October 25, 2010

ቅ/ሲኖዶስ 3ኛ ቀን ከሰዓት በፊት፦ ሊቀ ማእምራን ፋንታሁን ሙጬን ከሥራ አስኪያጅነት ኃላፊነታቸው አነሣ



(ደጀ ሰላም፤ ኦክቶበር 25/2010፤ ጥቅምት 15/2003 ዓ.ም):- ጥቅምት 12 ቀን 2003 ዓ.ም የተጀመረውና ዛሬም ቀጥሎ የዋለው የቅዱስ ሲኖዶስ ስብሰባ በዛሬው የከሰዓት በፊት ውሎው አወዛጋቢውን የአዲስ አበባ ሀገረ ስብከት ሥራ አስኪያጅ ሊቀ ማእምራን ፋንታሁን ሙጬን ከኃላፊነታቸው አስወግዷል፡፡ ቅዱስ ሲኖዶስ ዛሬ ጠዋት የአዲስ አበባ ሀገረ ስብከትን አስመልክቶ አራት አባላት ባሉት አጣሪ ኮሚቴ ቅዳሜ ዕለት ቀርቦ ባዳመጠው እና የጋለ ውይይት ተካሂዶበታል በተባለው ሪፖርት መነሻነት ነው ሥራ አስኪያጁ ከሐምሌ ወር 2001 ዓ.ም ጀምሮ ይዘውት ከቆዩት ኃላፊነታቸው እንዲነሡ የወሰነው፡፡
ሪፖርቱ ከንኡሳን ጉዳዮች በቀር የሀገረ ስብከቱ ሊቀ ጳጳስ የነበሩትን ብፁዕ አቡነ ሳሙኤልን ነጻ ያደረገ ሲሆን በዋናነት ተጠያቂ ያደረጋቸው የቀድሞውን እና ዛሬ ከኃላፊነታቸው የተነሡትን ሥራ አስኪያጆች፣ ጠቅላይ ቤተ ክህነቱን እና በኪራይ ቤቶች እና ሕንጻዎች አስተዳደር የግንባታ ፈቃድ የሚያጸድቁትን የምሕንድስና ባለሞያ እንደሆነ ተሰምቷል፡፡

L.M Fantahun Muchie
29ው የመንበረ ፓትርያርክ አጠቃላይ የሰበካ መንፈሳዊ ጉባኤ መደበኛ ስብሰባ በጠቅላይ ቤተ ክህነት ሥራ አስኪያጅ በቀረበው የሒሳብ እና ቁጥጥር ሪፖርት ላይ እና ሪፖርቱን ተከትሎ በተደረገው ውይይት ላይ በመመሥረት፣ ‹‹የአዲስ አበባ ሀገረ ስብከት የቃለ ዐዋዲውን ድንጋጌ ባለማክበር ቅጾችን በአግባቡ ያለመሙላት፣ ፐርሰንት አጠቃሎ አለማስገባት፣ የሁሉም አርኣያ መሆን ሲጠበቅበት በተደጋጋሚ በቂ ባልሆነ ምክንያት በሰበካ ጉባኤ ሁለንተናዊ ተግባር አድባራትን እና ገዳማትን አለመቆጣጠር እና አለማጠናከር ስለሚታይበት የሥራ አያያዙን እንዲያሻሻል፣ በአድባራቱ እና ገዳማቱ ታምኖ በማእከል በተዘጋጁት ቅጾች ተሞልቶ ገቢ ከሆነውም 35 በመቶ ለሀገረ ስብከቱ፣ 65 በመቶ ለመንበረ ፓትርያርኩ ገቢ እንዲያደርግ ጠበቅ ያለ ውሳኔ እና መመሪያ እንዲሰጠው›› ጉባኤው ባወጣው የጋራ የአቅዋም መግለጫ አበክሮ አሳስቦ ነበር፡፡

