September 23, 2010

በገቺው የአክራሪ ሙስሊሞች ሁከት 13 ግለሰቦች በቁጥጥር ሥር ዋሉ

  •  ሁከቱ ክርስቲያኖችን በኢኮኖሚ ለማዳከም እና ለማሸማቀቅ ያለመ ነው
(ደጀ ሰላም፤ ሰፕቴምበር 23/2010፤ መስከረም 13/2003 ዓ.ም):-  በኢሉአባቦራ ሀገረ ስብከት በገቺ ወረዳ አራት ቀበሌዎች እና ዘጠኝ አጥቢያ አብያተ ክርስቲያን ከአንድ ወር በላይ በአክራሪ ሙስሊሞች ሲፈጸም የቆየው ክርስቲያኖችን አግቶ የመውሰድ፣ መኖሪያቸውን ከብቦ የማስጨነቅ እና በሽመል የመደብደብ፣ የቡና እና ሌሎች ቋሚ ተክሎቻቸውን በሌሊት የመመንጠር፣ ሰብሎቻቸውን የማጥፋት፣ ከብቶቻቸውን ነድቶ የመውሰድ፣ አርዶ እና ተቃርጦ የመብላት የጥፋት ተግባራት መገታታቸውን እና የድርጊቱ ፈጻሚዎች የሆኑ 13 ግለሰቦች ካጠፏቸው ንብረቶች ጋራ በቁጥጥር ሥር ውለው በወረዳው ፖሊስ ጣቢያ እንደሚገኙ የአካባቢው ደጀ ሰላማውያውን አመለከቱ፡፡
እንደ ደጀ ሰላማውያኑ ገለጻ ከሆነ ወረዳው በጠንካራ የፖሊስ እና የቀበሌ ታጣቂዎች ስምሪት ውስጥ ይገኛል፤ በቁጥጥር ሥር ያልዋሉትንም በቀጣይ አድኖ ለፍርድ የማቅረቡ ዘመቻ እንደሚቀጥል የተገለጸ ሲሆን በዛሬው ዕለት ከሀገረ ስብከቱ እና ከገቺ ወረዳ ቤተ ክህነት ሐላፊዎች፣ ከወረዳ ምክር ቤቱ የካቢኔ አባላት እና የፖሊስ ኀይል ጋራ በተደረገ ስብሰባ ከሁለቱም ወገኖች ተውጣጥተው ለችግሩ ዘላቂ እልባት የሚሰጡ የአገር ሽማግሌዎች ተመርጠዋል፡፡ ይሁንና ከዚህ ቀደም በአካባቢው በደረሰው ጭፍጨፋ እና ከዚያም በኋላ በተለያየ መንገድ ከጅማ እስከ መቱ ድረስ በተዘረጋው እና ተባብሶ ከቀጠለው የአክራሪዎቹ ሰንሰለታማ ተጽዕኖ አኳያ ሁኔታው ሀገረ ስብከቱን ባካተተ መልኩ በሌላ ገለልተኛ አካል ቢታይ የተሻለ ዋስትና እንደሚኖረው ተጠቁሟል፡፡


ለችግሩ የቅርብ ጊዜ መንሥኤ እንደ ሆነ የተገለጸው በገቺ ወረዳ ጂሳ እና ቦረታ በተባሉ ኩታ ገጠም ቀበሌዎች መዋሰኛ ላይ ከሁለት ዓመት የይዞታ ክርክር በኋላ ባለፈው ዓመት ግንባታው ተጀምሮ በመጠናቀቅ ላይ ባለው የመድኃኔዓለም ሕንጻ ቤተ ክርስቲያን መሠራት ሳቢያ በአክራሪዎች ላይ ያደረው ክፉ የቅንዓት መንፈስ እንደ ሆነ ተገልጧል፡፡ ቤተ ክርስቲያኑ የተሠራው ቦታውን በበጎ ፈቃዱ ለሕንጻ ቤተ ክርስቲያኑ ማሠሪያ በማመልከቻ ጽፎ ባበረከተ ኦርቶዶክሳዊ ምእመን ቦታ ላይ ቢሆንም አንዳንድ የመንግሥት ባለሥልጣናት ለሙስሊሞቹ በሰጧቸው አጓጉል ተስፋ ሳቢያ አክራሪዎቹ ምእመናንን በማሸማቀቅ የሕንጻ ሥራውን የሚያሰናክሉ ድርጊቶችን ለመፈጸም እንደተነሣሱ ተመልክቷል፡፡ በዚህ የተነሣ በጎሌ ጻድቁ አቡነ ተክለ ሃይማኖት የልማት ጣቢያ ሠራተኞች እና በትምህርት ቤቶች ክርስቲያን መምህራን አካባቢውን ለቀው እንዲወጡ ግፊት ሲደረግባቸው ቆይቷል፡፡

