November 16, 2006

ከሶማሊያ እስልምና ኃይሎች ጀርባ ያሉት እነማን ናቸው


ከሶማሊያ እስልምና ኃይሎች ጀርባ ያሉት እነማን ናቸው፡፡ ኢትዮጵያና የኢትዮጵያ ቤተ ክርስቲያን ላይስ የሚኖራቸው ተጽዕኖ ምን ይመስላል የሚለውን ወደፊት እንመስበታለን፡፡ የተ.መ.ድን ሪፖርት መጠነኛ ሐተታ ይመልከቱ፡፡

1. ግብፅ

12. የግብፅ መንግስት የሶማሊያን እስላማዊ ፍርድ ቤቶች ህብረት በመደገፍ በሚከተለው መልኩ የሥልጠና ድጋፍ እንዳደረገ ተቆጣጣሪው ቡድኑ መረጃ አግኝቷል፡፡ እኤአ ጁላይ 26፣ 2006 ሞቃዲሾ በሚገኘው የእስላማዊ ፍርድ ቤቶች ህብረት የፋይናንስ ሃላፊ አብዱልቃድር አቡካር ዑመር አዳኒ መኖሪያ ቤት የህብረቱ ባለሥልጣኖችና ከሊብያ፣ ግብፅና ኤርትራ የመጡ ከፍተኛ የጦር መኮንኖች ስብሰባ ተካሂዷል፡፡ ስብሰባውም የሚከተሉትን ውሳኔዎች አስተላልፏል፡፡ ከሞቃዲሾ በስተሰሜን ባላድ ከተማ አጠገብ በሚገኘው የሂልወይኔ ጦር ሰፈር ለ3,800 ተዋጊዎች ስልጠና ይሰጣል፤ ለዚህም ተግባር ግብፅና ኤርትራ አሰልጣኞች የሚሰጡ ሲሆን ፤ የሊቢያ መንግሰት ህንፃዎችንና ተቋማትን ለማሻሻል ለስልጠናና ለማነቃቂያ የሚያስፈልጉ ወጪዎችን ይሸፍናል፡፡ በስብሰባው ማግስትም የሊብያ፣ የኤርትራና የግብፅ ወታደራዊ መኮንኖች ከሼክ ዮሱፍ ኢንዶሃዴ፣ አደን ሃሺ ‘’ አይሮው’’፣ አብዱላሂ አሊ ኑር እና ሙክታር ሮቡዎ ‘’ አቡ መንሱር’’ ጋር በመሆን ሁኔታዎችን በመገምገም ለሥልጠና የሚሆን ሥፍራ ይለያሉ፡፡

13. እ.ኤ.አ ኦገስት 23፣ 2006 የፍርድ ቤቶቹ ህብረት የሂልወይኔን ወታደራዊ ማሰልጠኛ ካምፕ ከፍቶ የመጀመሪያዎቹን ወደ 600 የሚጠጉ ምልምሎች ተቀበለ፤ ለምልምሎቹ ጠንከር ያለ ወታደራዊ ስልጠናና ርዕዮተ ዓለማዊ ሥልጠና እንደሚሰጣቸው ይጠበቃል፡፡

14. ተቆጣጣሪ ቡድኑ ከፍ ብለው የተጠቀሱትን መረጃዎች በመጥቀስ ምላሽ እንዲሰጥ ለግብፅ መንግስት እኤአ ሴፕቴምበር 2006 ደብዳቤ ልኮ ነበር፡፡ ከግብፅ መንግስት ቡድኑ እኤአ ኦክቶበር 2፣ 2006 የተላከው ምላሽ ቀደም ሲል በተጠቀሰው ድርጊት አንዳችም ተሳትፎ እንዳልነበረው የሚገልፅ ነበር፡፡

2. ኤርትራ

15. ከታች በተጠቀሰው ጊዜ ብቻ የኤርትራ መንግስት ቢያንስ በሃያ ስምንት የተለያዩ ጊዜያት የጦር መሳሪያዎችን፣ ጥይቶችና ፈንጂዎችን እንዲሁም ወታደራዊ ቁሳቁሶችን ለእስላማዊ ፍርድ ቤቶች ህብረት አቅርቧል፡፡ በተጨማሪም ወታደሮችን የሰጠ ሲሆን፣ ሥልጠናም እንዲሁ ሰጥቷል፡፡ ዝርዝሩም የሚከተለውን ይመስላል፡፡

የኤርትራ መንግስት ለእስላማዊ ፍርድ ቤቶች ህብረት ያደረገው ድጋፍ
16. እ.ኤ.አ ኤፕሪል 26፣ 2006 ኤኬ-47 ጠመንጃዎችን፣ ፒኬኤም አውቶማቲክ ጠመንጃዎችንና አርፒጂዎችን እንዲሁም የተለያዩ ጥይቶችና ፈንጂዎችን የጫነች ጀልባ ኤል ማአን የተባለው ወደብ አርፋለች፡፡ መሳሪያዎቹም የተላኩት ከኤርትራ መንግስት ለእስላማዊው ፍርድ ቤቶች ህብረት ነበር፡፡

17. እ.ኤ.አ ሜይ 6፣ 2006 በግምት 0500 ሠዓት አካባቢ አንድ የኤርትራ አንቶኖቭ ወታደራዊ አውሮፕላን ሶማልያ ውስጥ ዱሳማሬብ በተባለው በጋልጋዱድ ክልል ውስጥ የሚገኝ ስፍራ አርፏል፡፡ በወቅቱ የአውሮፕላኑን መምጣት የሚጠባበቁ ሰባት ያህል ሰዎች፣ አምስት የጭነት ማመላለሺያ መኪናዎችና ሁለት ላንድ ክሩዘሮች በሥፍራው ነበሩ፡፡ አውሮፕላኑ እንዲያርፍ ለማገዝም ተሽከርካሪዎቹ የፊት መብራቶቻቸውን አብርተዋል፡፡ አውሮፕላኑ ያጓጓዛቸው ፀረ አውሮፕላን መሳሪያዎች ወርደው የጭነት መኪናዎቹ ላይ ተጫኑ፤ መኪኖቹም በላንድ ክሩዘሮች እየታጀቡ በመጓዝ ሆብዬ ወደተባለ የሶማሌ ባህር ዳርቻ አካባቢ አቀኑ፡፡

18. እ.ኤ.አ ሜይ 9፣ 2006 ከማርካ በስተደቡብ ታችኛው ሸበሌ ክልል በሚገኘው ኤል አህመድ የተባለ ወደብ አንድ ጀልባ ደረሰች፡፡ ጀልባዋ የጫነችው ከፓኪስታንና ከኦሮሞ ነፃ አውጪ ( ኦነግ) የመጡ ተዋጊዎችን ነበር፡፡ ተዋጊዎቹ ከጀልባዋ አልወረዱም፡፡ ቀደም ሲል ሜይ 6 ፀረ አውሮፕላን ሊቀበሉ ከተገኙት 75 ሰዎች አምስቱ ከተረከቡት ፀረ አውሮፕላን የተወሰነውን ይዘው ጀልባዋ ላይ ተሳፈሩ፡፡ ከዚያም ጀልባዋ በስተደቡብ የራስኪያምቡኒን ዳርቻ በመያዝ ኤል አህመድ ወደተባለው ወደብ አመራች፡፡ ተቆጣጣሪ ቡድኑ ቀደም ሲል የራስኪያምቡኒ አካባቢ ለጦረኛ ፅንፈኞች የሥልጠና ድጋፍ መስጪያ ማዕክል መሆኑን ሪፖርት ማድረጉ ይታወሳል፡፡ የራስኪያምቡኒ ማዕከል ሃላፊም ታዋቂው ፅንፈኛና የሙናታሙል ጂሃድ ዋዳዋ ( የጂሃድና አህዝቦት ድርጅት) መሪ የሆነው ሼክ ሃሰን አብዱሌ ሄርሲ ‘’ ሼክ ሃሰን ቱርኪ’’ ነው፡፡

