May 12, 2010

የሃይማኖት መሪዎች ምርጫውን በማስመልከት ፓርቲዎችን ሊያነጋግሩ ነው

- ፓርቲዎቹ የተለያዩ አስተያየቶች ሰጥተዋል፤
(ሪፖርተር ጋዜጣ) :- የሃይማኖት መሪዎች የ2002 ምርጫን አስመልክቶ የፖለቲካ ፓርቲዎችን ነገ በምርጫ ቦርድ ጽሕፈት ቤት እንደሚያነጋግሯቸው ታወቀ፡፡

የሃይማኖት አባቶች ምርጫውን ሰላማዊ ለማድረግ ከፖለቲካ ፓርቲዎች ጋር የሚነጋገሩ ሲሆን፤ የኦርቶዶክስ፣ የካቶሊክ፣ የፕሮቴስታንትና የእስልምና እምነት መሪዎች መሆናቸው ታውቋል፡፡ 

የሃይማኖት መሪዎች የጠሩትን ስብሰባ አስመልክተን ያነጋገርናቸው የፖለቲካ ፓርቲዎቹ የተለያየ አስተያየት ሰንዝረዋል፡፡(Pictures: Courtesy of Addis Fortune).

የመላው ኢትዮጵያ ዴሞክራሲ ፓርቲ (መኢዴፓ) ሊቀመንበር አቶ ዘለሌ ፀጋ ሥላሴ እንደሚሉት፤ "የሃይማኖት አባቶች እኛን ከመሰብሰባቸው በፊት የፖለቲካ እስረኞችን አስፈትተው መምጣት አለባቸው፡፡
ባይሆን ወ/ሪት ብርቱካን ሚደቅሳን አስፈትተው ይዘው መምጣት አለባቸው፡፡ ሰው በየሜዳው ላይ እየሞተ፣ እጅግ በጣም የከፉ ችግሮች እያሉ፤ የእኛ ኃይማኖት አባቶች አሁን ምርጫው በኢሕአዴግ በደልና ጭቆና ሲጠናቀቅ፣ ቡራኬ ማምጣታቸው ተገቢ አይደለም የሚል አቋም አለን" ብለዋል፡፡

አቶ ዘለሌ እንደሚሉት፣ ስብሰባው ላይ የሃይማኖት አባቶች ቢያንስ ብርቱካንን ይዘው መምጣት አለባቸው፡፡ ይሄንን ካላደረጉ ግን በጠሩት ስብሰባ ላይ ለመገኘት ፓርቲያቸው ፈቃደኛ እንዳልሆነ በመግለጽ፣ "አድበስብሶ ለማለፍ ቡራኬ አንቀበልም" ሲሉ ገልጸዋል፡፡

የኢትዮጵያ ራዕይ ፓርቲ (ኢራፓ) ምክትል ሊቀመንበር አቶ አስፋው ጌታቸው በበኩላቸው፤ "ምርጫውን ሰላማዊ ለማድረግ ሁላችንም መቻቻል አለብን፡፡ ምርጫው በሰላም እንዲያልፍ ሁላችንም የጥረቱ አካል እስከሆንን ድረስ ወደ ኋላ የምንልበት ምንም ምክንያት የለም፡፡ ሌላ ተልዕኮ እስከሌለው ድረስ" ብለዋል፡፡

አቶ አሰፋ "ሁላችንም ዕምነት ያለን ሰዎች ነን፡፡ አንዳንድ ጌዜም እኮ ሞራላዊም ሆኑ መንፈሳዊ ነገሮች ያስፈልጋሉ የሚል ዕምነት አለን" ሲሉ ተናግረዋል፡፡

የቅንጅት ለአንድነትና ለዴሞክራሲ (ቅንጅት) ሊቀመንበር አቶ አየለ ጫሚሶ በበኩላቸው፤ የሀይማኖት አባቶች ዘግይተው ለሰላማዊ ጥሪ ከመጡ በሩ ክፍት ነው በማለት፣ "ትልቁ የምንፈልገው ነገር ምርጫው በሰላማዊ መንገድ እንዲጠናቀቅ ነው፡፡ በሕዝቡ ላይ የሚደርሰውን ጫና፣ ሁከትና ደም መፋሰስ እንዲሁም ሌሎች ሁኔታዎች እንዲፈጸሙ አንፈልግም፡፡" በዚህ ሁኔታ ምርጫው ሰላማዊ እንዲሆን፣ "የሃይማኖት አባቶች ከመጀመርያው ጠንክረው መቆም ሲገባቸው፣ ያንን ሳያደርጉ ዘግይተው በመጨረሻ ቢመጡም አይወቀሱም" ሲሉ አክለዋል፡፡ ትልቁ ነገር ዓላማው በማንኛውም ሰዓት ተፈጻሚ እንዲሆን ጥረት መደረጉ አግባብነት ስላለው አባቶች ያስተላለፉት ጥሪ ይደገፋል ብለዋል፡፡