ሐምሌ 21 ቀን 2002 ዓ.ም በገበር ቀበሌ አንዳንድ አሰጋጆች ቅሰቀሳ የተነሣሱ ሙስሊሞች ‹‹ክርስቲያኖች ደብድበውብን ነው›› በሚል በሐሰት አንድ ሙስሊምን በቃሬዛ ተሸክመው ወደ ሕክምና ቦታ ይሄዳሉ፡፡ ከዚያ በኋላ የክርስቲያኖቹን መኖሪያ በመክበብ ምእመናኑን በሽመል የመቱ ሲሆን የቀበሌው አስተዳደር ዘግይቶ ጣልቃ በመግባት ደብዳቢዎቹ ይቅርታ እንዲደረግላቸው እና ዕርቅ እንዲፈጠር ማድረጉ ተዘግቧል፡፡ 


ይሁንና ከነሐሴ 10 ቀን ጀምሮ በጂሳ ቀበሌ የክርስቲያኖችን የቡና ተክሎች የመቁረጥ፣ ሌሎችም ደራሽ ሰብሎቻቸውን የማጥፋት፣ ከብቶቻቸውን፣ በጎቻቸውን እና ፍየሎቻቸውን የመዝረፍ እና አርዶ የመብላት ተግባር በተመረጡ ምእመናን ላይ ሲፈጽሙ መቆየታቸው ተመልክቷል፡፡ መስከረም ስምንት ቀን ለዘጠኝ አጥቢያ ድርጊቱን ለመከላከል በሞከረ አንድ ክርስቲያን ላይም በፈጸሙት ድብደባ አቁስለውታል፤ ምእመኑ በአቅራቢያው ጤና ጣቢያ ሕክምና አግኝቶ ወደ ቤቱ ተመልሷል፡፡

ዛሬ በገቺ ወረዳ ላይ በተደረገው የጋራ ውይይት የወረዳው ባለሥልጣናት ድርጊቱን ከዘራፊዎች ስርቆት ጋራ በማያያዝ የድርጊቱን ፈጻሚዎች በአስቸኳይ ለፍርድ እንደሚያቀርቡ ቢናገሩም አንዳንድ የጉዳዩ ተከታታዮች ግን ችግሩ በተጠቀሱት ቀበሌዎች የጠንካራ ክርስቲያኖች የኑሮ መሠረት የሆኑትን የግብርና ሀብቶቻቸውን በማጥፋት በኢኮኖሚ ለማዳከም፣ በእምነታቸው ጠንክረው የሰበካቸውን የልማት እንቅስቃሴ ከመደገፍ እንዲታቀቡ ለማድረግ፣ ወትሮም በሀገረ ስብከቱ ሣስቶ በሚገኘው የስብከተ ወንጌል እንቅስቃሴ ግንዛቤ የሌላቸው ምእመናን ግራ እንዲጋቡ እና ተስፋ እንዲቆርጡ በማድረግ አካባቢውን ለቀው እንዲሰደዱ አልያም ችግሩን መቋቋም ተስኗቸው እምነታቸውን እንዲቀይሩ ለማስገደድ መሆኑን ተናግረዋል፡፡ በኑሮ አቅማቸው ደካማ የሆኑ ምእመናንን በጋብቻ ይዞ፣ በመውጫቸው እና በመግቢያቸው ማጨናነቅ እንዲሁም ንብረቶቻቸውን በመዝረፍ እምነታቸውን ማስቀየር እየጎሉ የመጡ የኢጥሙቃኑ ጫና መፍጠሪያ ስልቶች ናቸው፡፡  

በመሆኑም የጠቅላይ ቤተ ክህነቱ ስብከተ ወንጌል ሐዋርያዊ ተልእኮ መምሪያ፣ መንፈሳውያን ማኅበራት እና ገባሬ ሠናይ ምእመናን አቅማቸውን በማቀናጀት በአካባቢው ቋሚ መንፈሳዊ ትምህርት ቤቶችን በማቋቋም በቋንቋው የሚናገሩ፣ ባህሉን የሚያውቁ ነዋሪ ካህናትን በማፍራት፣ ችግር ፈቺ የአንድነት ጉባኤያትን በማዘጋጀት፣ ለሰባክያን መንቀሳቀሻ በጀት የሚሆን የገንዘብ ድጋፍ በመስጠት እንዲራዱ ጥሪ ተላልፏል፡፡

12 comments:

Anonymous said...