19. እ.ኤ.አ ከጁን 15፣ 2006 ጀምሮ ባለው አንድ ሳምንት ያክል ጊዜ ውስጥ አራት የኤርትራ ወታደራዊ አውሮፕላኖች ጋልጋዱድ ክልል፣ ዱሳማሬብ የተባለ ስፍራ አርፈዋል፡፡ ጭነታቸውም ውስጥ የተለያዩ የመሳሪያ ዓይነቶች፣ ኤኬ - 47 ጠመንጃዎች፣ ፒኬኤም አውቶማቲክ ጠመንጃዎች፣ አርፒጂዎችና የተለያዩ ዓይነቶች ፈንጂዎችና ወታደራዊ የመለያ ልብሶች ( ዩኒፎርሞች) ይገኙበታል፡፡

20. መሳሪያዎቹንና ወታደራዊ የመለያ ልብሶቹን የተረከበው የእስላማዊ ፍርድ ቤቶች ህብረት አባልና የሂዝቡል ሻብአብ (የወጣቶች ንቅናቄ) መሪዎች ከሆኑት አንደኛው አደን ሃሺ ፋራህ ‘’ አይሮው’’ ነው፡፡ ጭነቱም ከባድ መኪናዎች ላይ ተጭኖ በ12 ‘’ቴክኒካሎች’’ (መትረየስ የተደገነባቸው ጂፖች) ታጅቦ ወደሞቃዲሾ ተጓጉዟል፡፡ በዚያም ጭነቱ አራት ቦታ ከተለየ በኋላ ሞቃዲሾ፣ ማርካ፣ ባራዌ እና ኮንጎ (ጆውሃር አጠገብ የሚገኝ የቀድሞ የሽግግሩ መንግስት ወታደራዊ ማሰልጠኛ ካምፕና ኤርትራውያን እስላማዊውን የፍርድ ቤቶች ህብረት ለመደገፍ ወታደራዊ ሰፈር ሊያቋሙበት የሚያስቡበት ስፍራ ነው) ለሚገኙ ፅንፈኛ ተዋጊዎች ተከፋፍሏል፡፡

21. እ.ኤ.አ ጁን 19፣ 2006 ኤል አዴ ወደብ ( ሞቃዲሾ አካባቢ) አንድ ጀልባ ታየች፡፡ ጀልባዋ 23 ኤም- 72 ቀላል ፀረ - ብረት ለበስ መሳሪያዎችን፣ 1,200 ፀረ ታንክ ፈንጂዎችን፣ 4,000 ኤፍ አንድ የእጅ ቦምቦችን፣ ቁጥራቸው ያልታወቀ ቀላል መሳሪያዎችንና ጥይቶችን፣ 2,000 ዩኒፎርሞች፣ 1,500 ኮዳዎችንና መድኃኒቶችን ጭና ነበር፡፡ መሳሪያዎቹና ዕቃዎቹ የተጓጓዙት ኤርትራ ከሚገኘው አሰብ ወደብ ነው፡፡

22. እ.ኤ.አ ጁን 30፣ 2006 ሰላም የተባለች ጀልባ ምግብና መሳሪያ ጭና ከምፅዋ ወደብ በመነሳት ወደ ሶማሊያ ሄዳለች፡፡ መርከቧ 2,000 ቶን ምግብ፣ 50 ዲሽቃ፣ 50ባለ 82 ሚ.ሜ ሞርታሮች፣ 3,000 ኤ.ኬ - 47 ኤስ እና 1,000 ሳጥን ጥይቶች ጭና ነበር፡፡

23. እ.ኤ.አ ጁላይ 4፣ 2006 የኤርትራ ወታደራዊ አውሮፕላኖች ሰሜን ምስራቅ ሞቃዲሾ ወደሚገኘው ኢሳሌይ አውሮፕላን ጣቢያ አራቴ በረዋል፡፡ ከበረራዎቹ ሁለቱ ለእስላማዊ ፍርድ ቤቶች ህብረት መሳሪያ ያጓጓዙ ሲሆን፤ ቀሪዎቹ ሁለቱ በግምት 500 የሚሆኑ ከኦጋዴን ብሄራዊ ነፃ አውጪ ግምባርና ከኦነግ የተውጣጡ እንዲሁም የኤርትራ ሠራዊትን የያዙ ነበሩ፡፡

24. ወታደሮቹና ተዋጊዎቹም ኢሳሌይ የአውሮፕላን ማረፊያ እንደደረሱ ወዲያውኑ ወደ ኤልማን ወደብ ተወሰዱ፡፡በዚያም አክራሪና የህብረቱ ደጓሚ በመሆን በሚታወቀው የእስላማዊ ፍርድ ቤቶች ህብረት አቡካር ዑመር አዳኒ አስተባባሪነት በጀልባ ተጭነው ታችኛው ሸበሌ ወደምትገኘው ማርካ አካባቢ ሄዱ፡፡ በታችኛው ሸበሌ የተሰማሩበትም ምክንያት ከሞቃዲሾ በተጨማሪ ሌላ ጠቅላይ ሰፈር ለመመስረት ታስቦ ነው፡፡ ይህም አዲስ ወታደራዊ ማዕከልና ለውጭ ዜጎች (ተዋጊዎችና ወታደራዊ አሰልጣኞች) የማሰልጠኛ ካምፕ በመሆን የሚያገለግል ነው፡፡ ይህ ማዕከል የሚገኘው ለባህር ወደቡም ሆነ ኤል አህመድ ለሚገኘው አየር ማረፊያ ቅርብ የሆነ ቦታ ላይ ነው፡፡

25. እ.ኤ.አ ጁላይ 15፣ 2006 ኮሎኔል ዮሱፍ ነጋሽ ወርቄ የተባለ ኤርትራዊ መኮንን በአንዲት ቻርተርድ የሆነች አውሮፕላን ሞቃዲሾ ገብቷል፡፡ ኮሌኔሉ የሱማሊኛ ቋንቋ የሚናገር ሲሆን ከእስላማዊ ፍርድ ቤቶች ህብረት ጠቅላይ ምክር ቤት መሪዎች፣ የሥራ አስፈፃሚውን ኮሚቴ እና የማጅሊስ አል ሹራ (አማካሪ ኮሚቴ) ጨምሮ የጋር ውይይት አድርጓል፡፡ በማግስቱም ኮሎኔል ወርቄ በቶዮታ ፒካፕ በአራት ‘’ቴክኒካሎች’’ ታጅቦ ከሼክ ሃሰን ዳሂር አዌይስ ጋር ለመነጋገር ወደማሬርጉር ተጉዟል፡፡

