ሰጥተው እንደነበር የከተማው ምእመናን ያስታውሳሉ፡፡ በወቅቱ አቡነ ፋኑኤል በአደባባዩ እንዲህ ብለው ነበር - ‹‹መንግሥት የራሱን ወታደር አሠማርቶ እነዚህን ሰዎች (የሐዋሳ የፍትሕ እና ልማት ኮሚቴ አባላት) የማይቆጣጠር ከሆነ እኔ የራሴን ሚልሻ እመለምላለሁ፡፡›› በአንዳንዶች አስተያየት አቡነ ፋኑኤል እና የጠቅላይ ቤተ ክህነቱ ቀኝ እጃቸው ወ/ሮ እጅጋየሁ በየነ አቤቱታ የሚያቀርቡ ምእመናንን ‹‹በመንግሥት ደኅንነት ትያዛላችሁ›› እያሉ የሚያስፈራሩት እኒህን ‹‹ቅልጥም ሰባሪ›› ቴኳንዶዎቻቸውን ተጠቅመው ካልሆነ በቀር መንግሥት የሐዋሳ ፍትሕ እና ልማት ኮሚቴ አባላት የሰላም ኀይሎች መሆናቸውን በውል ይገነዘባል ተብሎ ይታመናል፤ መገንዘብ ብቻ ሳይሆን ሊቃና የማይችል ሁለንተናዊ ብልሽት ውስጥ የተዘፈቁትን ‹የጎበዝ አለቆች› ወደ ተካረረ ቅራኔ ውስጥ እየገባ የመጣው ስድስት ወራትን ያስቆጠረው የምእመኑ ኀዘን እና ልቅሶ ከስትራቴጂ አንጻር የአጥቂነት አሰላለፍ ይዞ የማያዳግም ምቱን ሳያሳርፍባቸው በፊት ‹‹በቃ ማለት በቃ ነው›› ሊላቸው ይገባል፡፡ ምእመናኑንም ችግሩ በያዝነው ወር አጋማሽ ላይ ከሚካሄደው የቅዱስ ሲኖዶስ ጉባኤ በፊት ካልተፈታ ቀደም ሲል ወደ መንበረ ፓትርያርኩ ከተመመው ምእመን በላይ የሆነ ሕዝባዊ ንቅናቄ እንደሚፈጥሩ፣ አቡነ ፋኑኤል እና ሌሎች ግብረ አበሮቻቸው በሀገር ውስጥ እና በውጭ የፈጸሟቸውን ቅሌቶች የሚያሳዩ በእጃቸው የሚገኙ ማስረጃዎችን ይፋ እንደሚያደርጉ ነው ያስታወቁት፡፡

የሀገረ ስብከቱን ችግሮች እንዲያጣራ በብፁዕ ወቅዱስአቡነ ጳውሎስ ፊርማ የተሠየመው አጣሪ ኮሚቴም ለኅሊናው እና ለቤተ ክርስቲያኒቱ ክብር ሲል በሐቅ እንዲሠራ ለደጀ ሰላም አስተያየታቸውን የሰጡ ምእመናን ጥሪያቸውን አስተላልፈዋል፡፡ እንደ ምእመናኑ አስተያየት አቡነ ፋኑኤል ከወዲሁ፣ ‹‹የአጣሪ ኮሚቴው አባላት ጓደኞቼ ናቸው፤ እኔ ከእነርሱ ጋራ ቀደም ብዬ ጨርሻለሁ፤ ዝም ብለው ነው የሚደክሙት. . .›› በማለት በተለይ የሀገረ ስብከቱ እና ከፍተኛ ምዝበራ የተፈጸመባቸው አጥቢያ አብያተ ክርስቲያን የሒሳብ ሪፖርቶች እንዳይመረመሩ የሚያደርጉትን መከላከል እና አስተያየትን የማዛባት አሉባልታ ኮሚቴው ተረድቶ በዲላ ይሁን በሐዋሳ እስከ አጥቢያ ድረስ ወርዶ ማጣራት እንደሚገባው አሳስበዋል፡፡ በሀገር ውስጥ እና በውጭ ያለው ምእመንም በጸሎት እንዲያስባቸው ተማፅነዋል፡፡

25 comments:

kawassa said...