Wey Anchi betekrstiyan,
Sintu worjibighn weredebish....
Hulum Yalfal... Ye 40 Ametu YeYodit Fetena, Ye 15 Ametu Yegiragn Dula... hulum Alfo Tarik Sihon Ahun degmo....

selamawi said...

በስመ ስላሴ አሃዱ አምላክ አሜን

በመጠኑም ቢሆን ጥሩ እርምጃ ነው ሳይቃጠል በቅጠል ተደርሶበታል መንግስት ሁልጊዜም ቢሆን እንደዚህ ገና ከመጀመሪያው መፍትሄ ቢፈልግለት እኮ የክርስቲያኖች ደም በከንቱ አይፈስም ነበር ያሁኑ ጥሩ ጅምር ነው በተረፈ ሌላው ደስ የሚለው እንቅስቃሴ ሁሉንም ብሄረሰቦች በየቋንቋቸው የሚያገለግሉ ከአካባቢው የወጡ አገልጋዮችን ለማፍራት የሚደረገው ጥረት በጣም የሚበረታታ ነው ያገሩን በሬ ባገሩ ሰርዶ በዚህ ባለንበት ሃገር አሜሪካም የጎደለን ይህ ነው እንደ አካባቢውና እንደቋንቋው መስለን ማገልገል ስላልቻልን ህዝብን በቃለ እግዚአብሔር አንጾ አንድ ማድረግ አቃተን ,, ሁሉንም በቸርነቱ ይርዳን

ዘ ሐመረ ኖህ said...

የአክራሪ እስልምና አጥፊነት ለሃገራችንም ለዓለምም ለእግዚአብሔርም የማይመች በመሆኑ መላው የኢትዮጵያ ሕዝብ ከመንግስት ጋር በመተባበር ሃገራችን የሃይማኖትም ሆነ የፖለቲካ ነጻነት ያለባት ሃገር እንድትሆን ጥረት እናድርግ፡፡ መንግስት የጀመረው መጠነኛ እርምጃ የሚያበረታታ ሲሆን ለወደፊቱ የተጠናከረ እርመጃ በመውሰድ የሕዝበ ክርስቲያኑንም ሆነ የጤናማ ሙስሊሙን ሕዝብ ድጋፍ በማግኘት ከተረጅነት ወጥተን በሰላምና በልማት አድገን ጠላትን ሁሉ አሳፍረን ወዳጆቻችንን የምናኮራ እንደምንሆን ጥርጥር የሌለው በመሆኑ መንግስት በጅማሬው እንዲቀጥልና ሌሎች መሰል እርምጃዎችን እንዲወስድ ያስችለው ዘነድ የመላውን ሕዝብ የልብ ትርታ እንዲያዳምጥና ተገቢውን መልስ እንዲሰጥ አሳስባለሁ፡፡ ቸር ይግጠመን

Anonymous said...

አዳሜ.. ሥልጣን ጵጵስና እያልሽ ትፋጃለሽ: አክራሪነት እና ምንፍቅና: ቤተክርስቲያኔን በጣጥሰው ሊበሏት ነው:: የከፋው ነገር የመጣው በኔ ኃጢአት ቢሆንም: ምነው እናንተን ሃይማኖተኛ ተብዬዎችስ (ከላይ ከላይ ያላችሁትን: አሁን በሥልጣን በዘርና በገንዘብ የምትባሉትን.... ለሥጋ ምቾት ብቻ የምትለፉትን).. ሃይ የሚላችሁ ጠፋ!! ምነው እመብርሃን ጭንቃችን ሃዘናችን በዛ? እረ ተለመኚን?!! ...እረ አለሁ በለን ፈጣሪ!!

Anonymous said...

To Dejeselam Other Chrstians

Please translate to English and other international language and post it on your blog and sent to other media, let know other people in the world know what is going on in Ethiopia by Fundamentalist muslims.

God Is Great

Metalem A. said...

It is clear that satan never sleep to attack the HOLYCHURCH.But GOD is always with us. what is expected from us it that nonstpping praying.
May GOD Bless our HOLYCHURCH.

Anonymous said...

