እንኳን ለ“ዳግማዊ ትንሣኤ”ው ዋዜማ በደህና አደረሳችሁ

(ደጀ ሰላም፤ ኤፕሪል 9/2010)፦ ውድ ደጀ ሰላማውያን፤ እንኳን ለዳግማዊ ትንሣኤው ዋዜማ በደህና አደረሳችሁ። ትንሣኤ በተለይም በእኛ በኦርቶዶክሳውያን ዘንድ በታላቅ ሁኔታ ነው የሚከበረው። ምዕራባውያን ግን ወደ ልደት (Christmas) ያደላሉ። የምሥራቅ ክርስቲያኖች (እኛ ኦሪየንታሎቹም ሆን ግሪኮቹ) ወደ ትንሣኤው አከባበር የበለጠ እናደላለን። ምክንያት? የክርስትና እምነት ከሌላው የምትለየው ሞትንና በመቃብር መበስበስን (ሙስና መቃብር) ደምስሶ በተነሣው ወልደ አብ ወልደ ማርያም የተመሰረተች ስለሆነች ነው። በበረት የተወለደው፣ በባሕረ ዮርዳኖስ የተጠመቀው፣ በደብረ ታቦር ብርሃነ መለኮቱን የገለጸው ጌታ እኩዮች አይሁድ እንደሰቀሉት ሞቶ ቢቀር ኖሮ የክርስትና ሃይማኖት ስም አጠራሩ በጠፋ ነበር።

በዓለም ላይ ሌሎች ብዙ እምነቶች በተለያዩ ሰዎች ተመሥርተዋል። የሁሉም መሥራቾች በመቃብር በስብሰው ቀርተዋል። በፍጡር የተጀመረ እምነት፣ በመቃብር ተዘግቶ ይቀራል። ሰው በሆነው በወልደ እግዚአብሔር በክርስቶስ ደም የተመሠረተችው እምነት ግን የትንሣኤ አዋጅ እያወጀች፣ ፈጣሪዋ ሞትንና በመቃብር መበስበስን ድል እንደነሣ እያስተማረች ትኖራለች። የዚህች እምነት ልጆች በመሆናችን፣ የትንሣኤ ተስፋ ስላለን ደስ ይበለን። አሜን