መጋቤ ካህናት ኀይለ ሥላሴ ዘማርያም
በብፁዕ ሥራ አስኪያጁ ሪፖርት እና እርሱን ተከትሎ ረቡዕ፣ ጥቅምት 10 ቀን 2003 ዓ.ም ከሰዓት በኋላ ተካሂዶ በነበረው ውይይት የአዲስ አበባ ሀገረ ስብከት በበጀት ዓመቱ ለመንበረ ፓትርያርኩ ማስገባት የነበረበትን የገቢውን 65 በመቶ (ብር 13,667,726.20 ሣንቲም) አለማስገባቱን፣ ከዚህም በላይ በጠቅላይ ቤተ ክህነቱ በተደረገው የዘጠኝ ዓመት የኦዲት ምርመራ ከሀገረ ስብከቱ የመንበረ ፓትርያርኩ ድርሻ የሆነ 65 በመቶ ከብር 42,000,000 በላይ ገቢ ሳይሆን እንደቀረ ተመልክቷል፡፡ በውይይቱ ላይ የካህናት አስተዳደር መምሪያ ኃላፊ የሆኑት መጋቤ ካህናት ኀይለ ሥላሴ ዘማርያም በኦዲት ሪፖርቱ መሠረት የአዲስ አበባ ሀገረ ስብከት የዘመኑ ጠቅላላ ገቢ 152,251,740.10 በመሆኑ የመንበረ ፓትርያርኩ ድርሻ የሆነው 65 በመቶ ብር 19,792,726.20 ሣንቲም፣ የሀገረ ስብከቱ 20 በመቶ ድርሻ ደግሞ ብር 30,450,348.02 ሣንቲም መሆኑን አስረድተው ነበር፡፡ በሰበካ ጉባኤው ስታቲስቲክስ ግን የሀገረ ስብከቱ የዘመኑ አጠቃላይ ገቢ 47,115,384.60፣ የሀገረ ስብከቱ 20 በመቶ ገቢ ብር 9,423,076.92፣ ለመንበረ ፓትርያርኩ ፈሰስ ያደረገው ደግሞ 6,125,000.00 ብቻ በመሆኑ በኦዲት ምርመራው ተገኘ ከተባለው ጠቅላላ ገቢ አንጻር ለመንበረ ፓትርያርኩ ገቢ መደረግ ከነበረበት መጠን (ብር 19,792,726.20 ሣንቲም) ከ13 ሚልዮን ብር በላይ ጉድለት እንደተገኘ ተገልጧል፡፡

ሊቀ ማእምራን ፋንታሁን ሙጬ በውይይቱ ወቅት ታይቷል ለተባለው ከፍተኛ ጉድለት ምላሽ ለመስጠት ሞክረው ነበር፡፡ ሥራ አስኪያጁ ብፁዕ አቡነ እስጢፋኖስ እና ብፁዕ አቡነ ኤጲፋንዮስ በሀገረ ስብከቱ ውስጥ በኃላፊነት የነበሩባቸውን ጊዜያት ለሀገረ ስብከቱ የሥራ ላይ ሁኔታዎች አስቸጋሪነት አስረጅ አድርጎ በመማጠን በሰጡት ምላሽ - ሀገረ ስብከቱ ማንኛውንም ገቢውን በሞዴል 30 እንደሚሰበስብ፣ የጠቅላይ ቤተ ክህነቱ ቁጥጥርም በዚህ ቅጽ ላይ የሰፈሩትን ሁሉንም ገቢዎች ፐርሰንት እንዳሰበባቸው ነገር ግን ለሕንፃ ቤተ ክርስቲያን ሥራ እና እድሳት፣ ለክሊኒክ እና ለትምህርት ቤቶች ግንባታ ተብሎ በገቢ የሚመዘገቡ ሒሳቦች ፐርሰንት ሊሰበሰብባቸው እንደማይገባ፣ በዚህ ሳቢያ ገቢው ከፍ ተደርጎ መቀመጡ ጎድሏል ለተባለው የተሳሳተ ስሌት ምክንያት መሆኑን፣ ይህም የቁጥጥር ቡድኑ በኦዲት ምርመራው የፈጸመው ቴክኒካል ስሕተት መሆኑን፣ ሀገረ ስብከቱ ግን ከአምናው የመንበረ ፓትርያርኩ ገቢ የብር 424‚987.89 ሣንቲም ብልጫ በማሳየት ካዝናውን አሟጦ ከመቼውም ከስድስት ሚልዮን ብር በላይ ማስገባቱን፣ ይህን ለማረጋገጥ ለውስጥ ይሁን ለውጭ ኦዲተሮች ቢሯቸው ክፍት መሆኑን፣ በርግጥም የተባለውን ፐርሰንት አስቀርተው ከሆነ ‹ፍርድ እንደሚገባቸው›  ተናግረው ነበር፡፡

የጠቅላይ ቤተ ክህነቱ የቁጥጥር አገልግሎት በሀገረ ስብከቱ ሒሳብ ላይ ለስድስት ወራት ባካሄደው እና በቀደመ ዓላማው በብፁዕ አቡነ ሳሙኤል ላይ እንከን ለመፈለግ ተነጣጥሮ እንደነበር በተገለጸለት የኦዲት ምርመራ ግኝት ሪፖርት ላይ የሀገረ ስብከቱ ጽ/ቤት፣ ሰበካ ጉባኤ መምሪያ እና ሒሳብ ክፍል አምነውበት ፊርማ እና ማኅተማቸውን እንዳሳረፉበት በመግለጽ ለሊቀ ማእምራን ፋንታሁን ሙጬ የመልስ መልስ የሰጡት ደግሞ የጠቅላይ ቤተ ክህነቱ የመንፈሳውያን ጉዳዮች ዘርፍ ምክትል ዋና ሥራ አስኪያጅ ንቡረ እድ ኤልያስ ኣብርሃ ነበሩ፡፡ ‹‹የአዲስ አበባ ሀገረ ስብከት የቃለ ዐዋዲውን ደንብ የጣሰ አካሄድ እየፈጸመ ነው፤›› ያሉት ምክትል ዋና ሥራ አስኪያጁ የሰበካ ጉባኤውን ቃለ ዐዋዲ አንቀጽ 42 ንኡስ አንቀጽ ስድስት በመጥቀስ የአዲስ አበባ ሀገረ ስብከት ከየአጥቢያ አብያተ ክርስቲያን ከተሰበሰበው 20 በመቶ እና ከማናቸውም የሀገረ ስብከቱ ገቢ ላይ ለመንበረ ፓትርያርኩ 65 ከመቶ፣ ለሀገረ ስብከቱ 35 በመቶ ገቢ እንዲያደረግ መታዘዙን አስታውሰዋል፡፡ 