Dear Dejeselamaweyan,
‹‹ችግሩ ከጥቅምቱ ሲኖዶስ በፊት ካልተፈታ አስከፊ ሁኔታ ሊከተል ይችላል››(አቤቱታ አቅራቢ ምእመናን)ትክክል፣ዉሳነ ብቻ ነዉ የምንጠብቀው (no more Discussion)
ከሐዋሳ ከተማ

Anonymous said...

+++


Betekrstianen ena semawayi wude yehon kidisnawan bemiakalilu sewoch
egziabiher mech yihon yemiferdew?!

Egnas min eyeseran yihon?
Yehawassa Me'emenan zarae le Andandoch mognoch, mesqiawoch ena nuro yalgebachew nachew!

Gin beyalenibet hullu Betekristian Yesew yaleh Eyalech new!
Siratuan, tiwfituan ena qenonawan yemifetatenu leteraw me'emen yemikebdu negeroch eyayen, eyeseman new Be'ewnet Kidus sinodos yihin hulu eyesema eyaye zim lil yegebawal yihon?

Amlak kidusan becherinu yimelketen!

Anonymous said...

አቤቱ እንደቸርነትክ መጠን ማረን.

Anonymous said...

Ay Dejeselam!!!! DejeTifat, Deje Huket!!! Deje Tebit!!

400 tekuandowoch new yalachihut?? Egziabher Yiiqr Yibelachihu!! I know yihenin sihuf endematawetut gin,....

samueldag said...

‹‹ለሰው ይቅርና የምትችሉ ከሆነ ለመድኃኔዓለም እንኳ ብታመለክቱ እኔ አልፈራም!›› (አቡነ ፋኑኤል)መዝሙር 14

ለመዘምራን አለቃ፤ የዳዊት መዝሙር።

1 ሰነፍ በልቡ። አምላክ የለም ይላል። በሥራቸው ረከሱ፥ ጐስቈሉ፤ በጎ ነገርን የሚሠራ የለም።

2 የሚያስተውል እግዚአብሔርንም የሚፈልግ እንዳለ ያይ ዘንድ፤ እግዚአብሔር ከሰማይ የሰው ልጆችን ተመለከተ።

3 ሁሉ ዐመፁ በአንድነትም ረከሱ በጎ ነገርን የሚሠራ የለም፤ አንድም ስንኳ የለም።

4 ጕሮሮአቸው የተከፈተ መቃብር ነው፥ በምላሳቸው ሸነገሉ፤

5 ከከንፈራቸው በታች የእባብ መርዝ አለ፤ አፋቸው መርገምንና መራራን ተሞልቶአል፤

6 ደምን ለማፍሰስ እግራቸው ፈጣን ነው፤ ጥፋትና ጕስቍልና በመንገዳቸው አለ፥ የሰላምን መንገድ አላወቁአትምና፤ እግዚአብሔርን መፍራት በዓይናቸው ፊት የለም።

7 ሕዝቤን እንደ እንጀራ የሚበሉ ኃጢአት የሚሠሩ ሁሉ በውኑ አያውቁምን? እግዚአብሔርንም አይጠሩትም።

8 በዚያ በታላቅ ፍርሃት እጅግ ፈሩ፥ እግዚአብሔር በጻድቃን ትውልድ ዘንድ ነውና።

9 የድሆችን ምክር አሳፈራችሁ፥ እግዚአብሔር ግን ተስፋቸው ነው።

10 ከጽዮን መድኃኒትን ለእስራኤል ማን ይሰጣል? እግዚአብሔር የሕዝቡን ምርኮ በመለሰ ጊዜ፥ ያዕቆብ ደስ ይለዋል፥ እስራኤልም ሐሤት ያደርጋል።

Anonymous said...

Dejeselam is a disgrace for our religion stop preaching hate among our fathers for God sake.

Anonymous said...

አቤቱ የሆነብንን አስብ!