የገቺና አከባቢዋ ምዕመናን አሁን እየተባላና ግዜውን ላልዋጀ ኦርቶዶክሳዊ ትልቅ ት/ት የሚሰጥ ምዕመን ነው፡፡ ምክንያቱም ያለማንም አጋዥ ሁሉንም ጫና ተቃቁሞ ትልቅ ስራን እየሰራ ይገኛል፡፡ አሁንም ተጠናክሮ ይቀጥላል፡፡

ኢሉባቦር በቤተ ክህነት ከደርግ እሰከ ኢህአዴግ አባት የሌላት ሀገር ሆና ምዕመናኖቻ ጠያቂ በማጣትና ተስፋ በመቁረጥ ጩኸው መፍትሔ ሲያጡ የማይፈልጉትን ዕምነት በግዴታ እንዲቀበሉ የሆነባት ምድር ከሆነች በጣም ቆይታለች፡፡አይድነቃችሁ እነ ሊቀ ትጉሃን ብርሃኑ መንገሻ የሚያደርጉትን ድርጊት አይታችሁ ተስፋ የቆረጣችሁ ምዕመናን እንዳትዘናጉ አደራ እንላለን በእነሱ የሚመደቡትንም ሰዎች ብዙ እምነት እንዳትጥሉባቸው ምክንያቱም የቤተክርሰቲያን የሆነውን ሁሉንም ነገር ሸጠው ጨርሰዋል መሬት ምዕመን ጥንታውያን ጽላቶች የአቡነ ሚካኤልን የእጅ የወርቅ መስቀል ሌላው ተዘርዝሮም አያልቅም ይሄንን አይታችሁ ተስፋ የቆረጣችሁ እንዳትዘናጉ አሁን በቅርብ ለማወቅ እንደተቻለ ከአህዛብና ከመናፍቃን ይሄ ነው የማይባል ገንዘብ በመውሰድ ህዝቡን በመሸጥ ላይ ነው ያሉት፡፡

ሌለው በጣም የሚገርመውና የሚያሳዝነው ከኢሉባቦር ምድር ወጥተው አዲሰ አበባ ላይ እንደ አንበሳ ለሚያገሱት መ/ር ምህረተአብ አሰፋና መሰሎቻቸው ትልቅ ትዕዝብት ውስጥ የመከታቸው ይመስለኛል፡፡

የሚመለከተው ክፍል ያስብበት ጳጳሱ አቡነ ፊሊጶስም ታግለው ታግለው ብያቅታቸው አ.አ ገብተዋል፡፡ምክንያቱም በአሁኑ ሰዓት የኢሉባቦር ሀገረ ስብከት ውስጥ የሚሰሩ ከስራ አሰኪያጁ ጀምሮ ያሉት በስጋ የተሳሰሩ ናቸው፡፡ ይህንን ሰንሰለት ለመበጣጠስና አሁን ትንሽ የቀሩትን ምዕመናን በዕመነት ለማቆየት ቤተ ክህነትና ባለድርሻ አካላት አዲስ አዲስ ጳጳስ ያስፈልጋታል ካልሆነም ለተልኮ ለተልዕኮ ለጅማ ሀ/ስ/ሊ/ጳጳስ ለሆኑት ለአቡነ እሰጢፋኖስ ተደርቦ ቢሰጣቸው እንጂ ምንም መፍትሔ ይመጣል ብላችሁ አትገምቱ፡፡

ቤተክህነት ከዚህ አንጻር ትልቅ ና ግዜ የማይሰጥ የቤት ስራ በዚህ ጥቂት ቀናትና ወራት ውሰጥ የሚጠብቃት ነገር አለ ቢባል ይሄ መጀመርያው ይሆናል፡፡

በመጨረሻ ለኢ/ኦ/ተ/ቤ/ክ ምዕመናን ቆም ብለን እናስብ ግለሰቦች ማሕበራት አፈንጋጮች ታዛዦች ከፋፋዮች ለአንድነት ጣሪዎች በሁለት ጎራ ተከፍለን ላለን በሙሉ የግላችንን ስሜትና ማንአለብኝነትን ትተን በንስሃ ተመልሰን ጥፋታችንን አምነን የእግዚአብሔርና የቤተክርስቲያን ደጋፊዎች ሆነን በአንድነት ዘንድሮን መቆም ካልቻልን እየጠፋን ነው እነዳንጠፋም ከፍተኛ ስጋት ና እውነታ አለ ገና ከጥዋቱ መስከረም ሳያልቅ በቤ/ክ ላይ የተጀመረውን የምታዩ ይመስለኛል፡፡
አደራ አደራ አደራ የግል ክብር ዝና ይቅር እግዚአብሔር ማስተዋሉን ያድለን፡፡