ንቡረ እድ ኤልያስ ኣብርሃ
 የሥራ አስኪያጁ መልስ ደንቡ ከሚያዝዘው አሠራር አኳያ አራምባ እና ቆቦ መሆኑን በአባባል በመተቸት በጉባኤተኛው ያሣቁባቸው ንቡረ እዱ፣ አንድ በጎ አድራጊ በርእስ ለይቶ ለሕንፃ ቤተ ክርስቲያን ሥራ እና እድሳት ካልሰጠ በቀር ሊቀ ማእምራን ፋንታሁን እንዳሉት ‹‹ፐርሰንት የማይከፈልበት›› የሚባል ገቢ እንደሌለ ተናግረዋል፡፡ ከ1993 ዓ.ም ጀምሮ የአዲስ አበባ ሀገረ ስብከት የቅጽ አሞላል እና ለመንበረ ፓትርያርኩ የሚያቀርበው የሒሳብ ሪፖርት ‹‹በሽወዳ/ማታለል የተሞላ›› ነው ያሉት ንቡረ እድ ኤልያስ - የሶማሌ፣ ጋምቤላ እና አሶሳ አህጉረ ስብከት በየዓመቱ ከ10,000 ያላነሰ የገቢ ዕድገት ሲያስመዘግቡ የአዲስ አበባ ሀገረ ስብከት በአምስት ዓመት ውስጥ ከ2000 ብር ያልበለጠ የገቢ ዕድገት ብቻ ማሳየቱን፣ የመንበረ ፓትርያርኩ የፐርሰንት ድርሻ ‹‹ቁልቁል እየመታ›› ማሽቆልቆሉን፣ በልማት ስም በሀገረ ስብከቱ ውስጥ ወጪ ተደርጓል የሚባለው ነገር ደግሞ ‹‹ሽቅብ እየወጣ›› መቀጠሉን፣ ከሀገረ ስብከቱ አድባራት እና ገዳማት ውስጥ ዓመቱን ሙሉ ፐርሰንት ያልተጠየቁ፣ የምእመናቸው ቁጥር እና የገቢያቸው መጠን በርግጥ የማይታወቅ ከ20 ያላነሱ አጥቢያዎች መኖራቸውን(በአንዳንዶች ግምት የአጥቢያ አብያተ ክርስቲያናቱ ፐርሰንት አየር ባየር ይበላል) በአጠቃላይ ላለፉት ዘጠኝ ዓመታት ሀገረ ስብከቱ ከ42 ሚልዮን ብር በላይ(የዘንድሮውን 13 ሚልዮን ሳይጨምር) የመንበረ ፓትርያርኩን ድርሻ በቅጥፈት ማስቀረቱን አስረድተዋል፡፡ በሀገረ ስብከቱ ጠቅላይ ቤተ ክህነቱ ከሚያውቃቸው ሞዴላሞዴሎች ውጭ በሚመዘገቡ ቅጻቅጾች ከፍተኛ የአጥቢያ አብያተ ክርስቲያን ገቢዎች እንደሚመዘበሩ፣ የሰበካ ጉባኤ አባላት በሕንጻ አብያተ ክርስቲያናት ዙሪያ የሚቀመጡ የግል ሙዳየ መባዕ እንዳላቸው ይታወቃል፡፡

በሁለቱ ኃላፊዎች ከፍተኛ ትችት የቀረበባቸው እና ‹ግምገማ› የተካሄደባቸው ሊቀ ማእምራን ፋንታሁን ከዚያ በኋላ በነበረው የጉባኤው ክፍለ ጊዜ በአዳራሹ አልታዩም፡፡ የሽልማት ኮሚቴው፣ ‹‹የ2001 የአዲስ አበባ ሀገረ ስብከትን ገቢ ከ2002 ገቢው ጋራ በማነጻጸር የበለጠ ሆኖ በመገኘቱ፣ የአንድነት የስብከተ ወንጌል ጉባኤያትን በማካሄዱ፣ ታላላቅ ዓመታዊ ክብረ በዓላት በደመቀ ሁኔታ እንዲከበሩ በማድረጉ፣ ለጋምቤላ እና ለደቡብ አፍሪካ አህጉረ ስብከት የበጎ አድራጎት ርዳታዎችን በማሰባሰቡ፣ የአጥቢያ አብያተ ክርስቲያን ይዞታ ካርታ ዝግጅት ተጠናክሮ እንዲቀጥል እና ለሊቃውንተ ቤተ ክርስቲያን እና ለተቸገሩ አብያተ ክርስቲያን ድጎማ/ርዳታ እንዲቀጥል በማድረጉ›› ያዘጋጀውን ሽልማትም ቀርበው አልተቀበሉም፡፡

