August 26, 2010

አቤቱ እንድናስተውል እርዳን

(Kiduse wwek)ከጊዜ ወደ ጊዜ የቤተክርስቲያን ፈተና እያየለ መምጣቱ ግልፅ ነው ፡፡ ከዚህ አንጻር ከእኛ የሚጠበቀውንና መፍትሔ ይሆናሉ ያልኳቸውን ጽፌላችኋለሁ፡፡ ጠቃሚ ነው ካላችሁ የጠመመውን አቅንታችሁ የተሳሳተውን አርማችሁ ለንባብ አብቋት ፡፡1ኛ. ወንጀል ሲፈጸም እያዩ ዝም ማለት እንኳን በፈጣሪ ዘንድ በምድራዊ መንግስትም ዘንድ ስለሚያስጠይቅ በሰበካ ጉባኤ ፣በህንጻ አሰሪ ኮሚቴ ፣በሰ/ት/ቤት በማኅበራት ውስጥ የምናገለግል ሁሉ የነቃ ተሳትፎ ማድረግና ለሙስናና ለፈተና የማያጋልጥ አሰራር መስራት አለብን፡፡ ከዚህ ባለፈ የሚሰሩትን ወንጀሎች ትክክለኛ መረጃ በማሰባሰብ ማጋለጥ ይጠበቅብናል፡፡

2ኛ. በየደረጃው የተሾማችሁ የቤተክርስቲያኗ ሀላፊዎች ቢቻል በምድርም በሰማይም የሚቀጣውን ፈጣሪ በመፍራት አይ ካላችሁም ህገ መንግስቱን በማክበር የህዝቡን ጩኸት እንድትሰሙ ለትውልድ የሚተርፍ ስራ ሰርታችሁ እንድታልፉ በእግዚአብሔር ርህራሄ እንለምናችኋለን፡፡
በዚህ አጋጣሚ ከደሞዛቸው እየቀነሱ ቤተክርስቲያንን የሚያሳንፁ እነሱ ሳይበሉ ደሃ የሚመግቡ ከራሳቸው ይልቅ ስለመንጋው የሚኖሩ ለስጋቸው ሳይሆን ለነፍሳቸው ያደሩ እረኞች ፣እንደዘመኑ የመርካቶ ቆብና የዘመድ ስልጣን ሳይሆን በድካምና በትምህርት የተሾሙ አገልጋዮች፣በምትሃት ሳይሆን በፀጋ እግዚአብሔር አጋንንት የሚታዘዙላቸው ካህናት ፣እንደ ቅዱስ እስጢፋኖስ ጣታቸውን ማብራት ባይችሉም ከእውነተኛ የቤተክርስቲያኗ ምንጭ ቀድተው በትምህርታቸው ነፍስን የሚያረኩ ዲያቆናት እንዳሉ ማወቅ ልብ ይሏል፡፡
3ኛ. መንግስት ምእመኑ በማስረጃ የተደገፈ ክስ ሲያቀርብ ተገቢ እርምጃ መውሰድ ይጠበቅበታል፡፡ መቼም መንግስት እንዲህ አይነት እምነት ተከታይ ይሁን ብለን ለመናገር ያለንበት ዘመን አስቸጋሪ ቢሆንም ፍርድ ሲጓደል ደሃ ሲበደል ዝም የሚል መንግስት ግን በእግዚአብሔር እንደሚቀጣ ሳንፈራ በድፍረት ሳናፍር በእውነት እንናገራለን፡፡ መፅሐፍ ቅዱስ እንኳን ባናነብ የቅርብ ጊዜ ትዝታ በመሆኑ ማስረጃ የሚጠይቅ አይመስለኝም፡፡
4ኛ. በተቀደሰው ስፍራ ርኩሰት ሲፈጸም አንባቢው ያስተውል፡፡ ከዚህም የበለጠ ርኩሰት ብናይ ፤ቢሰራ ከእምነታችን ንቅንቅ አንበል፡፡ ሚስማር እኮ ሲመቱት ይጠብቃል፡፡ ደግሞ ትንቢቱ እንዴት ይፈጸም ?
5ኛ. ይህ ሁሉ በቤተክርስቲያን ሲፈፀም ሆዴ ከሞላ ደረቴ ከቀላ ብለን ዝም ያልን አገልጋዮችም ሆንን የኔ ቢጤ ምእመናን ይህ የጨለማው ጊዜ ሲያልፍ ብርሃኑን እንደማናይ መገንዘብ ተገቢ ነው፡፡
6ኛ. የመምከር የማስተማር ጸጋ የተሰጠን ባገኘነው አጋጣሚ ሁሉ እውነትን እንናገር ፡፡ ምእመኑ ተስፋ እንዳይቆርጥ ፈጣሪውን ብቻ ተስፋ እንዲያደርግ እንምከር፡፡
7ኛ. ምዕመናን የቤተክርስቲያናችንን ዶግማ ስርዓትና ትውፊት ጠንቅቀን እንወቅ፡፡ አርአያ የሆነንን ፈጣሪ ፤ መስቀሉን ድንግል ማርያምን ቅዱሳኑንና የፀኑትን ብቻ እንመልከት፡፡ ለሰው መልካም አድርጉ ተባለ እንጂ ሰው ጥሩ ያድርግላችሁ አልተባልንም፡፡ ከሰው ምንም አንጠብቅ / Expectation = 0/
8ኛ. በቅድስና ህይወት የምትመላለሱ በተለይም ሁሉን እያወቃችሁ እንዳላወቀ እያላችሁ እንደሌላችሁ ራሳችሁን ዝቅ ያደረጋችሁ አባቶች እናቶች ወንድሞች እህቶች ስለቤተክርስቲያን ፀልዩ አልቅሱ ፡፡ ለኛም ለምንቅበዘበዘው ፣መንገዱ ለጠፋን ፣በማናውቀው ለምንፈርደው ፣ለምንሰርቀው ፣ሰዎችን ለምናየው ከመንገዱ ፈቀቅ ላልን ሁሉ ፀልዩልን አልቅሱልን፡፡
በአጠቃላይ ሁላችንም በድለናል የእግዚአብሔርም ክብር ጎሎናል ወደ እርሱ እንመለስ፡፡ የንስሐ ጊዜ ተሰጥቶናል እንጠቀምበት፡፡
ወስብሐት ለእግዚእ አጋእዝት፡፡
Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)