26. እ.ኤ.አ ጁላይ 17፣ 2006 ኤምቪ ዮሐና የሚል መጠሪያ ያላት ጀልባ ከኤርትራ ወደ ሶማሊያ ምግብና መሳሪያ ጭና ተጉዛለች፡፡ ጭነቷም 3,000 ቶን ምግብ፣ 50 ዲሽቃ፣ 30 ባለ 82 ሚ.ሜ ሞርታሮች፣ 2,000 ኤ.ኬ - 47 ጠመንጃዎች እና 100 አር.ፒ.ጂ- 7 ዎች ነበር፡፡ እዚህ ላይ ሊታወቅ የሚገባው የተባበሩት መንግስታት የሶማሊያ ጉዳይ ባለሙያዎች ቡድን ባቀረበው ሪፖርት መሠረት ኤምቪ ዮሐና የተባለችው የኤርትራ መንግስት ጀልባ በሶማሊያ ላይ የተጣለውን የመሳሪያ ማዕቀብ መጣሷን ገልጿል፡፡ ይህም ድርጊት መሳሪያ መርዳትንና የኦነግ ሠራዊት አባላትን ማጓጓዝን ይጨምራል፡፡

27. እ.ኤ.አ ጁላይ 20፣ 2006 ንብረትነቱ የዳአሎ አየር መንገድ የሆነ A 310­ -300 ኤርባስ አውሮፕላን ከአሰብ ወደሶማሊያ አቅንቶአል፡፡ አውሮፕላኑ የተለያዩ መሳሪያዎችን ጭኖ ነበር፡፡ ከእነዚህም መካከል ቢ - 10 ፀረ- ታንክ መሳሪያዎች፣ ከባድ አውቶማቲክ ጠመንጃዎች፣ ፒ.ኬ.ኤም አውቶማቲክ ጠመንጃዎች ከነ ጥይት መያዣዎቻቸውና መነፅሮቻቸው፣ ኤ.ኬ - 47 ጠመንጃዎች፣ ጂ 3 ኤ 3 ጠመንጃዎች፣ ብራውኒንግ ነጥብ 30 - ካሊበር አውቶማቲክ ጠመንጃዎች፣ ባዐ 120 ሚ.ሜ ሞርታሮች፣ በጠመንጃ የሚተኮሱ ቦምቦች ይገኙባቸዋል፡፡ እ.ኤ.አ ጁላይ 21፣ 2006 ዕለት ወይም በዚያኑ አካባቢ ሁለተኛው የመሳሪያ ጭነትና በርካታ ጥይቶችን የጫነ አሁንም ንብረትነቱ የዳአሎ አየር መንገድ የሆነ ኤ 310 – 300 ኤርባስ አውሮፕላን ሶማሊያ ገብቷል፡፡


28. የዳአሎ አየር መንገድ ንብረት የሆኑት አውሮፕላኖች ያጓጓዟቸው መሳሪያዎችም በመጀመሪያ ወደ አሰብ ወደብ የደረሱት በጀልባ ተጭነው ነበር፡፡ የተቆጣጣሪው ቡድን ምንጮች ኤርትራ ለእስላማዊ ፍርድ ቤቶቹ ህብረት ለሚደረገው እርዳታ እንደ መሸጋገሪያ ድልድይ በአስተባባሪነትና ድጋፍ ሰጪነት እያገለገለች እንደሆነ በግልፅ አስቀምጠዋል፡፡ ኤርትራን ለዚህ አላማቸው እየተጠቀሙባት የሚገኙ ሃገሮች ጅቡቲ፣ ሊብያ አረብ ጀማሃሪያ፣ ግብፅና አንዳንድ የመካከለኛው ምስራቅ ሃገሮች ይገኙበታል፡፡





29. ተቆጣጣሪው ቡድን እኤአ ኦገስት 18፣ 2006 ለዳአሎ አየር መንገድና ለኤርትራ መንግስት ከላይ የተገኙትን መረጃዎች በመግለፅ ምላሻቸውን እንደሚሻ የሚገልፅ ደብዳቤ ልኮ ነበር፡፡ ሁለቱም ወገኖች ኦገስት 22፣ 2006 ምላሽ የሰጡ ሲሆን፣በምላሻቸውም ከላይ በተገለፁት ክስተቶች ተሳታፊ አልነበረንም ሲሉ ክደዋል፡፡



30. እ.ኤ.አ ጁላይ 22፣ 2006 ከሰዓት በኋላ ለእስላማዊ ፍርድ ቤቶች ህብረት መሳሪያ የጫነ አንድ የንግድ አውሮፕላን ጋልጋዱድ ክልል፣ ዱሳማሬብ ላይ አርፏል፡፡ ጭነቱም የሚከተሉትን ያካተተ ነበር፤ 50 ከትከሻ የሚተኮስ ከምድር ወደ አየር ተምዘግዛጊ ሚሳይልና ሁለተኛ ጄኔሬሽን በኢንፍራሬድ የሚመራ ፀረ -ታንክ፤ 100 አር ፒ ጂዎች 540 ኤኬ- 47 ጠመንጃዎች፣ 94 ኤፍኤኤል ጠመንጃዎች፣ 106 ፒኬኤም ጠመንጃ፣ ቁጥራቸው ያልታወቀ ዙ 23ና ዲሽቃ ፀረ - አውሮፕላን፣ ምግብ፣ ውሃና መድሃኒቶች፡፡ ዘገባዎች እንደሚያመለክቱት መሳሪያዎቹን ያጓጓዘው አውሮፕላን ከተባበሩት አረብ ኤምሬቶች ባዶውን የተነሳ ሲሆን፤ ቀጥሎ የበረረው መሳሪያዎቹን ወደጫነበት ወደ ኤርትራ ነበር፡፡



31. መሳሪያዎቹም አምስት መኪኖች ላይ ተጭነው በሰባት ‘’ቴክኒካሎች’’ ታጅበው የተዋጊዎቹ አካባቢያዊ ዋና ፅህፈት ቤት ወደሚገኝበት ወደ ጋላግዱድ ክልል ማሬርጉር ተጓጉዘዋል፡፡ ቀጥሎ ባሉት ቀናትም ሼክ ዳሂር አዌይስ ፅህፈት ቤቱን ከዱሳማሬብ በስተደቡብ ምስራቅ በግምት 40 ኪሎ ሜትር ላይ ወደምትገኘው ቡላሌይ አዛወረ፡፡



32. እ.ኤ.አ ጁላይ 24፣ 2006 የመሳሪያ ጭነትና ከፍተኛ የኤርትራ ወታደራዊ መኮንኖችን የጫነ አውሮፕላን ሞቃዲሾ ኢሳሌ አውሮፕላን ማረፊያ አርፏል፡፡ መሳሪያዎቹም ብዛታቸው ያልታወቀ ሮኬቶችና ሌሎች ፀረ ታንክ መሳሪያዎች ናቸው፡፡