በምትኩ ሊቀ ማእምራን ፋንታሁን ትምህርታቸውን ይከታተሉበታል ወደሚባለው ኦስትርያ ማምራታቸው ነው እየተነገረ ያለው፡፡ በአንዳንዶች ዘንድ በኅዳር ወር የመጀመሪያ ሳምንታት ውስጥ ጋብቻ እንደሚፈጽሙ እየተነገረላቸው ያሉት የቀድሞው ሥራ አስኪያጅ ወደ አገር የመመለሳቸው ሁኔታ አጠራጣሪ ሆኖባቸዋል፡፡ በሌሎች ዘንድ ደግሞ ሰውዬው በኃላፊነታቸው ወቅት ያካበቱትን ሀብት (በአዲስ አበባ የተለያዩ ቦታዎች ያሠሩትን ቤት፣ የገዙትን መሬት እና መኪና. . .) እንደዋዛ ጥለው እንደማይቀሩ ነው የሚናገሩት፡፡ አቡነ ጳውሎስ እና ሥራ አስኪያጁ የነበራቸውን ጥብቅ ግንኙነት ታሳቢ ለሚያደርጉት ለእነዚህ አስተያየት ሰጪዎች፣ በአጠቃላዩ የሰበካ ጉባኤ ስብሰባ ላይ ፓትርያርኩ በተገኙበት የታየው ሊቀ ማእምራን ፋንታሁን ሙጬን ማእከል ያደረገው ግምገማ አስቀድሞ ስሌት የተሠራበት፣ ‹‹ሥራ አስኪያጁን በወንድ በር ከሕግ ተጠያቂነት ነጻ የማውጣት ድራማ ነው›› ይሉታል፡፡ ለዚህም እንደ አስረጅ የሚያቀርቡት ተናጋሪዎቹ በቀጥታም ይሁን በተዘዋዋሪ የየራሳቸው ችግር ያለባቸው ሁለቱ ኃላፊዎች ብቻ መሆናቸውን እንዲሁም አዲስ አበባ የፓትርያርኩ ልዩ ሀገረ ስብከት በመሆኑ በሚፈጸመው እንከን ሁሉ ፓትርያርኩን የሚመለከት ሆኖ ሳለ የጉባኤው ርእሰ መንበር የነበሩት አቡነ ጳውሎስ ዝምታን መምረጣቸው ነው፡፡

ያም ሆነ ይህ በአዲስ አበባ ሀገረ ስብከት ሥራ አስኪያጆች ታሪክ ከአምስት እስከ ሰባት የሚደርሱ የጥቅም አቀባባዮችን መርበብ በመዘርጋት፣ ከ20,000 - 25,000 ብር እጅ መንሻ በመቀበል፣ የቤተ ክርስቲያኒቱን ሊቃውንት እና አባቶች ክብረ ነክ ስድብ በመሳደብ የሚታወሱት የኦስትርያው ፒ.ኤች.ዲ ተማሪ ሊቀ ማእምራን ፋንታሁን ሙጬ ከብዙዎች ኀዘን እና ልቅሶ በኋላ ከኃላፊነታቸው ተነሥተዋል፡፡ ሀገረ ስብከቱ ግን ከዘርፈ ብዙ የአገልግሎት እና ልማት ተስፋዎቹ ጋራ እየተመዘበረ በውስብስብ ችግሮች ተተብትቦ ይገኛል፡፡ ቅዱስ ሲኖዶሱ በመንፈሳዊ ሕይወቱ፣ በአስተዳደራዊ ክህሎቱ እና በማኅበራዊ ተግባቦቱ የበሰለ ሥራ አስኪያጅ፣ ከቤተ ዘመዳዊ እና ጥቅማዊ አመለካከት የጸዳ ሊቀ ጳጳስ ይሾምለታል ወይስ እንደ አንዳንድ የሥልጣን ጥመኞች ምኞት እንደ ቅርጫ ሥጋ ይከፋፍለዋል? ቆይተን የምናየው ይሆናል።

14 comments:

ቅዱስ ከ አዋሳ said...

ቅዱስ ከ አዋሳ

ተመስገን!!!
በነካ እጃቸዉ የአዋሳዉን ሀገረ ስብከት ሥራ
አስኪያጅ እና የሀገረ ስብከቱ ሊቀ ጳጳስ አቡነ ፋኑኑልን ቢያነሱልን !!!
አውደ ምህረታቸን ዛሬ በሰላም ዋለ አጣሪ ኮሚቴው በሰጠው መመሪያ መሰረት ከዛሬ ጀምሮ ያሬድ አደመ እና ግብረ አበሮቹ ሁለተኘ አውደ ምህረት ላይ አይወጠም ተመስገን!!!
ቅዱስ ከ አዋሳ

Demissie said...