የዓሣ ግማቱ ካናቱ ነው ነገሩ ሁሉ፡፡ የአባ ጳውሎስ ብልሹነት ነው ብልሹ የሆኑ ጳጳሳትን ያፈራው፡፡

እስቲ እባካችሁ ስለ ‹አቡነ› ፋኑኤል መንፈሳዊም ሆነ ዘመናዊ የትምህርት ደረጃና እንዴት ለጵጵስና እንደበቁ ግለጹልን፡፡ ስማቸው ለምን ‹ፋኑኤል› ተብለው እንደተሾሙ እንኳን አውቃለሁ፡፡

ቅዱሰ ከሐዋሳ said...

አቤቱ የሆነብንን አስብ!
እስቲ እባካችሁ ስለ ‹አቡነ› ፋኑኤል መንፈሳዊም ሆነ ዘመናዊ የትምህርት ደረጃና እንዴት ለጵጵስና እንደበቁ፣ስለ አሜሪካ‹በሙግት መኖር እንደሆነ የኖርኩበት ነው›ከዜግነታዊ ማንነታቸው አንሥቶ ክስ ያልተለያቸው ናቸው፡፡
በአሜሪካዊ ዜግነታቸው የሚኮፈሱት አቡነ ፋኑኤል በሐዋሳ ደብረ ምሕረት ቅዱስ ገብርኤል ዐውደ ምሕረት ላይ፣ ‹‹ይሞታል ወይ ታዲያ! ስለ ራሴም ዝና እናገራለሁ፤ እኔ አሜሪካ ሄጄ በሊሞዚን መሽሞንሞን እችላለሁ፤ በችግር የምትቆራመደው አንተ ነህ!!›› በማለታቸው የማያፍሩ ናቸው፡፡ ሊቀ ጳጳሱ በየወሩ የቅዱስ ሚካኤል በዓል ዕለት ከአሜሪካው የቅዱስ ሚካኤል ቤተ ክርስቲያን ምእመናን ገንዘብ እንደሚሰበሰብላቸው/ እንደሚዋጣላቸው፣ መዋጮውንም ‹‹በሐዋሳ የካህናት ማሠልጠኛ ውስጥ ለምረዳቸው አሳዳጊ አልባ ሕፃናት አውለዋለሁ›› በሚል እንደሚሰበስቡ ተነግሯል፡፡ ተግባራቸዉን ግለጹልን...አደራ
አደራ አደራ...ግለጹልን
ከሐዋሳ ከተማ

Dan said...

አባ መላኩ በ$50,000 ዶላር ካባ ጳውሎስ ጵጵስና ተሹመው በአሜሪካን ያባ ጳውሎስ ተወካይ ሆነው መጡ ሲሉን አዝነን ቀድሞ በዋሽንግተን የሚካኤል ቤተ ክርስቲያን አለቃ ገበዝ የበላይ የሌለባቸው በንብረቱ ፈላችጭ ቆራጭ ወደነበሩበት መጡ::

ም ዕመናኑ አንቀበሎትም ብሎ እንዳባረራቸውም ሰማን አየን::

"እኔ አሜሪካ ሄጄ በሊሞዚን መሽሞንሞን እችላለሁ፤ በችግር የምትቆራመደው አንተ ነህ!!›› በማለታቸው የማያፍሩ ናቸው፡፡" እንደሚሉ አልጠራጥርም::

ስለሁኔታው ስለቤተክርስቲያንም አሳዛኝ ሁኔታ ስንወያይ ከመካከላችን "አሜሪካ ጳጳስ ሆኖ እንደፈለጉ መኖር አልተገኘም አዋሳ ተልከዋል" ቢል "እንዴ የአዋሳ ምዕመናን ምን እዳ አለበት "የነጋዴ ገንዘብ ሰብሳቢ ጳጳስ ነኝ ተብዬ " ተሸካሚ የሚሆነው ብለን አዘንን::

ዛሬ የአዋሳ ም ዕመናን በደሉ ቢበዛበት ተነሳ::
ብቃት የሌለውን የሾመ ሲኖዶስ ምን መልስ አለው?

Anonymous said...