33. እ.ኤ.አ ጁላይ 26፣ 2006 ሞቃዲሾ ላይ የእስላማዊ ፍርድ ቤቶች ህብረትና የሊብያ፣ የኤርትራና የግብፅ ከፍተኛ የጦር መኮንኖች ስብሰባ በእስላማዊ ፍርድ ቤቶች ህብረት የፋይናንስ ሃላፊ አብዱልቃድር አቡካር ዑመር አዳኒ መኖሪያ ቤት ውስጥ ተካሂዶ ነበር፡፡ ስብሰባውም የሚከተሉትን ውሳኔዎች አሳልፎዋል፤ ከሞቃዲሾ በስተሰሜን ባላድ ከተማ አቅራቢያ በሚገኘው ሂልወይኔ የጦር ሰፈር ለ3,800 ተዋጊዎች ወታደራዊ ስልጠና ይሰጣል፣ ግብፅና ኤርትራ አሰልጣኞችን ያቀርባሉ፣ የሊብያ መንግስትም ህንፃዎችንን ተቋማትን ለማሻሻያ እንዲሁም የስልጠና ወጪዎችንና ማበረታቻዎችን ይሸፍናል፡፡ የሊብያ፣ የኤርትራና የግብፅ የጦር መኮንኖች ከሼክ ዮሱፍ ኢንዶሃዴ አደን ሃሺ ‘’ አይሮው’’፣ አብዱላሂ አሊ ኑር እና ሙክታር ሮቦው ‘’አቡመንሱር’’ ጋር በመተባበር ከስብሰባው ቀጥሎ ባለው ቀን የስልጠናው ቦታ ያለበትን ሁኔታና የሚያስፈልጉትን ነገሮች ለመገምገም ተስማምተው ነበር፡፡

34. እ.ኤ.አ ኦገስት 23፣ 2006 እስላማዊ ወታደራዊ ሃይሎች ሂልወይኔ አካባቢ የሚገኘውን ወታደራዊ ማሰልጠኛ ከፍተው ጠለቅ ያለ ወታደራዊና ርዕዮተ አለማዊ ስልጠና ለመከታተል የተዘጋጁ የመጀመሪያዎቹን 600 ምልምሎች ተቀበሉ፡፡ ሼክ ሃሰን ዳሂር አዌይስ አዲሶቹን ምልምሎች በተመለከተ አስተያየቱን ሲሰጥ ከሌሎች ዓላማዎች በተጨማሪ ሶማልያን ከውስጥና ከውጪ ባዕድ ወረራ ለመከላከል ይሰለጥናሉ ብሏል፡፡

35. እ.ኤ.አ ጁላይ 26፣ 2006 ከሳዑዲ አረቢያ ምግብ ጭኖ የተነሳ ጀልባ ኤርትራ ጎራ በማለት መሳሪያዎችን ከጫነ በኋላ ወደ ሶማሊያ አምርቷል፡፡ በውስጡም አህምድ አቡ ማስሪ በመባል የሚታወቀውና የሙስሊም ወንድማማቾች አባል የሆነ ግብፃዊ ጡረተኛ ከፍተኛ የጦር መኮንን ነበር፡፡ ግብፃዊው የጀልባዋ ነጂ ለመምሰል ይሞክር ነበር፡፡ አብሮትም ኦማር ኢሳቅ በሚባል ስያሜ የሚጠቀም የምግብና የመሳሪያዎቹን ግዢ ያስተባበረ ሶማሊያዊ ነጋዴ ነበር፡፡ ጀልባዋ ከኤልማኣን በግምት 40 ኪሎ ሜትር ላይ በምትገኘው ራጌ ኤሌ ላይ አረፈች፡፡ የምግቡና የመሳሪያው ጭነትም በተጠንቀቅ ይጠባበቁ ወደነበሩት የጭነት መኪናዎች ተጋብተውና እንዳይታወቁ በጥንቃቄ ተሸፍነው ተዘጋጁ፡፡ ኮንቮዮና ግብፃዊውም የሼክ ሃሰን ዳሂር አዌይስ ጠንካራ ይዞታ ወደሆነችው ጋልጋዱድ ክልል አመሩ፡፡

36. ጀልባዋ 88 ሜትሪክ ቶን የመጫን አቅም ያላት ስትሆን፣ በላዩዋ ላይም XL8.5x10 የሚል ምልክት ተፅፎበታል፡፡ 3,600 ፀረ - ታንክ ፈን뻢ዎችን፣ 500 የእጅ ቦምቦችን ጭና ነበር፡፡ ተቆጣጣሪው ቡድን እኤአ ኦገስት 18፣ 2006 ለሳዑዲ አረቢያ መንግስት ከላይ የተመለከተውን መረጃ በመጥቀስ ምላሹን ለማወቅ ደብዳቤ ላከ፡፡ ሆኖም ይህ ሪፖርት ተጠናቅሮ እስከተሰጠበት ጊዜ ድረስ ያገኘው መልስ አልነበረም፡፡

37. እ.ኤ.አ ኦገስት 26፣ 2006 የተሟላ ትጥቅ ያላቸው 2,000 መደበኛ ወታደሮች በሶስት ጀልባዎች ከኤርትራ ተጉዘው ሰሜን ሞቃዲሾ ወደምትገኘው ዋርሼክ ጠረፍ ደርሰዋል፡፡ ከዚያም ወታደሮቹ ወደ ሰሜን ሞቃዲሾ ከተወሰዱ በኋላ የእስላማዊ ፍርድ ቤቶች ህብረት ወደሚቆጣጠራቸው የተለያዩ ስፍራዎች ተመድበዋል፡፡ ምደባቸውም እንደሚከተለው ነበር፤ 500 የሚሆኑት ኤርትራውያን ወታደሮች ባሌዶግሌ፣ 500 ሂልዌይኔ የማሰልጠኛ ካምፕ፣ 500 ታችኛው ሸበሌ ሲመደቡ፣ የተቀሩት 500 ደግሞ ሞቃዲሾ ውስጥ በቪላ ባይዶዋና የቀድሞው የፖሊስ አካዳሚ (ቦሊሲያ) ተመደቡ፡፡

38. እ.ኤ.አ ኦገስት፣ 2006 መጨረሻ በግምት 0645 ሰዓት ላይ አንድ መሳሪያ የጫነ ግዙፍ ወታደራዊ የመጓጓዣ አውሮፕላን ከኤርትራ ተነስቶ ሞቃዲሾ አለማቀፍ አውሮፕላን ማረፊያ አረፈ፡፡ ጭነቱም ቀጥለው ከተዘረዘሩት አንዱን ወይም ብዙዎቹን ያካተተ ነበር፡፡ ኤም- 46 130 ሚ.ሜ መትረየስ፣ ዲ - 30 122 መድፍ፣ ኤም - 30 ባለ 1202 ሚ.ሜ መድፍ፣ ዲ- 30 ባለ 152 ሚ.ሜ፣ ዙ 57- 2 ባለ 57 ሚ.ሜ፣ ዙ - 23- 2 ሺልካ -4 ባለ 23 ሚ.ሜ쇡 ዙ - 23- 4፤ የተለያዩ መጠን ያላቸው ሞርታሮች፣ ኤስ.ኤ - 6 ‘’ጌይንፋል’’ የተባሉ ከትንሽ እስከ መካከለኛ ርቀት ከየብስ ወደ አየር የሚወነጨፍ ሚሳይሎች፣ ፒዜድአርኬ ስትሬላ 2 ኤም ከየብስ ወደ አየር የሚወነጨፉ ሚሳይሎችና አር .ፒ. ጂ- 7፡፡