ለኢሉባቦር ሀገረ ስብከት ግን አፋጣኝ መፍትሔ፡፡ እስቲ በ37 ዓመት እንካን ቤ/ክ ና ምዕመናን ትንሽ እንዲያንሰራሩ አዲስ አዲስ ጳጳስና አዲስ አሰተዳዳር ቢመደብ ምክንያቱም በፊት ምንም አልነበረም አሁንም ምንም የለም፡፡

በመላው ዓለም ተሰራጭታችሁ ያላችሁ የቤተክርሰቲያን ልጆች በሙሉ የኢሉባቦርን ሀ/ሰብከት በጸሎት አስባት ተወላጆችም ድምጻችሁን አሰሙ ፡፡

ለደጀሰላም ከፍተኛ ምስጋና እያቀረብን ለዚህ አዲስ አምት በmp3 የዲ.ዳንኤል ክብረትን ለጥፋት የታዘዘች ከተማ ስብከትን ድህረገጻችሁ ላይ ብታስቀምጡና ሁሉም ምዕመን ቢያዳምጠው መልካም ነው፡፡

Anonymous said...

Frankly speaking, the report is still too long for me. I cannot finish it. But there are people who have time and patience to read a report like this which is full of redendent sentences and paragraphs and in effect tooooo long. So go on, sorry.

frew said...

addis abeban yachenanekut sebaki tebiyeowchu bitebaberus?

Anonymous said...

መንግስት ከባለፈዉ ተምሮ በዚያ አካባቢ ያለዉን የአክራሪዋችን እንቅስቃሴ መቅደም ቻለ ወይስ እንደባለፈዉ ወገኖቻችን ከለቁ በሃላ ሊደርስ ነዉ?

የፌረራል መንግስት እንዴት እያየዉ ነዉ?

Ze Agame said...

Government Leaders have you committed for the five year Development and Transformation plan? So keep alive your sitizens for achevment of the plan

Anonymous said...

ማንም ካንሰር በአስፕሪን ለማዳን ቢሞክር ከቀልድና ፌዝ ይቆጠርበታል፡፡ የኢትዮያ ቤተክርስቲያን ጥቃት ባለፉት 20 ዓመታት በዘለቄታዊነት መፍትሄ አልተሰጠዉም፡፡ ፖሊስ መላክና ለጊዜው ነፍስ ማዳን ትልቅ ተግባር ነው፡፡ ነገር ግን ሕጋዊ፣ ባህላዊ፣ ሕገመንግስታዊና ተቋማዊ መፍትሄ ካልተሰጠው በበደኖ፣ በሙጢ፣ በቀቀሊ፣ በቆሬ፣ በወተር፣ በአርባ ጉጉ፣ በጂማ አካባቢ፣ በቤንች ማጂ፣ በጎዴና ጂጂጋ፣ በዓለማያ አካባቢ፣ ወዘተ ሲፈፀሙ የነበሩ ግድያዎች፣ ከኢኮኖሚ ክርስቲያኖችን ማፈናቀል፣ ልጆቻቸውን አስገድዶ ማስለምና ማግባት፣ በአስተዳደርና በፀጥታ ስራ እንዳይሰማሩ በዘዴ ማግለል፣ ወዘተ ይቀጥላል፡፡

አረብነትን ከእስልምናን፤ የዜግነት መብቶችን ወሰንና ሃይመኛኖታዊ ምግባርን የማይለዩ በሳተላይት ቲቪና በየስርቻው በተቋቋሙ መድረሳዎች ጥላቻ የሚጠመቁ ወጣቶችን፣ በየከተማው የስፖርት ቤቶች ለወደፊቱ የጂሀድ አዋጅ እንዘጋጀለን የሚሉ ሕጻናትን በቅጡ ጠብቆ ማሳደግ እስካልተቻለ ድረስ ይህ ካንሰር ይቀጥላል፡ ይብሳል፣ ይገድለናልም፡፡

የሀይማኖት አባቶችና መንግሥት ግጭት በተፈጠረ ቁጥር ለፖለቲካ ትርፍ ብቻ ከሚሯሯጥ በቂና ሰፊአኘ እውነተኛና ግልጽ፣ ከስሜት ርቆ በመርህና እውቀት ላይ የተመሰረተ ውይይት የሚደረግበትን መድረክ መፍጠር ይገባዋል፡፡ ከዚህ በፊት የተከናወኑትን ጭፍጨፋዎች ሁሉ በግልፅ በፍትህ መዳኘት ይጠበቅበታል፡፡ ፖሊስ አስፕሪን እንጂ የቀዶ ጥገና ሀኪም አይደለም፡፡

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)