ብታምኑም ባታምኑም እውነቱ ይህ ነው (ከበስተ ጀርባ ያለው ሀይል)


በድህረ ገጽ የምናነበው ውስብስብ የሚከተሉት... የፈጠሩት አሸክንታብ ነው።
ጥቂት እውነታን በመያዝ፦

1. በቤተ ክህነቱ የተሰገሰጉ፣ የግል ረብን (የቦታ ዝውውር፣ቅጥር፣ ገንዘብ፣ሹመት፣ ጵጵስና፣ፕትርክናን...)ያስቀደሙ ከተወሰኑ ከማህበረ ቅዱሳን አባላት ማለትም እንደነርሱ ምናምቴ ፈላጊዎችና የስሜታዊ ጎደና የሚጓዙ ሰዎች በመመሳጠር ያጠናከሩት ሀገርና ቤተ ክርስቲያን ኣጥፊ ዘመቻ ነው
2. በፕሮቴስታንት ሥር ተሰልቅጠው ሳይማሩ ፓስተሮች ነን ብለው ወንጌልን እናስፋፋለን በማለት በሲዶ-ፕሮጀክት ገንዘብን ከፈረንጆች እየገፈፉ የቤተ ክርስቲያናችን መልክዐ ገጽ ከሥሩ ነቅለው የራሳቸውን ተልእኮ ለማንገስ በተለያየ ምክንያት ከኦርቶዶክስ ቤተ ክርስቲያን ያፈገፈጉ በተጨማሪም ሆዳቸው አምላካቸው የሆኑትን ኣንዳንድ ኦርቶዶክሳዊያን በተወሰነ መቁነን አፋቸውን እየከደኑ የሚሰበስቡት እርስ በርስ አጥፊ ወሬ
3. በሃይማኖት ጥላ ስር ተደብቆ ፖለቲካን ለማስረጽ ሲባል የተጠነሰሰ ድስኩር
4. ሽብርተኝነትን በመልቀቅ ኦርቶዶክስ ክርስትናን ለማዳከም ተብሎ የተለያየ ሀይል ያጠናከረው መዝገብ ነው
5.


ወንድሞች ሆይ!

ችግር ቢኖርም እኮ እሳቱን ለማጥፋት ትሯሯጣለህ እንጂ እንዲህ የመሰለ ውርጅብን የትስ ታይቶ ተሰምቶ ይታወቃል?

ሐጢኣት ሲደጋገም ይጣፍጥህና መጨረሻው ግን......?

አስተያየት ሰጪዎችስ እንዴት ነን? እንደኔ ይቅርታ አድርጉልኝና አምስተኛው ቁጥር እኛ ሳንሆን አንቀርም።

ውድ አንባቢ ሆይ፣
መልእክቴ በደጀ ሰላም ብሎግ ለሚሰራጩ ዜናዎች ያተኮረ እንጂ በቅዱስ ሲኖዶስ 3ኛው ቀን ውሎ ብቻ ኣይደለም፤ የማንንም ጠበቃ ኣይደለሁም የቤተ ክርስቲያኔ ብቻ


ውድ ህዝቤ ሆይ ከተሳሳትኩ አስተያየትህን ለመቀበል ፍጹም ደስተኛ ነኝ

ከልብ እንጸልይ!!!

Welega

123... said...

ለ ብፁዓን አባቶቻችን ቅዱስ ሲኖዶስ አባላት
ዝቅ ብዬ በረከታችሁ ይድረሰኝ አያልኩ
ሃሳብ አንድሰጥ ፍቀዱልኝ
አኔ አንደምመስለኝ ቤተክርስትያንን የዘረፉ ፣ያዘረፉ፣የተቀበሉ፣ያቀባበሉ፣የተኮሱ፣ያስተኮሱ፣ወዘተ
፩ በ ሲኖዶስ ደረጃ ላሉት አንዴ ህገ ቤተክርስትያን መቅጣት አለባችሁ ።
፪ ከ ሲኖዶስ ውጭ ላሉት ግን ቅዱስ ሲኖዶስ ከ ምመለከታቸው ጋር ሆኖ ሁሉንም ለፍርድ ማቅረብ አና አፋጣኝ አርምጃ መውሰድ አለበት -
ይሄውም የ ቤተክርስትያንን ተቁአማዊ ጥንካሬ ከማጠናከር አና የተያያዘ ችግር ያለባቸውን በየትኛውም የ ቤተክርስትያኒቱ የ ስልጣን ማረግ ይሁኑ አውግዞ ከመለየት ጀምሮ ማለት ነው ።
ይህም ማለት ልዩ ቢሮ ተከፍቶ በ አዚህ ቅሌት ውስጥ የተያያዘ ጉዳይ በ ሕግ መታየት አለበት ከ ጉዳዩ መስፋት አንፃር ሲታይ ክሩ አረጅም ይመስለኛል ።
ክሩ የረዘመ የገንዘብ ቅሌት ደሞ ድንገተኛ ፣አስችኩአይ አርምጃ ይፈልጋል ።
ዛሬ ወደ ኦስትርያ የሄዱ ነገ የተነካካ ሁላ ደሞ በ ባህርማዶ ያለችውን ቤተክርስትያን ሌላ የ መከራ ምራፍ አንዳይከፍቱ ያሰጋል ።
በ ገንዘብ አቅማቸውስ ጠንክረው መቆየት አለባቸው ወይ? ከ ሕግ አኩአያስ? ለ ሌላው ምን ያስተምራል?
አለበለዝያ ቅጠል ቅጠሉን ከነታትበን ጊዜ አንግዛ ከተባለ መዘዙ ትልቅ ነው ። አግዚአብሔር አና ሕዝብ አያዩን ነው ። ሰውን ትተን አግዝያብሔርን ፈርተን የሰራነው ሥራ ሁሉ ውጤት አለው አናንተን ቀና ብሎ መምከር ባይሆንብኝ ማለት የምፈልገው ይህን ነው ።
በረከታችሁ ይድረሰን