ኤርትራ ለኦጋዴን ብሄራዊ ነፃ አውጪ ግንባር (ኦብነግ) በእስላማዊ ፍርድ ቤቶች ህብረት በኩል ያደረገችው ድጋፍ


39. እ.ኤ.አ ጁላይ 8፣ 2006 በግመሎችና በአህዮች የተጫኑ የተለያዩ መሳሪያዎች በ70 የእስላማዊ ፍርድ ቤቶች ህብረትና 160 የኦብነግ ተዋጊዎች ታጅበው ከሶማሊያ የጋልጋዱድ ክልል በአቡድዋቅ አውራጃ በኩል ወደኢትዮጵያ ገብተዋል፡፡ መሳሪያዎቹም የሚከተሉት ናቸው፡፡ 6 ሳጥን ፈንጂዎች፣ ከትከሻ የሚተኮሱ 6 ፀረ - ታንኮች፣ 22 ፒ.ኬ.ኤም አውቶማቲክ ጠመንጃዎች፣ 120 ኤኬ - 47 ጠመንጃዎች፣ 40 ኤፍ.ኤ.ኤል ጠመንጃዎችና ስድስት ሳጥን የእጅ ቦምቦች ይገኙባቸዋል፡፡


ኤርትራ ውስጥ ለእስላማዊ ፍርድ ቤቶች ህብረት ሚሊሺያ አባሎች የተሰጠ ስልጠና

40. እ.ኤ.አ ጁላይ 27፣ 2006 ከ500 የሚበልጡ የእስላማዊ ፍርድ ቤቶች ህብረት አባላት ተዋጊዎች ከሞቃዲሾ የኤሳሌይ የአውሮፕላን ጣቢያ ተነስተው ወደ ኤርትራ በርረዋል፡፡ የተላኩትም በኤርትራ ቀደም ሲል ተልከው ስለነበሩት አዳዲስ ዓይነት ሮኬቶችና ከየብስ ወደ አየር የሚወነጨፉ ሚሳይሎች ስልጠና እንዲወስዱ ነው፡፡


ከእነዚህ በግምት 500 ከሚሆኑት ተዋጊዎች መካከል 200 የሚሆኑት በተጨማሪ በኤርትራ ውስጥ በሽምቅ ውጊያ የሚሰለጥኑ ነበሩ፡፡ ቀሪዎቹ ( 100) የሚሆኑት ወደ ሊብያ አረብ ጀማህሪያ እና (200) ደግሞ ወደ ሶሪያ አረብ ሪፐብሊክ ተልከዋል፡፡



41. እ.ኤ.አ ኦገስት 8፣ 2006 ደግሞ 300 ተጨማሪ የእስላማዊ ፍርድ ቤቶች ህብረት ተዋጊዎች ከባሌዶማሌ አውሮፕላን ማረፊያና ታችኛው ሸበሌ ክልል በመነሳት ወደ ኤርትራ በረዋል፡፡ የጉዟቸውም ዓላማ ኤርትራ በቅርቡ ለእስላማዊ ፍርድ ቤቶች ህብረት ስለላከቻቸው ሮኬቶችና ከየብስ ወደ አየር የሚወነጨፉ ሚሳይሎች ስልጠና እንዲወስዱ ለማድረግ ነበር፡፡ በዚሁ ቀን ቀደም ብሎ ይኼው ተዋጊዎቹን ያጓጓዘው አውሮፕላን ኤ.ኬ - 47 ጠመንጃዎችንና ፒ.ኬ.ኤም አውቶማቲክ ጠመንጃዎችን ባሌዶማሌ አውሮፕላን ጣቢያ አራግፏል፡፡



42. ተቆጣጣሪው ቡድን እኤአ ሴፕቴምበር 18፣ 2006 ለኤርትራ መንግስት ከላይ የተመለከተውን መረጃ በመዘርዘር እንዲያውቀውና ምላሹንም እንዲሰጥ በደብዳቤ ጠይቆታል፡፡ ሆኖም ይህ ሪፖርት ተጠናቅሮ ገቢ እስከተደረገበት ጊዜ ድረስ የተሰጠው ምላሽ አልነበረም፡፡

አስመራ የሚገኘው የኤሪኮ ኢንተርፕራይዝ ጉዳይ

43. እ.ኤ.አ ጁላይ 26፣ 2006 በ0745 ሠዓት ላይ ኢሊዩሺን 76 (IL- 76) የተባለ አውሮፕላን ለእስላማዊ ፍርድ ቤቶች ህብረት መሳሪያ ጭኖ ሞቃዶሾ አለማቀፍ አውሮፕላን ጣቢያ አረፈ፡፡

በአውሮፕላኑ ውስጥ 10 ከፍተኛ የኤርትራ ወታደራዊ መኮንኖች ነበሩ፡፡ መኮንኖቹ ያረፉት ረመዳን ሆቴል ሲሆን፣ የሆቴሉ ባለቤት አቡካር ዑመር አዳኒ የእስላማዊ ፍርድ ቤቶች ህብረት የፋይናንስ ( የገንዘብ) ምንጭ ነው፡፡

44. IL- 76 የተባለው አውሮፕላን ከአሰብ ሲነሳ መድረሻው ሃርጌሳ (ሶማሊላንድ) መሆኑን ቢያመላክትም ያመራው ግን ወደ ሞቃዲሾ ነበር፡፡ የአውሮፕላኑን ዓይነት ያስተዋወቀውም LFT – 1221 በሚል ሲሆን፣ ከጭራው ላይ የካዛክስታን ባንዲራ የተሳለበትና ቁጥሩ ተመድ በማለት የሚጀምር ነበር፡፡

45. አውሮፕላኑ ከማረፉ በፊት ወደ አውሮፕላን ማረፊያው የሚወስዱ መንገዶች በሙሉ ተዘግተው ነበር፡፡ የአካባቢውን ጥበቃና መሳሪያ የማውረዱን ተግባር ያስተባበረው የሂዝቡል ሸባብ መሪ የሆነው ሼክ ሙክታር ሮቦው ‘’አቡ መንሱር’’ ነው፡፡ መሳሪያው ሰባት የተሸፈኑ የጭነት መኪናዎች ላይ ሲጫን አንድ ሌላ የነዳጅ በርሜሎችን የጫነ መኪና ሳይሸፈን አብሮ ተቀላቅሎ ይታይ ነበር፡፡ መኪኖቹ ላይ የተጫኑት የተለያዩ የመሳሪያ ዓይነቶች የእጅ ቦምቦች፣ ፈንጂዎች፣ የመሳሪያ መለዋወጫዎች፣ ፒ.ኬ አውቶማቲክ ጠመንጃዎች፣ ኤል.ኤ. ደብሊዎች፣ ከየብስ ወደ አየር የሚወነጨፍ ሚሳይሎች፣ በርካታ ሮኬቶችን የሚተፉ ላውንቸሮች፣ ፀረ- አውሮፕላን፣ ፀረ - ታንክና ከባድ መሳሪያዎች ይገኙባቸዋል፡፡ በተጨማሪም አውሮፕላኑ ውስጥ ወታደራዊ ዩኒፎርሞችና መድኃኒቶች ነበሩ፡፡

