September 1, 2010

“የትኛው ሰባኪ፣ የትኛው ዘማሪ እዚህ አደባባይ መቆም እንዳለበት ወስነን እስክንነግራችሁ ድረስ በያላችሁበት ቁሙ!!” (በጋሻው ደሳለኝ)


(ደጀ ሰላም፤ ሰፕቴምበር 1/2001፤ ነሐሴ 26/2002 ዓ.ም):- ከነሐሴ 22 – 23 ቀን 2002 ዓ.ም በሐዋሳ መስቀል አደባባይ በተጠራው እና በበርካታ የፕሮቴስታንት አብያተ እምነት ተከታዮች ተሞልቶ በነበረው እንግልጋ (ስብስብ) “የቅድስት ማርያም ስብከተ ወንጌል ማስፋፊያ ማኅበር›” እየተባለ የሚጠራ ቡድን ቃል አቀባይ የሆነው በጋሻው ደሳለኝ “‹…ክልሉ የኛ ነው፤ ከዚህ በኋላ የትኛው ሰባኪ፣ የትኛው ዘማሪ እዚህ አደባባይ ላይ መቆም፣ ይህችን ምድር መርገጥ እንዳለበት ወስነን በቅርብ ቀን እንገልጽላችኋለን፡፡ እስከዚያው ድረስ በያላችሁበት ቁሙ!›› ማቱን በሐዋሳ የደጀ ሰላም ምንጮች አመለከቱ፡፡
በሀገረ ስብከቱ ሊቀ ጳጳስ አቡነ ፋኑኤል ይሁንታ እና በ‹‹ተስፋ ኪዳነ ምሕረት የፀረ-ኤች.አይ.ቪ ማኅበር›› አካል አስተባባሪነት የተዘጋጀው ይኸው ጉባኤ በማባበያ የተጠሩ በቁጥር ያነሱ ኦርቶዶክሳውያን የተገኙበት ነበር፡፡ “ፕሮግራሙ በአመዛኙ በማኅበሩ ሲቀሰቀሱ የቆዩ ልዩ ልዩ የፕሮቴስታንት አብያተ እምነት ተከታዮች እንደልባቸው የቦረቁበት ነበር” የተባለው ይኸው እንግልጋ በፕሮቴስታንታዊ ተሐድሶ ስልት የተቃኙ “ሁለ-አቀፍ ስብከቶች” ጎልተው የተሰሙበት እንደ ነበር ተዘግቧል፡፡
ከሀገረ ስብከቱ ምእመናን በተውጣጡ ታዋቂ እና አንጋፋ ኦርቶዶክሳውያን በተቋቋመው የፍትሕ እና ልማት ኮሚቴ ለፌዴራል እና የክልል መንግሥታዊ አካላት እንዲሁም ለፓትርያርኩ አቤቱታ የቀረበባቸው ሊቀ ጳጳሱ አቡነ ፋኑኤል፣ በቅዳሜው ፕሮግራም ላይ የከተማው ምእመናን በጉባኤው ላይ እንዲገኙ በማሳሰብ፣ ያልተገኙትን እንደሚያወግዙ በመዛት አስፈራርተው ነበር፡፡ በአደባባዩ ተናጋሪ የነበሩት በጋሻው ደሳለኝ እና ያሬድ አደመ ቀደም ሲል የተጠቀሰውን ኀይለ ቃል ለመናገር ሹመት የሌለው ‹ሥልጣን› ያገኙት በዚህ የሊቀ ጳጳሱ ወፈ-ገዝት ማስፈራርያ ተደፋፍረው ጭምር እንደ ሆነ ምንጮቹ አመልክተዋል፡፡ ቀደም ሲል በሊቀ ጳጳሱ እና በሀገረ ስብከቱ ሥራ አስኪያጅ ላይ አቤቱታ ያቀረቡት የፍትሕ እና ልማት ኮሚቴ አባላት በተለይም በሐዋሳ ደብረ ምሕረት ቅዱስ ገብርኤል ገዳም ቅጽር ውስጥ አንዳችም ስብሰባ እንዳያካሂዱ ለዞኑ ፖሊስ ከማመልከታቸውም በላይ የገዳሙ ጥበቃ ሠራተኞች በኮሚቴው አባላት ላይ የአካላዊ ጥቃት ርምጃ እንዲወስዱም ማዘዛቸውን የዜናው ምንጮች ያስረዳሉ፡፡
ከፖሊስ ምንም ዐይነት ምላሽ ያላገኙት ሊቀ ጳጳሱ በሐዋሳ መስቀል አደባባይ በተደረገው ስብሰባ “አንዳንድ ችግር ፈጣሪዎችን በተመለከተ ለፖሊስ ብናመለክትም ፖሊስ ሊሰማን አልቻለም” በማለት ማማረራቸው ተዘግቧል፡፡ አክለውም፣ ‹‹ሕዝቡ የቤተ ክርስቲያንን ሰላም ማስጠበቅ አለበት፤›› የሚል ማሳሰቢያ በመስጠት ያወረዱትን ‹‹የደብድቡልኝ›› ትእዛዝ ተፈጻሚ የማያደርጉትን የገዳሙን ጥበቃ አባላት፣ ‹‹የአባ ገብረ ወልድ (በእርሳቸው ትእዛዝ ከገዳሙ አስተዳዳሪነት የተነሡ) ዕጣ ይገጥማችኋል፤›› በማለት ከሥራቸው እንደሚያባርሯቸው ዝተውባቸዋል፡፡
Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)