አቶ አየለ፣ ቀደም ብሎ የምርጫ እንቅስቃሴ ሲጀመር የምርጫው መግቢያ አድርገው መዘጋጀት ነበረባቸው፡፡ የሃይማኖት አባቶች መጨረሻ ሰዓት ላይ መምጣታቸው የዘገየ አቀራረብ ቢሆንም እሰይ የሚያሰኝ እንጂ የሚያስወቅስ አይደለም ሲሉ አክለዋል፡፡

የመላው ኢትዮጵያ አንድነት ድርጅት (መኢአድ) የሕዝብ ግንኙነት ኃላፊ አቶ ያዕቆብ ልኬ እንደተናገሩት፤ "የሃይማኖት አባቶች እስካሁን ድረስ አልጠሩንም፣ የሰማሁት ነገር የለም፡፡ ወሬ ካልሆነ በስተቀር በጽሑፍ ጥሪ የተደረገልን ነገር የለም" ብለዋል፡፡

"በድርጅት ስም ጥሪ ሊደርሰን" ይገባል ያሉት ኃላፊው፣ ከዚህ አንጻር ምንም የደረሳቸው የጽሑፍ ጥሪ ስለሌለ በጥሪው ላይ አስተያየት መስጠት እንደማይፈልጉ ገልጸዋል፡፡

የኢትዮጵያ ፌዴራላዊ ዴሞክራሲያዊ አንድነት መድረክ አባልና ከፍተኛ አመራር ዶ/ር መረራ ጉዲና በበኩላቸው፤ "በ97 ምርጫ በሃይማኖት አባቶች ላይ ተስፋ ቆርጫለሁ፡፡ በ97ቱ ምርጫ ወቅት በጳጳሱ ቤት ሁሉም የሃይማኖት አባቶች በተገኙበት የኢትዮጵያን ሕዝብ አድኑ በሚል፣ የሃይማኖት አባትነታቸሁን ተወጡ በሚል ጠይቀናቸው ነበር፡፡ የአንዳንዶቹ መልስ እጅግ በጣም አሳዛኝ ነበር" ብለው "ወደ ምድራዊው ዓለም ያዳሉ ስለነበር የረዱን ነገር አልነበረም፡፡ ሕዝቡ ሲያልቅ ዝም ስላሉ፤ በእነሱ ላይ ተስፋ የማደርገው ነገር" የለም ብለዋል፡፡

ዶ/ር መረራ የመድረኩን ሐሳብ ሳይሆን የግላቸውን ሐሳብ መናገራቸውን ጠቁመው፣ ከካቶሊኩ ጳጳስ በስተቀር በሌሎቹ ሙሉ በሙሉ ተስፋ እንደቆረጡ ተናግረዋል፡፡

(በሰብለወንጌል ሀብታሙ)

6 comments:

Mahedere said...

On more time Dr. Merera showed his maturity. He is always known to be a man who speak his mind. And im many cases what he said hold water.
Good job Dr. Merara. Keep it up.

selamawi said...

በስመ ስላሴ አሃዱ አምላክ አሜን

ሁሉም የፖለቲካ ድርጅት ኃላፊዎች የተናገሩት አሳማኝ ነው የሆነው ሆኖ ግን ስለሰላም የሚቀርብን ማንኛውንም ጥያቄ በቅድመ ሁኔታ መዝጋት አይገባም
የሃይማኖት አባቶችም ቢሆኑ በመንግስት በኩል ድጋፍ እየተደረገላቸው የሚኖሩ እንጅ በሕብረተሰቡ ፍላጎት የተመረጡ ስላይደሉ ለመረጣቸው ክፍል ታማኝ መሆን ስላለባቸው ይመስለኛል የመንግስትን ትእዛዝ የሚያከብሩት