46. እ.ኤ.አ ጁላይ 28፣ 2006 ሁለት IL- 76 የጭነት አውሮፕላኖች ሞቃዲሾ አለማቀፍ አውሮፕላን ጣቢያ አርፈዋል፡፡ የመጀመሪያው ያረፈው በ0700 ሠዓት ነበር፡፡ ሁለቱም አውሮፕላኖች ለእስላማዊ ፍርድ ቤቶች ህብረት የተላከ መሳሪያ ጭነዋል፡፡ አሁንም አውሮፕላኖቹ ከማረፋቸው አስቀድሞ አውሮፕላን ማረፊያው ለትራፊክ ዝግ እንዲሆን ተደረገ፡፡ በአውሮፕላኖቹ የተጓጓዙትም የሚከተሉት ናቸው፡፡ ፀረ- ታንክ መሳሪያዎች፣ ዜድ.ፒ - 39፣ ፀረ አውሮፕላን መሳሪያዎች ከነ መቀመጫቸው፣ 80 ተለዋጭ አፈሙዞችና የዜድ ፒ - 39 ጥይቶች፣ ዲሽቃ ከባድ የአውቶማቲክ መሳሪያዎችና ጥይቶችን የያዙ ሳጥኖች፣ ፒ.ኬ ኤሞችና ጥይቶችን የያዙ ሳጥኖች፣ ኤ.ኬ - 47 ቶችና በሳጥኖች የተሞሉ ጥይቶች፣ ለኤ.ኬ - 47 የሚሆኑ የቦምብ ላውንቸሮች እንዲሁም ፈንጂዎች፣ ኤፍ.ኤ.ኤል ጠመንጃዎችና በሳጥን የተሞሉ ጥይቶች፣ ለኤፍ ኤ.ኤል ጠመንጃዎች የሚያገለግሉ የቦምብ ላውንቸሮች፣ ኤስ.ኤ.አር - 80 ጠመንጃዎች፣ ፀረ- ሰው ፈንጂዎች፣ ቢ- 10 ፀረ ታንክ መሳሪያዎች በሳጥን ከተሞሉ ጥይቶቻቸው ጋር፣ 60 ሚ.ሜ ሞርታሮችና በሳጥን የተሞሉ ጥይቶች፡፡

47. መሳሪያዎቹ በጭነት መኪናዎች ከተጫኑ በኋላም በ25 ‘’ ቴክኒካሎች’’ ታጅበው ሞቃዲሾ ውስጥ በሚገኙ ሶሰት የመሳሪያ መጋዘኖች እንዲቀመጡ ተደርጓል፡፡ የመሳሪያ ግምጃ ቤቶቹም የሚገኙት በቪላ ባይዶዋ፣ ቪላ ሶማሊያና በቀድሞው የፖሊስ አካዳሚ ነው፡፡ አብዛኞቹ መሳሪያዎች የተቀመጡት በቪላ ሶማሊያና በቀድሞው የፖሊስ አካዳሚ (ቦሊሲያ) ነው፡፡

48. ከዚያም በመቀጠል መሳሪያዎቹ እኤአ ጁላይ 26 እና28 በሞቃዲሾ፣ ጆውሃርና ቡር ሃካባና ጉሪየል ለሚገኙ የእስላማዊ ፍርድ ቤቶች ህብረት ሚሊሽያዎች ተከፋፍለዋል፡፡

49- እኤአ ኦገስት 7፣ 2006 አንድ በኤሪኮ ኢንተርፕራይዝ የሚንቀሳቀስ አሊዮሺን 76 አውሮፕላን ከአሰብ ተነስቶ ወደ ሞቃዲሾ አለማቀፍ አውሮፕላን ማረፊያ አምርቷል፡፡ የተጠቀመውም ኤል.ኤፍ.ቲ - 3756 በሚል ስም ነው፡፡

50. ተቆጣጣሪው ቡድን እኤአ ኦገስት 9፣ 2006 ለኤርትራ መንግስት፤ ሴፕቴምበር 1፣ 2006 ደግሞ ለካዛክስታን መንግስት ጉዳዩን አስመልክቶ ደብዳቤ ፅፎ ነበር፡፡ ተቆጣጣሪው ቡድን በተጨማሪም እኤአ ሲፕቴምበር 19፣ 2006 ደቡብ አፍሪካ ለሚገኘው የኤሮፍሎት ኩባንያና ለደቡብ አፍሪካ መንግስት ከፍ ሲል ስለተጠቀሰው ጉዳይ ምላሽ እንዲሰጡ በደብዳቤ ጠይቆ ነበር፡፡ ይሁን እንጂ ይህ ሪፖርት ተጠናቅሮ ገቢ እስከተደረገበት ጊዜ ድረስ ከደቡብ አፍሪካ መንግስት የተገኘ ምላሽ የለም፡፡

51. የኤርትራ መንግስት እ.ኤ.አ ኦገስት 9፣ 2006 ለተፃፈለት ደብዳቤ ምላሽ አልሰጠም፡፡ እኤአ ሴፕቴምበር 6፣ 2006 ለተፃፈለት ግን መልስ ሰጥቷል፡፡ ምላሹም የሚከተለው ነው፤ ‘’ የኤርትራ መንግስት ስለተጠቀሰው አውሮፕላን መምጣትም ሆነ መሄድ አንዳችም መረጃ የለውም፡፡ (ይልቁንም) የተባበሩት መንግስታት የኤርትራ መንግስት የፀጥታው ምክር ቤትን ውሳኔ 733 (1992) እየጣሰ ነው በማለት በተደጋጋሚ የሚያሰራጨው የተሳሳተ መረጃ በጣም ያሳስበዋል፡፡’’ የኤርትራ መንግስት በዚሁ ደብዳቤው የተቆጣጣሪ ቡድኑ መረጃ ‘’ ሙሉ በሙሉ የተሳሳተና ተአማኒነት የሌለው ነው‘’ ብሏል፡፡

52. ይሁንና ከዚያ በኋላ ለተቆጣጣሪ ቡድኑ የሚከተሉት መረጃዎች ደረሱት፡፡

ሀ/ የዓለም አቀፉ ሲቪል አቭዮሽን ድርጅት (አይ .ሲ.ኤ.ኦ) እና የጎረቤት ሃገር የአየር ትራፊክ መቆጣጠሪያ ባለስልጣን በረራዎች መካሄዳቸውን አረጋገጡ፡፡

ለ/ እኤአ ሴፕቴምበር 19፣ 2006 የካዛክስታን መንግስት የ IL- 76 በረራን በተመለከተ በሰጠው ምላሽ አውፕሮላኑ የኤሮፍሎት ንብረት መሆኑን ገለፀ፡፡

