March 23, 2008

በዝቋላ ገዳም ዙሪያ የደን ቃጠሎ ደረሰ

Sunday, 23 March 2008
በምሥራቅ ሸዋ ዞን በአዱላላ ወረዳ በሚገኘው የዝቋላ አቡነ ገብረመንፈስ ቅዱስ ገዳም ዙሪያ ባለው ደን ላይ መጋቢት 10 ቀን 2000 ዓ.ም በተነሳ የእሳት ቃጠሎ ግምቱ ያልታወቀ ደን ተቃጠለ፡፡

በአዲስ አበባ ከ70 ኪሎ ሜትር በላይ ርቀት ላይ የሚገኘው በዚሁ ገዳም ላይ የተነሳው የእሳት ቃጠሎ በአየር ኃይል አባላት፣ በኦሮሚያ ክልል ፈጥኖ ደራሽ ፖሊስና በአካባቢው ሕዝብ ትብብር በቁጥጥር ስር ለማዋል መቻሉን በቦታው የተገኙ የአይን እማኞች ለሪፖርተር ጋዜጣ ገልጸዋል፡፡

አደጋው በደረሰበት ገዳም ተገኝተው የነበሩት ዋና ሳጅን ታደሰ መራራ ስለጉዳዩ ተጠይቀው በሰጡት ምላሽ፤ "በገዳሙ አካባቢ የእሳት ቃጠሎ መነሻው በውል ባይታወቅም እሳቱ በተነሳበት ወቅት በአካባቢው የሲጋራ መለኮሻ (ላይተር) የያዙ ሰዎች በመገኘታቸው፣ የአደጋው መንስኤ ከእነሱ ጋር የተያያዘ ሊሆን ይችላል የሚል ግምት ስላደረብን በቁጥጥር ሥር አውለን በማጣራት ላይ ነን" ማለታቸውን የዓይን እማኞች ገልጸዋል፡፡

የቃጠሎውን አደጋ መነሻ በማድረግ ሌላ ወንጀል እንዳይፈጸም ፖሊስ ከፍተኛ ክትትልና ቁጥጥር እያደረገ መሆኑን የገለጹት የዓይን እማኞቹ፣ በገዳሙ ዙሪያ ተነስቶ የነበረውን የእሳት ቃጠሎ ለመቆጣጠር የተደረገውን ጥረት አስቸጋሪ ያደረገው ወደ ገዳሙ የሚሄደው መንገድ አስቸጋሪና የተበላሸ መሆኑንም ተናግረዋል፡፡

የደረሰውን የእሳት አደጋ ለመቆጣጠር ከ200 በላይ የሀገር መከላከያ ሠራዊት መሰማራታቸውን፣ ቃጠሎው ያደረሰውን ጉዳት ለመመልከት፣ መነኮሳቱንና የአካባቢውን ነዋሪዎች ለማረጋጋት ብፁዕ ወቅዱስ አቡነ ጳውሎስን ጨምሮ አሥር ሊቃነ ጳጳሳት በቦታው መገኘታቸውን ተናግረዋል፡፡

ቅዱስ ፓትሪያርኩ ቃጠሎውን በሄሊኮፕተር ተዘዋውረው ከተመለከቱ በኋላ ባደረጉት ንግግር፣ ለአገርና ለዓለም ሰላም የሚፀልዩ አባቶች በሚገኙበት በገዳሙ ዙሪያ መቀጣጠል ጀምሮ የነበረው እሳት እጅግ አስጊ እንደነበር ተናግረው፣ የሀገር መከላከያ ሠራዊትና አየር ኃይል ያበረከቱት አስተዋጽኦ የሚደነቅ መሆኑን መናገራቸውን የዓይን እማኞቹ ገልጸዋል፡፡

የዝቋላ አቡነ ገብረመንፈስ ቅዱስ ገዳም አበምኔት መምህር ገብረመድህን አፈወርቅ በበኩላቸው እንደተናገሩት "ለእሳቱ መነሻ እንጨት የሚቆርጡና ከሰል የሚያከስሉ ሰዎች ናቸው የሚል ግምት አለን፡፡ አሁንም የተዳፈነ እሳት ካለ በቁጥጥር ሥር ለማዋል በመጠባበቅ ላይ ነን" ማለታቸውን እማኞቹ ተናግረዋል፡፡

እሳቱ እስከ ትናንት በስቲያ ድረስ ሙሉ በሙሉ እንዳልጠፋ፣ አሁን ካለው ከፍተኛ የፀሐይ ሙቀት ጋር ተያይዞ ቃጠሎው ይባባሳል የሚል ፍራቻ እንዳለ፣ እንዲሁም በየረር አካባቢም አዲስ ቃጠሎ ተከስቶ መታየቱን አንዳንድ ምንጮች ገልጸው፣ መንግሥት በተለይ ትኩረት ሊያደርግባቸው የሚገባውን ቦታዎች ከወዲሁ ሊጠነቀቅላቸው እንደሚገባ ጠቁመዋል፡፡
Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)