ተቃዋሚዎች ሁልጊዜ ለመቃዎም ብቻ ከሚጥሩ ይልቅ እርስበእርሳቸው ተስማምተው ለኢትዮጵያ ህዝብ ራእይ ሰንቀው ቢቀርቡ መልካም ይመስለኛል
በተለይ በውጭው ዓለም ኖረናል የሚሉት ምሁራን ከውጭው ዓለም ተመክሮን ቀስመው ለሃገራቸው መጥቀም ነበረባቸው እነርሱ ግን በተቃራኒው የኢትዮጵያን ሕዝብ የሕልም እንጀራ አሳይተው ለስልጣን ሲራኮቱ ሕዝብ ተስፋ ቆርጧል

ተስፋን የሚቀጥል አምላክ ለኃገራችን ለኢትዮጵያ በጎ መሪ ይላክላት

ወልደ መድህን

Anonymous said...

DR. Merara what a nature this guy is born to be A complainer .
What ever has done in the country for him it is valuless what A PESIMIST.

Anonymous said...

ሰላምን የሚጠላ ከሰላም አምላክ የተለየዉ ክፉ መንፈስ ያደረበት ነዉና ለሰላም የሚጠሩ ጉባኤዎች ሁሉ በሰላም ወዳዶች ይደገፋሉ። ነገር ግን ከበስተኋላቸዉ ጅራት ከሌላቸዉ ብቻ ነዉ ይህ እዉነት የሚሆነዉ። የተከበሩ ዶክተር መረራ ቢጠራጠሩና በእዉነት የተሰማቸዉን ሳይሸፋፍኑ በመናገራቸዉ አከብራቸዋለሁ። ሃሳባቸዉን እጋራለሁና። የሃይማኖት አባቶች ምድራዊ ስላጣን የማያሳሳቸዉና የማያስፈራራቸዉ እንዲሆኑ ተስፋ ይደረጋል። ያ በእኛ ዘንድ ስላልታየ የፖለቲካዉ ሰዉ ከሃይማኖት ሰዎቹ ይልቅ በሞራል ልቀዉ ነዉ ይህን ያሉ። ከሃይማኖት አባቶች የሚጠበቀዉን ፍሬ በዘመናችን ማየት ባለመቻላችን ሁላችንም አንገታችንን እንደደፋን ሊታወቅ ይገባል።

በሰላም ስም የሚሰራ ስዉር ደባን ብንጠረጥር፤ ማንስ ያማናል? ማንስ ይወቅሰናል? እባብን ያየ በልጥ በረየ ይሉ የለም አበዉ?! ልባችን እየደማ፤ ዉስጣችን እያለቀሰ፤ በሞራል የጠነከሩ ፈሪሃ እግዚአብሔር ያደረባቸዉ የሃይማኖት አባቶችን ለማየት በጸሎት እንበርታ። ይህ ጥሪም ለበጎ ፍፃሜ እንዲዉል ምኞታችንን እንግለፅ። ግን ኦ ሶላም በስምሽ ስንት ግፍ ተሰራ?!!! የምንልበት ድርጊት ሲፈፀም እንዳናይ የፈጣሪያችን ፀጋ አይለየን።

ያቺ ምድር እኮ የማንም አይደለችም፤ የሰማይና ምድር ገዢ የልዑል እግዚአብሔር እንጂ!

ቸር ወሬ ያሰማን አቦ!
ኢትዮጵያዊት

Anonymous said...

ኢትዮጵያዊውን የቶም እና ጄሪ ፊልም ከቁጥር አንድ ጀምራችሁ የምትተውኑ የፖለቲካ ቶም እና ጄሪዎች ጠቅላይ ሚኒስትራችን እንዳሉት በቃን ብትሉ ምናለ? ቢያንስ ለአፋችሁ ያህል፡፡ ሀገሪቱ 1960ዎቹን ለቅቃ ወደ ሃያኛው ክፍለ ዘመን ትገባ ዘንድ ብትረዷት ምናለ፤ በአንድ ወቅት በአንድም በሌላም መልኩ የቶም እና ጄሪን ፊልም የጀመራችሁ ተዋንያን፣ እባካችሁ ሌላ ፊልም እንይበት፡፡ የመነካከስ እና የመበላላት፣ የማያቋርጥ ቅንቃኔ እና ጠላትነት ተከታታይ ፊልም ሰልችቶናል፡፡

weybla said...

Dr Merara is a matured person he speak real thing. Especially 1997 mircha lay yetenagerewu betam betam tikikil newu. Any ways Melkam Zemen Le Ethiopia

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)