ሐ/ እ.ኤ.አ ሴፕቴምበር 29፣ 2006 ላይ ደግሞ ኤሮፍሎት በበኩሉ ተጠቃሹ IL- 76 አውሮፕላን ቀደም ሲል ኤሪኮ ለሚባለው የኤርትራ ኩባንያ መሸጡን ገለፀ፡፡ በዚህም መሰረት የተቆጣጣሪ ቡድኑ ሊቀመንበር እኤአ በኦክቶበር 2006 የመጀመሪያዎቹ ሳምንታት ከኤሪኮ ጋር ግንኙነት ለመመስረት ተደጋጋሚ ሙከራ አደረገ፡፡ ሆኖም ከኤሪኮን ማግኘት አልተቻለም፡፡

53. የተቆጣጣሪ ቡድኑ ሊቀመንበር ተጨማሪ መረጃዎችንና ማብራሪዎችን በመሻት እኤአ ኦክቶበር 3፣ 2006 ቀደም ሲል መረጃ ለሰጠው የኤሮፍሎት ተወካይ ስልክ በመደወል ተጨማሪ መረጃ እንደሚፈልግ ገለፀለት፡፡ ተጠቃሹ አውሮፕላን የኤሪኮ መሆኑን የሚገልፅ የሠነድ ማስረጃ እንደሚሰጥ ገልፆ ነበር፡፡ ሆኖም ግን ይህ ሪፖርት ገቢ እስከተደረገበት ጊዜ ድረስ ያገኘው ሠነድ የለም፡፡

የዩሮ አቪዩኒክ አየር ትራንስፖርት ሊሚትድ ቢ-707 አውሮፕላን ጉዳይ

54. ተቆጣጣሪው ቡድን እኤአ ኦክቶበር 8 እና 10 2006 ቢ - 707 አውሮፕላን ከምፅዋ ተነስቶ ወደ ሞቃዲሾ አለማቀፍ አውሮፕላን ጣቢያ ሁለት ጊዜ ስለመብረሩ መረጃ አግኝቷል፡፡ አውሮፕላኑ 5X- EOT የሚል የዩጋንዳ ቁጥር የተፃፈበት ሲሆን፣ ራሱን ያስተዋወቀው የስካይ ጄት አቪየሽን ሊሚትድ ‘’ኤም ኤች ዩ’’ በሚል ነው፡፡ ይህም ቀድሞ ንብረትነቱ የሜምፊስ አየር መንገድ ነበር፡፡ አውሮፕላኑ በመጀመሪያው ቀን ያጓጓዘው ጀኔሬተሮች፣ መድኃኒቶች፣ 2,500 ለአንድ ሰው የሚሆኑ ድንኳኖች እና 30 ትልልቅ ድንኳኖች፣400 መኪኖች ላይ የሚገጠሙ የቴሌኮሙኒኬሽን መሳሪያዎች፣ 1,500 በእጅ የሚያዙ የመገናኛ መሳሪያዎችና 10 የታሸጉ ኮንቴይነቶችን ነበር፡፡ የጭነቱ ተቀባዮች ራስኪአምቦኒ፣ ጉሪየል፣ ሞቃዶሾና ኪስማዩ የሰፈሩ የእስላማዊ ፍርድ ቤቶች ህብረት ወታደራዊ ሃይሎች ነበሩ፡፡ እኤአ ኦክቶበር 10 የተጓጓዘውም መጠኑ ያልታወቀ መሳሪያና የእስላማዊ ፍርድ ቤቶች ህብረት ወታደራዊ ሃይል ተወካዮች ነበሩ፡፡ ተወካዮቹ ለህብረቱ ድጋፍ የሚሰጥ አገር ሰልጥነው ወደ ሶማልያ እየተመለሱ ነበር፡፡

55. ስካይ ጄት አቪዬሽን ሊሚትድ ኩባንያ የሚገኘው ካምፓላ ዑጋንዳ ነው፡፡ የተቆጣጣሪ ቡድኑ ሊቀመንበር ከኩባንያው በስልክ ያገኙት መረጃም የሚከተለውን ይመስላል፡፡ ቀደም ሲል የተጠቀሰው ቢ - 707 አውሮፕላን እኤአ ጁላይ 5፣ 2006 በህገ ወጥ መንገድ ከግብፅ እንዲወጣ ተደርጎ ነው፡፡ እ.ኤ.አ ኦክቶበር 8 እና 10 ባህሬይን በሚገኘው ዩሮ አቪዮኒክ አየር አገልግሎት ንብረትነት ከምፅዋ ወደሞቃዲሾ በረራዎች ያደረገውም ኩባንያው የአውሮፕላኑን ቁጥርም ሆነ የበረራ ሰርቲፊኬት ፈቃድ እንዲሁም ስም ያለ ስካይ ጄት አቪዬሽን ፈቃድ ነው፡፡ አውሮፕላኑ የጦር መሳሪያ ለማጓጓዝ መዋሉን እንዳወቀም ኩባንያው ለግብፅ፣ ለኤርትራ፣ ለኢትዮጵያ፣ ለየመንና ለዩናይትድ አረብ ኤምሬት ባለሥልጣኖች ደብዳቤ ልኳል፡፡

3. ሊብያ አረብ ጃማሂሪያ

102. የሊብያ አረብ ጃማሂሪያ መንግስት ወደ ሶማሊያ ወታደራዊ አውሮፕላንን ልኳል፤ ስልጠና፣ የገንዘብ ድጋፍና ቢያንስ አንድ ዙር የመሳሪያ ጭነትም ለእስላማዊ ፍርድ ቤቶች ህብረት አቅርቧል፡፡

103. ተቆጣጣሪው ቡድንም IL -­ 76 የበረራ ምልክቱ የሊብያ ዓረብ አየር ሃይል (LAAF) 930 የሚል እና በሊብያ መንግስት የሚንቀሳቀስ አውሮፕላን እኤአ ኤፕሪል 20፣ 2004 ሞቃዲሾ ለማረፉ መረጃ አግኝቷል፡፡ በተጨማሪም እኤአ ሴፕቴምበር 6፣ 2005 ሌላ በሊብያ መንግስት የሚንቀሳቀስ አውሮፕላን በባሌዶግሌ አውሮፕላን ማረፊያ አርፎ እንደነበር መረጃ አግኝቷል፡፡

104. ተቆጣጣሪው ቡድን እኤአ ጁን 12፣2006 ለሊብያ አረብ ጃማሂሪያ መንግስት ከላይ የተገኙትን መረጃዎች የሚገልፅና ምላሽ የሚጠይቅ ደብዳቤ ልኮ ነበር፡፡ የሊብያ አረብ ጃማሂሪያ መንግስትም እኤአ ኦገስት 8፣ 2006 በተፃፈ ደብዳቤ ‘’ሁለቱ የሊብያ አውሮፕላኖች ባብዛኛው ለአየር ጭነት አገልግሎት የሚውሉ የአየር ሃይል አውሮፕላኖች ናቸው፡፡ ወደ ሶማልያም ሁለት በረራ አድርገዋል፡፡ አንዱ እኤአ ኤፕሪል 20፣ 2004 ሲሆን፣ ሌላው ደግሞ ሴፕቴምበር 14፣ 2004 የተደረጉ ነበሩ፡፡ የሁለቱ በረራዎች አላማም ወደ ሃገሪቱ የገቡ ህገ ወጥ ስደተኞችን ወዳገራቸው መመለስ ነበር ብሏል፡፡