የአዋሳ የእነ አባ ፋኑኤል ድራማ ምክንያቱ ምንድን ነው?
ልማት ሰው በምድር ላይ እያለ ኑሮውን ስለሚያሻሽልበት ጉዳይ የሚያተኩር ሲሆን ሀይማኖት ደግሞ ሰው ከዚህ አለም በሞት ከተለየ በኋላ በዘላለማዊ ህይወት ለመኖር ማቀድ ነው፡፡ ሁሉም ሀይማኖቶች ከልማት ርብርባችን ጋር አብረው የሚሄዱ መሰረታዊ መርሆዎቸን ያስቀምጣሉ፤፤በዚህ ረገድ ልዩትኩረት የሚያሻው መርሆዎች የስራ እኩልነትና በራስ ውጤት ልክ ተጠቃሚ የመሆን መርሆዎች ናቸው፡፡
የስራ ክቡርነት መርህ የልማታችንም የሀይማኖታችንም መነሻዎቸ በመሆናቸው በእምነት ነጻነት መካከል መደጋገፍ ከልሆነ በስተቀር ግጭት እንደሌለ ያረጋግጣል፡፡ልማታዊ መስመራችን ኪራይ ሰብሳቢነትን ከስራህ ውጤት በላይ አትመኝ ከዚህ ስታልፍ ግን ጸረ ልማት ያስብልሀል ነው የሚለው፡፡ ሆኖም ይህን መስመር በሚዓረር መልኩ በሀይማኖት ሽፋን የኪራይ ሰብሳቢነት አመለካከትና ተግባር የሚያራመዱ እንዳሉ ይታወቃል፡፡ሰርተህ ብላ የሚለውን ሀይማኖታዊ መመርያ በመጣስ ምፅዋትና መደጋገፍ መስራት ያልቻሉትን ለመደገፍ ብቻ የተቀመጠ መመርያ መሆኑን በመጣሰ ሳይሰሩ መኖርና መክበር የሚፈልጉ የተለያዩ እምነቶቸ መሪዎችና ተከታዮቻቸው መኖራቸው አልቀረም
ይህ የኪራይ ሰብሳቢነት አመለካከት የሚመነጨው ከዴሞክራሲያዊ ስርዓቱ ወይም ከሐይማኖቶቹ መርህ ሳይሆን በአገራችን ተንሰራፍቶ ከሚገኘው የኪራይ ሰብሳቢነት ፖለቲካ እና ከኪራይ ሰብሳቢነት አመለካከት ተግባር በመሆኑ ቀጣይነት ያለው ትግል ይፈልጋል፡፡
በአዋሳ እየታየ ያለው እውነት ደግሞ ይህንን የሚያመለክት ነው ፡፡ በክራይ ሰበሳቢነት በዋናነት የተሰማራው ያሬድ አደመ ነው፡፡ በሁለተኝነት ደግሞ መጋቤ ሀዲስ የተባለው ፍሰሀ ለማ ነው ይህ ሰው በጸረ ማህበረ ቅዱሳንነቱ የሚታወቅና ለአቡነ ፋኑኤልና ለስራ አስኪያጁ በዋና አማካሪነት የሚሰራ ሲሆን የሚጻፉ ደብዳቤዎችን በማዘጋጀት ክስ የሚያስመሰርተውም እርሱ ነው፡፡ በቅርቡ በፍርድ ቤት ሚስት እንዳለው ተበይኖበት ሳለ የፍርድ ሂደቱን የሀገረ ስብከቱ ስራአስኪያጅና ፓፓሱ እያወቁ ስርአተ ተክሊል ያደረጉለት ሰው ነው (የወለደው ልጅ ስሙ ሙሴ ይባላል የወለደችለት ልጅ ደግሞ ሶስና ትባላለች ክስ መስርታ የአዋሳ ፍርድቤት ለተወለደው ልጅ በየወሩ 300ብር እንዶቆርጥ አድርጎታል ይህን በማንኛውም ሰአት ፍርድቤት ሄዶ ማጣራት ይቻላል)እነዚህ ሁለት ሰዎቸ ናቸው አዋሳን አያመሱት የሚገኘው ስለዚህ እነሱን ከማንኛውም አገልግሎት ማገድ ያስፈልጋል ፡፡ ያሬድ አደመ በቅርቡ ወደ ዱባይ ለመጥፋት ቪዛ እየጠበቀ ሲሆን ከፍርድ ሂደቱ እንዳያመልጥ ጥብቅ ክትትለ ሊደረግበት ይገባል

Tamiru said...

