December 18, 2009

የምድረ ከብድ ገዳማውያን የስንዴ ክምር ተቃጠለ

(ስምዐ ጽድቅ ጋዜጣ, በኢዮብ ሥዩም):- በጉራጌ ሀገረ ስብከት በሶዶ ወረዳ ቡኢ ከተማ አቅራቢያ የሚገኘው የምድረ ከብድ አቡነ ገብረመንፈስ ቅዱስ ገዳም የስንዴ ክምር መንሥኤው ባልታወቀ ምክንያት በእሳት መቃጠሉን የሀገረ ስብከቱ ሊቀ ጳጳስ አስታወቁ፡፡ የጉራጌ፣ ሀድያና ስልጢ አህጉረ ስብከት ሊቀጳጳስ ብፁዕ አቡነ መልከጼዴቅ ለስምዐ ጽድቅ ጋዜጣ እን ደተናገሩት፤ ኅዳር 20ቀን 2002 ዓ.ም ሌሊት ለገዳማውያኑ የዓመት ቀለብ የሚሆን የስንዴ ክምር ባልታወቀ ምክንያት ተቃጥሏል፡፡

ጉዳዩን ለወረዳው ፖሊስና የመንግሥት አካላት ሪፖርት አድረገናል ያሉት ሊቀጳጳሱ፤ በአካባቢው ዕድሜ ጠገብና አንጋፋ በሆነው በዚህ ገዳም በደረሰው ቃጠሎ ማዘናቸውን ጠቁመው፤ ሀገረስብከቱ ከተባባሪ ምእመናን ጋር በመሆን የገዳሙን ችግር ለማቃለል የበኩሉን እንደሚወጣ አስረድተዋል፡፡

ገዳሙ የደረሰበትን ድንገተኛ ችግር ለመወጣት ሀገረ ስብከቱ የሚያደርገውን እንቅስቃሴ ሕዝበ ክርስቲያኑ እንዲያግዝም ጥሪ አቀርበዋል፡፡

የገዳሙ ገበዝና መጋቢ አባ ኃይለማርያም እንደተናገሩት፤ ኅዳር 20 ቀን 2002 ዓ.ም ለ21 አጥቢያ ከሌሊቱ ስድስት ሰዓት አካባቢ ባልታወቀ ምክንያት የገዳማውያኑ እህል በሙሉ በቃጠሎ መውደሙን ገልጸው፤ እህሉን ከእርሻው ላይ ለመሰብሰብ ሦስት ቀን እንደፈጀና የተቃጠለው አምስት መቶ ኩንታል የሚገመት የስንዴ ክምር እንደሆነ አስታውቀዋል፡፡

መንስኤው ባልታወቀ ምክንያት በእሳት የወደመው እህል ለገዳማውያኑ የዓመት ቀለብ ነበር የሚሉት መጋቢ አባ ኃይለማርያም፤ በአደጋው የተነሣም በገዳሙ ከፍተኛ የሆነ የእህል እጥረት ሊከሰት እንደሚችል ጠቁመዋል፡፡

የሶዶ ወረዳ ቤተክህነት ሥራ አስኪያጅ ሊቀካህናት ጌቱ አበበ በበኩላቸው፤ በገዳሙ ስለተከሰተው ቃጠሎ ሪፖርት መደረጉንና ወረዳውም ለሚመለከታቸው የመንግሥት አካላት ማሳወቁን ጠቅሰው፤ መረጃው የደረሳቸው የወረዳው ፖሊስ አባላትም በቦታው በመገኘት ሁኔታውን ተመልክተው ወንጀል ፈጻሚዎቹን በቁጥጥር ሥር ለማዋል በጥረት ላይ እንደሚገኙም አስረድተዋል፡፡

የሶዶ ወረዳ ፖሊስ ሓላፊ ኮማንደር ጉግሣ ቡሪሳ ጉዳዩን አስመልክተው እንደተናገሩት፣ ፖሊስ አደጋው በተከሰተ ማግስት በቦታው ተገኝቶ የአደጋውን መንሥኤ ለማወቅ መረጃ እየሰበሰበ እንደሚገኝ ገልጸዋል፡፡ መረጃው እንደደረሰው ከአካባቢውና ከገዳሙ ማኅበረሰብ ጋር በመተባበርም በቅርቡም ወንጀለኞቹን ይዘን ለሕግ እናቀርባለን ሲሉም አስረድተዋል፡፡ በገዳሙ ከ120 በላይ መናኒያን እንዳሉ ለማወቅ ተችሏል፡፡

ወስብሐት ለእግዚአብሔር

Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)