105. ሆኖም ተቆጣጣሪው ቡድን ከሊብያ አረብ ጀማሂሪያ መንግስት የአየር ጭነት መግለጫ፣ የጉዞ መስመር የበረራ ቡድን አባላትን ስም ዝርዝር የሚገልፁ ሰነዶችን ቢጠይቅም አለማግኘቱን ለመግለፅ ይፈልጋል፡፡

106. እ.ኤ.አ ጁላይ 24፣ 2006 የሊብያ የጦር መኮንኖች ቡድን ባሌዶግሌ አውሮፕላን ማረፍያ ከደረሰ በኋላ ጁላይ 26፣ 2006 ሞቃዲሾ ላይ በእስላማዊ ፍርድ ቤቶች ህብረት የፋይናንስ ሃላፊ መኖሪያ ቤት ውስጥ በተካሄደ ስብሰባ ከእስላማዊ ፍርድ ቤቶች ህብረትና በጉብኝት ላይ ከነበሩ የኤርትራና የግብፅ ከፍተኛ የጦር መኮንኖች ጋር ስብሰባ አካሂዷል፡፡ ስብሰባውም የሚከተሉትን ውሳኔዎች አሳልፎዋል፡፡ ከሞቃዲሾ በስተሰሜን ባላድ ከተማ አቅራቢያ በሚገኘው ሂልወይኔ የጦር ሰፈር ለ3,800 ተዋጊዎች ወታደራዊ ስልጠና ይሰጣል፣ ግብፅና ኤርትራ አሰልጣኞችን ያቀርባሉ፣ የሊብያ መንግስትም ህንፃና ተቋማት ማሻሻያዎችን፣ የስልጠና ወጪዎችንና ማበረታቻዎችን ይሽፍናል፤ የሊብያ፣ የኤርትራና የግብፅ የጦር መኮንኖችም ከሼክ ሱፍ ኢንዶሃዴ፣ አደን ሃሺ ‘’አይሮው’’፣ አብዱላሂ አሊ ኑር እና ሙክታር ሮቦው ‘’አቡ መንሱር’’ ጋር በመተባበር ከስብሰባው ቀጥሎ ባለው ቀን የስልጠናው ቦታ ያለበትን ሁኔታና የሚያስፈልጉትን ነገሮችን ለመገምገም ተስማምተው ነበር፡፡

107.ከዚያም የሊብያ አረብ ጃማሂሪያ መንግስት የወደፊቱን ስልጠና ለመደራጀትና የስልጣን ደረጃን ባማከለ መልኩ ከ75 ዶላር እስከ 450 ዶላር ደሞዝ ለመክፈል እንዲቻል 1 ሚሊዮን ዶላር አበርክቶአል፡፡

108.እ.ኤ.አ ኦገስት 23፣ 2006 የእስላማዊ ፍርድ ቤቶች ህብረት ሂልወይኔ የሚገኘውን ወታደራዊ ማሰልጠኛ ካምፕ ከፍቶ ጠለቅ ያለ ወታደራዊና ርዕዮተ አለማዊ ስልጠና ለመከታተል የተዘጋጁ የመጀመሪያዎቹን 600 ምልምሎች ተቀበለ፡፡

109.እ.ኤ.አ ጁላይ 31፣ 2006 አንዲት የሊብያ አረብ ጃማሂሪያ መርከብ ለእስላማዊው ፍርድ ቤቶች ህብረት የሚሆን የጦር መሳሪያና ምግብ ጭና በጠዋቱ ሞቃዲሾ አካባቢ በሚገኘው ኤልማኣን ወደብ መልህቋን ጣለች፡፡ የመርከቧን ጭነትም ከእስላማዊው ፍርድ ቤቶች ህብረት ጠቅላይ ምክር ቤት የደህንነት ባለሥልጣናት አባላት መካከል አብዱላሂ ሚአሊን ጋአብ ‘’አቡ - ኡቴይባ’’፣ አደን ሃሺ ፋራህ ‘’አይሮው ‘’፣ ሼክ ሃሰን ሙክታር ሮቦው ‘’አቡ መንሱር ‘’ እና የራስኪምቦኒ ቡድን ተረክበዋል፡፡ የጭነቱ ዝርዝርም እንደሚከተለው ነው፡፡ 12 ዲሽቃ ከባድ መሳሪያ፣ 24 አር ፒጂ፣ 70 ፒኬኤም፣ 350 ለኤኬ 47 ላውንቸር መተኮሻነት የሚውሉ ማስወንጨፊያዎች፣ ያልታወቀ መጠን ያለው ኤኬ 47፣ ፒኬኤም፣ እና አርፒጂ - 2 እንዲሁም አርፒጂ - 7፣ 2,000 የመኪና ጎማዎች፣ 80 ጄኔሬተሮች፣ የምግብ ዘይት፣ ስኳር፣የስንዴ ዱቄትና ተምር ናቸው፡፡

110.ተቆጣጣሪው ቡድን እኤአ ኦገስት 9፣ 2006 በሊብያ አረብ ጃማሂሪያ መንግስት ከላይ የተገኙትን መረጃዎች የሚገልፅና ምላሽ የሚጠይቅ ደብዳቤ ልኮ ነበር፡፡ ነገር ግን ተቆጣጣሪው ቡድን ይህን ሪፖርት እስካቀረበበት ድረስ ምንም አይነት ምላሽ አላገኘም፡፡

111.እኤአ ጁላይ 27፣ 2006 የእስላማዊው ፍርድ ቤቶች ህብረት ተዋጊዎች የንዑስ ቡድን ታክቲክ እና ልዩ የጦር መሳሪያዎች ላይ ያተኮረ ላቅ ያለ ስልጠና ለመውሰድ በአውሮፕላን ተጭነው ወደ ሊብያ አረብ ጃማሂሪያ ተጉዘዋል፡፡

112.ተቆጣጣሪው ቡድንም እኤአ ሴፕቴምበር 19፣ 2006 ከላይ የተገኙትን መረጃዎች የሚገልፅና ምላሽ የሚጠይቅ ደብዳቤ ለሊቢያ አረብ ጃማሂሪያ መንግስት ልኮ ነበር፡፡ ነገር ግን ተቆጣጣሪው ቡድን ይህን ሪፖርት እስካቀረበበት ወቅት ድረስ ምንም አይነት ምላሽ አላገኘም፡፡
Post a Comment

Blog Archive

የአቡነ ጳውሎስ "ሐውልተ ስምዕ"

ነጻ ፓትርያርክ ምርጫ ቢሆን ኖሮ ማንን ይመርጡ ነበር? እንበልና ሁሉም ነገር ሥርዓቱን ጠብቆ የተከናወነ የእጩዎች ምርጫ ቢሆን ኖሮ፣ አሁን የምናነሣቸው ጉድለቶች ባይኖሩ ኖሮ፣ 6ኛው ፓትርያርክ እንዲሆን የምትመርጡት ማንን ነበር? (ማሳሰቢያ፦ አሁን ያለው ክፍፍል እና የመንግሥት ተጽዕኖ ባይኖር ኖሮ ተብሎ የሚመለስ ጥያቄ ነው። የምን “ባይኖር ኖሮ ነው” የሚል አስተያየት ካለዎትም እናከብራለን።)