“ብፁ” ያሬድ አደመ እኮ አሞሌ ጨው የቀመሰ በግ ሆኗል፡፡
በፆም እና በጸሎት እንጂ አይለቅም
ደጀ ሠላሞች ለምን ስለእሱ አትጽፉም? እጅግ በጣም በርካታ ችግር አለበትና፡፡
ቤ/ክ በአሁን ወቅት እየፈተኑ ካሉት ውስጥ አንዱ ነው፡፡


“የአዋሳ ህዝብ እንደ በሶ ቢበጠበጥ ስራዬን መስራት አላቆምም” “ብፁ አቡነ” ፋኑኤል

ሽታው /ከቀጨኔ/ said...

አባ መላኩ "አቡነ ፋኑኤል" በመንፈሣዊም በዘመናዊም የዕውቀት ደረጃቸው ልብስ ሰፊ ኮትና ሱሪ መሰላችሁ እሱማ ቢሆን ሙያ ነበር የእርሳቸው ግን ካባና ፈረጂያ ባዶ ስለሆኑ ለድንቁርናቸው መከለያ እንዴት ጳጳስ ሆኑ ታዲያ አሜሪካን ሀገር /ዲሲ/ ያለው የቅ/ሚካኤል ሙዳዬ ምጽዋት ውሎ ይግባ እንጂ ምን ችግር አለ "እንኳን ለሰው ለመድኃኔ ዓለም ብትነግሩ..." አይደል ያሉት ጨዋው አባ መላኩ.

mengiste yaya said...

እዉነቱን ስለገለጻችሁልን እናመሰግናለን በዚሁ ቀጥሉ ቃለ ሂዎት ያሰማልን
በዚሁ ከቀጠላችሁ ቤ/ክርስቲያችን ችጋር እየቀነሰላት ይሄዳል
ለሁሉም እንደበደላችን ሳይሆን እንደችርነቱ አምላክ ጠብቆቱ አይለየን

Anonymous said...

Dear Deje selam,

You are the only place where we get the truth. Please keep up your work!!! The mafia group in Awassa lead by aba melaku has done many more evil things that you never expect from a person who knows God. As you web site is getting more and more popular among the orthodox people, your reporting of the mafia group activities will help a lot in solving our church problem

Anyone please tell me how to write in Amharic font. Thank you!

Anonymous said...

Yehe link Yalemenem software Amarga Metafe Yaschelal.

Mokerew: http://freetyping.geezedit.com/

awudemihret said...

ጉድ ሳይሰማ መስከረም አይጠባም መነኩሴው ምን ነካቸው ለመሆኑ የድሮ ስራቸውን የሚያቅ አለ እስቲ

ንገሩን የምንኩስና ስማቸውስ ማን ይባላል የት ቦታና ሀገርስ ሰርዋል

Anonymous said...

ይገርማል፡በጀርመን ያሉ ካህናትና አቡኑ አንድ አይነት ስራ ነው የሚሰሩት፡፡ዋጋቸውን የሚቀበሉበት
ጊዜ ሩቅ አይደለም፡፡እግዚአብሄር አይዘበትበትምና፡፡

Anonymous said...

ዉድ anonymous መአማርኛ ለመፃፍ የሚያስችለውን ዘዴ ስላመላከትከኝ በታም አመሰግናለሁ

ዘ ቢለን ጊዮርጊስ said...

