October 10, 2010

በዘሪሁን ሙላቱ ላይ የቅጣት ውሳኔ ለመስጠት ለሐሙስ ተቀጠረ፤ የቅጣት ማቅለያ እና የቅጣት ማክበጃ ሐሳቦች ለፍርድ ቤቱ ቀርበዋል

(ደጀ ሰላም፤ ኦክቶበር 10/2010፤ መስከረም 30/2003 ዓ.ም):- ‹‹የሐውልቱ ሥር ቁማርተኞች›› ጽሑፍ በእነ ወ/ሮ እጅጋየሁ በየነ የስም ማጥፋት ወንጀል ክስ የቀረበበትን የሊቀ ትጉሃን ዘሪሁን ሙላቱን የመከላከያ ምስክር ቃል፣ የሰነድ እና የድምፅ ማስረጃዎች የመረመረው የፌዴራሉ የመጀመሪያ ደረጃ ፍ/ቤት አራዳ ምድብ ችሎት በተከሳሹ ላይ የቅጣት ውሳኔ ለመስጠት ለሐሙስ፣ ጥቅምት አራት ቀን 2003 ዓ.ም ቀጠሮ ሰጠ፡፡ በዳኛው ትእዛዝ በጽሑፍ ተገልብጦ በችሎቱ በንባብ የተሰማው የዘሪሁን የመከላከያ ምስክር የዲያቆን ዓባይነህ አሰፋ የምስክርነት ቃል የፍርድ ሂደቱን ሊያዛባ በሚችል መልኩ ተቆራርጦ መቅረቡን በስፍራው የተገኙ ተመልካቾች አስተያየታቸውን ሰጥተዋል፡፡

በዕለቱ ዳኛው ዐቃቤ ሕግ እና ተከሳሹ ለውሳኔው የቅጣት ማቅለያ እና የቅጣት ማክበጃ ሐሳባቸውን እንዲያቀርቡ ጠይቀዋል፡፡ በዚህም መሠረት ዐቃቤ ሕጉ ጽሑፉ ‹‹የግል ተበዳይ ነን›› በሚሉት ግለሰቦች ማኅበራዊ ግንኙነት እና ሥነ ልቡና ላይ ኀያል ጉዳት ያደረሰ በመሆኑ ተከሳሹ ከፍተኛውን ቅጣት (እስከ ሁለት ዓመት) እንዲቀጣላቸው በቅጣት ማክበጃ ሐሳባቸው ጠይቀዋል፡፡ ተከሳሽ ዘሪሁን በበኩሉ እስከ አሁን ጽሑፉን የጻፈው እርሱ ለመሆኑ የሚያስረዳ አንዳችም አሳማኝ ማስረጃ እንዳልተገኘበት፣ መንግሥት እና ሕግ ባለበት አገር ሕገ መንግሥታዊ መብቱ ተገፎ በኢፍትሐዊ አያያዝ እየተጉላላ መሆኑን፣ የቀረበው ማስረጃ የሚያስቀጣው ሆኖ ቢገኝ እንኳ በአ.አ.ዩ የፒ.ኤች.ዲ ትምህርቱን በመከታተል ላይ በመሆኑ ቅጣቱ ወደ ገንዘብ እንዲቀየርለት ለፍርድ ቤቱ የቅጣት ማቅለያ ሐሳቡን አቅርቧል፡፡ የግራ ቀኙን ሐሳብ ያዳመጠው ፍርድ ቤቱም በተከሳሹ ላይ የቅጣት ውሳኔ ለመስጠት ለጥቅምት አራት ቀን 2003 ዓ.ም ሐሙስ በመቅጠር ችሎት መልስ ሆኗል፡፡

በሌላ በኩል ለእነ ወ/ሮ እጅጋየሁ በየነ የከሳሽ ምስክር ሆኖ የቀረበው ዲያቆን ዳንኤል ገብረ ሥላሴ በአዲስ አበባ ሀገረ ስብከት በሲ.ኤም.ሲ አካባቢ ለሚገኘው የጻድቁ አቡነ ተክለ ሃይማኖት ቤተ ክርስቲያን ሰበካ መንፈሳዊ አስተዳደር ጉባኤ በጸሐፊነት መቀጠሩን ለደጀ ሰላም የደረሰው ጥቆማ ያስረዳል፡፡ በቤተ ክርስቲያኑ የነበረው የቀድሞው ጸሐፊ ወደ ሌላ ስፍራ መዛወሩ በጥቆማው ተመልክቷል፡፡ ዲያቆን ዳንኤል ቀደም ሲል በቀጨኔ ደብረ ሰላም መድኃኔዓለም ቤተ ክርስቲያን በዲቁና ሲያገለግል የቆየ የወ/ሮ እጅጋየሁ ቀራቢ እና ዘሪሁን ሙላቱን ሆነ ብሎ በመኖሪያ ቤቱ ካስጠጋ በኋላ ጠቁሞ በማስያዝ ቁልፍ ሚና የተጫወተ እንደ ሆነ ተዘግቧል፡፡
Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)