April 15, 2008

ኢትዮጵያና የኮፕቲክ ኦርቶዶክ አብያተ-ክርስቲያናት ወደ አዲስ የወዳጅነት ዘመን እየተሸጋገሩ ነው

አዲስ አበባ, ሚያዝያ 6 ቀን 2000 (ENA) - የኢትዮጵያና የኮፕቲክ ኦርቶዶክ ቤተ-ክርስቲያናት በአዲስ የትብብር መንፈስ ወደ አዲስ የወዳጅነት ዘመን እየተሸጋገሩ ነው ሲሉ የቤተ-ክርስቲያናቱ መሪዎች አዲስ አበባ ውስጥ አስታወቁ።
መሪዎቹ በ 1986 የተደረሰውን ስምምነት ተግባራዊ ለማድረግ የሚያስችል ሰነድም ተፈራርመዋል።
ከፊርማው በኋላ የኢትዮጵያ ኦርቶዶክስ ተዋህዶ ፓትሪያርክ ብፁዕ ወቅዱስ አቡነ ጳውሎስና የኮፕቲክ ኦርቶዶክስ ፓትሪያክ አቡነ ሺኖዳ ሳልሳዊ ለጋዜጠኞች ሲናገሩ ቤተ-ክርስቲያናቱ በጋራ ለመስራት ወደሚያስችላቸው አዲስ የትብብር ዘመን እያመሩ ነው።

ብፁዕ አቡነ ጳውሎስ እንደገለፁት የፓትሪያርክ ሺኖዳ የኢትዮጵያ ጉብኝትም ሆነ የጋራ ሰነዱ መፈረም ከሁለቱ ቤተክርስቲያናት ግንኙነት ያለፈ ጥቅም አለው።

ስምምነቱ ለማንኛውም ሰላማዊ ግንኙነት ዐቢይ ምሳሌ መሆን ይችላል፣ ከሰላም ውጭ ላለ ማንኛውም አካልም ጥሩ መመሪያ ሊሆን ይችላል ብለዋል።

በተለይ በዚህ ሰላም በእጅጉ በሚያስፈልግበት በ 21ኛው ክፍለ ዘመን በአንድ የእምነት ቤተሰብ ያሉ አካላት መካከል የሚደረስ እንዲህ ያለ ስምምነት ጠቀሜታው የጎላ ነው ሲሉ ብፁዕ ወቅዱስ አቡነ ጳውሎስ ተናግረዋል።

አቡነ ሺኖዳ ሳልሳዊ በበኩላቸው በተለይ በቀጣይ ዓመታት የሁለቱ ቤተ-ክርስቲያናት ግንኙነት በተለያየ መስክ እንደሚቀጥል ተናግረው በመንፈሳዊ ትምህርት ዘርፍ ቤተክርስቲያናቸው ከቅድስት ሥላሴ መንፈሳዊ ኮሌጅ ጋር በትብብር ለመስራት እቅድ ይዛለች ብለዋል።

እንዲሁም በውጭ በሚኖሩ የቤተክርስቲያናቱ ምዕመናን መካከል ያለውን ግንኙነት ለማጠናከር የኮፕቲክ ኦርቶዶክስም ሆነች የኢትዮጵያ ኦርቶዶክስ ተዋህዶ ቤተክርስቲያን አብረው እንደሚሰሩ አቡነ ሺኖዳ ተናግረዋል።

በቅዱስ ሲኖዶስ በተካሄደ ስነስርዓት የተፈረመው ይህ ስምምነት በ1986 በሁለቱ ቤተክርስቲያናት መካከል የተደረሰ ስምምነትን ተግባራዊ ለማድረግ ያለመ ሲሆን ባለ 6 ገፁ ሰነድ በ 15 አንቀጾች የተከፋፈለ ነው።

የኢትዮጵያና የኮፕቲክ ኦርቶዶክ ቤተ-ክርስቲያናት ከጥንታዊ ዘመነ-ክርስት ጀምሮ የጠበቀ ግንኙነት እንዳላቸው የሚያትተው ይህ ሰነድ የኢትዮጵያ ኦርቶዶክስ ተዋህዶ ቤተክርስቲያን ራሷን የቻለች ነፃ ቤተክርስቲያን መሆኗን ያውጃል።

እንዲሁም ሁሉቱም ቤተክርስቲያናት አንድ ዓይነት የኦርቶኮክስ እምነት በማራመድና ራሳቸውን ያቻሉ ነፃ አካላት በመሆን እስክንድሪያ ባለው መንበረ ማርቆስ ስር መሆናቸውን ሰነዱ ይናገራል።

በ 300 ዓ.ም ገደማ ጠንካራ ግንኙነት የጀመሩት ቤተክርስቲያናቱ በተለይ የመጀመሪያው የኢትዮጵያ ጳጳስ አቡነ ሰላማ በኮፕቲክ ፓትሪያርክ አባ አትናቴዎስ የኢትዮጵያ ጳጳስ ሆነው በተሾሙበት የአብርሃና አፅብሃ ዘመነ መንግስት ግንኙነታቸውን ተጠናክሮ ቀጥሎ ነበር።

ለሶስት ቀናት በአዲስ አበባ ጉብኝት ያደረጉት ብፁዕ ወቅዱስ አቡነ ሺኖዳ ሳልሳዊ ፕሬዚዳንት ግርማንና ጠቅላይ ሚኒስትር መለስ ጨምሮ በርካታ የመንግስትና የቤተክህነት ባለስልጣናትን አነጋግረዋል።
Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)