ሰላም ደጀ ሰላማውያን የቤተክርስቲያናችን ጉዳይ እየባሰበት እንጅ እየተስተካከለ መሄድ አልቻለም ምክንያቱም ሲኖዶስ ተብሎ የተሰበሰበ ው ከጥቂቶች በቀር የግል ጥቅማቸውን ለማሳደድ ነው ::ጥቂቶቹም ቢሆኑ እየተደረገ ያለውን ስህተት ቢናገሩም የሚሰማቸው አላገኙም ምላሹም መደብደብ እና የ ቤታቸውም መስኮቶች መሰባበር ሁኖል:: አባ መላኩን በተመለከተ ችግሩ የሲኖዶሱ ነው በተለይ የአቡነ ጰውሎስ ነው አባቶች ሲሾሙ ከገዳም በቅድስናቸው ፣በመንፈሳዊ እውቀታቸው፣በእድሜያቸው...ነበር:: አሁን ግን አሜሪካ ገዳም ትመስል የሚምረጡት ከዚያ ሁኖል ። ስለዚህ እኛ ልናደርግ የሚገባን 1ኟ ሁላችንም በአንድነት ወደእግዚአብሄር መጮህ 2ኟ ከእውነተኞቹ አባቶ ች ጋር ሆነን መታገል 3ኟ በዚህ ካልተስተካከሉ ምእመኑ የራሱን እርም ጃ መውሰድ ለሁሉም እግዚአብሄር ይርዳን

H/Meskel said...

In the name of the Fatgher, the Son & the Wholly Sprite One God Amen.

Dear readers
Let me tell you the exact proverb which explauns the current issue:-

Power (e.g. bieng an archboshop) never corrupts; but when foolishes (like for e.g. 'aba' paulos, 'aba' fanuel, 'aba' sereke,...) come to the power, they corrupt the power.
English proverb.

DEREJE THE AWASSA said...

ደጀሰላሞች እግዚአብሔር ይስጥልን።
አሁን በዝተናል የአዋሳ ምዕመን እውነታውን እያወቀ ነው።
ለአባ ፋኑኤል ግን ይህ መልዕክት አለኝ ‹ከሰው መሰወር ይቻላል ከእግዚእብሔርና ከሕሊና ግን በፍፁም›
የገብርኤል ሕንፃ እንዴት እንደተሰራ የሚያውቀው የአዋሳ ሕዝብ ነው። ማንም ርስቱን ሲቀሙት ዝም አይልም።
ያኔ ሕንፃውን ስንሰራ መናፍቃን ‹እናንተ ብትገነቡትም እኛ እንገባበታለን› ብለው ነበር። እንዳሉትም ተሃድሶአውያንና ዘራፊወች ወረሩን።
እግዚእብሔር ቤቱን በቅርቡ ያፀዳል ርስቱንም ያስመልሳል
ተዋህዶ ለዘላለም ትኑር

Anonymous said...

ውድ ደጀ ሰላማዉያን
እዉነት ነው አሁን አብዛኛዉ ምእመን የአባ ፋኑኤልን ተንኮልና ግፍ አውቆታል
አንድ መፍትሄ ለቤ\ክናችን ሳናገኝ ትግላችንን አናቆምም
እናንተም በፀሎት አስቡን
እየተከታተላችሁ መዘገባችሁን አጠናክራችሁ ቀትሉ
እግዚአብሄር ይርዳን

ገ\እ ከአዋሳ

Anonymous said...

 አዋሳን ከ3 አመት በፊት አውቃታለሁ ያኔ አበነ ፋኑኤል ጥሩ ስም ነበራቸው ለ 20 አመት የኖረ የሀገረ ስብከቱን ችግር በወያየት ፈቱ ተብሎ ምእመኑ ይወዳቸው ያከብራቸውም ነበር ጥሩ አባት በማግኘቱም እግዚያብሄርን አመስግኖል ጉድና ጅራት ከወደኃላ ነው እንዲሉ እንዲህ ሆነው አረፉት አምላክ ልቦና ይስጠን!!! ነገሩ መበላሸቱን ያወኩት አለምነህ በኩረ ትጉሃን ሲባል ነው፡፡ አይ አለምነህ! በኩረ በጥባጭና ወነወበዴ በዚያ ላይ ያሬድ አደመ አዛዥ ናዛዥ የሆነበት ግን የቤተክሪስቲያን አምለክ በዚሁሉ ውስጥ አላማ ሰይኖረው አይቀርም

Anonymous said...