Anonymous said...

ጎበዝ የተወሰደው እርምጃ ትክክል ቢሆንም የጠገበውን ፋንታሁን አባረው የራበውን እንዳይሾሙ ፍሩ

123... said...

ጋሽ ደምሴ (ከ ላይ አስተያየት የሰጠሀው) ወንድሜ
ጥፋት አንዳለ አምነሃል ትንሽ አውነት ይዞ ብለሃላ !!!
ዱላው በዛ ደሞ ትላለህ (ባንተ አጠራር ውርጅብኝ )
በ ቃላት አውነቱ ተፃፈ ሲሆን ሲሆን አኮ ጌታችን ''ይህን ከ አዚህ አንሱ '' ብሎ በ ቤተክርስትያን ላይ የሚነግዱትን ጅራፍ አንስቷል ።
አንዴ መፅሀፉስ የ ቃላት ውርጅብኝ ሳይሆን ጅራፍ ነው የታዘዘው ግን አኛ ኃጢአተኛ ትውልድ አደለን ? የ መፅሐፉን ሕግ መፈፀም አቃተን ።
አባክህ ተሰልይልን ሕጉን አንድንፈፅም !!!!

Anonymous said...

Dear Welega,
You said it correctly!!! Egziabher Yibarkih!!!!

Demissie said...

The "123...said", to Demissie

I have accepted your comment regarding the small truth,but as to me it is good to handle them legally than distributing all over the world.

Dear comment giver, don't you observe how many enemies who surround our church ?

Would you mind if Ikindly ask you, we have to think widely?

Thank you

Anonymous said...

በስመአብ ወወልድ ወመንፈስ ቅዱስ አሕዱ አምላክ አሜን!!
ከእኛ የሚጠበቀው መልካም መልካሙን ማሰብና መፀለይ ነው፡፡ ከዚህ በተረፈ መንፈስ ቅዱስ በቦታው በጊዜውና በሰዓቱ ሁሉንም ያከናውነዋል፡፡

ቸሩ ፈጣሪያችን ለአባቶቻችን ሐይልና ብርታቱን ያብዛላቸው፡፡ አሜን!!

መርከቤ ንጉሴ/ከአዲስ አበባ/

መርከቤ ንጉሴ/ከአዲስ አበባ/ said...

በስመአብ ወወልድ ወመንፈስ ቅዱስ አሕዱ አምላክ አሜን!!
ከእኛ የሚጠበቀው መልካም መልካሙን ማሰብና መፀለይ ነው፡፡ ከዚህ በተረፈ መንፈስ ቅዱስ በቦታው በጊዜውና በሰዓቱ ሁሉንም ያከናውነዋል፡፡

ቸሩ ፈጣሪያችን ለአባቶቻችን ሐይልና ብርታቱን ያብዛላቸው፡፡ አሜን!!

መርከቤ ንጉሴ/ከአዲስ አበባ/

123... said...