 አዋሳን ከ3 አመት በፊት አውቃታለሁ ያኔ አበነ ፋኑኤል ጥሩ ስም ነበራቸው ለ 20 አመት የኖረ የሀገረ ስብከቱን ችግር ፈቱ ተብሎ ምእመኑ ይወዳቸው ያከብራቸውም ነበር ጥሩ አባት በማግኘቱም እግዚያብሄርን አመስግኖል ጉድና ጅራት ከወደኃላ ነው እንዲሉ እንዲህ ሆነው አረፉት አምላክ ልቦና ይስጠን!!! ነገሩ መበላሸቱን ያወኩት አለምነህ በኩረ ትጉሃን ሲባል ነው፡፡ አይ አለምነህ! በኩረ በጥባጭና ወንበዴ በዚያ ላይ ያሬድ አደመ አዛዥ ናዛዥ የሆነበት ግን የቤተክሪስቲያን አምለክ በዚሁሉ ውስጥ አላማ ሰይኖረው አይቀርም

Anonymous said...

ውድ ደጀሰላሞች ይህንን ጉዳይ ትኩረት ሰጥታችሁ በማተታችሁ ምስጋናዬን ማቅረብ እወዳለሁ፡፡ በተጨማሪም ሌላ ቦታ ያላችሁም ህዝበ ክርስቲያኖች እንድታውቁት ይምፈልጋቸው ጉዳዮች...
1ኛ.ህዝበ ክርስቲያኑ እዚህ አዋሳ መፍትሄ በማጣቱ ከ15 ቀናት በፊት አውቶበሶችን በመኮናተር አዲስ አበባ ድረስ በመሄድ ለአቡነ ጳውሎስ ጉዳዩን በዝርዝር በማቅረብ ካስረዱ በኋላ ከአቡኑም "በ2ና 3 ቀናት ውስጥ አጠሪ ኮሚቴ ልኬ አስተካክላለሁ" በማለት ቃል ቢገቡም እስካሁን ድረስ እንኳንስ ኮሚቴ ይቅርና አንድ አባት መጥቶ እንኳን "እንዴት ናችሁ" ሊለን አልቻለም
2ኛ. በተለይም ይህ ጉዳይ ገሃድ ከወጣ ወዲህ አቶ ያሬድ አደመ ቅዳሜና እሁድ ጧት ከቅዳሴ በኋላና በየቀኑ የ11 ሰኣት ፕሮግራም ላይ መድረኩን ሙሉ በሙሉ በመቆጣጠር ቃለ እግዚአብሄርን ማስተማር ትቶ "ቤተክርስቲያን ለምን ትበደላለች" ብሎ የተነሳውን ህዝበ ክርስቲያን መሳደብና ማንጓጠጥ ስራዬ ብሎ ተያይዞታል፡፡ በሌላ በኩል ከፍተኛ የሆነ የሃይማኖት ህፀፅም እንዳለበት ሳይፈልጉት ያስተማራቸው የሰንበት ት/ቤት ተማሪዎች ቃላቸውን ሰጥተዋል፡፡ እንግዲህ ቤታችን የመናፍቃን መጨፈሪያም እየሆነች ነው ማለት ነው፡
3ኛ. በጣም የሚያሳዝነው ይሀው ያሬደ አደመ ከላይ እንደገለፅኩት ብጥብጥ እንዲነሳ ህዝቡን በስድብና በማንጓጠጥ እያነሳሳ ነው፡ ተድያ ይህንን ሲያደርግ ዝም ብሎ እንዳይመስላችሁ ውሹና ቴኳንዶ የሚሰለጥኑ ልጆችን ከሃይማኖታችን ወጪ ያሉትንም ጭምር በማካተት የዘማሪያን ልብስ አልብሶ በተንቀቅ አውደ ምህረት ላይ አሰልፎ መሆኑን ስገልፅላችሁ ምንም ማጋነን ሳልጨምርበት ነው፡፡
እንግዲህ በእልፍ አእላፋት የምትጠበቀዋን ቤተክርስቲያናችን አቶ ያሬድ ከማን ጋር ለመዋጋት እንደሆነ ባይገባኝም በካራቲስቶች ሊተካው እየሞከረው ነው እላችኋለሁ ባይሳካለትም፡፡
4ኛ. አንድ ከሱ የማይሻል ድሮ ሲካፈሉ ነው መሰለኝ እርስ በእርስ ሲነቆሩ የኖሩ አለምነህ የሚባል ወንበዴና ዘራፊ ጎን ለጎን በመሆን "ጠላት ይቃጠል፡ ሲደክማቸው ይተዉታል፡ ወዘተ" በማለት ህዝቡን ለማባላት እየጣረ ነው፡፡
5ኛ. በተጨማሪም ከዲላ አንስቶ የበተክርስቲያንን መበዝበዝና የመናፍቃን መድረክ መያዝ አቃጥሏቸው "ለምን ዬሄ ይሆናል" ብለው የተነፈሱ እንዲሁም ከተቃዋሚ ቡድን ጋር ታይታችኋል፤ የተባሉ መነኮሳት ቀሳውስትና ዲየቆናት ከስራቸው ተባረዋል፡፡ እግዚአብሄር ቤቱን ይጎብኝ እንጂ ምን እንላለን፡፡
5ኛ. አቡነ ፋኑልን በተመለከተ የቤተክርስቲያኒቱ ሽማግሌዎች ዬሄ ሁሉ እንዳይከሰት ችግሮች በእንጭጩ እንዲቀጩ እያለቀሱ ቢጠይቋቸውም "አታልቅሱብኝ፤ በለቅሶ አይሆንም፤ እናንተ ምንም አያገባችሁም፤ ሁሉም ነገር በኔ መልካም ፈቃድ ብቻ ነው ሊሆን የሚችለው፤ ያዋሳ ህዝብ እንደ ወተት ቢናጥ ምንም አያመጣም፤ወዘተ" በማለት እነኝህን ታላላቅ አባቶችን ተስፋ ያስቆረጠ መልስ በመስጠታቸው ሽማግሌዎቹም ህዝቡን በማሳወቅ ወደ ሚቀጥለው እርምጃ እንዲሄዱ ተገደዋል፡፡
በመጨረሻም አብዛኛውን ህዝበ ክርስተያን ያሳሰበው ጉዳይ ደግሞ ከላይ እንደገለፅኩላችሁ ከጅ አይሻል ዶማ እንዲሉ ያ ሁሉ ህዝበ ክርስቲያን ገንዘቡን ከስክሶ፡ ስራውን ጥሎ አዲስ አበባ ድረስ ሄዶ ያለውን ችግር በእንባም ጭምር ከጠየቀ በኋላ "በ2ና 3 ቀናት ውስጥ አጣሪ ኮሚቴ እልክላችኋለሁ" ያሉትም አባት ቃላቸውን ገድፈው እዚህ ህዝብ ሲበጣበጥ እንደ ድራማ ሊያዩም ይሁን አላውቅም ጆሮ ዳባ ብለዋል፡፡
በመሆኑም ባሁኑ ሰኣት ህዝቡ በየቀኑ በመገናኘት ምን ይሻላል እያለ እየተወያየ ነው ያለው፡፡ ታድያ አሁን ባጣሪ ኮሚቴው መምጣት
ተስፋ እየቆረጠ በመሆኑ እስከ ጥቅምት 12(የሲኖዶስ ስብሰባ እስኪጀመር ድረስ)ጠብቀን በድጋሚ አዲስ አበባ እንሄዳለን ወይም የራሳችን እርምጃ እንወስዳለን ወደሚል ድምዳሜ እየተደረሰ ነውና ነገሩ በጣም አስጊ ደረጃ ላይ እየደረሰ ነው፡፡ ስለዚህ ሁላችሁም ክፉ ነገር እንዳይከሰትና እግዚአብሄር የቤቱን ሰላም ይመልስ ዘንድ ጸልዩ ፡፡ "ፀልዩ በእንተ ሰላመ ቤተክርስቲያን አሀቲ ቅድስት ጉባኤ"
አሁንም እግዚአብሄር ፊቱን ይመልስልን ፡ አሜን፡፡
ተክለ ስላሴ ነኝ
ከኣዋሳ

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)