አኔ አንደምመስለኝ
በ ደጀ ሰላም ላይ የሚወጡት ፅሁፎች በጣም ግልፅ ሆነ አንዳንዱን ለ ቤተክርስትያን ስም ሲባል ቢቆይ ምናለ
አንድያውም አንዳንዳንዶች አባባል አዛው በውስጥ ብያልቅ የሚሉ አሉ ።ሃሳቡ በመሰረቱ ቢሆን ጥሩ ነበር ።ግን ያልተገነዘብነው ነገር የ ጊዜውን መለዋወጥ ነው ይህም ማለት አሁን የምንኖርበት ዓለም ትናንት አንደምንኖርበት ዓለም አደለም ።ማስረጃ ልጥቀስ :-
፩ የመገናኛ ቴክኖሎጂ ዘመኑን ቀይሮታል
የቤተክርስትያንን ደህንነት የማይፈልጉ ወገኖች የ ቤተክርስትያኒቱ ጠላቶች ሆነው ከ ውስጥ አስካሉ ድረስ በ ድረ ገፅ ተጻፈ አልተጻፈ ማንኛውም መረጃ ከ ቤተክርስትያን ወጥቶ በ ፍራክሽን ሰከንድ ውስጥ መሰማቱ አይቅርም።
ይልቁንም ጉዳዩ ከ ቤተክርስትያን አካላት አና መመናን መደበቁ ቀድመው መረጃውን ያገኙት ፀረ -ቤተክርስትያን አካላት ከላይ አንደተገለፀው ትንሽ አውነት አሳይተው ትልቅ ውሸት አክለው ጉዳዩን ያቶዙትና አባቶች ከ አባቶች፣መመናን ከ አባቶች መደማመጥ ያቅታቸዋል ።መተማመን ይጠፋል ማን አጥፊ አንደሆነ ለመለየት ተስኖን መደናበር መተራመስ ይኖር ነበር ። በ አዚህ መሃል መናፍቅ አና ተሃድሶ ቦታ ያገኝ ነበር ። የሰይጣን አንዱ ታክቲክ ሰዎች አንድ ሆነው ስለ አንድ ነገር አንዳያስቡ ማረግ ነው አና አውነተትኛ የ ቤተክርስትያን ልጅ ስለቤተክርስትያን ክፉ ነገር ስሰማ መፍትሄውን ያስባል ብያንስ በ ሃዘን አምላኩን ይጠይቃል። ''በሽታውም የደበቀ መድሃኒት አይገኝለትም'' አንደተባለ ለባውም አየሰረቀ ፣ተሃድሶውም አያመሰ፣ ጉዳዩን ዓለም አይስማው ማለት ''አግሩን ጅብ አየበላው ምንድነው ? ብሎ ለጠየቀው ሰው ድመፅ ቀንስ አያ ጅቦ አግሬን አየኮረተመ ነው '' ያለውን ተረት ይመስላል ።
፪ የ ሕዝብ ጉዳይ በ ሕዝብ ይፈታል
አሁን የምንኖርበት ዓለም ነገሮችን ድብቅ በማረግ አያምንም ።በ አዚህም ተጠቅሟል ።ዲፕሎማሲ ባቅሙ አንኩአን ''ፐብሊክ ዲፕሎማሲ'' ሆኗል ።ከ ሕዝብ ችግሮችን ባለመደበቅ መፍትሄም ከ ሕዝብ ጋር ማግኘት ተችሏል ።
ተዋህዶ ደሞ ከ አዚህ ሁሉ የፀዳች በጣም ግልፅ አሰራር ያላት ።''ሰው '' ለተባለ ፍጥረት ሁሉ የተሰጠች ሃይማኖት ነች ። መሪዋ አምላኩአ ጌታችን መመርያዋ መፅሐፍ ቅዱስ ፣ግቡ በ ምድር ላይ መልካም ሥራ ሰርቶ በ ሃይማኖት ፀንቶ ሰማያዊት አየሩሳለምን መውረስ ነው ። በ አዚህ ሂደት የማይሄድ ሁሉ ከ መንገድ ወቷል ማለት ነው ።
አና ወንድሜ ደምሴ ከ አዚህ አንፃር ሲታይ መፃፍ ነበረበት አንድያውም ለ መፍትሄው መፋተንም መፈለግም መፃፉ ጠቅሟል ነው የምለው ።
ይቆየን

Dirsha said...

It is westing time to respond to guys like Demissie b/c he denys the reality and tiry to cheat us but I wants to tell him that we know where you are and don't west your time to cheat. I am doutiful still what the end will be. I share the idea Yetegebew Fantahun tenesto Yeterabew endayimeta betam esegalehu. Amilak Yitebiken, Enibachinin Yabisilin.

Anonymous said...

ሟርቱንና፡ፍራቻውን፡ለጣዖቱ፡ወገኖች፡በመተው፡
በቆራጥነት፡የተጀመረውን፡የእግዚአብሔርን፡ቤት
፡የማጽዳት፡ተጋድሎ፡በሙሉ፡ልባችን፡በመደገፍ፡
ከአባቶች፡የሚቀርበውን፡ጥሪ፡ሁሉ፡ሥራ፡ላይ፡ለማ
ዋል፡እንትጋ።

አሁን፡ጊዜው፡የጠረጋ፡ሰዓት፡ስለሆነ፡ሁላችንም፡ጠ
ረጋው፡በሚገባ፡እንዲፈጸም፡በአንድ፡ለብ፡ያለንን፡
እንቅርብ።እግዚአብሔርን፡ተማፅነን፡ተንግዲህ፡እ
ንዲህ፡ያለ፡አመፅና፡ማናለብኝነት፡ተዋሕዶ፡ቤታች
ን፡ውስጥ፡ቦታ፡እንዳይኖረው፡ለእግዚአብሔር፡ሕግ
ና፡ሥርዓት፡እንታገል።

እስቲ፡አሁን፡በነዚህ፡ላይ፡አተኩረን፡እንሥራ።ያኔ፡
ማን፡ማን፡እንደሆነ፡መለየትና፡የሚስተካከለውን፡
ማስተካከል፤የሚታረመውን፡ማረም፡እንችላለን።

እግዚአብሔር፡ስለቤቱ፡ጉዳይ፡ቀናተኛ፡ስለሆነ፣የ
ጀመረውን፡እንዲጨርሰው፡እኛም፡ቃሉን፡ተቀብለ
ን፡በትጋት፡በተጋድሎ፡ውስጥ፡ከሚገኙት፡አባቶች፡
ጋር፡ወደ፡ግራ፡ወደ፡ቀኝ፡ሳንል፡በቀጥታ፡እንቁም!

መንፈስ፡ቅዱስ፡አባቶችን፡አበርትቶ፡እዚህ፡አድርሷ
ቸዋል።እኛም፡ከአባቶች፡ጋር፡ተጋድሏችን፡የትዋሕ
ዶ፡ትንሣኤ፡ስለሆነ፡በአንድ፡ልብ፡እንሁን።እንደ፡አ
ዋሳ፡ሕዝበ፡ተዋሕዶ፡በእምነትና፡በትጋድሎ፡እንፅና!

የተጀመረውን፡ቅዱስ፡ተጋድሎ፡እግዚአብሔር፡ፍሬ
ያማ፡ሆኖ፡እንድናይ፡ያብቃን!አሜን።


ሳሙኤል፡ዘአሰቦት።

Anonymous said...

በዕርግጥ እሳቸው በመነሳታቸው እንደ ቀላልና ተራ ነገር እንደውም በቀላሉ መተው የሌለበት ጉዳይ ቢኖር ቤ/ክ ያጣችው ገንዘብን ብቻ ሳይሆን እኒህ መዥገር ሰው ስልጣን ላይ ከወጡ ግዜ አንስቶ ተልዕኮዋን በአግባቡ እንዳትወጣ ምዕመናኖቻን እንዳትታደግ ከስራቸው በኮለኮላቸው እሳቸውን መሰል ስራ አስክያጆች ታላቅ በመቀበል ምዕመናኑን በቁሙ ለአህዛብና ለመናቃን ቸርችረውታል ምዕመናኑ እንባውን አፍሶ ወዳልፈለገበት ሄደ፡፡ ያሳዝናል ወረዱ የሚለው ብቻ አስደሳች መስሎ አይታየኝም ግንዱ ተቆርጠዋል ብንልም ቅርንጫፎቹን እንዳይዘነጉ በጣጥሶ መጣል ያስፈልጋል ቤ/ክ ለግለሰቦች ሳይሆን ለምዕመናኖቻ አፋጣኝ መፍትሄ ያሰፈልጋታል፡፡ይህንንም ያልኩበት ምክንያት በቅርቡ በመስከረም ወር በኢሉባቦር ገቺ ወረዳ አከባቢ ዘገባ ዘግባችሁልን ነበር አንዳንድ የህዝብ አስተያየትም ተካቶበት ነበር፡፡
እኔም እንደማውቀው ማንም ሰው 100% የሚናገረው አንድ ሃቅ አለ የሊቀ ማዕመራን ፋንታሁን ሙጩ ተቀዳሚ ደቀ መዝሙር ሊቀ ትጉሃን ብርሃኑ መንገሻንና ቤተዘመዶቻቸውን የዘመናት ድርጊት ቤ/ክህነት ለምን ዝም አለች ምላሹ አንድ ነው በእማኝነት የምነግራችሁ ለሊቀ ማዕመራንንና ተባባረዎቻቸው ከ30-40 ኪሎ ቅቤና ማር እየተጫነ ይጋዝ ነበር፡፡ እባካችሁ በተለይ አባቶች የኢሉባቦርን ነገር ከ እግዚአብሔር ጋር አንድ በሉን ህዝቡ ላይ በመስከረም ወር የደረሰበትን ሰምታችኃል፡፡ እነሊቀ ትጉሃን ግን በቅርቡ በመቱ ከተማ በአክስዮን 3ኛ ስጋ ቤታቸውን ከፍተዋል፡፡
አገልግሎት ይላችኃል ይሄ ነው፡፡
በመላው ዓለም ያላችሁ በሙሉ ከደርግ-ኢህአዴግ ነጻ ላልወጣችው ሀገረስብከት ድምጻችኁን አሰሙልን፡፡ምክንያቱም የቀሩት እንካን እንዲቆሙ፡፡

የቀሩትንም አባቶች ምዕመናን ከአድርባይነት መንፈስ እግዚአብሔር ጠብቆ በአንድ መንፈስ በሕበረት ለመቆም ያብቃን፡፡

Anonymous said...

ኢዚም የነበረውን ፍቅር በየሰው መሃል ገብቶ አደፈራርሶታል ሁሉም አንቅሮ ተፍቶታል
አሁን ያልታውቀ መስሎታል ቪየና መቶ ተደብቃአል የቪየና ምእመናን እሱ ቀደሰ ማለት ስይጣን አስተማረ ማለት ነው የአኦርቶዶክስ ስነስራቱ ጠፋ ማለት ነው

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)